ប្រទេសចិន មានគម្រោងនាំអតិថិជនដំបូងៗរបស់ពួកគេ ហោះទៅកាន់ទីអវកាសនៅក្នុងដំណើរទេសចរណ៍ក្រោមគន្លងគោចរផែនដីនៅឆ្នាំ ២០២៥។
អ្នកវិទ្យាសាស្ត្រជាន់ខ្ពស់ Yang Yiqiang អតីតអគ្គនាយករបស់គម្រោងរ៉ុក្កែត Long March 11 កាលពីឆ្នាំ ២០១៨ និងជាស្ថាបនិករបស់ក្រុមហ៊ុនអវកាស CAS Space ដែលទទួលបានការគាំទ្រដោយរដ្ឋាភិបាលចិន បានព្យាករថា សេវាកម្មទេសចរណ៍អវកាសបែបពាណិជ្ជកម្មនឹង «ផ្ទុះការពេញនិយម» នាប៉ុន្មានឆ្នាំខាងមុខ។
«ដោយមានការកែលំអរូបមន្តពាណិជ្ជកម្ម ប្រទេសចិន គ្រោងនឹងចាប់ផ្ដើមផ្ដល់សេវាទេសចរក្រោមគន្លងគោចរនៅឆ្នាំ ២០២៥ ជាមួយនឹងតម្លៃប្រមាណពី ២ ទៅ ៣ លានយុន (២៨៦,០០០ ដល់ ៤៣០,០០០ ដុល្លារអាម៉េរិក)។ នេះបើតាមសារព័ត៌មាន Global Times ស្រង់សម្ដីរបស់លោក Yang ចុះផ្សាយកាលពីថ្ងៃទី ១៧ កញ្ញា។
លោក Yang បានឱ្យដឹងថា ទេសចរណ៍ក្រោមគន្លងគោចររបស់ផែនដីបានរីកចម្រើនជាងមុនទាក់ទងនឹងបញ្ហាបច្ចេកទេស ធៀបនឹងប្រភេទទេសចរណ៍អវកាសដទៃ និងសមស្របសម្រាប់មនុស្សស្ទើរតែគ្រប់គ្នា។ ការហោះហើរនាពេលអនាគតរបស់ ប្រទេសចិន អាចនាំអតិថិជន ៧ នាក់/ជើង ឡើងទៅកាន់ជាន់ខាងលើនៃបន្ទាត់ Karman ក្នុងរយៈកម្ពស់ជាង ១០០ គីឡូម៉ែត្រ ជាទីដែលត្រូវបានចាត់ទុកថាជាព្រំដែនរវាងបរិយាកាសផែនដី និងបរិយាកាសខាងក្រៅផែនដី។ ការហោះហើរនេះនឹងមានរយៈពេលប្រហែល ១០ នាទី ក្នុងនោះ អតិថិជននឹងមានពេលច្រើននាទីដើម្បីទទួលយកបទពិសោធន៍ក្នុងបរិស្ថានមិនមានទម្ងន់។
នៅក្នុងប្រកាសមួយកាលពីឆ្នាំកន្លង CAS Space បាននិយាយថា ពួកគេកំពុងអភិវឌ្ឍរ៉ុក្កែត និងយានអវកាសដែលអាចប្រើប្រាស់ឡើងវិញ សម្រាប់ដំណើរទេសចរណ៍អវកាសនេះ។ នៅពេលហោះឡើងដល់បន្ទាត់ Karman រ៉ុក្កែតនឹងផ្ដាច់ខ្លួន រួចវិលត្រលប់មកកាន់បរិយាកាស ចុះចតលើផែនដីដោយប្រើប្រាស់ម៉ាស៊ីនរ៉ុក្កែត ខណៈដែលយានអវកាសបន្តហោះហើរ និងចុះចតដោយប្រព័ន្ធឆត្រយោង។
សេវាកម្មទេសចរណ៍អវកាសបែបពាណិជ្ជកម្មរបស់ ប្រទេសចិន នឹងផ្ទុះការពេញនិយមនៅឆ្នាំ ២០២៧ នៅពេលប្រទេសនេះដាក់ពង្រាយរួចរាល់នូវប្រព័ន្ធផ្កាយរណបដ៏ធំ និងនៅពេលមានរ៉ុក្កែតដែលអាចប្រើប្រាស់ឡើងវិញ។
ចិន គឺជាប្រទេសដែលចាប់ផ្ដើមដំណើរការសកម្មភាពសម្រាប់ទេសចរណ៍អវកាសបែបពាណិជ្ជកម្មក្រោយគេ ធៀបនឹងមហាអំណាចមួយចំនួន ប៉ុន្តែកំពុងតែដុតដៃដុតជើងដើម្បីបង្កើនល្បឿន ក្នុងនោះមាន ៣៧០ ក្រុមហ៊ុនបានលោតចូលក្នុងវិស័យអវកាសពាណិជ្ជកម្ម គិតត្រឹមឆ្នាំកន្លង។ នេះបើតាមព័ត៌មានពីថ្នាលព័ត៌មានពាណិជ្ជកម្ម Qichacha៕
