ក្រុមហ៊ុនទូរស័ព្ទ VIVO បានប្រកាសចេញជាផ្លូវការនូវស្មាតហ្វូនជំនាន់ចុងក្រោយ 2ម៉ូដែលគឺ NEX 3 និង NEX 3 ប្រភេទ 5G នៅលើទីផ្សារប្រទេសចិន កាលពីថ្ងៃទី17 ខែកញ្ញា 2019 កន្លងទៅថ្មីៗនេះ។
ងាកមកមើលរូបរាងរបស់ស្មាតហ្វូននេះវិញ ទាំង NEX 3 និង NEX 3 ប្រភេទ 5G បំពាក់អេក្រង់ទំហំ 6.8 អ៊ិញ FullHD+ ប្រភេទ AMOLED (ដូចស្មាតហ្វូនដទៃដែរ) ប៉ុន្តែរូបរាងវាជាអេក្រង់កោងខ្លាំង ដែលក្រុមហ៊ុនឱ្យឈ្មោះថា “Waterfall FullView Display” សូម្បីតែ Samsung ដែលជាជើងខ្លាំងខាងផលិតអេក្រង់ AMOLED នេះក៏ដោយ ក៏មិនធ្លាប់មានយកមកដាក់លើស្មាតហ្វូនរបស់ខ្លួនដែរ (Samsung ធ្លាប់ប្រកាសចេញអេក្រង់ Edge តែមិនកោងដល់ម្លឹងទេ)។
ស្មាតហ្វូន VIVO NEX 3 នេះដែរ មានបំពាក់កាមេរ៉ាចំនួន3 នៅផ្នែកខាងក្រោយ ដែលមានកាមេរ៉ាមេ 64MP និងកាមេរ៉ា 2ទៀតកម្រិត 13MP ជាប្រភេទ Wide-Angle និង Telephoto។
ឯកាមេរ៉ាមុខ Selfie ជាប្រភេទ Pop-Up (ហូតឡើងលើ) មានបង្កប់ក្នុងតួខ្លួនដែលមានទំហំ 16MP មានបំពាក់មុខងារ Portrait Master ហើយវាមានសមត្ថភាពថតរូបភាពប្រភេទ Wide បានទៀតផង។ ប្រើបន្ទះឈីបចុងក្រោយបង្អស់គឺ Snapdragon 855 Plus មានថាមពលថ្មទំហំ 4500mAh និងកម្លាំងសាកថ្មល្បឿនលឿនដល់ 44វ៉ាត់។
ស្មាតហ្វូនថ្មីសន្លាងទាំង2 នេះរាងថ្លៃបន្តិចហើយ គ្រាន់តែតម្លៃចាប់ផ្តើមនៅចិន (ជម្រើស RAM 8GB/128GB) គឺ 705ដុល្លារ(4998យន់) ចំណែកម៉ូដែល 5G (ជម្រើស RAM 8GB/256GB) គឺ 805ដុល្លារ(5698យន់) និងម៉ូដែល 5G (ជម្រើស RAM 12GB/256GB) គឺ 875ដុល្លារ(6198យន់)៕
សូមទស្សនាវីដេអូបង្ហាញរូបរាងពេញខាងក្រោមនេះ៖
