អន្តរជាតិ - La Reine Media

នាឡិកាប្រាប់ថ្ងៃវិនាសរបស់ផែនដីសម្រាប់ឆ្នាំ 2023 ជិតត្រូវបានបង្ហាញស្ថានភាព

នៅថ្ងៃទី 24 មករា 2023 ព័ត៌មានរបស់ក្រុមអ្នកវិទ្យាសាស្ត្រអាតូមិច នឹងបង្ហាញឱ្យដឹងអំពីស្ថានភាពរបស់ទ្រនិចនាឡិកាថ្ងៃវិនាសរបស់ផែនដី ជានិមិត្តរូបដែលបង្ហាញថា មនុស្សលោកឈានចូលទៅក្បែរហានិភ័យបំផ្លាញខ្លួនឯងដល់កម្រិតណា។

ព័ត៌មានរបស់ក្រុមអ្នកវិទ្យាសាស្ត្រអាតូមិច (BAS) នឹងត្រូវបានប្រារព្ធឡើងក្នុងកិច្ចប្រជុំតាមអនឡាញនៅម៉ោង 22 ថ្ងៃទី 24 មករា 2023 (ម៉ោងនៅកម្ពុជា) ដើម្បីប្រកាសឱ្យដឹងអំពីទីតាំងរបស់ទ្រនិចនាទីរបស់នាឡិកាថ្ងៃវិនាស សម្រាប់ឆ្នាំ 2023 (2023 Doomsday Clock)។ កិច្ចប្រជុំនោះនឹងមានវត្តមានរបស់វាគ្មិនជាច្រើនរូបមកពី BAS និងសមាជិកទាំងឡាយរបស់ Elders ដែលជាអង្គការឯករាជ្យរបស់ក្រុមមេដឹកនាំទូទាំងសកលលោក ដែលបង្កើតឡើងដោយអតីតប្រធានាធិបតីអាហ្វ្រិកខាងត្បូង Nelson Mandela ក្នុងគោលដៅសន្តិភាព យុត្តិធម៌ និងសិទ្ធិមនុស្ស។

បច្ចុប្បន្ន នាឡិកាថ្ងៃវិនាសកំពុងស្ថិតនៅត្រង់ចំណុច 100 វិនាទីមុនពាក់កណ្ដាលយប់។ នាឡិកាថ្ងៃវិនាសត្រូវបានបង្ហាញជាលើកដំបូងនៅពេលសង្គ្រាមត្រជាក់បានចាប់ផ្ដើមនៅឆ្នាំ 1947 និងស្ថិតនៅត្រង់ចំណុច 7 នាទីមុនពាក់កណ្ដាលយប់។

ជារៀងរាល់ឆ្នាំ សមាជិកទាំងឡាយរបស់ក្រុមប្រឹក្សាវិទ្យាសាស្ត្រ និងសន្តិសុខរបស់ BAS នឹងកែប្រែទ្រនិចនាឡិកាដើម្បីបង្ហាញអំពីស្ថានភាពដែលបង្កើតឡើងដោយព្រឹត្តិការណ៍នានាក្នុងឆ្នាំចាស់ ដែលបានរុញច្រានមនុស្សជាតិទៅជិត ឬឆ្ងាយពីហានិភ័យនៃការបំផ្លាញខ្លួនឯង។ បច្ចុប្បន្ន នាឡិកាថ្ងៃវិនាសត្រូវបានប្រើប្រាស់ដើម្បីព្រមានអំពីការគំរាមកំហែងដែលមានប្រភពពីគ្រប់អាវុធប្រល័យលោក ការបំផ្លិចបំផ្លាញបរិស្ថាន បម្រែបម្រួលអាកាសធាតុជាដើម ចំពោះពិភពលោក។

នាឡិកាថ្ងៃវិនាស សម្រាប់ឆ្នាំ 2023 (2023 Doomsday Clock)

លើកដំបូងដែលទ្រនិចនាឡិកាថ្ងៃវិនាសដើរដល់ចំណុចឆ្ងាយបំផុតពីចំណុចពាក់កណ្ដាលយប់ (ម៉ោង 12 យប់) គឺនៅឆ្នាំ 1991 បន្ទាប់ពី សហរដ្ឋអាម៉េរិក និងសូវៀត ចុះកិច្ចព្រមព្រៀងបន្ថយអាវុធយុទ្ធសាស្ត្រ ដើម្បីកាត់បន្ថយចំនួនក្បាលគ្រាប់នុយក្លេអែរ។ ពេលនោះ ទ្រនិចនាឡិកាត្រូវបានដាក់ឆ្ងាយពីចំណុចមុនពាក់កណ្ដាលយប់ដល់ទៅ 17 នាទី។ ចាប់ពីពេលនោះមក ទ្រនិចនាទីរបស់នាឡិកានេះក៏ផ្លាស់ទីទៅមុខជាបន្តបន្ទាប់។ ការគំរាមកំហែងពីបម្រែបម្រួលអាកាសធាតុ ត្រូវបាន BAS កំណត់ជាលើកដំបូងថាជាកត្តាកំណត់ទីតាំងរបស់ទ្រនិចនាឡិកានៅឆ្នាំ 2007 ពេលដែលទ្រនិចនាឡិកាមានចម្ងាយពីចំណុចពាក់កណ្ដាលយប់ 5 នាទី មិនមែន 7 នាទីដូចមុនៗនោះ។

ឆ្នាំ 2020 ទ្រនិចនាឡិកាថ្ងៃវិនាសស្ថិតនៅត្រង់ចំណុច 100 វិនាទីមុនពាក់កណ្ដាលយប់ ជាចំណុចជិតបំផុតមិនធ្លាប់មានពីមុនមក។ «សង្គ្រាមនុយក្លេអែរដែលអាចបញ្ចប់អរិយធម៌របស់មនុស្សជាតិ គឺជារឿងដែលអាចកើតឡើង។ យើងក៏មិនអាចបដិសេធបញ្ហាបម្រែបម្រួលអាកាសធាតុដែលកំពុងកើតឡើង និងអាចបំផ្លាញពិភពផែនដីបានឡើយ» John Mecklin ដែលជាមន្ត្រីមួយរូបរបស់ BAS បានឱ្យដឹងដូច្នេះ។

ក្នុងរយៈពេលពីរឆ្នាំកន្លង ទ្រនិចនាឡិកាថ្ងៃវិនាសនៅតែស្ថិតនៅត្រង់ចំណុច 100 វិនាទីមុនពាក់កណ្ដាលយប់។ ក្រុមអ្នកជំនាញកំពុងតែរង់ចាំមើលថាតើបណ្ដាព្រឹត្តិការណ៍ក្នុងឆ្នាំកន្លង រួមមានជាអាទិ៍ ការបំភាយឧស្ម័នផ្ទះកញ្ចក់ទូទាំងពិភពលោក និងសង្គ្រាមរវាងរស្ស៊ី – អ៊ុយក្រែន អាចប៉ះពាល់ដល់ទ្រនិចនាទីរបស់នាឡិកាថ្ងៃវិនាសនេះដែរ ឬទេ៕

January 19, 2023

ឥណ្ឌាទំនងជាបានឈ្នះចិន ក្លាយជាប្រទេសមានប្រជាជនច្រើនជាងគេលើពិភពលោក

ចំនួនប្រជាជនរបស់ប្រទេសឥណ្ឌា មកដល់ចុងឆ្នាំ 2022 ទំនងជាមានច្រើនជាងប្រទេសចិន 5 លាននាក់ និងក្លាយជាប្រទេសដែលមានប្រជាជនច្រើនជាងគេលើពិភពលោក។

យោងតាមការគណនារបស់ World Population Review (WPR) ដែលជាអង្គការឯករាជ្យមានទីស្នាក់ការកណ្ដាលនៅសហរដ្ឋអាម៉េរិក ចំនួនប្រជាជនជននៅឥណ្ឌា គិតត្រឹមចុងឆ្នាំ 2022 គឺ 1.417 ពាន់លាននាក់ ខ្ពស់ជាង 5 លាននាក់ បើធៀបនឹងប្រទេសចិន។

ឥណ្ឌា ប្រទេសមានប្រជាជនចំនួនពាក់កណ្ដាលដែលមានអាយុក្រោម 30 ឆ្នាំ នឹងក្លាយជាខឿនសេដ្ឋកិច្ចធំមួយដែលរីកចម្រើនលឿនជាងគេលើពិភពលោកក្នុងប៉ុន្មានឆ្នាំទៀត។ ដើម្បីប្រើប្រាស់ចំណុចខ្លាំងផ្នែកប្រជាសាស្ត្រនេះ ឥណ្ឌាត្រូវការបង្កើតការងារថ្មីដល់ប្រជាជនរាប់លាននាក់ជារៀងរាល់ឆ្នាំ នៅពេលដែលកសិករជាច្រើនបោះបង់ស្រែចំការ។

ចំណែកអង្គការសហប្រជាជាតិវិញ បានគណនាឃើញថា ឥណ្ឌានឹងក្លាយជាប្រទេសមានប្រជាជនច្រើនជាងគេបង្អស់នៅចុងឆ្នាំនេះ។ ដោយសារតែផលប៉ះពាល់ពីវិបត្តិសុខភាព ឆ្នាំ 2021 ឥណ្ឌាមិនបានប្រកាសទិន្នន័យស្ដីពីការជំរឿនដែលធ្លាប់ធ្វើឡើងរៀងរាល់មួយទសវត្សរ៍ម្ដងនោះទេ។

អង្គការសហប្រជាជាតិបានរកឃើញថា ជាងពាក់កណ្ដាលនៃចំនួនប្រជាជនដែលគ្រោងនឹងកើនឡើងនៅទូទាំងសកលលោក គិតចាប់ពីឆ្នាំ 2022 ដល់ 2050 គឺភាគច្រើនប្រមូលផ្ដុំនៅក្នុង 8 ប្រទេស រួមមាន កុងហ្កោ អេហ្ស៊ីប អេត្យូពី ឥណ្ឌា នីហ្សេរីយ៉ា ប៉ាគីស្ថាន ហ្វ៊ីលីពីន និងតង់សានី៕

January 18, 2023

អូស្ត្រាលី៖ យន្តហោះដឹកមនុស្សជាង 100 នាក់ ផ្ដល់សញ្ញាសុំជួយសង្គ្រោះបន្ទាន់

ជើងហោះហើរលេខ QF144 ដឹកមនុស្សជាង 100 នាក់ ហោះពី Auckland ប្រទេសនូវែលសេឡង់ បានបញ្ចេញសញ្ញាសុំជួយសង្គ្រោះនៅពេលត្រៀមចុះចតលើព្រលានយន្តហោះ Sydney។

អ្នកនាំពាក្យមួយរូបរបស់ផ្នែកសង្គ្រោះបន្ទាន់នៅឯព្រលានយន្តហោះ Sydney បានឱ្យដឹងថា អង្គភាពនេះកំពុងធ្វើការប្រតិកម្មចំពោះជើងហោះហើររបស់ក្រុមហ៊ុន Qantas Airways ដែលត្រូវបានគេដឹងថា មានដឹកអ្នកដំណើរជាង 100 នាក់មកពីនូវែលសេឡង់ បន្ទាប់ពីទទួលបានសញ្ញាពីយន្តហោះនេះ។

យន្តហោះនេះបានចាកចេញពី Auckland ប្រទេសនូវែលសេឡង់ នៅថ្ងៃនេះ នឹងគ្រោងចុះចតនៅ Sydney នៅវេលាម៉ោង 11 និង 28 នាទី (ម៉ោងនៅកម្ពុជា)។ យោងតាមសារព័ត៌មាន Franceinfo យន្តហោះ Boeing 737-800 ខាងលើ បានចុះចតដោយសុវត្ថិភាព។

Safe touchdown of #Qantas flight #QF144
Further details to follow@SamChuiPhotos pic.twitter.com/ROoxWTwHic
— Ted Perton (@tedperton) January 18, 2023

ទូរទស្សន៍លេខ 9 របស់ប្រទេសអូស្ត្រាលី បានផ្សាយថា មូលហេតុអាចបណ្ដាលមកពីបញ្ហាម៉ាស៊ីនរបស់យន្តហោះ៕

…

January 18, 2023

ក្រុមកំពូលអ្នកមានអំពាវនាវដល់រដ្ឋាភិបាល សូមឱ្យ «យកពន្ធលើទ្រព្យសម្បត្តិរបស់ពួកយើង»

សមាជិកជាង 200 នាក់របស់ក្រុមកំពូលអ្នកមាន បានអំពាវនាវឱ្យរដ្ឋាភិបាលបណ្ដាប្រទេស «យកពន្ធលើយើងខ្ញុំជាបន្ទាន់» ដើម្បីដោះស្រាយគ្រោះទុរភិក្ស។

ក្រុមមហាសេដ្ឋី និងសេដ្ឋីដែលមានសមាជិក 205 រូប ក្នុងនោះមានទាំងអ្នកស្នងមរតកក្រុមហ៊ុន Disney មហាសេដ្ឋិនី Abigail Disney និងលោក Mark Ruffalo ដែលជាតារាសម្ដែងក្នុងតួអង្គ Huk ជាដើម កាលពីថ្ងៃទី 17 មករា បានប្រកាសអំពាវនាវដល់ក្រុមមេដឹកនាំពិភពលោក និងក្រុមមេដឹកនាំដែលកំពុងប្រជុំនៅឯវេទិកាសេដ្ឋកិច្ចពិភពលោក (WEF) នៅ Davos ប្រទេសស្វ៊ីស ប្រញាប់ចេញផែនការយកពន្ធលើទ្រព្យសម្បត្តិដើម្បីដោះស្រាយបញ្ហា «វិសមភាពធ្ងន់ធ្ងរ» ក្នុងសង្គម។

«ការការពារប្រជាធិបតេយ្យ ការកសាងកិច្ចសហប្រតិបត្តិការ ទាមទារឱ្យមានសកម្មភាពដើម្បីស្ថាបនាសេដ្ឋកិច្ចស្មើភាពគ្នាចាប់ពីពេលនេះ។ នេះមិនមែនជាបញ្ហាដែលត្រូវទុកឱ្យកូនចៅជំនាន់ក្រោយរបស់យើងដោះស្រាយឡើយ។ ពេលនេះគឺជាពេលដែលត្រូវដោះស្រាយបញ្ហាកំពូលអ្នកមាន ជាពេលដែលត្រូវយកពន្ធលើអ្នកមានកំពូលៗ»។

ក្នុងលិខិតដែលមានចំណងជើងថា «ផលវិបាករបស់ភាពមានបានកម្រិតកំពូល» ក្រុមសេដ្ឋី និងមហាសេដ្ឋីមកពី 13 ប្រទេសបានឱ្យដឹងថា «ក្នុងប្រវត្តិសាស្ត្រ 5 ទសវត្សរ៍កន្លង គឺជារឿងរ៉ាវស្ដីពីភាពមានបានដែលមិនបានសាយភាយទៅដល់កន្លែងដទៃ ប៉ុន្តែវាបន្តបាចសាចទៅលើពួកគេដដែល។ ក្នុងប៉ុន្មានឆ្នាំមកនេះ និន្នាការនេះបានបង្កើនល្បឿនគួរឱ្យកត់សម្គាល់។ ដំណោះស្រាយនៅពេលនេះគឺថា អស់លោកដែលជាអ្នកតំណាងនៅទូទាំងសកលលោក ត្រូវតែយកពន្ធលើយើងខ្ញុំ ដែលជាក្រុមកំពូលអ្នកមាន និងត្រូវធ្វើពីពេលនេះ»។

មហាសេដ្ឋិនី Abigail Disney និងលោក Mark Ruffalo ដែលជាតារាសម្ដែងក្នុងតួអង្គ Huk ក៏ស្ថិតក្នុងក្រុមអ្នកមានដែលបានអំពាវនាវឱ្យយកពន្ធលើទ្រព្យសម្បត្តិរបស់ក្រុមកំពូលអ្នកមាន

ក្រុមអ្នកមានខាងលើព្រមានថា បើមិនធ្វើសកម្មភាពទេ នោះមហន្តរាយនឹងកើតឡើង។ «មានភាពតានតឹងជាច្រើនដែលសង្គមត្រូវរងផលប៉ះពាល់ មានឪពុកម្ដាយជាច្រើនបានត្រឹមតែមើលកូនៗស្រេកឃ្លាន គ្រាដែលក្រុមអ្នកមានកំពូលៗសម្លឹងមើលទ្រព្យសម្បត្តិរបស់ពួកគេកើនឡើងពីមួយថ្ងៃទៅមួយថ្ងៃ។ …ដល់ពេលដែលត្រូវធ្វើសកម្មភាពហើយ។»។

លិខិតខាងលើត្រូវបានលើកឡើងនៅពេលមានការស្រាវជ្រាវថ្មីមួយបានបង្ហាញថា ជិត 2/3 នៃទ្រព្យសម្បត្តិដែលទើបរកបានចាប់តាំងពីកូវីដ-19 ផ្ទុះឡើង គឺជាកម្មសិទ្ធិរបស់ មនុស្ស 1% លើផែនដី ដែលជាអ្នកមានជាងគេ។ អង្គការមនុស្សធម៌ Oxfam ឱ្យដឹងថា ក្រុមអ្នកមានកំពូលៗរកបានទ្រព្យថ្មី 26 ទ្រីលាន (26,000,000,000,000) ដុល្លារអាម៉េរិក គិតត្រឹមចុងឆ្នាំ 2021។ តួលេខនេះស្មើនឹង 63% ក្នុងចំណោមទ្រព្យថ្មីសរុបដែលទើបរកបាន ហើយទ្រព្យក្ដៅពីនេះគឺជាកម្មសិទ្ធិរបស់មនុស្ស 99% នៅលើផែនដី។

Oxfam បន្តថា ការកើនឡើងនៃទ្រព្យសម្បត្តិរបស់ក្រុមអ្នកមានកម្រិតកំពូលគឺអមជាមួយនឹងការកើនឡើងនៃគ្រោះទុរភិក្ស។ អង្គការនេះក៏បានអំពាវនាវឱ្យមានការយកពន្ធលើក្រុមកំពូលអ្នកមានផងដែរ។ យោងតាម Oxfam បើសិនជាយកពន្ធ 5% លើទ្រព្យសម្បត្តិរបស់សេដ្ឋី និងមហាសេដ្ឋីនៅលើពិភពលោក គេអាចប្រមូលបានប្រាក់ 1.7 ទ្រីលានដុល្លារអាម៉េរិក/ឆ្នាំ គ្រប់គ្រាន់សម្រាប់ការជួយដល់ដល់មនុស្ស 2 ពាន់លាននាក់ដែលកំពុងអត់ឃ្លាន និងផ្ដល់ជំនួយដល់បណ្ដាមូលនិធិមនុស្សធម៌នានាដើម្បីបញ្ចប់គ្រោះទុរភិក្ស៕

January 18, 2023

អូស្ត្រាលីចំណាយជិតពីរពាន់លានដុល្លារអាម៉េរិក ដើម្បីទិញឧទ្ធម្ភាគចក្រផលិតដោយ Lockheed Martin

ក្រសួងការពារជាតិអូស្ត្រាលី ប្រកាសថា ចំណាយប្រាក់ 1.96 ពាន់លានដុល្លារ ដើម្បីទិញឧទ្ធម្ភាគចក្រពហុមុខងាររបស់សហរដ្ឋអាម៉េរិក Black Hawk ចំនួន 40 គ្រឿង។

កាលពីថ្ងៃទី 17 មករា ក្រសួងការពារជាតិរបស់អូស្ត្រាលី បានប្រកាសថា នឹងទិញឧទ្ធម្ភាគចក្រ UH-60M Black Hawk របស់ក្រុមហ៊ុនអាម៉េរិក Lockheed Martin ចំនួន 40 គ្រឿង ដើម្បីជំនួសក្រុមហោះហើរ MR-90 Taipan ដែលផលិតដោយក្រុមហ៊ុន Airbus របស់អឺរ៉ុប។

ឧត្តមសេនីយ៍ Jeremy King ទទួលខុសត្រូវផ្នែកសព្វាវុធនៃក្រសួងការពារជាតិអូស្ត្រាលី ឱ្យដឹងថា នេះគឺជាការទិញដូរដ៏សំខាន់ដើម្បីបម្រើដល់តម្រូវការជាយុទ្ធសស្ត្ររបស់កងកម្លាំងប្រដាប់អាវុធ។ «Black Hawk គឺជាមូលដ្ឋានដែលត្រូវបានអភិវឌ្ឍពេញលេញដ៏គួរឱ្យទុកចិត្តបាន ធ្លាប់ត្រូវបានសាកល្បង និងត្រូវបានគាំទ្រដោយបណ្ដាញផ្គត់ផ្គង់សាកលយ៉ាងមាំមួន» លោក Jeremy King អះអាងដូច្នេះ។

កងទ័ពអូស្ត្រាលីកំពុងប្រើប្រាស់ឧទ្ធម្ភាគចក្រ Taipan ចំនួន 47 គ្រឿង ហើយគ្រោងនឹងបន្តប្រើប្រាស់រហូតដល់ឆ្នាំ 2037។ ប៉ុន្តែ កន្លងមកឧទ្ធម្ភាគចក្រនេះជួបបញ្ហាជាញឹកញាប់ និងត្រូវបានផ្អាកការប្រើប្រាស់ច្រើនដងដើម្បីការពារសុវត្ថិភាព។

UH-60 Black Hawk គឺជាឧទ្ធម្ភាគចក្រដឹកជញ្ជូនយុទ្ធសាស្ត្រដែលត្រូវបានសហរដ្ឋអាម៉េរិកដាក់ឱ្យប្រើប្រាស់ក្នុងជួរកងទ័ពតាំងពីឆ្នាំ 1979។ វាអាចហោះហើរក្នុងល្បឿន 295 គីឡូម៉ែត្រ/ម៉ោង និងអាចហោះកម្ពស់ 5.8 គីឡូម៉ែត្រ។ កំណែថ្មីៗរបស់ Black Hawk ក៏ត្រូវបានអភិវឌ្ឍសម្រាប់កងទ័ពអាម៉េរិក ក៏ដូចជាសម្រាប់ការនាំចេញទៅកាន់ប្រទេសជាច្រើនលើពិភពលោក៕

January 18, 2023

ស្ត្រីវ័យចំណាស់ជាងគេបង្អស់លើពិភពលោក បានទទួលមរណភាពហើយ

បូជាចារ្យជនជាតិបារាំង លោកយាយ Lucile Randon ដែលជាស្ត្រីមួយរូបត្រូវបានគេជឿថា មានវ័យចំណាស់ជាងគេលើពិភពលោក បានទទួលមរណភាពក្នុងជន្មាយុ 118 ឆ្នាំ ពេលកំពុងសម្រាន្តនៅឯមជ្ឈមណ្ឌលចាស់ជរា។

លោកយាយ Lucile Randon កើតឆ្នាំ 1904 នៅ Ales ភាគខាងត្បូងប្រទេសបារាំង។ នេះគឺជាឆ្នាំដែល New York សម្ពោធផ្លូវរថភ្លើងអគ្គិសនីក្រោមដីដំបូង ខណៈពានរង្វាន់ប្រណាំងកង់ប្រចាំឆ្នាំ Tour de France ទើបតែប្រារព្ធឡើងបានមួយរដូវកាល។

ការបួងសួង និងការទៅសួរសុខទុក្ខប្រជាជនគឺជាសកម្មភាពប្រចាំថ្ងៃរបស់លោកយាយ Lucile Randon ពេលរស់នៅក្នុងមជ្ឈមណ្ឌលចាស់ជរានៅ Toulon។

បើទោះជាពិការភ្នែក និងត្រូវជិះរទេះរុញ ប៉ុន្តែលោកយាយ Lucile Randon នៅតែយកចិត្តទុកដាក់ដល់ជនចាស់ជរាដទៃ ព្រោះថា នោះគឺជាសុភមង្គលរបស់លោកយាយ។ កាលពីឆ្នាំ 2021 លោកយាយ Lucile Randon បានក្លាយជានិមិត្តរូបនៃក្ដីសង្ឃឹមរបស់មនុស្សនៅលើពិភពលោក បន្ទាប់ពីបានយកឈ្នះលើជំងឺកូវីដ-19។

នៅពេលត្រូវបានសួរអំពីអាថ៌កំបាំងដែលជួយឱ្យមានអាយុយឺនយូរ លោកយាយ Lucile Randon ប្រាប់ថា «គេនិយាយថា ការធ្វើការអាចប៉ះពាល់ដល់សុខភាព ប៉ុន្តែសម្រាប់ខ្ញុំ ការធ្វើការបានជួយឱ្យខ្ញុំរស់បានយូរ»។ លោកយាយឱ្យដឹងថា នៅតែធ្វើការពេលមានអាយុ 108 ឆ្នាំ។

លោកយាយ Lucile Randon តែងតែបដិសេធសំណើសុំពិនិត្យ DNA និងមានប្រសាសន៍ថា «មានតែព្រះអម្ចាស់ប៉ុណ្ណោះទើបដឹង» អំពីអាថ៌កំបាំងជួយឱ្យលោកយាយមានអាយុយឺនយូរ៕

January 18, 2023

គ្រោះថ្នាក់អាកាសចរណ៍ដែលសម្លាប់មនុស្សច្រើនជាងគេក្នុងប្រវត្តិសាស្ត្រ

យន្តហោះបុកគ្នានៅលើផ្លូវរត់ កំហុសផ្នែកទំនាក់ទំនង ឬកំហុសផ្នែកបច្ចេកទេសគឺជាមូលហេតុចម្បងដែលបណ្ដាលឱ្យមានគ្រោះថ្នាក់អាកាសចរណ៍សម្លាប់មនុស្សច្រើនពាន់នាក់ក្នុងប្រវត្តិសាស្ត្រ។

1-ករណីយន្តហោះ Boeing 747 ពីរគ្រឿងប៉ះគ្នានៅ Tenerife ប្រទេសអេស្ប៉ាញកាលពីថ្ងៃទី 27 មីនា 1977 គឺជាគ្រោះថ្នាក់យន្តហោះដែលបានសម្លាប់មនុស្សច្រើនជាងគេក្នុងប្រវត្តិសាស្ត្រអាកាសចរណ៍របស់ពិភពលោក។

ដោយសារតែកំហុសផ្នែកទំនាក់ទំនង យន្តហោះ KLM 4805 កំពុងផ្លាស់ទីលើផ្លូវរត់ដើម្បីត្រៀមហោះឡើង ស្រាប់តែបានប៉ះនឹង Pan Am 1736 ដែលជាយន្តហោះកំពុងស្ថិតនៅលើផ្លូវរត់ដូចគ្នា។ គ្រោះថ្នាក់យន្តហោះដែលកើតឡើងដោយសារមេឃចុះអ័ព្ទក្រាស់នេះបានសម្លាប់មនុស្ស 583 នាក់ ខណៈ 61 នាក់ផ្សេងទៀតបានរួចពីការស្លាប់។

2-យន្តហោះ Boeing 747 របស់ក្រុមហ៊ុន Japan Airlines កំពុងហោះហើរក៏ជួបនឹងឧបទ្ទវហេតុកាលពីថ្ងៃទី 12 សីហា 1985 នៅជប៉ុន។

កំហុសបច្ចេកទេសត្រង់ជញ្ជាំងទប់សម្ពោធនៅខាងក្រោយយន្តហោះ បណ្ដាលឱ្យកន្ទុយរបស់វាត្រូវបាក់ នាំឱ្យយន្តហោះធ្លាក់ទៅបុកភ្នំ Takamagahara។ គ្រោះថ្នាក់នេះបានសម្លាប់មនុស្ស 520 នាក់ និង 4 នាក់រួចពីការស្លាប់។

3-ករណីប៉ះគ្នាលើអាកាសនៅភូមិ Charkhi Dadri ប្រទេសឥណ្ឌា កាលពីថ្ងៃទី 12 វិច្ឆិកា 1996 រវាងយន្តហោះ Boeing 747 របស់ក្រុមហ៊ុន Saudi Arabian Airlines និង Ilyushin II-76 របស់ក្រុមហ៊ុន Kazakhstan Airlines។

មូលហេតុត្រូវបានគេដឹងថា ដោយសារអ្នកបើកបររបស់ Kazakhstan Airlines មិនបានរក្សាកម្ពស់ឱ្យបានច្បាស់ព្រោះតែបញ្ហានៅពេលទំនាក់ទំនងជាមួយបុគ្គលិកគ្រប់គ្រងជើងហោះហើរ។ ឧបទ្ទវហេតុនេះបានសម្លាប់មនុស្ស 349 នាក់ដែលនៅលើយន្តហោះទាំងពីរ។

ក្រៅពីនេះ នៅមានករណីគ្រោះថ្នាក់យន្តហោះជាច្រើនទៀតដែលបានសម្លាប់មនុស្សរាប់រយនាក់/ករណី រួមមាន ៖

4-ករណីយន្តហោះ McDonnell Douglas DC-10 របស់ក្រុមហ៊ុនអាកាសចរណ៍តួកគី ធ្លាក់នៅប្រទេសបារាំង កាលពីថ្ងៃទី 03 មីនា 1974 បានសម្លាប់មនុស្ស 346 នាក់។

5-យន្តហោះក្រុមហ៊ុនឥណ្ឌា Air India 182 កាលពីថ្ងៃទី 23 មិថុនា 1985 ក៏មានហេតុការណ៍បំផ្ទុះគ្រាប់បែកនៅលើអាកាស បណ្ដាលឱ្យយន្តហោះធ្លាក់ចូលមហាសមុទ្រអាត្លង់ទិក សម្លាប់មនុស្ស 329 នាក់។

6-យន្តហោះ Saudi Arabian 163 កាលពីថ្ងៃទី 19 សីហា 1980 បានឆាបឆេះនៅពេលហោះឡើង និងបានធ្លាក់ សម្លាប់មនុស្ស 301 នាក់។

7-យន្តហោះ MH17 របស់ Malaysia Airlines ត្រូវបានគេសង្ស័យថា ត្រូវរុស្ស៊ីបាញ់ទម្លាក់កាលពីថ្ងៃទី 17 កក្កដា 2014 ពេលហោះឆ្លងភាគខាងកើតប្រទេសអ៊ុយក្រែន បណ្ដាលឱ្យមនុស្ស 298 នាក់បាត់បង់ជីវិត។

8-យន្តហោះ Iran Air 655 របស់ Iran Air ត្រូវបាននាវាផ្ទុកយន្តហោះចម្បាំងអាម៉េរិក បាញ់ទម្លាក់កាលពីថ្ងៃទី 03 កក្កដា 1988 ក្នុងដែនអាកាសអ៊ីរ៉ង់ ក្នុងសម័យសង្គ្រាមអ៊ីរ៉ង់-អ៊ីរ៉ាក់ ដែលកាលណោះ អាម៉េរិកគឺជាអ្នកគាំទ្រអ៊ីរ៉ាក់៕

January 17, 2023

ប្ដីប្រពន្ធជាពីឡុតមួយគូ «ស្លាប់ឃ្លាតពីគ្នា 16 ឆ្នាំក្នុងករណីធ្លាក់យន្តហោះនៅនេប៉ាល់»

Khatiwada ដែលជាអ្នកបើកបរយន្តហោះដឹកមនុស្ស 72 នាក់ និងបានជួបគ្រោះថ្នាក់ធ្លាក់យន្តហោះកាលពីថ្ងៃទី 15 មករា 2023 ក៏មានស្វាមីឈ្មោះ Pokhrel ជាពីឡុតម្នាក់ដែលបានស្លាប់ក្នុងហេតុការណ៍ធ្លាក់យន្តហោះកាលពីឆ្នាំ 2006។

ពីឡុតរង Anju Khatiwada កាលពីឆ្នាំ 2010 បានចូលធ្វើការឱ្យក្រុមហ៊ុនអាកាសចរណ៍ Yeti Airlines របស់នេប៉ាល់ ដើម្បីបន្តអាជីពជាអ្នកបើកបរយន្តហោះរបស់ស្វាមី Dipak Pokhrel ជាពីឡុតដែលបានស្លាប់ក្នុងគ្រោះថ្នាក់យន្តហោះកាលពីមុននោះ 4 ឆ្នាំ។

«ស្វាមីរបស់អ្នកស្រីបានស្លាប់កាលពីឆ្នាំ 2006 ក្នុងគ្រោះថ្នាក់យន្តហោះធុនតូច Twin Otter របស់ Yeti Airlines នៅ Jumla (ឃុំមួយរបស់ប្រទេសនេប៉ាល់)។ អ្នកស្រីបានចូលរួមកម្មវិធីបណ្ដុះបណ្ដាលពីឡុតដោយប្រើប្រាស់ប្រាក់ធានារ៉ាប់រងជីវិតរបស់ស្វាមី ក្រោយពីគាត់បានស្លាប់» Sudarshan Bartaula អ្នកនាំពាក្យរបស់ក្រុមហ៊ុន Yeti Airlines កាលពីថ្ងៃទី 16 មករា បានឱ្យដឹងដូច្នេះ។

យោងតាមសារព័ត៌មានរបស់នេប៉ា់ល់ Dipak Pokhrel គឺជាម្នាក់ក្នុងចំណោមមនុស្ស 10 នាក់ដែលបានស្លាប់នៅពេលយន្តហោះ Twin Otter បានធ្លាក់ក្នុងពេលកំពុងហោះហើរពី Nepalganj ទៅកាន់ Jumla កាលពីថ្ងៃទី 21 មិថុនា 2006។ Pokhrel ពេលនោះគឺជាពីឡុតរងនៅលើយន្តហោះដែលបានជួបគ្រោះថ្នាក់នោះ។

អ្នកស្រី Khatiwada ដែលជាភរិយារបស់សពអតីតអ្នកបើកបរយន្តហោះ Pokhrel កាលពីថ្ងៃទី 15 មករា គឺជាពីឡុតរងនៅលើយន្តហោះដឹកមនុស្ស 72 នាក់ របស់ក្រុមហ៊ុន Yeti Airlines ដូចគ្នា ដែលហោះពីរដ្ឋធានីកដ្ឋមណ្ឌូ ទៅកាន់ទីក្រុង Pokhara។ យន្តហោះនេះបានធ្លាក់មុនការចុះចតតែ 10 វិនាទីប៉ុណ្ណោះ។ ហេតុការណ៍ធ្លាក់យន្តហោះនេះបានសម្លាប់មនុស្សយ៉ាងតិច 68 នាក់ ខណៈជនរងគ្រោះក្រៅពីនេះក៏មិនមានសង្ឃឹមថានៅមានជីវិត។

ជើងហោះហើរកាលពីថ្ងៃទី 15 មករា 2023 គួរណាស់តែជាជើងហោះហើរចុងក្រោយរបស់ Khatiwada ក្នុងឋានៈជាពីឡុតរង មុនពេលអ្នកស្រីត្រូវបានដំឡើងឋានៈជាប្រធានពីឡុត។

ប្រអប់ខ្មៅចំនួនពីរត្រូវបានរកឃើញកាលពីថ្ងៃទី 16 មករា នឹងជួយឱ្យសមត្ថកិច្ចអាចរកឃើញមូលហេតុដែលនាំឱ្យកើតមានឧបទ្ទវហេតុធ្លាក់យន្តហោះនេះ។

នៅប្រទេសនេប៉ាល់ ចំនួនមនុស្សដែលបានស្លាប់ក្នុងករណីធ្លាក់យន្តហោះ និងឧទ្ធម្ភាគចក្រ បានកើនជិតដល់ 350 នាក់ រាប់ចាប់ពីឆ្នាំ 2000។ ឧបទ្ទវហេតុធ្លាក់យន្តហោះដែលរន្ធត់បំផុតនៅនេប៉ាល់ គឺករណីឆ្នាំ 1992 ដែលកាលណោះ មនុស្សទាំង 167 នាក់លើជើងហោះហើររបស់ក្រុមហ៊ុនអាកាសចរណ៍អន្តរជាតិប៉ាគីស្ថាន បានស្លាប់ពេលយន្តហោះធ្លាក់ក្នុងគ្រាត្រៀមចុះចតនៅកដ្ឋមណ្ឌូ៕

January 17, 2023

ការរស់នៅនៃប្រជាជនក្នុងទីក្រុងដែលត្រជាក់ជាងគេលើពិភពលោក

Nurgusun Starostina ជាអ្នកស្រុក Yakutsk ដែលជាទីក្រុងរបស់ស៊ីបេរី នៅតំបន់ចុងបូព៌ានៃប្រទេសរុស្ស៊ី ឱ្យដឹងថា ដើម្បីទប់ទល់នឹងអាកាសធាតុត្រជាក់ -50 អង្សាសេ នាងត្រូវស្លៀកពាក់ «ដូចទៅនឹងស្ពៃក្ដោប»។

ស្ថិតនៅឆ្ងាយពីរដ្ឋធានីមូស្គូប្រហែល 5,000 គីឡូម៉ែត្រទៅទិសខាងកើត និងនៅលើតំបន់កកជារៀងរហូត Yakutsk តែងតែមានសីតុណ្ហភាព -40 អង្សាសេ និងជាទីក្រុងដែលត្រជាក់ជាងគេបង្អស់លើពិភពលោក។ កាលពីសប្ដាហ៍កន្លង រដូវត្រជាក់បានអូសបន្លាយពេលខុសពីធម្មតា ធ្វើឱ្យសីតុណ្ហភាពចុះដល់ -50 អង្សាសេ។

«មិនអាចប្រឆាំងនឹងអាកាសធាតុបែបនេះបានឡើយ។ អ្នកបានត្រឹមតែសម្របខ្លួន និងស្លៀកពាក់ឱ្យបានសមស្រប» Anastasia Gruzdeva ដែលបានស្ថិតនៅក្រៅផ្ទះកាលពីថ្ងៃទី 15 មករា ប្រាប់ដូច្នេះ។

បើទោះជាអាកាសធាតុត្រជាក់ខ្លាំង ទីក្រុងខាងលើនៅតែមានប្រជាជនរស់នៅប្រហែល 300,000 នាក់។ ទីក្រុងសម្បូររ៉ែ Yakutsk នេះ មានវឌ្ឍនភាពខ្លាំងក្នុងរយៈពេលច្រើនទសវត្សរ៍កន្លង និងទាក់ទាញបានយុវវ័យជាច្រើនមករស់នៅ។

«បានរស់នៅទីនេះ អ្នកមិនមានអារម្មណ៍ថាត្រជាក់ទៀតទេ។ ខួរក្បាលនឹងប្រាប់អ្នកថា គ្រប់យ៉ាងនៅតែធម្មតា» Gruzdeva រៀបរាប់បន្ថែមអំពីទីក្រុងដែលត្រូវគ្របដណ្ដប់ដោយព្រឹល អ័ព្ទ និងទឹកកក។

Nurgusun Starostina ដែលជាអ្នកលក់ត្រីបង្កកនៅផ្សារដោយមិនបាច់មានទូក្លាសេ បាននិយាយថា ពុំមានគន្លឹះអាថ៌កំបាំងណាមួយសម្រាប់ទប់ទល់នឹងធាតុត្រជាក់។ នាងថា «ត្រូវការតែសម្លៀកបំពាក់ក្រាស់។ ស្លៀកពាក់ច្រើនជាន់ ដូចទៅនឹងស្ពៃក្ដោបអីចឹង!»។ Starostina បន្ថែមថា «ផ្សាររបស់យើងគឺជាផ្សារដែលត្រជាក់បំផុតលើពិភពលោក»។

នៅក្នុងខែមករា សីតុណ្ហភាពនៅ Yakutia អាចចុះដល់ -70 អង្សាសេ។ ប្រជាជននៅទីនេះត្រូវបានណែនាំមិនឱ្យពាក់វ៉ែនតា ព្រោះថា ផ្នែកលោហធាតុរបស់វ៉ែនតានឹងកក ហើយជាប់ទៅនឹងស្បែក ព្រមទាំងអាចរលាត់ស្បែក បើប្រឹងបំបែកវាពីស្បែក។

នៅ Yakutia ប្រជាជន និងសិស្សានុសិស្សភាគច្រើនទៅធ្វើការ និងទៅសាលារៀនដោយជិះរថយន្តក្រុង។ ចំណែកអ្នកជិះរថយន្តផ្ទាល់ខ្លួន ត្រូវបំពាក់ប្រព័ន្ធកម្ដៅក្នុងរថយន្ត និងរុំភួយជុំវិញអាគុយ បើមិនដូច្នេះទេ រថយន្តនឹងពិបាកដំណើរការ។

«ត្រូវតែគ្របដណ្ដប់ក្បាល នេះគឺជារឿងសំខាន់។ ក្រៅពីនេះ អ្នកត្រូវតែស្លៀកខោក្រាស់ ព្រោះយើងតែងបាត់បង់កម្ដៅច្រើនត្រង់ជើង។ បើជើងអ្នកត្រជាក់ ដងខ្លួនទាំងមូលរបស់អ្នកក៏ត្រជាក់។ ដូច្នេះ ចូរស្លៀកពាក់ក្រាស់ៗ» Gruzdeva រៀបរាប់៕

January 16, 2023

នេប៉ាល់ប្រកាសកាន់ទុក្ខ ក្រោយហេតុការណ៍ធ្លាក់យន្តហោះកាលពីម្សិលមិញ

ប្រទេសនេប៉ាល់ប្រកាសកាន់ទុក្ខមួយថ្ងៃក្រោយពីមានហេតុការណ៍ធ្លាក់យន្តហោះដឹកមនុស្ស 72 នាក់ពេលកំពុងត្រៀមចុះចតនៅឯព្រលានយន្តហោះ Pokhara។

ឧបនាយករដ្ឋមន្ត្រីនេប៉ាល់ Bishnu Poudel បានឱ្យដឹងថា ថ្ងៃនេះប្រទេសនេប៉ាល់កាន់ទុក្ខដើម្បីរម្លឹកដល់វិញ្ញាណក្ខន្ធជនរងគ្រោះយ៉ាងតិច 68 នាក់ ដែលបានស្លាប់ក្នុងហេតុការណ៍ធ្លាក់យន្តហោះរបស់ក្រុមហ៊ុន Yeti Airlines កាលពីថ្ងៃទី 15 មករា 2023។

ក្រសួងមហាផ្ទៃនេប៉ាល់ ប្រកាសថា នឹងបង្ហូតទង់ជាតិពាក់កណ្ដាលដងដើម្បីរម្លឹកដល់វិញ្ញាណក្ខន្ធជនរងគ្រោះក្នុងហេតុការណ៍ដ៏សោកសៅនេះ។ រដ្ឋាភិបាលនេប៉ាល់ ក៏បានសម្រេចផ្អាករាល់សេវាកម្មសាធារណៈ លើកលែងតែសេវាកម្មចាំបាច់ និងពន្យារពេលរាល់កម្មវិធីដែលបានគ្រោងទុក នេះបើតាមអ្នកនាំពាក្យក្រសួងមហាផ្ទៃ Phadindra Mani Pokharel។

ចំណែកក្រុមហ៊ុនអាកាសចរណ៍ Yeti Airlines ក៏បានផ្អាករាល់ជើងហោះហើរដែលត្រូវបានកំណត់រួចហើយ ក្រោយពីមានហេតុការណ៍នៅ Pokhara។

យន្តហោះ ATR-72 របស់ Yeti Airlines បានជួបគ្រោះថ្នាក់ពេលកំពុងរងវិធីចុះចតលើព្រលានយន្តហោះអន្តរជាតិ Pokhara នៅភាគកណ្ដាលប្រទេសនេប៉ាល់។ អាជ្ញាធរនេប៉ាល់បានឱ្យដឹងថា បានរកឃើញសាកសពជនរងគ្រោះ 68 នាក់នៅកន្លែងកើតហេតុ។

វីដេអូដែលត្រូវបានបង្ហោះលើបណ្ដាញសង្គមបង្ហាញថា យន្តហោះ ATR-72 កំពុងហោះលើកម្ពស់ទាបខាងលើផ្ទះរបស់ប្រជាជនក៏ស្រាប់តែផ្អៀង 90 អង្សាទៅខាងឆ្វេង។ ក្រោយមកយន្តហោះនោះក៏បាត់ខ្លួនពីអេក្រង់ ប៉ុន្តែ នៅតែឮសំឡេងម៉ាស៊ីន និងសំឡេងប៉ះទង្គិចដ៏ខ្លាំង ដែលទំនងជាសំឡេងយន្តហោះធ្លាក់ដល់ដី។

ATR-72 គឺជាប្រភេទយន្តហោះដឹកអ្នកដំណើរខ្នាតតូច ដែលត្រូវបានដាក់ឱ្យប្រើប្រាស់តាំងពីឆ្នាំ 1988 និងអាចដឹកមនុស្សបាន 78 នាក់។ យន្តហោះ ATR-72 ជាង 400 គ្រឿងត្រូវបានផលិត និងលក់ឱ្យក្រុមហ៊ុនអាកាសចរណ៍នានានៅលើពិភពលោក។

មុននោះ ប្រទេសនេប៉ាល់ក៏ធ្លាប់មានគ្រោះថ្នាក់ធ្លាក់យន្តហោះដ៏មហារន្ធត់មួយកាលពីឆ្នាំ 1992 ដែលបានសម្លាប់មនុស្ស 167 នាក់។ យន្តហោះដែលជាកម្មសិទ្ធិរបស់ក្រុមហ៊ុនអាកាសចរណ៍អន្តរជាតិប៉ាគីស្ថាននោះ ជួបឧបទ្ទវហេតុនៅពេលព្យាយាមចុះចតនៅរដ្ឋធានីកដ្ឋមណ្ឌូ (Kathmandu)៕

January 16, 2023

Category: អន្តរជាតិ