ក្រោយពីសមត្ថកិច្ចនាយកដ្ឋានប្រយុទ្ធប្រឆាំងផលិតផលក្លែងក្លាយបានធ្វើការឃាត់ខ្លួនអ្នកលក់ឡេតាមអនឡាញម្នាក់ រហូតដល់មានការឃុំខ្លួនរូបនាងរួចមកនោះ ក៏មានមជ្ឍដ្ឋានមហាជនមួយចំនួនបានប្រតិកម្ម និងរិះគន់ថា សមត្ថកិច្ចនាយកដ្ឋាននោះធ្វើសកម្មភាពជ្រុល ហេតុអ្វីក៏មិនធ្វើការបញ្ជាក់ និងពន្យល់លម្អិត អំពីការអនុវត្តច្បាប់លក់នៅលើអនឡាញឱ្យប្រជាជនបានដឹងផង។
ជាមួយគ្នានោះដែរ ពិធីការិនីល្បី និងជាតារាសម្ដែងគឺ កញ្ញា ថន លក្ខិណា ក៏ជាតំណាងជួយលក់ផលិតផលតាមអនឡាញឱ្យបងស្រីរបស់នាង គឺអ្នកនាងថន តារា ដែលបានយកផលិតផលពីប្រទេសថៃ ប្រភេទទូឆ្ពុង និងថ្នាំឆ្ពុង មកលក់ក្នុងទីផ្សារអនឡាញក្នុងប្រទេសកម្ពុជាដែរនោះបានប្រាប់អ្នកយកព័ត៌មាន គេហទំព័រឡារ៉ែននៅថ្ងៃសូត្រមន្តឡើងផ្ទះវីឡាថ្មីនៅបុរី ប៉េង ហួត ទល់មុខសាលាកសិកម្មតម្លៃរាប់ម៉ឺនដុល្លារថា “ចំពោះការចុះបញ្ជីនេះ ការពិតទៅនាងខ្ញុំក៏គាំទ្រដែរ ក៏ប៉ុន្ដែបើរឿងដល់ថ្នាក់ចាប់រឹបអូសយកតែម្ដងនោះ គឺរឿងហ្នឹងដូចជារាងលើស រាងធ្ងន់បន្តិចហើយ“។ គួរបញ្ជាក់ថា ផលិតផលរបស់តារាស្រីរូបនេះក៏នៅមិនទាន់ទទួលបានការចុះបញ្ជីពាណិជ្ជកម្មនៅឡើយទេ។
ជាក់ស្ដែងតារាស្រីរូបនេះបានបន្ដប្រាប់អ្នកយកព័ត៌មាននៃគេហទំព័រ ឡារ៉ែន ដោយលើកជាមតិឡើងថា “បើទោះបីជាមិនទាន់ចុះបញ្ចីក្តី ក៏ទោសរបស់យើងមិនទាន់ដល់កម្រិតហ្នឹងទេ គួរតែសមត្ថកិច្ច និងមន្ត្រីដែលពាក់ព័ន្ធណែនាំ ឬចេញជាលិខិតដល់អ្នកលក់អនឡាញឱ្យបានដឹង និងទៅចុះបញ្ជីឱ្យបានត្រឹមត្រូវជាមុនសិនដែរ“។
ចុងក្រោយ តារាស្រីដែលអាចនិយាយភាសាថៃបានស្ទាត់ជំនាញរូបនេះ ក៏បានបញ្ជាក់ផងដែរថា ទូឆ្ពុង និងថ្នាំឆ្ពុង ដែលយកមកពីប្រទេសថៃ ហើយដាក់លក់នៅលើបណ្ដាញសង្គម Facebook នេះ គឺមិនមានប៉ះពាល់ដល់សុខភាព និងខូចសុខភាពឡើយ គឺមានតែជួយឱ្យសម្រស់ និងមានសុខភាពល្អ តែប៉ុណ្ណោះ។ ដើម្បីកាន់តែជាក់ច្បាស់សូមទស្សនាវីដេអូខាងក្រោមនេះ ៖
ទស្សនាទិដ្ឋភាពសូត្រមន្ដទាំងស្រុកវីឡាថ្មីតម្លៃរាប់ម៉ឺនរបស់ ថន លក្ខិណា នៅក្នុងបុរីប៉េងហួតខាងក្រោមនេះ៖
