អន្តរជាតិ - La Reine Media

កូរ៉េខាងត្បូង ថា កូរ៉េខាងជើង បាញ់កាំភ្លើងធំ 80 គ្រាប់ទៅកាន់តំបន់ការពារយោធា

កងទ័ពកូរ៉េខាងត្បូង នាថ្ងៃទី 04 វិច្ឆិកានេះបានប្រកាសថា កូរ៉េខាងជើង បានបាញ់កាំភ្លើងធំប្រហែល 80 គ្រាប់ ទៅលើតំបន់ការពារយោធានៅតំបន់សមុទ្រភាគខាងកើតប្រទេសនេះ។

យោងតាម Yonhap កងទ័ពកូរ៉េខាងត្បូង នាថ្ងៃទី 04 វិច្ឆិកានេះបានប្រកាសថា កូរ៉េខាងជើង បានបាញ់កាំភ្លើងធំប្រហែល 80 គ្រាប់ទាំងយប់ទៅលើតំបន់ការពារយោធានៅតំបន់សមុទ្រភាគខាងកើតប្រទេសនេះ ដែលនេះជាការរំលោភលើកិច្ចព្រមព្រៀងឆ្នាំ 2018 ជាមួយនឹង កូរ៉េខាងត្បូង ស្ដីពីការកាត់បន្ថយភាពតានតឹងផ្នែកយោធា។

សកម្មភាពខាងលើបានកើតមានឡើងក្នុងពេលដែល កូរ៉េខាងជើង បន្តការបាញ់មីស៊ីលជាបន្តបន្ទាប់នាពេលកន្លង។

ដោយឡែកនៅក្នុងថ្ងៃទី 2-2 វិច្ឆិកា កូរ៉េខាងជើង បានបាញ់មីស៊ីលជិត 30 គ្រាប់ទៅកាន់សមុទ្រភាគខាងកើត និងភាគខាងលិចប្រទេសនេះ។

ក្នុងចំណោមមីស៊ីលដែល កូរ៉េខាងជើង បានបាញ់ មាន 1 គ្រាប់បានធ្លាក់ក្បែរដែនសមុទ្ររបស់ កូរ៉េខាងត្បូង និង 1 គ្រាប់ទៀតដែល កូរ៉េខាងត្បូង ជឿថាជាមីស៊ីលអន្តរទ្វីប Hwasong-17៕

November 4, 2022

អេស្ប៉ាញ ៖ បាតុកររាប់ពាន់នាក់ទាមទារឱ្យនិយោជកដំឡើងប្រាក់ខែ

បញ្ហាអតិផរណានៅ ប្រទេសអេស្ប៉ាញ បានថយចុះមកនៅត្រឹម 7.3% ក្នុងខែតុលាឆ្នាំនេះ បើធៀបនឹងជាង 10% ក្នុងបណ្ដាខែនៅរដូវក្ដៅ ចំណែកប្រាក់ខែវិញ បានឡើងតែ 1% ប៉ុណ្ណោះ ដែលនេះធ្វើឱ្យជីវភាពរបស់ពលករត្រូវធ្លាក់ទៅក្នុងស្ថានភាពលំបាក។

ពលរដ្ឋអេស្ប៉ាញ រាប់ពាន់នាក់ បានប្រមូលផ្ដុំគ្នានៅលើទីលាន Plaza Mayor នៅ រាជធានីម៉ាឌ្រីដ ដើម្បីធ្វើបាតុកម្មទាមទារដំឡើងប្រាក់ខែ។ នេះគឺជាបាតុកម្មទ្រង់ទ្រាយធំដំបូងនៅប្រទេសនេះ រាប់ចាប់ពីវិបត្តិនៃការចំណាយក្នុងការរស់នៅ។

ក្រុមបាតុករនាំគ្នាលើកបដាដែលសរសេរពាក្យស្លោក និងស្រែកហ៊ោជយឃោសន៍ទាមទារឱ្យនិយោជកដំឡើងប្រាក់ខែ ក្នុងគ្រាដែលទំនិញឡើងថ្លៃខ្ពស់។

ក្នុងកិច្ចសម្ភាសជាមួយទូរទស្សន៍ SER លោក Unai Sordo អគ្គលេខាធិការនៃសហជីពធំបំផុតនៅ អេស្ប៉ាញ CCOO បានសង្កត់ធ្ងន់ថា បំណងខាងលើរបស់ពលករគឺជារឿងសមស្រប។

ក្រុមសហជីពនៅ អេស្ប៉ាញ ចង់ឱ្យមានការដំឡើងប្រាក់ខែប្រហែលពី 4 ទៅ 4.5% នៅក្នុងឆ្នាំនេះ និង ពី 2.5 ទៅ 3% នៅក្នុង 2 ឆ្នាំបន្តបន្ទាប់ខាងមុខ។

អតិផរណានៅ អេស្ប៉ាញ បានថយចុះមកនៅ 7.3% ក្នុងខែតុលាឆ្នាំនេះ ធៀបនឹងជាង 10% ក្នុងបណ្ដាខែនៅរដូវក្ដៅ។ ក៏ប៉ុន្តែ អត្រានេះនៅតែខ្ពស់ជាងឆ្ងាយ បើធៀបនឹងអំឡុងពេលដទៃ។

អតិផរណាកើនឡើងខ្ពស់ រួមនឹងបញ្ហាឱនភាពសេដ្ឋកិច្ច ភាគច្រើនគឺជាលទ្ធផលនៃផលប៉ះពាល់របស់សង្គ្រាមនៅ អ៊ុយក្រែន និងស្ថានភាពរអាក់រអួលនៃប្រភពផ្គត់ផ្គង់ឥន្ធនៈ និងឧស្ម័នដែលនាំចូលទៅ អឺរ៉ុប៕

November 4, 2022

មហាសន្និបាតអង្គការសហប្រជាជាតិ ថ្កោលទោសចំពោះទណ្ឌកម្មរបស់ អាម៉េរិក លើ គុយបា

រដ្ឋមន្ត្រីការបរទេសគុយបា Bruno Rodriguez បានឱ្យដឹងថា ចាប់តាំងពីឆ្នាំ 2019 រដ្ឋាភិបាលអាម៉េរិក បានបង្កើនការហ៊ុមព័ទ្ធ ដាក់ទណ្ឌកម្មលើ គុយបា ក្នុងបំណងធ្វើឱ្យ ប្រជាជនគុយបា រស់នៅក្នុងស្ថានភាពកាន់តែលំបាក។

កាលពីថ្ងៃទី 03 វិច្ឆិកា មហាសន្និបាតអង្គការសហប្រជាជាតិលើកទី 77 បានអនុម័តសេចក្ដីសម្រេចលើកទី 30 ដែលថ្កោលទោសចំពោះការដាក់ទណ្ឌកម្មសេដ្ឋកិច្ចរបស់ សហរដ្ឋអាម៉េរិក ទៅលើ គុយបា។ សេចក្ដីសម្រេចនេះទទួលបានសន្លឹកឆ្នោតគាំទ្រ 185/193 សំឡេង។

ថ្លែងនៅមុនការបោះឆ្នោត រដ្ឋមន្ត្រីការបរទេសគុយបា Bruno Rodriguez បានឱ្យដឹងថា ចាប់តាំងពីឆ្នាំ 2019 រដ្ឋាភិបាលអាម៉េរិក បានបង្កើនការហ៊ុមព័ទ្ធសេដ្ឋកិច្ចរបស់ គុយបា ក្នុងបំណងធ្វើឱ្យ ប្រជាជនគុយបា រស់នៅក្នុងស្ថានភាពកាន់តែលំបាក។

ក្នុងរយៈពេល 14 ខែដំបូងរបស់ រដ្ឋាភិបាលលោក ចូ បៃដិន ទណ្ឌកម្មសេដ្ឋកិច្ចរបស់ សហរដ្ឋអាម៉េរិក បានធ្វើឱ្យ គុយបា ខាតបង់ 6.35 ពាន់លានដុល្លារ ដែលស្មើនឹង 15 លានដុល្លារ/ថ្ងៃ។

រដ្ឋមន្ត្រីការបរទេសគុយបា Bruno Rodriguez ក៏យល់ថា រដ្ឋាភិបាលរបស់លោក បៃដិន កំពុងតែបន្តអនុវត្តគោលនយោបាយ «ដាក់សម្ពាធជាអតិបរមា» ពីសម័យប្រធានាធិបតី ដូណាល់ ត្រាំ ចំពោះ គុយបា។

លោក Bruno Rodriguez ឱ្យដឹងថា ក្នុងប៉ុន្មានខែកន្លងមកនេះ ថ្វីបើមានការកែសម្រួលជាវិជ្ជមានខ្លះ ប៉ុន្តែនៅតែមានការកំណត់ចំនួនជើងហោះហើរជាដើម របស់ សហរដ្ឋអាម៉េរិក ទៅកាន់ គុយបា។

នេះគឺជាលើកទី 30 ហើយ ដែលមហាសន្និបាតអង្គការសហប្រជាជាតិអនុម័តសេចក្ដីសម្រេចដែលស្នើឡើងជារៀងរាល់ឆ្នាំដោយ គុយបា ដើម្បីអំពាវនាវឱ្យដកទណ្ឌកម្ម ហើយសុទ្ធតែទទួលបានសំឡេងគាំទ្រច្រើនលើសលុប។

ក៏ប៉ុន្តែ សេចក្ដីសម្រេចរបស់ មហាសន្និបាតអង្គការសហប្រជាជាតិមានអំណាចតែក្នុងផ្នែកនយោបាយប៉ុណ្ណោះ ពោលគឺមិនមានលក្ខណៈចាប់បង្ខំឡើយ៕

November 4, 2022

ណាសា បញ្ជូនយានទៅកាន់អាចម៍ផ្កាយមួយដួងដែលមានដែកតម្លៃ 10,000,000,000,000,000,000 ដុល្លារនៅឆ្នាំក្រោយ

យានអវកាសណាសា គ្រោងនឹងហោះទៅកាន់អាចម៍ផ្កាយមួយដួងដែលមានផ្ទុកលោហធាតុមានតម្លៃយ៉ាងសម្បើម រួមមាន មាស នីកែល ដែកជាដើម មានតម្លៃប្រហែល 10,000,000,000,000,000,000 ដុល្លារអាម៉េរិក នៅខែតុលា 2023។

ក្រោយការពន្យារពេលច្រើនលើក ណាសា នឹងបន្តអនុវត្តបេសកកម្មស្រាវជ្រាវ 16 Psyche ដែលជាអាចម៍ផ្កាយមួយដួងស្ថិតនៅក្នុងខ្សែក្រវាត់អាចម៍ផ្កាយ (Asteroid belt) នេះបើតាម Futurism ចេញផ្សាយកាលពីថ្ងៃទី 02 វិច្ឆិកា។

16 Psyche មានទំហំស្មើនឹង 1% នៃទំហំសរុបរបស់ខ្សែក្រវាត់អាចម៍ផ្កាយ និងត្រូវបានគេសន្និដ្ឋានថាជាស្នូលរបស់ភពបុរាណមួយ។ ទំហំរបស់ 16 Psyche មិនជារឿងដែលក្រុមអ្នកវិទ្យាសាស្ត្រចាប់អារម្មណ៍ឡើយ ប៉ុន្តែ បរិមាណលោហធាតុ និងប្រភពរបស់វាទើបគួរឱ្យយកចិត្តទុកដាក់។ វាត្រូវបានគេជឿថា មានដែក នីកែល និងមាសយ៉ាងច្រើនសន្ធឹកដែលមានតម្លៃប្រមាណ 10,000,000,000,000,000,000 (10 quintillions) ដុល្លារអាម៉េរិក ច្រើនជាងតម្លៃសេដ្ឋកិច្ចទាំងមូលរបស់មនុស្សជាតិនៅលើផែនដី។

ណាសា បានបញ្ជាក់ថា យានអវកាសរបស់ខ្លួននឹងត្រូវបានបញ្ជូនឡើងដោយរ៉ុក្កែត Falcon Heavy របស់ SpacX យ៉ាងឆាប់ត្រឹមថ្ងៃទី 10 តុលា 2023។

Psyche 16 ត្រូវបានរកឃើញដំបូងកាលពីឆ្នាំ 1852។ ក្រុមអ្នកវិទ្យាសាស្ត្រយល់ថា នេះគឺជាដានរបស់ពិភពបុរាណមួយដែលត្រូវបានកម្ទេចដោយការប៉ះទង្គិចនៅពេលប្រព័ន្ធព្រះអាទិត្យកំពុងកកើត។ អាចម៍ផ្កាយនេះមានទទឹងប្រហែល 225 គីឡូម៉ែត្រ៕

November 3, 2022

ផ្ទុះនៅមូលដ្ឋានទ័ពអាកាសរបស់ រុស្ស៊ី ឧទ្ធម្ភាគចក្រច្រើនគ្រឿងរងការខូចខាត

មូលដ្ឋានទ័ពរបស់ រុស្ស៊ី នៅក្បែរព្រំដែនជាមួយ លីទុយអានី ត្រូវបានគេបំផ្ទុះ បណ្ដាលឱ្យឧទ្ធម្ភាគមួយចំនួនរងការខូចខាត ប៉ុន្តែមិនទាន់ដឹងច្បាស់ថា ភាគីខាងណាជាអ្នកទទួលខុសត្រូវ។

សារព័ត៌មានរុស្ស៊ី កាលពីថ្ងៃទី 31 តុលា បានផ្សាយថា ឧទ្ធម្ភាគចក្រវាយប្រហារ Ka-52 ចំនួន 2 គ្រឿង នៅព្រលានយន្តហោះយោធាក្នុងខេត្ត Pskov បានរងការខូចខាតពេលមានករណីផ្ទុះមួយចំនួនកាលពីព្រលប់ថ្ងៃមុននោះ។ របាយការណ៍បានឱ្យដឹងថា យ៉ាងហោចណាស់មានការផ្ទុះចំនួន 3 ករណីនៅព្រលានយន្តហោះដែលកំពុងមានការជួសជុលឧទ្ធម្ភាគចក្រយោធា។

«ការផ្ទុះនេះខ្លាំងដល់ថ្នាក់ធ្វើឱ្យបំណែករបស់យន្តហោះត្រូវខ្ទាតឆ្ងាយ 200 ម៉ែត្រ» ឆាណែល Telegram Baza បានឱ្យដឹងដូច្នេះ។ ភាគីខាង រុស្ស៊ី មិនទាន់លើកឡើងអំពីមូលហេតុនៃការផ្ទុះនេះនៅឡើយ។

សារព័ត៌មានអាម៉េរិក កាលពីថ្ងៃទី 02 វិច្ឆិកា បានបង្ហោះវីដេអូមួយបង្ហាញថា មានបុរសម្នាក់មិនស្គាល់អត្តសញ្ញាណ តម្រៀបវត្ថុមួយចំនួនដែលត្រូវបានគេជឿថាជាគ្រាប់ផ្ទុះ ហើយដាក់ទៅលើឧទ្ធម្ភាគចក្រយោធា 1 គ្រឿងរបស់ រុស្ស៊ី ដែលទំនងជាឧទ្ធម្ភាគ Ka-52។

CNN បានបញ្ជាក់ថា វីដេអូនេះត្រូវបានថតនៅក្នុងមូលដ្ឋានទ័ព Veretye នៅ Beredniki ក្នុងខេត្ត Pskov ដែលមានចម្ងាយប្រហែល 35 គីឡូម៉ែត្រ ពី ព្រំដែនរុស្ស៊ី-លីទុយអានី និង ព្រំដែនរុស្ស៊ី-អ៊ុយក្រែន ប្រហែល 10,000 គីឡូម៉ែត្រ។ រូបភាពពីផ្ដាយរណបបង្ហាញថា ឧទ្ធម្ភាគចក្រមួយចំនួនក្នុងមូលដ្ឋានទ័ពនេះបានខូចខាត។

អ៊ុយក្រែន កាលពីថ្ងៃទី 02 វិច្ឆិកា ឱ្យដឹងថា «ករណីផ្ទុះខ្លាំងបានកើតឡើងនៅមូលដ្ឋានទ័ពអាកាស Veretye របស់ រុស្ស៊ី។ លទ្ធផលនៃការផ្ទុះគឺឧទ្ធម្ភាគចក្រវាយប្រហារ Ka-52 ចំនួន 2 គ្រឿង និងឧទ្ធម្ភាគចក្រ Mi-28N របស់ រុស្ស៊ី បានខ្ទេចទាំងស្រុង ខណៈដែល 2 គ្រឿងទៀតរងការខូចខាតធ្ងន់ធ្ងរ»។

ក្រសួងការពារជាតិ របស់ រុស្ស៊ី មិនទាន់បញ្ចេញប្រតិកម្មអ្វីនៅឡើយ ទាក់ទិននឹងហេតុការណ៍ផ្ទុះខាងលើ៕

November 3, 2022

ករណីបាក់ស្ពានយោលសម្លាប់មនុស្សជាងរយនាក់នៅ ឥណ្ឌា ៖ ក្រុមហ៊ុនជួសជុលត្រូវបានចោទប្រកាន់

ក្រុមមន្ត្រីឥណ្ឌា បានចោទថា ក្រុមហ៊ុនជំនាញខាងផលិតនាឡិកា Oreva ដែលទទួលបានសិទ្ធិជួសជុលស្ពានយោល Morbi ត្រូវតែទទួលខុសត្រូវក្នុងករណីបាក់ស្ពានដែលបានបណ្ដាលឱ្យមនុស្ស 135 នាក់បាត់បង់ជីវិត។

«Oreva បានជួលក្រុមហ៊ុនម៉ៅការដែលមិនមានសមត្ថភាពគ្រប់គ្រាន់។ ខ្សែកាបសំខាន់ជាងគេរបស់ស្ពានមិនត្រូវបានផ្លាស់ប្ដូរនៅក្នុងការជួសជុល» រដ្ឋអាជ្ញាតុលាការឥណ្ឌា Harshendu Panchal បានប្រាប់ក្រុមអ្នកយកព័ត៌មានក្រោយសវនាការកាលពីថ្ងៃទី 01 វិច្ឆិកា និងបានឱ្យដឹងថា ខ្សែកាបសំខាន់បំផុតរបស់ស្ពាន Morbi ត្រូវច្រែះស៊ីទៅហើយ។

លោក Panchal ក៏បាននិយាយថា ប៉ូលិសបានរកឃើញថា ក្រុមហ៊ុនដំឡើងបន្ទះអាលុយមីញូម 4 ជាន់នៅលើស្ពាន Morbi ធ្វើឱ្យទម្ងន់របស់ផ្ទៃស្ពានត្រូវធ្ងន់ថែមមួយកម្រិតទៀត ដែលនេះនាំឱ្យស្ពានត្រូវបាក់នៅពេលមានមនុស្សច្រើននៅពីលើ។

ស្ពានយោល Morbi ប្រវែង 230 ម៉ែត្រ ដែលជាទីតាំងទាក់ទាញទេសចរខ្លាំងនៅទីរួមស្រុក Morbi ក្នុងរដ្ឋ Gujarat គឺជាស្ពានដែលសាងសង់កាលពីសម័យអាណានិគមអង់គ្លេស ហើយបានបើកដំណើរការឡើងវិញបន្ទាប់ពីការជួសជុលជិត 7 ខែ។

Deepak Parekh អ្នកគ្រប់គ្រងក្រុមហ៊ុន Oreva បានប្រាប់តុលាការថា ករណីបាក់ស្ពានយោល Morbi គឺកើតឡើងដោយសារ «បំណងរបស់ព្រះ»។ Parekh រួមនឹងមនុស្ស 8 នាក់ផ្សេងទៀត ក្នុងនោះរួមមាន អ្នកម៉ៅការ 2 នាក់, បុគ្គលិកលក់សំបុត្រ 5 នាក់ និងសន្តិសុខការពារស្ពាន Morbi 1 នាក់ ត្រូវបានប៉ូលិសចាប់ខ្លួនដើម្បីបម្រើឱ្យការស៊ើបអង្កេត៕

November 3, 2022

សេតវិមាននិយាយថា កូរ៉េខាងជើង កំពុងជញ្ជូនគ្រាប់កាំភ្លើងធំឱ្យ រុស្ស៊ី

សេតវិមាន បានឱ្យដឹងថា កូរ៉េខាងជើង កំពុងជញ្ជូនគ្រាប់កាំភ្លើងធំយ៉ាងច្រើនទៅឱ្យ រុស្ស៊ី ដើម្បីប្រើប្រាស់នៅ អ៊ុយក្រែន ដោយដាក់ក្នុងប្រអប់ទំនិញទៅកាន់ មជ្ឈិមបូព៌ា ឬ ទ្វីបអាហ្វ្រិក។

«សហរដ្ឋអាម៉េរិក ទទួលបានព័ត៌មានថា កូរ៉េខាងជើង កំពុងផ្គត់ផ្គង់ដោយសម្ងាត់នូវគ្រាប់កាំភ្លើងធំក្នុងបរិមាណច្រើនសម្រាប់យុទ្ធនាការយោធារបស់ រុស្ស៊ី នៅ អ៊ុយក្រែន ដោយលាក់គោលដៅតាមរយៈការបង្កើតប្រអប់ដែលនិយាយថា ពួកវាកំពុងត្រូវបានដឹកទៅកាន់ មជ្ឈិមបូព៌ា ឬ អាហ្វ្រិកខាងជើង» អ្នកនាំពាក្យរបស់ ក្រុមប្រឹក្សាសន្តិសុខជាតិអាម៉េរិក John Kirby ឱ្យដឹងកាលពីថ្ងៃទី 02 វិច្ឆិកា។

ក្រុមមន្ត្រីអាម៉េរិក មិនប្រាកដថា រុស្ស៊ី បានទទួលទំនិញនេះហើយ ឬនៅ និងកំពុងតាមដានសភាពការណ៍ ហើយថា នឹងពិភាក្សាជាមួយសម្ព័ន្ធមិត្ត និងដៃគូ ពិសេសគឺនៅ អង្គការសហប្រជាជាតិ ដើម្បីមានវិធានការទប់ទល់។

អ្នកនាំពាក្យក្រសួងការបរទេសអាម៉េរិក Ned Price យល់ថា ប្រទេសនេះអាចនឹងដាក់ទណ្ឌកម្មបន្ថែមដូចទៅនឹងករណី អ៊ីរ៉ង់ ផ្ដល់អាវុធឱ្យ រុស្ស៊ី បើទោះជា ក្រុងតេហេរ៉ង់ និង មូស្គូ សុទ្ធតែបានច្រានចោលការចោទប្រកាន់។

ភាគីខាង រុស្ស៊ី និង កូរ៉េខាងជើង មិនទាន់មានការអធិប្បាយឆ្លើយតបនឹងការចោទប្រកាន់នេះនៅឡើយ។

កូរ៉េខាងជើង នៅតែរក្សាទំនាក់ទំនងល្អជាមួយ រុស្ស៊ី ក្នុងគ្រាដែលបណ្ដាប្រទេសលោកខាងលិច ដាក់ទណ្ឌកម្មលើ ទីក្រុងមូស្គូ ដោយសារតែការចូលឈ្លានពាន អ៊ុយក្រែន។ ទីក្រុងព្យុងយ៉ាង ក៏បានចោទថា សហរដ្ឋអាម៉េរិក គឺជាដើមហេតុបង្កឱ្យមានវិបត្តិនៅ អ៊ុយក្រែន និងបានហៅគោលនយោបាយ «អនុត្តរភាព» របស់បស្ចិមលោក ថាជាមូលហេតុដែលនាំឱ្យ រុស្ស៊ី ត្រូវបើកយុទ្ធនាការយោធាដើម្បីការពារខ្លួន៕

November 3, 2022

កូរ៉េខាងជើង បាញ់មីស៊ីលប្លោង ធ្វើឱ្យ ជប៉ុន ប្រកាសជម្លៀសប្រជាជន

កូរ៉េខាងជើង បាញ់មីស៊ីលប្លោងចំនួន 2 គ្រាប់ ក្នុងនោះមាន 1 គ្រាប់ជាប្រភេទរយៈចម្ងាយឆ្ងាយ បណ្ដាលឱ្យ ជប៉ុន ត្រូវប្រកាសឱ្យឈ្លៀសប្រជាជនក្នុងខេត្តចំនួន 3 នៅភាគកណ្ដាល។

«កូរ៉េខាងជើង ទំនងជាបានបាញ់មីស៊ីល។ ចូរស្វែងរកជម្រកសុវត្ថិភាពនៅក្នុងផ្ទះ ឬបន្ទប់ក្រោមដី។ បទបញ្ជាជម្លៀសត្រូវអនុវត្តសម្រាប់បណ្ដាខេត្តនៅភាគកណ្ដាល Miyagi, Niigata និង Yamagata» រាជរដ្ឋាភិបាលជប៉ុន បានឱ្យដឹងដូច្នេះនៅក្នុងសេចក្ដីប្រកាសជូនដល់ប្រជាជនកាលពីម៉ោង 7 និង 50 នាទីថ្ងៃនេះ ត្រូវនឹងម៉ោង 5 និង 50 នាទីនៅ កម្ពុជា។

អាជ្ញាធរជប៉ុន បានឱ្យដឹងថា មីស៊ីលមិនត្រូវបានបាញ់ស្កាត់ និងបានធ្លាក់ទៅក្នុងមហាសមុទ្រប៉ាស៊ីហ្វិក។ នេះគឺជាលើកទីពីរហើយដែល កូរ៉េខាងជើង បានបាញ់មីស៊ីល និងបង្ខំឱ្យ ជប៉ុន ប្រកាសជម្លៀសប្រជាជននៅក្នុងរង្វង់ 1 ខែកន្លងមកនេះ។

ក្រសួងការពារជាតិជប៉ុន ក្រោយមកបាននិយាយថា មីស៊ីលមិនបានហោះឆ្លងកាត់ទឹកដីប្រទេសនេះដូចការព្រមាន និងបានប្រកាសថា កូរ៉េខាងជើង បានបាញ់មីស៊ីលប្លោងចំនួន 2 គ្រាប់បន្ថែមទៀត។ រដ្ឋមន្ត្រីក្រសួងការពារជាតិជប៉ុន Yasukazu Hamada ទទួលស្គាល់ថា ព័ត៌មានដំបូងគឺជាការយល់ច្រឡំ ដោយសារតែប្រទេសនេះ «បាត់ដានរបស់មីស៊ីល នៅពេលវាហោះឆ្លងកាត់សមុទ្រជប៉ុន»។

អាជ្ញាធរកូរ៉េខាងជើង មិនទាន់មានប្រតិកម្មណាមួយឆ្លើយតបនឹងព័ត៌មានខាងលើនៅឡើយ។

ករណីបាញ់មីស៊ីលខាងលើកើតឡើងមួយថ្ងៃបន្ទាប់ពី កូរ៉េខាងជើង បានបាញ់មីស៊ីលច្រើនប្រភេទយ៉ាងតិច 23 គ្រាប់កាលពីថ្ងៃទី 02 វិច្ឆិកា ដែលនេះគឺជាតួលេខច្រើនមិនធ្លាប់មានពីមុនមក។

សម្មភាពយោធារបស់ភាគីនានា កំពុងតែធ្វើឱ្យ ឧបទ្វីបកូរ៉េ «ឡើងកម្ដៅ» នាប៉ុន្មានខែចុងក្រោយនេះ។ កូរ៉េខាងជើង បានបាញ់ប្លោងមីស៊ីលជាច្រើនលើក ដោយលើកមូលហេតុថា ដើម្បីឆ្លើយតបនឹងសមយុទ្ធយោធារបស់ អាម៉េរិក កូរ៉េខាងត្បូង និងជប៉ុន។ ចំណែក សហរដ្ឋអាម៉េរិក និងសម្ព័ន្ធមិត្ត ក៏បានថ្កោលទោសករណីបាញ់ប្លោងមីស៊ីលរបស់ ព្យុងយ៉ាង ដោយចាត់ទុកថា នោះគឺជាសកម្មភាពបង្កហេតុ និងនាំឱ្យមានអស្ថិរភាព ព្រមទាំងបង្កើនការធ្វើសមយុទ្ធរួម៕

November 3, 2022

ហេតុការណ៍ប្រជ្រៀតគ្នាស្លាប់នៅ កូរ៉េខាងត្បូង ៖ សណ្ឋាគារក្បែរ «ផ្លូវមរណៈ» ពង្រីកផ្ទៃដីដោយខុសច្បាប់

ឯកសារសាងសង់បានបង្ហាញថា សណ្ឋាគារ Hamilton ដែលនៅជាប់នឹងកូនផ្លូវក្នុងហេតុការណ៍ប្រជ្រៀតជាន់គ្នាស្លាប់ជាងរយនាក់នៅ Itaewon បានពង្រីកផ្ទៃដីដោយខុសច្បាប់ បណ្ដាលឱ្យផ្លូវកាន់តែចង្អៀត។

សារព័ត៌មាន Yonhap កាលពីថ្ងៃទី 01 វិច្ឆិកា ដកស្រង់ឯកសារសាងសង់ បានឱ្យដឹងថា សណ្ឋាគារ Hamilton បានសាងសង់លម្ហទំហំ 17.2 ម៉ែត្រក្រឡានៅខាងជើងអគារធំដោយខុសច្បាប់។

បរិវេណលម្ហនេះស្ថិតនៅជាប់នឹង «ផ្លូវមរណៈ» ជាទីដែលបានកើតមានហេតុការណ៍ប្រជ្រៀតជាន់គ្នាស្លាប់យ៉ាងតិច 156 នាក់ កាលពីថ្ងៃទី 29 តុលា។ កូនផ្លូវជ្រាលដែលមានភោជនីយដ្ឋាន និងបារជាច្រើននេះ មានប្រវែងប្រហែល 45 ម៉ែត្រ ទទឹងប្រហែល 5 ម៉ែត្រត្រង់ចំណុចទួល និង 3.2 ម៉ែត្រត្រង់ចំណុចជម្រាល។

ផ្ទៃដីដែលសណ្ឋាគារ Hamilton បានពង្រីក បាននាំឱ្យកូនផ្លូវនេះកាន់តែតូចចង្អៀតបន្ថែមទៀត។ អាជ្ញាធរខណ្ឌ Yonsan បានឱ្យដឹងថា បានប្រកាសប្រាប់ខាងសណ្ឋាគារអំពីការរំលោភច្បាប់នេះ និងបានសម្រេចដាក់ពិន័យកាលពីឆ្នាំមុន ប៉ុន្តែ ពួកគេមិនមានសិទ្ធិបង្ខំឱ្យសណ្ឋាគារនេះរុះរើត្រង់ចំណុចពង្រីកខុសច្បាប់នោះឡើយ។

ក្នុងថ្ងៃដដែល អគ្គស្នងការនគរបាលជាតិកូរ៉េខាងត្បូង លោក Yoon Hee-keun បានឱ្យដឹងថា ប៉ូលិសនឹងពិនិត្យលើលទ្ធភាពនៃការរំលោភច្បាប់របស់សណ្ឋាគារ ក៏ដូចជាលទ្ធភាពដែលទាក់ទិនគ្នា រវាងផ្ទៃដីដែលសណ្ឋាគារបានពង្រីក និងហេតុការណ៍ដ៏រន្ធត់នេះ៕

November 2, 2022

កូរ៉េខាងត្បូង បាញ់មីស៊ីលឆ្លងកាត់ដែនសមុទ្រជាមួយ កូរ៉េខាងជើង

កូរ៉េខាងត្បូង ប្រកាសថា បានបាញ់មីស៊ីល 3 គ្រាប់សំដៅទៅភាគខាងជើងនៃដែនទឹកជាមួយនឹង កូរ៉េខាងជើង ដើម្បីឆ្លើយតបទៅនឹងករណី ទីក្រុងព្យុងយ៉ាង បាញ់មីស៊ីលប្លោង 10 គ្រាប់នាពេលកន្លង។

«យន្តហោះចម្បាំង F-15K និង KF-16 របស់ កូរ៉េខាងត្បូង បានបាញ់មីស៊ីលអាកាសប្រឆាំងដីចំគោលដៅកម្រិតខ្ពស់ទៅកាន់តំបន់សមុទ្រភាគខាងជើងនៃបន្ទាត់ព្រំដែនភាគខាងជើង (NLL) ដើម្បីឆ្លើយតបទៅនឹងការដែល កូរ៉េខាងជើង បាញ់មីស៊ីប្លោងរយៈចម្ងាយជិត» អគ្គសេនាធិការរួមកូរ៉េខាងត្បូង (JCS) ឱ្យដឹងនាថ្ងៃនេះដូច្នេះ ប៉ុន្តែមិនបានបង្ហើបអំពីប្រភេទរបស់មីស៊ីលដែលទើបបានបាញ់។

មុននោះ JCS បានប្រកាសថា កូរ៉េខាងជើង នាថ្ងៃទី 02 វិច្ឆិកា បានបាញ់មីស៊ីលប្លោងជាង 10 គ្រាប់ទៅកាន់តំបន់សមុទ្រភាគខាងកើតរបស់ ឧបទ្វីបកូរ៉េ ក្នុងនោះមាន 1 គ្រាប់បានហោះរំលង NLL មុនពេលធ្លាក់ទៅក្នុងសមុទ្រ និង 1 គ្រាប់ទៀតធ្លាក់នៅក្នុងតំបន់សមុទ្រដែលមានចម្ងាយពីទីក្រុង Sokcho ប្រហែល 57 គីឡូម៉ែត្រទៅទិសអាគ្នេយ៍។

គ្រាប់មីស៊ីលទី 3 របស់ កូរ៉េខាងជើង ហោះឆ្ពោះទៅកាន់កោះ Ulleungdo មុនពេលធ្លាក់ក្នុងដែនសមុទ្រអន្តរជាតិ។ មីស៊ីល 1 គ្រាប់នេះបានធ្វើឱ្យក្រុមមន្ត្រីនៅ កូរ៉េខាងត្បូង ត្រូវប្រកាសអាសន្ន និងបញ្ជាឱ្យឈ្លៀសមនុស្សនៅលើកោះនេះ។

ទីក្រុងសេអ៊ូល បានប្រកាសថា ការបាញ់មីស៊ីលរបស់ខ្លួននេះគឺចង់បង្ហាញថា កូរ៉េខាងត្បូង មានសមត្ថភាពគ្រប់គ្រាន់ក្នុងការវាយប្រហារសងសឹកទៅលើរាល់គោលដៅនៅ កូរ៉េខាងជើង និងចំគោលដៅកម្រិតខ្ពស់បំផុត។

សម្មភាពយោធារបស់ភាគីនានា កំពុងតែធ្វើឱ្យ ឧបទ្វីបកូរ៉េ «ឡើងកម្ដៅ» នាប៉ុន្មានខែចុងក្រោយនេះ។ កូរ៉េខាងជើង បានបាញ់ប្លោងមីស៊ីលជាច្រើនលើក ដោយលើកមូលហេតុថា ដើម្បីឆ្លើយតបនឹងសមយុទ្ធយោធារបស់ អាម៉េរិក កូរ៉េខាងត្បូង និងជប៉ុន។ ចំណែក សហរដ្ឋអាម៉េរិក និងសម្ព័ន្ធមិត្ត ក៏បានថ្កោលទោសករណីបាញ់ប្លោងមីស៊ីលរបស់ ព្យុងយ៉ាង ដោយចាត់ទុកថា នោះគឺជាសកម្មភាពបង្កហេតុ និងនាំឱ្យមានអស្ថិរភាព ព្រមទាំងបង្កើនការធ្វើសមយុទ្ធរួម៕

November 2, 2022

Category: អន្តរជាតិ