បន្ទាប់មានលេចឮព័ត៌មានថា តារាចម្រៀងស្រី Katy Perry កំពុងសាងស្នេហ៍លួចលាក់ជាមួយអតីតសង្សារនាងគឺលោក Orlando Bloomនោះ ថ្មីនេះៗ នាងបានចេញមុខបកស្រាយតាមរយៈការសម្ភាសជាមួយសារព័ត៌មាន Eonline។
គួររំឭកផងដែរថា លោក Orlando Bloom បានចែកផ្លូវគ្នាជាមួយតារាចម្រៀងស្រី Katy Perry កាលពីខែមីនាកន្លងទៅ ក៏ប៉ុន្ដែនៅពេលថ្មីនេះៗ អ្នកទាំងពីរត្រូវបានអ្នកសារព័ត៌មានប្រទះឃើញបណ្ដើរគ្នាទៅចូលរួមការប្រគំតន្ត្រីរបស់ Ed Sheeran ជាមួយគ្នា និងថែមទាំងស្និទ្ធស្នាលគ្នាខ្លាំងទៀតផង។ តើមានរឿងអ្វីកើតឡើងទៅ?
ជាមួយបទសម្ភាសនេះ តារាស្រីរូបនេះបានពោលថា “ពិតមែនហើយ អ្នកក៏បានដឹងដែរ នាងខ្ញុំគិតថា មានមនុស្សជាច្រើនដែលបានដើរចូលមកក្នុងជីវិតរបស់អ្នក តែក៏ជារឿងល្អមួយដែរ ព្រោះយើងបានរក្សាទុកនូវមនុស្សដែលស្រឡាញ់យើងនៅក្បែរខ្លួន”។
គួរបញ្ជាក់ផងដែរថា នៅក្នុងបទសម្ភាសនោះ Katy Perry បានផ្ដល់នូវតម្រុយថ្មីមួយដែលបង្ហាញថា នាងកំពុងមានស្នេហាជាមួយមនុស្សដែលមានឈ្មោះចាប់ផ្តើមដោយអក្សរ L ដូច្នេះប្រហែលជាមិនមែន Orlando Bloom ទេ។ នាងបានបន្ដទៀតថា “នៅពេលអ្នកចាស់ទៅ គ្រប់យ៉ាងចាប់ផ្ដើមធ្វើឱ្យវិលមុខ និងមានអារម្មណ៍ថា ការងាររវល់ច្រើន ខណៈដែលកំពុងមានការប្រគំតន្ត្រីទេសចរណ៍នៅក្នុងឆ្នាំនេះទៀតផង”៕
