អាជ្ញាធរកោះតៃវ៉ាន់ ប្រកាសបង្កើតមូលនិធិវិនិយោគ តម្លៃ ២០០ លានដុល្លារអាម៉េរិក សម្រាប់ ប្រទេសលីទុយអានី ក្នុងគ្រាដែលក្រុមហ៊ុន សហគ្រាសមួយចំនួនត្អូញត្អែរអំពីការខាតបង់ដោយសារតែភាពតានតឹងរវាង លីទុយអានី និង ចិនដីគោក។
«តៃវ៉ាន់ កំពុងបង្កើតមូលនិធិមួយដោយមានទុនដំបូងស្មើនឹង ២០០ លានដុល្លារអាម៉េរិក ដើម្បីវិនិយោគទៅក្នុងវិស័យឧស្សាហកម្មរបស់ លីទុយអានី ដែលជាយុទ្ធសាស្ត្ររបស់ លីទុយអានី និង តៃវ៉ាន់» ប្រធានការិយាល័យតំណាងកោះតៃវ៉ាន់ ប្រចាំ លីទុយអានី លោក Eric Huang បានឱ្យដឹងដូច្នេះកាលពីថ្ងៃទី ៥ មករា។
លោក Eric Huang បន្ថែមថា ខ្ទង់វិនិយោគ ២០០ លានដុល្លារនេះគឺជាផ្នែកមួយក្នុងគម្រោងរបស់ តៃវ៉ាន់ ដើម្បីពង្រឹងទំនាក់ទំនងជាមួយ លីទុយអានី ក្រោយមានភាពតានតឹងជាមួយ ចិនដីគោក។ ខ្ទង់វិនិយោគដំបូងនេះ នឹងត្រូវបានប្រើប្រាស់នៅក្នុងឆ្នាំនេះ។
ប្រទេសលីទុយអានី កំពុងរងការរិះគន់ពី ចិនដីគោក ដោយសារតែបានអនុញ្ញាតឱ្យ អាជ្ញាធរកោះតៃវ៉ាន់ បើកការិយាល័យតំណាងនៅ Vilnius កាលពីខែវិច្ឆិកា ឆ្នាំ ២០២១ ដោយដាក់ឈ្មោះថា «ការិយាល័យតំណាងតៃវ៉ាន់»។ ប្រទេសចិន ប្រឆាំងការប្រើប្រាស់ពាក្យ «តៃវ៉ាន់» សម្រាប់ដាក់ឈ្មោះ ព្រោះខ្លាចបង្កឱ្យមានអារម្មណ៍ស្របច្បាប់ជាអន្តរជាតិសម្រាប់កោះនេះ។ ការិយាល័យតំណាងនានានៅក្រៅស្រុករបស់ កោះតៃវ៉ាន់ តែងត្រូវបានដាក់ឈ្មោះថា «ការិយាល័យសេដ្ឋកិច្ច និងវប្បធម៍តៃប៉ិ»។
ប្រធានាធិបតី របស់ លីទុយអានី លោក Gitanas Nauseda សប្ដាហ៍នេះបានទទួលស្គាល់ «កំហុសឆ្គង» នៅពេលអនុញ្ញាតឱ្យ តៃវ៉ាន់ ប្រើប្រាស់ឈ្មោះកោះនេះដាក់ឱ្យការិយាល័យតំណាង។
ថ្នាក់ដឹកនាំ និងក្រុមហ៊ុននានារបស់ លីទុយអានី បានត្អូញត្អែរថា ភាពតានតឹងជាមួយ ចិនដីគោក បានធ្វើឱ្យប្រទេសនេះ និងក្រុមហ៊ុននានា រងការខាតបង់ផ្នែកសេដ្ឋកិច្ច។
តំណាងពាណិជ្ជកម្មអាម៉េរិក លោកស្រី Katherine Tai នៅក្នុងការពិភាក្សាតាមទូរស័ព្ទជាមួយរដ្ឋមន្ត្រីការបរទេស លីទុយអានី Gabrielius Landsbergis កាលពីពេលថ្មីៗនេះ បានសន្យាសហការជួយ លីទុយអានី ទប់ទល់នឹង «សកម្មភាពកៀបសង្កត់ផ្នែកការទូត និងសេដ្ឋកិច្ច»។
ចិនដីគោក តែងចាត់ទុក កោះតៃវ៉ាន់ ជាខេត្តមួយរបស់ខ្លួនដែលរង់ចាំតែការបង្រួបបង្រួមប៉ុណ្ណោះ ហើយបានប្រកាសជាញឹកញាប់ថា នឹងប្រើកម្លាំងបាយដើម្បីយកកោះនេះមកវិញ បើសិនជាចាំបាច់។ ភាពតានតឹងរវាង ចិនដីគោក និង កោះតៃវ៉ាន់ បានឈានដល់ចំណុចគួរឱ្យព្រួយបារម្ភនៅក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីលោកស្រី Tsai Ing-wen ដែលជាអ្នកប្រឆាំង «គោលការណ៍ចិនតែមួយ» បានក្លាយជាមេដឹកនាំចាប់តាំងពីឆ្នាំ ២០១៦៕
