អន្តរជាតិ - La Reine Media

រងសម្ពាធខ្លាំង!! អាមេរិក ត្រៀមចែករំលែកវ៉ាក់សាំង “AstraZeneca” 60លានដូស ឱ្យទូទាំងពិភពលោក

សហរដ្ឋអាមេរិក នឹងចាប់ផ្ដើមចែករំលែកវ៉ាក់សាំងប្រឆាំងកូវីដ-19របស់ AstraZeneca ច្រើនបំផុត ចំនួន 60លានដូស ឱ្យទៅប្រទេសផ្សេងៗទូទាំងពិភពលោក យ៉ាងលឿនបំផុតក្នុងប៉ុន្មានសប្ដាហ៍ខាងមុខនេះ ក្រោមការកៀបសង្កត់ បង្ខំឱ្យចែករំលែកវ៉ាក់សាំងទៅឱ្យប្រទេសឥណ្ឌា និងប្រទេសផ្សេងៗ ដែលរងផលប៉ះពាល់យ៉ាងធ្ងន់ធ្ងរ។ នេះបើតាមការឱ្យដឹងពីមន្ទីរសេតវិមានកាលពីថ្ងៃចន្ទ ទី26 មេសា។

លោកស្រី ជេន សាគី អ្នកនាំពាក្យមន្ទីរសេតវិមាន បានប្រាប់ឱ្យដឹងថា សហរដ្ឋអាមេរិក នឹងបញ្ចេញវ៉ាក់សាំងទៅឱ្យប្រទេសផ្សេងៗ នៅពេលដែលវ៉ាក់សាំងទាំងនោះ មានគ្រប់គ្រាន់ ដោយលោកស្រីបញ្ជាក់ថា ប្រហែលជាមានវ៉ាក់សាំងអ៊ែស្ត្រាហ្សេនេកា ដែលត្រៀមរួចជាស្រេច សម្រាប់ការបញ្ជូនចេញ ប្រមាណជា 10លានដូស ក្នុងប៉ុន្មានសប្ដាហ៍ខាងមុខ ចំណែកប្រមាណជា 60លានដូសទៀតនោះ ពេលនេះកំពុងស្ថិតក្នុងដំណាក់កាលការផលិត និងប្រហែលជានឹងបញ្ជូនចេញបាន ក្នុងខែឧសភា និងមិថុនា។

“ពេលនេះយើងគ្មានវ៉ាក់សាំងរបស់អ៊ែស្ត្រាហ្សេនេកា នៅក្នុងដៃឡើយ” លោកស្រីសាគី បានថ្លែងបែបនេះ ព្រមទាំងបញ្ជាក់ថា គណៈអ្នកគ្រប់គ្រងច្បាប់សហរដ្ឋអាមេរិក ចាំបាច់ត្រូវពិនិត្យមើលឡើងវិញអំពីគុណភាពរបស់វ៉ាក់សាំង ដែលផលិតចេញមកទាំងនោះផងដែរ។

លោកស្រីសាគី បានថ្លែងបន្តថា រដ្ឋបាលរបស់លោកប្រធានាធិបតី ចូ បៃដិន កំពុងស្ថិតក្នុងការសម្រេចចិត្តថា តើនឹងបែងចែកវ៉ាក់សាំងទៅឱ្យប្រទេសណាខ្លះ និងច្រើនតិចប៉ុនណា? លោកស្រីថ្លែងថា “យើងនឹងពិចារណាជម្រើសផ្សេងៗ ពីប្រទេសសម្ព័ន្ធមិត្តរបស់យើង និងប្រាកដណាស់ យើងយល់ថា វានឹងឆ្លងកាត់សម្ព័ន្ធភាពដោយផ្ទាល់”

បច្ចុប្បន្ន វ៉ាក់សាំងរបស់អ៊ែស្ត្រាហ្សេនេកា មិនទាន់បានទទួលការអនុម័តពីគណៈកម្មការអាហារ និងថ្នាំរបស់សហរដ្ឋអាមេរិកនៅឡើយ សម្រាប់ប្រើក្នុងករណីអាសន្ន។

កាលពីខែមីនា រដ្ឋបាលរបស់លោកបៃដិន ធ្លាប់បានប្រាប់ថា នឹងបញ្ជូនវ៉ាក់សាំងអ៊ែស្ត្រាហ្សេនេកា ប្រមាណជា 4លានដូស ទៅឱ្យប្រទេសកាណាដា និងមិកស៊ិក និងពេលនេះ កំពុងស្ថិតក្រោមសម្ពាធ បង្ខំឱ្យបែងចែកវ៉ាក់សាំងដែលមាននៅក្នុងស្តុក ទៅឱ្យប្រទេសឥណ្ឌា និងប្រទេសផ្សេងៗបន្ថែមទៀត។

ក្រុមអ្នករិះគន់ បានចោទរដ្ឋបាលសហរដ្ឋអាមេរិកថា បានប្រមូលទុកវ៉ាក់សាំង ក្នុងខណៈដែលប្រទេសដទៃ កំពុងរើបម្រះយ៉ាងខ្លាំងក្លា ដើម្បីឱ្យបានវ៉ាក់សាំង ដែលមានភាពចាំបាច់បំផុតសម្រាប់ប្រទេសទាំងនោះ។

ប្រទេសឥណ្ឌា កំពុងក្លាយជាមជ្ឈមណ្ឌលកណ្ដាលថ្មីក្រោយគេរបស់ជំងឺរាតត្បាតដ៏ធំនេះ ដែលកំពុងប្រឈម ធ្វើឱ្យប្រព័ន្ធសុខភាពសាធារណៈរបស់ប្រទេសឈានទៅរកសភាវដួលរលំ។

អ្នកនាំពាក្យរបស់ក្រុមហ៊ុនអ៊ែស្ត្រាហ្សេនេកា មិនបានសម្ដែងការយល់ឃើញយ៉ាងត្រង់ៗចំពោះពាក្យថ្លែងការណ៍របស់សហរដ្ឋអាមេរិកនោះទេ តែបានប្រាប់ថា “ការសម្រេចចិត្តបញ្ជូនស្តុកវ៉ាក់សាំងរបស់សហរដ្ឋអាមេរិក ទៅកាន់ប្រទេសផ្សេងៗនោះ គឺជាការសម្រេចចិត្តដោយរដ្ឋាភិបាលសហរដ្ឋអាមេរិក”

កាលពីថ្ងៃចន្ទ ទី26 មេសា ទីភ្នាក់ងារព័ត៌មាន AP បានរាយការណ៍ថា នឹងមានការបែងចែកវ៉ាក់សាំងក្នុងប៉ុន្មានសប្ដាហ៍ខាងមុខ បន្ទាប់ពីបានទទួលភ្លើងបៃតង ពីការិយាល័យគណៈកម្មការអាហារ និងថ្នាំរបស់សហរដ្ឋអាមេរិករួចហើយ៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 27, 2021

(វីដេអូ)-ក្រុមនាវិកឥណ្ឌូនេស៊ី ច្រៀងចម្រៀងលាគ្នា មុនពេលនាវាមុជទឹកជួបគ្រោះថ្នាក់

វីដេអូខ្លីមួយដែលបង្ហាញអំពីសកម្មភាពច្រៀងចម្រៀងរួមគ្នារបស់ក្រុមនាវិកនៃនាវាមុជទឹក KRI Nanggala នាំឱ្យមនុស្សជាច្រើនមានការសោកស្ដាយ និងអាណិតអាសូរចំពោះពួកគេ។

វីដេអូនេះត្រូវបានថតមុនពេល KRI Nanggala 402 ជួបគ្រោះថ្នាក់ និងបានបង្ហាញថា សមាជិកមួយចំនួននៃក្រុមនាវិកចំនួន 53 ច្រៀងចម្រៀង «Sampai Jumpa» ជាបទចម្រៀងដែលល្បីល្បាញនៅប្រទេសឥណ្ឌូនេស៊ី ដែលវាមានន័យថា «លាយហើយ»។ Heri Oktavian ដែលជាមេបញ្ជាការ និងនាវិកជាច្រើនរូប កំពុងឈរ និងអង្គុយជុំវិញអ្នកដេញហ្គីតា។

«បើទោះជាខ្ញុំមិនបានត្រៀមខ្លួនជាស្រេចដើម្បីចងចាំ ហើយក៏មិនបានត្រៀមដើម្បីរស់ដោយគ្មានរូបអូន សូមបួងសួងឱ្យអូនជួបតែប្រការល្អៗបំផុត» ចម្រៀងនេះ មានឃ្លាច្រៀងដូច្នេះ។

អ្នកនាំពាក្យរបស់កងទ័ពឥណ្ឌូនេស៊ី Djawara Whimbo បាននិយាយថា វីដេអូ និងសកម្មភាពនេះ ត្រូវបានធ្វើឡើងដូចជាការលាគ្នាសម្រាប់មេបញ្ជាការ ដែលជិតអស់អាណត្តិនៃកងកម្លាំងនាវាមុជទឹករបស់ឥណ្ឌូនេស៊ី។ មេបញ្ជាការថ្មី បានចូលមកកាន់តំណែងនេះ កាលពីដើមខែមីនា ឆ្នាំ2021។

នាវាមុជទឹក KRI Nanggala បានទាក់ទងលើកចុងក្រោយទៅកាន់ទីបញ្ជាការនៅវេលាម៉ោង 3ព្រឹក ថ្ងៃទី21 ខែមេសា និងបានដាច់ទំនាក់ទំនងទាំងស្រុងចាប់ពីម៉ោង 4 និង30នាទី។ សាកសពនាវាដែលបានបែកជាបួនចំណែកធំៗ ត្រូវបានរកឃើញកាលពីថ្ងៃទី25 ខែមេសា និងកំពុងស្ថិតនៅបាទសមុទ្រ Bali។ ក្រុមនាវិកដែលមានសមាជិកចំនួន 53នាក់ ត្រូវបានប្រកាសថា បានបាត់បង់ជីវិត។

ក្រុមមន្ត្រីឥណ្ឌូនេស៊ី មិនទាន់កំណត់បានមូលហេតុសំខាន់ទាក់ទិននឹងឧបទ្ទវហេតុនេះ ប៉ុន្តែ យល់ថា នាវានេះទំនងជាបានជួបបញ្ហាដាច់ភ្លើង បណ្ដាលឱ្យក្រុមនាវិកមិនអាចបញ្ជាឱ្យនាវាផុសឡើងលើផ្ទៃទឹក។ Hadi Tjahjanto មេបញ្ជាការកងទ័ពឥណ្ឌូនេស៊ី បានឱ្យដឹងថា មិនមានករណីផ្ទុះណាមួយកើតឡើងនោះទេ នៅក្នុងអំឡុងពេលនាវាត្រូវលិច។

មេបញ្ជាកងទ័ពជើងទឹកឥណ្ដូនេស៊ី លោក Yudo Margono ច្រានចោលបញ្ហាកំហុសរបស់មនុស្ស ដោយនិយាយថា ដំណើរការដ៏ត្រឹមត្រូវ ត្រូវបានធ្វើឡើងនៅពេលនាវាចេញប្រតិបត្តិការ៕

ប្រភព៖ AFP
ប្រែសម្រួល៖ បុត្រា

April 27, 2021

ប្រទេសមហាអំណាច ចំណាយថវិកាខាងយោធាកើនឡើង ទោះពិភពលោកកំពុងមានជំងឺរាតត្បាត

ថវិកាខាងយោធារបស់ពិភពលោក បានកើនឡើងដល់ជិត 2លានលានដុល្លារអាមេរិក កាលពីឆ្នាំកន្លងទៅ ផ្ទុយគ្នាស្រឡះពីខាងវិបត្តិសេដ្ឋកិច្ច ដែលជាផលប៉ះពាល់ពីស្ថានការណ៍ជំងឺរាតត្បាតកូវីដ-19។

ទីភ្នាក់ងារព័ត៌មានអន្តរជាតិ បានរាយការណ៍ពីទីក្រុងស្តុកហូម ប្រទេសស៊ុយអែត នៅថ្ងៃទី26 មេសា ថា សេចក្ដីរាយការណ៍ដោយស្ថាប័នស្រាវជ្រាវសន្តិភាពអន្តរជាតិស្តុកហូម ពាក់ព័ន្ធនឹងការចាយវាយខាងយោធាទូទាំងពិភពលោកកាលពីឆ្នាំ2020 បានកើនឡើង 2.6% ពីស្ថិតិកាលពីឆ្នាំមុន ឬ 1,981លានដុល្លារអាមេរិក ទៅជាជិត 2លានលានដុល្លារអាមេរិក ផ្ទុយគ្នាស្រឡះពី GDP ទូទាំងពិភពលោក ដែលជាមធ្យមថយចុះ 4.4% កាលពីឆ្នាំទៅ ដោយសារតែវិបត្តិកូវីដ-19។

ទាំងអស់នេះ លោក ឌីអេហ្គោ ឡូប៉េហ្ស ដា ស៊ីលវ៉ា អ្នករៀបចំធ្វើរបាយការណ៍ម្នាក់ បានទទួលស្គាល់ថា តួលេខការចំណាយដែលចេញមក “ហួសពីការនឹកស្មាន” និងអាចធ្វើឱ្យក្រុមអ្នករៀបចំធ្វើរបាយការណ៍ សរុបបានថា វិបត្តិការឆ្លងរាលដាលរបស់កូវីដ-19 “ស្ទើរតែគ្មានផលប៉ះពាល់អ្វីឡើយ” ចំពោះការដំណើរការនយោបាយខាងយោធារបស់ប្រទេសជាច្រើន ជាពិសេសបណ្ដាប្រទេសមហាអំណាច។

សហរដ្ឋអាមេរិក និងប្រទេសចិន ជាប្រទេសមហាអំណាចខាងយោធាលំដាប់លេខ1 និង2 របស់ពិភពលោក នៅតែជាប្រទេស2 ដែលមានការចំណាយខាងយោធាច្រើនបំផុត ដោយនៅក្នុងចំណែករបស់សហរដ្ឋអាមេរិក មានចំណែកគិតជាភាគរយ 39% តាមដោយប្រទេសចិន មានចំណែក 13% តែយ៉ាងណាក្ដី នៅពេលវិភាគស៊ីជម្រៅក្នុងសេចក្ដីលម្អិត គេបានរកឃើញថា ទោះជាថវិកាខាងយោធារបស់ប្រទេសចិន នៅតែជាតួលេខ តិចជាងខាងសហរដ្ឋអាមេរិកច្រើនក៏ដោយ តែចំពោះចំនួនទឹកប្រាក់វិញ បានកើនឡើងជាបន្តបន្ទាប់រហូតរយៈពេលពេល 26ឆ្នាំកន្លងមក រហូតមកនៅត្រឹម 252,000លានដុល្លារអាមេរិក កាលពីឆ្នាំទៅ ចំណែកសហរដ្ឋអាមេរិកវិញ មានថវិកាខាងយោធា កើនឡើងរហូត 3ឆ្នាំចុងក្រោយ មកដល់ឆ្នាំទៅ ក្រោយពីថយចុះពេញមួយរយៈពេល 7ឆ្នាំមុនហ្នឹង។

ម្យ៉ាងទៀត ថវិកាខាងយោធា និងការចាយវាយដែលពាក់ព័ន្ធវិស័យនេះរបស់សហរដ្ឋអាមេរិក គឺជារឿងដែលគួរឱ្យតាមសង្កេតមើលបំផុត ពេញមួយរយៈពេល 4ឆ្នាំបន្ទាប់ពីនេះទៅ តាមរយៈការដែលរដ្ឋបាលក្រុងវ៉ាស៊ីនតោនបច្ចុប្បន្ន របស់លោកប្រធានាធិបតី ចូ បៃដិន នៅមិនទាន់មានឥរិយាបថថា នឹងកាត់បន្ថយថវិកាក្នុងរឿងនេះនៅឡើយ ទោះជាមានការត្រៀមដកកងទ័ព ដែលនៅសេសសល់ប្រមាណជា 2,500នាក់ទៀត ចេញពីអាហ្វហ្គានីស្ថានក្នុងអំឡុងថ្ងៃទី11 កញ្ញាខាងមុខនេះក្ដី ដែលផ្ទុយពីថ្ងៃគម្រប់ខួប 20ឆ្នាំ នៃហេតុការណ៍វិនាសកម្ម 911៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 26, 2021

ប្រជាជនចិន 81% ចង់ចាក់វ៉ាក់សាំងកូវីដ ព្រោះជឿថា អាចការពារមេរោគមរណៈនេះបាន

ប្រព័ន្ធផ្សព្វផ្សាយរបស់ប្រទេសចិន បានរាយការណ៍នៅថ្ងៃនេះ (ទី26 មេសា) ថា 81ភាគរយ នៃក្រុមអ្នកធ្វើប្រជាមតិ បានរកឃើញថា ប្រជាជនចិនស្វាគមន៍ទទួលវ៉ាក់សាំងការពារកូវីដ-19 ជាវ៉ាក់សាំង ដែលពួកគេត្រូវការចាក់ ខ្លាំងជាងវ៉ាក់សាំងដទៃទៀត។

ការធ្វើប្រជាមតិការយល់ឃើញនេះ បានរៀបចំធ្វើដោយទស្សនាវដ្ដី Southern Weekly និង DXY ផ្លាតហ្វ៉ម ការមើលថែទាំសុខភាពអនឡាញ ដែលធំជាងគេបំផុតរបស់ប្រទេសចិន តាមរយៈការសាកសួរគំនិតយោបល់ប្រជាជនជាង 12,674នាក់ ដែលក្នុងចំនួននេះ មានគ្រូពេទ្យ 622នាក់ផង។

អ្នកឆ្លើយក្នុងទម្រង់សួរ-ឆ្លើយ មាន 85% ជឿថា វ៉ាក់សាំងអាចការពារជំងឺកូវីដ-19បាន កើនឡើងពីលទ្ធផលធ្វើប្រជាមតិកាលពីឆ្នាំទៅ ដែលមានចំនួនត្រឹមតែ 47%ប៉ុណ្ណោះ។

ក្រៅពីវ៉ាក់សាំងកូវីដ-19ហើយ ក្រុមប្រជាមតិ ថែមទាំងត្រូវការបានទទួលវ៉ាក់សាំងការពារវីរុសរលាកថ្លើម B, HIV និងគ្រុនផ្ដាសាយធំផងដែរ។

កាលពីថ្ងៃទី21 មេសា ឆ្នាំ2021 លោក មី ហ្វឹង អ្នកនាំពាក្យការិយាល័យគណៈកម្មការសុខភាពនៃប្រទេសចិន បានឱ្យដឹងថា ប្រទេសចិនកំពុងបង្កើនការព្យាយាមក្នុងការចាក់វ៉ាក់សាំង ដោយមានការចាក់វ៉ាក់សាំង កូវីដ-19 បានច្រើនជាង 200លានដូសហើយ។

រឿងនេះ បានធ្វើឱ្យប្រទេសចិន មានភាពប្រហាក់ប្រហែលគ្នានឹងសហរដ្ឋអាមេរិក ក្នុងរឿងការចាក់វ៉ាក់សាំង ដោយសហរដ្ឋអាមេរិក បានចាក់វ៉ាក់សាំងរួចហើយ បានចំនួន 200លានដងដូចគ្នា តែយ៉ាងណាក្ដី ភាពខុសប្លែកគ្នានៃចំនួនប្រជាជន ធ្វើឱ្យពេលគិតជាអត្រាភាគរយនៃការចាក់វ៉ាក់សាំងជូនប្រជាជនទាំងអស់វិញ ធ្វើឱ្យប្រទេសចិន នៅតែតាមពីក្រោយសហរដ្ឋអាមេរិកដដែល។

អ្នកជំនាញការរបស់អង្គការសុខភាពពិភពលោក បានវាយតម្លៃថា ត្រូវតែមានការចាក់វ៉ាក់សាំងឱ្យប្រជាជនយ៉ាងតិចណាស់ 65-70% ទើបអាចសាងប្រព័ន្ធប្រឆាំងជំងឺក្នុងសង្គមបាន។

កាលពីសប្ដាហ៍កន្លងទៅ លោក ជឹង ចុងវើយ អគ្គនាយកមជ្ឈមណ្ឌលអភិវឌ្ឍន៍វិទ្យាសាស្ត្រវេជ្ជសាស្ត្រ និងតិចណូឡូជី និងការិយាល័យគណៈកម្មការសុខភាពនៃប្រទេសចិន បានថ្លែងនៅក្នុងពិធី Boao Forum for Asia 2021 ថា “ប្រទេសចិន បានរៀបផែនការក្នុងការផលិតវ៉ាក់សាំងការពារវីរុសកូវីដ-19 ជាង 3ពាន់លានដូស ក្នុងអំឡុងដំណាច់ឆ្នាំនេះ និងបង្កើនកម្លាំងការផលិតឱ្យបានប្រមាណ 5ពាន់លានដូសថែមទៀត”៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 26, 2021

រូបភាពរន្ធត់! វិបត្តិកូវីដឥណ្ឌា នាយករដ្ឋមន្ត្រីទទួលស្គាល់ថា ដូចព្យុះសង្ឃរាចាប់អង្រួនប្រទេស

កាលពីថ្ងៃទី25 មេសា ទីភ្នាក់ងារព័ត៌មាន Reuters បានរាយការណ៍ពីវិបត្តិកូវីដ-19 ដែលឆ្លងរាតត្បាតយ៉ាងធ្ងន់ធ្ងរនៅក្នុងប្រទេសឥណ្ឌា ដោយស្ថិតិអ្នកឆ្លងមេរោគថ្មីប្រចាំថ្ងៃ បានបំបែកស្ថិតិពិភពលោក លើស 3សែននាក់ក្នុង 1ថ្ងៃ ជាប់ៗគ្នា 4ថ្ងៃ ដោយកាលពីថ្ងៃទី24 មេសា មានចំនួន 349,691នាក់ និងស្លាប់ 2,767នាក់ ក្នុងអំឡុងពេល 24ម៉ោង។

សម្រាប់ចំនួនអ្នកឆ្លងមេរោគសរុប បានឡើងជិតដល់ 17លាននាក់ ចំណែកចំនួនអ្នកស្លាប់ កើនឡើងដល់ 192,310នាក់។ បច្ច័យចម្បងរបស់ការឆ្លងរាលដាលដ៏ធ្ងន់ធ្ងរនេះ បណ្ដាលមកពីមេរោគកូវីដ-19ក្លាយពូជ រួមទាំងការប្រមូលផ្ដុំគ្នា ក្នុងរដូវកាលខាងសាសនា ដែលមានប្រជាជននាំគ្នាហែមកចូលរួមជាច្រើនលាននាក់ កាលពីដើមខែមេសា។

ក្រៅពីវិបត្តិអ្នកជំងឺ ហៀរមន្ទីរពេទ្យហើយ បរិមាណខ្យល់អុកស៊ីហ្ស៊ែន ដែលទុកព្យាបាលអ្នកជំងឺ ក៏មានមិនគ្រប់គ្រាន់ រហូតធ្វើឱ្យអ្នកជំងឺអាការធ្ងន់ធ្ងរ ត្រូវស្លាប់យ៉ាងគួរតក់ស្លុត។

ក្រៅពីនោះ ប្រទេសឥណ្ឌា ថែមទាំងត្រូវប្រឈមនឹងចំនួនសាកសពអ្នកជំងឺកូវីដ-19 ដែលមានច្រើនហៀរកន្លែងតម្កល់សពជាបន្តបន្ទាប់ រហូតដល់អាជ្ញាធរត្រូវអាស្រ័យលើការដុតបូជា នៅតាមទីវាលស្រឡះៗ ដោយបណ្ដារថយន្តសង្គ្រោះរបស់មន្ទីរពេទ្យ បានដឹកសាកសពយកមកដាក់នៅកន្លែងឈាបនកិច្ចបណ្ដោះអាសន្នយ៉ាងបន្តកន្ទុយគ្នាឥតឈប់ឈរ អ្នកខ្លះអាចត្រូវរង់ចាំបូជាសពសាច់ញាតិ យូររហូតដល់ទៅ 6ម៉ោងក៏មាន។

រូបភាពពីយន្តហោះដ្រូន បានបង្ហាញឱ្យឃើញទីកន្លែងបូជាសពដ៏ធំទូលាយមួយ នៅក្នុងទីក្រុងនីវដេលី មានគំនរភ្លើងជាចំណុច។ សាកសពត្រូវបានរុំជុំជិតដោយក្រណាត់ស និងត្រូវគរសង្កត់ពីលើដោយគំនរអុស មុននឹងបញ្ឆេះភ្លើង ដុតបូជាដោយអាជ្ញាធរ និងសាច់ញាតិដែលសុទ្ធតែស្លៀកឈុត PPE ពណ៌ស ការពារខ្លួនយ៉ាងគត់មត់។

គិតតាំងពីថ្ងៃទី15 មេសាមក ប្រទេសឥណ្ឌា មានរបាយការណ៍អ្នកឆ្លងកូវីដ ខ្ពស់លើស 2សែននាក់ ដែលច្រើនជាងស្ថិតិខ្ពស់បំផុតប្រចាំឆ្នាំ2020 ដែលមានតែ 93,000នាក់ក្នុង 1ថ្ងៃនោះទៅទៀត បន្ទាប់ពីនោះ ចំនួនអ្នកឆ្លងមេរោគថ្មី ថែមទាំងបានកើនឡើងដល់ជាង 3សែននាក់ក្នុង 1ថ្ងៃ ជាប់ៗគ្នា 4ថ្ងៃហើយទៀតផង។

លោក ណារិនដ្រា ម៉ូឌី នាយករដ្ឋមន្ត្រីឥណ្ឌា បានថ្លែងអំពាវនាវ សុំឱ្យប្រជាជនគ្រប់រូប ចូលទទួលយកការចាក់វ៉ាក់សាំង និងប្រយ័ត្នខ្លួនឯងពី “ព្យុះសង្ឃរានៃការឆ្លងមេរោគ” ដែលគ្រានេះបានញាប់ញ័ររញ្ជួយទូទាំងប្រទេស។

លោកម៉ូឌី បានថ្លែងថា “ការឆ្លងរាលដាលរលកទី1 យើងតស៊ូប្រយុទ្ធ រហូតបានជោគជ័យ រហូតមានជឿជាក់ តែគ្រានេះ ព្យុះសង្ឃរា បានវាយបោកបក់ទូទាំងប្រទេសរហូតញ័ររញ្ជួយ”

រដ្ឋបាលលោក ម៉ូឌី ត្រូវរងការរិះគន់យ៉ាងធ្ងន់ធ្ងរថា បានបណ្ដោយឱ្យការការពារខ្លួនធ្លាក់ចុះ និងធ្វេសប្រហែស មានការរៀបចំពិធីជួបជុំរបស់មនុស្សចំនួនដ៏ច្រើន ទាំងពិធីខាងសាសនា និងកិច្ចការងារខាងនយោបាយ ដោយមិនបានត្រៀមរួចជាស្រេចនូវប្រព័ន្ធសុខភាពសាធារណៈ សម្រាប់ទប់ទល់នឹងស្ថានការណ៍នេះឡើយ។

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 26, 2021

ក្រោយរកឃើញសាកសពនាវាមុជទឹក KRI Nanggala ដែលបានបាត់ខ្លួន តំណាងរាស្ត្រឥណ្ឌូនេស៊ីសង្ស័យថា «អាចមកពីកំហុសនៃការជួសជុលនៅកូរ៉េខាងត្បូង»

តំណាងរាស្ត្រ និងជាអតីតឧត្ដមសេនីយ៍យោធា TB Hasanuddin សំដែងការព្រួយបារម្ភថា នាវាមុជទឹក KRI Nanggala ដែលបានលិចនោះគឺ អាចបណ្ដាលមកពីការជួសជុលនៅឯប្រទេសកូរ៉េខាងត្បូង អំឡុងឆ្នាំ 2010-2012។

«ការជួសជុលនៅកូរ៉េខាងត្បូង មិនត្រឹមតែផ្លាស់គ្រឿងបន្លាស់នោះទេ តែក៏ប៉ះពាល់ដល់គ្រោងនាវាមុជទឹកនេះផងដែរ ពិសេសគឺប្រព័ន្ធបាញ់មីស៊ីលទឹក» អតីតមន្ត្រីយោធាជាន់ខ្ពស់ Hasanuddin និងជាសមាជិកនៃគណៈកម្មការការពារជាតិ ការបរទេស និងព័ត៌មាន នៃសភាជាន់ទាបឥណ្ឌូនេស៊ី បាននិយាយកាលពីម្សិលមិញ (25 មេសា) អំពីនាវាមុជទឹក KRI Nanggala ដែលបានលិចនៅឯសមុទ្រ Bali។

KRI Nanggala ត្រូវបានជួសជុលនៅកូរ៉េខាងត្បូង ក្នុងអំឡុងឆ្នាំ 2010-2012 ដើម្បីផ្លាស់អាគុយ និងគ្រឿងម៉ាស៊ីន ក៏ដូចជាបំពាក់ប្រព័ន្ធកំណត់ទិស sonar និងប្រព័ន្ធគ្រប់គ្រងការប្រយុទ្ធ។

តំណាងរាស្ត្រ Hasanuddin ឱ្យដឹងថា ការជួសជុលនេះ ត្រូវចំណាយប្រាក់អស់ប្រមាណ 75លានដុល្លារអាមេរិក និងបានបន្ថែមថា ការបាញ់សាកល្បងមីស៊ីលទឹក ធ្លាប់បានបរាជ័យ ដោយសារបំពង់បាញ់មីស៊ីល ជួបបញ្ហា បណ្ដាលឱ្យនាវិក 3នាក់ ត្រូវបាត់បង់ជីវិត។ បន្ទាប់មក វាក៏ត្រូវបានជួសជុលឡើងវិញ។

«ខ្ញុំសង្ស័យថា លទ្ធផលនៃការជួសជុល បាននាំឱ្យមានកំហុសឆ្គង បណ្ដាលឱ្យនាវា Nanggala ត្រូវលិច» នេះបើតាមសំដីរបស់ Hasanuddin។ លោកក៏បានស្នើឱ្យផ្អាកដំណើរការនាវាមុជទឹក KRI Cakra ដែលស្ថិតក្នុងប្រភេទជាមួយនឹង KRI Nanggala។

កងកម្លាំងជួយសង្គ្រោះ បានរកឃើញសាកសពនាវាមុជទឹក KRI Nanggala ស្ថិតនៅបាទសមុទ្រ Bali ជម្រៅ 838ម៉ែត្រ ដែលមានចម្ងាយពីកន្លែងមុជលើកចុងក្រោយប្រមាណតែ 1.4គីឡូម៉ែត្រប៉ុណ្ណោះ។

មេបញ្ជាការកងទ័ពជើងទឹកឥណ្ឌូនេស៊ី Yudo Margono កាលពីថ្ងៃទីល្ងាចថ្ងៃទី25 មេសា បានឱ្យដឹងថា៖ «នាវាមុជទឹក KRI Nanggala បានបែកបាក់ជាបីចំណែកធំ»។ ចំណែកមេបញ្ជាការកងទ័ពឥណ្ឌូនេស៊ី Hadi Tjahjanto បញ្ជាក់ថា៖ «នាវិកទាំង 53នាក់ដែលនៅក្នុងនាវាមុជទឹកនេះ បានបាត់បង់ជីវិត»៕

ប្រភព៖ AFP, Detik News
ប្រែសម្រួល៖ បុត្រា

April 26, 2021

ចេញសញ្ញាក្ដៅគគុក!! ភ្លើងឆេះកប៉ាល់ដឹកប្រេង ក្រៅឈូងសមុទ្រស៊ីរី សង្ស័យត្រូវ យន្តហោះដ្រូនសត្រូវ បាញ់កម្ទេច

ក្រសួងថាមពល នៃប្រទេសស៊ីរី បានបង្ហើបឱ្យដឹងថា ក្រុមអ្នកពន្លត់អគ្គិភ័យ ត្រូវបានបញ្ជូនទៅពន្លត់ភ្លើងដែលឆេះនាវាដឹកប្រេង ១គ្រឿង នៅក្រៅឈូងសមុទ្ររបស់ប្រទេសមួយនេះ កាលពីថ្ងៃសៅរ៍ (ទី24មេសា) ក្រោមការសង្ស័យថា វាអាចត្រូវវាយប្រហារដោយយន្តហោះដ្រូន ១គ្រឿង ដែលមានទិសដៅហោះមកពីដែនសមុទ្រលេបាណុន។

អត្តសញ្ញាណរបស់នាវាផ្ទុកប្រេង 1គ្រឿងនេះ មិនបានបង្ហាញច្បាស់លាស់ឡើយ ដោយខាងស្ថានីយទូរទស្សន៍ អាល់-អាឡាម របស់ប្រទេសអ៊ីរ៉ង់ បានបញ្ជាក់ថា វាជានាវាមួយ ក្នុងចំណោមនាវាដឹកប្រេងរបស់ប្រទេសអ៊ីរ៉ង់ ដែលកាលពីពេលថ្មីៗនេះ ទើបនឹងចូលចតនៅកំពង់ផែឃ្លាំងប្រេងរបស់ប្រទេសស៊ីរី តែខាងទីភ្នាក់ងារព័ត៌មាន ថាស្នីម ប្រព័ន្ធផ្សព្វផ្សាយពាក់កណ្ដាលរដ្ឋរបស់អ៊ីរ៉ង់ដូចគ្នា បានរាយការណ៍ខុសពីគ្នា ដោយបានប្រាប់ថា វាមិនមែនជានាវាដឹកប្រេងរបស់អ៊ីរ៉ង់ទេ។

អាល់-អាឡាម ប្រព័ន្ធផ្សព្វផ្សាយជាភាសាអារ៉ាប់ របស់ប្រទេសអ៊ីរ៉ង់ បានបញ្ជាក់ថា កប៉ាលផ្ទុកប្រេង 1គ្រឿងនេះ បានរងការខូចខាតមួយផ្នែក និងមិនមានអ្នកស្លាប់ទេ តែខាង ថាស្នីម បានរាយការណ៍ ដោយអាងលើប្រភពព័ត៌មាន ដែលបានប្រាប់ថា “ហេតុការណ៍នេះកើតឡើងទៅលើនាវា 1គ្រឿងផ្សេងទៀត និងមិនមានភាពពាក់ព័ន្ធគ្នា ជាមួយនាវាដែលកំពុងផ្ទុកទំនិញរបស់អ៊ីរ៉ង់នោះទេ”

ចំណែក Tanker Trackers វេបសាយតាមដានការធ្វើដំណើររបស់កប៉ាលដឹកប្រេង បានសរសេរនៅលើប្រព័ន្ធធ្វីតធើរថា កប៉ាលដឹកប្រេង ដែលត្រូវបានប្រទះឃើញភ្លើងឆាបឆេះនៅក្រៅឈូងសមុទ្រទីក្រុង បានីយ៉ាស មិនមែនជាកប៉ាលរបស់ប្រទេសអ៊ីរ៉ង់ទេ តែវាមានលេខបញ្ជីលេបាណុន។

ទោះជាដូច្នេះក្ដី សាណា ប្រព័ន្ធផ្សព្វផ្សាយរបស់រដ្ឋស៊ីរី ដែលអាងលើសេចក្ដីថ្លែងការណ៍របស់ក្រសួងថាមពល បានហៅរឿងនេះថា ជាហេតុការណ៍វាយប្រហារដោយយន្តហោះដ្រូន តែមិនបានផ្ដល់សេចក្ដីលម្អិតបន្ថែមអំពីហេតុការណ៍នេះឡើយ និងទីភ្នាក់ងារព័ត៌មាន អាល់-ម៉ាយ៉ាឌីន ស្ថានីយទូរទស្សន៍គាំទ្រប្រទេសស៊ីរី បានរាយការណ៍ដោយសង្ស័យថា កប៉ាលផ្ទុកប្រេងនេះ ត្រូវបានវាយប្រហារដោយយន្តហោះដ្រូនរបស់អ៊ីស្រាអែល។ តែ ខាងកងទ័ពអ៊ីស្រាអែល បានបដិសេធ ផ្ដល់ការយល់ឃើញណាមួយចំពោះហេតុការណ៍ដែលកើតឡើងនេះ។

គួរបញ្ជាក់ដែរថា ហេតុការណ៍នេះកើតឡើង ក្នុងខណៈដែលអ៊ីស្រាអែល កំពុងបង្កើនប្រតិបត្តិការវាយប្រហារគោលដៅផ្សេងៗរបស់អ៊ីរ៉ង់ ក្នុងនោះរួមមានទីតាំងសង្ស័យផលិតអាវុធរបស់អ៊ីរ៉ង់ នៅក្នុងប្រទេសស៊ីរី ដើម្បីទប់ស្កាត់នូវអ្វីដែលពួកគេមើលឃើញថា ជាការរុករានឈ្លានពានខាងយោធានៅក្នុងប្រទេសស៊ីរី របស់អ៊ីរ៉ង់៕

ប្រភព៖ ទីភ្នាក់ងារព័ត៌មាន Reuters
ប្រែសម្រួល តាវ៉ែនតា

April 25, 2021

អាស៊ាន៖ សម្រេចបានឆន្ទាមតិ 5ចំណុច ក្រោយពិភាក្សាជាមួយលោក មីន អង់ឡាយ បញ្ចប់វិបត្តិមីយ៉ាន់ម៉ា

ក្រុមមេដឹកនាំប្រទេសក្នុងភូមិភាគអាស៊ីភាគអាគ្នេយ៍ បានថ្លែងថា ពួកគេបានឯកភាពលើផែនការមួយចំនួនជាមួយនឹងមេដឹកនាំក្រុមរដ្ឋប្រហារយោធាមីយ៉ាន់ម៉ា នៅថ្ងៃទី24 មេសា ដើម្បីបញ្ចប់វិបត្តិក្នុងប្រទេសនោះ តែមេដឹកនាំរដ្ឋប្រហាររូបនោះ មិនបានឆ្លើយតបយ៉ាងច្បាស់លាស់ ចំពោះសំណូមពរឱ្យបញ្ឈប់ការសម្លាប់អ្នកតវ៉ាប្រឆាំងដែលជាពលរដ្ឋនោះទេ។

“វាលើសពីការរំពឹងទុករបស់យើង…” លោកនាយករដ្ឋមន្ត្រី មូយីតឌីន យ៉ាស់ស៊ីន របស់ប្រទេសម៉ាឡេស៊ី បានថ្លែងប្រាប់ក្រុមអ្នកយកព័ត៌មាន ក្រោយកិច្ចប្រជុំមេដឹកនាំនៃប្រជាជាតិអាស៊ាន ដែលលោកឧត្ដមសេនីយ៍ឯក មីន អង់ឡាយ បានចូលរួមប្រជុំផងដែរនោះ។

មេដឹកនាំម៉ាឡេស៊ី បានថ្លែងបន្តថា៖ “យើងព្យាយាម មិននិយាយចោទប្រកាន់ភាគីគាត់ ច្រើនជ្រុលពេកទេ ព្រោះយើងមិនបានខ្វល់ថា អ្នកណាជាអ្នកបង្កនោះទេ យើងគ្រាន់តែបញ្ជាក់ថា អំពើហិង្សា ត្រូវតែបញ្ចប់ សម្រាប់គាត់ បញ្ហាកើតឡើង គឺដោយសារតែភាគីម្ខាងទៀត តែគាត់យល់ស្របថា អំពើហិង្សា ត្រូវតែបញ្ឈប់”

ក្រុមមេដឹកនាំក្នុងប្រទេសអាស៊ាន ត្រូវការការសន្យាពីលោក មីន អង់ឡាយ ក្នុងការរារាំងកងកម្លាំងសន្តិសុខរបស់គាត់ ដែលក្រុមអ្នកតាមដានស្ថានការណ៍ និងក្រុមសកម្មជន បានបញ្ជាក់ថា បានសម្លាប់មនុស្សអស់ 745នាក់ហើយ ចាប់តាំងពីកើតមានការតវ៉ាប្រឆាំងបែបអហិង្សា ដើម្បីតតាំងនឹងការធ្វើរដ្ឋប្រហារកាលពីថ្ងៃទី1 កុម្ភៈ ហើយពួកគេទាំងនោះ នៅតែត្រូវការឱ្យដោះលែងអ្នកទោសនយោបាយផងដែរ។

មេដឹកនាំប្រទេសម៉ាឡេស៊ី បានបន្តថា៖ “គាត់មិនបានបដិសេធនូវអ្វីដែលខ្ញុំ និងមេដឹកនាំឯទៀតលើកយកមកពិភាក្សានោះទេ”

ចំណែកឯការថ្លែងការណ៍របស់ប្រទេសប្រ៊ុយណេ ដែលជាប្រធានអាស៊ានវិញ បានបញ្ជាក់អំពីឆន្ទាមតិ ដែលសម្រេចបាន 5ចំណុច ប្រកបដោយ៖ ការបញ្ឈប់អំពើហិង្សា, ការចរចាដែលរីកចម្រើនរវាងគ្រប់ភាគីដែលពាក៉ព័ន្ធ, អ្នកតំណាងពិសេសរបស់អាស៊ាន នឹងសម្របសម្រួលក្នុងការចរចា, ការទទួលយកជំនួយ និងការទៅចូលទៅទស្សនកិច្ចរបស់អ្នកតំណាងពិសេស តែយ៉ាងណាក្ដី មិនមានការថ្លែងអំពីការដោះលែងអ្នកទោសនយោបាយនៅក្នុងសេចក្ដីថ្លែងការណ៍នោះទេ។

“គាត់ប្រាប់ថា គាត់(លោកមីន អង់ឡាយ) ទទួលស្ដាប់ពួកយើង ហើយគាត់នឹងនាំយកទៅពិចារណាថា តើវាមានចំណុចណាខ្លះ ដែលជាប្រយោជន៍?” លោក លី ស៊ានលុង នាយករដ្ឋមន្ត្រីរបស់សិង្ហបុរី បានថ្លែងបែបនេះ តាមការរាយការណ៍របស់ស្ថានីយទូរទស្សន៍ Channel NewsAsia។

មេដឹកនាំប្រទេសសិង្ហបុរី បានបន្តថា “គាត់មិនបានប្រឆាំងនឹងអាស៊ាន ដែលមានតួនាទីសម្របសម្រួល ឬការទៅទស្សនកិច្ចរបស់ក្រុមអ្នកតំណាងអាស៊ាន ឬការជួយសង្គ្រោះផ្នែកមនុស្សធម៌ណាមួយទេ”

តែលោក លី បានបន្ថែមថា ការងារនេះ នៅត្រូវដំណើរការបន្តយូរតទៅទៀត ព្រោះមានរឿងមួយ ដែលនឹងត្រូវធ្វើឱ្យបានសម្រេច គឺបញ្ឈប់អំពើហិង្សា និងដោះលែងអ្នកទោសនយោបាយ។

តែ ទាំងអស់នេះ មិនទាន់មានការយល់ឃើញណាមួយពីលោកឧត្ដមសេនីយ៍ មីន អង់ឡាយ នៅឡើយ។

លោក ឆាលស៍ សានទីអេហ្គោ ប្រធានសមាជិករដ្ឋសភាអាស៊ាន ដើម្បីសិទ្ធិមនុស្ស បានថ្លែងថា “ការដោះលែងអ្នកទោសនយោបាយ គឺជារឿងចាំបាច់មួយ សម្រាប់បញ្ឈប់អំពើហិង្សា”

លោក សានទីអេហ្គោ បញ្ជាក់ថា “អាស៊ានត្រូវតែដំណើរការយ៉ាងឆាប់រហ័ស និងកំណត់ពេលវេលាឱ្យបានច្បាស់លាស់ សម្រាប់លោកមីន អង់ឡាយ ក្នុងការបញ្ឈប់អំពើហិង្សា ឬត្រៀមខ្លួនជាស្រេចក្នុងការឱ្យគាត់ទទួលខុសត្រូវ”

ការជួបប្រជុំគ្នារបស់អាស៊ាននេះ គឺជាការព្យាយាមរវាងប្រទេសជាលើកដំបូង ក្នុងការជួយសម្រាលវិបត្តិក្នុងប្រទេសមីយ៉ាន់ម៉ា ចាប់តាំងពីកើតការធ្វើរដ្ឋប្រហារផ្ដួលរំលំរដ្ឋាភិបាល ដែលបានមកពីការបោះឆ្នោតរបស់លោកស្រី អ៊ុងសាន ស៊ូជី។ មីយ៉ាន់ម៉ា គឺជាប្រទេសមួយ ក្នុងចំណោម 10ប្រទេសសមាជិកអាស៊ាន ដែលមាននយោបាយការសម្រេចចិត្ត ដែលជាឆន្ទាមតិ និងការមិនជ្រៀតជ្រែកកិច្ចការផ្ទៃក្នុងរបស់ប្រទេសជាសមាជិក៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 25, 2021

យកអុកស៊ីហ្ស៊ែនតាមខ្លួន!? ឥណ្ឌា ទប់លែងឈ្នះ ឆ្លងកូវីដជាង 3សែននាក់ក្នុង 1ថ្ងៃ

ចំនួនអ្នកជំងឺកូវីដ-19 នៅក្នុងប្រទេសឥណ្ឌា បានកើនឡើងច្រើនជាង 3សែននាក់ ជាថ្ងៃទី2 ជាប់ៗគ្នា កណ្ដាលវិបត្តិខ្វះខ្យល់អុកស៊ីហ្ស៊ែន។

ទីភ្នាក់ងារព័ត៌មានអន្តរជាតិ បានរាយការណ៍ពីទីក្រុងនីវដេលី ប្រទេសឥណ្ឌា កាលពីថ្ងៃទី23 មេសាថា ក្រសួងសុខាភិបាលរបស់ឥណ្ឌា បានរាយការណ៍ពីស្ថិតិថ្មីពាក់ព័ន្ធនឹងជំងឺកូវីដ-19 នៅក្នុងប្រទេស ដោយបានរកឃើញអ្នកជំងឺថ្មី 332,730នាក់ ជាចំនួនមួយ ខ្ពស់បំផុតជាប្រវត្តិសាស្ត្រ ទាំងលំដាប់ប្រទេស និងលំដាប់ពិភពលោក ដោយកើនឡើង 17,895នាក់ ពីស្ថិតិចាស់កាលពីថ្ងៃព្រហស្បតិ៍ ដែលនេះគឺជាថ្ងៃទី2 ជាប់គ្នាហើយ ដែលប្រទេសឥណ្ឌា បានអះអាងពីអ្នកឆ្លងមេរោគថ្មីប្រចាំថ្ងៃ ច្រើនជាង 3សែននាក់ និងធ្វើឱ្យចំនួនអ្នកជំងឺកូវីដ-19 សរុប ច្រើនជាង 16លាននាក់ ច្រើនជាប់លំដាប់លេខ2 បន្ទាប់ពីសហរដ្ឋអាមេរិក។

ខណៈដែលក្នុងជុំ 1ថ្ងៃដូចគ្នា មានអ្នកស្លាប់ទាំងអស់ 2,263នាក់ ជាស្ថិតិស្លាប់ប្រចាំថ្ងៃខ្ពស់បំផុតដូចគ្នា ចាប់តាំងពីមានការឆ្លងរាលដាលនៅក្នុងប្រទេសកាលពីខែមករាមក ធ្វើឱ្យបច្ចុប្បន្នប្រទេសឥណ្ឌា មានចំនួនអ្នកស្លាប់ដោយសារជំងឺកូវីដ-19 យ៉ាងតិច 186,920នាក់ ជាប់លំដាប់ថ្នាក់លេខ3 បន្ទាប់ពីសហរដ្ឋអាមេរិក និងប្រេស៊ីល ចំណែកស្ថិតិអ្នកជំងឺ ដែលនៅសល់ និងកំពុងព្យាបាលក្នុងប្រព័ន្ធមន្ទីរពេទ្យ មានចំនួនយ៉ាងតិច 2,428,600នាក់។

ទាំងអស់នេះ មន្ទីរពេទ្យនៅក្នុងប្រទេសឥណ្ឌា យ៉ាងតិច 2កន្លែង បានទទួលស្គាល់ថា កំពុងជួបនឹងវិបត្តិខ្វះខ្យល់អុកស៊ីហ្ស៊ែន ចំណែកលោកនាយករដ្ឋមន្ត្រី ណារិនដ្រា ម៉ូឌី បានត្រៀមប្រជុំបន្ទាន់ ជាមួយប្រមុខមន្ត្រី ក្នុងរដ្ឋដែលបញ្ហាអុកស៊ីហ្ស៊ែនមិនគ្រប់គ្រាន់ និងក្រុមហ៊ុនផលិតខ្យល់អុកស៊ីហ្ស៊ែនទាំងអស់នៅថ្ងៃនេះ៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 24, 2021

ក្ដីសង្ឃឹមក្នុងការជួយសង្គ្រោះនាវិកជាង 50នាក់ នៃនាវាមុជទឹកប្រទេសឥណ្ឌូនេស៊ីដែលបាត់ខ្លួន បានរលាយបាត់ទៅហើយ!

ក្ដីសង្ឃឹមដែលថានឹងអាចជួយសង្គ្រោះក្រុមនាវិកជាង 50នាក់នៃនាវាមុជទឹករបស់ឥណ្ឌូនេស៊ី ដែលកំពុងបាត់ខ្លួន បានរលាយបាត់បង់អស់រលីង នៅពេលដែលបរិមាណអុកស៊ីសែនរបស់នាវា ត្រូវបានគេគណនាឃើញថា អស់គ្មានសល់ នៅព្រឹកនេះ។

ក្នុងគ្រាដែលទាហានរាប់រយនាក់កំពុងចូលរួមស្វែងរកនាវាមុជទឹក KRI Nanggala 402 ក្រុមមន្ត្រីឥណ្ឌូនេស៊ី បានឱ្យដឹងថា បរិមាណអុកស៊ីសែនដែលមាននៅក្នុងនាវានេះ អាចប្រើបានតែក្នុងរយៈពេល 72ម៉ោងទៀតប៉ុណ្ណោះ បន្ទាប់ពីដាច់ចរន្តអគ្គិសនី។ កាលកំណត់នោះ បានកន្លងផុតទៅនៅវេលាទៀបភ្លឺនៃថ្ងៃទី24 ខែមេសានេះ ប៉ុន្តែ គេនៅមិនទាន់រកឃើញនាវា ក៏ដូចជាក្រុមនាវិកចំនួន 53នាក់នោះដដែល។

នាវាមុជទឹក KRI Nanggala បានទាក់ទងមកកាន់បញ្ជាការដ្ឋានកាលពីវេលាម៉ោង 3ទៀបភ្លឺ នៃថ្ងៃទី21 ខែមេសា ដើម្បីសុំការអនុញ្ញាត មុជទៅក្រោមសមុទ្រ ហើយនាវានេះក៏បានដាច់ទំនាក់ទំនងទាំងស្រុងនៅវេលាម៉ោង 4កន្លះ នៃថ្ងៃដដែល។ ក្រុមអ្នកជួយសង្គ្រោះឥណ្ឌូនេស៊ី កាលពីថ្ងៃទី23 ខែមេសា បានរកឃើញសញ្ញានៃវត្ថុមួយដែលមាន «ដែនម៉ាញេទិកខ្ពស់» កំពុងលិចក្រោមទឹក ជម្រៅពី 50-100ម៉ែត្រ នៅភាគខាងជើងសមុទ្រ Bali ប៉ុន្តែ មិនទាន់ដឹងច្បាស់ថា វាជាអ្វី។

មុននោះ កងទ័ពជើងទឹកឥណ្ឌូនេស៊ី បានសន្និដ្ឋានថា នាវាមុជទឹកនេះ ទំនងជាបានលិចក្នុងជម្រៅពី 600-700ម៉ែត្រ ជ្រៅជាងឆ្ងាយបើធៀបនឹងជម្រៅអតិបរមាដែលនាវានេះអាចធ្វើសកម្មភាពបាន។ ទឹកសមុទ្រជម្រៅ 700ម៉ែត្រ មានសម្ពាធខ្ពស់ជាង 70ដង បើធៀបនឹងសម្ពាធបរិយាកាសលើផ្ទៃទឹកសមុទ្រ ដូច្នេះ សម្បកនាវាទំហំមួយម៉ែត្រក្រឡានឹងត្រូវរងសម្ពាធជាង 720តោន។ នាវាមុជទឹកធម្មតា នៅពេលស្ថិតក្នុងជម្រៅបែបនេះ អាចនឹងត្រូវបាត់បង់រូបរាងដើម ឬក៏អាចត្រូវសម្ពាធទឹកសមុទ្រច្របាច់ កៀបខ្ទេចខ្ទី បើសិនជាដងខ្លួនរបស់វាមានបញ្ហា។

នាវាមុជទឹក KRI Nanggala ទម្ងន់ 1,395តោន ត្រូវបានផលិតនៅប្រទេសអាល្លឺម៉ង់កាលពីឆ្នាំ1977 និងត្រូវបានដាក់ឱ្យប្រើប្រាស់នៅក្នុងជួរកងទ័ពជើងទឹកឥណ្ឌូនេស៊ី ចាប់ពីឆ្នាំ1981៕

ប្រភព៖ AFP
ប្រែសម្រួល៖ បុត្រា

April 24, 2021

Category: អន្តរជាតិ