តាមរយៈបណ្ដាញទំនាក់ទំនងសង្គមហ្វេសប៊ុករបស់ពិធីករប្រចាំស្ថានីយទូរទស្សន៍ MY TV និងជាតារាកំប្លែងវ័យក្មេង នាយ ព្រែក បានបង្ហោះរូបភាពជាមួយគូដណ្ដឹងយ៉ាងស្រស់សោភា នាឱកាសចូលរួមពិធីមង្គលការមួយ ដែលអ្នកគាំទ្រ បានលាន់មាត់ថា មួយសន្លឹកនេះ អ្នកទាំងពីរពិតជាស័ក្តសមគ្នាណាស់ ស្អាតទាំងគូតែម្ដង។ កន្លងមក នាយ ព្រែក តែងតែបង្អួតភាពផ្អែមល្ហែម និងស្និលស្នាលជាមួយសំណព្វចិត្តលោកឱ្យមហាជនអ្នកគាំទ្របានឃើញ ពីចំណងស្នេហ៍ស្អិតរមួតដូចស្ករតាំងម៉ែនេះ។
ជាក់ស្ដែងថ្មីៗនេះ គូស្នេហ៍វ័យក្មេងមួយគូខាងលើ បានបណ្ដើរគ្នាទៅចូលរួមមង្គលការមួយយ៉ាងត្រសងនៅខេត្តកំពង់ចាម ទោះបីជាគូដណ្ដឹង នាយព្រែក មិនមែនជាអ្នកសិល្បៈក៏ពិតមែន តែនាងមានរូបសម្រស់ស្រស់ស្អាត ស៊ីវិល័យមិនចាញ់តារាប៉ុន្មានទេ ធ្វើឱ្យក្រសែភ្នែកជាច្រើនបានសម្លឹងនិងចាប់អារម្មណ៍មកលើរូបនាង និងនាយ ព្រែក ផ្ទាល់តែម្ដង។ ជាទូទៅអ្នកគាំទ្របានពោលសរសើរពីរូបសម្រស់អនាគតកូនប្រសា យាយយ៉យ រូបនេះ ពិតជាស្រស់ស្អាត សមសួន លេចធ្លោគួរឱ្យស្រឡាញ់ជាមួយឈុតពណ៌ទឹកសណ្ដែកខ្ចីរបស់នាង ។
គួរបញ្ជាក់ផងដែរ តារាកំប្លែងវ័យក្មេង នាយព្រែក បានភ្ជាប់ពាក្យជាមួយកូនស្រីអ្នកខេត្តកំពង់ចាមកញ្ញា ជា ស្រីតី អស់រយៈពេលយូរគួរសមដែរហើយ ប៉ុន្ដែមកដល់ពេលនេះ គូស្នេហ៍វ័យក្មេងមួយគូនេះនៅមិនទាន់លេចឮដំណឹងចូលរោងការនៅឡើយទេ៕
