អ្នកនាងសារ៉ាយ សក្ខណា និងស្វាមីត្រូវបានមហាជនមើលឃើញថា អ្នកទាំងពីរជាគូស្វាមីភរិយាដែលស្រឡាញ់គ្នាយ៉ាងល្អូកល្អិនចាក់ទឹកមិនលិចរហូតមក ហើយសុភមង្គលដែលពួកគេមាននេះវាកើតឡើងដោយសារតែការទុកចិត្ដគ្នា។
មហាជនជាច្រើនប្រាកដជានៅចាំបានថា អ្នកនាងសារ៉ាយ សក្ខណា បានរៀបការតាំងពីឆ្នាំ2012ម្ល៉េះ។ ចាប់តាំងពីពួកគេចាប់ដៃគ្នាជាគូស្វាមីភរិយាមកពុំធ្លាប់លេចឮនូវដំណឹងរកាំរកូសអ្វីឡើយ ផ្ទុយទៅវិញមានតែព័ត៌មានលើកឡើងពីការស្រឡាញ់ និងយកចិត្ដទុកដាក់របស់ស្វាមីមកលើរូបនាងរហូតគេគិតថា អ្នកនាងសារ៉ាយ សក្ខណា ប្រហែលជាស្រឡាញ់ស្វាមីបាត់មុខមិនបានហើយមើលទៅ។ តែទោះជាយ៉ាងណា ចំពោះរឿងនេះត្រូវបាននាងលើកឡើងថា ការដែលស្វាមីស្រឡាញ់ទុកចិត្ដនាងពិតជាមាន100% ផ្ទុយទៅវិញបើស្វាមីហ៊ានក្បត់នាងទៅមានស្រីផ្សេង ដឹងតែលែងគ្នាតែម្ដង ពិសេសនៅពេលស្វាមីឡើងចុះទៅមកក្រៅប្រទេសច្រើន ធ្វើឱ្យនាងមានភាពស្រពិចស្រពិលទៅវិញ។
សារ៉ាយ សក្ខណា បញ្ជាក់ថា៖«ខ្ញុំមិនចង់ឱ្យគេលើកឡើងថា ឱ្យតែអ្នកសិល្បៈការហើយលែងគ្នាវិញ ការពិតមិនមែនទេគ្មាននរណាម្នាក់ចង់ការហើយលែងគ្នាទេ។ ផ្ទុយទៅវិញប្រសិនបើខ្ញុំតាមដានដឹងថា ស្វាមីមានស្រី និងបើបី្ដខ្ញុំមានស្រីមែននោះ គ្មានលើកទី2ទេ ត្រឹមតែលើកទី1 ត្រូវតែចប់ ត្រូវចប់!»។
បើទោះបីជាការលើកឡើងបែបនេះត្រូវបានគេគិតចាត់ទុកថា វាដូចជាប្រផ្នូលមិនល្អក៏ដោយ ប៉ុន្ដែត្រូវអ្នកនាងសារ៉ាយ សក្ខិណា អះអាងថា បច្ចុប្បន្នសុភមង្គលក្នុងគ្រួសាររបស់នាងនៅតែមានភាពល្អប្រសើរដូចមុនដដែល៕
