អន្តរជាតិ - La Reine Media

សភាជាន់ទាបអាម៉េរិក អនុម័តសេចក្ដីព្រាងច្បាប់ផ្ដល់ជំនួយរាប់ពាន់លានដុល្លារដល់តៃវ៉ាន់

សភាជាន់ទាបអាម៉េរិក អនុម័តសេចក្ដីព្រាងច្បាប់ស្ដីពីថវិកាសម្រាប់ការពារជាតិឆ្នាំ 2023 ក្នុងនោះមានទាំងកញ្ចប់ជំនួយយោធាឡើងដល់ 10 ពាន់លានដុល្លារសម្រាប់ កោះតៃវ៉ាន់ ផងដែរ។

សេចក្ដីព្រាងច្រាប់ការពារជាតិ (NDAA) សម្រាប់ឆ្នាំ 2023 ដែលត្រូវបានសភាជាន់ទាបរបស់ សហរដ្ឋអាម៉េរិក អនុម័តកាលពីថ្ងៃទី 08 ធ្នូ នឹងអនុញ្ញាតឱ្យប្រទេសនេះផ្ដល់ជំនួយដល់ កោះតៃវ៉ាន់ ចំនួន 2 ពាន់លានដុល្លារជារៀងរាល់ឆ្នាំ ចាប់ពីឆ្នាំ 2023 ដល់ 2027។ ច្បាប់នេះក៏អនុញ្ញាតឱ្យ ប្រធានាធិបតី ចូ បៃដិន ផ្ដល់ឱ្យ តៃវ៉ាន់ នូវឧបករណ៍ការពារជាតិដែលយកពីឃ្លាំងរបស់ អាម៉េរិក ឬសេវាកម្មដទៃ ដែលមានទំហំទឹកប្រាក់ឡើងដល់ 1 ពាន់លានដុល្លារ/ឆ្នាំ។

យោងតាមសេចក្ដីព្រាងច្បាប់ថ្មីខាងលើ រដ្ឋមន្ត្រីការបរទេស រដ្ឋមន្ត្រីការពារជាតិ ត្រូវ «ផ្ដល់អាទិភាព និងពន្លឿនការឆ្លើយតបនឹងសំណើពី តៃវ៉ាន់ ទៅតាមកម្មវិធីលក់ទំនិញយោធាឱ្យភាគីខាងក្រៅ»។

«NDAA នឹងបង្កើនទំនាក់ទំនងផ្នែកការពារជាតិរបស់ សហរដ្ឋអាម៉េរិក ជាមួយនឹង តៃវ៉ាន់» តំណាងរាស្ត្រ Bob Menendez ប្រធានគណៈកម្មការកិច្ចការបរទេសនៅសភាជាន់ទាប បានឱ្យដឹងដូច្នេះនៅក្នុងប្រកាសមួយ មុនពេលសេចក្ដីព្រាងច្បាប់ត្រូវបានអនុម័ត។

សេចក្ដីព្រាងច្បាប់នេះត្រូវការសភាជាន់ខ្ពស់អនុម័តបន្តទៀត មុនពេលត្រូវបានបញ្ជូនទៅកាន់ សេតវិមាន ដើម្បីប្រធានាធិបតី ចូ បៃដិន ចុះហត្ថលេខាជាច្បាប់។

ទីក្រុងប៉េកាំង និង ទីក្រុងតៃប៉ិ មិនទាន់បញ្ចេញប្រតិកម្មអ្វីនៅឡើយ ទាក់ទិននឹងសេចក្ដីព្រាងច្បាប់ថ្មីរបស់ សហរដ្ឋអាម៉េរិក៕

December 9, 2022

ក្រោយធ្វើរដ្ឋប្រហារមិនបានសម្រេច ប្រធានាធិបតីប៉េរូ ក៏ត្រូវបានទម្លាក់ពីតំណែង

ប្រធានាធិបតីរប្រទេសប៉េរូ លោក Pedro Castillo ត្រូវបានសភាទម្លាក់ពីតំណែង ហើយក្រោយមកប៉ូលិសក៏បានបង្ហោះរូបថតលោកអង្គុយនៅក្នុងប៉ុស្ដិ៍ ប៉ុន្តែមិនទាន់ដឹងថា ត្រូវបានចាប់ខ្លួន ឬយ៉ាងណានៅឡើយ។

សភាប៉េរូ បានអនុម័តលើការសម្រេចចិត្តទម្លាក់ប្រធានាធិបតី Pedro Castillo កាលពីថ្ងៃទី 07 ធ្នូ ដោយមានសន្លឹកឆ្នោតគាំទ្រ 101 សំឡេង, ប្រឆាំង 6 សំឡេង និង អនុបវាទ 10 សំឡេង។ ការសម្រេចនេះត្រូវបានធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីលោក Castillo ចេញបញ្ជាឱ្យរំសាយសភា នៅក្នុងការប៉ុនប៉ងក្ដោបក្ដាប់អំណាយមិនបានជោគជ័យ។

សភាប៉េរូ បន្ទាប់មកក៏បានស្នើឱ្យអនុប្រធានាធិបតី Dina Boluarte ស្បថចូលកាន់តំណែងប្រធានាធិបតី នាំឱ្យ ប៉េរូ មានប្រធានាធិបតីជាស្ត្រីភេទលើកដំបូង។ លោកស្រីនឹងកាន់តំណែងនេះរហូតដល់ឆ្នាំ 2026 និងបានអំពាវនាវឱ្យមានការសាមគ្គីគ្នាដើម្បីឆ្លងផុតវិបត្តិបច្ចុប្បន្ន ព្រមទាំងបានរិះគន់ចំពោះបទបញ្ជារបស់លោក Castillo ថា ជា «អំពើរដ្ឋប្រហារ» ផងដែរ។

ប៉ូលិសប៉េរូ បានបង្ហោះរូបថតលើបណ្ដាញសង្គមបង្ហាញថា អតីតប្រធានាធិបតី Castillo អង្គុយអានកាសែតនៅក្នុងប៉ុស្តិ៍ប៉ូលិស ក្រោយការបោះឆ្នោតរបស់សភា ហើយថា ពួកគេបាន «ធ្វើអន្តរាគមន៍» ដើម្បីសម្រេចភារកិច្ច ប៉ុន្តែ មិនបានឱ្យដឹងថា លោក Castillo ត្រូវបានចាប់ខ្លួន ឬយ៉ាងណាទេ។ រូបថតនេះ ក្រោយមកក៏ត្រូវបានលុបចេញពីគណនី Twitter របស់ប៉ូលិសជាតិ។

អតីតប្រធានាធិបតីប៉េរូ លោក Pedro-Castillo (អាវខៀវ)

រដ្ឋមន្ត្រីជាច្រើនរូបបានលាលែងពីតំណែង បន្ទាប់ពីលោក Casitillo ចេញបញ្ជាឱ្យរំសាយសភាជាតិ ខណៈដែលកងទ័ព និងប៉ូលិសរបស់ ប្រទេសប៉េរូ ព្រមានថា ទង្វើរបស់លោក Casitillo គឺជាការបំពានរដ្ឋធម្មនុញ្ញ។

បាតុកម្មមួយចំនួនបានកើតឡើងនៅ ប៉េរូ ក្រោយពីការបោះឆ្នោតនៅសភា។ មនុស្សរាប់សិបនាក់គ្រវីទង់ជាតិនៅតាមដងផ្លូវក្នុង រដ្ឋធានីលីម៉ា ដើម្បីអបអរការចាកចេញរបស់លោក Casitillo ក្នុងគ្រាដែលក្រុមគាំទ្រអតីតប្រធានាធិបតី ក៏ហែក្បួនដើម្បីប្រឆាំងនឹងការសម្រេចរបស់សភា។

របងបន្លាលួស និងប៉ូលិសប្រឆាំងកុបកម្មរាប់សិបនាក់ត្រូវបានដាក់ពង្រាយនៅជុំវិញតំបន់អគាររដ្ឋាភិបាល និងសភាប៉េរូ។

លោក Casitillo អតីតគ្រូបង្រៀននៅជនបទ បានរងការរិះគន់មិនឈប់ឈរ ចាប់តាំងពីបានក្លាយជាប្រធានាធិបតីរបស់ ប៉េរូ ក្រោយការបោះឆ្នោតកាលពីឆ្នាំកន្លង។ លោកបានកាន់តំណែងតាំងពីខែកក្កដា 2021 និងបានរួចផុតពីការចោទប្រកាន់ពីរលើក ហើយក៏ជាបុគ្គលដែលស្ថិតក្រោមការស៊ើបអង្កេតចំនួន 6 ករណីផងដែរ។

រដ្ឋមន្ត្រីក្រសួងយុត្តិធម៌ប៉េរូ កាលពីខែកន្លង បានដាក់ពាក្យប្ដឹងចោទប្រកាន់ថា លោក Castillo គឺជាមេដឹកនាំក្រុមជនល្មើសទាក់ទងនឹងគ្រួសារ និងសម្ព័ន្ធមិត្តរបស់គាត់។ អតីតប្រធានាធិបតី Castillo បានបដិសេធការចោទប្រកាន់នេះ និងនិយាយថា រូបគាត់គឺជាជនរងគ្រោះនៅក្នុងយុទ្ធនាការទម្លាក់តំណែងរបស់សភា៕

December 8, 2022

តំណាងរាស្ត្រប្រទេសតួកគី វាយតប់គ្នានៅក្នុងសភា ពេលពិភាក្សាអំពីថវិកាជាតិសម្រាប់ឆ្នាំក្រោយ

តំណាងរាស្ត្របក្សប្រឆាំងមួយរូបរបស់ តួកគី ត្រូវសង្គ្រោះបន្ទាន់ បន្ទាប់ពីត្រូវរងការវាយទៅលើក្បាលនៅក្នុងហេតុការណ៍ប្រវាយប្រតប់គ្នាជាមួយតំណាងរាស្ត្រដទៃនៅក្នុងរដ្ឋសភា។

ការជជែកអំពីថវិកាជាតិសម្រាប់ឆ្នាំ 2023 នៅ សភាតួកគី កាលពីថ្ងៃទី 06 ធ្នូ បានប្រព្រឹត្តទៅប្រកបដោយភាពតានតឹង រហូតដល់ធ្វើឱ្យមានអំពើវាយតប់គ្នា។ តំណាងរាស្ត្របក្សកាន់អំណាច AKP និងបណ្ដាបក្សប្រឆាំង បានរត់ទៅរកគ្នា និងវាយតប់គ្នា ខណៈតំណាងរាស្ត្រខ្លះទៀតរកវិធីរារាំង។

ទិដ្ឋភាពដែលផ្សាយដោយ DHA បានបង្ហាញថា តំណាងរាស្ត្រ Huseyin Ors អាយុ 58 ឆ្នាំ របស់បក្ស Iyi (Good Party) ត្រូវបានតំណាងរាស្ត្រ Zafer Isik របស់បក្សកាន់អំណាច AKP ដាល់ចំផ្ទៃមុខ ឬក្បាល។ តំណាងរាស្ត្រ Aylin Cesur មកពីបក្ស Iyi បានជួយសង្គ្រោះភ្លាមៗដល់លោក Ors មុនពេលនាំទៅសង្គ្រោះបន្ទាន់។

នេះមិនមែនជាលើកដំបូងឡើយដែលមានហេតុការណ៍វាយតប់គ្នានៅសភារបស់ តួកគី។ កាលពីឆ្នាំ 2020 កិច្ចប្រជុំពិភាក្សាអំពីសកម្មភាពយោធារបស់ តួកគី នៅ ស៊ីរី ក៏ប្រព្រឹត្តទៅក្នុងភាពតានតឹង បណ្ដាលឱ្យតំណាងរាស្ត្រមួយចំនួនបាត់បង់អំណត់ ហើយក៏សម្រុកចូលទៅរកគ្នា និងវាយតប់គ្នាពេញសភា៕

December 7, 2022

ឥណ្ឌូណេស៊ី ដាក់ពន្ធនាគារចំពោះអ្នកមានទំនាក់ទំនងផ្លូវភេទក្រៅអាពាហ៍ពិពាហ៍

សភាឥណ្ឌូណេស៊ី បានអនុម័តសេចក្ដីព្រាងនៃវិសោធនកម្មក្រមព្រហ្មទណ្ឌ ក្នុងនោះក៏មានមាត្រាកំណត់ថា ដាក់ពន្ធនាគារអតិបរមាមួយឆ្នាំចំពោះបុគ្គលដែលមានទំនាក់ទំនងផ្លូវភេទក្រៅអាពាហ៍ពិពាហ៍។

សេចក្ដីព្រាងនៃវិសោធនកម្មក្រមព្រហ្មទណ្ឌ ត្រូវបានសភាឥណ្ឌូណេស៊ី អនុម័តនាថ្ងៃនេះ បន្ទាប់ពីអនុប្រធានសភាជាន់ទាប Sufmi Dasco Ahmad គោះញញួរ និងស្រែកថា «ស្របច្បាប់»។ សេចក្ដីព្រាងនៃវិសោធនកម្មក្រមព្រហ្មទណ្ឌនេះ មុននោះទទួលបានការឯកភាពទាំងស្រុងពីបក្សទាំង 9 នៅ ឥណ្ឌូណេស៊ី បើទោះជាធ្វើឱ្យមានមតិចម្រូងចម្រាសក្នុងសង្គម។

មាត្រាមួយក្នុងចំណោមមាត្រាដែលបង្កភាពចម្រូងចម្រាសបំផុតក្នុងសេចក្ដីព្រាងនៃវិសោធនកម្មក្រមព្រហ្មទណ្ឌនេះ គឺការចាត់ទុកទំនាក់ទំនងផ្លូវភេទក្រៅអាពាហ៍ពិពាហ៍ ក៏ដូចជាការរួមរស់របស់គូស្នេហ៍មិនទាន់រៀបការថាជារឿងខុសច្បាប់។

អំពើរួមរស់ជាមួយគ្នាមុនពេលរៀបការនៅ ឥណ្ឌូណេស៊ី នឹងត្រូវបានកាត់ទោសដាក់ពន្ធនាគារយ៉ាងយូរ 6 ខែ ខណៈដែលអ្នកមានទំនាក់ទំនងផ្លូវភេទក្រៅអាពាហ៍ពិពាហ៍ នឹងត្រូវបានដាក់ពន្ធនាគារមួយឆ្នាំ នេះបើតាមសារព័ត៌មាន AFP។

ការកំណត់ខាងលើត្រូវបានក្រុមហ៊ុននានានៅ ឥណ្ឌូណេស៊ី រិះគន់ថា ជាការបង្កឧបសគ្គដល់វិស័យទេសចរណ៍ បើទោះក្រុមមន្ត្រីប្រទេសនេះអះអាងថា ទេសចរដែលមកកំសាន្តនៅកោះ Bali មិនត្រូវបានកែប្រែដោយក្រមព្រហ្មទណ្ឌនេះ៕

December 6, 2022

យន្តហោះគ្មានមនុស្សជិះ វាយប្រហារលើព្រលានយន្តហោះរុស្ស៊ី នៅក្បែរព្រំដែនអ៊ុយក្រែន

អភិបាលខេត្ត Kursk បានឱ្យដឹងថា ព្រលានយន្តហោះរបស់ រុស្ស៊ី នៅព្រំដែនក្បែរទឹកដីរបស់ អ៊ុយក្រែន ត្រូវរងការវាយប្រហារពីយន្តហោះគ្មានមនុស្សជិះ (UAV) ដែលនេះកើតឡើងមួយថ្ងៃបន្ទាប់ពីករណីផ្ទុះនៅមូលដ្ឋានទ័ពអាកាសចំនួន 2 របស់ រុស្ស៊ី។

«ការវាយប្រហារដោយយន្តហោះគ្មានមនុស្សជិះ (UAV) បានបណ្ដាលឱ្យអាងដាក់ប្រេងមួយត្រូវឆេះ នៅក្នុងបរវេណរបស់ ព្រលានយន្តហោះ Kursk ប៉ុន្តែមិនបង្កឱ្យមានមនុស្សស្លាប់។ កងកម្លាំងជំនាញកំពុងមានវត្តមាននៅកន្លែងកើតហេតុ» Roman Starovoit អភិបាលខេត្ត Kursk នៅភាគខាងលិចប្រទេសរុស្ស៊ី ថ្ងៃនេះបានប្រាប់ដូច្នេះ។

ព្រលានយន្តហោះ Kursk ស្ថិតនៅចម្ងាយពីទីក្រុងរដ្ឋបាលរបស់ខេត្ត Kursk ប្រហែល 7 គីឡូម៉ែត្រ ទៅទិសខាងកើត។ ព្រលានយន្តហោះនេះបានផ្អាកទទួលយន្តហោះស៊ីវិលចាប់ពីថ្ងៃទី 24 កុម្ភៈ 2022 ជាពេលដែលសង្គ្រាមនៅ អ៊ុយក្រែន ទើបតែផ្ទុះឡើង។

អភិបាលខេត្ត Kursk មិនបាននិយាយច្បាស់ថា UAV ដែលបានវាយប្រហារលើព្រលានយន្តហោះខាងលើ មានប្រភពពីណា។ ចំណែក អ៊ុយក្រែន ក៏មិនទាន់មានការអធិប្បាយអ្វីទាក់ទងនឹងព័ត៌មាននេះ។

ករណីខាងលើកើតឡើងមួយថ្ងៃបន្ទាប់ពីមានករណីផ្ទុះពីរលើកនៅមូលដ្ឋានទ័ពអាកាស Dyagilevo និង Engels របស់ រុស្ស៊ី។ ក្រសួងការពារជាតិរុស្ស៊ី បានចោទថា អ៊ុយក្រែន ប្រើប្រាស់ UAV ពីសម័យសូវៀត វាយប្រហារលើមូលដ្ឋានទាំងពីរនេះ។ អ៊ុយក្រែន ក៏មិនទាន់បានបញ្ចេញប្រតិកម្មនៅឡើយ៕

December 6, 2022

គណៈប្រតិភូតំណាងរាស្ត្រចម្រុះបក្សរបស់ អូស្ត្រាលី ធ្វើទស្សនកិច្ចកោះតៃវ៉ាន់

ប្រតិភូតំណាងរាស្ត្ររបស់ ប្រទេសអូស្ត្រាលី ធ្វើដំណើរទៅកាន់ កោះតៃវ៉ាន់ ដើម្បី «ពិភាក្សាអំពីផលប្រយោជន៍រួម» បើទោះជាមានការព្រមានជាមុនពីសំណាក់ទីក្រុងប៉េកាំង។

«ប្រតិភូតំណាងរាស្ត្រចម្រុះបក្សនៅសភារបស់ អូស្ត្រាលី កំពុងធ្វើទស្សនកិច្ច កោះតៃវ៉ាន់។ ប្រតិភូនេះបានមកដល់កោះរួចហើយ» អ្នកនាំពាក្យរបស់ការិយាល័យការបរទេសរបស់ តៃវ៉ាន់ Joanne Ou ថ្លែងនៅថ្ងៃទី 06 ធ្នូដូច្នេះ។

លោកស្រី Ou ឱ្យដឹងថា ប្រតិភូតំណាងរាស្ត្រអូស្ត្រាលី នឹង «ពិភាក្សាអំពីបញ្ហាជាច្រើនស្ដីពីផលប្រយោជន៍រួម» រវាងភាគីទាំងពីរ ប៉ុន្តែ មិនបានលើកឡើងលម្អិត។ លោកស្រីបន្ថែមថា តៃវ៉ាន់ វាយតម្លៃខ្ពស់ចំពោះភាពស្និទ្ធស្នាលរបស់ សភាអូស្ត្រាលី និងកោតសរសើរចំពោះទំនាក់ទំនងរវាង ទីក្រុងតៃប៉ិ និង កង់បេរ៉ា ថា «សកម្ម សម្បូរបែប ភាគីទាំងពីរទទួលផលប្រយោជន៍រួម»។

យោងតាមអ្នកនាំពាក្យក្នុងប្រតិភូខាងលើ ក្រុមតំណាងរាស្ត្រអូស្ត្រាលី បានចេញដំណើរតាំងពីថ្ងៃទី 04 ធ្នូ ដើម្បីចាប់ផ្ដើមធ្វើទស្សនកិច្ច 5 ថ្ងៃនៅ តៃវ៉ាន់។ ឥរិយាបថនេះអាចបញ្ឆេះកំហឹងរបស់ ចិនដីគោក ក្នុងគ្រាដែលទំនាក់ទំនងរវាង ទីក្រុងប៉េកាំង និង កង់បេរ៉ា ហាក់ចាប់ផ្ដើមបង្ហាញសញ្ញាប្រេះឆា។

ក្រសួងការបរទេសចិន កាលពីថ្ងៃទី 05 ធ្នូ បានធ្វើការប្រឆាំងយ៉ាងខ្លាំងក្លាចំពោះដំណើរទស្សនកិច្ចខាងលើ និងបានអំពាវនាវឱ្យ អូស្ត្រាលី គោរព «គោលការណ៍ប្រទេសចិនតែមួយ» និង «ឈប់បញ្ជូនសារខុសឆ្គងដល់កងកម្លាំងទាមទារឯករាជ្យសម្រាប់ កោះតៃវ៉ាន់»។

ចំណែក នាយករដ្ឋមន្ត្រីអូស្ត្រាលី Anthony Albanese វិញ ថ្លែងថា ដំណើរទស្សនកិច្ចនេះគឺជាដំណើរឯកជន មិនមែនទស្សនកិច្ចរបស់រដ្ឋាភិបាលឡើយ។

ទីក្រុងប៉េកាំង តែងចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន ហើយប្រកាសថា នឹងប្រើប្រាស់កម្លាំងបាយដើម្បីរឹបអូសកោះនេះមកគ្រប់គ្រង បើសិនជាចាំបាច់៕

December 6, 2022

បរិមាណប្រេងឆៅរបស់ ប្រទេសរុស្ស៊ី ដែលនាំចូលទៅកាន់ ទ្វីបអឺរ៉ុប ថយចុះជាង 80%

គិតមកដល់ថ្ងៃទី 02 ធ្នូ 2022 ប្រេងរបស់ រុស្ស៊ី ដែលនាំចូល ទ្វីបអឺរ៉ុប បានថយចុះមកនៅមិនដល់ 310,000 ធុង/ថ្ងៃ ដែលនេះបានថយ 80% ធៀបនឹងមុនសង្គ្រាមនៅ អ៊ុយក្រែន។

សកម្មភាពនាំចេញប្រេងឆៅរបស់ រុស្ស៊ី ទៅកាន់ អឺរ៉ុប កំពុងថយចុះយ៉ាងឆាប់រហ័ស។ មុនពេលបើកយុទ្ធនាការយោធានៅ អ៊ុយក្រែន កាលពីខែកុម្ភៈ 2022 រុស្ស៊ី នាំចេញប្រេងឆៅទៅកាន់ អឺរ៉ុប ជាមធ្យម ជាង 1.5 លានធុងជារៀងរាល់ថ្ងៃ។ ប៉ុន្តែ គិតមកដល់ថ្ងៃទី 02 ធ្នូ 2022 តួលេខនេះបានថយចុះមកនៅមិនដល់ 310,000 ធុង នេះបើតាមទិន្នន័យដែល Bloomberg បានទទួល។

កាលពីថ្ងៃទី 05 ធ្នូ បទបញ្ជាហាមឃាត់ប្រេងរបស់ រុស្ស៊ី ដែលដឹកតាមសមុទ្ររបស់ សហភាពអឺរ៉ុប (EU) បានចាប់ផ្ដើមមានសុពលភាព។ ទណ្ឌកម្មនេះត្រូវបានគេព្យាករថា នឹងធ្វើឱ្យប្រេងឆៅរបស់ រុស្ស៊ី ដែលនាំចូលទៅកាន់ EU ស្មើនឹង ។

ការនាំចេញប្រេងទៅកាន់បណ្ដាប្រទេសនៅ មជ្ឈិមបូព៌ា (រួមមាន អ៊ីតាលី, តួកគី, ក្រិក, ក្រូអាត ជាដើម) គិតត្រឹមថ្ងៃទី 02 ធ្នូ 2022 បានថយចុះទាបបំផុតរាប់ចាប់តាំងពីសង្គ្រាមនៅ អ៊ុយក្រែន បានផ្ទុះឡើង។ លំហូរប្រេងមកកាន់តំបន់នេះបានថយចុះជាបន្តបន្ទាប់ក្នុងរយៈពេល 4 សប្ដាហ៍ចុងក្រោយនេះ។

មកដល់ពេលនេះ ប្រេងឆៅរបស់ រុស្ស៊ី បាន និងកំពុងងាកមកកាន់ អាស៊ី។ កប៉ាល់ដឹកប្រេងធុនតូចជាច្រើនចាប់ផ្ដើមធ្វើដំណើរវាងឆ្លងកាត់ អឺរ៉ុប តាមរយៈព្រែកជីក Suez ដើម្បីប្រគល់ទំនិញឱ្យ ឥណ្ឌា និង ចិន។

ថ្លៃដឹកជញ្ជូនដែលកំពុងកើនឡើងខ្ពស់ កំពុងតែដាក់សម្ពាធទៅលើតម្លៃប្រេងឆៅរបស់ រុស្ស៊ី ដែលនាំចេញពីតំបន់បាល់ទិក។ ទិន្នន័យរបស់ Bloomberg បង្ហាញថា បច្ចុប្បន្នតម្លៃប្រេងរបស់ រុស្ស៊ី ទាបជាងប្រហែល 30 ដុល្លារអាម៉េរិក ធៀបនឹងតម្លៃប្រេង Brent។

គិតត្រឹមថ្ងៃទី 02 ធ្នូ ប្រេងឆៅសរុបដែលនាំចេញពី ប្រទេសរុស្ស៊ី កើន 94,000 ធុងក្នុងមួយថ្ងៃ ឡើងដល់ 2.99 លានធុង/ថ្ងៃ។ បរិមាណប្រេងរបស់ រុស្ស៊ី ដែលនាំចូល ប្រទេសចិន ឥណ្ឌា និង តួកគី បូករួមនឹងបរិមាណប្រេងដែលមិនទាន់មានគោលដៅ បានថយចុះជាមធ្យម 2.45 លានធុងក្នុងមួយថ្ងៃ។ ទោះជាយ៉ាងនេះក៏ដោយ តួលេខនេះនៅតែខ្ពស់ជាងជិត 4 ដង ធៀបនឹងមុនសង្គ្រាម៕

December 6, 2022

ស្ត្រីរងគ្រោះម្នាក់ត្រូវគេប្លន់យកកូនក្នុងផ្ទៃ ពេលទៅទទួលអំណោយជាខោអាវកូនក្មេង

(ម៉ិកស៊ិក)- ជនសង្ស័យ 2 នាក់ វាយប្រហារលើ Vazquez អាយុ 20 ឆ្នាំ ជាស្ត្រីដែលកំពុងមានផ្ទៃពោះ 9 ខែ ដើម្បីប្លន់យកទារកក្នុងផ្ទៃ។

ការិយាល័យរដ្ឋអាជ្ញារដ្ឋ Veracruz នៅភាគខាងកើតនៃ ប្រទេសម៉ិកស៊ិក កាលពីថ្ងៃទី 05 ធ្នូ 2022 បានឱ្យដឹងថា សមិត្ថកិច្ចបានចាប់ខ្លួនជនសង្ស័យ 2 នាក់ ដែលត្រូវបានចោទប្រកាន់ពីបទចាប់ជំរិត និងសម្លាប់មនុស្ស។ ជនសង្ស័យ 2 នាក់ រួមមានប្រុសម្នាក់ និងស្រីម្នាក់ ពេលនោះកំពុងគ្រប់គ្រងទារកម្នាក់។

ស្ត្រីរងគ្រោះឈ្មោះ Rosa Isela Castro Vazquez អាយុ 20 ឆ្នាំ និងមានផ្ទៃពោះ 9 ខែ ត្រូវបានអ្នកផ្ទះរាយការណ៍ប្រាប់សមិត្ថកិច្ចថា បានបាត់ខ្លួនកាលពីថ្ងៃទី 30 វិច្ឆិកា ក្រោយពីបានធ្វើដំណើរទៅជួបស្ត្រីម្នាក់ដែលស្គាល់គ្នាតាមអ៊ីនធើណិត ដើម្បីទទួលយកសម្លៀកបំពាក់កូនក្មេងដែលស្ត្រីរូបនោះសន្យាផ្ដល់ជូន។

សារព័ត៌មាននៅ ម៉ិកស៊ិក បានផ្សាយថា នេះគឺជាករណីសម្លាប់មនុស្សដើម្បីប្លន់យកទារកក្នុងផ្ទៃលើកទី 3 នៅប្រទេសម៉ិកស៊ិក ក្នុងមួយរយៈពេលខ្លីចុងក្រោយនេះ។

សាកសពរបស់ស្ត្រីរងគ្រោះត្រូវបានរកឃើញកាលពីថ្ងៃទី 03 ធ្នូ 2022 នៅ Medellin de Bravo ដែលជាតំបន់កំពង់ផែទំនិញ និងសេវាកម្មនៅ Veracruz។ មន្ត្រីមួយរូបសុំមិនបញ្ចេញឈ្មោះបានឱ្យដឹងថា ជនសង្ស័យ 2 នាក់នោះត្រូវបានចោទប្រកាន់ពីបទវះពោះស្ត្រីរងគ្រោះដើម្បីយកទារកក្នុងផ្ទៃ ព្រោះតែស្ត្រីជាជនសង្ស័យមិនអាចមានផ្ទៃពោះ។ ទារកដែលជាកូនបង្កើតរបស់ស្ត្រីរងគ្រោះ ត្រូវបានបញ្ជូនទៅកាន់មន្ទីរពេទ្យដើម្បីពិនិត្យសុខភាព។

ក្រុមមន្ត្រីម៉ិកស៊ិក បានរកឃើញថា មានស្ត្រីជាង 3,700 នាក់ត្រូវបានសម្លាប់នៅក្នុងឆ្នាំ 2021 ក្នុងនោះមាន 1,000 ករណីត្រូវបានដាក់បញ្ចូលទៅក្នុងបញ្ជីស្ដីពីករណីសម្លាប់មនុស្សព្រោះតែការស្អប់ស្ត្រីភេទ៕

នៅក្នុងពិធីបញ្ចុះសពរបស់ ស្ត្រីរងគ្រោះ Rosa Isela Castro Vazquez

December 6, 2022

អែលសាល់វ៉ាឌ័រ ពង្រាយកម្លាំង 10,000 នាក់ ឡោមព័ទ្ធមូលដ្ឋានរបស់ក្រុមសង្គមងងឹត

រដ្ឋាភិបាលអែលសាល់វ៉ាឌ័រ បញ្ចេញទាហាន និងប៉ូលិស 10,000 នាក់ បិទខ្ទប់ទីរួមស្រុក Soyapango ដើម្បីតាមចាប់ខ្លួនសមាជិកក្រុមចាប់ជំរិតទារប្រាក់នៅក្នុងតំបន់នេះ។

ប្រធានាធិបតីរបស់ ប្រទេសអែលសាល់វ៉ាឌ័រ (El Salvador) Nayib Bukele ប្រកាសថា ទីរួមស្រុក Soyapango នៅជាយរដ្ឋធានីសាន់សាល់វ៉ាឌ័រ (San Salvador) ត្រូវបានបិទខ្ទប់ទាំងស្រុងចាប់ពីថ្ងៃទី 03 វិច្ឆិកា។ ទាហាន និងប៉ូលិសត្រូវបានតម្រូវឱ្យត្រួតពិនិត្យលិខិតស្នាមរបស់ប្រជាជន ខណៈដែលកងកម្លាំងពិសេសតាមរកក្រុមជនពាលនៅខាងក្នុង។

នេះគឺជាការបញ្ចេញកម្លាំងធំបំផុតនៅក្នុងយុទ្ធនាការរបស់ប្រធានាធិបតី Bukele ដើម្បីបោសសម្អាតក្រុមជនពាលដែលចាប់ជំរិតទារប្រាក់ពីបណ្ដាក្រុមហ៊ុននៅក្នុងតំបន់ជាយរដ្ឋធានី។

ក្រុមឧក្រិដ្ឋជនដែលកំពុងកាន់កាប់ទីរួមស្រុក Soyapango គឺ Barrio 18 ជាក្រុមសង្គមងងឹតមួយដែលប្រើអំពើហិង្សាច្រើនជាងគេនៅ អែលសាល់វ៉ាឌ័រ។ អាជ្ញាធរអែលសាល់វ៉ាឌ័រ កាលពីថ្ងៃទី 04 ធ្នូ បានប្រកាសថា ចាប់បាន «ត្រីធំ» មួយក្បាលរបស់ក្រុម Barrio 18 គឺ Guillermo Alexander Pineda ដែលត្រូវគេសង្ស័យថាជាអ្នកបានចេញបញ្ជាឱ្យចាប់ជំរិតទារប្រាក់ និងសម្លាប់មនុស្សនៅពាសពេញប្រទេស។

អែលសាល់វ៉ាឌ័រ គឺជាប្រទេសមួយក្នុងចំណោមប្រទេសដែលមានអត្រាឧក្រិដ្ឋកម្មខ្ពស់បំផុតក្នុងពិភពលោក។ អត្រានៃអំពើសម្លាប់មនុស្សជាមធ្យមនៅប្រទេសនេះគឺ 51 ករណី/ប្រជាជន 100,000 នាក់ នៅក្នុងមួយថ្ងៃ ក្នុងឆ្នាំ 2018 ដែលភាគច្រើនទាក់ទិននឹងក្រុមសង្គមងងឹត។

នៅក្នុងយុទ្ធនាការបោសសម្អាតឧក្រិដ្ឋកម្មដែលប្រកាសដោយប្រធានាធិបតី Bukele កាលពីខែមីនា អាជ្ញាធរអែលសាល់វ៉ាឌ័រ បានចាប់ខ្លួនជនសង្ស័យជាង 58,000 នាក់៕

ប្រធានាធិបតី របស់ ប្រទេសអែលសាល់វ៉ាឌ័រ (El Salvador) Nayib Bukele

December 5, 2022

សហរដ្ឋអាម៉េរិក បញ្ចេញ «ឃាតករបំបាំងកាយ» ជំនាន់ទី 6 «B-21»

ក្រុមហ៊ុន Northrop Grumman បង្ហាញយន្តហោះ B-21 ដែលមានរហ័សនាមថា «ឃាតករបំបាំងកាយ» ដែលជាយន្តហោះទម្លាក់គ្រាប់បែកថ្មីដំបូងរបស់ សហរដ្ឋអាម៉េរិក ក្នុងរយៈពេលជាង 30 ឆ្នាំកន្លងមកនេះ។

ក្រុមហ៊ុនការពារជាតិអាម៉េរិក Northrop Grumman កាលពីយប់ថ្ងៃទី 02 ធ្នូ 2022 បានបង្ហាញយន្តហោះទម្លាក់គ្រាប់បែកបំបាំងកាយ B-21 Raider នៅក្នុងពិធីមួយនៅឯរោងចក្រលេខ 42 ក្នុងតំបន់ Palmdale រដ្ឋ California។ យន្តហោះដែលត្រូវបានបង្ហាញក្នុងព្រឹត្តិការណ៍នេះមានឈ្មោះកូដថា T1។ វាកំពុងស្ថិតក្នុងដំណាក់កាលសាកល្បងលើដី ហើយគ្រោងនឹងហោះហើរសាកល្បងដំបូងនៅឆ្នាំក្រោយ។ យ៉ាងហោចក៏មានយន្តហោះ 5 គ្រឿងទៀតក៏កំពុងស្ថិតក្នុងដំណាក់កាលផលិត។

នេះគឺជាម៉ូដែលយន្តហោះទម្លាក់គ្រាប់បែកថ្មីដំបូងរបស់ សហរដ្ឋអាម៉េរិក រាប់ចាប់តាំងពីទសវត្សរ៍ឆ្នាំ 1980 ជាពេលវេលាដែល B-2 Spirit ត្រូវបានដាក់ឱ្យប្រើក្នុងជួរកងទ័ព។ ក្រុមហ៊ុន Northrop Grumman ប្រកាសថា នេះគឺជា «យន្តហោះទម្លាក់គ្រាប់បែកបំបាំងកាយជំនាន់ទី 6 ត្រូវតាមអត្ថន័យពិតដំបូងគេលើពិភពលោក»។

ទ័ពអាកាសអាម៉េរិក គ្រោងបញ្ជាទិញ B-21 ប្រហែល 100 គ្រឿង ដើម្បីជំនួសយន្តហោះទម្លាក់គ្រាប់បែកយុទ្ធសាស្ត្រ B-1B Lancer និង B-2 Spirit នៅច្រើនសិបឆ្នាំខាងមុខ។ B-21 មួយគ្រឿងមានតម្លៃជិត 700 លានដុល្លារ ដោយមិនទាន់គិតដល់ថ្លៃស្រាវជ្រាវ និងផលិត ខណៈដែលគម្រោងទាំងមូលមានតម្លៃប្រហែល 203 ពាន់លានដុល្លារអាម៉េរិក៕

December 3, 2022

Category: អន្តរជាតិ