អន្តរជាតិ - La Reine Media

ម៉ាឡេស៊ី មានបំណងបង្កើនសហប្រតិបត្តិការលើវិស័យពាណិជ្ជកម្មការពារជាតិ ជាមួយ ប្រទេសថៃ

យោងតាមមន្ត្រីការពារជាតិរបស់ ម៉ាឡេស៊ី ក្រុមហ៊ុននានារបស់ប្រទេសនេះ និង ប្រទេសថៃ អាចសហការរកស៊ីក្នុងវិស័យសេវាកម្មថែទាំ និងជួសជុលយន្តហោះ ឧស្សាហកម្មយន្តហោះគ្មានមនុស្សបើកបរ និងអាវុធ។

កាលពីថ្ងៃទី ២៨ សីហា នៅក្នុងដំណើរទស្សនកិច្ចនៅ ប្រទេសថៃ អគ្គលេខាធិការនៃ ក្រសួងការពារជាតិម៉ាឡេស៊ី Datuk Seri Muez Abd Aziz បានលើកឡើងថា ម៉ាឡេស៊ី មានបំណងបង្កើនកិច្ចសហប្រតិបត្តិការផ្នែកការពារជាតិជាមួយ ប្រទេសថៃ ក្នុងនោះក៏នឹងមានការផលិតសម្ភារយោធា ដើម្បីជំរុញវិស័យឧស្សាហកម្មការពារជាតិរបស់ប្រទេសនេះ។

អគ្គលេខាធិការនៃ ក្រសួងការពារជាតិម៉ាឡេស៊ី បញ្ជាក់ថា ក្នុងខែតុលា ប្រទេសនេះនឹងប្រកាសអំពីគោលនយោបាយសម្រាប់ឧស្សាហកម្មការពារជាតិ និងសន្តិសុខ (DIPKN)។ ដូច្នេះ ម៉ាឡេស៊ី ត្រៀមខ្លួនជានិច្ចក្នុងការរៀនសូត្រពី ប្រទេសថៃ ជាប្រទេសដែលមានបទពិសោធន៍ច្រើនក្នុងវិស័យការពារជាតិ។

ទន្ទឹមនឹងនេះ មន្ត្រីរបស់ ម៉ាឡេស៊ី ខាងលើ ក៏បានឱ្យដឹងថា បណ្ដាក្រុមហ៊ុនរបស់ ម៉ាឡេស៊ី និង ថៃ អាចសហការរកស៊ីក្នុងវិស័យការពារជាតិដូចជា សេវាកម្មថែទាំ ជួសជុលយន្តហោះ ការផលិតយន្តហោះគ្មានមនុស្សបើកបរ និងការផលិតអាវុធជាដើម។

បច្ចុប្បន្ន អគ្គលេខាធិការនៃ ក្រសួងការពារជាតិម៉ាឡេស៊ី Datuk Seri Muez Abd Aziz កំពុងតែបំពេញទស្សនកិច្ចនៅ ប្រទេសថៃ។ ដំណើរទស្សនកិច្ចនេះផ្ដោតសំខាន់ទៅលើការជំរុញកិច្ចសហប្រតិបត្តិការទ្វេភាគី ជួបពិភាក្សាជាមួយក្រុមមន្ត្រីការពារជាតិរបស់ ប្រទេសថៃ និងធ្វើទស្សនកិច្ចនៅរោងចក្ររបស់ Chaiseri Defence Co Ltd ដែលជាក្រុមហ៊ុនការពារជាតិ គ្រប់គ្រងដោយ ក្រសួងការពារជាតិថៃ មានជំនាញខាងផលិតយានយន្តយោធាសម្រាប់នាំចេញទៅកាន់ប្រទេសជាង ៤០ ក្នុងពិភពលោក៕

August 29, 2022

ប្រធានាធិបតី ហ្សេឡែនស្គី ថា អ៊ុយក្រែន នឹងវាយដណ្ដើមយកមកវិញទឹកដីទាំងអស់ដែល រុស្ស៊ី បានចូលកាន់កាប់

ប្រធានាធិបតីអ៊ុយក្រែន លោក ហ្សេឡែនស្គី សន្យាថា ប្រទេសនេះនឹងដណ្ដើមយកមកវិញនូវទឹកដីទាំងអស់ដែលត្រូវបាន កងទ័ពរុស្ស៊ី ចូលកាន់កាប់ ក្នុងនោះមានទាំងតំបន់ Donbass និង ឧបទ្វីបគ្រីមៀ (Crimea) ផងដែរ។

«យើងមិនធ្លាប់បានភ្លេច ហើយក៏នឹងមិនបំភ្លេចចោលទីក្រុងណាមួយ ប្រជាជនណាម្នាក់របស់យើងឡើយ» ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ថ្លែងក្នុងសុន្ទរកថាមួយ កាលពីព្រលប់ថ្ងៃទី ២៨ សីហា។

«ពេលនេះ Donbass ស្ទើរតែត្រូវបានបំផ្លាញទាំងស្រុងដោយសារការវាយប្រហារតាមផ្លូវអាកាសរបស់ រុស្ស៊ី។ Donetsk ដែលជាទីមោទកភាព រុងរឿង ក៏ត្រូវរងការបៀតបៀន ព្រោះតែការឈ្លានពានរបស់ រុស្ស៊ី។ ក៏ប៉ុន្តែ អ៊ុយក្រែន នឹងដណ្ដើមយកមកវិញ។ ប្រាកដជាបែបនេះ។ ជីវភាពនឹងត្រលប់មកវិញ។ គុណតម្លៃរបស់ ប្រជាជន Donbass នឹងត្រូវបានដណ្ដើមមកវិញ។ ឱកាសរស់នៅដោយសុវត្ថិភាព និងសុភមង្គល ក៏នឹងវិលត្រលប់មកវិញ» លោក ហ្សេឡែនស្គី អះអាងដូច្នេះ។

យោងតាមលោក ហ្សេឡែនស្គី ទង់ជាតិអ៊ុយក្រែន នឹងបង្ហាញខ្លួននៅ Donetsk, Gorlovka, Mariupol និងនៅគ្រប់ទីកន្លែងដែលបច្ចុប្បន្នត្រូវបានគ្រប់គ្រងដោយ កងទ័ពរុស្ស៊ី។

ការអះអាងរបស់ ប្រធានាធិបតីអ៊ុយក្រែន ត្រូវបានលើកឡើងក្នុងអំឡុងពេលដែល ប្រធានគណៈកម្មការកិច្ចការបរទេស នៃ សភាជាន់ទាបរុស្ស៊ី បានប្រកាសលក្ខខណ្ឌសម្រាប់ការចរចរសន្តិភាពជាមួយ អ៊ុយក្រែន។ លោក Leonid Slutsky បានបញ្ជាក់ថា ការដែល អ៊ុយក្រែន ចុះចាញ់ និង«មិនមានគំនិតហ្វាស៊ីសនិយម» នឹងក្លាយជាលក្ខខណ្ឌចម្បងបង្អស់សម្រាប់ការចរចាសន្តិភាព៕

August 29, 2022

រុស្ស៊ី ថានឹងចរចររកសន្តិភាព បើសិន អ៊ុយក្រែន ចុះចាញ់ដោយគ្មានលក្ខខណ្ឌ

ប្រធានគណៈកម្មការកិច្ចការបរទេស នៃ សភាជាន់ទាបរុស្ស៊ី បានអះអាងថា ការដែល អ៊ុយក្រែន ចុះចាញ់ និង«មិនមានគំនិតហ្វាស៊ីសនិយម» នឹងក្លាយជាលក្ខខណ្ឌចម្បងបង្អស់សម្រាប់ការចរចាសន្តិភាព។

«យើងត្រៀមខ្លួនរួចរាល់ក្នុងការពិនិត្យលើដំណើរការនៃការចរចា បើសិនភាគីខាង អ៊ុយក្រែន ចុះចាញ់ដោយគ្មានលក្ខខណ្ឌ កាត់បន្ថយកម្លាំងប្រដាប់អាវុធ ក៏ដូចជាមិនមានគំនិតហ្វាស៊ីសនិយមទាំងស្រុង និងជាដាច់ខាត» ប្រធានគណៈកម្មការកិច្ចការបរទេសរបស់ សភាជាន់ទាប់រុស្ស៊ី និងជាប្រធានក្រុមចរចាជាមួយ អ៊ុយក្រែន លោក Leonid Slutsky បង្ហោះសារនៅលើ Telegram កាលពីថ្ងៃទី ២៧ សីហាដូច្នេះ។

ប្រកាសនេះត្រូវបានធ្វើឡើងនៅក្នុងគ្រាដែលប្រទេសទាំងពីរ ថ្មីៗនេះ បានលើកឡើងនូវគោលជំហោរយ៉ាងដាច់អហង្ការស្ដីពីលក្ខខណ្ឌសម្រាប់ការចរចា។ ទីក្រុងកៀវ ក្នុងខែនេះបានអះអាងថា នឹងចូលតុចរចា ចុះណាតែ ទីក្រុងមូស្គូ ទទួលរងការខូចខាតធ្ងន់ធ្ងរ និងបរាជ័យក្នុងសមរភូមិ៕

August 29, 2022

Boeing ប្រកាសពីជើងហោះហើរដឹកមនុស្សទៅកាន់អវកាសជាលើកដំបូង

ក្រុមហ៊ុនផលិតយន្តហោះលំដាប់កំពូលពិភពលក Boeing កាលពីថ្ងៃទី ២៥ សីហា បានបង្ហើបឱ្យដឹងថា ក្រុមហ៊ុននេះអាចនឹងបំពេញបេសកកម្មដឹកមនុស្សជាលើកដំបូងឡើងទៅកាន់ស្ថានីយអវកាសអន្តរជាតិ (ISS) នៅក្នុងខែកុម្ភៈ ២០២៣។

ចាប់ពីឆ្នាំ ២០២០ អ្នកអវកាសអាម៉េរិក អាចឡើងទៅកាន់ ISS តាមរយៈយានអវកាសរបស់ក្រុមហ៊ុន SpaceX ប៉ុន្តែ ទីភ្នាក់ងារអវកាសអាម៉េរិក ណាសា (NASA) នៅតែចង់បន្ថែមជម្រើសដើម្បីកាត់បន្ថយការពឹងផ្អែកទៅលើប្រព័ន្ធបាញ់បង្ហោះរបស់ រុស្ស៊ី។

ណាសា កំពុងតែសហការជាមួយ Boeing ដើម្បីអភិវឌ្ឍ «តាក់ស៊ីអវកាស» ដែលត្រូវបានដាក់ឈ្មោះថា Starliner ក្នុងគោលដៅបញ្ជូនមនុស្សទៅកាន់ទីអវកាស ១ លើក/ឆ្នាំ។

«បច្ចុប្បន្ន យើងកំពុងកំណត់ថ្ងៃបាញ់បង្ហោះយ៉ាងឆាប់ត្រឹមខែកុម្ភៈ ២០២៣» Steve Stich ប្រធានកម្មវិធីហោះហើរពាណិជ្ជកម្មរបស់ ណាសា ឱ្យដឹងដូច្នេះ។

យោងតាម Mark Nappi ប្រធានកម្មវិធី Starliner របស់ Boeing បេសកកម្មដឹកមនុស្សដំបូងរបស់ Starliner ដែលមានឈ្មោះថា CFT នឹងដឹកអ្នកអវកាស ២ រូបរបស់ សហរដ្ឋអាម៉េរិក គឺ Barry Wilmore និង Sunita Williams ឡើងទៅកាន់ ISS ហើយក្រោយមកត្រលប់មកកាន់ផែនដី និងចុះចតដោយឆត្រយោង។

ដូចទៅនឹងការហោះហើរសាកល្បងគ្មានមនុស្សបើកបរកន្លងមក Starliner នឹងនៅតែប្រើប្រាស់រ៉ុក្កែត Atlas V របស់ សហរដ្ឋអាម៉េរិក ដើម្បីនាំមនុស្សឡើងទៅកាន់ស្ថានីយអវកាសអន្តរជាតិ៕

August 27, 2022

ទ័ពអាកាសអាម៉េរិក និង កូរ៉េខាងត្បូង បានបញ្ចប់សមយុទ្ធយោធា Buddy Wing

កងទ័ពសហរដ្ឋអាម៉េរិក និងកងទ័ពកូរ៉េខាងត្បូង បានបញ្ចប់សមយុទ្ធយោធារួមគ្នាក្នុងថ្ងៃទី ២៥ ខែសីហាកន្លងទៅ។

សមយុទ្ធយោធាដែលមានឈ្មោះថា Buddy Wing ខាងលើត្រូវបានធ្វើឡើងចាប់ពីថ្ងៃទី ២៣ ដល់ ២៥ សីហា។ នេះគឺជាសមយុទ្ធមួយដែលភ្ជាប់ពីសមយុទ្ធ Freedom Shield (ខែលការពារសេរីភាព) របស់កងទ័ពអាម៉េរិក និងកូរ៉េខាងត្បូង។

កងទ័ពសហរដ្ឋអាម៉េរិក បានបញ្ជូនយន្តហោះចម្បាំង F-16 និងអ្នកជំនាញផ្នែកយោធាជាង ៤០ នាក់ ចូលរួមសមយុទ្ធយោធាជាមួយទ័ពអាកាសរបស់ កូរ៉េខាងត្បូង ក្នុងនោះ កូរ៉េខាងត្បូង ប្រើប្រាស់យន្តហោះចម្បាំង KF-16។ យន្តហោះចម្បាំងសរុបដែលត្រូវបានប្រើប្រាស់ក្នុងសមយុទ្ធរួមគ្នានេះគឺមានជាង ១០ គ្រឿង។

ដោយបានបង្កើតឡើងកាលពីឆ្នាំ ១៩៩៧ Buddy Wing គឺជាសមយុទ្ធមួយក្នុងចំណោមសមយុទ្ធថ្នាក់វរសេនាតូចសម្រាប់ក្រុមអ្នកបើកបរយន្តហោះចម្បាំងរបស់ ទ័ពអាកាសអាម៉េរិក និង កូរ៉េខាងត្បូង ក្នុងបំណងពង្រឹងសមត្ថភាពប្រយុទ្ធលើអាកាស និងការសហការក្នុងសមរភូមិ៕

August 26, 2022

យន្តហោះដឹកអ្នកដំណើរជិត ២០០ នាក់ ឆេះម៉ាស៊ីនពេលកំពុងហោះហើរ

(ម៉ិកស៊ិក)-យន្តហោះរបស់ក្រុមហ៊ុនអាកាសចរណ៍ម៉ិកស៊ិក Viva Aerobus ត្រូវចុះចតបន្ទាន់នៅពេលកំពុងហោះទៅកាន់ Los Angeles ដោយសារតែឆេះម៉ាស៊ីនខាងស្ដាំ បន្ទាប់ពីបានហោះឡើង។

កាលពីព្រលប់ថ្ងៃទី ២៣ សីហា យន្តហោះ Airbus A320 របស់ក្រុមហ៊ុន Viva Aerobus ដែលចេញដំណើរពីទីក្រុង Guadalajara ប្រទេសម៉ិកស៊ិក ឆ្ពោះទៅកាន់ Los Angeles សហរដ្ឋអាម៉េរិក ដឹកមនុស្ស ១៨៦ នាក់។

ក្រោយពីហោះឡើងបានប្រហែល ១០ នាទី អ្នកដំណើរបានឮសូរសំឡេងផ្ទុះ និងឃើញកម្ទេចភ្លើង និងអណ្ដាតភ្លើងបាញ់ចេញពីម៉ាស៊ីនផ្នែកខាងស្ដាំងរបស់យន្តហោះ។ អ្នកដំណើរស្រែកប្រាប់ក្រុមហោះហើរនៅពេលយន្តហោះកំពុងស្ថិតនៅលើកម្ពស់ ៤,០០០ ម៉ែត្រ។ យន្តហោះក៏ត្រូវបានបង្វែរក្បាលហោះត្រលប់ក្រោយ និងចុះចតដោយសុវត្ថិភាពនៅ Guadalajara។

ថ្វីបើហេតុការណ៍នេះមិនបានបណ្ដាលឱ្យអ្នកណាម្នាក់រងរបួស ប៉ុន្តែ វាបានធ្វើឱ្យអ្នកដំណើរភ័យស្លន់ស្លោ។ អ្នកដំណើរខ្លះយំ ខ្លះស្រែកដោយរន្ធត់ និងខ្លះទៀតបួសសួងសុំសេចក្ដីសុខសុវត្ថិភាព។

មួយថ្ងៃក្រោយពីហេតុការណ៍បានកើតឡើង ក្រុមហ៊ុន Viva Aerobu បានប្ដូរយន្តហោះផ្សេងដើម្បីដឹកអ្នកដំណើរទាំងនោះទៅកាន់ Los Angeles។

ក្រុមហ៊ុនអាកាសចរណ៍ខាងលើឱ្យដឹង កម្ទេចភ្លើង និងអណ្ដាតភ្លើងដែលបាញ់ចេញពីម៉ាស៊ីនរបស់យន្តហោះនេះគឺកើតឡើងដោយសារការកកិតរវាងលោហធាតុ ហើយថា កំពុងតែស្រាវជ្រាវរកមូលហេតុ៕

August 26, 2022

រកឃើញពិភពគ្របដណ្ដប់ដោយទឹកថ្មីមួយ ស្ថិតនៅក្រៅប្រព័ន្ធព្រះអាទិត្យ

ក្រុមអ្នកតារាសាស្ត្របានរកឃើញពិភពមួយដែលទំនងជាមានទឹកគ្របដណ្ដប់ទាំងស្រុង ចម្ងាយពីពិភពផែនដីប្រមាណ ១០០ ឆ្នាំពន្លឺ។

ពិភព TOI-1452 b គោចរជុំវិញព្រះអាទិត្យរបស់វានៅក្នុងប្រព័ន្ធផ្កាយភ្លោះស្ថិតក្នុងកញ្ចុំផ្កាយ Draco។ ក្នុងការស្រាវជ្រាវដែលបានប្រកាសលើទស្សនាវដ្ដីតារាសាស្ត្រកាលពីថ្ងៃទី ១២ សីហា អ្នកស្រាវជ្រាវរាប់សិបនាក់មកពីវិទ្យាស្ថាននានានៅទូទាំងពិភពលោក បានបញ្ជាក់អំពីវត្តមានរបស់ TOI-1452 b តាមរយៈការប្រើប្រាស់ផ្កាយរណបសង្កេតភពដែលនៅខាងក្រៅប្រព័ន្ធព្រះអាទិត្យ TESS ក៏ដូចជាស្ថានីយសង្កេត Mont-Megantic នៅ ប្រទេសកាណាដា និងតេឡេស្កុប MuSCAT3 នៅ Hawaii។

ភពថ្មីដែលទើបតែបានរកឃើញនេះ ត្រូវគេអះអាងថា ធំជាងប្រហែល ៧០% និងធ្ងន់ជាងជិត ៥ ដង បើធៀបនឹងផែនដីរបស់មនុស្ស។ TOI-1452 b វិលជុំវិញផ្កាយមេ ១១ ថ្ងៃក្នុង ១ ជុំ និងត្រូវបានគេជឿថា មានសីតុណ្ហភាពល្មម។ ផ្កាយមេ និងផ្កាយ ១ ដួងផ្សេងទៀត វិលជុំវិញគ្នាក្នុងគម្លាតឆ្លាយជាង ២.៥ ដង ធៀបនឹងរយៈចម្ងាយពីផែនដីទៅកាន់ភពភ្លុយតូ (Pluto)។

ក្រុមអ្នកវិទ្យាសាស្ត្របានរកឃើញភ័ស្ដុតាងបង្ហាញថា TOI-1452 b គឺជាភពដែលមានទឹកគ្របដណ្ដប់ នេះបើតាម Charles Cadieux ដែលជាប្រធានក្រុមស្រាវជ្រាវលើ TOI-1452 b។

លទ្ធផលនៃការស្រាវជ្រាវបង្ហាញថា ទឹកមានចំណែកប្រមាណ ៣០% នៃទម្ងន់សរុបរបស់ TOI-1452 b ដែលនេះស្រដៀងទៅនឹងព្រះចន្ទមួយចំនួននៅក្នុងប្រព័ន្ធព្រះអាទិត្យរបស់មនុស្ស ដូចជា Titan និង Ganymede ជាដើម។

ទោះជាយ៉ាងណាក៏ដោយ ដើម្បីបញ្ជាក់ឱ្យបានប្រាកដថា TOI-1452 b ពិតជាមានទឹក ឬអត់ ក្រុមអ្នកវិទ្យាសាស្ត្រត្រូវការសង្កេតបន្ថែមដោយប្រើប្រាស់កែវយឹតអវកាស James Webb។ ក្រុមអ្នកស្រាវជ្រាវកំពុងព្យាយាមដាក់កក់កាលបរិច្ឆេទប្រើប្រាស់ James Webb ដើម្បីសង្កេតមើលភពនេះឱ្យបានច្បាស់ នៅពេលឆាប់ៗខាងមុខ៕

August 25, 2022

រាប់រយនាក់ភ័យស្លន់ស្លោ ពេលរថភ្លើងក្រោមដីខូចកណ្ដាលផ្លូវនៅក្រោមចក្រសមុទ្រ Manche

អ្នកដំណើររាប់រយនាក់ត្រូវជាប់ជាច្រើនម៉ោងនៅក្នុងផ្លូវរូងក្រោមច្រកសមុទ្រ Manche ចន្លោះ ប្រទេសបារាំង និង អង់គ្លេស ដោយសារតែរថភ្លើងខូចកណ្ដាលផ្លូវ។

Gettlink ដែលជាក្រុមហ៊ុនគ្រប់គ្រងផ្លូវដែកភ្ជាប់ពីភាគខាងជើងនៃ ប្រទេសបារាំង ទៅនឹងភាគអាគ្នេយ៍របស់ ប្រទេសអង់គ្លេស បានឱ្យដឹងថា អ្នកដំណើរ ៤០០ នាក់ មកពី ប្រទេសបារាំង ទៅកាន់ អង់គ្លេស ត្រូវចុះដើរចាកចេញពីរថភ្លើង បន្ទាប់ពីរថភ្លើងនេះជួបបញ្ហានៅក្នុងផ្លូវរូងក្រោមច្រកសមុទ្រ Manche កាលពីម្សិលមិញ (២៤ សីហា)។

Sarah Fellows ជាអ្នកដំណើរម្នាក់មានអាយុ ៣៧ ឆ្នាំ បានប្រាប់ថា នេះជាហេតុការណ៍ដ៏គួរឱ្យភ័យខ្លាចជាទីបំផុត ហើយ «ទិដ្ឋភាពដូចទៅនឹងឈុតឆាកទីបញ្ចប់នៃពិភពលោកក្នុងខ្សែភាពយន្ត។ យើងដើរទៅកាន់ជ្រោះជ្រៅដោយមិនដឹងច្បាស់ថាមានរឿងអ្វីកើតឡើង។ គ្រប់គ្នាស្ថិតនៅក្រោមសមុទ្រ។ ស្ត្រីម្នាក់ស្រែកយំក្នុងផ្លូវរូងក្រោមដី ចំណែកម្នាក់ទៀតភ័យស្លន់ស្លោដោយសារតែដើរម្នាក់ឯង» នាង Sarah Fellows រៀបរាប់អំពីអ្វីដែលបានកើតឡើងនៅក្នុងហេតុការណ៍រថភ្លើងក្រោមដីមានបញ្ហាខាងលើ។

អ្នកដំណើរម្នាក់ឈ្មោះ Michael Kent ឱ្យដឹងថា គ្រប់គ្នាជាប់ក្នុងរថភ្លើងក្រោមដីនេះជាច្រើនម៉ោង មុនពេលត្រូវបានឈ្លៀស និងបានចែករំលែករូបភាពបង្ហាញថា មនុស្សម្នាកំពុងរង់ចាំរាប់ម៉ោងខាងក្នុងរថភ្លើង និងដើរតាមបណ្ដោយផ្លូវរូងក្រោមដី មុនពេលបានឡើងរថយន្តក្រុងត្រលប់ទៅកាន់ស្ថានីយរថភ្លើង Folkestone នៅ ប្រទេសអង់គ្លេស។

ប្រព័ន្ធផ្លូវរូងក្រោមដីឆ្លងកាត់ច្រកសមុទ្រ Manche ដែលត្រូវបានសម្ពោធដាក់ឱ្យប្រើប្រាស់កាលពីឆ្នាំ ១៩៩៤ មាន រួមមាន ២ ខ្សែ ក្នុងនោះផ្លូវរូង ១ ខ្សែសម្រាប់រថភ្លើង និង ១ ខ្សែទៀតសម្រាប់សេវាកម្មផ្សេងៗ ហើយ ១ ខ្សែៗមានប្រវែង ៥០ គីឡូម៉ែត្រ។ កំណាត់ផ្លូវរូងក្រោមសមុទ្រមានប្រវែងប្រមាណ ៣៨.៦ គីឡូម៉ែត្រ ដែលជាផ្លូវរូងក្រោមសមុទ្រវែងជាងគេបង្អស់ក្នុងពិភពលោក។

August 25, 2022

នាយករដ្ឋមន្ត្រីថៃ ត្រូវតុលាការធម្មនុញ្ញផ្អាកតួនាទីបណ្ដោះអាសន្ន

តុលាការធម្មនុញ្ញនៃប្រទេសថៃ បានព្យួរតួនាទីរបស់ នាយករដ្ឋមន្ត្រី Prayuth Chan-ocha នៅក្នុងពេលពិនិត្យលើការតវ៉ាដែលថា លោកបានកាន់តំណែងយូរគ្រប់គ្រាន់ទៅតាមការកំណត់។

សេចក្ដីសម្រេចនេះត្រូវបានធ្វើឡើងបន្ទាប់ពីតុលាការយល់ព្រមពិនិត្យពាក្យបណ្ដឹងរបស់ក្រុមបក្សនៅក្រៅរដ្ឋាភិបាល ដែលបានប្ដឹងលោក Prayuth បានស្ថិតនៅក្នុងតួនាទីជានាយករដ្ឋមន្ត្រីគ្រប់ ៨ ឆ្នាំ ទៅតាមការកំណត់របស់ច្បាប់។ រដ្ឋធម្មនុញ្ញរបស់ ប្រទេសថៃ ហាមនាយករដ្ឋមន្ត្រីកាន់អំណាចលើសពី ៨ ឆ្នាំ។

«តុលាការបានពិនិត្យពាក្យបណ្ដឹង និងឯកសារនានា និងបានរកឃើញថា មានមូលដ្ឋានសមស្របដើម្បីសង្ស័យថា កើតមានករណីដូចបានតវ៉ា» ប្រកាសរបស់តុលាការធម្មនុញ្ញថៃ ឱ្យដឹងដូច្នេះ។ «ដូច្នេះ ចៅក្រមភាគច្រើន (៥/៩) យល់ថា នាយករដ្ឋមន្ត្រី Prayuth ត្រូវតែព្យួរតួនាទីចាប់ពីថ្ងៃទី ២៤ សីហា រហូតដល់ពេលតុលាការធ្វើការសម្រេចចិត្ត»។

លោក Prayut Chan-ocha បានឡើងគ្រប់គ្រងតំណែងជានាយករដ្ឋមន្ត្រីរបស់ ប្រទេសថៃ តាំងពីឆ្នាំ ២០១៤ នៅពេលមានរដ្ឋប្រហារយោធាកើតឡើង។

August 24, 2022

សហរដ្ឋអាម៉េរិក ផ្ដល់ជំនួយយោធាបន្ថែម តម្លៃរាប់ពាន់លានដុល្លារ ដល់ អ៊ុយក្រែន

សេតវិមាន ត្រៀមប្រកាសកញ្ចប់ជំនួយយោធាតម្លៃរាប់ពាន់លានដុល្លារ ដល់ អ៊ុយក្រែន ដែលនេះគឺជាខ្ទង់ជំនួយធំបំផុតក្នុងរយៈពេល ៦ ខែមកនេះ។

មន្ត្រីជាន់ខ្ពស់របស់ សហរដ្ឋអាម៉េរិក សុំមិនបញ្ចេញឈ្មោះ បានឱ្យដឹងថា សេតវិមាន គ្រោងនឹងប្រកាសកញ្ចប់ជំនួយសន្តិសុខថ្មីតម្លៃ ៣ ពាន់លានដុល្លារ ដល់ អ៊ុយក្រែន យ៉ាងឆាប់នៅក្នុងថ្ងៃនេះ ជាថ្ងៃដែល អ៊ុយក្រែន ប្រារព្ធទិវាឯករាជ្យជាតិ។ នេះនឹងជាខ្ទង់ជំនួយផ្នែកយោធាធំបំផុតសម្រាប់ ទីក្រុងកៀវ រាប់ចាប់តាំងពី ទីក្រុងមូស្គូ បានបើកយុទ្ធនាការយោធានៅ អ៊ុយក្រែន កាលពី ៦ ខែមុន។

មន្ត្រីជាន់ខ្ពស់របស់ សហរដ្ឋអាម៉េរិក បាននិយាយថា ជំនួយលើកនេះនឹងផ្ដោតសំខាន់ទៅលើគ្រាប់រំសេវ និងប្រព័ន្ធការពារគ្រាប់។

មុននោះ សហរដ្ឋអាម៉េរិក បានផ្ដល់ជំនួយផ្នែកយោធាប្រមាណ ១០.៦ ពាន់លានដុល្លារ ដល់ អ៊ុយក្រែន ដើម្បីទប់ទល់នឹង រុស្ស៊ី រាប់ចាប់តាំងពីសង្គ្រាមបានផ្ទុះឡើងកាលពីថ្ងៃទី ២៤ កុម្ភៈ ២០២២។

August 24, 2022

Category: អន្តរជាតិ