ការព្រួយបារម្ភអំពីវិបត្តិសេដ្ឋកិច្ចសកល និងហានិភ័យនានាដែលកើនឡើងកាន់តែខ្ពស់នៅ ទ្វីបអឺរ៉ុប កំពុងតែរុញរូបិយប័ណ្ណដុល្លារអាម៉េរិក ឱ្យឡើងខ្ពស់ ហើយបើយោងតាមក្រុមអ្នកជំនាញនៅ Wall Street ប្រាក់ដុល្លារអាម៉េរិក នឹងមានតម្លៃខ្ពស់ជាងប្រាក់អឺរ៉ូ ក្នុងពេលឆាប់ៗនេះ។
បន្ទាប់ពីមានការឡើងថ្លៃខ្ពស់បំផុតកាលពីពាក់កណ្ដាលដើមឆ្នាំ ក្នុងអំឡុងជាង ១ ទសវត្សរ៍កន្លង ប្រាក់ដុល្លារអាម៉េរិក កំពុងត្រូវបានទិញចូលច្រើនពីសំណាក់ក្រុមអ្នកវិនិយោគ ដោយពួកគេចាត់ទុកថា រូបិយប័ណ្ណដុល្លារអាម៉េរិក គឺជា «រូងលាក់ខ្លួនដ៏មានសុវត្ថិភាព» ដើម្បីគេចពីផលប៉ះពាល់ដែលកើតពីការដាំក្បាលចុះរបស់ទីផ្សារភាគហ៊ុន។ ក្រៅពីនេះ ការដែលទីផ្សាររំពឹងលើលទ្ធភាពងើបឡើងវិញរបស់សេដ្ឋកិច្ចនៅ សហរដ្ឋអាម៉េរិក ក៏បាន និងកំពុងជួយជាកម្លាំងដល់ ប្រាក់ដុល្លារអាម៉េរិក ផងដែរ។
សន្ទស្សន៍ WSJ Dollar (សន្ទស្សន៍តាមដានការវិវត្តរបស់ប្រាក់ដុល្លារអាម៉េរិក ធៀបនឹងបណ្ដុំនៃរូបិយប័ណ្ណចំនួន ១៦ ផ្សេងទៀត) បានឡើងខ្ពស់បំផុតក្នុងអំឡុង ២០ ឆ្នាំ កាលពីសប្ដាហ៍កន្លង និងកើន ២.៥% ក្នុងខែនេះ។ អត្រាប្ដូរប្រាក់ដុល្លារអាម៉េរិក/ប្រាក់អឺរ៉ូ ក៏ឡើងដល់ចំណុចខ្ពស់បំផុតរាប់ចាប់ពីឆ្នាំ ២០០២។
ក្រុមអ្នកវិភាគនៅ Wall Street បានព្យាករថា រូបិយប័ណ្ណដុល្លារអាម៉េរិក នឹងឡើងថ្លៃជាបន្តទៀត ក្នុងគ្រាដែលហានិភ័យនៃវិបត្តិសេដ្ឋកិច្ចសកលកាន់តែឡើងខ្ពស់។ អ្នកជំនាញរបស់ Morgan Stanley បានព្យាករថា ប្រាក់ដុល្លារអាម៉េរិក នឹងឡើងខ្ពស់ ហើយ ប្រាក់អឺរ៉ូ នឹងត្រូវបានជួញដូរក្នុងតម្លៃត្រឹម ៩៧ សេននៃរូបិយប័ណ្ណដុល្លារអាម៉េរិក នៅចុងខែកញ្ញាខាងមុខ។
ការឡើងថ្លៃរបស់ ប្រាក់ដុល្លារអាម៉េរិក គឺជា «កាំបិតមុខពីរ» ចំពោះអ្នកប្រើប្រាស់ និងអ្នកជំនួញនៅ សហរដ្ឋអាម៉េរិក។ ប្រាក់ដុល្លារថ្លៃជាងប្រាក់អឺរ៉ូ នឹងជួយជំរុញសកម្មភាពទិញដូរក្នុងប្រទេស ប៉ុន្តែវាក៏ប៉ះពាល់ដល់ប្រាក់ចំណូលរបស់បណ្ដាក្រុមហ៊ុនពហុជាតិ។
ប្រាក់ដុល្លារឡើងថ្លៃ ក៏ជះឥទ្ធិពលមិនល្អដល់មុខទំនិញនានា ព្រោះថា មុខទំនិញទាំងនោះតែងត្រូវបានកំណត់តម្លៃជាប្រាក់ដុល្លារអាម៉េរិក។ ប្រការនេះប៉ះពាល់ដល់បណ្ដាទីផ្សារដែលទើបលេចធ្លោ និងកំពុងជំពាក់បំណុលដែលកំណត់តម្លៃដោយប្រាក់ដុល្លារអាម៉េរិក៕
