បន្ទាប់ពីទទួលបានព័ត៌មានថា លោកអ៉ិត សេដ្ឋា កំពុងតែមានជំងឺជាទម្ងន់ និងត្រូវបានបញ្ជូនទៅកាន់មន្ទីរពេទ្យរុស្ស៊ីកាលពីព្រឹកមិញហើយនោះ អីលូវនេះលោកបានទទួលមរណភាពហើយ។
លោកអ៉ិត សេដ្ឋា ជាពិធីករដ៏មានប្រជាប្រិយភាពនៅក្នុងប្រទេសកម្ពុជាដែលបងប្អូនប្រជាពលរដ្ឋខ្មែរជាច្រើនបានស្គាល់លោក កាលពីវេលាម៉ោង 2 រសៀលថ្ងៃនេះលោកបានទទួលមរណភាពហើយបន្ទាប់ពីបានបញ្ជូនទៅដល់មន្ទីរពេទ្យ។
គួរបញ្ជាក់ថា លោកអ៉ិត សេដ្ឋា បានកើតក្នុងឆ្នាំ1970 នៅក្នុងស្រុកមោងឬស្សី ខេត្ដបាត់ដំបង។ ក្រោយថ្ងៃរំដោះ 1979 លោកបានចូលរៀននៅក្នុងសាលាវត្ដដំរីស។ រហូតដល់ឆ្នាំ1987 លោកបានភៀសខ្លួនទៅរស់នៅក្នុងជំរំខាវអ៊ីដាងប្រទេសថៃ។ ក្នុងឆ្នាំ1990 លោកបានរៀនភាសាថៃ និងជំនាញកាត់តវីដេអូនៅទីក្រុងបាងកក ប្រទេសថៃ។ ឆ្នាំ 1991 លោកបានធ្វើមាតុភូមិនិវត្ដន៍មករស់នៅទីក្រុងភ្នំពេញដោយបានចូលមកបម្រើការងារក្នុងស្ថានីយទូរទស្សន៍ IBC។ ឆ្នាំ1994 លោកបានផ្លាស់ចូលមកបម្រើការងារក្នុងស្ថានីយទូរទស្សន៍ប៉ុស្ដិ៍លេខ5។ ឆ្នាំ2001 លោកបានចូលបម្រើការងារនៅស្ថាប័នទូរទស្សន៍ខ្សែកាប្លិ៍ និងនៅឆ្នាំ2009លោកបានចូលបម្រើការងារនៅស្ថានីយទូរទស្សន៍ CTN រហូតដល់ថ្ងៃលោកទទួលមរណភាព៕
