អន្តរជាតិ - La Reine Media

អង្គការសហប្រជាជាតិ អំពាវនាវដល់ រុស្ស៊ី ឱ្យផ្ដល់សំណងដល់ អ៊ុយក្រែន

មហាសន្និបាតអង្គការសហប្រជាជាតិ អនុម័តសេចក្ដីសម្រេចស្ដីពីការគាំទ្រយន្តការស្នើឱ្យ រុស្ស៊ី ផ្ដល់សំណងលើការខូចខាតដល់មនុស្ស និងទ្រព្យសម្បត្តិទៅឱ្យ អ៊ុយក្រែន នៅក្នុងសង្គ្រាម។

សេចក្ដីសម្រេចដែលមិនមានលក្ខណៈចាប់បង្ខំនេះ ត្រូវបានមហាសន្និបាតអង្គការសហប្រជាជាតិ អនុម័ត បន្ទាប់ពីការបោះឆ្នោតកាលពីថ្ងៃទី 14 វិច្ឆិកា ដែលទទួលបានការគាំទ្រ 94 សំឡេង, ប្រឆាំង 14 សំឡេង និង អនុបវាទ 63 សំឡេង។

រុស្ស៊ី ចិន គុយបា កូរ៉េខាងជើង និង អ៊ីរ៉ង់ ស្ថិតក្នុងចំណោមប្រទេសដែលបោះឆ្នោតប្រឆាំង ខណៈដែល ឥណ្ឌា អ៊ីស្រាអែល និង ប្រេស៊ីល ស្ថិតក្នុងចំណោមប្រទេសបោះឆ្នោតអនុបវាទ។

យោងតាមសេចក្ដីសម្រេច រុស្ស៊ី «ត្រូវតែទទួលផលវិបាកផ្លូវច្បាប់សម្រាប់រាល់សកម្មភាពខុសច្បាប់អន្តរជាតិ ក្នុងនោះក៏មានការបង់ប្រាក់សំណងសម្រាប់រាល់ការខូចខាតដែលកើតដោយសារសកម្មភាពទាំងនេះ»។ សេចក្ដីសម្រេចខាងលើក៏បានអំពាវនាវឱ្យបង្កើតស្ថិតិផ្លូវការមួយស្ដីពីការខូចខាតដែល អ៊ុយក្រែន បានទទួលរងនៅក្នុងសង្គ្រាមជាមួយ រុស្ស៊ី។

សេចក្ដីសម្រេចកាលពីថ្ងៃទី 14 វិច្ឆិកា អាចជួយឱ្យ អ៊ុយក្រែន លើកឡើងនូវការទាមទារចំពោះទ្រព្យដែលមានតម្លៃរាប់រយពាន់លានដុល្លាររបស់ រុស្ស៊ី ដែល សហរដ្ឋអាម៉េរិក និងសម្ព័ន្ធអឺរ៉ុប បានបង្កក បន្ទាប់ពីសង្គ្រាមបានផ្ទុះឡើង។

ឯកអគ្គរដ្ឋទូតអ៊ុយក្រែន ប្រចាំអង្គការសហប្រជាជាតិ Sergiy Kyslytsya អះអាងថា ធ្លាប់មានករណីបែបនេះរួចមកហើយ ដែលកាលណោះ អ៊ីរ៉ាក់ ត្រូវសងការខូចខាត 52.4 ពាន់លានដុល្លារអាម៉េរិក ឱ្យ កូវ៉ែត ក្រោយពីការវាយប្រហារកាលពីឆ្នាំ 1990។ សកម្មភាពនេះត្រូវបានតាមដានដោយ ក្រុមប្រឹក្សាសំណងនៃអង្គការសហប្រជាជាតិ។

ចំណែក ឯកអគ្គរដ្ឋទូតរុស្ស៊ី នៅ អង្គការសហប្រជាជាតិ Vassily Nebenzia បានចោទ អ៊ុយក្រែន និងប្រទេសលោកខាងលិចថា កំពុងរកវិធីដើម្បី «ការពារអំពើរឹបអូសទ្រព្យដែលបានបង្កក ក្នុងគោលដៅប្រើប្រាស់ដើម្បីអូសបន្លាយពេល និងបង្កើនសភាពធ្ងន់ធ្ងរដល់សង្គ្រាម»។

ក្រុមមន្ត្រីអ៊ុយក្រែន កាលពីថ្ងៃទី 22 កញ្ញា បានឱ្យដឹងថា ការខូចខាតដែលប្រទេសនេះទទួលរងគឺឡើងដល់ជិត 1 ទ្រីលានដុល្លារអាម៉េរិក (1,000,000,000,000.00) ច្រើនជាង 5 ដង ធៀបនឹង GDP ប្រចាំឆ្នាំអំឡុងពេលមុនសង្គ្រាមរបស់ប្រទេសនេះ៕

November 15, 2022

ចាក់ជះធាតុរាវក្នុងពិព័រណ៍សាកសពអប់ (ម៉ាំមី/Mummy) ដើម្បីអំពាវនាវឱ្យការពារបរិស្ថាន (វីដេអូ)

(អេស្ប៉ាញ)-ក្រុមសកម្មជនបរិស្ថាននាំគ្នាចាក់ និងជះធាតុរាវទៅលើទូដាក់សាកសពអប់ដែលគេហៅថា ម៉ាំមី (Mummy) នៅក្នុងសារមន្ទីរមួយនៅ Barcelona ក្នុងបំណងអំពាវនាវឱ្យមានសកម្មភាពការពារបរិស្ថាន។

សកម្មជនបរិស្ថានពីររូប បានចាក់ និងជះធាតុរាវពណ៌ប្រផេះ និងក្រហមពីដបទឹកសុទ្ធ ទៅលើទូកញ្ចក់ការពារសាកសពអប់ដែលគេដាក់ជាការបង្ហាញត្រាប់ ព្រមទាំងជះធាតុរាវនោះទៅលើស៊ុមរូបគំនូរដែលព្យួរជុំវិញជញ្ជាំងនៅក្នុងសារមន្ទីរអេហ្ស៊ីប នៅ Barcelona កាលពីថ្ងៃទី 13 វិច្ឆិកា។

បន្ទាប់មក ពួកគេដាក់ដៃទៅលើប្រអប់កញ្ចក់តាំងបង្ហាញ និងលើកបដាដែលសរសេរថា «យុត្តិធម៌អាកាសធាតុ»។ នៅពេលក្រុមប៉ូលិសមកដល់ សកម្មជនបរិស្ថានទាំងពីរនាក់ក៏បានសហការ និងមិនត្រូវបានចាប់ខ្លួន ប៉ុន្តែ ខាងសារមន្ទីរនិយាយថា នឹងដាក់ពាក្យប្ដឹងដើម្បីទាមទារសំណង។

សកម្មជនខាងលើស្ថិតក្នុងក្រុម Futuro Vegetal ដែលជាអ្នកការពារបរិស្ថាននៅ ប្រទេសអេស្ប៉ាញ និងធ្លាប់បានដាក់ដៃទៅលើរូបគំនូរនៅក្នុងសារមន្ទីរ Prado នៅ ម៉ាឌ្រីដ កាលពីដើមខែវិច្ឆិកា។

នេះគឺជាសកម្មភាពថ្មីបំផុតនៅក្នុងចំណោមបាតុកម្មរបស់ក្រុមការពារបរិស្ថាន។ កន្លងមក ពួកគេធ្លាប់ជះទឹកស៊ុបទៅលើគំនូររបស់ Vicent van Gogh នៅ ទីក្រុងឡុងដ៍ និង រ៉ូម ព្រមទាំងបានប៉ាតដំឡូងបារាំងកិនទៅលើផ្ទាំងគំនូរដែលជាកំពូលស្នាដៃរបស់វិចិត្រករ Monet។

ក្រុម Futuro Vegetal បានឱ្យដឹងថា ករណីបាតុកម្មថ្មីបំផុតនេះគឺដើម្បី «បង្ហាញនូវស្ថានការណ៍បន្ទាន់» ដែលពិភពលោកកំពុងប្រឈម។ «បច្ចុប្បន្ន កាកសំណល់ជ័រ 99% នៅលើពិភពលោកត្រូវបានផលិតឡើងពីឥន្ធនៈហ្វូស៊ីល» ក្រុមនេះអះអាងដូច្នេះ។

Futuro Vegetal ចង់ឱ្យ អេស្ប៉ាញ ឈប់ផ្ដល់ជំនួយដល់វិស័យចិញ្ចឹមសត្វ និងស្នើឱ្យប្រើប្រាស់ប្រាក់ជំនួយនេះដើម្បីជំរុញការផលិតអាហារដែលមានប្រភពពីរុក្ខជាតិ៕

November 14, 2022

ប្រទេសស្លូវេនី មានប្រធានាធិបតីជាស្ត្រីភេទដំបូងក្នុងប្រវត្តិសាស្ត្រ

មេធាវី Natasa Pirc Musar នឹងក្លាយជាប្រធានាធិបតីភេទស្រីដំបូងក្នុងប្រវត្តិសាស្ត្ររបស់ ប្រទេសស្លូវេនី បន្ទាប់ពីយកឈ្នះលើគូប្រជែងដែលជាអតីតរដ្ឋមន្ត្រីការបរទេស Logar នេះបើតាមលទ្ធផលបឋមនៃការរាប់សន្លឹកឆ្នោត។

«ខ្ញុំនឹងប្រឹងប្រែងឱ្យអស់ពីសមត្ថភាពដើម្បីក្លាយជាប្រធានាធិបតីពិតប្រាកដមួយរូបសម្រាប់ប្រជាជនគ្រប់រូប ធ្វើសកម្មភាពដើម្បីលទ្ធិប្រជាធិបតេយ្យ និងសិទ្ធិមនុស្សជាមូលដ្ឋាន និងសមស្របតាមធម្មនុញ្ញ» លោកស្រី Musar ថ្លែងនៅចំពោះមុខក្រុមអ្នកយកព័ត៌មានបន្ទាប់ពីបានប្រកាសជ័យជំនះកាលពីថ្ងៃទី 13 វិច្ឆិកា។

ទិន្នន័យពីគណៈកម្មការរៀបចំការបោះឆ្នោតដែលយោងទៅតាមតួលេខ 99% នៃសន្លឹកឆ្នោតដែលបានរាប់បង្ហាញថា លោកស្រី Pirc Musar វ័យ 54 ឆ្នាំ ទទួលបានសន្លឹកឆ្នោតគាំទ្រ 53.86% នៅក្នុងការបោះឆ្នោតជុំទីពីរសម្រាប់កៅអីប្រធានាធិបតីស្លូវេនី។ ចំណែកគូប្រជែងរបស់លោកស្រី គឺអតីតរដ្ឋមន្ត្រីការបរទេស Andze Logar ទទួលបានសន្លឹកឆ្នោតត្រឹម 46.14% ប៉ុណ្ណោះ។ អត្រានៃពលរដ្ឋដែលបានទៅបោះឆ្នោតគឺ 49.9%។

លោកស្រី Natasa Pirc Musar គឺជាអតីតពិធីការិនីទូរទស្សន៍ និងជាមេធាវីដែលមានឥទ្ធិពលនៅ ស្លូវេនី។ លោកស្រីឃោសនារកសំឡេងឆ្នោតដោយយោងទៅលើគោលនយោបាយទាក់ទិននឹងសិទ្ធិមនុស្ស នីតិរដ្ឋ និងបណ្ដាបញ្ហាសុខុមាលភាពសង្គម។ ក្នុងការបោះឆ្នោតជុំដំបូង លោក Logar រកបានសំឡេងឆ្នោតគាំទ្រ 33.9% ចំណែកលោកស្រី Musar រកបានតែ 26.9%៕

November 14, 2022

ប្រជាជនអ៊ុយក្រែន នៅទីក្រុង Kherson យំក្នុងថ្ងៃរំដោះ ព្រោះតែរំភើបខ្លាំង

ក្រោយពី រុស្ស៊ី បានដកទ័ព ប្រជាជននៅទីក្រុង Kherson នាំគ្នាកាន់ទង់ជាតិ និងផ្កាចេញទៅកាន់ដងផ្លូវ អ្នកខ្លះក៏យំព្រោះតែរំភើបខ្លាំងនៅពេលទទួលស្វាគមន៍កងកម្លាំងរបស់ អ៊ុយក្រែន ដែលចូលមករំដោះទីក្រុងនេះ។

ថ្ងៃទី 11 វិច្ឆិកាត្រូវបានប្រធានាធិបតី ហ្សេឡែនស្គី ហៅថា «ថ្ងៃប្រវត្តិសាស្ត្រ» នៅពេល កងទ័ពអ៊ុយក្រែន ចូលទៅគ្រប់គ្រងទីក្រុង Kherson ដោយមានការទទួលស្វាគមន៍របស់ប្រជាជននៅទីននេះ។ ប្រជាជនភាគច្រើននៅ Kherson បានភៀសខ្លួនទៅតាមបទបញ្ជារបស់ រុស្ស៊ី មុនពេលដងទ័ព។ អ្នកដែលក្រាញននៀលនៅក្នុងទីក្រុងនេះ មានការរំភើបជាខ្លាំងព្រោះតែការរីករាយបន្ទាប់ពីត្រូវរង់ចាំអស់ជាច្រើនថ្ងៃ។

មនុស្សម្នាលើកទង់ជាតិអ៊ុយក្រែន នៅជុំវិញទីលាន Svoboda និងលើកដៃ ឱបថើបទាហានរបស់ អ៊ុយក្រែន ដែលចូលមករំដោះ។

ក្រុមប្រជាពលរដ្ឋខ្លះក៏នាំគ្នាតម្រៀបទង់ជាតិអ៊ុយក្រែន ក្បែរដងផ្លូវ ខណៈរថយន្តនានាដែលធ្វើដំណើរតាមដងផ្លូវក៏ចុចស៊ីផ្លេជាប់ៗគ្នា ដើម្បីអបអរសាទរចំពោះដំណើរចូលមកកាន់ទីក្រុង Kherson របស់ កងកម្លាំងអ៊ុយក្រែន។

ក្រសួងការពារជាតិរុស្ស៊ី ប្រកាសថា ទាហានសរុបជាង 30,000 នាក់ និងអង្គភាពគ្រប់គ្រងអាវុធ និងសម្ភារជាង 5,000 អង្គភាពផ្សេងទៀតត្រូវបានដកទៅកាន់ច្រាំងខាងកើតនៃទន្លេ Dnieper បញ្ចប់ការគ្រប់គ្រង 8 ខែនៅ Kherson៕

November 12, 2022

អ៊ុយក្រែន អំពាវនាវដល់កងកម្លាំងរុស្ស៊ី-បេឡារុស ឱ្យទម្លាក់អាវុធចុះចាញ់

កងទ័ពអ៊ុយក្រែន បានអំពាវនាវដល់ទាហាននៅក្នុងកងកម្លាំងចម្រុះរុស្ស៊ី-បេឡារុស ឱ្យទម្លាក់អាវុធចុះចាញ់ បើសិនពួកគេត្រូវបានបញ្ជាឱ្យវាយលុកចូលទឹកដីរបស់ អ៊ុយក្រែន។

«ផ្ញើជូនបណ្ដាទាហានបេឡារុស ៖ បើសិនអ្នកមិនមានជម្រើសផ្សេងក្រៅតែពីការអនុវត្តតាមបទបញ្ជាឱ្យឆ្លងដែនដើម្បីចូលរួមសង្គ្រាមរបស់ រុស្ស៊ី ប្រឆាំងនឹង អ៊ុយក្រែន ចូរបិទម៉ាស៊ីនយានយន្ត ដោះគ្រាប់ លើកទង់ស ហើយរង់ចាំជួបតំណាងរបស់យើងខ្ញុំ» អគ្គមេបញ្ជាការកងទ័ពអ៊ុយក្រែន សរសេរសារបង្ហោះលើ Facebook កាលពីថ្ងៃទី 11 វិច្ឆិកាដូច្នេះ។

កងទ័ពអ៊ុយក្រែន ប្រកាសថា ទាហានបេឡារុស ដែលទម្លាក់អាវុធនឹងត្រូវបានធានាទៅលើកន្លែងស្នាក់នៅ។ សម្ភារ និងអាវុធរបស់ពួកគេនឹងត្រូវបានរក្សាទុកសមស្រប ហើយទាហានអាចត្រលប់ទៅផ្ទះ និងទទួលអាវុធទៅវិញក្រោយពីសង្គ្រាមបានបញ្ចប់។

អគ្គមេបញ្ជាការកងទ័ពអ៊ុយក្រែន ក៏បានអំពាវនាវឱ្យ ទាហានរុស្ស៊ី ក្នុងកងកម្លាំងចម្រុះជាមួយ បេឡារុស ដាក់អាវុធចុះចាញ់ផងដែរ។ «គ្រប់គ្នានឹងត្រូវបានប្រព្រឹត្តទៅតាមអនុសញ្ញាទីក្រុងហ្សឺណែវ និងបានត្រលប់ទៅផ្ទះនៅពេលសង្គ្រាមបានបញ្ចប់ មិនដូច្នេះទេ គ្រប់គ្នាមានតែរង់ចាំការស្លាប់នៅលើសមរភូមិប៉ុណ្ណោះ» សាររបស់ អគ្គមេបញ្ជាការកងទ័ពអ៊ុយក្រែន មានឃ្លាសរសេរដូច្នេះ។

បេឡារុស គឺជាសម្ព័ន្ធមិត្តជិតស្និទ្ធរបស់ រុស្ស៊ី និងបានអនុញ្ញាតឱ្យ ទីក្រុងមូស្គូ ប្រើប្រាស់ទឹកដីរបស់ខ្លួនដើម្បីចូលឈ្លានពានលើ អ៊ុយក្រែន។ បេឡារុស ក៏ត្រូវបានសង្ស័យថា អនុញ្ញាតឱ្យ រុស្ស៊ី ប្រើប្រាស់ដែនអាកាសដើម្បីបាញ់ប្លោងមីស៊ីលចូលទឹកដីរបស់ អ៊ុយក្រែន ផងដែរ៕

November 12, 2022

ប្រធានាធិបតីអាម៉េរិក ថា ជីវិតនៅលើពិភពផែនដីកំពុងរងការគំរាមកំហែង

លោក ចូ បៃដិន បានព្រមានថា វិបត្តិអាកាសធាតុកំពុងតែគំរាមកំហែងដល់ «ភាពរស់រានរបស់ពិភពផែនដី» និងជំរុញឱ្យបណ្ដាប្រទេសបញ្ចេញសកម្មភាពបន្ថែមទៀតដើម្បីកាត់បន្ថយការបំភាយកាបូន។

«វិបត្តិអាកាសធាតុគឺជាបញ្ហាសន្តិសុខរបស់មនុស្សជាតិ សន្តិសុខសេដ្ឋកិច្ច សន្តិសុខបរិស្ថាន សន្តិសុខជាតិ និងជារឿងស្លាប់រស់របស់ពិភពផែនដី» ប្រធានាធិបតីអាម៉េរិក លោក បៃដិន ថ្លែងកាលពីថ្ងៃទី 11 វិច្ឆិកា នៅក្នុងសន្និសីទស្ដីពីបម្រែបម្រួលអាកាសធាតុ របស់ អង្គការសហប្រជាជាតិ ឆ្នាំ 2022 (COP29) នៅទីក្រុង Sharm el-Sheikh នៃ ប្រទេសអេហ្ស៊ីប។

ប្រធានាធិបតីអាម៉េរិក ក៏បានអះអាងថា សហរដ្ឋអាម៉េរិក កំពុងតែដើរលើផ្លូវត្រូវដើម្បីទៅដល់ឆ្នាំ 2030 សម្រេចបានគោលដៅកាត់បន្ថយការបំភាយឧស្ម័នបានពី 50 ទៅ 52%។

លោក បៃដិន ក៏បានជំរុញឱ្យបណ្ដាប្រទេសបញ្ចេញសកម្មភាពបន្ថែមទៀតដើម្បីកាត់បន្ថយការបំភាយកាបូន ក្នុងបំណងគ្រប់គ្រងស្ថានភាពឡើងកម្ដៅទូទាំងសកលលោក។ «នេះគឺជាកាតព្វកិច្ច និងការទទួលខុសត្រូវរបស់មេដឹកនាំទូទាំងពិភពលោក» លោក បៃដិន ថ្លែងដូច្នេះ។

ប្រធានាធិបតីអាម៉េរិក បន្តថា «បណ្ដាប្រទេសដែលមានលទ្ធភាព គួរតែជួយដល់បណ្ដាប្រទេសកំពុងអភិវឌ្ឍដើម្បីឱ្យពួកគេអាចដាក់ចេញនូវការសម្រេចចិត្តទាក់ទងនឹងអាកាសធាតុ បង្កលក្ខណៈងាយស្រួលសម្រាប់ដំណើរការផ្លាស់ប្ដូរថាមពលរបស់ពួកគេ និងកសាងផ្លូវទៅកាន់ការរីកចម្រើនសមស្របជាមួយនឹងអាកាសធាតុរបស់យើង»។

សន្និសីទអាកាសធាតុ COP27 ប្រព្រឹត្តទៅចាប់ពីថ្ងៃទី 06 ដល់ 18 វិច្ឆិកា 2022 នៅ អេហ្ស៊ីប។ អគ្គលេខាធិការនៃ អង្គការសហប្រជាជាតិ លោក Antonio Guterres កាលពីថ្ងៃទី 07 វិច្ឆិកា បានព្រមានថា បណ្ដាប្រទេសមាន 2 ជម្រើសគឺ សាមគ្គីក្នុងការទប់ទល់នឹងការប្រែប្រួលអាកាសធាតុ ឬ «ធ្វើអត្តឃាតជាក្រុម»៕

November 12, 2022

ធនាគារអភិវឌ្ឍអ៊ីស្លាម រួមចំណែក 13 ពាន់លានដុល្លារសម្រាប់ការដោះស្រាយបញ្ហាអាកាសធាតុ

ជំនួយសម្រាប់សកម្មភាពដោះស្រាយបញ្ហាអាកាសធាតុគឺជា «ប្រការសំខាន់ដើម្បីសម្រេចបាននូវការរីកចម្រើនគ្រប់វិស័យ និងជួយដល់ក្រុមមនុស្សដែលងាយរងគ្រោះ ពិសេសគឺនៅតាមបណ្ដាប្រទេសក្រីក្របំផុត»ប្រធានសមាគមធនាគារអភិវឌ្ឍអ៊ីស្លាម (IDBG) សង្កត់ធ្ងន់ដូច្នេះ។

ប្រធាន IDBG លោក Mohamed Al-Jasser ឱ្យដឹងថា បម្រែបម្រួលអាកាសធាតុបន្តជាការគំរាមកំហែងចំពោះការអភិវឌ្ឍសេដ្ឋកិច្ច-សង្គម ក៏ដូចជាសុខភាព និងការរីកចម្រើនរបស់សង្គម។ លោក Mohamed Al-Jasser បញ្ជាក់ថា គោលដៅរបស់ IDBG គឺការជំរុញដំណើរការផ្លាស់ប្ដូរប្រកបដោយសមធម៌ និងទូទៅ។

នៅក្នុងវេទិកាស្ដីពីហិរញ្ញវត្ថុអាកាសធាតុកាលពីថ្ងៃទី 10 វិច្ឆកា នៅក្រៅសន្នសីទលើកទី 27 របស់ភាគីនៃអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ (COP27) ដែលរៀបចំដោយ អេហ្ស៊ីប ចាប់ពីថ្ងៃទី 06 ដល់ 18 វិច្ឆិកា 2022 លោក Al-Jasser ថ្លែងថា ក្រុមសម្របសម្រួលអារ៉ាប់ បានប្រកាសអំពីកញ្ចប់ជំនួយហិរញ្ញវត្ថុតម្លៃ 24 ពាន់លានដុល្លារអាម៉េរិក សម្រាប់សកម្មភាពអាកាសធាតុក្នុងរយៈពេល 8 ឆ្នាំខាងមុខ ក្នុងនោះ IDBG នឹងរួមចំណែក 13 ពាន់លានដុល្លារ។

គោលដៅរបស់ខ្ទង់ថវិកាដែលនឹងត្រូវបានផ្ដល់ឱ្យក្នុងដំណាក់កាលចាប់ពីឆ្នាំ 2023 ដល់ 2030 នេះ គឺដើម្បីជួយជ្រោមជ្រែងផ្នែកហិរញ្ញវត្ថុសម្រាប់បណ្ដាគម្រោងដោះស្រាយ និងកាត់បន្ថយបញ្ហាកើតឡើងពីបម្រែបម្រួលអាកាសធាតុ ក្នុងនោះក៏មានការលើកកម្ពស់សមត្ថភាពស្ដារប្រព័ន្ធស្បៀង ចរាចរណ៍ស្អាត ប្រព័ន្ធទីក្រុង និងសន្តិសុខថាមពលផងដែរ។

ប្រធានសមាគមធនាគារអភិវឌ្ឍអ៊ីស្លាម (IDBG) សង្កត់ធ្ងន់ថា ជំនួយសម្រាប់សកម្មភាពដោះស្រាយបញ្ហាអាកាសធាតុគឺជា «ប្រការសំខាន់ដើម្បីសម្រេចបាននូវការរីកចម្រើនគ្រប់វិស័យ និងជួយដល់ក្រុមមនុស្សដែលងាយរងគ្រោះ ពិសេសគឺនៅតាមបណ្ដាប្រទេសក្រីក្របំផុត» របស់ IDBG៕

November 11, 2022

សហរដ្ឋអាម៉េរិក បញ្ចេញកញ្ចប់ជំនួយយោធាថ្មីតម្លៃ 400 លានដុល្លារសម្រាប់ អ៊ុយក្រែន

ថវិកាជំនួយផ្នែកសន្តិសុខរបស់ សហរដ្ឋអាម៉េរិក សម្រាប់ អ៊ុយក្រែន កើនឡើងដល់ជាង 18 ពាន់លានដុល្លារ រាប់ចាប់ពីខែកុម្ភៈ 2022 បន្ទាប់ពី មន្ទីរបញ្ចកោណ បញ្ចេញកញ្ចប់ជំនួយយោធាថ្មីនេះ។

មន្ទីរបញ្ចកោណ កាលពីកាលពីថ្ងៃទី 10 វិច្ឆិកា 2022 បានប្រកាសអំពីកញ្ចប់ជំនួយយោធាតម្លៃ 400 លានដុល្លារសម្រាប់ អ៊ុយក្រែន ក្នុងនោះមានទាំងបណ្ដាប្រព័ន្ធការពារដែនអាកាស និងមីស៊ីលបាញ់ពីដីទៅអាកាសផងដែរ។

លេខារងផ្នែកសារព័ត៌មានរបស់ មន្ទីរបញ្ចកោណ Sabrina Singh បញ្ជាក់ថា កញ្ចប់ជំនួយយោធាថ្មីរបស់ សហរដ្ឋអាម៉េរិក នឹងរួមមាន ប្រព័ន្ធការពារដែនអាកាសកម្រិតទាប និងមានសមត្ថភាពចល័តកម្រិតខ្ពស់ Avenger ចំនួន 4 ក៏ដូចជាមីស៊ីល Stinger សម្រាប់ប្រព័ន្ធទាំង 4 នេះ។

នេះគឺជាលើកដំបូងហើយដែល ទីក្រុងវ៉ាស៊ីងតោន ផ្ដល់ឱ្យ ទីក្រុងកៀវ នូវប្រព័ន្ធការពារដែនអាកាស Avenger។

កញ្ចប់ជំនួយថ្មីនេះក៏មានមីស៊ីលសម្រាប់ប្រព័ន្ធការពារដែនអាកាស HAWK រួមនឹងគ្រាប់កាំភ្លើងធំ គ្រាប់កាំភ្លើងត្បាល់ រ៉ុក្កែតសម្រាប់ប្រព័ន្ធ HIMARS និងគ្រាប់កាំភ្លើងជាង 20 លានគ្រាប់សម្រាប់អាវុធធុនស្រាល។

កញ្ចប់ជំនួយយោធាថ្មីដែលត្រូវបានប្រកាសកាលពីថ្ងៃទី 10 វិច្ឆិកានេះ បាននាំឱ្យថវិកាជំនួយផ្នែកសន្តិសុខរបស់ សហរដ្ឋអាម៉េរិក សម្រាប់ អ៊ុយក្រែន កើនឡើងដល់ 18.6 ពាន់លានដុល្លារ រាប់ចាប់ពីខែកុម្ភៈ 2022៕

November 11, 2022

ក្រសួងហិរញ្ញវត្ថុអង់គ្លេស បង្កកទ្រព្យតម្លៃជាង 20 ពាន់លានដុល្លាររបស់ រុស្ស៊ី

ចាប់ពីខែកុម្ភៈដល់ខែតុលា 2022 ប្រាក់ជាង 18 ពាន់លានផោនអង់គ្លេស នៅក្នុងបណ្ដាមូលនិធិដែលត្រូវបានបង្កកដោយ ក្រសួងហិរញ្ញវត្ថុអង់គ្លេស គឺជាកម្មសិទ្ធិ ឬតំណាងរបស់ក្រុមជនជាតិរុស្ស៊ី ដែលមានឈ្មោះនៅក្នុងបញ្ជីទណ្ឌកម្ម។

យោងតាម Sputniknews កាលពីថ្ងៃទី 10 វិច្ឆិកា ការិយាល័យអនុវត្តទណ្ឌកម្មផ្នែកហិរញ្ញវត្ថុរបស់ ក្រសួងហិរញ្ញវត្ថុអង់គ្លេស (OFSI) បានបញ្ជាក់ថា ប្រទេសនេះបានបង្កបទ្រព្យតម្លៃ 18.39 ពាន់លានផោនអង់គ្លេស (21 ពាន់លានដុល្លារអាម៉េរិក) របស់ រុស្ស៊ី ក្នុងដំណាក់កាលពីខែកុម្ភៈដល់តុលា 2022 ដើម្បីឆ្លើយតបនឹងយុទ្ធនាការយោធារបស់ ទីក្រុងមូស្គូ នៅ អ៊ុយក្រែន។

របាយការណ៍វាយតម្លៃប្រចាំឆ្នាំរបស់ OFSI ដែលបានប្រកាសកាលពីម្សិលមិញ មានឃ្លាសរសេរថា «ចាប់ពីថ្ងៃទី 22 កុម្ភៈដល់ថ្ងៃទី 20 តុលា 2022 ប្រាក់ចំនួន 18.39 ពាន់លានផោនអង់គ្លេស នៅក្នុងបណ្ដាមូលនិធិដែលត្រូវបានបង្កក ត្រូវបានរាយការណ៍ឱ្យ OFSI ថា ជាកម្មសិទ្ធិ ឬតំណាងរបស់ក្រុមជនជាតិរុស្ស៊ី ដែលមានឈ្មោះនៅក្នុងបញ្ជីទណ្ឌកម្ម»។

ទិន្នន័យដែលទើបត្រូវបានលើកឡើងនេះ បង្ហាញអំពីការកើនឡើងយ៉ាងខ្ពស់នៃទ្រព្យសម្បត្តិរបស់ រុស្ស៊ី ដែលត្រូវបាន អង់គ្លេស បង្កក រាប់ចាប់ពីខែកញ្ញា 2021 ដែលមុននោះ មានតែ 44.5 លានផោនប៉ុណ្ណោះ។

OFSI ក៏បានបន្ថែម ជនជាតិរុស្ស៊ី ចំនួន 1,271 នាក់ ទៅក្នុងបញ្ជីទណ្ឌកម្ម ចាប់ពីថ្ងៃទី 22 កុម្ភៈដល់ 24 សីហា 2022។ មនុស្សតែ 11 នាក់ប៉ុណ្ណោះដែលត្រូវបានដកចេញពីបញ្ជីទណ្ឌកម្មនៅក្នុងពេលដំណាលគ្នានេះ៕

November 11, 2022

អ៊ីរ៉ង់ ប្រកាសថា ផលិតបានមីស៊ីលល្បឿនលឿនជាងសំឡេងលើសពី 5 ដង

ឆ្មាំបដិវត្តន៍អ៊ីស្លាមអ៊ីរ៉ង់ បានប្រកាសថា ពួកគេផលិតបានមីស៊ីលល្បឿនលឿនជាងសំឡេងប្រភេទ Hypersonic និងវាយតម្លៃថា នេះគឺជាជំហានដ៏ធំមួយនៅក្នុងវិស័យការពារជាតិរបស់ប្រទេសនេះ។

«មីស៊ីលនេះមានល្បឿនលឿនខ្លាំង អាចចល័តនៅក្នុង និងក្រៅបរិយាកាស។ វាគឺជាជំហានដ៏ធំនៅក្នុងវិស័យមីស៊ីល ដែលត្រូវបានអភិវឌ្ឍដើម្បីសំដៅលើខែលការពារមីស៊ីលរបស់សត្រូវ» មេបញ្ជាការកងកម្លាំងអវកាសនៃឆ្មាំបដិវត្តន៍អ៊ីស្លាមអ៊ីរ៉ង់ (IRGC) លោក Amir Ali Hajizadeh បានឱ្យដឹងដូច្នេះនៅថ្ងៃនេះ បន្ទាប់ពីបានប្រកាសថា ប្រទេសនេះផលិតបានមីស៊ីលល្បឿនលឿនជាងសំឡេងប្រភេទ Hypersonic។

លោក Amir Ali Hajizadeh មិនបានបង្ហើបព័ត៌មានលម្អិតស្ដីពីមីស៊ីលល្បឿនលឿនជាងសំឡេង (hypersonic missile) នេះ ក៏ដូចជាមិនទាន់មានដំណឹងទាក់ទិននឹងការសាកល្បងអាវុធប្រភេទនេះរបស់ អ៊ីរ៉ង់ នៅឡើយ។

មីស៊ីល Hypersonic គឺជាអាវុធមានល្បឿនលឿនជាងសំឡេងយ៉ាងតិច 5 ដង ដែលប្រហែលជាង 6,200 គីឡូម៉ែត្រ/ម៉ោង។ ល្បឿននេះ រួមនឹងគន្លងគោចរស្មុគស្មាញ ធ្វើឱ្យអាវុធប្រភេទនេះហាក់មិនអាចត្រូវបានបាញ់ទម្លាក់ដោយខែលការពារមីស៊ីលនាបច្ចុប្បន្ន៕

November 10, 2022

Category: អន្តរជាតិ