បន្ទប់ពិសោធន៍ស្រាវជ្រាវទ័ពអាកាសអាម៉េរិក (AFRL) បានបង្ហើបឱ្យដឹងដំបូងអំពីគម្រោងប្រកបដោយមហិច្ឆតារបស់ប្រទេសនេះ ក្នុងបំណងល្បាតទីអវកាសដែលនៅខាងក្រៅតំបន់ពង្រាយផ្កាយរណបធម្មតា។
បន្ទប់ពិសោធន៍ AFRL បានឱ្យដឹងថា រង្វង់នៃការយកចិត្តទុកដាក់របស់កងកម្លាំងអវកាសអាម៉េរិក ពេលនេះនឹងត្រូវពង្រីកឡើងដល់ «៤៣៨,០០០ គីឡូម៉ែត្រ និងឆ្ងាយជាងនេះទៀត»។
យោងតាមស្ថានីយវិទ្យុ Suptnik នៅក្នុងវីដេអូដែលបានបង្ហោះក្នុងបណ្ដាញសង្គម Youtube ថ្មីៗនេះបង្ហាញថា AFRL មានមោទកភាពក្នុងការបង្ហាញប្រព័ន្ធត្រួតពិនិត្យល្បឿនលឿន Cislunar (CHPS) ក្នុងគោលដៅរុករក និងគ្រប់គ្រងទីអវកាសដែលនៅចន្លោះព្រះចន្ទ និងផែនដី។
ពាក្យថា «cislunar» ត្រូវបានប្រើប្រាស់ដើម្បីនិយាយអំពីរង្វង់ទីអវកាសដែលស្ថិតនៅចន្លោះគន្លងគោចររបស់ផែនដី និងគន្លងគោចររបស់ព្រះចន្ទ។
វីដេអូបានបង្ហាញថា រូបភាពមីស៊ីល ១ គ្រាប់ដែលបាញ់ចេញពីផែនដី បានបញ្ចេញផ្កាយរណប ១ គ្រឿង។ ផ្កាយរណបនេះហោះចេញផុតពីតំបន់ដែលប្រព័ន្ធផ្កាយរណបក្បែរផែនដី កំពុងស្ថិតនៅ ហើយចុងក្រោយ ក៏បានទៅដល់ព្រះចន្ទ។
AFRL អធិប្បាយថា ការរត់ប្រណាំងឡើងទៅកាន់ឋានព្រះចន្ទនឹងមានសន្ទស្សន៍ខ្លាំងជាងពេលណាទាំងអស់ នៅក្នុងប៉ុន្មានទសវត្សរ៍ខាងមុខ ក្នុងនោះក៏មាន ចិន និង រុស្ស៊ី ដែលកំពុងអនុវត្តកម្មវិធីស្រាវជ្រាវ និងកសាងមូលដ្ឋាននៅលើឋានព្រះចន្ទ។ AFRL ក៏បាននិយាយថា កម្មវិធីអវកាស Artemis របស់ ទីភ្នាក់ងារអវកាសអាម៉េរិក (NASA) មិនត្រឹមតែអាចនាំអ្នកអវកាសអាម៉េរិក ទៅជាន់ដីព្រះចន្ទនោះទេ តែវាក៏នឹងបង្កើត «ជីវភាពយូរអង្វែង» ដំបូង នៅទីនោះ។
វីដេអូខាងលើក៏បានលើកឡើងអំពីហានិភ័យប៉ះទង្គិចក្នុងទីអវកាស ព្រោះតែចំនួនផ្កាយរណបកំពុងគោចរជុំវិញផែនដី មានកាន់តែច្រើន។ បច្ចុប្បន្ន វត្ថុប្រហែល ២៧,០០០ ដែលបង្កើតឡើងដោយមនុស្ស កំពុងអណ្ដែតត្រសែតក្នុងគន្លងគោចរក្បែរផែនដី។
AFRL អាចត្រូវបានប្រគល់ភារកិច្ចក្នុងការអភិវឌ្ឍប្រព័ន្ធល្បាតផ្លូវល្បឿនលឿន Cirslunar នៅក្នុងរដូវក្ដៅនេះ ហើយគ្រោងនឹងបង្ហាញប្រព័ន្ធនេះនៅក្នុងឆ្នាំ ២០២៥ នេះបើតាមគេហទំព័របច្ចេកវិទ្យាការពារជាតិ C4SRNET៕
