សារព័ត៌មាន Yahoo បានចេញផ្សាយថា តារាសម្ដែងស្រីដែលកំពុងតែល្បីនៅក្នុងពិភពភាពយន្តហូលីវូដ នាង Jennifer Lawrence បានរួចជីវិត ពីគ្រោះថ្នាក់យន្ដហោះផ្ទាល់ខ្លួនរបស់នាងដែលមានបញ្ហាគ្រឿងម៉ាស៊ីន ហើយត្រូវបង្ខំចុះចតភ្លាមៗនៅក្នុងព្រលានយន្ដហោះ នៅតំបន់ Buffalo ទីក្រុងញូវយ៉ក សហរដ្ឋអាមេរិក ។
ប្រភពស្និទ្ធនឹងតារាស្រីរូបនេះ បានបង្ហើបប្រាប់សារព័ត៌មាន Yahoo ថា នាង Jennifer Lawrence បានហោះចេញពីទីក្រុង Louisville រដ្ឋ Kentuckyក្រោយពេលនាងបានទៅសួរសុខទុក្ខក្រុមគ្រួសារនៅទីនោះ លុះដល់ពេលត្រឡប់មកវិញ យន្ដហោះរបស់នាងមានបញ្ហាគ្រឿងម៉ាស៊ីន ប៉ុន្តែសំណាងល្អណាស់ដែលអ្នកបើកបរបានបញ្ជាយន្តហោះ និងចុះចតដោយសុវត្ថិភាព ប៉ុន្តែមិនបានបញ្ជាក់ពីមូលហេតុលម្អិតនៃបញ្ហានោះឡើយ ដែលពាក់ព័ន្ធនឹងករណីនេះ អ្នកនាំពាក្យរបស់ទីភ្នាក់ងារអាកាសចរណ៍ប្រចាំតំបន់ គ្រាន់តែបានឲ្យដឹងថា “យន្ដហោះ Hawker Beechcraft B40 មួយគ្រឿងនោះបានចុះចតបន្ទាន់យ៉ាងមានសុវត្ថិភាពនៅអាកាសយានដ្ឋាន Buffalo ចំណែកឯបញ្ហាដែលនាំឱ្យមានការសុំចុះចតបន្ទាន់នោះត្រូវបានគេរកឃើញថា មានបញ្ហាផ្នែកគ្រឿងម៉ាស៊ីន៕
