សេដ្ឋិនី Alexandra Mary “Alex” Hirschi (Alex Hirschi) គឺជា vlogger ផ្នែករថយន្ត ដែលមានអ្នកតាមដានជាង 50 លាននាក់នៅលើបណ្ដាញសង្គម និងរកបានប្រាក់រាប់លានដុល្លារក្នុងមួយឆ្នាំ។
Alex Hirschi វ័យ 35 ឆ្នាំ ត្រូវបានគេស្គាល់ជាទូទៅថា “Supercar Blondie”។ នាងបានតស៊ូជាមួយនឹងបណ្ដាញផ្សព្វផ្សាយសង្គមអស់រយៈពេលជាង 1 ទសវត្សរ៍មកហើយ តាមរយៈការងារជាអ្នកផ្សាយសំឡេង ហើយបច្ចុប្បន្ន នាងគឺជាអ្នកជំនាញផ្នែក អធិប្បាយ (review) ប្រភេទរថយន្តទំនើប។ ច្រើនឆ្នាំមកនេះ Alex Hirschi បានក្លាយជាបុគ្គលល្បីឈ្មោះលំដាប់អន្តរជាតិមួយរូប ដោយសារការ review រថយន្តរបស់នាង។
ខាងក្រោមនេះគឺជារឿងរ៉ាវជោគជ័យខ្លះ របស់ Alex Hirschi ៖
Alex Hirschi ចាប់កំណើត និងធំឡើងនៅក្នុងរដ្ឋ Queensland ប្រទេសអូស្ត្រាលី។ នាងបានទៅរស់នៅក្នុងទីក្រុង ឌូបៃ នៃប្រទេសអារ៉ាប់រួម (United Arab Emirates) ចាប់ពីឆ្នាំ 2008 ជាកន្លែងដែលនាងធ្វើការជាអ្នកអានព័ត៌មាន និងពិធីការិនី នៅស្ថានីយវិទ្យុ Dubai Eye 103.8។
ពេលនោះ នាងមានឈ្មោះល្បីថាជា “Radio Blondie” និងធ្លាប់បានសម្ភាសតារាល្បីៗ អំពីការចូលចិត្តរថយន្តផ្ទាល់ខ្លួនរបស់ពួកគេ ក្នុងនោះមានទាំងតារាសម្ដែងប្រុស Jake Gyllenhaal និង John Travolta ផងដែរ។
នាង Alex បានរៀបការជាមួយ Nik Hirschi ដែលជាអ្នកគ្រប់គ្រង និងជាជំនួយការរបស់នាង។ Nik ទទួលខុសត្រូវលើការថតវីដេអូ។ បុរសនេះធ្លាប់ជាបុគ្គលិកធនាគារ ប៉ុន្តែ គាត់បានបោះបង់ការងារនេះ ដើម្បីងាកមកផ្ដោតលើកិច្ចការងាររបស់ភរិយា ចាប់ពីឆ្នាំ 2018។ អាចនិយាយបានថា Alex គឺជាបុគ្គលសំខាន់មួយរូបដែលរួមចំណែកជួយឱ្យ Alex បានទទួលជោគជ័យក្នុងការងារ។
ដោយសារបង្កើតបានខ្លឹមសារដែលខ្លួនចូលចិត្តផង និងប្រកបដោយភាពទាក់ទាញ Alex រកបានប្រាក់ជិត 20 លានដុល្លារអាមេរិក។ នៅឆ្នាំ 2018 នាងបានចាកចេញពីវិទ្យុ ដើម្បីថតវីដេអូ review រថយន្ត។ ការស្រាវជ្រាវកាលពីឆ្នាំ 2020 របស់ GoCompare (គេហទំព័រ ប្រៀបធៀបសេវាហិរញ្ញវត្ថុរបស់ អង់គ្លេស) បានផ្សាយថា Alex រកបានប្រហែល 1.4 លានដុល្លារអាមេរិក ជារៀងរាល់ឆ្នាំ ពីការបង្ហោះអត្ថបទដែលមានម្ចាស់ឧបត្ថម្ភ នៅលើបណ្ដាញសង្គម។
គិតមកដល់បច្ចុប្បន្ន តាមការគណនា Alex មានទ្រព្យដែលមានតម្លៃជាង 17 លានដុល្លារអាមេរិក។ តួលេខនេះ ទំនងជាមិនអាក្រក់នោះទេ សម្រាប់អ្នកដែលទើបតែចូលប្រលូកក្នុងមុខរបរជាអ្នក review រថយន្ត បាន 3 ឆ្នាំ។ Alex ក៏ជាស្ត្រីមួយរូប នៅក្នុងចំណោមស្ត្រីដែលមានអ្នកតាមដានច្រើនជាងគេក្នុងពិភពលោក។
Alex ចាប់ផ្ដើមបង្ហោះខ្លឹមសារស្ដីពីរថយន្ត នៅលើទំព័រ Instagram ដែលមានអ្នកតាមដានចំនួន 300 នាក់ កាលពីឆ្នាំ 2015។ បច្ចុប្បន្ន នាងមានអ្នកតាមដានជាង 9 លាននាក់ នៅលើបណ្ដាញសង្គមនេះ។ នៅលើ Youtube វិញ នាងមានតាមដានជាង 6.5 លាននាក់ និង នៅលើ Facebook មានជាង 40 លាននាក់។
ដោយសារមានប្រាក់ និងមានចំណូលចិត្តចំពោះរថយន្តទំនើប ដូច្នេះ Alex ក៏មានរថយន្តទំនើបៗជាច្រើនគ្រឿង។ ឆ្នាំ 2020 នាងបានលក់ Lamborghini Huracan មួយគ្រឿងដែលនាងចូលចិត្ត នៅមុនការមកដល់របស់ COVID-19។
នាង Alex បាននិយាយថា៖ «ខ្ញុំទើបតែទទួលបានរថយន្ត Rolls-Royce ថ្មីមួយគ្រឿង និង McLaren ថ្មីមួយគ្រឿង។ ក្រៅពីនេះ ខ្ញុំបានបញ្ជាទិញរថយន្ត Tesla Cybertruck មួយគ្រឿងផងដែរ»៕
ប្រភព៖ SCMP
ប្រែសម្រួល៖ បុត្រា
