អន្តរជាតិ - La Reine Media

នាវាអមការពារមួយគ្រឿង ត្រូវនាវាមុជទឹក និងយន្តហោះចម្បាំងរបស់ អាមេរិក សហការគ្នា បាញ់ពន្លិចនៅលើលំហសមុទ្រ Hawaii

យន្តហោះចម្បាំង និងនាវាមុជទឹករបស់ សហរដ្ឋអាមេរិក ធ្វើសមយុទ្ធប្រើគ្រាប់ពិត បាញ់ពន្លិចនាវាអមការពារ Ingraham ដែលបានចូលនិវត្តន៍ នៅលើតំបន់លំហសមុទ្រ Hawaii។

បណ្ដាអង្គភាពចំណុះក្រុមប្រយុទ្ធនាវាផ្ទុកយន្តហោះចម្បាំង Carl Vinson រួមនឹងនាវាមុជទឹក និងកងម៉ារីន របស់ សហរដ្ឋអាមេរិក បានធ្វើលំហាត់វាយប្រហាររយៈចម្ងាយឆ្ងាយ នៅក្នុងសមយុទ្ធបាញ់ពន្លិចគោលដៅ (SINKEX) សំដៅនាវាការពារដែលចូលនិវត្តន៍ USS Ingraham នៅលើលំហសមុទ្រ Hawaii។ នេះបើតាមកងទ័ពជើងទឹក សហរដ្ឋអាមេរិក ដែលឱ្យដឹងក្នុងសេចក្ដីប្រកាសព័ត៌មានកាលពីថ្ងៃទី 17 សីហា។

រូបភាពដែលត្រូវបានកងទ័ពជើងទឹក អាមេរិក ប្រកាស បង្ហាញថា យន្តហោះចម្បាំង F/A-18E Super Hornet បំពាក់ដោយគ្រាប់បែក AGM-154 JSOW ហោះឡើងពីនាវាផ្ទុកយន្តហោះចម្បាំង USS Carl Vinson ខណៈដែលនាវាមុជទឹកវាយប្រហារ USS Chicago ស្ថិតក្នុងក្រុម Los Angeles បញ្ចូលគ្រាប់រ៉ុក្កែតប្រឆាំងនាវាចម្បាំង UGM-84 Harpoon ទៅក្នុងបំពង់បាញ់គ្រាប់ មុននឹងធ្វើការវាយប្រហារគោលដៅ។

វីដេអូខាងលើ បង្ហាញពីនាវាចម្បាំងដែលចូលនិវត្តន៍មួយគ្រឿងត្រូវគ្រាប់មិស៊ីលពីអាកាស និងពីក្រោមទឹក ក្នុងលំហាត់សមយុទ្ធអន្តរជាតិ RIMPAC 2016។

នាវាអមការពារ USS Ingraham បានផ្ទុះឆេះ បង្កើតបានជាអណ្ដាតភ្លើង និងផ្សែងហុយទ្រលោម បន្ទាប់ពីត្រូវរងការវាយប្រហារជាច្រើនគ្រាប់។ កងទ័ពជើងទឹក អាមេរិក មិនបានឱ្យដឹងថា នាវា USS Ingraham បានលិចបែបណានោះទេ។

USS Ingraham ដែលជានាវាអមការពារ បំពាក់មិស៊ីលនាំផ្លូវដោយ GPS ដែលត្រូវបានដាក់ឱ្យប្រើប្រាស់ក្នុងជួរកងទ័ពជើងទឹក អាមេរិក កាលពីខែសីហា ឆ្នាំ 1989 និងចូលនិវត្តន៍កាលពីឆ្នាំ 2015 គឺជានាវាមួយគ្រឿងចុងក្រោយបង្អស់ដែលស្ថិតក្នុងក្រុមនាវាអមការពារ Oliver Hazard Perry របស់ សហរដ្ឋអាមេរិក៕

August 19, 2021

អាហ្វហ្គានីស្ថាន៖ ទស្សនាសកម្មភាព ស្ត្រីអ្នកយកព័ត៌មានរបស់ CNN ចុះយកព័ត៌មានពី តាលីបង់ និងពលរដ្ឋ ក្រោយក្រុមឧទ្ទាម គ្រប់គ្រងកាប៊ុល បាន 24 ម៉ោង (វីដេអូ)

អ្នកយកព័ត៌មាន Clarissa Ward របស់ទូរទស្សន៍ CNN ដែលមានទីស្នាក់ការកណ្ដាលនៅ សហរដ្ឋអាមេរិក បានសួរសមាជិកមួយចំនួនរបស់ក្រុមតាលីបង់ និងពលរដ្ឋសាមញ្ញនៅលើដងផ្លូវក្នុងរដ្ឋធានីកាប៊ុល រយៈពេល 24 បន្ទាប់ពី តាលីបង់ បានចូលកាន់កាប់រដ្ឋធានី។

ភ្លាមៗបន្ទាប់ពីចាកចេញពីទីតាំងស្នាក់នៅ យើងឃើញច្បាស់ថា អ្នកណាជាអ្នកទទួលខុសត្រូវ។ ក្រុមប្រដាប់អាវុធ បានបង្ហាញខ្លួនគ្រប់ទីកន្លែងក្នុងរដ្ឋធានី។ ពួកគេញញឹមដោយសារទទួលបានជ័យជំនះ ព្រោះបានកាន់កាប់ទីក្រុងដែលមានពលរដ្ឋ 6 លាននាក់ ក្នុងរយៈពេលតែប៉ុន្មានម៉ោង និងស្ទើរតែមិនចាំបាច់ផ្ទុះអាវុធ។

Clarissa Ward ៖ នេះគឺជាទិដ្ឋភាពដែលខ្ញុំមិននឹកស្មានថាបានជួបប្រទះ។ នេះជាក្រុមប្រដាប់អាវុធ តាលីបង់ ហើយនៅខាងក្រោយគឺជាស្ថានទូត សហរដ្ឋអាមេរិក។ ទាហាន (តាលីបង់) មួយចំនួន ដែលប្រដាប់ដោយអាវុធរបស់ សហរដ្ឋអាមេរិក និយាយថា ពួកគេមកទីនេះដើម្បីការពារច្បាប់ និងរក្សាសណ្ដាប់ធ្នាប់។

មេបញ្ជាការម្នាក់របស់ តាលីបង់ បានប្រាប់ថា៖ «គ្រប់យ៉ាងស្ថិតក្នុងការគ្រប់គ្រង គ្រប់យ៉ាងនឹងពុំមានបញ្ហានោះទេ។ គ្រប់គ្នាមិនបាច់ព្រួយបារម្ភឡើយ»។

Clarissa Ward ៖ «តើពួកលោក ចង់បញ្ជូនសារអ្វីខ្លះទៅកាន់ សហរដ្ឋអាមេរិក?»

មេបញ្ជាការខាងលើនិយាយថា៖ «អាមេរិក បានចំណាយពេលគ្រប់គ្រាន់ហើយនៅក្នុងប្រទេស អាហ្វហ្គានីស្ថាន ពួកគេត្រូវការចាកចេញ។ ពួកគេបានខាតបង់អាយុជីវិត និងប្រាក់កាសច្រើនណាស់»។

Clarissa Ward ៖ មនុស្សម្នា ចូលមកថតរូបជាមួយពួកគេ (ទាហាន តាលីបង់)។ ពួកគេស្រែកថា «ពួក អាមេរិកាំង ត្រូវតែស្លាប់» ប៉ុន្តែ ទន្ទឹមនឹងនេះ ពួកគេហាក់ដូចស្និទ្ធស្នាល ពិតជាគួរឱ្យចម្លែក។

Clarissa Ward ៖ គ្រប់កន្លែងដែលពួកយើងបានទៅដល់ ក្រុម តាលីបង់ ហាក់សុទ្ធតែចង់និយាយជាមួយ។ មនុស្សជាច្រើនមានការភ័យខ្លាចថា តាលីបង់ អាចវាយប្រហារសងសឹកចំពោះសមាជិកនៃកងសន្តិសុខ (របស់រដ្ឋាភិបាល)។

«ចាប់តាំងពីម្សិលមិញ យើងបានបញ្ជាក់ថា ពុំមានបញ្ហាអ្វីកើតឡើង។ យើងធានាចំពោះគ្រប់គ្នាថា ពួកគេនឹងមានសុវត្ថិភាព» Mawlawi Akhundzada ដែលជាមេបញ្ជាការម្នាក់របស់ តាលីបង់ និយាយដូច្នេះ។ «យើងស្ដាប់តាមបញ្ជារបស់ថ្នាក់ដឹកនាំ។ នៅពេលបានសន្យាហើយ យើងនឹងគោរពតាម»។

Clarissa Ward ៖ ការរក្សាច្បាប់ និងសណ្ដាប់ធ្នាប់គឺជាអាទិភាពកំពូលនៅក្នុងការសន្យា។ ក្រុម តាលីបង់ ឈរយាមខ្លោងទ្វារនៃវិមានប្រធានាធិបតី។ ពួកគេនិយាយថា ពួកគេមកទីនេះដើម្បីជំនួសកន្លែងទំនេរ នៅពេលក្រុមមន្ត្រីរដ្ឋាភិបាល បានរត់គេចខ្លួន។

Clarissa Ward ៖ ប៉ុន្តែ ឥរិយាបថស្វាគមន៍ បានបញ្ចប់ត្រឹមនេះ ហើយវត្តមានរបស់ខ្ញុំក៏ចាប់ផ្ដើមបង្កឱ្យមានភាពតានតឹង។ ពួកគេឱ្យខ្ញុំឈរទៅម្ខាង ព្រោះតែខ្ញុំជាស្រី។

Clarissa Ward ៖ តាលីបង់ មិនទាន់ប្រើប្រាស់ច្បាស់សាសនាអ៊ីស្លាមដ៏តឹងរ៉ឹងរបស់ខ្លួន ប៉ុន្តែ មនុស្សជាច្រើនបានត្រៀមខ្លួនសម្រាប់ប្រការនេះ។ អ្នកអាចមើលឃើញហាងផាត់មុខនេះ និងហាងដទៃ ដែលបានលាបថ្នាំពណ៌លើរូបភាពរបស់ស្ត្រីដែលមិនបាំងមុខនៅខាងមុខហាង។

មេបញ្ជាការម្នាក់របស់ តាលីបង់ លោក Assad Massoud Khistani និយាយថា «ច្បាប់សាសនាអ៊ីស្លាម នឹងត្រូវបានអនុវត្តជាសន្សឹម។

Clarissa Ward ៖ អស់លោកនឹងការពារស្ត្រីដោយរបៀបណា? ព្រោះថា ស្ត្រីជាច្រើនមានការព្រួយបារម្ភថា នឹងមិនបានទៅសាលារៀន ឬទៅធ្វើការ។

Assad Massoud Khistani ៖ ស្ត្រីអាចបន្តជីវភាពប្រចាំថ្ងៃរបស់ខ្លួន ហើយយើងនឹងមិនថាអ្វីនោះដែរ។ ពួកគេអាចបន្តការសិក្សា ប៉ុន្តែ ត្រូវជួតកន្សែង hijab របស់សាសនាអ៊ីស្លាម។

Clarissa Ward ៖ ដូចកន្សែងដែលខ្ញុំជួតនេះដែរ មែនទេ?

Assad Massoud Khistani ៖ មិនដូចរបស់អ្នកទេ ពួកគេ នឹងត្រូវបិទមុខ។

Clarissa Ward ៖ បិទមុខ?

Assad Massoud Khistani ៖ ត្រូវហើយ។

Clarissa Ward ៖ លោកចង់និយាយអំពី niqab?

Assad Massoud Khistani ៖ គឺ niqab។

Clarissa Ward ៖ ហេតុអ្វីពួកគេត្រូវបិទមុខ?

Assad Massoud Khistani ៖ នេះគឺជាការកំណត់របស់សាសនាអ៊ីស្លាម។

Clarissa Ward ៖ កាន់សាសនាអ៊ីស្លាមគឺត្រូវប្រើឈ្នួត niqab?

Assad Massoud Khistani ៖ ពិតណាស់។ កាន់សាសនាអ៊ីស្លាមគឺត្រូវតែអីចឹង។

Clarissa Ward ៖ ភាគច្រើននៃពលរដ្ឋ អាហ្វហ្គានីស្ថាន ដែលយើងបានជួប ពួកគេសុទ្ធតែមានការរន្ធត់ និងពិបាកក្នុងការដោះស្រាយបញ្ហាក្នុងអំឡុង 24 ម៉ោងកន្លង។

Clarissa Ward ៖ Fistula និយាយថា ឪពុករបស់គាត់គឺជាទាហានរបស់រដ្ឋាភិបាល អាហ្វហ្គានីស្ថាន និងបានស្លាប់នៅរដូវក្ដៅឆ្នាំនេះ ហើយគាត់មិនដឹងថា ត្រូវធ្វើយ៉ាងណា។

Fistula ៖ កាលពីម្សិលមិញ ខ្ញុំបានបាត់បង់គ្រប់យ៉ាង ខ្ញុំមានអារម្មណ៍ថា មិនមានសុវត្ថិភាពទេ ពេលនៅទីនេះ។

Clarissa Ward ៖ លោកខ្លាច?

Fistula ៖ ពិតណាស់ ខ្ញុំភ័យខ្លាច ខ្ញុំបាត់បង់ឪពុក ហើយម្ដាយខ្ញុំបានស្លាប់នៅឯខេត្ត Logar កាលពីខែមុន។

Clarissa Ward ៖ សោកស្ដាយណាស់ដែលបានឮរឿងនេះ។

Fistula ៖ នៅតែខ្ញុំ និងប្អូនស្រីរបស់ខ្ញុំ យើងនៅផ្ទះ ហើយនេះជាមូលហេតុដែលយើងភ័យខ្លាចអ្វីដែលនឹងកើតឡើងឆាប់ៗនេះ។ នោះគឺជាបញ្ហាធំមួយសម្រាប់ពួកយើង។

Clarissa Ward ៖ នេះគឺជាអារម្មណ៍ដែលមនុស្សជាច្រើនកំពុងជួបប្រទះ។ ដើរតាមដងផ្លូវ គេមានអារម្មណ៍ថា បញ្ហាពិតប្រាកដគឺមិនស្ថិតនៅលើអ្នកដែលដើរតាមដងផ្លូវនោះទេ។ ពួកគេទាំងនោះ (អ្នកនៅក្នុងផ្ទះ) ភ័យខ្លាចខ្លាំងក្នុងការចេញពីផ្ទះ។ រង់ចាំមើលថា តើថ្ងៃស្អែកនឹងទៅជាយ៉ាងណា…

August 19, 2021

អាហ្វហ្គានីស្ថាន៖ តាលីបង់ ដុតកម្ទេចសួនកម្សាន្ត ក្រោយទាហានរបស់ខ្លួន ចូលលេងជិះឡានបុកគ្នា

កាប៊ុល៖ ក្រុម តាលីបង់ បានដុតបំផ្លាញសួនកម្សាន្តមួយនៅក្នុងខេត្ត Jowzjan រយៈពេលតែប៉ុន្មានថ្ងៃប៉ុណ្ណោះ បន្ទាប់ពីវីដេអូមួយដែលបង្ហាញអំពីការលេងកម្សាន្តរបស់ទាហានមួយចំនួននៃក្រុមប្រដាប់អាវុធនេះ ត្រូវបានបង្ហោះលើបណ្ដាញសង្គម។

វីដេអូដែលបានបង្ហោះលើបណ្ដាញសង្គមកាលពីថ្ងៃទី 17 សីហា បង្ហាញថា សួនកម្សាន្តទាំងមូលមួយកន្លែងនៅក្នុងខេត្ត Jowzjan ភាគខាងលិច អាហ្វហ្គានីស្ថាន កំពុងស្ថិតក្នុងអណ្ដាតភ្លើងនាពេលយប់ ជាមួយនឹងអគ្គិភ័យយ៉ាងសន្ធោសន្ធៅគ្របដណ្ដប់ទីតាំងនេះ។ គណនី Twitter ដែលបានបង្ហោះវីដេអូនេះ ឱ្យដឹងថា នេះគឺជាសួនកម្សាន្ត Bokhdi នៅក្នុងទីក្រុង Sheberghan នៃខេត្ត Jowzjan។

ម្ចាស់គណនីខាងលើឱ្យដឹងថា តាលីបង់ បានដុតកម្ទេចសួនកម្សាន្តនេះគឺដោយសារនៅខាងក្នុងមានរូបសំណាកដែលផ្ទុយពីទំនៀមទម្លាប់សាសនាអ៊ីស្លាម។

មុននេះប៉ុន្មានថ្ងៃប៉ុណ្ណោះ ក្នុងវីដេអូមួយនៅលើបណ្ដាញសង្គម គេឃើញមានក្រុមប្រដាប់អាវុធមួយចំនួនរបស់ តាលីបង់ នាំគ្នាកាន់កាំភ្លើងចូលលេងកម្សាន្តដោយសប្បាយរីករាយ ក្នុងនោះ ទាហានខ្លះលេងជិះឡានបុកគ្នា និងខ្លះជិះទោងវិល ក្នុងសួនកំសាន្តមួយនៅ កាប៊ុល ក្រោយពីបានចូលគ្រប់គ្រងរដ្ឋធានី។

កាលពីថ្ងៃទី 18 សីហា អ្នកនាំពាក្យម្នាក់របស់ តាលីបង់ លោក Waheedullah Hashimi និយាយ ថា៖ «នឹងពុំមានលទ្ធិប្រជាធិបតេយ្យណាមួយនោះឡើយ ពីព្រោះថា វាគ្មានមូលដ្ឋានគ្រឹះអ្វីទាំងអស់នៅក្នុងប្រទេសរបស់យើង។ យើងនឹងមិនពិភាក្សាអំពីប្រភេទរបបនយោបាយដែលនឹងត្រូវអនុវត្តនៅ អាហ្វហ្គានីស្ថាន ដោយសារវាច្បាស់លាស់អស់ទៅហើយ។ នោះគឺជាច្បាប់សាសនាអ៊ីស្លាម សារី (Sharia)»។

យោងតាមអ្នកនាំពាក្យរូបនេះ អាហ្វហ្គានីស្ថាន អាចត្រូវបានដឹកនាំដោយក្រុមប្រឹក្សា តាលីបង់ និងមេបញ្ជាការកំពូល Haibatullah Akhundzada ដែលមានតួនាទីដូចទៅនឹងប្រធានាធិបតី។

រចនាសម្ព័ន្ធនៃអំណាចដែល Hashimi បានថ្លែងនេះ មានចំនុចប្រហាក់ប្រហែលនឹងវិធីដែល តាលីបង់ បានប្រើប្រាស់សម្រាប់គ្រប់គ្រង អាហ្វហ្គានីស្ថាន ក្នុងអំឡុងពីឆ្នាំ 1996 ដល់ឆ្នាំ 2001។ កាលណោះ មេបញ្ជាការកំពូល Mulllah Omar មិនបង្ហាញវត្តមាន ដោយទុកឱ្យក្រុមប្រឹក្សាមួយជាអ្នកដឹកនាំប្រទេស។

សកម្មភាពមួយចំនួនរបស់ តាលីបង់ នាពេលថ្មីៗនេះ បាន និងកំពុងបង្ហាញថា តាលីបង់ ទំនងជាមិនអាចប្ដូរផ្លាស់ទៅរកសេរីភាពបានច្រើនដូចការសន្យារបស់ពួកគេនោះទេ៕

August 19, 2021

អតីតអនុប្រធានាធិបតី អាហ្វហ្គានីស្ថាន បង្កើតកម្លាំងប្រឆាំង តាលីបង់

អតីតអនុប្រធានាធិបតី អាហ្វហ្គានីស្ថាន លោក Saleh ប្រកាសកាន់អំណាច បង្កើតសម្ព័ន្ធភាពយោធាដើម្បីប្រឆាំងតបតនឹងក្រុម តាលីបង់ និងដាក់ការិយាល័យកណ្ដាលរបស់ខ្លួន នៅជ្រលងភ្នំ Panjshir ដែលនៅមិនឆ្ងាយប៉ុន្មានពីរដ្ឋធានីកាប៊ុល។

«ខ្ញុំនឹងមិនធ្វើឱ្យមនុស្សរាប់លាននាក់ ស្ដាប់អំពីដំណឹងអស់សង្ឃឹមរបស់យើងនោះឡើយ។ ខ្ញុំនឹងមិនស្ថិតនៅក្រោមដំបូលមេឃជាមួយនឹង តាលីបង់។ ចូរចូលរួមជាមួយកងកម្លាំងប្រយុទ្ធតតាំងរបស់យើង» លោក Amrullah Saleh អតីតអនុប្រធានាធិបតី អាហ្វហ្គានីស្ថាន នៅក្នុងរដ្ឋាភិបាលដែលទើបតែបានផ្ដួលរំលំ ប្រកាសដូច្នេះកាលពីថ្ងៃទី 17 សីហា។

មុននោះ លោក Saleh បានហៅខ្លួនឯងថា ប្រធានាធិបតីបណ្ដោះអាសន្ន របស់ អាហ្វហ្គានីស្ថាន ក្រោយពីប្រធានាធិបតី Ashraf Ghani បានរត់ចោលប្រទស ក្នុងគ្រា តាលីបង់ ជិតចូលដល់រដ្ឋធានីកាប៊ុល កាលពីថ្ងៃទី 15 សីហា។ លោក Saleh ឱ្យដឹងថា លោកកំពុងទាក់ទងទៅកាន់ក្រុមមេដឹកនាំ ដើម្បីស្វែងរកការគាំទ្រ និងការយល់ស្របរបស់ពួកគេ នៅក្នុងការធ្វើសង្គ្រាមប្រឆាំង តាលីបង់។

លោក Saleh បានរិះគន់ប្រធានាធិបតី Ghani ដែលបានរត់គេចខ្លួន ហើយលោកក៏បានអះអាងថា កងកម្លាំងយោធាដែលនៅក្រោមបញ្ជាការរបស់លោក នៅតែរស្សាស្មារតីប្រយុទ្ធតតាំង។

ក្រោយមក នៅក្នុងវីដេអូដែលបានបង្ហោះលើបណ្ដាញសង្គម Twitter បង្ហាញថា លោក Saleh និងក្រុមមន្ត្រី អាហ្វហ្គានីស្ថាន ឡើងឧទ្ធម្ភាគចក្រនៅឯព្រលានយន្តហោះ Hamid Karzai ដើម្បីហោះទៅកាន់ជ្រលងភ្នំ Panjshir ដែលមានចម្ងាយប្រហែល 110 គីឡូម៉ែត្រ ទៅទិសខាងជើងនៃរដ្ឋធានីកាប៊ុល។ រថយន្ត និងម៉ូតូប្រមាណ 80 គ្រឿង ត្រូវបានហែជាក្បួន នៅជ្រលងភ្នំកាលពីថ្ងៃទី 18 សីហា។

ក្នុងចំណោមអ្នកអមដំណើរជាមួយលោក Saleh ក៏មាន Ahmad Massoud ដែលជាកូនប្រុសរបស់ Ahmad Shah Massoud ជាមេបញ្ជាការកំពូលមួយរូបរបស់សម្ព័ន្ធយោធាភាគខាងជើង ដែលធ្លាប់ប្រយុទ្ធប្រឆាំងនឹង តាលីបង់ រហូតដល់ពេល សហរដ្ឋអាមេរិក បានផ្ដួលរំលំកាលពីឆ្នាំ 2001។ អតីតអនុប្រធានាធិបតី Saleh និងអតីតរដ្ឋមន្ត្រីស្ដីទីនៃក្រសួងការពារជាតិ Bismillah Khan Mohammadi ក៏ធ្លាក់ជាសមាជិកនៃ សម្ព័ន្ធយោធាភាគខាងជើង ផងដែរ៕

August 19, 2021

តាលីបង់ ប្រកាសថា «គ្មានរបបលទ្ធិប្រជាធិបតេយ្យ» ឡើយ នៅ អាហ្វហ្កានីស្ថាន!

ក្រុម តាលីបង់ បានប្រកាសថា លទ្ធិប្រជាធិបតេយ្យពុំមានមូលដ្ឋានគ្រឹះនៅ អាហ្វហ្គានីស្ថាន នោះទេ ហើយប្រទេសនេះ អាចត្រូវបានគ្រប់គ្រងដោយក្រុមប្រឹក្សា តាលីបង់។

«នឹងពុំមានលទ្ធិប្រជាធិបតេយ្យណាមួយនោះឡើយ ពីព្រោះថា វាគ្មានមូលដ្ឋានគ្រឹះអ្វីទាំងអស់នៅក្នុងប្រទេសរបស់យើង។ យើងនឹងមិនពិភាក្សាអំពីប្រភេទរបបនយោបាយដែលនឹងត្រូវអនុវត្តនៅ អាហ្វហ្គានីស្ថាន ដោយសារវាច្បាស់លាស់អស់ទៅហើយ។ នោះគឺជាច្បាប់សាសនាអ៊ីស្លាម សារី (Sharia)» អ្នកនាំពាក្យ តាលីបង់ លោក Waheedullah Hashimi និយាយកាលពីថ្ងៃទី 18 សីហា ដោយចង់បញ្ជាក់ថា តាលីបង់ នឹងប្រើប្រាស់ច្បាប់សាសនាអ៊ីស្លាម។

យោងតាមអ្នកនាំពាក្យរូបនេះ អាហ្វហ្គានីស្ថាន អាចត្រូវបានដឹកនាំដោយក្រុមប្រឹក្សា តាលីបង់ និងមេបញ្ជាការកំពូល Haibatullah Akhundzada ដែលមានតួនាទីដូចទៅនឹងប្រធានាធិបតី។

ជនភៀសខ្លួន អាហ្វហ្គានីស្ថាន នៅព្រលានយន្តហោះ Hamid Karzai

រចនាសម្ព័ន្ធនៃអំណាចដែល Hashimi បានថ្លែងនេះ មានចំនុចប្រហាក់ប្រហែលនឹងវិធីដែល តាលីបង់ បានប្រើប្រាស់សម្រាប់គ្រប់គ្រង អាហ្វហ្គានីស្ថាន ក្នុងអំឡុងពីឆ្នាំ 1996 ដល់ឆ្នាំ 2001។ កាលណោះ មេបញ្ជាការកំពូល Mulllah Omar មិនបង្ហាញវត្តមាន ដោយទុកឱ្យក្រុមប្រឹក្សាមួយជាអ្នកដឹកនាំប្រទេស។

ក្រុមមេដឹកនាំ តាលីបង់ នឹងបើកកិច្ចប្រជុំមួយនៅចុងសប្ដាហ៍នេះ ដើម្បីពិភាក្សាគ្នា និងកំណត់យករបបដឹកនាំប្រទេស។ ក្នុងរយៈពេលច្រើនថ្ងៃមកនេះ ពិភពលោកបានមើលឃើញថា សមាជិក ក៏ដូចជាអ្នកនាំពាក្យជាច្រើនរូបរបស់ តាលីបង់ កំពុងតែបន្ទន់ឥរិយាបថខ្លាំង បើធៀបនឹងកាលពីជាង 20 ឆ្នាំមុន។ យ៉ាងនេះក្ដី ការលើកឡើងរបស់ Waheedullah Hashimi ហាក់មិនបានចូលរួមបន្ធូរបន្ថយការព្រួយបារម្ភរបស់ប្រជាជន ពិសេសគឺស្ត្រី ចំពោះរបប តាលីបង់ នោះទេ។

ចាប់តាំងពី សហរដ្ឋអាមេរិក ចាប់ផ្ដើមដកទ័ពចេញពី អាហ្វហ្គានីស្ថាន កាលពីខែឧសភា តាលីបង់ ក៏បានវាយលុក និងសម្រុកចូលកាន់កាប់រដ្ឋធានីកាប៊ុល បានសម្រេច កាលពីថ្ងៃទី 15 សីហា ដោយពុំមានការវាយប្រហារតបតពីកម្លាំងរដ្ឋាភិបាល។ ជនជាតិអាហ្វហ្គានីស្ថាន រាប់ពាន់នាក់ បានរត់ទៅកាន់ព្រលានយន្តហោះ ដើម្បីស្វែងរកវិធីចាកចេញពីប្រទេស៕

August 19, 2021

ស្ត្រី អាហ្វហ្គានីស្ថាន មានមន្ទិលចំពោះការសន្យារបស់ តាលីបង់

នៅពេលសកម្មជនសិទ្ធិស្ត្រីម្នាក់ រួមជាមួយនឹងប្អូនស្រីរបស់នាង ធ្វើដំណើរទៅផ្សារកាលពីថ្ងៃទី 17 សីហា កងទាហាន តាលីបង់ បានសម្លាក់សម្លឹងពួកគេ ដូចចង់ធ្វើអ្វីម្យ៉ាង ប៉ុន្តែ ពុំបានរំខានដល់អ្នកទាំងពីរឡើយ។

នៅ Herat ដែលជាទីក្រុងធំទីបីរបស់ អាហ្វហ្គានីស្ថាន សិស្សស្រី នៅតែអាចទៅរៀនជាមួយសិស្សប្រុស ប៉ុន្តែ ក្រុមទាហាន តាលីបង់ ឈរចាំចែកឈ្នួតក្បាលឱ្យពួកគេ។ នៅរដ្ឋធានីកាប៊ុល ស្ត្រីអ្នកយកព័ត៌មានមួយរូប បានសម្ភាសជាមួយមន្ត្រីម្នាក់របស់ តាលីបង់ នៅក្នុងបន្ទប់ថត ដែលនេះមិនធ្លាប់មាននៅក្នុងសម័យ តាលីបង់ កាលពីក្រុមនេះមិនទាន់ត្រូវបានផ្ដួលរំលំ។

ក្នុងអំឡុងកាន់អំណាច ពីឆ្នាំ 1996-2001 តាលីបង់ បានដាក់កំណត់យ៉ាងតឹងរ៉ឹងចំពោះស្ត្រី ដោយបង្ខំឱ្យស្ត្រីគ្របស្បៃជិតមុខ ហើយការចេញទៅខាងក្រៅ ត្រូវតែមានញាតិជាមនុស្សប្រុសម្នាក់ទៅជាមួយ។ ស្ត្រីពុំមានសិទ្ធិធ្វើការនៅខាងក្រៅគ្រួសារ និងមិនមានសិទ្ធិបោះឆ្នោត។ ស្ត្រី អាហ្វហ្គានីស្ថាន អាចត្រូវប្រឈមនឹងការដាក់ទណ្ឌកម្មយ៉ាងធ្ងន់ធ្ងរ បើសិនមិនគោរពតាមការកំណត់របស់ តាលីបង់ ក្នុងនោះរួមមានទាំងការវាយដំ ការគប់នឹងដុំថ្មរហូតដល់ស្លាប់ បើសិនត្រូវបានរកឃើញថា មានសហាយស្មន់។

អំឡុងពេលនោះ តាលីបង់ ថែមទាំងបិទទ្វារសាលារៀនសម្រាប់សិស្សស្រីដែលមានអាយុចាប់ពី 10 ឆ្នាំឡើងទៅទៀតផង។ ឆ្នាំ 1999 ពុំមានសិស្សស្រី អាហ្វហ្គានីស្ថាន ណាម្នាក់ បានរៀននៅសាលាមធ្យមសិក្សាឡើយ ហើយមានតែ 4% ប៉ុណ្ណោះ ក្នុងចំណោមក្មេងស្រី 9,000 នាក់ បានចូលសាលាបឋមសិក្សា។ គ្រប់យ៉ាងបានផ្លាស់ប្ដូរ នៅពេល តាលីបង់ ត្រូវបាន សហរដ្ឋអាមេរិក ផ្ដួលរំលំ កាលពីឆ្នាំ 2001 ក្នុងនោះ ក្មេងស្រីប្រមាណ 3.5 លាននាក់ នៅ អាហ្វហ្គានីស្ថាន បានទៅរៀនសូត្រ។

បច្ចុប្បន្ន ក្រោយការឡើងគ្រប់គ្រងប្រទេសបានប៉ុន្មានថ្ងៃ តាលីបង់ បានប្រឹងប្រែងបង្ហាញអំពីជំហរសន្តិភាព និងមិនតឹងរ៉ឹងដូចមុន ដោយបានសន្យាថា នឹងគោរពសិទ្ធិរបស់ស្ត្រី ហើយអញ្ជើញស្ត្រីឱ្យចូលធ្វើការក្នុងស្ថាប័នរដ្ឋាភិបាល។ ក៏ប៉ុន្តែ ស្ត្រី អាហ្វហ្គានីស្ថាន ជាច្រើន នៅតែមានមន្ទិលសង្ស័យចំពោះ តាលីបង់ ហើយមនុស្សជាច្រើននៅតែបញ្ចេញឥរិយាបថប្រុងប្រយ័ត្ន។

នៅពាសពេញផ្ទៃប្រទេស ពលរដ្ឋនៅតែស្ថិតនៅក្នុងផ្ទះ ដោយមានការភ័យខ្លាចក្នុងការឈានជើងចូលពិភពថ្មី ជាទីដែល តាលីបង់ ធ្លាប់បានធ្វើបាបស្ត្រី និងកាត់បន្ថយសកម្មភាពរបស់ពួកគេ ហើយពេលនេះបានឡើងកាន់អំណាចជាថ្មី។

ស្ត្រី អាហ្វហ្គានីស្ថាន កំពុងមានព្រួយបារម្ភ ខ្លាចសម័យកាលដ៏ខ្មៅងងឹត វិលត្រលប់មកវិញ

ស្ត្រីជាគ្រូបង្រៀនជនជាតិអឺរ៉ុបម្នាក់ នៅរដ្ឋធានីកាប៊ុល បានឱ្យដឹងថា ការភ័យខ្លាច កំពុងកើតមានគ្រប់ទីកន្លែងក្នុងរដ្ឋធានី។ «ពួកគេ (តាលីបង់) ចាប់ផ្ដើមដើរត្រួតពិនិត្យគ្រប់ផ្ទះ ហើយជួនកាលក៏សម្រុកចូលក្នុងផ្ទះប្រជាជន។ ពួកគេនិយាយថា ពួកគេនឹងឱ្យប្រជាជនរស់នៅដោយសុខសាន្ត ក៏ប៉ុន្តែ ទង្វើរបស់ពួកគេ គឺជាសញ្ញាបង្ហាញថា សម្ដីរបស់ពួកគេ មិនមែនជាការពិត»។

តាលីបង់ ចាប់ផ្ដើមដើរស្វែងរកអ្នកកាសែត ក្រុមមនុស្សដែលធ្វើការឱ្យក្រុមប្រឆាំង រួមនឹងគោលដៅដទៃទៀត។ នេះបើតាមសម្ដីរបស់អ្នកគ្រូជនជាតិអឺរ៉ុបខាងលើ។

«ខ្ញុំមិនជឿសម្ដីរបស់ តាលីបង់ ឡើយ» នារីជាពិធីការិនីម្នាក់ វ័យ 29 ឆ្នាំ នៅរដ្ឋធានីកាប៊ុល បាននិយាយដូច្នេះ។ នារីរូបនេះ កំពុងលាក់ខ្លួនក្នុងផ្ទះរបស់សាច់ញាតិ កាលពីថ្ងៃទី 17 សីហា។

ស្ត្រី អាហ្វហ្គានីស្ថាន ក្រោមការគាំទ្ររបស់ សហរដ្ឋអាមេរិក

នៅខេត្ត Herat ភាគខាងលិច អាហ្វហ្គានីស្ថាន Zahra វ័យ 26 ឆ្នាំ ជាសកម្មជនសិទ្ធិស្ត្រី បាននិយាយថា អ្នកស្រុកស្ទើរតែទាំងអស់ ពិសេសគឺស្ត្រី កំពុងស្ថិតនៅក្នុងផ្ទះនៅឡើយ កាលពីថ្ងៃទី 17 សីហា ក្រោយពី តាលីបង់ ឡើងកាន់អំណាចបាន 5 ថ្ងៃ។

Zahra សង្ឃឹមថា នឹងបានឡើងយន្តហោះចាកចេញពី អាហ្វហ្គានីស្ថាន នាពេលខាងមុខ។ នាងនិយាយថា កាលពីថ្ងៃទី 17 សីហា នាងទៅផ្សារទិញរបស់របរមុនពេលចេញដំណើរ។ ក្នុងឈុតរ៉ូបវែង និងឈ្នួតប្រពៃណីលើក្បាល នាង និងប្អូនស្រី ត្រូវទាហាន តាលីបង់ មួយចំនួន សម្លឹងមុខមិនដាក់ភ្នែក ហាក់បីដូចជាការមើលងាយ និងចង់គំរាម គួរឱ្យភ័យខ្លាច៕

August 18, 2021

អង់គ្លេស នឹងទទួលជនភៀសខ្លួន អាហ្វហ្គានីស្ថាន 20,000 នាក់

ចក្រភពអង់គ្លេស នឹងទទួលយកជនភៀសខ្លួន អាហ្វហ្គានីស្ថាន ចំនួន 20,000 នាក់ ទៅតាមផែនការរយៈពេល 5 ឆ្នាំ ក្នុងគ្រាដែលពលរដ្ឋជាច្រើន បានរត់គេចពីក្រុម តាលីបង់។

«អង់គ្លេស មានបំណុលមនោសញ្ចេតនាចំពោះមនុស្សគ្រប់គ្នាដែលបានធ្វើការជាមួយយើង ដើម្បីប្រែក្លាយ អាហ្វហ្គានីស្ថាន ទៅជាទីកន្លែងល្អប្រសើរជាងមុន ក្នុងអំឡុង 20 ឆ្នាំកន្លង។ មនុស្សជាច្រើនក្នុងចំណោមពួកគេ ពិសេសគឺស្ត្រី កំពុងត្រូវការជំនួយជាបន្ទាន់របស់យើង។ ខ្ញុំមានមោទកភាពណាស់ ដោយ អង់គ្លេស អាចអនុវត្តដំណាក់កាលនេះដើម្បីជួយពួកគេ និងគ្រួសារ រស់នៅដោយសុវត្ថិភាពនៅប្រទេស អង់គ្លេស» នាយករដ្ឋមន្ត្រីអង់គ្លេស Boris Johnson បានថ្លែងដូច្នេះកាលពីថ្ងៃទី 17 សីហា នៅពេលប្រកាសអំពីគម្រោងទទួលជនភៀសខ្លួន អាហ្វហ្គានីស្ថាន។

ក្នុងឆ្នាំដំបូង ជនភៀសខ្លួន 5,000 នាក់ដែលមានលក្ខខណ្ឌគ្រប់គ្រាន់ រួមមានស្ត្រី និងកុមារី រួមនឹងក្រុមសាសនិកភាគតិច នឹងទទួលបានអាទិភាព។

ក្រសួងមហាផ្ទៃ អង់គ្លេស ឱ្យដឹងថា «ផែនការទទួលជនភៀសខ្លួននេះ នឹងត្រូវបានពិនិត្យមើលបន្តទៀតក្នុងបណ្ដាឆ្នាំបន្ទាប់ ដោយមនុស្សចំនួន 20,000 នាក់ នឹងត្រូវបានទទួលយកក្នុងរយៈពេលយូរ»។

នាយករដ្ឋមន្ត្រី អង់គ្លេស លោក Boris Johnson និងលោកស្រី រដ្ឋមន្ត្រីក្រសួងមហាផ្ទៃ អង់គ្លេស Priti Patel

លោកស្រីរដ្ឋមន្ត្រីក្រសួងមហាផ្ទៃ អង់គ្លេស Priti Patel ក៏បានអំពាវនាវដល់បណ្ដាប្រទេស ឱ្យជួយដល់ជនភៀសខ្លួន អាហ្វហ្គានីស្ថាន។ លោកស្រីបញ្ជាក់ថា៖ «យើងខ្ញុំមិនអាចធ្វើរឿងនេះតែម្នាក់ឯក»។

កម្មវិធីស្រដៀងគ្នានេះ ធ្លាប់ត្រូវបាន អង់គ្លេស ធ្វើឡើងនៅប្រទេស ស៊ីរី រួចហើយ ដោយបានទទួលយកជនភៀសខ្លួន 20,000 នាក់ ទៅរស់នៅប្រទេស អង់គ្លេស ចាប់ពីឆ្នាំ 2014 ដល់ឆ្នាំ 2021។ ប៉ុន្តែ ក្រុមរដ្ឋមន្ត្រីទទួលស្គាល់ថា ការនាំមនុស្សចេញពី អាហ្វហ្គានីស្ថាន ជាក់ស្ដែង នឹងស្មុគស្មាញ ដោយសារកម្រិតនៃការត្រួតត្រារបស់ តាលីបង់។ បច្ចុប្បន្ន មិនទាន់ដឹងច្បាស់ថា តាលីបង់ នឹងអនុញ្ញាតឱ្យពលរដ្ឋរបស់ពួកគេចាកចេញទៅបរទេសក្នុងកម្រិតណានៅឡើយ។

សហរដ្ឋអាមេរិក និង អង់គ្លេស សន្យាថា នឹងបន្តសកម្មភាពជម្លៀសជនភៀសខ្លួនចេញពី អាហ្វហ្គានីស្ថាន។ អង់គ្លេស គឺជាប្រទេសសកម្មទីពីរ បន្ទាប់ពី សហរដ្ឋអាមេរិក នៅក្នុងការប្រយុទ្ធប្រឆាំងនឹង តាលីបង់ ក្រោយពីមានអំពើភេរវកម្មនៅ សហរដ្ឋអាមេរិក កាលពីថ្ងៃទី 11 កញ្ញា 2021។ ទាហានរបស់ អង់គ្លេស ជាង 450 នាក់ ក៏បានបាត់បង់ជីវិត នៅក្នុងសង្គ្រាម អាហ្វហ្គានីស្ថាន៕

August 18, 2021

Bloomberg ៖ «អាមេរិក បង្កកប្រាក់ជិត 9.5 ពាន់លានដុល្លារ របស់ អាហ្វហ្គានីស្ថាន»

មន្ត្រីមួយរូបរបស់រដ្ឋាភិបាលលោក Joe Biden បានទទួលស្គាល់ថា សហរដ្ឋអាមេរិក កំពុងបង្កកប្រាក់ជិត 9.5 ពាន់លានដុល្លារ ដែលជាកម្មសិទ្ធិរបស់ធនាគារជាតិ អាហ្វហ្គានីស្ថាន។

ទន្ទឹមនឹងការបង្កកប្រាក់ខាងលើ មន្ត្រី អាមេរិក រូបនេះក៏បានឱ្យដឹងថា សហរដ្ឋអាមេរិក ក៏បានផ្អាកការផ្ទេរសាច់ប្រាក់សុទ្ធទៅឱ្យ អាហ្វហ្គានីស្ថាន ផងដែរ។ សកម្មភាពនេះ ត្រូវបានធ្វើឡើងក្នុងបំណងរារាំងរដ្ឋាភិបាលដែលដឹកនាំដោយក្រុម តាលីបង់ អាចគ្រប់គ្រងប្រភពនៃខ្ទង់ប្រាក់នេះបាន។

ប្រភពព័ត៌មានរបស់ Bloomberg អះអាងថា រាល់ទ្រព្យសម្បត្តិរបស់ធនាគារជាតិណាមួយដែលត្រូវបានរដ្ឋាភិបាល អាហ្វហ្គានីស្ថាន ដាក់នៅឯ សហរដ្ឋអាមេរិក នឹងមិនត្រូវបានអនុញ្ញាតផ្ដល់ឱ្យ តាលីបង់ ព្រោះថា ក្រុមនេះនៅតែស្ថិតក្នុងបញ្ជីឈ្មោះនៃបណ្ដាក្រុមដែលត្រូវរងការដាក់ទណ្ឌកម្ម របស់ក្រសួងហិរញ្ញវត្ថុ សហរដ្ឋអាមេរិក។

ការដាក់ទណ្ឌកម្មរបស់ សហរដ្ឋអាមេរិក ចំពោះ តាលីបង់ គឺមានន័យថា ក្រុមប្រដាប់អាវុធនេះ មិនអាចចូលទៅគ្រប់គ្រងខ្ទង់ថវិកាណាទាំងអស់។ ប្រភពព័ត៌មានបញ្ជាក់ថា ភាគច្រើននៃខ្ទង់ប្រាក់ជិត 9.5 ពាន់លានដុល្លាររបស់ធនាគារជាតិ អាហ្វហ្គានីស្ថាន បច្ចុប្បន្ន មិនត្រូវបានគ្រប់គ្រងនៅ អាហ្វហ្គានីស្ថាន នោះទេ។ មកដល់ពេលនេះ ក្រសួងហិរញ្ញវត្ថុ អាមេរិក មិនទាន់បានអធិប្បាយអ្វីអំពីព័ត៌មាននេះនៅឡើយ៕

August 18, 2021

តាលីបង់ សន្យាថា អនុញ្ញាតឱ្យស្ត្រី អាហ្វហ្គានីស្ថាន ទៅរៀន និងទៅធ្វើការ

អ្នកនាំពាក្យរបស់ក្រុមប្រដាប់អាវុធ តាលីបង់ បានសន្យាថា ស្ត្រី អាហ្វហ្គានីស្ថាន នឹងមិនត្រូវរងការរើសអើង និងមានឱកាសទៅសិក្សារៀនសូត្រ ធ្វើការ «នៅក្នុងក្របខណ្ឌ» ច្បាប់សាសនាអ៊ីស្លាម។

«រដ្ឋអ៊ីស្លាម (Islamic Emirate of Afghanistan) គោរពសិទ្ធិរបស់ស្ត្រី ក្នុងក្របខណ្ឌច្បាប់សាសនាអ៊ីស្លាម Sharia» អ្នកនាំពាក្យរបស់ តាលីបង់ លោក Zabihullah Mujahid ថ្លែងដូច្នេះ កាលពីថ្ងៃទី 17 សីហា ក្នុងសន្និសីទសារព័ត៌មានដំបូងរបស់ តាលីបង់ ក្រោយពីក្រុមនេះ គ្រប់គ្រងរដ្ឋធានីកាប៊ុល នៃប្រទេសអាហ្វហ្គានីស្ថាន។

លោក Zabihullah Mujahid និយាយថា ស្ត្រីនៅ អាហ្វហ្គានីស្ថាន នឹងទទួលបានសិទ្ធិ និង «សកម្មភាពក្នុងវិស័យ និងតំបន់ផ្សេងគ្នា ដោយយោងទៅតាមវិន័យ និងការកំណត់» ក្នុងនោះមានទាំងវិស័យអប់រំ សុខាភិបាល នគរបាល និងប្រព័ន្ធយុត្តិធម៌។

សិស្សសាលាវិចិត្រសិល្បៈក្នុងឈុតឈ្នួត Hijab នៅ អាហ្វហ្គានីស្ថាន

«ខ្ញុំចង់ធានាដល់គ្រប់គ្នាថា នឹងពុំមានការរើសអើងណាមួយចំពោះស្ត្រី ប៉ុន្តែ ពិតណាស់ ត្រូវតែស្ថិតក្នុងក្របខណ្ឌរបស់យើងខ្ញុំ» អ្នកនាំពាក្យរបស់ តាលីបង់ បញ្ជាក់បន្ថែម ប៉ុន្តែ មិនបាននិយាយលម្អិតអំពីក្របខណ្ឌនេះនោះទេ។

ឆ្លើយតបនឹងសំនួរអំពីលទ្ធភាពដែលស្ត្រី អាហ្វហ្គានីស្ថាន អាចបន្តធ្វើការក្នុងផ្នែកផ្សព្វផ្សាយ លោក Mujahid និយាយថា តាលីបង់ មិនទាន់បង្កើតរដ្ឋាភិបាល ហើយប្រទេសនេះ ត្រូវការពេលវេលាដើម្បីបង្កើតច្បាប់។

មុននេះ អ្នកនាំពាក្យមួយរូបផ្សេងទៀតរបស់ តាលីបង់ គឺលោក Suhail Shaheen បានអះអាងថា ស្ត្រីអាហ្វហ្កានីស្ថាន នៅតែអាចធ្វើការ និងរៀនដល់កម្រិតមហាវិទ្យាល័យ។ លោកថា តាលីបង់ សន្យាថា គោរពសិទ្ធិទទួលបានការអប់រំ ធ្វើការ និងសេរីភាពបញ្ចេញមតិ របស់ស្ត្រី «ក្រោមពន្លឺនៃច្បាប់សាសនាអ៊ីស្លាម»។

លោក Suhail Shaheen បន្ថែមថា តាលីបង់ នឹងមិនបង្ខំឱ្យស្ត្រីអាហ្វហ្គានីស្ថាន ពាក់ស្បៃ Burqa ដែលជាឈុតសម្លៀកបំពាក់ គ្របពីក្បាលដល់ចុងជើង នោះទេ ដោយគ្រាន់តែស្នើឱ្យពួកគេប្រើប្រាស់ឈ្នួត hijab ប្រពៃណីរបស់អ៊ីស្លាមសាសនិក (មូស្លីម)។

គួររំលឹកថា មុនពេលត្រូវបាន សហរដ្ឋអាមេរិក ផ្ដួលរំលំកាលពីឆ្នាំ 2001 ក្រុមតាលីបង់ មានឈ្មោះល្បីខ្លាំង ខាងប្រើច្បាប់អ៊ីស្លាមដ៏មហាតឹងរ៉ឹង នៅក្នុងអំឡុង 5 ឆ្នាំនៃការកាន់កាប់អំណាច ក្នុងនោះក៏មានការបង្ខំឱ្យស្ត្រីស្លៀកពាក់ជិតពីក្បាលដល់ចុងជើង ការហាមក្មេងស្រីមិនឱ្យទៅសាលារៀន និងដាក់ពិន័យលើស្ត្រីដែលចេញដើរតាមផ្លូវដោយមិនមានសាច់ញាតិជាមនុស្សប្រុសទៅជាមួយ៕

August 18, 2021

តាលីបង់ ប្រកាសថា «គំនុំគុំកួន បានបញ្ចប់ហើយ» ខណៈអនុប្រធានាធិបតី ប្រកាសថា ខ្លួនជាមេដឹកនាំស្របច្បាប់

ក្រុមតាលីបង់ ដែលទើបដណ្ដើមបានជ័យជំនះលើ សហរដ្ឋអាមេរិក ក៏ដូចជារដ្ឋាភិបាល អាហ្វហ្គានីស្ថាន បានឱ្យដឹងថា «គំនុំគុំកួន ត្រូវបានបញ្ចប់» និងមិនចង់មានសត្រូវណាមួយទៀតនោះឡើយ ទន្ទឹមនឹងការបោះជំហានទៅរកការបង្កើតរដ្ឋាភិបាលថ្មី។

«យើងគ្មានបំណងវិលទៅរកសង្គ្រាម ឬជម្លោះអ្វីទៀតនោះទេ។ ការគុំកួននឹងគ្នា បានបញ្ចប់ ហើយយើងចង់រស់នៅក្នុងសន្តិភាព។ យើងមិនចង់មានសត្រូវណាមួយទេ ទាំងក្នុង និងក្រៅប្រទេស» អ្នកនាំពាក្យរបស់ តាលីបង់ Zabihullah Mujahid និយាយដូច្នេះនៅក្នុងសន្និសីទសារព័ត៌មានកាលពីថ្ងៃទី 17 សីហា។

នេះគឺជាសន្និសីទសារព័ត៌មានដំបូងបង្អស់ រាប់ចាប់ពី តាលីបង់ ដណ្ដើមបានជ័យជំនះស្ទើរតែទាំងស្រុងនៅ អាហ្វហ្គានីស្ថាន កាលពីថ្ងៃទី 15 សីហា។ លោក Zabihullah Mujahid បញ្ជាក់ថា «អាហ្វហ្គានីស្ថាន នឹងមានរដ្ឋាភិបាលអ៊ីស្លាម ដ៏ខ្លាំងក្លាមួយ»។

យោងតាម Zabihullah Mujahid មេដឹកនាំកំពូលរបស់ តាលីបង់ បានប្រកាសលើកលែងទោសរួមរួចហើយ និងសន្យាថា ធានាសុវត្ថិភាពដល់ក្រុមអ្នកម៉ៅការ អ្នកបកប្រែដែលធ្លាប់ធ្វើការឱ្យ អាមេរិក និងសម្ព័ន្ធមិត្តរបស់ អាមេរិក ក៏ដូចជាទាហានរបស់រដ្ឋាភិបាលដែលប្រឆាំងនឹង តាលីបង់ រួមទាំងគ្រួសាររបស់ពួកគេ ដែលព្យាយាមចាកចេញពី អាហ្វហ្គានីស្ថាន។

ទោះជាយ៉ាងនេះក្ដី អនុប្រធានាធិបតី អាហ្វហ្គានីស្ថាន លោក Amrullah Saleh បានប្រកាសដែរថា លោកគឺជាមេដឹកនាំបណ្ដោះអាសន្នស្របច្បាប់ បន្ទាប់ពីប្រធានាធិបតី Ashraf Ghani ចាក់ចេញពីប្រទេស។

«យោងតាមរដ្ឋធម្មនុញ្ញរបស់ អាហ្វហ្គានីស្ថាន នៅពេលប្រធានាធិបតីអវត្តមាន រត់គេចខ្លួន លាលែងពីតំណែង ឬទទួលមរណភាព អនុប្រធានាធិបតីទីមួយ ត្រូវក្លាយជាប្រធានាធិបតីបណ្ដោះអាសន្ន។ ខ្ញុំកំពុងមានវត្តមាននៅក្នុងប្រទេសរបស់ខ្ញុំ និងជាប្រធានាធិបតីបណ្ដោះអាសន្នស្របច្បាប់។ ខ្ញុំកំពុងទាក់ទងទៅកាន់មេដឹកនាំនានា ដើម្បីធានាចំពោះការគាំទ្រ និងការយល់ស្របរបស់ពួកគេ» លោក Amrullah Saleh សរសេរនៅលើ Twitter កាលពីម្សិលមិញដូច្នេះ។

ក្រុមតាលីបង់ ចូលគ្រប់គ្រងរដ្ឋធានីកាប៊ុល បានយ៉ាងងាយស្រួល កាលពីព្រលប់ថ្ងៃទី 15 សីហា។ តាលីបង់ ដណ្ដើមបានជោគជ័យលើកងទ័ពរដ្ឋាភិបាល អាហ្វហ្គានីស្ថាន ក្រោយពី សហរដ្ឋអាមេរិក និងសម្ព័ន្ធមិត្តបានដកទ័ពភាគច្រើនរបស់ពួកគេ ចេញពី អាហ្វហ្គានីស្ថាន។

នៅពេល តាលីបង់ ជិតចូលដល់រដ្ឋធានី ប្រធានាធិបតី អាហ្វហ្គានីស្ថាន Ashraf Ghani ក៏បានរត់ចោលប្រទេស ដោយលើកឡើងថា «ដើម្បីបញ្ចៀសការបង្ហូរឈាម» បណ្ដាលឱ្យរដ្ឋាភិបាលដែលគាំទ្រដោយប្រទេសលោកខាងលិច ត្រូវដួលរលំ។ ក្រុមតាលីបង់ បានចូលដល់វិមានប្រធានាធិបតី ហើយប្រកាសថានឹងបង្កើត រដ្ឋ Islamic Emirate of Afghanistan (បកប្រែក្រៅផ្លូវការថា រដ្ឋអ៊ីស្លាមរួបរួមនៃអាហ្វហ្គានីស្ថាន)៕

August 18, 2021

Category: អន្តរជាតិ