អន្តរជាតិ - La Reine Media

ណាសារកឃើញ «ពពកយក្សបង្កបង្កើតជីវិត» ត្រជាក់បំផុតក្នុងចក្រវាល

តេឡេស្កុបអវកាស James Webb របស់ណាសា រកឃើញដុំពពកយក្សផ្ទុកសមាសធាតុមួយចំនួនដែលបង្កើតបានជាលំហមួយមានសីតុណ្ហភាព -263 អង្សាសេ។

នៅក្នុងលទ្ធផលនៃការសិក្សាស្រាវជ្រាវដែលត្រូវបានចុះផ្សាយលើទស្សនាវដ្ដី Nature Astronomy កាលពីថ្ងៃទី 23 មករា ក្រុមតារាវិទូបានប្រើប្រាស់ Webb ដើម្បីសង្កេតមើលផ្នែកខាងក្នុងរបស់ដុំពពកយក្សដែលមានឈ្មោះថា Chameleon I មានចម្ងាយពីផែនដីប្រហែល 500 ឆ្នាំពន្លឺ និងបានរកឃើញស្រទាប់ទឹកកកមួយដែលមានផ្ទុកសមាសធាតុសំខាន់ក្នុងការកកើតជីវិត រួមមាន កាបូន អុកស៊ីសែន អ៊ីដ្រូសែន នីដ្រូសែន និងស្ពាន់ធ័រ ដែលត្រូវបានហៅជារួមថា COHNS។ ពួកវាគឺជាបណ្ដុំនៃសមាសធាតុដែលបង្កើតពិភពដែលអាចរស់នៅបាន។

បណ្ដាដុំពពកដូច Chameleon I នេះ ក៏ត្រូវបានហៅថា ថ្នាលបណ្ដុះផ្កាយ ព្រោះថា ការ «ដួលរលំ» របស់ពួកវា បន្តិចម្ដងៗនឹងបង្កើតបានជាផ្កាយ និងភព។ សមាសធាតុគីមីខាងលើត្រូវបានកំណត់ដោយបណ្ដាស្រទាប់ទឹកកកនៅជ្រៅខាងក្នុងពពក Chameleon I។

ក្រៅពី COHNS សាមញ្ញ ក្រុមតារាវិទូខាងលើក៏បានរកឃើញភស្ដុតាងស្ដីពីទឹកដែលបានកក រួមនឹងម៉ូលេគុលសរីរាង្គស្មុគស្មាញជាងនេះ មានដូចជា មេតាណុល មេតាន អាម៉ូនិក និងកាបូនអ៊ីលស៊ុលហ្វីត (methanol, methane, ammoniac, carbonyl sulfide) ទៀតផង។

យោងតាម Space/CNN នាពេលខាងមុខ ក្រុមអ្នកវិទ្យាសាស្ត្រនេះគ្រោងនឹងប្រើប្រាស់ទិន្នន័យរបស់ James Webb ដើម្បីគណនារកទំហំរបស់គ្រាប់ធូលី និងទម្រង់រូបរាងរបស់ទឹកកក។ ការសង្កេតទាំងនេះនឹងបើកផ្លូវឱ្យមានការយល់ដឹងច្បាស់អំពីដំណើរការកកើតរបស់បណ្ដាម៉ូលេគុលសាមញ្ញ និងស្មុគស្មាញចាំបាច់ដើម្បីបង្កើតបានជាបណ្ដុំបង្កបង្កើតជីវិត៕

January 26, 2023

លិចកប៉ាល់ដឹកទំនិញនៅលើសមុទ្រជប៉ុន នាំឱ្យមនុស្ស 18 នាក់បាត់ខ្លួន

កម្លាំងការពារឆ្នេរសមុទ្រជប៉ុនប្រកាសថា កប៉ាល់ដឹកទំនិញ Jintan បានលិចនៅលើលំហសមុទ្រ Nagasaki នៅពេលយប់ ហើយសមត្ថកិច្ចសង្គ្រោះបាន 4 នាក់ ចំណែក 18 នាក់ទៀតកំពុងបាត់ខ្លួន។

ប៉ូលិសសមុទ្រជប៉ុន (JCG) បានឱ្យដឹងថា កប៉ាល់ Jintan បានបញ្ចេញសញ្ញាសុំជួយសង្គ្រោះនៅវេលាម៉ោងប្រហែល 23 និង 15 នាទី (ម៉ោង 21 និង 15 នាទីនៅកម្ពុជា) ថ្ងៃទី 24 មករា ចេញពីតំបន់សមុទ្ររបស់ខេត្ត Nagasaki និងមានចម្ងាយពីកោះ Danjo ប្រហែល 110 គីឡូម៉ែត្រទៅទិសខាងលិច។

ក្រុមនាវិកពេលនោះបានប្រាប់ថា «កប៉ាល់ផ្អៀង និងចូលទឹក» ហើយថាបានឡើងទូកសង្គ្រោះបន្ទាន់មុនពេលកប៉ាល់នេះលិច។ នៅលើកប៉ាល់ Jintan នេះមានមនុស្ស 14 នាក់ជាជនជាតិចិន និង 8 នាក់ជាជនជាតិមីយ៉ានម៉ា។

JCG បញ្ជាក់ថា កប៉ាល់ Jintan មានទម្ងន់ 6,600 តោន ចុះឈ្មោះនៅហុងកុង។ ការិយាល័យនាយករដ្ឋមន្ត្រីជប៉ុន ឱ្យដឹងថា បានបង្កើតក្រុមទំនាក់ទំនងមួយរួចហើយដើម្បីសម្រួលដល់ករណីលិចកប៉ាល់នេះ។

ឧបទ្ទវហេតុនេះបានកើតឡើងនៅពេលប្រទេសជប៉ុនកំពុងរងអាកាសធាតុត្រជាក់ខ្លាំង ក្នុងនោះ សីតុណ្ហភាពនៅលើកោះមួយចំនួននៅក្បែរកន្លែងកើតហេតុបំផុត ចុះត្រជាក់ដល់ 3 អង្សាសេ នៅពេលថ្ងៃ៕

January 25, 2023

«នាឡិកាប្រាប់ថ្ងៃវិនាសនៃផែនដី» រំកិលទៅមុខថែម 10 វិនាទីទៀតហើយ!

ដោយសារតែការគំរាមកំហែងពីសង្គ្រាមរវាងរុស្ស៊ី និងអ៊ុយក្រែន ឆ្នាំនេះទ្រនិចនាឡិកាប្រាប់ថ្ងៃវិនាសរបស់ផែនដីត្រូវបានរំកិលទៅមុខ 10 វិនាទីបន្ថែមទៀត ដោយស្ថិតនៅឆ្ងាយពីចំណុចកណ្ដាអធ្រាត្រត្រឹមតែ 90 វិនាទីប៉ុណ្ណោះ។

កាលពីម៉ោង 22 ថ្ងៃទី 24 មករា ម៉ោងនៅកម្ពុជា ព័ត៌មានរបស់ក្រុមអ្នកវិទ្យាសាស្ត្រអាតូមិច (BAS) បានប្រកាសពីការរំកិលទ្រនិចនាទីរបស់នាឡិកាប្រាប់ថ្ងៃវិនាសនៃផែនដីទៅកាន់តែជិតដល់ចំណុចពាក់កណ្ដាលយប់ ដែលនេះគឺជាការប្រែប្រួលដំបូងនៅក្នុងរយៈពេល 3 ឆ្នាំកន្លង។ បច្ចុប្បន្ន ទ្រនិចនាឡិកានេះត្រូវបានដាក់ត្រង់ចំណុច 90 វិនាទីមុនពាក់កណ្ដាលយប់។ ក្នុងប្រវត្តិសាស្ត្រ 76 ឆ្នាំរបស់នាឡិកាប្រាប់ថ្ងៃវិនាសនៃផែនដី មនុស្សជាតិមិនធ្លាប់ដើរដល់ក្បែរចំណុចមហន្តរាយសកលដល់កម្រិតនេះឡើយ។

នាឡិកាប្រាប់ថ្ងៃវិនាសនៃផែនដីត្រូវបានបង្ហាញជាលើកដំបូងនៅពេលសង្គ្រាមត្រជាក់បានចាប់ផ្ដើមនៅឆ្នាំ 1947 និងស្ថិតនៅត្រង់ចំណុច 7 នាទីមុនពាក់កណ្ដាលយប់។ ជារៀងរាល់ឆ្នាំ សមាជិកទាំងឡាយរបស់ក្រុមប្រឹក្សាវិទ្យាសាស្ត្រ និងសន្តិសុខរបស់ BAS នឹងកែប្រែទ្រនិចនាឡិកាដើម្បីបង្ហាញអំពីស្ថានភាពដែលបង្កើតឡើងដោយព្រឹត្តិការណ៍នានាក្នុងឆ្នាំចាស់ ដែលបានរុញច្រានមនុស្សជាតិទៅជិត ឬឆ្ងាយពីហានិភ័យនៃការបំផ្លាញខ្លួនឯង។ បច្ចុប្បន្ន នាឡិកាថ្ងៃវិនាសនៃផែនដីត្រូវបានប្រើប្រាស់ដើម្បីព្រមានអំពីការគំរាមកំហែងដែលមានប្រភពពីគ្រប់អាវុធប្រល័យលោក ការបំផ្លិចបំផ្លាញបរិស្ថាន និងបម្រែបម្រួលអាកាសធាតុជាដើម ចំពោះពិភពលោក។

ឆ្នាំ 2020 ទ្រនិចនាឡិកាប្រាប់ថ្ងៃវិនាសនៃផែនដី ស្ថិតនៅត្រង់ចំណុច 100 វិនាទីមុនពាក់កណ្ដាលយប់។ ក្នុងរយៈពេល 2 ឆ្នាំកន្លង ទ្រនិចនាឡិកានេះស្ថិតនៅត្រង់ចំណុចនេះដដែល។

ឆ្នាំនេះ BAS រំកិលទ្រនិចនាទីរបស់នាឡិកាប្រាប់ថ្ងៃវិនាសនៃផែនដីទៅមុខ ដោយសារតែការគំរាមកំហែងពីសង្គ្រាមនៅអ៊ុយក្រែន។ បច្ចុប្បន្ន នាឡិកានេះកំពុងស្ថិតនៅត្រង់ចំណុច 90 វិនាទីមុនពាក់កណ្ដាលយប់ ដែលនេះបង្ហាញថា ពិភពលោកទាំងមូលកំពុងស្ថិតនៅក្បែរមាត់ជ្រោះមហន្តរាយបំផុតមិនធ្លាប់មានពីមុនមក» BAS បញ្ជាក់ដូច្នេះ៕

January 25, 2023

អគ្គិសនីអង់គ្លេសផ្ដល់ប្រាក់ឱ្យអតិថិជនដើម្បីកាត់បន្ថយការប្រើប្រាស់ភ្លើង

ក្រុមហ៊ុនអគ្គិសនី National Grid ប្រកាសអនុវត្តកម្មវិធីផ្ដល់ជំនួយជាទឹកប្រាក់ដើម្បីឱ្យអតិថិជននៅអង់គ្លេសប្រើប្រាស់អគ្គិសនីតិចជាងមុននៅក្នុងម៉ោងមមាញឹក។

ក្រុមហ៊ុនអគ្គិសនី និងឧស្ម័នពហុជាតិ National Grid ដែលមានទីស្នាក់ការកណ្ដាលនៅប្រទេសអង់គ្លេស កាលពីថ្ងៃទី 22 មករា បានឱ្យដឹងថា នឹងចំណាយប្រាក់ដើម្បីឱ្យអតិថិជនក្នុងប្រទេសនេះប្រើប្រាស់អគ្គិសនីតិចជាងមុននៅក្នុង 2 ថ្ងៃដើមសប្ដាហ៍។ នេះគឺជាករណីដំបូងដែល National Grid អនុវត្តកម្មវិធីនេះដើម្បីទប់ស្កាត់បញ្ហាខ្វះអគ្គិសនី។

គ្រួសារ និងក្រុមហ៊ុនជាង 1 លានដែលបានចុះឈ្មោះប្រើប្រាស់សេវាតម្រូវការបត់បែន (DFS) នឹងត្រូវបានដកថ្លៃប្រើប្រាស់អគ្គិសនីប្រហែល 3 ផោនសម្រាប់រៀងរាល់ 1 គីឡូវ៉ាតដែលពួកគេសំច័យបាននៅក្នុងអំឡុងពេលពីម៉ោង 17-18 ចាប់ពីថ្ងៃទី 23 ដល់ 24 មករា។ តាមការគណនា ការដកថ្លៃអគ្គិសនីនេះមានតម្លៃចន្លោះពី 6 ទៅ 20 ផោន។

ក្រុមហ៊ុន National Grid បញ្ជាក់ថា កម្មវិធីនេះមិនមែនមានន័យថា ប្រភពផ្គត់ផ្គង់អគ្គិសនីជួបហានិភ័យនោះទេ ដូច្នេះគ្រប់គ្នាមិនត្រូវបារម្ភឡើយ។

បណ្ដាប្រទេសនៅអឺរ៉ុប កំពុងប្រឈមនឹងវិបត្តិថាមពលក្នុងរដូវរងា នៅពេលតម្លៃឥន្ធនៈកើនឡើងខ្ពស់ដោយសារឥទ្ធិពលនៃសង្គ្រាមរុស្ស៊ី-អ៊ុយក្រែន។ ទីក្រុមមូស្គូបានកាត់បន្ថយការនាំចេញឧស្ម័នទៅកាន់អឺរ៉ុប ធ្វើឱ្យបណ្ដាប្រទេសនៅតំបន់នេះ ត្រូវទិញឧស្ម័នពីប្រភពផ្សេងក្នុងតម្លៃថ្លៃ នាំឱ្យការចំណាយរបស់ប្រជាជនទៅលើថាមពលមានការកើនឡើងខ្ពស់ខ្លាំង៕

January 25, 2023

ករណីបាញ់ប្រហារទីបីនៅ California បណ្ដាលឱ្យមនុស្សច្រើននាក់ស្លាប់ និងរងរបួស

(សហរដ្ឋអាម៉េរិក) – ប៉ូលិសនៅ Oakland ឱ្យដឹងថា មានហេតុការណ៍បាញ់ប្រហារមួយផ្សេងទៀតបានបណ្ដាលឱ្យមនុស្សម្នាក់ស្លាប់ និង 7 នាក់របួស ដែលនេះគឺជាករណីបាញ់ប្រហារទីបីក្នុងរង្វង់ 3 ថ្ងៃ នៅរដ្ឋ California។

យោងតាមក្រុមមន្ត្រីនៅ Oakland កម្លាំងប៉ូលិសត្រូវបានបញ្ជូនទៅកាន់ផ្ទះមួយចំនួននៅក្បែរមហាវិថី Macarthur នៅវេលាម៉ោង 18 ថ្ងៃទី 23 មករា (ម៉ោង 6 ថ្ងៃទី 24 មករានៅកម្ពុជា) បន្ទាប់ពីទទួលបានសញ្ញាជូនដំណឹងពីប្រព័ន្ធចាប់សំឡេងកាំភ្លើងស្វ័យប្រវត្ត។ សមត្ថកិច្ចបានរកឃើញសម្បកគ្រាប់កាំភ្លើងជាច្រើនគ្រាប់នៅឯស្ថានីយប្រេងឥន្ធនៈមួយក្បែរទីលានសាលារៀន Mills College ប៉ុន្តែមិនឃើញជនរងគ្រោះ។

សមត្ថកិច្ចនៅ Oakland ប្រកាសថា ករណីផ្ទុះអាវុធកើតឡើង «រវាងមនុស្សមួយចំនួន»។ បន្ទាប់មក មន្ទីរពេទ្យមួយចំនួនក៏បានទាក់ទងទៅកាន់ប៉ូលិស និងរាយការណ៍អំពីការទទួលជនរងគ្រោះដែលរងរបួសដោយសារគ្រាប់កាំភ្លើង។

សាក្សីនិយាយថា ស្នូរគ្រាប់កាំភ្លើងផ្ទុះឡើងក្នុងពេលកំពុងថតវីដេអូចម្រៀង។ មនុស្ស 7 នាក់រងរបួសស្រាល ខណៈដែលអត្តសញ្ញាណរបស់ជនរងគ្រោះដែលបានស្លាប់ មិនទាន់ត្រូវបានបង្ហើបឱ្យដឹងនៅឡើយ ប៉ុន្តែ សមាជិកគ្រួសារជនរងគ្រោះបានប្រាប់ថា មានឈ្មោះ Mario Navarro អាយុ 18 ឆ្នាំ។

ហេតុការណ៍ខាងលើគឺជាករណីបាញ់ប្រហារទីបីនៅក្នុងរដ្ឋ California ក្នុងអំឡុងពេល 3 ថ្ងៃកន្លង។ ករណីបាញ់ប្រហារមុននោះប៉ុន្មានម៉ោង បានកើតឡើងនៅក្នុងទីតាំងដាច់ដោយឡែកក្នុងទីក្រុង Half Moon Bay មានចម្ងាយប្រហែល 65 គីឡូម៉ែត្រពី Oakland និងបានបណ្ដាលឱ្យមនុស្ស 7 នាក់ស្លាប់។

ករណីបាញ់ប្រហារមួយផ្សេងទៀតនៅ Monterey Park ក្នុងរដ្ឋ California កាលពីថ្ងៃទី 21 មករា បណ្ដាលឱ្យមនុស្សយ៉ាងតិច 11 នាក់បាត់បង់ជីវិត។ ជនសង្ស័យត្រូវបានគេដឹងថា មានឈ្មោះ Huu Can Tran អាយុ 72 ឆ្នាំ ប៉ុន្តែមិនទាន់ដឹងច្បាស់ពីមូលហេតុ។

នៅក្នុង 3 សប្ដាហ៍ដំបូងនៃឆ្នាំ 2023 សហរដ្ឋអាម៉េរិកកើតមានករណីបាញ់ប្រហារសម្លាប់មនុស្សសរុបចំនួន 39 លើកមកហើយ៕

January 25, 2023

ស្នូលផែនដីអាចចាប់ផ្ដើមវិលបញ្ច្រាសទិសបច្ចុប្បន្ននៅពេលឆាប់ៗខាងមុខ

ការសិក្សាស្រាវជ្រាវថ្មីដែលត្រូវបានប្រកាសកាលពីថ្ងៃទី 23 មករា លើទស្សនាវដ្ដី Nature Geoscience បានបង្ហើបឱ្យដឹងថា ការប្រែប្រួលទិសនៃរង្វិលជុំរបស់ស្នូលផែនដីអាចកើតឡើងក្នុងរង្វង់ប៉ុន្មានទសវត្សរ៍ខាងមុខ។

អំឡុងពាក់កណ្ដាលទសវត្សរ៍ឆ្នាំ 1990 អ្នកវិទ្យាសាស្ត្រ Xiaodong Song នៅបន្ទប់ពិសោធន៍ SinoProbe របស់សាលាផែនដី និងវិទ្យាសាស្ត្រចក្រវាលនៅទីក្រុងប៉េកាំង ប្រទេសចិន សហការជាមួយ Paul Richards នៅសាកលវិទ្យាល័យ Columbia បានផ្ដល់ភស្ដុតាងដំបូងស្ដីពីការវិលដោយឯករាជ្យរបស់ស្នូលផែនដី។

ដើមឡើយ ក្រុមអ្នកវិទ្យាសាស្ត្រខាងលើរកឃើញថា ស្នូលខាងក្នុងវិលទៅតាមទិញពីលិចទៅកើត បើទោះលឿនជាងបណ្ដាស្រទាប់ផ្សេងៗរបស់ផែនដី។ ទិសនៃរង្វិលនេះភាគច្រើនទទួលរងពីឥទ្ធិពលម៉ាញេទិក និងអគ្គិសនីនៅក្នុងស្នូលរាវខាងក្រៅដែលព័ទ្ធជុំវិញស្នូលរឹងខាងក្នុងបង្អស់ ក៏ដូចជាឥទ្ធិពលនៃទំនាញជាមួយនឹងស្រទាប់កណ្ដាល។

ក៏ប៉ុន្តែ ការរកឃើញកាលពីអំឡុងទសវត្សរ៍ឆ្នាំ 1990 ខាងលើ នៅមានបញ្ហាជាច្រើនដែលមិនទាន់ត្រូវបានដោះស្រាយទាក់ទងនឹងទិសនៃរង្វិលជុំរបស់ស្នូល នៅពេលពិនិត្យដល់កត្តាមួយចំនួនមានដូចជាល្បឿននៃរង្វិលជុំជាដើម។ បញ្ហាទាំងនេះបានជំរុញឱ្យក្រុមអ្នកស្រាវជ្រាវខាងលើប្រឹងប្រែងប្រមូលទិន្នន័យបន្ថែមទៀតដើម្បីបញ្ជាក់ឱ្យបានច្បាស់។

ក្នុងការស្រាវជ្រាវថ្មីបំផុតដែលទើបត្រូវបានប្រកាស ពួកគេបានវិភាគទៅលើរលកសញ្ញាដែលកើតឡើងពីការរញ្ជួយដីតាមធម្មជាតិ ដែលជះកាត់តាមស្នូលផែនដីចាប់ពីទសវត្សរ៍ឆ្នាំ 1960។ ពួកគេរកឃើញថា ស្នូលផែនដីវិលលឿនជាងធៀបនឹងស្រទាប់កណ្ដាល និងសម្បករបស់ផែនដី ទៅតាមទិសពីលិចទៅកើតចាប់តាំងពីទសវត្សរ៍ឆ្នាំ 1970 រហូតមកដល់ប្រហែលឆ្នាំ 2009។ ក្រោយមក រង្វិលនេះហាក់បានឈប់តាំងពីឆ្នាំ 2009 ដល់ 2011។ ចាប់ពីដំណាក់កាលនេះមក រង្វិលស្នូលផែនដីហាក់ប្ដូរទិសជាសន្សឹមៗ។ ការប្រែប្រួលខាងលើនេះទំនងជាស្ថិតក្នុងរង្វង់ 7 ទសវត្សរ៍៕

January 24, 2023

រុស្ស៊ីថា ពិភពលោកខិតជិតដល់លទ្ធភាពកើត «សង្គ្រាមលោកលោកទីបី»

លោក Dmitry Medvedev ចោទសហរដ្ឋអាម៉េរិក និងសម្ព័ន្ធមិត្តថា ហាក់បញ្ឆេះសង្គ្រាមលោកលើកទីបីដោយការត្រៀមវាយប្រហារលើរុស្ស៊ី ធ្វើឱ្យប្រទេសនេះត្រូវតែបញ្ចេញសកម្មភាព។

«យើងគួរតែជួយឱ្យគ្រប់គ្នាលើសកលលោកយល់ថា យុទ្ធនាការយោធាដែលកំពុងកើតឡើងគឺជាប្រតិកម្មដោយបង្ខំ និងជាជម្រើសចុងក្រោយនៅចំពោះមុខការត្រៀមវាយប្រហារពីសហរដ្ឋអាម៉េរិក និងសម្ព័ន្ធមិត្ត។ ជាក់ច្បាស់ណាស់ ពិភពលោកបានខិតទៅជិតលទ្ធភាពកើតមានសង្គ្រាមលោកលើកទីបី ព្រោះតែបញ្ហាដែលបានកើតឡើងមុននោះ» អនុប្រធានក្រុមប្រឹក្សាសន្តិសុខជាតិរុស្ស៊ី Dmitry Medvedev ថ្លែងកាលពីថ្ងៃទី 23 មករាដូច្នេះ។

លោក Medvedev ក៏បាននិយាយថា «វិបត្តិធ្ងន់ធ្ងរ» នៅឯអង្គការសហប្រជាជាតិ និងបណ្ដាអង្គការអន្តរជាតិដទៃ កំពុងត្រូវបានលោកខាងលិចកែប្រែឱ្យទៅជាសមរភូមិ។

សហរដ្ឋអាម៉េរិក មិនទាន់បញ្ចេញប្រតិកម្មនៅឡើយទាក់ទិននឹងការអះអាងរបស់ អនុប្រធានក្រុមប្រឹក្សាសន្តិសុខជាតិរុស្ស៊ី Dmitry Medvedev។

លោក Medvedev មុននោះក៏ធ្លាប់បានព្រមានថា ការប្រឹងប្រែងសុំចូលជាសមាជិកនៃសម្ព័ន្ធមិត្តយោធាណាតូរបស់អ៊ុយក្រែន នឹង «ពន្លឿនការចាប់ផ្ដើមសង្គ្រាមលោកលើកទីបី»។

លោក Medvedev ក៏ធ្លាប់បានរម្លឹកជាច្រើនលើកនូវការប្រកាសដែលថា រុស្ស៊ីមានសិទ្ធិប្រើប្រាស់អាវុធនុយក្លេអែរនៅពេលចាំបាច់ «ដោយមិនត្រូវសុំច្បាប់ និងពិភាក្សាជាមួយអ្នកណាទាំងអស់»៕

January 24, 2023

រដ្ឋ California មានហេតុការណ៍បាញ់សម្លាប់មនុស្ស 7 នាក់

(សហរដ្ឋអាម៉េរិក) – California បន្តកើតមានហេតុការណ៍បាញ់ប្រហារនៅ Half Moon Bay បណ្ដាលឱ្យមនុស្សស្លាប់យ៉ាងតិច 7 នាក់ និងម្នាក់រងរបួស។

សារព័ត៌មានអាម៉េរិកកាលពីថ្ងៃទី 23 មករា (24 នៅកម្ពុជា) បានផ្សាយថា ទីក្រុង Half Moon Bay ក្នុងស្រុក San Mateo របស់រដ្ឋ California បានកើតមានហេតុការណ៍បាញ់ប្រហារនៅក្នុងកសិដ្ឋានពីរដែលនៅក្បែរគ្នា បណ្ដាលឱ្យមានមនុស្សស្លាប់យ៉ាងតិច 7 នាក់ និងម្នាក់របួសធ្ងន់ធ្ងរ។

សមត្ថកិច្ចមិនទាន់ប្រកាសព័ត៌មានលំអិត ប៉ុន្តែបានបញ្ជាក់ថា កំពុងដោះស្រាយករណីបាញ់ប្រហារសម្លាប់មនុស្សច្រើននាក់ និងបានចាប់ខ្លួនជនសង្ស័យរួចហើយ។ LA Times បានផ្សាយថា ជនសង្ស័យគឺជាពលរដ្ឋរស់នៅក្នុងតំបន់កើតហេតុ និងមានអាយុ 67 ឆ្នាំ។

NBC Bay Area ដកស្រង់សម្ដីមន្ត្រីរបស់ទីក្រុង Half Moon Bay បានឱ្យដឹងថា ជនរងគ្រោះនានានៅក្នុងករណីបាញ់ប្រហារនេះគឺជាកសិករដើមកំណើតចិន ប៉ុន្តែមិនទាន់ដឹងច្បាស់មូលហេតុនៅពីក្រោយហេតុការណ៍នេះនៅឡើយ។

អភិបាលរដ្ឋ California លោក Gavin Newsom ដែលកំពុងស្ថិតនៅឯ Monterey Park ដើម្បីចូលរួមដោះស្រាយករណីបាញ់ប្រហារសម្លាប់មនុស្សយ៉ាងតិច 11 នាក់មុននោះ បានសម្ដែងការបារម្ភចំពោះហេតុការណ៍នេះ។

ករណីបាញ់ប្រហារនៅទីក្រុង Half Moon Bay បានកើតឡើងក្រោយពីមានករណីបាញ់រះនៅ Monterey Park រដ្ឋ California ដូចគ្នា ដែលបានបណ្ដាលឱ្យមនុស្សយ៉ាងតិច 11 នាក់បានបាត់បង់ជីវិត និង 9 នាក់រងរបួស។ ជនសង្ស័យត្រូវបានសមត្ថកិច្ចរកឃើញថា មានឈ្មោះ Huu Can Tran អាយុ 72 ឆ្នាំ ប៉ុន្តែមិនទាន់ដឹងពីមូលហេតុនៃអំពើនេះនៅឡើយ៕

January 24, 2023

EU អនុម័តកញ្ចប់ជំនួយយោធាថ្មីតម្លៃរាប់រយលានអឺរ៉ូសម្រាប់អ៊ុយក្រែន

ទីភ្នាក់ងារសារព័ត៌មាន Reuters បានឱ្យដឹងថា ក្នុងកិច្ចប្រជុំបិទទ្វារកាលពីថ្ងៃទី 23 មករា ក្រុមរដ្ឋមន្ត្រីការបរទេសអឺរ៉ុប (EU) បានអនុម័តកញ្ចប់ជំនួយយោធាតម្លៃ 500 លានអឺរ៉ូ សម្រាប់អ៊ុយក្រែន។

កញ្ចប់ជំនួយយោធាទី 7 ដែលមានតម្លៃ 500 លានអឺរ៉ូ ស្មើនឹង 544 លានដុល្លារអាម៉េរិករបស់សហភាពអឺរ៉ុបនេះគឺជារបៀបវារៈសំខាន់មួយនៅក្នុងកិច្ចប្រជុំថ្នាក់រដ្ឋមន្ត្រីការបរទេសរបស់ EU ដែលត្រូវបានធ្វើឡើងនៅព្រុចសែល ប្រទេសបែលហ្ស៊ិក។

កញ្ចប់ជំនួយថ្មីខាងលើនេះត្រូវបានអនុម័តរួមជាមួយខ្ទង់ប្រាក់ជំនួយបន្ថែម 45 លានអឺរ៉ូ សម្រាប់សកម្មភាពហ្វឹកហ្វឺនផ្នែកយោធាដល់អ៊ុយក្រែន។

យោងតាមរបៀបវារៈ កិច្ចប្រជុំថ្នាក់រដ្ឋមន្ត្រីការបរទេសរបស់ EU ក៏នឹងពិភាក្សាគ្នាអំពីកញ្ចប់ទណ្ឌកម្មទី 10 សំដៅលើរុស្ស៊ី ដែលនឹងមានសុពលភាពចាប់ពីខែក្រោយផងដែរ។

ទាក់ទងនឹងជំនួយយោធាខាងលើ រដ្ឋមន្ត្រីការបរទេសរុស្ស៊ី Sergey Lavrov កាលពីថ្ងៃទី 23 មករា បានរិះគន់ដល់ការផ្ដល់ជំនួយយោធាតម្លៃរាប់ពាន់លានដុល្លារដែលបស្ចិមលោកបាន និងកំពុងផ្ដល់ឱ្យអ៊ុយក្រែន ដើម្បីប្រឆាំងនឹងរុស្ស៊ី៕

January 24, 2023

ករណីបាញ់សម្លាប់មនុស្សជាង 10 នាក់នៅ California៖ ចៅម្ចាស់ក្លឹបដណ្ដើមកាំភ្លើងពីជនសង្ស័យ ទប់ស្កាត់អំពើបាញ់ប្រហារទីពីរ

វីដេអូពីកាមេរ៉ាសុវត្ថិភាពបង្ហាញថា អ្នកសរសេរកម្មវិធីកុំព្យូទ័រ Brandon Tsay បានប្រទាញប្រទង់ និងដណ្ដើមបានអាវុធពីជនសង្ស័យក្នុងករណីបាញ់សម្លាប់មនុស្សនៅ California សហរដ្ឋអាម៉េរិក។

Brandon Tsay អាយុ 26 ឆ្នាំ ទទួលបានការសរសើរថាជាវីរបុរស បន្ទាប់ពីដណ្ដើមបានកាំភ្លើងរបស់ជនសង្ស័យ Huu Can Tran ដែលមុននោះបានបាញ់សម្លាប់មនុស្សយ៉ាងតិច 11 នាក់ និងបង្ករបួសដល់មនុស្ស 9 នាក់នៅក្នុងក្លឹបកំសាន្តមួយនៅ Monterey Park រដ្ឋ California។ សកម្មភាពរបស់ Tsay ត្រូវបានវាយតម្លៃថា បានទប់ស្កាត់ករណីបាញ់ប្រហារលើកទីពីរនៅក្នុងក្លឹបរាត្រី Lai Lai ក្នុងតំបន់ Alhambra ជាទីដែល Tsay ប្រឈមមុខនឹងជនសង្ស័យ។

វីដេអូដកស្រង់ពីកាមេរ៉ាសុវត្ថិភាពនៅក្នុងក្លឹបរាត្រី Lai Lai ដែលត្រូវបាន NBC News ចុះផ្សាយក្នុងថ្ងៃទី 24 មករា បង្ហាញអំពីសកម្មភាពរបស់ Tsay និងជនសង្ស័យ Huu Can Tran ប្រទាញប្រទង់គ្នានៅក្នុងកន្លែងមិនមានមនុស្សរបស់ក្លឹប Lai Lai។

Tsay ដែលមានជីតាជាម្ចាស់ក្លឹប Lai Lai មិនបានដឹងថា ជនសង្ស័យដែលខ្លួនកំពុងប្រឈមមុខ មុននោះប្រហែល 20 នាទី បានសម្លាប់មនុស្សយ៉ាងតិច 11 នាក់ និងបង្ករបួសដល់មនុស្ស 9 នាក់នៅក្នុងក្លឹបនៅឯ Monterey Park នោះឡើយ។

https://www.youtube.com/watch?v=9QF2PCn0bjA

Tsay ត្រូវបានមនុស្សម្នាកោតសរសើរថាជាវីរបុរសដែលបញ្ចេញសកម្មភាពដ៏ក្លាហាន នៅពេលប្រឈមមុខជាមួយនឹងជនសង្ស័យក្នុងករណីបាញ់រះ។ សមត្ថកិច្ចជឿថា ជនសង្ស័យមានបំណងធ្វើការបាញ់ប្រហារជាលើកទីពីរ ប៉ុន្តែ Tsay បានទប់ស្កាត់ទាន់ពេល៕

January 24, 2023

Category: អន្តរជាតិ