ក្រុមអ្នកវិនិយោគដែលចង់ប្រថុយជាមួយនឹងរថយន្តអគ្គិសនីនៅពេលនេះ គឺមានជម្រើសតែមួយគត់ នោះគឺ Tesla របស់ Elon Musk។
សារព័ត៌មាន Bloomberg បានអះអាងថា នៅពេលតម្លៃប្រេងឡើងខ្ពស់ តម្លៃហ្គាសក៏កើនឡើងទៅតាមនោះ ធ្វើឱ្យអ្នកវិនិយោគដែលចង់បោះទុនច្រើនទៅក្នុងវិស័យរថយន្តអគ្គិសនី មានជម្រើសតែមួយគត់៖ Tesla ឬមិនជ្រើសរើសក្រុមហ៊ុនណាទាំងអស់។
ការ «រត់ចោល» បណ្ដាភាគហ៊ុនរថយន្តអគ្គិសនីកាលពីពេលថ្មីៗនេះ បានជួយឱ្យ Tesla ហក់ឡើងកាន់តែខ្ពស់ លើបណ្ដាគូប្រជែងថ្មីរបស់ខ្លួន។ គម្លាតត្រូវបានបន្ថែមកាន់តែឆ្ងាយកាលពីសប្ដាហ៍មុន នៅពេលក្រុមហ៊ុនរថយន្តអគ្គិសនីធំៗចំនួន ២ នៅ សហរដ្ឋអាម៉េរិក រួមមាន Rivian និង Lucid បានបង្ហើបឱ្យដឹងអំពីឧបសគ្គជាច្រើនដែលកើតឡើងដោយសារបញ្ហារអាក់រអួលនៃបណ្ដាញផ្គត់ផ្គង់ នាំឱ្យមាននិន្នាការលក់ចោលភាគហ៊ុនរបស់ក្រុមហ៊ុនទាំងនេះ។
បញ្ហាជាច្រើនកំពុងកើតឡើងនៅក្នុងបណ្ដាក្រុមហ៊ុនក្នុងវិស័យរថយន្ត ប៉ុន្តែ Tesla កំពុងទទួលបានផលចំណេញ។ តម្លៃប្រេងកើនឡើង បានជួយឱ្យរថយន្តអគ្គិសនីកាន់តែទទួលបានចំណាប់អារម្មណ៍ជាងពេលណាទាំងអស់ ហើយសូម្បីតែលោក ចូ បៃដិន ក៏អំពាវនាវឱ្យទទួលយករថយន្តអគ្គិសនីផងដែរ។
ក៏ប៉ុន្តែ មិនមែនក្រុមហ៊ុនផលិតរថយន្តអគ្គិសនីទាំងអស់សុទ្ធតែនឹងទទួលបានផលប្រយោជន៍ពីតម្លៃប្រេងនោះឡើយ។ ក្រុមអ្នកវិនិយោគកាន់តែពិនិត្យយ៉ាងល្អិតល្អន់មុននឹងជ្រើសរើស។ ក្នុងនោះ មានតែ Tesla មួយគត់ដែលលេចធ្លោជាងគេនៅពេលប្រៀបធៀបថា ក្រុមហ៊ុនណាខ្លះរកបានប្រាក់ចំណេញ។
ជាសរុប Rivian និង Lucid បានប្រគល់រថយន្តអគ្គិសនីចំនួន ១,០០០ គ្រឿង ដល់ដៃអតិថិជន ក្នុងឆ្នាំ ២០២១។ ចំណែក Tesla លក់បានជិត ១ លានគ្រឿង ក្នុងឆ្នាំកន្លង។
កាលពីសប្ដាហ៍មុន គិតចាប់ពីថ្ងៃអង្គារដល់ថ្ងៃសុក្រ ភាគហ៊ុន Rivian បានថយចុះ ៣០% ហើយបើរាប់ចាប់ពីខែវិច្ឆិកា ២០២១ ភាគហ៊ុននេះថយចុះ ៧០% ដែលនេះបានធ្វើឱ្យតម្លៃមូលធនទីផ្សាររបស់ Rivian បាត់បង់ជិត ១០០ ពាន់លានដុល្លារអាម៉េរិក។ ចំណែកភាគហ៊ុន Lucid ក៏ថយចុះ ១៤% កាលពីថ្ងៃអង្គារ ហើយបច្ចុប្បន្នបានថយចុះ ៥៩% បើធៀបនឹងកម្រិតខ្ពស់កាលពីខែវិច្ឆិកា ឆ្នាំ ២០២១៕
