អន្តរជាតិ - La Reine Media

មិនទុកចិត្ត!! សហរដ្ឋអាមេរិក ប្រកាសតាមមើលយ៉ាងដិតដល់ ទោះរុស្ស៊ីដកទ័ពរាប់សែននាក់ចេញពីព្រំដែនអ៊ុយក្រែនក្ដី

ប្រទេសរុស្ស៊ី បានថ្លែងកាលពីថ្ងៃព្រហស្បតិ៍ ទី22 មេសា ចេញបញ្ជាឱ្យដកកងទ័ពចេញពីតំបន់ព្រំដែនជាប់ប្រទេសអ៊ុយក្រែន ត្រឡប់ចូលបន្ទាយវិញ បញ្ឈប់ការបន្ថែមកម្លាំងយោធា ដែលធ្វើឱ្យកើតមានក្ដីបារម្ភកង្វល់ចំពោះប្រទេសលោកខាងលិច តែយ៉ាងណាក៏ដោយ ខាងសហរដ្ឋអាមេរិកវិញ បានបញ្ជាក់ថា នឹងតាមសង្កេតមើលស្ថានការណ៍នេះយ៉ាងដិតដល់ជាបន្តទៅទៀត។

ការអះអាង ដកកងទ័ពនេះ អាចនឹងធ្វើឱ្យកើតមានការស្វាគមន៍ពីប្រទេសលោកខាងលិចទាំងឡាយ ដែលកាលពីពេលមុននេះ បានសម្ដែងក្ដីព្រួយបារម្ភ ពាក់ព័ន្ធនឹងនិន្នាការដែលប្រទេសរុស្ស៊ី អាចនឹងជ្រៀតជ្រៀតចូល នៅភាគខាងកើតរបស់ប្រទេសអ៊ុយក្រែនខ្លាំងជាងមុន ក្នុងខណៈដែលពួកឧទ្ទាមផ្ដាច់ខ្លួន ដែលរុស្ស៊ីផ្ដល់ការគាំទ្រ បានបើកឆាកប្រយុទ្ធជាមួយទាហានរដ្ឋាភិបាលអ៊ុយក្រែន ក្នុងភូមិភាគនោះ តាំងពីឆ្នាំ2014 មកម្ល៉េះ។

អ្នកនាំពាក្យរបស់ប្រធានាធិបតីអ៊ុយក្រែន បានបញ្ជាក់កាលពីដើមខែថា រុស្ស៊ីមានទាហានប្រចាំការ តាមជួរព្រំដែនជាប់គ្នា ភាគខាងកើតរបស់អ៊ុយក្រែន ច្រើនជាង 40,000នាក់ និងជាង 40,000នាក់ទៀតនៅក្នុងគ្រីមៀ ដោយក្នុងនោះប្រមាណជា 50,000នាក់ ជាការដាក់ប្រចាំការថ្មី តែយ៉ាងណាក្ដី ខាងក្រុងម៉ូស្គូ មិនបានផ្ដល់តួលេខណាមួយ ពាក់ព័ន្ធនឹងចំនួនកម្លាំងទាហានរបស់ពួកគេឡើយ។

លោកប្រធានាធិបតី វ្ល៉ូឌីមៀ សេលេនស្គី បានសរសេរនៅក្នុងធ្វីតធើរថា “អ៊ុយក្រែនស្វាគមន៍ចំពោះជំហានណាមួយ ក្នុងការបន្ថយការប្រចាំយោធា និងបន្ថយស្ថានការណ៍ភាពតានតឹងនៅដុងបាស់ (ភាគខាងកើតរបស់អ៊ុយក្រែន)” ព្រមទាំងថ្លែងអំណរគុណកម្លាំងគាំទ្រពីបណ្ដាសម្ព័ន្ធមិត្តអន្តរជាតិទៀតផង។

ដាមីតូ ឃូលេបា រដ្ឋមន្ត្រីការបរទេស បានប្រាប់ទីភ្នាក់ងារព័ត៌មានរ៉យទ័រថា ក្រុងកៀវ មិនដឹងថាក្រុងម៉ូស្គូ មានចេតនាចាប់ផ្ដើមវាយប្រហារ ដែរឬទេ? និងប្រទេសលោកខាងលិច ត្រូវតែបង្ហាញគោលជំរយ៉ាងច្បាស់លាស់ថា ពួកគេនឹងឈរនៅជាមួយអ៊ុយក្រែន បើសិនរុស្ស៊ីចាប់ផ្ដើមវាយប្រហារ។ “ពេលនេះ វាអាចទៅរួច បានទាំង 2ផ្លូវ ហើយនេះគឺហេតុផលដែលថា ហេតុអីបានប្រតិកម្មយ៉ាងមាំមួនរបស់ប្រទេសលោកខាងលិច មានភាពសំខាន់ខ្លាំងបំផុត សម្រាប់ការពារមិនឱ្យពូទីន សម្រេចចិត្តធ្វើដូច្នោះ”

លោក ណិត ផ្រៃស៍ អ្នកនាំពាក្យក្រសួងការបរទេសសហរដ្ឋអាមេរិក ប្រាប់ថា ក្រុងវ៉ាស៊ីនតោន បានដឹងពាក់ព័ន្ធនឹងសេចក្ដីថ្លែងការណ៍របស់ប្រទេសរុស្ស៊ីហើយ និងកំពុងតាមសង្កេតមើលស្ថានការណ៍តាមបណ្ដោយព្រំដែនយ៉ាងដិតដល់។ “យើងបានឮសេចក្ដីថ្លែងការណ៍នោះហើយ ខ្ញុំគិតថា យើងត្រូវតែសម្លឹងមើលទៅលើទង្វើបន្តទៀត”៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 23, 2021

សេចក្ដីព្រាងច្បាប់ប្រឆាំងការរើសអើងលើជនជាតិអាស៊ី ត្រូវបានព្រឹទ្ធសភាអាមេរិក អនុម័តរួចហើយ!

សភាជាន់ខ្ពស់របស់សហរដ្ឋអាមេរិក បានអនុម័តច្បាប់ប្រឆាំងការរើសអើងជាតិសាសន៍ដែលសំដៅលើពលរដ្ឋអាមេរិកាំងដើមកំណើតអាស៊ី នៅក្នុងគ្រាដែលអំពើប្រកាន់ជាតិសាសន៍លើជនជាតិអាមេរិកាំងដើមកំណើតអាស៊ី កំពុងរាលដាលពាសពេញសហរដ្ឋអាមេរិក។

សេចក្ដីព្រាងច្បាប់ខាងលើ ត្រូវបានអនុម័តកាលពីថ្ងៃទី22 ខែមេសា ឆ្នាំ2021 ដោយមានសន្លឹកឆ្នោតគាំទ្រចំនួន 94សំឡេង និងប្រឆាំង 1សំឡេង។ តំណាងរាស្ត្រនៃសភាជាន់ខ្ពស់មកពីបក្សសាធារណរដ្ឋ លោក Josh Hawley គឺជាអ្នកបោះឆ្នោតប្រឆាំងនឹងសេចក្ដីព្រាងច្បាប់នេះ។

សេចក្ដីព្រាងច្បាប់នេះ ត្រូវបានស្នើឡើងដោយតំណាងរាស្ត្រសភាជាន់ខ្ពស់ Mazie Hirono, Tammy Duckworth និងតំណាងរាស្ត្រសភាជាន់ទាប Grace Meng មកពីគណបក្សប្រជាធិបតេយ្យ ដើម្បីស្នើឱ្យក្រសួងយុត្តិធម៌បង្កើតការិយាល័យស៊ើបអង្កេតលើអំពើល្មើសច្បាប់ទាក់ទងនឹងការស្អប់ខ្ពើមជាតិសាសន៍ដែលត្រូវបានរាយការណ៍នៅក្នុងវិបត្តិ Covid-19។ សេចក្ដីព្រាងច្បាប់នេះក៏ណែនាំឱ្យក្រុមមន្ត្រីអនុវត្តច្បាប់នៅមូលដ្ឋាន រាយការណ៍អំពីអំពើល្មើសច្បាប់រើសអើងជាតិសាសន៍ ពង្រីកការអប់រំដល់សហគមន៍នានា និងប្រឆាំងនឹងពាក្យស្អប់ខ្ពើមទាក់ទងនឹងវិបត្តិ Covid-19។

Hirono និង Duckworth គឺជាជនជាតិអាមេរិកាំងដើមកំណើតអាស៊ីតែពីរនាក់គត់ នៅក្នុងសភាជាន់ខ្ពស់សហរដ្ឋអាមេរិក ក្នុងចំណោមតំណាងរាស្ត្រសរុបចំនួន 100នាក់។

សេចក្ដីព្រាងច្បាប់នេះនឹងត្រូវការការអនុម័តនៅសភាជាន់ទាប ជាកន្លែងដែលកៅអីភាគច្រើនត្រូវបានកាន់កាប់ដោយបក្សប្រជាធិបតេយ្យ ហើយបន្ទាប់មកទៀត វានឹងត្រូវបញ្ជូនទៅកាន់សេតវិមានដើម្បីឱ្យប្រធានាធិបតី Joe Biden ចុះហត្ថលេខា។

សូមរំលឹកថា អំពើហិង្សាប្រឆាំងនឹងពលរដ្ឋអាមេរិកាំងដើមកំណើតអាស៊ី បានកើនឡើងខ្ពស់ ចាប់តាំងពី Covid-19 បានផ្ទុះឡើង។ ក្រុមសកម្មជន និងប៉ូលិសបានឱ្យដឹងថា គំនិតស្អប់ខ្ពើមជនជាតិអាស៊ី ត្រូវបានញុះញង់ដោយវោហាសាស្ត្រចោទប្រកាន់ចិនអំពីបញ្ហា Covid-19។ អតីតប្រធានាធិបតី Donald Trump ធ្លាប់បានប្រើពាក្យពេចន៍ដូចជា «វីរុសចិន» ជាដើម ដើម្បីហៅ Covid-19។

យោងតាមក្រុមសកម្មជនប្រឆាំងនឹងអំពើស្អប់ខ្ពស់លើពលរដ្ឋអាមេរិកដើមកំណើតអាស៊ី និងបណ្ដាកោះនៅមហាសមុទ្រប៉ាស៊ីហ្វិក (AAPI) អំពើរើសអើងជាតិសាសន៍ជិត 3,800ករណី បានកើតឡើងនៅសហរដ្ឋអាមេរិក រាប់ចាប់ពីខែមីនា ឆ្នាំ2020 ដល់ខែកុម្ភៈ ឆ្នាំ2021។ ចំណែកមជ្ឈមណ្ឌលស្រាវជ្រាវអំពីលទ្ធិស្អប់ខ្ពើម និងជ្រុលនិយម នៃសាកលវិទ្យាល័យរដ្ឋ California បានបញ្ជាក់ថា អំពើល្មើសដែលប្រឆាំងនឹងពលរដ្ឋអាមេរិកាំងដើមកំណើតអាស៊ី កើនជិត 150% ក្នុងឆ្នាំ2020 បើធៀបនឹងឆ្នាំ2019៕

ប្រភព៖ Reuters, Financial Times
ប្រែសម្រួល៖ បុត្រា

April 23, 2021

UN ប៉ានប្រមាណថា ប៉ុន្មានខែខាងមុខ ប្រជាជនមីយ៉ាន់ម៉ា ច្រើនលាននាក់ នឹងប្រឈមនឹងគ្រោះទុរភិក្ស ដោយសារវិបត្តិផ្ទៃក្នុង

ភាពគ្មានស្ថិរភាពខាងស្បៀង កំពុងកើនឡើងយ៉ាងឆាប់រហ័សនៅក្នុងប្រទេសមីយ៉ាន់ម៉ា ដែលនេះជាផលប៉ះពាល់បណ្ដាលមកពីរដ្ឋប្រហារ និងវិបត្តិហិរញ្ញវត្ថុ ដែលមានភាពធ្ងន់ធ្ងរទ្វេឡើង ដោយអង្គការសហប្រជាជាតិ បានប៉ាន់ប្រមាណថា នឹងមានមនុស្សជាច្រើនលាននាក់ ប្រឈមនឹងភាពអត់ឃ្លាន ក្នុងអំឡុងពេលប៉ុន្មានខែខាងមុខនេះ។

អង្គការចំណីអាហារពិភពលោក ឬ WFP បានវិភាគថា មនុស្សម្នាច្រើនដល់ 3.4លាននាក់ នឹងត្រូវតស៊ូ ដើម្បីរកទិញស្បៀងអាហារ ក្នុងរយៈពេល 3-6ខែខាងមុខ ដោយទីប្រជុំជននឹងទទួលរងផលប៉ះពាល់យ៉ាងធ្ងន់ធ្ងរ បណ្ដាលមកពីអត្រាគ្មានការងារធ្វើ ដែលកើនឡើងក្នុងវិស័យផលិតកម្ម ការសាងសង់ និងសេវាកម្ម រួមទាំងតម្លៃម្ហូបអាហារដែលកើនឡើងខ្ពស់ដូចគ្នា។

“អ្នកក្រ ចំនួនដ៏ច្រើន លែងមានការងារធ្វើ និងមិនអាចរកទិញចំណីអាហារបានឡើយ ដូច្នេះចាំបាច់ត្រូវមានការតបស្នងយ៉ាងព្រមព្រៀងគ្នា ដើម្បីសម្រាលការលំបាកលំបិនភ្លាមៗ និងការពារមិនឱ្យកើតមានភាពចុះខ្សោយខាងស្ថិរភាពចំណីអាហារ” លោក ស្ទីហ្វេន អ៊ែនដឺសុន ប្រធានអង្គការចំណីអាហារពិភពលោក ប្រចាំប្រទេសមីយ៉ាន់ម៉ា បានថ្លែងបែបនេះនៅក្នុងសេចក្ដីថ្លែងព័ត៌មាន។

WFP បានបញ្ជាក់ថា តម្លៃទីផ្សារអង្ករ និងប្រេងឆា កើនឡើង 5% និង 18% តាមលំដាប់ ចាប់តាំងពីដំណាច់ខែកុម្ភៈមក និងមានសញ្ញាថា ក្រុមគ្រួសារជនជាតិមីយ៉ាន់ម៉ាមួយចំនួន ក្នុងទីក្រុងយ៉ាំងហ្គោន កំពុងរំលងពេលបាយចោលខ្លះ ហូបអាហារដែលមានគុណតម្លៃខាងភោជនាហារទាប និងកំពុងមានបំណុលច្រើន។

ក្រុមការងារ បានរៀបផែនការក្នុងការពង្រីកប្រតិបត្តិការផ្ដល់ការជួយសង្គ្រោះមនុស្ស កើនឡើង 3ដង ស្មើនឹង 3.3លាននាក់ និងកំពុងប្រមូលផ្ដុំថវិកា ដើម្បីប្រើប្រាស់ក្នុងការជួយសង្គ្រោះឱ្យបានដល់ 106លានដុល្លារ។ នេះបើតាមការឱ្យដឹងពីស្ថាប័នខាងលើ។

ទាំងអស់នេះ អ្នកនាំពាក្យរដ្ឋបាលទាហានមីយ៉ាន់ម៉ា មិនបានឆ្លើយតបទូរស័ព្ទដែលទីភ្នាក់ងារព័ត៌មាន Reuters ទំនាក់ទំនង ដើម្បីសុំការអធិប្បាយឡើយ៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 23, 2021

បែលហ្ស៊ិកភ័យរន្ធត់! រកឃើញអ្នកឆ្លងជំងឺកូវីដក្លាយពូជឥណ្ឌា ខណៈដែលប្រទេសជាច្រើន ហាមជើងហោះហើរ

មេរោគកូវីដ-19 ប្រភេទក្លាយពូជ ដែលកាន់តែពុះកញ្ជ្រោលខ្លាំងឡើងក្នុងករណីអ្នកឆ្លងថ្មីនៅក្នុងប្រទេសឥណ្ឌា ត្រូវបានរកឃើញនៅក្នុងប្រទេសបែលហ្ស៊ិក ក្នុងក្រុមនិស្សិតជនជាតិឥណ្ឌា ដែលធ្វើដំណើរមកពីទីក្រុងប៉ារីស ប្រទេសបារាំង ខណៈដែលកាណាដា ជាប្រទេសចុងក្រោយគេ ដែលបានហាមឃាត់ជើងហោះហើរមកពីប្រទេសឥណ្ឌា និងប៉ាគីស្ថាន មិនឱ្យធ្វើដំណើរចូលប្រទេស ក្រោមក្ដីកង្វល់បារម្ភចំពោះមេរោគក្លាយពូជ ដែលមានលក្ខណៈពិសេស ដែលអាចបង្កឱ្យកើត “ការឆ្លងរាលដាលច្រើនឡើង” ឬរហូតដល់ “កាត់បន្ថយប្រសិទ្ធភាពវ៉ាក់សាំង” បានទៀតផង។

លោក ប៉េដ្រូ ហ្វាខុន មន្ត្រីថ្នាក់ខ្ពស់នៃរដ្ឋបាលបែលហ្ស៊ិក បានបង្ហើបប្រាប់ទីភ្នាក់ងារព័ត៌មាន AFP ថា និស្សិតពេទ្យឥណ្ឌា 20នាក់ ដែលធ្វើដំណើរមកពីទីក្រុងប៉ារីស ប្រទេសបារាំង ចូលមកបែលហ្ស៊ិក ក្នុងអំឡុងពាក់កណ្ដាលខែមេសា មានលទ្ធពិនិត្យវីរុសកូរ៉ូណាប្រភេទថ្មីក្លាយពូជឥណ្ឌា វិជ្ជមាន។

និស្សិតទាំងអស់ ត្រូវបាននាំខ្លួនទៅមជ្ឈមណ្ឌលបង្ខាំងជំងឺ ក្នុងក្រុងហាលស៍ និងទីក្រុងលូវឹន ភាគខាងជើងប្រទេសបែលហ្ស៊ិក ដែលពីដើមពួកគេមានកម្មវិធីចូលរួមសិក្ខាសាលាហ្វឹកអប់រំ ក្នុងទីក្រុងមួយនេះ។

ក្រុមអ្នកជំនាញការជាច្រើន បានចង្អុលបង្ហាញថា ក្រុមនិស្សិតទាំងនោះ អាចជាជនរងគ្រោះរបស់ Super Spreader ទាំងពីសមាជិកក្នុងក្រុមខ្លួនឯង ឬអ្នកដំណើរដទៃទៀតនៅលើរថយន្តក្រុង ដែលដឹកពួកគេ ពីទីក្រុងប៉ារីស មកប្រទេសបែលហ្ស៊ិក “ក្រុមនិស្សិតទាំងនោះ កំពុងស្ថិតក្នុងការបង្ខាំងខ្លួនយ៉ាងតឹងរ៉ឹង តាំងពីពេលធ្វើដំណើរមកដល់ រហូតមកដល់ថ្ងៃនេះ និស្សិតទាំង 20នាក់ ក្នុងចំណោម 43នាក់ បានឆ្លងមេរោគកូវីដក្លាយពូជ” លោក អេមម៉ានូអែល អង់ដ្រេ អ្នកជំនាញផ្នែក Microbiology មកពីមហាវិទ្យាល័យលូវឹន បានថ្លែងបែបនេះ។

លោក ម៉ាក ហ្វាន រ៉ាន់ស៍ អ្នកវីរុសវិទ្យា ជាអ្នកជំនាញការម្នាក់ទៀត បានផ្ដល់សម្ភាសជាមួយស្ថានីយវិទ្យុក្នុងតំបន់ថា ក្រុមរបស់លោក បានធ្វើដំណើរតាមយន្តហោះមកដល់ទីក្រុងប៉ារីសនៅថ្ងៃទី12 មេសា បន្ទាប់ពីនោះ 5ថ្ងៃតមកទៀត និស្សិតជាច្រើននាក់ បានចាប់ផ្ដើមបង្ហាញអាការការឆ្លងមេរោគវីរុសកូរ៉ូណាប្រភេទថ្មី។

មេរោគក្លាយពូជឥណ្ឌា B.1.617 ចាប់ផ្ដើមរកឃើញនៅក្នុងប្រទេសផ្សេងៗរួចហើយ ក្នុងនោះរួមទាំងសហរដ្ឋអាមេរិក អូស្ត្រាលី អ៊ីស្រាអែល និងសិង្ហបុរី ដែលក្ដីបារម្ភកង្វល់ពាក់ព័ន្ធនឹងមេរោគក្លាយពូជនេះ បានធ្វើឱ្យប្រទេសមួយចំនួន ក្នុងនោះរួមទាំងចក្រភពអង់គ្លេសផង បានកំណត់កម្រិតការធ្វើដំណើរជាមួយប្រទេសឥណ្ឌា។

យ៉ាងណាក៏ដោយ ក្ដីកង្វល់បារម្ភ មានកាន់តែខ្លាំងឡើង ក្រោយពីចំនួនអ្នកឆ្លងមេរោគកូវីដ-19 ក្នុងប្រទេសឥណ្ឌា បានកើនឡើងយ៉ាងឥតឈប់ឈរ ដោយថ្មីៗបំផុតនេះ បានក្លាយជាស្ថិតិថ្មី ខ្ពស់បំផុតក្នុងពិភពលោក ចាប់តាំងពីមេរោគវីរុសកូរ៉ូណាប្រភេទថ្មី ចាប់ផ្ដើមរាលដាល កាលពីចុងឆ្នាំ2019 មក។

មូលហេតុមួយផ្នែក របស់ការឆ្លងរាលដាលរលកថ្មីនៅក្នុងប្រទេសឥណ្ឌា បណ្ដាលមកពីវីរុសក្លាយពូជបែប “Double Mutant”។

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 23, 2021

អង់គ្លេស៖ មនុស្ស 23នាក់បានស្លាប់ដោយសារបញ្ហាកកឈាម ក្រោយការចាក់វ៉ាក់សាំង AstraZeneca

ក្រុមមន្ត្រីអង់គ្លេសបានឱ្យដឹងថា ប្រទេសនេះបានរកឃើញករណីស្លាប់ចំនួន 32នាក់ នៅក្នុងចំណោមករណីកកឈាមដ៏កម្រ ចំនួន 168នាក់ បន្ទាប់ពីបានចាក់វ៉ាក់សាំង AstraZeneca។

នាយកដ្ឋានគ្រប់គ្រងឱសថ និងផលិតផលថែរក្សាសុខភាពរបស់អង់គ្លេស (MHRA) បានរាយការណ៍ថា ក្នុងចំណោមពលរដ្ឋ 21.2លាននាក់ដែលបានចាក់វ៉ាក់សាំង AstraZeneca ដូសទីមួយ គិតមកដល់ថ្ងៃទី14 ខែមេសា ឆ្នាំ2021 មនុស្សចំនួន 168នាក់ត្រូវបានរកឃើញថា មានឈាមកកក្នុងរាងកាយ ក្នុងនោះក៏មាន 32នាក់បានស្លាប់។

បច្ចុប្បន្ន តួលេខស្ដីអំពីបញ្ហាកកឈាម និងស្លាប់ ដែលទាក់ទិននឹងវ៉ាក់សាំង AstraZeneca បានកើនបន្តបន្ទាប់គឺ 68 និង 10ករណី បើធៀបនឹងទិន្នន័យដែលត្រូវបានស្រង់កាលពីថ្ងៃទី5 ខែមេសា។

MHRA បានបញ្ជាក់ថា៖ «យោងតាមការវាយតម្លៃជាបន្តបន្ទាប់នេះ ការផ្ដល់យោបល់នោះគឺថា «ផលប្រយោជន៍របស់វ៉ាក់សាំងនេះ នៅតែធំជាងហានិភ័យរបស់វា សម្រាប់ពលរដ្ឋភាគច្រើន»។

នៅតំបន់អឺរ៉ុប ប្រទេសជាច្រើនបានចាប់ផ្ដើមយុទ្ធនាការចាក់វ៉ាក់សាំង Johnson & Johnson ឡើងវិញ បន្ទាប់ពីស្ថាប័នគ្រប់គ្រងឱសថរបស់សហភាពនេះ គាំទ្រដល់វ៉ាក់សាំងប្រភេទមួយដូសនេះ។

ក្រោយពីបានស្រាវជ្រាវលើករណីកកឈាមបន្ទាប់ពីបានចាក់វ៉ាក់សាំង គណៈកម្មការសុវត្ថិភាពរបស់ស្ថាប័នគ្រប់គ្រងឱសថអឺរ៉ុប (EMA) កាលពីថ្ងៃទី20 ខែមេសា បានសម្រេចថា «ការព្រមានអំពីបញ្ហាកកឈាមខុសធម្មតា និងបរិមាណប្លាកែតក្នុងឈាមមានកម្រិតទាប គួរតែត្រូវបានបន្ថែមទៅក្នុងព័ត៌មាននៃផលិតផល» របស់វ៉ាក់សាំង Johnson & Johnson។ EMA យល់ថា គួរតែបន្តប្រើប្រាស់វ៉ាក់សាំង Johnson & Johnson ព្រោះថា វាមានផលប្រយោជន៍ច្រើនជាងផលវិបាក។

ពិភពលោក បច្ចុប្បន្នមានអ្នកឆ្លងវីរុសCovid-19 សរុបចំនួន 145,315,026នាក់ ក្នុងនោះមាន 3,084,441នាក់បានស្លាប់, 123,302,909នាក់បានជាសះស្បើយ និង 18,927,676នាក់កំពុងព្យាបាល។ នេះបើតាមគេហទំព័រ Worldometers៕

ប្រភព៖ AFP, CNN
ប្រែសម្រួល៖ បុត្រា

April 23, 2021

នាវាមុជទឹកឥណ្ឌូនេស៊ីដែលកំពុងបាត់ខ្លួន នៅសល់អុកស៊ីសែន ប្រហែល 70ម៉ោងទៀតប៉ុណ្ណោះ

សារព័ត៌មាន CNN (អាមេរិក) ដកស្រង់សម្ដីរបស់ឧត្តមនាវី Yudo Margono អគ្គមេបញ្ជាការកងទ័ពជើងទឹកឥណ្ឌូនេស៊ី បានឱ្យដឹងដោយយោងទៅលើការគណនាដែលរាប់ចាប់ពីដំណាក់កាលនៅមានទំនាក់ទំនងនាថ្ងៃទី21 ខែមេសាថា នាវាមុជទឹកដែលកំពុងបាត់ខ្លួននោះ នៅមានអុកស៊ីសែនដែលអាចឱ្យក្រុមនាវិកដកដង្ហើមបានត្រឹមតែ 72ម៉ោងទៀតប៉ុណ្ណោះ។

នាវាមុជទឹកផលិតនៅប្រទេសអាល្លឺម៉ង់ KRI Nanggala-402 ត្រូវបានអនុញ្ញាតឱ្យមុជចូលក្នុងទឹកលើកចុងក្រោយ នៅវេលាម៉ោង15 នៃថ្ងៃទី21 ខែមេសា ហើយក្រោយមកក៏បានដាច់ទំនាក់ទំនងជាមួយនឹងក្រុមការងារនៅលើគោក។ ឧត្តមនាវី Margono បានបង្ហើបឱ្យដឹងថា ពេលនោះ KRI Nanggala-402 ទើបតែបានបាញ់មីស៊ីលទឹកចំនួនពីរគ្រាប់ នៅក្នុងសមយុទ្ធក្នុងសមុទ្រ Bali ត្រង់ចន្លោះសមុទ្រ Bali និងមហាសមុទ្រឥណ្ឌា។

លោក Margono បន្ថែមថា កងទ័ពជើងទឹកបានឃើញរលកសញ្ញានៃវត្ថុមួយដែលស្ថិតនៅជម្រៅប្រមាណពី 50-100ម៉ែត្រក្រោមទឹកសមុទ្រ និងមានដែនម៉ាញេទិច ដែលនេះទំនងជាបានជះចេញពីនាវាមុជទឹកដែលកំពុងបាត់ខ្លួន។

នាវាមុជទឹក KRI Nanggala-402 ដែលមានទម្ងន់ 1,395តោន ដែលកំពុងជួបគ្រោះថ្នាក់នេះ ត្រូវបានដាក់ឱ្យប្រើប្រាស់នៅក្នុងជួរកងទ័ពឥណ្ឌូនេស៊ី ចាប់ពីឆ្នាំ1981៕

ប្រភព៖ CNN
ប្រែសម្រួល៖ បុត្រា

April 22, 2021

“អុកស៊ីហ្ស៊ែនបែកធ្លាយ” ធ្វើឱ្យអ្នកជំងឺកូវីដ នៅប្រទេសឥណ្ឌា ស្លាប់ 22នាក់ ខណៈកូវីដកំពុងឆ្លងខ្លាំង ស្លាប់គរជើង និងរៀបចំបូជាបែបសាមញ្ញៗ

មានអ្នកជំងឺយ៉ាងតិច 22នាក់ បានស្លាប់កាលពីថ្ងៃពុធ (ទី21មេសា) ក្នុងមន្ទីរពេទ្យមួយ ស្ថិតនៅភាគខាងលិចនៃប្រទេសឥណ្ឌា បណ្ដាលមកពីការចែកចាយខ្យល់អុកស៊ីហ្ស៊ែនក្នុងប្រព័ន្ធម៉ាស៊ីនជួយការដកដង្ហើមរបស់ពួកគេ កើតការរអាក់រអួល ក្រោយពីធុងផ្ទុកខ្យល់អុកស៊ីហ្ស៊ែន បានបែកធ្លាយ។ លោករដ្ឋមន្ត្រីក្រសួងសុខាភិបាល បានថ្លែងថា ខណៈដែលប្រទេសឥណ្ឌាកំពុងជួបនឹងវិបត្តិ ចំនួនអ្នកស្លាប់ដោយសារកូវីដ-19 ប្រចាំថ្ងៃ ហក់ឡើងខ្ពស់ដល់ជាង 2,000នាក់ជាលើកដំបូង និងករណីឆ្លងថ្មី ក៏កើនឡើង 1ថ្ងៃជិត 300,000នាក់ដែរនោះ បានធ្វើឱ្យមន្ទីរពេទ្យទូទាំងប្រទេស ប្រឈមនឹងបញ្ហាខ្វះខាតខ្យល់អុកស៊ីហ្ស៊ែន។

ហេតុការណ៍អ្នកជំងឺស្លាប់ 22នាក់នេះ កើតឡើងនៅឯទីក្រុងណាស៊ីក ជាទីតាំងមួយក្នុងចំណោមតំបន់ដែលជំងឺកូវីដ-19 កំពុងរាតត្បាតយ៉ាងខ្លាំងនៅក្នុងប្រទេសឥណ្ឌា ដោយអ្នកជំងឺទាំងនោះ កំពុងប្រើឧបករណ៍ម៉ាស៊ីនជួយការដកដង្ហើមនៅក្នុងមន្ទីរពេទ្យមួយ ហើយធុងផ្ទុកអុកស៊ីហ្ស៊ែន បានកើតការបែកធ្លាយ។ លោក រ៉ាឆេត តូប៉េ រដ្ឋមន្ត្រីក្រសួងសុខាភិបាល របស់រដ្ឋរ៉ាស្ត្រារៈ ដែលជារដ្ឋមួយមានបានធូរធារបំផុតរបស់ប្រទេសឥណ្ឌា និងជាមូលដ្ឋានរបស់ទីក្រុងនោះ បានថ្លែងឱ្យដឹង។

សោកនាដកម្មក្នុងគ្រានេះ ជាការដាក់បន្ទុកបន្ថែមពីលើសេចក្ដីទុក្ខលំបាកចំពោះប្រទេសឥណ្ឌា ប្រទេសដែលមានប្រជាជន 1,300លាននាក់ ដែលកំពុងប្រឈមនឹងការឆ្លងរាលដាលរបស់វីរុសកូរ៉ូណា រលកទី2 ដែលលោកនាយករដ្ឋមន្ត្រី ណារិនដ្រា ម៉ូឌី ប្រាប់ថា “ឆាប់រហ័ស និងធ្ងន់ធ្ងរដូចព្យុះសង្ឃរា” និងកំពុងសាងបន្ទុកធ្ងន់ធ្ងរ ដល់មន្ទីរពេទ្យទូទាំងប្រទេស។

ក្រសួងសុខាភិបាលរបស់ប្រទេសឥណ្ឌា បានរាយការណ៍កាលពីថ្ងៃពុធ ទី21 មេសាថា ក្នុងជុំ 24ម៉ោង ដែលកន្លងទៅ មានមនុស្សស្លាប់ក្នុងចំនួនខ្ពស់បំផុត 2,023នាក់ ចំណែកអ្នកឆ្លងមេរោគ មាន 295,000នាក់ ជិតស្មើនឹងស្ថិតិរបស់សហរដ្ឋអាមេរិក ក្នុងអំឡុងពេលដែលកូវីដឆ្លងរាលដាលខ្លាំងនៅទីនោះ កាលពីខែមករា ខណៈដែលមន្ទីរពេទ្យទូទាំងប្រទេស មានរបាយការណ៍ អំពីការខ្វះខាតអុកស៊ីហ្ស៊ែន។

ទោះជា ឥណ្ឌា ជាប្រទេសដែលល្បីឈ្មោះថា ជាប្រទេសអ្នកផលិតវ៉ាក់សាំងធំជាងគេរបស់ពិភពលោក រួមទាំងរដ្ឋបាល ក៏បានបញ្ជាឱ្យផ្អាកការនាំចេញវ៉ាក់សាំងអ៊ែស្ត្រាហ្សេនេកា ដើម្បីរក្សាទុកប្រយុទ្ធប្រឆាំងនឹងការរាលរាលរបស់វីរុសកូរ៉ូណារលកទី2 ផងក្ដី តែពេលនេះ ឥណ្ឌា ទើបតែចាក់វ៉ាក់សាំងឱ្យប្រជាជនបានជាង 130លានដូសប៉ុណ្ណោះ ហើយដើម្បីពន្លឿនដំណើរការរឿងនេះ ឱ្យកាន់តែឆាប់រហ័សឡើង រដ្ឋបាលបានប្រកាសថា ចាប់ពីថ្ងៃទី1 ឧសភា តទៅ ប្រជាជនវ័យចំណាស់គ្រប់រូប មានសិទ្ធិចូលទទួលការចាក់វ៉ាក់សាំងទាំងអស់៕

មន្ត្រីសុខភាពសាធារណៈ និងសាច់ញាតិ ដែលសុទ្ធតែស្លៀកឈុត និងឧបករណ៍ការពារផ្ទាល់ខ្លួន នាំគ្នាលើកសាកសពបុរសម្នាក់ ដែលស្លាប់ដោយជំងឺកូវីដ-19 មានដាក់ទៅលើទីបូជាសព ក្នុងទីក្រុងនីវដេលី កាលពីថ្ងៃពុធ ទី21 មេសា

សាច់ញាតិស្លៀកឈុត និងឧបករណ៍ការពារផ្ទាល់ខ្លួន ចូលរួមពិធីបូជាសព

សភាពរបស់ឈាបនដ្ឋានមួយ នៅក្នុងទីក្រុងនីវដេលី ទីក្រុងធំរបស់ប្រទេសឥណ្ឌា កាលពីថ្ងៃពុធ អាចមើលឃើញគំនរអុសដែលកំពុងឆេះ ដើម្បីបូជាសាកសព ដែលស្លាប់ដោយសារជំងឺកូវីដ-19

ញាតិមិត្ត ដែលស្លៀកឈុត និងឧបករណ៍ការពារផ្ទាល់ខ្លួន (PPE) សម្ដែងក្ដីសោកសៅស្ដាយស្រណោះចំពោះអ្នកស្លាប់ដោយសារជំងឺកូវីដ-19 នៅឯកន្លែងបូជាសព ក្នុងទីក្រុងនីវដេលី កាលពីថ្ងៃពុធ ទី21 មេសា

ក្រុមអ្នកជំងឺ ដែលកំពុងពាក់ម៉ាស់អុកស៊ីហ្ស៊ែន ត្រូវបានចល័តចេញទីកាន់មន្ទីរពេទ្យ 1ទៀត ក្នុងទីក្រុង អាមេដាបាត់ ប្រទេសឥណ្ឌា នៅថ្ងៃពុធ ទី21 មេសា

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 22, 2021

ជប៉ុន ប្រាប់ថា ត្រូវភ្នាក់ងារសម្ងាត់ “កងទ័ពចិន” ចោះចូលប្រព័ន្ធកុំព្យូទ័រ

ប៉ូលិសជប៉ុន កំពុងបើកការស៊ើបអង្កេត ករណីការវាយប្រហារខាង Cyber ទៅលើអង្គភាព និងក្រុមហ៊ុនជិត 200កន្លែងនៅក្នុងប្រទេសជប៉ុន ដោយសង្ស័យថា ជាស្នាដៃរបស់ក្រុម Hacker ដែលពាក់ព័ន្ធនឹងកងទ័ពចិន។

អង្គភាពសំខាន់ៗរបស់រដ្ឋបាលជប៉ុន ដែលត្រូវហ៊ែកឃើរ ដែលគេសង្ស័យថា ជាសមាជិករបស់បក្សកុម្មុយនីស្តចិន ចោះចូលទិន្នន័យនោះ មានដូចជា ស្ថាប័នត្រួតពិនិត្យនៃប្រទេសជប៉ុន, ក្រុមហ៊ុន Mitsubishi Electronic ដែលមានគ្រោងការពាក់ព័ន្ធនឹងកិច្ចការការពារជាតិ, មហាវិទ្យាល័យ ខេអូ រួមទាំងស្ថាប័នស្រាវជ្រាវកម្រិតខ្ពស់ជាច្រើនកន្លែងរបស់ប្រទេសជប៉ុនទៀតផង។

ទីភ្នាក់ងារត្រួតពិនិត្យអវកាសនៃប្រទេសជប៉ុន ទទួលស្គាល់ថា ប្រព័ន្ធកុំព្យូទ័រ ត្រូវបានលបលួចចោះចូលកាលពីឆ្នាំ2016 តែមិនបានបង្ហើបឱ្យដឹងថា តើមានទិន្នន័យបែកធ្លាយចេញ ឬត្រូវបានកែច្នៃប៉ុនណានោះទេ។

ប្រតិបត្តិការវាយប្រហារខាង Cyber នេះ ដំណើរការដោយក្រុម Hacker ដែលប្រើឈ្មោះថា Tick ដែលស្ថិតនៅក្រោមការបង្គាប់បញ្ជាដោយផ្ទាល់របស់កងទ័ពចិន។

ប៉ូលិសជប៉ុន បានកំណត់មុខសញ្ញាវិស្វករកុំព្យូទ័រជនជាតិចិនម្នាក់ ដែលបានប្រើប្រាស់លេខសម្ងាត់ប្រចាំខ្លួនក្លែងក្លាយ ដើម្បីចូលទៅក្នុងប្រព័ន្ធកុំព្យូទ័ររបស់ស្ថាប័នជាច្រើននៅក្នុងប្រទេសជប៉ុន។ បុរសចិន វ័យ ៣០ឆ្នាំរូបនេះ ត្រូវបានគេសង្ស័យថា ធ្លាប់លបលួចចូលប្រើ Server ជាច្រើនកន្លែង ដោយប្រើឈ្មោះក្លែងក្លាយផ្សេងៗគ្នា និងបានបញ្ជូនទិន្នន័យពី Server ទាំងនោះទៅកាន់ក្រុមហ៊ែកឃើរ “Tick”។

ក្រៅពីនេះ នៅបានរកឃើញទៀតថា មាននិស្សិតចិនម្នាក់ ដែលបានជួល Server ជាច្រើន Server នៅក្នុងប្រទេសជប៉ុន ដោយប្រើលិខិតឆ្លងដែនក្លែងក្លាយ ដើម្បីបង្ហាញអត្តសញ្ញាណខ្លួន និងតាមរយៈការស៊ើបអង្កេត គេបានរកឃើញថា និស្សិតម្នាក់នេះ មានពាក់ព័ន្ធជាមួយកងទ័ពចិន។

ខណៈនេះ បុរសវិស្វករ និងនិស្សិតចិនរូបនោះ បានធ្វើដំណើរចាកចេញពីប្រទេសជប៉ុនហើយ។

កងទ័ពចិន មានអង្គភាពដែលប្រើលេខសម្ងាត់ថា 61419 មានមូលដ្ឋាននៅទីក្រុងឈិងតៅ មណ្ឌលសានតុង ប្រទេសចិន ត្រូវបានគេសង្ស័យថា ជាអង្គភាពដែលទទួលខុសត្រូវ ផ្នែកវាយប្រហារខាង Cyber របស់ប្រទេសជប៉ុន និងកូរ៉េខាងត្បូង។

លោក ខាត់ស៊ឺណូប៊ុ ខាតូ អគ្គលេខាធិការទីស្ដីការគណៈរដ្ឋមន្ត្រីជប៉ុន បាននិយាយអំពីរឿងនេះ ដោយមិនបានបញ្ជាក់ថា ជាស្នាដៃរបស់អ្នកណា ថា “ការវាយប្រហារខាង Cyber ចំពោះអង្គភាពរាជការ និងគ្រោងសាងមូលដ្ឋានគ្រឹះផ្សេងៗនេះ មានការរៀបចំស្ថាប័ន និងមានភាពទំនើបទាន់សម័យកាន់តែខ្លាំងឡើង រដ្ឋបាលជប៉ុន នឹងផ្ដល់ភាពសំខាន់លើរឿងនេះ ដើម្បីទប់ទល់នឹងការវាយប្រហារទាំងនោះ”៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 22, 2021

ប្រមុខហ្វ៊ីលីពីន ប្រកាស “អាចមានការបង្ហូរឈាម” ត្រៀមបញ្ជូននាវាចម្បាំង តតាំងកប៉ាល់ចិន 240គ្រឿង

កាលពីថ្ងៃទី20 មេសា ទីភ្នាក់ងារព័ត៌មាន South China Morning Post បានរាយការណ៍អំពីសម្ព័ន្ធភាពរវាងប្រទេសចិន និងហ្វ៊ីលីពីន ដែលកំពុងតានតឹងឡើងជាថ្មីម្ដងទៀត ក្រោយពីលោកប្រធានាធិបតី រ៉ូឌ្រីកូ ឌូតឺតេ នៃប្រទេសហ្វ៊ីលីពីន បានថ្លែងថា នឹងបញ្ជូននាវាចម្បាំង ទៅតតាំងនឹងកងនាវាចិនប្រមាណជា 240គ្រឿង ដែលចតត្រាំ មិនព្រមទៅណា នៅក្នុងតំបន់សេដ្ឋកិច្ចពិសេសរបស់ហ្វ៊ីលីពីន ក្នុងដែនទឹកសមុទ្រចិនខាងត្បូង តាំងពីខែមីនាកន្លងទៅ ទោះជាអាជ្ញាធរហ្វ៊ីលីពីនទាមទារឱ្យដកកងនាវាទាំងនោះចេញ ជាច្រើនដងហើយក៏ដោយ តែប្រទេសចិន បែរជាអះអាងថា វាគ្រាន់តែជាកប៉ាលនេសាទ និងមានមូលហេតុចាំបាច់ ត្រូវចតបណ្ដែតខ្លួននៅក្នុងបរិវេណនោះសិន។

“បើយើងទៅទីនោះ ដើម្បីអះអាងពីតំបន់ក្នុងអំណាចតុលាការរបស់យើង វានឹងមានការបង្ហូរឈាមគ្នា… ពេលនេះ ខ្ញុំមិនបានចាប់អារម្មណ៍រឿងការនេសាទប៉ុន្មានទេ ខ្ញុំមិនគិតថា វាមានត្រីច្រើន ដល់ថ្នាក់មកឈ្លោះគ្នានោះទេ” លោកឌូតឺតេ ថ្លែងបានបែបនេះ ក្នុងខណៈធ្វើសេចក្ដីថ្លែងព័ត៌មាន តាមស្ថានីយទូរទស្សន៍ កាលពីព្រលប់ថ្ងៃចន្ទ ទី19មេសា។

ហើយលោកបានបន្តទៀតថា បើសិនជាអនាគត មានជម្លោះវិវាទពាក់ព័ន្ធនឹងធនធានធម្មជាតិខាងសមុទ្រ លោកនឹងបញ្ជូននាវារបស់អង្គភាពសន្តិសុខព្រំដែនសមុទ្រ ចេញទៅ ៥គ្រឿង “ពួកគេអាចដេញតាមប្រមាញ់… ពួកគេនឹងលេងដោយខ្លួនឯង ប៉ុណ្ណឹងក៏បានណាស់ទៅហើយ ហើយចាំមើលមើល៍ថា តើអ្នកណាខ្លាំងជាងអ្នកណា? តែពេលណាដែលយើងចាប់ផ្ដើមការជីកខួង ពេលយើងចាប់ផ្ដើមបាន អ្វីក៏ដោយដែលនៅក្រោមសមុទ្រចិន ដូចជាប្រេងរបស់យើង ដល់ពេលនោះ ខ្ញុំនឹងបញ្ជូននាវាពណ៌ប្រផេះ ទៅទីនោះ ដើម្បីទាមទារសិទ្ធិដែលយើងមាន”

បើពួកគេ ចាប់ផ្ដើមចោះខួងប្រេងនៅទីនោះ ខ្ញុំនឹងសួររដ្ឋបាលចិនថា តើទីនោះ វាជាចំណែកមួយក្នុងកិច្ចព្រមព្រៀងរបស់យើងដែរឬទេ? បើមិនមែនកិច្ចព្រមព្រៀង ខ្ញុំក៏នឹងចោះខួងយកប្រេងនៅទីនោះដែរ បើពួកគេបានប្រេងនោះ ក៏ប្រហែលជាដល់ពេលហើយ ដែលយើងគួរតែចាប់ផ្ដើមដូចគ្នា។ លោកឌូតឺតេ បានបញ្ជាក់បែបនេះ៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 22, 2021

ឥណ្ឌា៖ លក់វ៉ាក់សាំង AstraZeneca ក្នុងតម្លៃ 400រូពី/ដូស ខណៈអ្នកស្លាប់ដោយសារ Covid-19 កើនដល់ជាង 3,071,580នាក់

កាលពីថ្ងៃទី21 ខែមេសាកន្លងទៅ វិទ្យាស្ថាន Serum របស់ឥណ្ឌា (Serum Institute of India) បានប្រកាស ថា នឹងលក់វ៉ាក់សាំង AstraZeneca (ឈ្មោះ COVISHIELD ផលិតនៅឥណ្ឌា) បង្ការវីរុសCovid-19 ទៅឱ្យរដ្ឋាភិបាលនានា ក្នុងតម្លៃ 400រូពី (ស្មើនឹង 5.3ដុល្លារ) ក្នុងមួយដូស ខណៈដែលតម្លៃលក់ទៅឱ្យមន្ទីរពេទ្យឯកជន គឺ 600រូពី (ស្មើនឹង 7.95ដុល្លារ) ក្នុងមួយដូស។

សេចក្ដីប្រកាសរបស់វិទ្យាស្ថាន Serum បានបញ្ជាក់ថា៖ «ដោយសារភាពស្មុគស្មាញ និងចាំបាច់បន្ទាន់នៃស្ថានការណ៍ ការផ្គត់ផ្គង់វ៉ាក់សាំងដោយឡែកសម្រាប់ក្រុមហ៊ុននានាគឺជារឿងលំបាក។ យើងជំរុញឱ្យក្រុមហ៊ុន និងបុគ្គលនានា ប្រើប្រាស់វ៉ាក់សាំងតាមរយៈស្ថាប័នរដ្ឋាភិបាល និងប្រព័ន្ធសុខាភិបាលឯកជន»។

ទន្ទឹមនឹងនេះ វិទ្យាស្ថានខាងលើ ក៏បានឱ្យដឹងថា ចាប់ពីខែកក្កដា ឆ្នាំ2021 តទៅ ឥណ្ឌាអាចចាប់ផ្ដើមបង្កើនផលិតភាពនៃការផលិតវ៉ាក់សាំង COVISHIELD ឡើងដល់100ដូស/ខែ ដែលច្រើនជាបច្ចុប្បន្នប្រមាណពី 60-70ដូស/ខែ។ ក៏ប៉ុន្តែ ដំណាក់កាលនៃការបង្កើនផលិតភាពនេះ យឺតយ៉ាវជាងពីរខែ បើធៀបនឹងពេលវេលាដែលបានគ្រោងទុកកាលពីដំបូង។

នៅទូទាំងពិភពលោក បច្ចុប្បន្ន មានអ្នកឆ្លង Covid-19 សរុបចំនួន 144,430,477នាក់ ក្នុងនោះមាន 3,071,589នាក់បានស្លាប់, 122,605,010នាក់បានជាសះស្បើយ និង 18,753,878នាក់កំពុងព្យាបាល ក្នុងនោះដែរក៏មានអ្នកជំងឺប្រមាណ 109,845នាក់អាចបាត់បង់ជីវិត ដោយសារតែមានអាការធ្ងន់ធ្ងរ៕

ប្រភព៖ វិទ្យាស្ថាន Serum
ប្រែសម្រួល៖ បុត្រា

April 22, 2021

Category: អន្តរជាតិ