កាលពីមុនបើនិយាយពីការថតរូបបានល្អស្អាត គេតែងឱ្យតម្លៃទៅលើប្រភេទកាមេរ៉ាអាជីព DSLR ប៉ុន្តែចូលដល់យុគសម័យស្មាតហ្វូននេះ បើត្រឹមចង់ថតរូបស្អាតគ្រាន់ទុកមើល វាមិនមែនជារឿងពិបាកប៉ុន្មានឡើយ ខណៈស្មាតហ្វូនជាច្រើនមានសមត្ថភាពកាមេរ៉ាខ្លាំង ថតរូបបានច្បាស់អាចទទួលយកបាន។ យ៉ាងណាមិញ បន្ថែមពីលើសមត្ថភាពដែលមានលើស្មាតហ្វូនហើយ វាក៏ទាមទាឱ្យអ្នកត្រូវយល់ដឹងពីគន្លឹះមួយចំនួននៃក្បួនច្បាប់ការថតរូបផងដែរ។ ខាងក្រោមនេះ ជាគន្លឹះសំខាន់ៗមួយចំនួនដែលអ្នកចង់ថតរូបដោយប្រើកាមេរ៉ាស្មាតហ្វូនគួរស្វែងយល់៖
បើតាមការបញ្ជាក់ឱ្យដឹងពីអ្នកជំនាញថតដោយទូរស័ព្ទដៃ លោក បង ជីប បានឱ្យដឹងថា ត្រឹមចង់បានរូបថតស្រស់ស្អាតមួយ មិនចាំបាច់ត្រូវប្រើកាមេរ៉ាដែលមានសមត្ថភាពខ្លាំង តម្លៃថ្លៃនោះទេ ត្រឹមមានទូរស័ព្ទស្មាតហ្វូនមួយដែលមានសមត្ថភាពកាមេរ៉ាសមល្មម រួមនឹងទេពកោសល្យ និងជំនាញប្រើកម្មវិធីកែរូប គឺជារឿងគ្រប់គ្រាន់ហើយ។ រឿងនេះ លោកអ្នកត្រូវគិតលើ 4 ចំណុច ដើម្បីទទួលបានរូបថតល្អស្អាតមួយសន្លឹក។
1- ការយល់ដឹងពីសិល្បៈ និងពន្លឺ៖ ការថតរូបក៏ជាសិល្បៈមួយដែរ ទាំងអស់នេះតម្រូវឱ្យមានតិចនិក និងគំនិតច្នៃប្រឌិតខ្ពស់ ទាំងបច្ចេកទេស និងការចាប់ប្លង់ថត។ មនុស្សម្នាក់ៗមានសិល្បៈថតរូបខុសៗគ្នា។ មនុស្សពីរនាក់ថតប្លង់ជាមួយគ្នា មិនប្រាកដថា រូបថតល្អដូចគ្នានោះទេ គឺអាស្រ័យលើសិល្បៈក្នុងខ្លួនរបស់ពួកគេម្នាក់ៗថា តើអាចចាប់យកប្លង់ និងបន្ថែមទិដ្ឋភាពផ្សេងៗទៅក្នុងរូបបានពូកែប៉ុនណា។
ទាក់ទងនឹងពន្លឺនេះ អ្នកថតត្រូវដឹងពីពន្លឺប៉ុនណាដែលទូរសព្ទ័របស់យើងអាចចាប់រូបភាពបានល្អ ដូចជាទូរស័ព្ទខ្លះអាចថតបានគ្រប់ស្ថានភាពពន្លឺ ចំណែកទូរស័ព្ទខ្លះទៀតអាចថតបានតែក្នុងកន្លែងដែលមានពន្លឺគ្រប់គ្រាន់ប៉ុណ្ណោះ។
2- ការចាប់ប្លង់ និងអត្ថន័យ៖ ការជ្រើសយកប្លង់ក៏ជាចំណុចសំខាន់មួយ បើចង់បានរូបស្អាតក្រោមក្រសែភ្នែកមនុស្សទូទៅ អ្នកថតរូបម្នាក់ៗត្រូវការចាំបាច់ក្នុងការចេះស្វែងយល់ពីប្លង់ និងក្បួនច្បាប់មូលដ្ឋានដែលជាគ្រឹះដ៏សំខាន់បន្ថែមពីលើការដែលត្រូវមានគំនិតច្នៃប្រឌិត ច្បិចយកប្លង់ណាដែលប្លែក តែមានភាពល្អស្អាត និងទាក់ទាញខុសពីគេ។ ឧទាហរណ៍ដូចជា ប្លង់ចាំងឆ្លុះផ្ទៃទឹក ប្លង់ថ្ងៃលិច ប្លង់ទេសភាពជនបទ ប្លង់ពន្លឺភ្លើងក្នុងទីក្រុង ប្លង់សត្វល្អិត ជាដើម។ល។
ចំពោះប្លង់ក្នុងច្បាប់នៃការថតរូបមាន 9 ដូចជា Rule of third, Leading line, Framing, Pattern ….។ល។ ដូចនេះហើយយើងត្រូវដឹងថា ត្រូវយកច្បាប់មួយណាមកប្រើ។
ចំពោះក្នុងនោះ អត្ថន័យក៏ជារឿងសំខាន់ដែលអ្នកថតរូបត្រូវគិតដំបូងគេដែរ ព្រោះរូបទាំងនោះ វានឹងបង្ហាញពីអ្វីដែលយើងចង់ប្រាប់ទៅអ្នកមើល ដោយវាមិនមែនត្រឹមតែជារូបភាពស្អាតធម្មតាប៉ុណ្ណោះទេ។ មុនពេលថតរូបមួយយើងត្រូវគិតថា តើរូបដែលយើងថតនោះចង់បង្ហាញពីអ្វីដល់អ្នកមើល តើរូបនោះអាចមានប្រយោជន៍ដល់អ្នកមើល ឬក៏អត់? ហើយគេអាចមានអារម្មណ៍វិជ្ជមាន ឬអវិជ្ជមានពេលដែលឃើញរូបភាពមួយនោះហើយ។
3- ស្វែងយល់ឱ្យច្បាស់ពីបច្ចេកវិទ្យាកាមេរ៉ាទូរស័ព្ទដែលខ្លួនកំពុងកាន់ប្រើ៖ សម្រាប់ស្មាតហ្វូនកំពូលៗរបស់ក្រុមហ៊ុនមួយចំនួន សុទ្ទសឹងបំពាក់នូវកាមេរ៉ាដែលមានសមត្ថភាពខ្លាំង និងមានមុខងារថតរូបដែលដូចនឹងកាមេរ៉ាអាជីពដែរ។ ដូច្នេះ មុនចាប់ផ្ដើមថត អ្នកគួរសិក្សាឱ្យច្បាស់ពីកាមេរ៉ាទូរស័ព្ទនោះ មានមុខងារ និងសមត្ថភាពកម្រិតណា ទាក់ទងនឹង Shutter speed, ISO, White balance, និង manual focus។ ក្នុងនោះ បើទូរស័ព្ទនោះមានមុខងារកំណត់បានទៅ File Raw ក៏កាន់តែពិសេសទៅទៀត ព្រោះវាអាចងាយស្រួលក្នុងការកែសម្រួលរូបក្រោយពេលថតបាន។
4- ការប្រើកម្មវិធីកែរូបជំនួយ៖ ជាការពិត ទោះអ្នកជំនាញប្រើកាមេរ៉ា DSLR ក៏ត្រូវការប្រើកម្មវិធីជំនួយក្រោយពេលថតដែរ ដូច្នេះសម្រាប់អ្នកប្រើកាមេរ៉ាទូរស័ព្ទក៏ដូចគ្នាដែរ គឺទាមទារឱ្យយើងចេះកែលម្អបន្ថែមទាក់ទងជាមួយពណ៍ និងពន្លឺរូបភាពបន្ថែមទៀតដែរ។
កម្មវិធីកែរូបមាន Snapseed, Pixlr, Mix, Adobe Photoshop Express, និង Lightroom ជាដើម៕
