អន្តរជាតិ - La Reine Media

ករណីអតីតព្រះនាង Meghan ទទួលបានប្រាក់ 7លានដុល្លារ ដើម្បីបរិហាកេរ្ដិ៍គ្រួសារខាងប្ដី លោក Trump ថា៖ «ឃើញទេ ខ្ញុំនិយាយហើយថា នាងមិនមែនមនុស្សល្អប៉ុន្មានទេ»

អតីតប្រធានាធបិតីសហរដ្ឋអាមេរិក លោក Donald Trump បានចាត់ទុកថា ខ្លួននិយាយត្រូវ នៅពេលទាយថា អតីតព្រះនាង Meghan ដែលជាព្រះរាជនត្តារបស់មហាក្សត្រីអង់គ្លេស គឺជាមនុស្ស «មិនល្អប៉ុន្មានឡើយ»។ សារព័ត៌មាន Business Insider បានចេញផ្សាយថា ទូរទស្សន៍ CBS ត្រូវចំណាយប្រាក់យ៉ាងហោចពី 7-9 លានដុល្លារអាមេរិក ដើម្បីទទួលបានសិទ្ធិផ្ដាច់មុខក្នុងការចាក់ផ្សាយកិច្ចសម្ភាសរវាងគ្រួសារ Meghan-Harry ជាមួយនឹង មហាសេដ្ឋិនី និងជាពិធីការិនី Oprah Winfrey កាលពីថ្ងៃទី 7 មីនាកន្លងទៅ។

យោងតាម Fox News ទីប្រឹក្សាជាន់ខ្ពស់របស់អតីតប្រធានាធិបតី Donald Trump ដែលស្ថិតនឹង Jasson Miller ថ្មីៗនេះ បានចូលរួមក្នុងកម្មវិធីផ្សាយផ្ទាល់មួយ។ ក្នុងនោះ លោក Miller បានបង្ហើបឱ្យដឹងអំពីការយល់ឃើញរបស់លោក Trump ចំពោះអតីតព្រះនាង Meghan បន្ទាប់ពីនាងបានសម្ភាសជាមួយពិធីការិនី Oprah Winfrey ដែលបានធ្វើឱ្យរាជវាំងអង់គ្លេសក្ដៅក្រហាយ។

«ឃើញទេ ខ្ញុំធ្លាប់បាននិយាយហើយថា នាងនោះមិនល្អប៉ុន្មានទេ ហើយពេលនេះ គ្រប់គ្នាបានឃើញច្បាស់ហើយ» លោក Miller ដកស្រង់សម្ដីរបស់លោក Donald Trump និយាយដូច្នេះ។

ប្រការដែលគួរឱ្យចាប់អារម្មណ៍ជាងគេ នោះគឺថា លោក Trump មិនហ៊ាននិយាយចេញជាសាធារណៈអំពីការយល់ឃើញរបស់ខ្លួនចំពោះអតីតព្រះនាង Meghan ព្រោះតែខ្លាចត្រូវរងសម្ពាធដូចករណីអ្នកដឹកនាំកម្មវិធី Piers Morgan របស់ទូរទស្សន៍ប្រទេសអង់គ្លេស។

កិច្ចសម្ភាសរវាងគ្រួសារ Meghan-Harry ជាមួយនឹង មហាសេដ្ឋិនី និងជាពិធីការិនី Oprah Winfrey កាលពីថ្ងៃទី 7 មីនាកន្លងទៅ

លោក Morgan ថ្មីៗនេះ ត្រូវបានស្ថានីយទូរទស្សន៍ដកតំណែងចេញពីកម្មវិធីដ៏ល្បីឈ្មោះ “Good Morning Britain” ដោយសារតែពិធីករដ៏ល្បីឈ្មោះរូបនេះ បានរិះគន់ចំៗលើព្រះនាង Meghan ហើយក៏ត្រូវទស្សនិកជនប្រតិកម្ម។

លោក Morgan បានឱ្យដឹងថា ខ្លួនត្រូវបានបណ្ដេញពីការងារ ដោយសារមិនព្រមសុំទោស Meghan បន្ទាប់ពីកិច្ចសម្ភាសបរិហាកេរ្ដិ៍គ្រួសារខាងស្វាមី បង្កឱ្យមានផលប៉ះពាល់ដល់កិត្តិយសរាជវាំងអង់គ្លេស។

បើទោះជាមានការព្រួយបារម្ភ ប៉ុន្តែ អតីតប្រធានាធិបតីសហរដ្ឋអាមេរិក លោក Donald Trump នៅតែគាំទ្រលោក Piers Morgan ដដែល។

«ខ្ញុំនៅខាងលោក Morgan។ គាត់ជាមនុស្សពូកែ និងអស្ចារ្យ ប៉ុន្តែ ពួកគេបែរជាព្យាយាមបណ្ដេញគាត់ពីការងារព្រោះតែការរិះគន់ Meghan ទៅវិញ» ទីប្រឹក្សា Miller ថា អតីតប្រធានាធិបតី Trump ថ្លែងដូច្នេះ។

នេះមិនមែនជាលើកដំបូងនោះទេដែលលោក Trump បានរិះគន់ព្រះនាង Meghan។ អំឡុងឃោសនាបោះឆ្នោតប្រធានាធិបតី ឆ្នាំ 2016 ព្រះនាង Meghan កាលណោះគឺជាពលរដ្ឋអាមេរិកាំង បានប្រកាសថានឹងបោះឆ្នោតជូនបេក្ខភាព Hilary Clinton។ នាងឱ្យដឹងថា ខ្លួនបោះឆ្នោតនេះមិនមែនដោយសារលោកស្រី Hilary ជាស្ត្រីភេទនោះទេ តែដោយសារមិនចង់រស់នៅក្នុងស្ថានភាពដែលលោក Trump ជាអ្នកគូសវាស។

អតីតប្រធានាធិបតីសហរដ្ឋអាមេរិក លោកDonald Trump

ឆ្នាំ 2019 អតីតប្រធានាធិបតី Trump កាលណោះមានអារម្មណ៍ភ្ញាក់ផ្អើលខ្លាំងអំពីរឿងរ៉ាវខាងលើ នៅពេលត្រូវបានសារព័ត៌មាន The Sun របស់អង់គ្លេសសួរដល់បញ្ហានោះ។ «ខ្ញុំមិនបានដឹងអំពីរឿងរ៉ាវនោះ។ អាចនិយាយយ៉ាងណាទេ…ខ្ញុំមិននឹកស្មានថា នាងចិត្តអាក្រក់ដូច្នេះសោះ» លោក Trump ឆ្លើយនឹងសំណួររបស់ The Sun។

នៅក្នុងរដូវឃោសនារកសំឡេងឆ្នោតកាលពីឆ្នាំ 2020 ពេលត្រូវបានសួរអំពីគ្រួសាររបស់ Meghan លោក Trump ក៏បានទទួលស្គាល់ថា ខ្លួនមិនចូលចិត្តព្រះនាង Meghan ទាល់តែសោះ។

«ខ្ញុំមិនចូលចិត្តនាងនោះទាល់តែសោះ ហើយនាងក៏ប្រហែលជាដឹងអំពីប្រការនេះ។ ប៉ុន្តែ ខ្ញុំនៅតែចង់ជូនពរសំណាងល្អចំពោះព្រះអង្គម្ចាស់ Harry ព្រោះថា គាត់នឹងត្រូវការប្រការនោះក្នុងជីវិតអាពាហ៍ពិពាហ៍» លោក Trump បន្ថែម៕

ប្រភព៖ BI, BBC
ប្រែសម្រួល៖ បុត្រា

March 15, 2021

មីយ៉ានម៉ា៖ រោងចក្រចិនច្រើនកន្លែងត្រូវបានដុតបំផ្លាញ ខណៈបាតុករភូមា 38នាក់ បានបាត់បង់ជីវិត

រោងចក្រមួយចំនួនដែលមានភាគហ៊ុនរបស់ចិន នៅតំបន់ឧស្សាហកម្មក្នុងទីក្រុង Yangon ត្រូវបានដុតបំផ្លាញ នាំឱ្យកងកម្លាំងប៉ូលិសបាញ់ប្រហារលើហ្វូងបាតុករ បណ្ដាលឱ្យមនុស្សរាប់សិបនាក់បាត់បង់ជីវិត។

សារព័ត៌មានក្នុងស្រុកបានឱ្យដឹងថា នៅពេលផ្សែងចាប់ផ្ដើមលេចឡើងចេញពីតំបន់ឧស្សាហកម្ម Hlaingthaya ជាយក្រុង Yangon កាលពីថ្ងៃទី 14 មីនា កងកម្លាំងសន្តិសុខក៏ចាប់ផ្ដើមបាញ់កាំភ្លើងសំដៅលើហ្វូងបាតុករ បណ្ដាលឱ្យមនុស្សយ៉ាងតិច 22 នាក់បានស្លាប់។

ទូរទស្សន៍ Myawaddy របស់កងទ័ពភូមា បានចេញផ្សាយថា ក្រុមប៉ូលិសប្រឆាំងបាតុកម្មបានផ្ទុះអាវុធនៅពេលរោងចក្រកាត់ដេរចំនួន 4 និងរោងចក្រផលិតជីចំនួន 1 កន្លែង បានចាប់ឆេះ។ ហ្វូងបាតុករប្រមាណ 2,000 នាក់ បានរារាំងរថយន្តពន្លត់អគ្គិភ័យធ្វើសកម្មភាព។

«ពិតជាសាហាវ។ គ្រប់គ្នាត្រូវបានបាញ់ប្រហារនៅចំពោះមុខខ្ញុំ។ ខ្ញុំនឹងមិនភ្លេចទិដ្ឋភាពនេះឡើយ» អ្នកយកព័ត៌មានម្នាក់នៅកន្លែងកើតហេតុរៀបរាប់។

ក្រៅពីតួលេខបាតុករដែលបានស្លាប់ខាងលើ ក៏មានមនុស្សចំនួន 16 នាក់ផ្សេងទៀតបានបាត់បង់ជិវិតនៅក្នុងតំបន់មួយចំនួន ក្នុងនោះមានដូចជា Mandalay និង Bago ជាដើម នាំឱ្យថ្ងៃទី 14 មីនា ក្លាយជាថ្ងៃបង្ហូរឈាមបំផុតរាប់ចាប់ពីក្រោយថ្ងៃរដ្ឋប្រហារយោធា។ ទូរទស្សន៍កងទ័ព MRRV បានផ្សាយថា ប៉ូលិសម្នាក់បានស្លាប់ដោយសាររបួសនៅត្រង់ដើមទ្រូង បន្ទាប់ពីមានការប៉ះទង្គិចជាមួយក្រុមបាតុករ។

ច្បាប់អាជ្ញាសឹកត្រូវបានអនុវត្តនៅក្នុងតំបន់ Hlaingthaya និងខណ្ឌមួយផ្សេងទៀតនៅទីក្រុង Yangon។ បច្ចុប្បន្ន មិនទាន់មានក្រុមណាមួយចេញមុខទទួលខុសត្រូវចំពោះការដុតបំផ្លាញរោងចក្រខាងលើនេះនៅឡើយ។

ភាគីកងទ័ពបានបដិសេធការអធិប្បាយអំពីហេតុការណ៍ខាងលើ ខណៈតំណាងរាស្ត្រ Sasa ដែលតំណាងឱ្យក្រុមតំណាងរាស្ត្រជាប់ឆ្នោតដែលត្រូវបានផ្ដួលរំលំដោយរដ្ឋប្រហារ បានបង្ហាញការគាំទ្រដល់ក្រុមបាតុករ។ លោក Sasa ថ្លែងថា៖ «ក្រុមជនល្មើស ជនដៃដល់ ដែលជាសត្រូវរបស់ប្រជាជនមីយ៉ានម៉ា SAC (ក្រុមប្រឹក្សាគ្រប់គ្រងរដ្ឋ) នឹងត្រូវទទួលខុសត្រូវចំពោះឈាមគ្រប់ដំណាក់ដែលបានស្រក់ចេញ»។

ចំណែកស្ថានទូតចិន បានអធិប្បាយថា ស្ថានភាពពិតជា «ធ្ងន់ធ្ងរ» ហើយថា បុគ្គលិកជនជាតិចិនជាច្រើននាក់បានរងរបួស និងជាប់គាំងក្នុងអគារ ព្រមទាំងបានស្នើឱ្យមីយ៉ានម៉ាការពារទ្រព្យសម្បត្តិ និងពលរដ្ឋចិនផងដែរ។

ប្រទេសមីយ៉ានម៉ា បានធ្លាក់ទៅក្នុងអំពីហិង្សា និងភាពវឹកវរ បន្ទាប់ពីកងទ័ពបានយកលេសដែលពួកគេបានចោទថាមានអំពើលួចបន្លំសន្លឹកឆ្នោតដើម្បីធ្វើរដ្ឋប្រហារ និងបានចាប់ខ្លួនទីប្រឹក្សារដ្ឋ លោកស្រី Aung San Suu Kyi រួមនឹងក្រុមមន្ត្រីរបស់បក្សសម្ព័ន្ធជាតិប្រជាធិបតេយ្យ (NLD)។ លោកស្រី Suu Kyi ដែលបច្ចុប្បន្នប្រឈមនឹងការចោទប្រកាន់ជាច្រើនករណី នឹងត្រូវបង្ហាញខ្លួននៅក្នុងតុលាការនាថ្ងៃនេះ៕

ប្រភព៖ Reuters
ប្រែសម្រួល៖ បុត្រា

March 15, 2021

Meghan ភរិយាអតីតព្រះអង្គម្ចាស់អង់គ្លេស នឹងឈរឈ្មោះជាបេក្ខភាពប្រធានធិបតីអាមេរិក នៅឆ្នាំ 2024 ក្រោយកិច្ចសម្ភាសចោទប្រកាន់រាជវាំង

សារព័ត៌មានអង់គ្លេស Daily Mail ដកស្រង់ប្រភពព័ត៌មានពីមន្ត្រីជាន់ខ្ពស់ម្នាក់នៅក្នុងគណបក្សការងារអង់គ្លេស (Labour Party) ដែលសុំមិនបញ្ចេញឈ្មោះ បានឱ្យដឹងថា Meghan Markle កំពុងតែរកវិធីប្រើប្រាស់ស្ថានការណ៍ក្រោយកិច្ចសម្ភាសដែលបានចោទប្រកាន់រាជវង្សអង់គ្លេសថា «រើសអើងពូជសាសន៍» ដើម្បីចាប់ផ្ដើមជីវិតនយោបាយរបស់ខ្លួន ដែលនេះអាចនាំនាងចូលកាន់កាប់សេតវិមាន។

Meghan Markle ត្រូវបានគេដឹងថា កំពុងតភ្ជាប់ទំនាក់ទំនងជាមួយនឹងក្រុមមន្ត្រីជាន់ខ្ពស់របស់បក្សប្រជាធិបតេយ្យអាមេរិក ដើម្បីផ្ដើមយុទ្ធនាការ និងរកវិធីប្រកួតប្រជែងក្នុងការឈរឈ្មោះបោះឆ្នោតប្រធានាធិបតី។ យោងតាម Daily Mail បណ្ដាញគាំទ្រអតីតនាយករដ្ឋមន្ត្រីអង់គ្លេស លោក Tony Blair និងបក្សប្រជាធិបតេយ្យ កំពុងតែពិភាក្សាគ្នាអំពីមហិច្ឆតានយោបាយរបស់ Meghan និងក្រុមអ្នកគាំទ្រប្រកបដោយសក្ដានុពលរបស់នាង។

ប្រភពព័ត៌មានសម្ងាត់របស់ Daily Mail សង្កត់ធ្ងន់ថា Meghan កំពុងពិចារណាអំពីការឈរឈ្មោះជាបេក្ខភាពប្រធានាធិបតីអាមេរិកសម្រាប់ឆ្នាំ 2024 នៅពេលដែលលោក Joe Biden មានអាយុ 82 ឆ្នាំ ដែលនឹងអាចប្រជែងឆ្នោតក្នុងអាណត្តិទីពីរ។

ព័ត៌មានខាងលើត្រូវបានលើកឡើង បន្ទាប់ពី Meghan និងស្វាមី Harry អតីតព្រះអង្គម្ចាស់អង់គ្លេសដែលជាព្រះរាជនត្តានៃមហាក្សត្រី Elizabeth ទីពីរ បានធ្វើបទសម្ភាសរយៈពេលជាង 2 ម៉ោង ជាមួយនឹងពិធីការិនី និងជាមហាសេដ្ឋិនី Oprah Winfrey ដែលបានចាក់ផ្សាយនៅលើទូរទស្សន៍អាមេរិក កាលពីថ្ងៃទី 7 មីនា។

ព្រះអង្គម្ចាស់ Harry (Henry Charles Albert David)

ក្នុងកិច្ចសម្ភាស នាង Meghan បានបង្ហើបឱ្យដឹងអំពីព័ត៌មានគួរឱ្យចាប់អារម្មណ៍ជាច្រើន ដូចជាថា នាងធ្លាប់មានបំណងធ្វើអត្តឃាតដោយសារទាល់ច្រក មិនទទួលបានចម្លើយ ឬជំនួយពីរាជវាំង ព្រមទាំងបានចោទប្រកាន់ថា រាជវង្សអង់គ្លេសមានការរើសអើងពូជសាសន៍នៅពេលនាងកំពុងមានគ័ភ៌, មិនចង់ផ្ដល់ឋានៈជាព្រះអង្គម្ចាស់ ឬព្រះនាងដល់កូនរបស់នាង និងថែមទាំងយកចិត្តទុកដាក់លើសម្បុរស្បែករបស់ទារកក្នុងផ្ទៃទៀតផង។ល។

ប្រភព៖ Daily Mail
ប្រែសម្រួល៖ បុត្រា

March 15, 2021

Covid-19 នៅ ASEAN គិតត្រឹមដំណាច់ថ្ងៃទី 14/មីនា៖ អ្នកឆ្លងថ្មីនៅហ្វីលីពីន កើនលើសឥណ្ឌូនេស៊ី

កាលពីថ្ងៃទី 14 មីនា បណ្ដាប្រទេសនៅក្នុងសមាគម ASEAN រកឃើញករណីវិជ្ជមានថ្មីជាង 11,200 នាក់ នាំឱ្យតួលេខអ្នកវិជ្ជមានសរុបឡើងជិតដល់ 2.6 លាននាក់ ក្នុងនោះ អ្នកវិជ្ជមានថ្មីនៅប្រទេសហ្វីលីពីន បានកើនលើសឥណ្ឌូនេស៊ី។

យោងតាមទំព័រ Worldometers គិតត្រឹមម៉ោង 23 និង 59 នាទី នៃថ្ងៃទី 14 មីនា បណ្ដាប្រទេសនៅក្នុងសមាគមប្រជាជាតិអាស៊ីអាគ្នេយ៍ (ASEAN) បានរកឃើញអ្នកវិជ្ជមាននឹង Covid-19 ថ្មី ចំនួន 11,203 ករណី និងអ្នកស្លាប់ចំនួន 164 ករណី។

ដូច្នេះ បណ្ដាប្រទេសក្នុងសមាគម ASEAN បច្ចុប្បន្ន មានអ្នកវិ្ជមាននឹង Covid-19 សរុបចំនួន 2,598,168 នាក់ ក្នុងនោះមាន 55,821 នាក់ បានស្លាប់ និង 2,330,813 នាក់បានជាសះស្បើយ។

ក្នុងថ្ងៃទី 14 មីនា តំបន់អាស៊ីអាគ្នេយ៍មានប្រទេសចំនួន 3 ដែលមានអ្នកស្លាប់ដោយសារ Covid-19 ក្នុងនោះ ឥណ្ឌូនេស៊ីមានរហូតដល់ 97 នាក់ ខណៈហ្វីលីពីន មាន 63 នាក់ និងម៉ាឡេស៊ីមាន 4 នាក់។

ឥណ្ឌូនេស៊ីបន្តជាសម្បុកវីរុស Covid-19 ធំជាងគេក្នុងតំបន់ ASEAN ដោយមានអ្នកជំងឺសរុប 1,419,455 នាក់ ក្នុងនោះមានអ្នកជំងឺថ្មីចំនួន 4,714 នាក់ និងអ្នកស្លាប់សរុប 38,426 នាក់។

ហ្វីលីពីនកំពុងដោះស្រាយបញ្ហាឆ្លងរាលដាលថ្មី ដោយមានករណីឆ្លងថ្មីច្រើនជាងឥណ្ឌូនេស៊ីទៅទៀត ដោយមានអ្នកវិជ្ជមានថ្មីចំនួន 4,899 នាក់ ក្នុងចំណោមអ្នកវិជ្ជមានសរុបចំនួន 621,498 នាក់ និងអ្នកស្លាប់សរុប 12,829 នាក់។ ចំណែកស្ថានការណ៍នៅប្រទេសម៉ាឡេស៊ី កំពុងប្រសើរឡើងជាងមុនបន្តិច ដោយមានអ្នកវិជ្ជមានថ្មីក្នុងថ្ងៃទី 14 មីនា ចំនួន 1,354 នាក់ នាំឱ្យតួលេខសរុបនៃអ្នកវិជ្ជមាន ឡើងដល់ 621,498 និងស្លាប់សរុប 12,829 នាក់៕

ប្រភព៖ Worldometers/THX
ប្រែសម្រួល៖ បុត្រា

March 15, 2021

Biden ប្រកាសថា អាមេរិកនឹងត្រលប់មកធម្មតាវិញចាប់ពីខែកក្កដា

ប្រធានាធិបតីអាមេរិក លោក Joe Biden បានណែនាំឱ្យបណ្ដារដ្ឋ ប្រញាប់ជំរុញយុទ្ធនាការចាក់វ៉ាក់សាំងបង្ការ Covid-19 ដើម្បីអាចឱ្យប្រទេសនេះ ត្រលប់មករក «ប្រហាក់ប្រហែលធម្មតា» វិញ ចាប់ពីខែកក្កដា 2021។

«មុនថ្ងៃទី 4 កក្កដា គ្រួសារ និងមិត្តភក្ដិរបស់គ្រប់គ្នា អាចនឹងមានឱកាសជួបជុំគ្នានៅខាងក្រោយសួន ឬទីតាំងណាមួយដើម្បីចម្អិនអាហារ ជប់លៀង និងប្រារព្ធពិធីរំលឹកថ្ងៃឯករាជ្យ» ប្រធានាធិបតី Joe Biden បានថ្លែងដូច្នេះនៅសេតវិមានកាលពីថ្ងៃទី 11 មីនា។

លោក Biden អះអាងថា សហរដ្ឋអាមេរិកអាចឆ្លងកាត់ខួបទិវាឯករាជ្យដូចធម្មតាបាន ឬមិនបានគឺអាស្រ័យលើការដែលពលរដ្ឋភ្ញាក់រលឹកទៅចាក់វ៉ាក់សាំងនៅពេលដល់វេន និងបន្តអនុវត្តតាមការណែនាំរបស់ស្ថាប័នសុខាភិបាលស្ដីអំពីការពាក់ម៉ាស់ ក៏ដូចជារក្សាគម្លាតសង្គម។

លោក Biden បន្តថា ពលរដ្ឋអាមេរិកាំងអាយុលើសពី 65 ឆ្នាំជាង 70% បានចាក់វ៉ាក់សាំងលើកទីមួយ។ លោកថា រដ្ឋាភិបាលកំពុងដើរត្រង់ទិសដៅ ក្នុងការចែកចាយវ៉ាក់សាំងចំនួន 100 លានដូស ក្នុងអំឡុង 60 ថ្ងៃដំបូងនៃការឡើងកាន់តំណែងរបស់លោក។

«ពុំទាន់មានប្រទេសណាអាចធ្វើបានដូច្នេះ» លោក Biden សង្កាត់ធ្ងន់យ៉ាងនេះ។ លោក Biden ក៏បានអំពាវនាវឱ្យពលរដ្ឋអាមេរិកាំង ទៅចាក់វ៉ាក់សាំងឱ្យបានគ្រប់ៗគ្នា ដើម្បីឆាប់ឱ្យប្រទេសជាតិវិលប្រលប់មករកសភាពធម្មតា។

កាលពីថ្ងៃទី 11 មីនា លោក Biden ក៏បានចុះហត្ថលេខាបញ្ចេញកញ្ចប់ថវិកា «គម្រោងរំដោះពលរដ្ឋអាមេរិក» តម្លៃ 1.9 លានលានដុល្លារ ដែលលោកជាអ្នកស្នើ ដើម្បីជួយដល់ប្រជាជន និងជំរុញកំណើនសេដ្ឋកិច្ច។

យោងតាមទំព័រ Worldometers សហរដ្ឋអាមេរិកបច្ចុប្បន្នគឺជាសម្បុកវីរុស Covid-19 ធំជាងគេបង្អស់ក្នុងពិភពលោក ដោយមានអ្នកឆ្លងវីរុសជាង 29,990,000 នាក់ និងជាង 540,000 បានបាត់បង់ជីវិត៕

ប្រភព៖ Fox News
ប្រែសម្រួល៖ បុត្រា

March 13, 2021

WHO ៖ ពុំមានមូលហេតុដែលត្រូវផ្អាកចាក់វ៉ាក់សាំង AstraZeneca

អង្គការសុខភាពពិភពលោក (WHO) បានអះអាងថា មិនមានមូលហេតុអ្វីដែលនាំឱ្យពិភពលោកត្រូវផ្អាកការចាក់វ៉ាក់សាំងបង្ការវីរុស Covid-19 របស់ក្រុមហ៊ុន AstraZeneca (អង់គ្លេស-ស៊ុយអែដ) នោះទេ ក្រោយពីមានប្រទេសមួយចំនួនបានផ្អាកប្រើប្រាស់វ៉ាក់សាំងនេះ។

ខាងលើនេះគឺជាការលើកឡើងរបស់លោកស្រី Margaret Harris អ្នកនាំពាក្យនៃអង្គការសុខភាពពិភពលោក ដែលបានថ្លែងកាលពីថ្ងៃទី 12 មីនា 2021។

ការលើកឡើងរបស់ WHO ត្រូវបានធ្វើឡើង ក្រោយពីប្រទេសមួយចំនួនក្នុងពិភពលោក ដូចជា ដាណឺម៉ាក, ន័រវែស, អ៊ីស្លង់ ជាដើម បានប្រកាសផ្អាកការចាក់វ៉ាក់សាំងរបស់ក្រុមហ៊ុន AstraZeneca ដោយសារតែមានបញ្ហាកកឈាមលើមនុស្សមួយចំនួនបន្ទាប់ពីបានចាក់វ៉ាក់សាំងនេះ។ ប្រទេសថៃ កាលពីម្សិលមិញក៏បានក្លាយជាប្រទេសដំបូងគេនៅអាស៊ីអាគ្នេយ៍ដែលផ្អាកការចាក់វ៉ាក់សាំងនេះដែរ។

ក៏ប៉ុន្តែ រដ្ឋាភិបាលនៃប្រទេសជាច្រើន នៅតែបន្តប្រើប្រាស់វ៉ាក់សាំង AstraZeneca ដោយយល់ថា ផលប្រយោជន៍ដែលវ៉ាក់សាំងនេះនាំមកគឺធំធេងជាងឆ្ងាយ បើធៀបនឹងហានិភ័យ។

យោងតាមស្ថិតិពីអង្គភាពចាក់វ៉ាក់សាំងនានានៅអឺរ៉ុប នៅក្នុងចំណោមមនុស្សប្រមាណជា 5 លាននាក់ដែលបានចាក់វ៉ាក់សាំង AstraZeneca មានមនុស្សប្រហែល 30 នាក់ប៉ុណ្ណោះដែលជួបបញ្ហាកកឈាម។ អត្រានេះមិនស្ថិតនៅក្រៅការព្យាករអំពីហានិភ័យនោះទេ។

វ៉ាក់សាំងបង្ការ Covid-19 ដែលត្រូវបានក្រុមហ៊ុន AstraZeneca សហការអភិវឌ្ឍជាមួយនឹងសាកលវិទ្យាល័យ Oxford ត្រូវបានអនុម័តឱ្យប្រើប្រាស់ជាបន្ទាន់ និងប្រើប្រាស់នៅក្នុងប្រទេសជាង 50 ក្នុងនោះមានទាំងអង់គ្លេស និងសហភាពអឺរ៉ុប (EU) ផងដែរ៕

ប្រភព៖ AFP
ប្រែសម្រួល៖ បុត្រា

March 13, 2021

ករណីកុមារអាមេរិកស្បែកខ្មៅម្នាក់ ត្រូវមិត្តរួមថ្នាក់គំរាមឱ្យផឹកទឹកនោម កំពុងត្រូវបានស៊ើបអង្កេត

ប៉ូលិសរដ្ឋ Texas នៃសហរដ្ឋអាមេរិក បានបើកការស៊ើបអង្កេតលើបណ្ដឹងចោទប្រកាន់មួយករណីស្ដីអំពីកុមារស្បែកខ្មៅម្នាក់ដែលរៀននៅសាលាមធ្យមសិក្សា ត្រូវបានមិត្តរួមថ្នាក់ធ្វើបាបយ៉ាងព្រៃផ្សៃ ព្រមទាំងបង្ខំឱ្យផឹកទឹកនោមទៀតផង ទាក់ទងនឹងបញ្ហា «ប្រកាន់ពូជសាសន៍»។

យោងតាមសារព័ត៌មានអង់គ្លេស Daily Mail កាលពីថ្ងៃទី 10 មីនា 2021 ប៉ូលិសក្រុង Plano នៃរដ្ឋ Texas ឱ្យដឹងថា ពួកគេកំពុង «ញាប់ដៃ ញាប់ជើង» ស៊ើបអង្កេតករណីសិស្សថ្នាក់ទី 8 ម្នាក់ ឈ្មោះ SeMarion Humphrey ត្រូវសង្ស័យថា ត្រូវបានមិត្តរួមថ្នាក់ធ្វើបាបយ៉ាងអាណោចអាធម្ម។

ការស៊ើបអង្កេតត្រូវបានធ្វើឡើង បន្ទាប់ពីនាង Summer Smith ដែលជាម្ដាយរបស់កុមារ SeMarion បានធ្វើសន្និសីទសារព័ត៌មានមួយនៅខាងក្រៅសាលាមធ្យមសិក្សា Haggard ដោយស្នើឱ្យក្រុមអាណាព្យាបាល និងសិស្សដែលពាក់ព័ន្ធនឹងករណីនេះ ត្រូវទទួលខុសត្រូវចំពោះអំពើហិង្សារបស់កូនៗពួកគេ។

Smith ឱ្យដឹងថា កូនប្រុសរបស់នាង ត្រូវបានគេសម្លុតគំរាម និងរំខាននៅឯសាលា Haggard ក្នុងអំឡុង 2 ឆ្នាំកន្លងទៅនេះ។ ប៉ុន្តែ ហេតុការណ៍បានធ្ងន់ធ្ងរដល់ចំណុចកំពូលកាលពីថ្ងៃទី 12 កុម្ភៈ 2021 នៅពេល SeMarion ត្រូវបានមិត្តរួមថ្នាក់ម្នាក់អញ្ជើញឱ្យចូលរួមពិធីជប់លៀង និងគេងនៅទីនោះ។ កុមាររងគ្រោះនេះ មិនបានដឹងទាល់តែសោះថា មិត្តរួមថ្នាក់មួយចំនួនដែលធ្លាប់បានធ្វើបាបខ្លួន នឹងចូលរួមពិធីនោះ។

ក្នុងយប់នោះ Smith និយាយថា កូនប្រុសរបស់នាងត្រូវគេបង្អាប់ដោយពាក្យគ្រោតគ្រាតបំផុត។ សិស្សមួយចំនួនថែមទាំងបានយកកាំភ្លើងជ័រ បាញ់ទៅលើ SeMarion។ ក្នុងវីដេអូមួយបានបង្ហាញថា កុមាររូបនេះ ថែមទាំងត្រូវទះកំផ្លៀងទៀតផង។

អ្វីដែលសាហាវជាងគេ នោះគឺសកម្មភាពនៅក្នុងវីដេអូមួយដែលត្រូវបានចែករំលែកនៅលើបណ្ដាញសង្គម បង្ហាញថា SeMarion ត្រូវបានបង្ខំឱ្យផឹកទឹកមួយប្រភេទ ដែលវាទំនងជាទឹកនោម ដែលដាក់នៅក្នុងកែវក្រដាសមួយ ខណៈដែលនៅជុំវិញ មានសំឡេងសើចកងរំពង។

ដំបូងឡើយ SeMarion មិនហ៊ាននិយាយប្រាប់អ្នកណាអំពីអ្វីដែលបានកើតឡើងកាលពីយប់នោះ ដោយសារតែមានគេគំរាមថានឹងវាយធ្វើបាប។

SeMarion មិនបានត្រលប់ទៅសាលាអស់រយៈពេលជាងមួយសប្ដាហ៍ ដោយសារតែព្រឹលធ្លាក់ខ្លាំង។ ប៉ុន្តែ វីដេអូដែលបង្ហាញថា SeMarion ត្រូវមិត្តរួមថ្នាក់បង្ខំឱ្យផឹកទឹកនោម ត្រូវបានគេចែករំលែកតៗគ្នាពេញបណ្ដាញសង្គមនៅក្នុងអំឡុងពេលនោះ។

ក្រោយពីត្រលប់មកសាលាវិញ សិស្សម្នាក់បានសួរ SeMarion ថា តើត្រូវគេបង្ខំឱ្យផឹកទឹកនោមមែន ឬទេ។ ពេលនេះ SeMarion គ្រាន់តែឆ្លើយថា មិនចាំហេតុការណ៍នោះទេ។ មកដល់សប្ដាហ៍កន្លងទៅ ទើប SeMarion រៀបរាប់ហេតុការណ៍គ្រប់យ៉ាង ប្រាប់នាយកសាលារបស់ខ្លួន បន្ទាប់ពីក្រុមមន្ត្រីនៅសាលារៀនបានដឹងអំពីវីដេអូនោះ។

នៅក្នុងសេចក្ដីប្រកាសមួយកាលពីថ្ងៃទី 5 មីនា Sara Bonser ដែលជាអ្នកគ្រប់គ្រងសាលានៃតំបន់ Plano បានឱ្យដឹងថា ភ្លាមៗនោះ ពួកគេបានបើកការស៊ើបអង្កេតលើករណីនេះ។

«ហេតុការណ៍យ៉ាងដូច្នេះ បានធ្វើឱ្យប៉ះពាល់ដល់សហគមន៍របស់យើង។ ខ្ញុំចង់ឱ្យសហគមន៍របស់យើងដឹងថា Plano នឹងមិនអត់ឱនឱ្យទង្វើគំរាមកំហែង ឬរំខាននានាជាដាច់ខាត» Bonser បញ្ជាក់។

ក្រុមមន្ត្រីអប់រំរបស់សាលាបានឱ្យដឹងថា ពួកគេកំពុងធ្វើការជាមួយ «សិក្សានុសិស្សដែលពាក់ព័ន្ធ រួមនឹងអាណាព្យាបាលរបស់ពួកគេផងដែរ» ដើម្បីដោះស្រាយបញ្ហានេះ។

មេធាវី Cole តំណាងឱ្យគ្រួសារ SeMarion បានឱ្យដឹងថា គ្រួសារជនរងគ្រោះមានបំណងប្ដឹងពីបទព្រហ្មទណ្ឌចំពោះសិស្សទាំងឡាយដែលបានប្រើអំពើហិង្សាមកលើ SeMarion។

«នេះមិនមែនជាទោសស្រាលនោះទេ តែវាមានលក្ខណធ្ងន់ធ្ងរ។ ដែលហៅវាថាជាសកម្មភាពសម្លុតគំរាមគឺគ្រាន់តែដើម្បីកាត់បន្ថយទម្ងន់ទោសនៃអំពើហិង្សានេះតែប៉ុណ្ណោះ»៕

ប្រភព៖ Daily Mail
ប្រែសម្រួល៖ បុត្រា

March 12, 2021

ម៉ាឡេស៊ីនឹងដាក់ទោសយ៉ាងធ្ងន់ធ្ងរចំពោះបុគ្គលបញ្ចេញព័ត៌មានក្លែងក្លាយទាក់ទងនឹង Covid-19

ចាប់ពីថ្ងៃទី 12 មីនា 2021 ប្រទេសម៉ាឡេស៊ី នឹងពិន័យជាប្រាក់ឡើងដល់ 100,000 រីងហ្កីត (ជិត 25,000 ដុល្លារ) ឬដាក់ពន្ធនាគាររហូតដល់ 3 ឆ្នាំ ឬក៏ពិន័យទាំងពីរវិធានការនេះ ចំពោះករណីផ្ដល់ព័ត៌មានក្លែងក្លាយ ផ្សាយព័ត៌មានក្លែងក្លាយ ទាក់ទងនឹងស្ថានភាព Covid-19 ឬស្ថានភាពបន្ទាន់របស់ប្រទេសជាតិ។

ព័ត៌មានខាងលើត្រូវបានចុះផ្សាយនៅលើទំព័រជូនដំណឹងរបស់រដ្ឋាភិបាលម៉ាឡេស៊ី កាលពីថ្ងៃទី 11 មីនា 2021។ ក្រៅពីប្រការទាំងនេះ តុលាការក៏អាចស្នើឱ្យជនល្មើសសុំទោសចំពោះជនទាំងឡាយណាដែលរងផលប៉ះពាល់ផងដែរ។ បើសិនជាជនល្មើសមិនអនុវត្តតាមតុលាការ នោះនឹងត្រូវពិន័យជាប្រាក់ឡើងដល់ 50,000 រីងហ្កីត (12,500 ដុល្លារអាមេរិក) ឬដាក់ពន្ធនាគារក្រោមមួយឆ្នាំ ឬត្រូវទទួលការពិន័យទាំងពីរ។

គិតមកដល់ព្រឹកថ្ងៃទី 12 មីនា 2021 នេះ ម៉ាឡេស៊ី បានរកឃើញអ្នកវិជ្ជមាននឹង Covid-19 សរុបចំនួន 319,364 នាក់ ក្នុងនោះមានអ្នកជាសះ 300,620 នាក់ ខណៈ 17,544 នាក់ កំពុងព្យាបាល និង 1,200 បានបាត់បង់ជីវិត៕

ប្រភព៖ CNA
ប្រែសម្រួល៖ បុត្រា

March 12, 2021

រាជវាំងអង់គ្លេសថានឹងដោះស្រាយបញ្ហាទាក់ទិនកិច្ចសម្ភាសរបស់ Meghan Markle តែចៅប្រសាឆ្លើយវិញដោយអន្ថន័យ «ហ៊ានស៊ី ហ៊ានសង»

បន្ទាប់ពីមហាក្សត្រីអង់គ្លេស Elizabeth ទីពីរ ប្រកាសថានឹងដោះស្រាយបញ្ហាក្នុងរាជវង្សជាលក្ខណដោយឡែក ភ្លាមនោះ ភរិយារបស់អតីតអង្គម្ចាស់ Harry នាង Meghan ក៏ឆ្លើយតបទាក់ទងនឹងកិច្ចសម្ភាសមួយរបស់នាង ដែលបាន និងកំពុងធ្វើឱ្យរង្គោះរង្គើរាជវាំង Buckingham។

>អត្ថបទទាក់ទង៖ សម្ព័ន្ធ 54ប្រទេស តំណាងដោយក្សត្រី Elizabeth ទីពីរ កំពុងរង្គោះរង្គើ ក្រោយអតីតអង្គម្ចាស់ Harry និងនាង Meghan ចោទថា «រាជវង្សអង់គ្លេស រើសអើងពូជសាសន៍»

កាលពីថ្ងៃទី 7 មីនា គ្រួសារ Harry – Meghan បានធ្វើឱ្យពិភពលោកមានមតិច្របូកច្របល់ បន្ទាប់ពីកិច្ចសម្ភាសរបស់ពួកគេជាមួយនឹងមហាសេដ្ឋិនី និងជាកំពូលពិធីការិនីទូរទស្សន៍ CBS អ្នកស្រី Oprah Winfrey ត្រូវបានចាក់ផ្សាយ។ Meghan បានរិះគន់លើរាជវង្សអង់គ្លេស ដែលជាគ្រួសារខាងស្វាមីរបស់ខ្លួនថា មានការរើសអើងពូជសាសន៍ចំពោះរូបនាងដែលមានឈាមជ័រជាជនជាតិស្បែកខ្មៅ។

ពីរថ្ងៃក្រោយមក មហាក្សត្រីអង់គ្លេស Elizabeth ទីពីរ ក៏បានប្រកាសជាផ្លូវការថា បញ្ហាទាំងឡាយខាងលើនឹងត្រូវបានដោះស្រាយដោយឡែកក្នុងរាជរង្ស។ ក្រោយការប្រកាសនេះ ចៅប្រសាស្ដេចអង់គ្លេស នាង Meghan ក៏បានឆ្លើយតបភ្លាម។

មិត្តជិតស្និទ្ធរបស់ Meghan Markle បានប្រាប់សារព័ត៌មាន Daily Mail ថា Meghan Markle «មិនមានការសោកស្ដាយ» ចំពោះកិច្ចសម្ភាសរបស់នាង និងស្វាមី ជាមួយនឹង Oprah នោះទេ ហើយថា រាជវាំងគួរតែ «ត្រេកអរ និងធូរចិត្ត» នៅពេលនាងមិនបានរៀបរាប់លម្អិតជាងនេះអំពីអ្វីដែលបានកើតឡើងនៅខាងក្រោយក្លោងទ្វាររាជវាំង។

ប្រភពព័ត៌មានដែលស្និទ្ធនឹងគ្រួសាររបស់ Meghan Markle ឱ្យដឹងថា អាទិភាពបច្ចុប្បន្នរបស់ Meghan Markle នោះគឺរក្សាសុខភាពឱ្យល្អដើម្បីរង់ចាំថ្ងៃផ្ដល់កំណើតឱ្យកូន។ គ្រួសារ Meghan Markle ធ្លាប់បាននិយាយថា Meghan Markle នឹងឆ្លងទន្លេនៅក្នុងរដូវក្ដៅនេះ។ ក្រៅពីនេះ អតីតព្រះនាងរបស់អង់គ្លេសរូប ក៏បានអះអាងថា ខ្លួនបានត្រៀមខ្លួនជាស្រេចដើម្បីចរចាជាមួយអង្គម្ចាស់ទាំងឡាយណាដែលចង់ចូលរួមការពិភាក្សាដើម្បីស្ថាបនា៕

ប្រភព៖ Daily Mail
ប្រែសម្រួល៖ បុត្រា

March 11, 2021

សម្ព័ន្ធ 54ប្រទេស តំណាងដោយក្សត្រី Elizabeth ទីពីរ កំពុងរង្គោះរង្គើ ក្រោយអតីតអង្គម្ចាស់ Harry និងនាង Meghan ចោទថា «រាជវង្សអង់គ្លេស រើសអើងពូជសាសន៍»

កិច្ចសម្ភាស Harry – Meghan បានបង្កឱ្យមានហានិភ័យបែកបាក់ក្នុង «គ្រួសារ» នៃក្រុមប្រទេសរបស់សម្ព័ន្ធកុម្ម៉ង់វែល (Commonwealth of Nations) ជាសមាគមដែលមានប្រទេសចំនួន 54 ដែលភាគច្រើនគឺជាអតីតប្រទេសក្រោមអាណានិគមអង់គ្លេស។

ក្នុងបណ្ដាប្រទេសដែលមានទំនាក់ទំងជាប្រវត្តិសាស្ត្រជាមួយចក្រភពអង់គ្លេស ការចោទប្រកាន់របស់អតីតព្រះអង្គម្ចាស់ Harry និងនាង Meghan ដែលថា មាន «សមាជិករាជរង្សខ្លួនមានការព្រួយបារម្ភថា កូនៗរបស់ពួកគេនឹងមានសម្បុរស្បែកពណ៌ខ្មៅ» នោះ បាននាំឱ្យមានការលើកឡើងនូវសំណួរជាច្រើន៖ «តើប្រទេសទាំងនោះ (ប្រទេសដែលស្ថិតក្នុងសម្ព័ន្ធប្រជាជាតិកុម្ម៉ង់វែល) ពិតជាចង់ភ្ជាប់ទំនាក់ទំនងស្អិតល្មួតជាមួយអង់គ្លេស និងរាជវាំងអង់គ្លេស ឬទេ?»។

សូមបញ្ជាក់ថា មហាក្សត្រី Elizabeth ទីពីរ មិនត្រឹមតែជាមេដឹកនាំរបស់អង់គ្លេសប៉ុណ្ណោះទេ តែក៏ជាមេដឹកនាំរបស់កុម្ម៉ង់វែល ដែលជាសមាគមអន្តររដ្ឋាភិបាលមួយដែលមានការចូលរួមរបស់ប្រទេសអង់គ្លេស និងប្រទេសចំនួន 53 ផ្សេងទៀត ដែលសុទ្ធសឹងតែធ្លាប់ជាប្រទេសស្ថិតក្រោមអាណានិគមរបស់អង់គ្លេស។ សម្ព័ន្ធនេះត្រូវបានបង្កើតឡើងដោយប្រកាសមួយនាទីក្រុងឡុងដ៍កាលពីឆ្នាំ 1949 ដែលកំណត់ថា ប្រទេសជាសមាជិក «មានសេរីភាព និងសមភាព»។ មហាក្សត្រីរបស់អង់គ្លេសគឺជានិមិត្តរូបនៃសម្ព័ន្ធនេះ។ ក្រៅពីអង់គ្លេស មហាក្សត្រី Elizabeth ទីពីរ ក៏ជាក្សត្រីរបស់ប្រទេសចំនួន 15 ទៀតដែលស្ថិតក្នុងសម្ព័ន្ធកុម្ម៉ង់វែលនេះដែរ (រួមមានប្រទេស Antigua and Barbuda, Australia, the Bahamas, Barbados, Belize, Canada, Grenada, Jamaica, New Zealand, Papua New Guinea, St. Kitts and Nevis, St. Lucia, St. Vincent and the Grenadines, the Solomon Islands, និងប្រទេស Tuvalu)។

កិច្ចសម្ភាសរបស់អតីតព្រះអង្គម្ចាស់ Harry របស់អង់គ្លេស និងនាង Meghan ត្រូវបានចាក់ផ្សាយលើទូរទស្សន៍អាមេរិក កាលពីយប់ថ្ងៃទី 7 មីនា មុនទិវានៃសម្ព័ន្ធប្រជាជាតិកុម្ម៉ង់វែល 8 មីនា។ អតីតនាយករដ្ឋមន្ត្រីអូស្ត្រាលី Malcolm Turnbull បាននិយាយថា ការបង្ហើបឱ្យដឹងនៅក្នុងកិច្ចសម្ភាសនេះគឺជាមូលហេតុដែលប្រទេសនេះអាចកាត់ផ្ដាច់ទំនាក់ទំនងជាលក្ខណធម្មនុញ្ញជាមួយនឹងរបបរាជាធិបតេយ្យអង់គ្លេស។

«យើងគួរតែបញ្ឈប់ នៅពេលសម័យកាលកាន់អំណាចរបស់មហាក្សត្រីបានបញ្ចប់» លោក Turnbull និយាយដូច្នេះ។ «តើយើងពិតជាចង់ឱ្យមនុស្សម្នាក់មកធ្វើជាមេដឹកនាំប្រទេសរបស់ខ្លួន ព្រោះតែអ្នកនោះជាក្សត្រា ឬក្សត្រីរបស់អង់គ្លេស?»។

តម្លៃរបស់សម្ព័ន្ធកុម្ម៉ង់វែល ធ្លាប់ត្រូវបានលើកយកមកជជែកវែកញែកជាច្រើនលើកមកហើយ ក្នុងនោះ ក្រុមអ្នករិះគន់បានចោទសួរថា តើបណ្ដាប្រទេស និងប្រជាជាតិដែលធ្លាប់ស្ថិតក្រោមអាណានិគម និងធ្លាប់ត្រូវបានកៀបសង្កត់ គួរតែបន្តទំនាក់ទំនងដូច្នេះជាមួយនឹងប្រទេសអង់គ្លេស ឬទេ?

គោលបំណងនៃការបង្កើតសម្ព័ន្ធកុម្ម៉ង់វែល គឺដើម្បីកែលម្អទំនាក់ទំនងអន្តរជាតិ ប៉ុន្តែ ទំនាក់ទំនងរបស់អង់គ្លេសជាមួយបណ្ដាប្រទេសជាសមាជិក ត្រូវបានកំហុសឆ្គងក្នុងការទូត និងប្រវត្តិសាស្ត្រនៃជំនាន់អាណានិគម ធ្វើឱ្យល្អក់កករ។ ក្នុងសុន្ទរកថាអបអរទិវាសម្ព័ន្ធកុម្ម៉ង់វែល កាលពីថ្ងៃទី 8 មីនា មហាក្សត្រីអង់គ្លេសបានសង្កត់ធ្ងន់ទៅលើ «ស្មារតីរួបរួម»។

កិច្ចសម្ភាសរបស់អតីតអង្គម្ចាស់ Harry និងអ្នកម្នាង Meghan «ជួយឱ្យយើងអាចមើលឃើញលម្អិតជាងមុន» អំពីតម្លៃរបស់សម្ព័ន្ធកុម្ម៉ង់វែល នេះបើតាម Nicholas Sengoba ដែលជាអ្នកកាសែតប្រចាំប្រទេសអ៊ូហ្គង់ដា អតីតប្រទេសក្រោមអាណានិគមរបស់អង់គ្លេស។

ផែនទីនៃបណ្ដាប្រទេសដែលស្ថិតក្នុងសម្ព័ន្ធកុម្ម៉ង់វែល ដែលតំណាងដោយមហាក្សត្រីអង់គ្លេស Elizabeth ទីពីរ

លោក Nicholas Sengoba និយាយថា នៅប្រទេសអ៊ូហ្គង់ដា នៅមាន «បញ្ហាជាច្រើនមិនទាន់ដោះស្រាយ» ទាក់ទិននឹងទង្វើរំលោភបំពានកាលពីជំនាន់អាណានិគម និងបានចោទសួរ ក្រោយពីមានកិច្ចសម្ភាសខាងលើ ថា «តើមេដឹកនាំបណ្ដាប្រទេសក្នុងសម្ព័ន្ធកុម្ម៉ង់វែល គួរមានមោទកភាពនៅពេលបានទទួលទានអាហារពេលយប់ជាមួយសមាជិករបស់រាជវង្សអង់គ្លេស ឬយ៉ាងណា?»។

ចំណែកភាគីខាងរាជវាំង Buckingham វិញ បានប្រតិកម្មថា ការចោទប្រកាន់របស់ Harry និង Meghan ទាក់ទងនឹងបញ្ហារើសអើងពូជសាសន៍នៅក្នុងរាជវាំងអង់គ្លេស នោះ នឹងត្រូវបានដោះស្រាយដោយឡែក។ នាង Meghan មានឪពុកជាជនជាតិស្បែកខ្មៅ រីឯម្ដាយជាជនជាតិស្បែកស។

ក្រោយកិច្ចសម្ភាសរបស់ Harry និង Meghan ប្រជាជននៅអាហ្វ្រិក មានការប្រតិកម្មយ៉ាងខ្លាំងក្លា។ «ប្រទេសអង់គ្លេស និងរាជវាំង គឺបែបនេះ។ គ្រប់គ្នាសង្ឃឹមអ្វីទៀត? ពួកគេធ្លាប់កៀបសង្កត់យើងអស់ជាច្រើនឆ្នាំ» អ្នកលេង Twitter នៅអាហ្វ្រិកខាងត្បូងម្នាក់ បង្ហោះសារយ៉ាងដូច្នេះ។

Mohammed Groenewald ជាអ្នកដែលធ្លាប់បាននាំ Harry និង Meghan ទៅទស្សនកិច្ចវិហារអ៊ីស្លាមមួយនៅទីក្រុង Cape Town បាននិយាយថា កិច្ចសម្ភាសខាងលើ បានរំលឹក និងលាតត្រដាងឡើងវិញអំពីបញ្ហា «រើសអើងពូជសាសន៍របស់ចក្រពត្តិអង់គ្លេស»។ លោកបន្ថែមថា បញ្ហានេះ «បានបង្ហាញយ៉ាងច្បាស់លាស់ហើយ»។

កេនយ៉ាគឺជាអតីតប្រទេសក្រោមអាណានិគមដែលក្សត្រី Elizabeth ធ្លាប់មកធ្វើទស្សនកិច្ចកាលពីឆ្នាំ 1952 ក្នុងនាមជាមហាក្សត្រី។ «យើងមានការខឹងខ្លាំងណាស់នៅពេលបានដឹងថា ប្អូនស្រីមានដើមកំណើតអាហ្វ្រិក ត្រូវគេធ្វើបាបដោយសារតែនាងជាជនជាតិស្បែកខ្មៅ» Sylvia Wangari ជាពលរដ្ឋម្នាក់នៅរដ្ឋធានី Nairobi និយាយអំពីនាង Meghan។ Wangari បន្ថែមថា កាលពីក្សត្រី Elizabeth មកធ្វើទស្សនកិច្ចកេនយ៉ា ប្រជាជនប្រទេសនេះមិនបាន «សំដែងឥរិយាបថប្រកាន់ពូជសាសន៍អ្វីឡើយ»។

ចំណែកនាយករដ្ឋមន្ត្រីកាណាដា លោក Justin Trudeau វិញ បាននិយាយថា «មិនគួរបោះបង់កត្តាណាមួយភ្លាមៗ និងចាប់ផ្ដើមជាថ្មីនោះទេ»។ រីឯ Jagmeet Singh ដែលជាមេដឹកនាំបក្សប្រជាធិបតេយ្យថ្មី (New Democratic Party) វិញ បាននិយាយថា របបរាជាធិបតេយ្យ «មិនមានប្រយោជន៍អ្វីដល់ជីវភាពប្រចាំថ្ងៃរបស់ប្រជាជនកាណាដានោះឡើយ»។

កិច្ចសម្ភាសរបស់ Harry និង Meghan មិនបានចាក់បញ្ចាំងលើកញ្ចក់ទូរទស្សន៍ឥណ្ឌា ដែលជាប្រទេសមួយមានមនុស្សរស់នៅច្រើនជាងគេបង្អស់នៅក្នុងសម្ព័ន្ធកុម្ម៉ង់វែល ដោយមានប្រជាជនសរុបជាង 1.3 លាននាក់។ ក៏ប៉ុន្តែ សារព័ត៌មាននានានៅតែមានការចុះផ្សាយអំពីប្រតិកម្មអវិជ្ជមានចំពោះរាជវង្សអង់គ្លេស។

ទោះជាយ៉ាងណាក៏ដោយ «សម្ព័ន្ធកុម្ម៉ង់វែលពិតជាមានសារសំខាន់សម្រាប់រាជវង្សអង់គ្លេស ព្រោះវាបង្ហាញថា ពួកគេបានគ្រប់គ្រងប្រទេស និងតំបន់ជាច្រើន ប៉ុន្តែ ចំណែកពួកយើង យ៉ាងណាទៅវិញ? ខ្ញុំមិនយល់សោះថា ហេតុអ្វីបានជាយើងនៅតែស្ថិតក្នុងសម្ព័ន្ធនេះ» នេះបើតាមសម្ដីរបស់មេធាវី Sunaina Phul៕

ប្រភព៖ AP
ប្រែសម្រួល៖ បុត្រា

March 11, 2021

Category: អន្តរជាតិ