ឃ្លាំងអាវុធមួយកន្លែងរបស់ រុស្ស៊ី នៅក្នុងខេត្ត Belgorod ក្បែរព្រំដែនជាមួយ អ៊ុយក្រែន បានផ្ទុះ បណ្ដាលឱ្យមនុស្ស ១៤ នាក់ត្រូវរងរបួស ខណៈដែលមូលហេតុត្រូវបានក្រុមមន្ត្រីក្នុងតំបន់យល់ថាគឺជា «កំហុសរបស់មនុស្ស»។
«ដោយសារកត្តាមនុស្ស ឃ្លាំងគ្រាប់រំសេវមួយបានផ្ទុះ នៅក្នុងខណ្ឌ Valuysky» Vyacheslav Gladkov អភិបាលខេត្ត Belgorod នៅភាគខាងលិចប្រទេសរុស្ស៊ី សរសេរលើបណ្ដាញសង្គម Telegram កាលពីថ្ងៃទី ២៨ កញ្ញាដូច្នេះ។ អភិបាលខេត្តខាងលើបន្ថែមថា អ្នកដែលរងរបួសបានទទួលការព្យាបាល ហើយកងកម្លាំងសង្គ្រោះបន្ទាន់ត្រូវបានបញ្ជូនទៅកាន់កន្លែងកើតហេតុ។
ខណ្ឌ Valuysky មានប្រជាជនប្រហែល ៣៨ ពាន់លាន ស្ថិតនៅចម្ងាយពីព្រំដែនអ៊ុយក្រែន ប្រហែល ១៥ គីឡូម៉ែត្រទៅទិសខាងជើង។ តំបន់នេះធ្លាប់រងការវាយប្រហារបន្ទាប់ពីកងទ័ពរបស់ រុស្ស៊ី ដកចេញពីខេត្ត Kharkov ភាគឦសានប្រទេសអ៊ុយក្រែន កាលពីដើមខែនេះ។
ក្នុងមួយរយៈពេលខ្លីចុងក្រោយនេះ ឃ្លាំងអាវុធជាច្រើនកន្លែងនៅក្នុងខេត្ត Belgorod របស់ រុស្ស៊ី បានផ្ទុះជាបន្តបន្ទាប់។ អភិបាលរបស់ ខេត្ត Belgorod បានឱ្យដឹងថា ហេតុការណ៍ភាគច្រើនកើតឡើងដោយសារកត្តាមនុស្ស ឬអាកាសធាតុក្ដៅខ្លាំង ប៉ុន្តែក៏បានចោទថា កងទ័ពអ៊ុយក្រែន បានប្លោងគ្រាប់ដាក់តំបន់នេះផងដែរ។
អាជ្ញាធរអ៊ុយក្រែន តែងតែចៀសវាងការប្រកាសថានៅពីក្រោយហេតុការណ៍ផ្ទុះឃ្លាំងអាវុធនៅ រុស្ស៊ី ប៉ុន្តែ ធ្លាប់បានចំអកថា ទាហានរុស្ស៊ី មានការធ្វេសប្រហែស។ អភិបាលខេត្ត Lugansk របស់ អ៊ុយក្រែន កាលពីថ្ងៃទី ១៤ កញ្ញា បានព្រមានថា កងទ័ពអ៊ុយក្រែន អាចនឹងវាយប្រហារចូលក្នុងទឹកដីរបស់ រុស្ស៊ី បើសិនជាចាំបាច់៕
