អន្តរជាតិ - La Reine Media

ចិន ចាប់ខ្លួនអតីតប្រធានក្រុមហ៊ុនផលិតអាវុធក្នុងស្រុក

អាជ្ញាធរចិន បានសម្រេចចិត្តចាប់ខ្លួន Yin Jiaxu អតីតប្រធានរបស់ Norinco ដែលជាក្រុមហ៊ុនមួយក្នុងចំណោមក្រុមហ៊ុនផលិតអាវុធធំបំផុតនៅ ប្រទេសចិន។

ការចាប់ខ្លួន Yin Jiaxu អាយុ 65 ឆ្នាំនេះ ត្រូវបានធ្វើឡើងក្រោមបទចោទ «សង្ស័យថាបានប្រព្រឹត្តអំពើស៊ីសំណូក ផ្ដល់ផលប្រយោជន៍ដោយខុសច្បាប់ទៅឱ្យសាច់ញាតិ និងមិត្តភក្ដិ»។

អតីតប្រធានក្រុមហ៊ុនឧស្សាហក្មភាគខាងជើងប្រទេស (Norinco) ត្រូវបានគណៈកម្មការជាតិអធិការកិច្ច និងវិន័យ (Central Commission for Discipline Inspection/CCDI) ស៊ើបអង្កេតរយៈពេល 7 ឆ្នាំមកហើយ ទាក់ទិននឹង «ការរំលោភយ៉ាងធ្ងន់ធ្ងរលើវិន័យ និងច្បាប់» (ឃ្លាដែលតែងត្រូវបានគេប្រើប្រាស់ជំនួសពាក្យពុករលួយ នៅ ប្រទេសចិន) មុនពេលត្រូវបានចាប់ខ្លួន។

លោក Yin Jiaxu ធ្លាប់ជាលេខាបក្ស និងជាប្រធានក្រុមហ៊ុន Norinco រហូតដល់ឆ្នាំ 2018។ លោកត្រូវបានប្រគល់ខ្លួនទៅឱ្យតុលាការកាលពីថ្ងៃទី 30 កញ្ញា ឆ្នាំ 2021 បន្ទាប់ពីត្រូវបណ្ដេញពីបក្ស និងដកហូតរាល់មុខតំណាង និងអត្ថប្រយោជន៍។

CCDI បានចោទលោក Yin ថា បានទទួលសំណូកជាទឹកប្រាក់ និងអំណោយយ៉ាងច្រើន ព្រមទាំងប្រើតួនាទីទាញយកផលប្រយោជន៍ជួយដល់អ្នកផ្សេង និងចែករំលែកសកម្មភាពជំនួញឱ្យទៅសាច់ញាតិ និងមិត្តភក្ដិ ដែលនាំឱ្យជាតិមានការខាតបង់ច្រើន។

មុនពេលបានឡើងកាន់តំណែងខ្ពស់បំផុតនៅ Norinco ក្នុងពីឆ្នាំ 2013 លោក Yin ធ្លាប់បានធ្វើការរយៈពេល 14 ឆ្នាំនៅក្នុងក្រុមហ៊ុនបុត្រសម្ព័ន្ធរបស់ Norinco ដែលមានជំនាញខាងផលិតរថយន្តទេសចរណ៍ រថយន្តដឹកទំនិញខ្នាតតូច និងរថយន្តដឹកទំនិញពាណិជ្ជកម្ម។ លោក ត្រូវបានគេចាត់ទុកថាជាកូនសោសំខាន់ដែលជួយឱ្យក្រុមហ៊ុន Norinco បានចាកផុតពីហានិភ័យនៃការក្ស័យធនកាលពីឆ្នាំ 1998។

លោក Yin គឺជាប្រធានជាន់ខ្ពស់ទីពីររបស់ Norinco ដែលបានប្រឈមនឹងតុលាការ ចាប់តាំងពីប្រធានាធិបតីចិន លោក ស៊ី ជីនពីង ផ្ដួចផ្ដើមយុទ្ធនាការប្រឆាំងអំពើពុករលួយកាលពី 9 ឆ្នាំមុន៕

October 26, 2021

ចិន ចាក់វ៉ាក់សាំង COVID-19 ដល់កុមារចាប់ពីអាយុ 3 ឆ្នាំ ដល់ 11 ឆ្នាំ

កុមារដែលមានអាយុចាប់ពី 3 ឆ្នាំ នៅ ប្រទេសចិន ចាប់ផ្ដើមទទួលបានការចាក់វ៉ាក់សាំងបង្ការ COVID-19 ក្នុងគ្រាដែលសម្បុកវីរុសថ្មី កំពុងកើតមាន។

អាជ្ញាធរនៃខេត្តយ៉ាងតិចចំនួន 5 របស់ ប្រទេសចិន បានប្រកាសបើកយុទ្ធនាការចាក់វ៉ាក់សាំងដល់កុមារអាយុចាប់ពី 3 ឆ្នាំ ដល់ 11 ឆ្នាំ។ ការពង្រីកវិសាលភាពនៃយុទ្ធនាការចាក់វ៉ាក់សាំងនេះ ធ្វើឡើងនៅពេលប្រទេសនេះកំពុងអនុវត្តវិធាការនានាដើម្បីគ្រប់គ្រងរលកនៃការផ្ទុះឆ្លងរាលដាលថ្មី។

គិតមកដល់បច្ចុប្បន្ន ប្រជាជនប្រមាណ 76% នៅ ប្រទេសចិន បានទទួលការចាក់វ៉ាក់សាំងគ្រប់ពីរដូសរួចហើយ ខណៈក្រុមមន្ត្រីកំពុងព្យាយាមរក្សាគោលការណ៍ «គ្មាន COVID-19» ចំពោះរលកនៃការឆ្លងដាលថ្មី។ ដើមសប្ដាហ៍នេះ ខេត្ត Gansu បានបិទទ្វាររាល់ទីតាំងទេសចរណ៍ ក្នុងពេលដែលប្រជាជននៅក្នុងអនុតំបន់មួយចំនួននៃតំបន់ស្វយ័ត ម៉ុងហ្គោលីខាងក្នុង (Inner Mongolia) ក៏ត្រូវបានស្នើឱ្យនៅក្នុងផ្ទះ ដោយសារមានករណីឆ្លងថ្មី៕

October 26, 2021

COVID-19! អ៊ីស្រាអែល ថា វ៉ារ្យ៉ង់ AY4.2 ឆ្លងរាលដាលខ្លាំងជាង Delta ទៅទៀត

អ្នកជំនាញរបស់ ប្រទេសអ៊ីស្រាអែល បានឱ្យដឹងថា វីរុស COVID-19 ប្រភេទ AY4.2 មានលទ្ធភាពឆ្លងរាលដាលខ្លាំងជាង ប៉ុន្តែសមត្ថភាពផ្ស៊ាំ ឬទប់ទល់នឹងវ៉ាក់សាំង ទំនងជាមិនអាចយកឈ្នះ Delta។

AY4.2 ដែលត្រូវបានរកឃើញដំបូងនៅ ប្រទេសអង់គ្លេស និងបានបង្ហាញខ្លួននៅ ប្រទេសអ៊ីស្រាអែល កាលពីសប្ដាហ៍មុន មានសមត្ថភាពឆ្លងរាលដាលខ្លាំងជាង Delta រហូតដល់ 15%។ នេះបើតាមលទ្ធផលនៃការស្រាវជ្រាវដំបូងរបស់ក្រសួងសុខាភិបាល អ៊ីស្រាអែល កាលពីថ្ងៃទី 24 តុលា។ ប៉ុន្តែ សមត្ថភាពក្នុងការទប់ទល់នឹងវ៉ាក់សាំងរបស់ AY4.2 នេះ ខ្សោយជាង Delta។ អ៊ីស្រាអែល រកឃើញវ៉ារ្យ៉ង់ AY4.2 ត្រឹមតែ 6 ករណីប៉ុណ្ណោះ ហើយសុទ្ធតែជាករណីនាំចូល។

វ៉ារ្យ៉ង់ AY4.2 ត្រូវបានក្រុមអ្នកវិទ្យាសាស្ត្រ អង់គ្លេស រកឃើញកាលពីខែមុន។ វាមិនទាន់ត្រូវបានគេចាត់ទុកថាជាវីរុសបំប្លែងខ្លួនថ្មីដែលគួរយកចិត្តទុកដាក់ ឬព្រួយបារម្ភនៅឡើយ ទើបអ្នកវិទ្យាសាស្ត្រមិនទាន់ដាក់ឈ្មោះទៅតាមអក្ខរក្រមក្រិក ដូចជា Alpha និង Delta ជាដើម។

អ្នកវិទ្យាសាស្ត្រកំពុងតាមដាន AY4.2 ដើម្បីឱ្យដឹងថា ការឆ្លងរាលដាលរបស់វាខ្លាំងកម្រិតណា។ ក្រុមមន្ត្រីរបស់ អង់គ្លេស ថ្មីៗនេះ បានប្រកាសថា វ៉ារ្យ៉ង់ថ្មីនេះមាន 6% ក្នុងចំណោមករណីឆ្លង COVID-19 ដែលត្រូវបានគេវិភាគនៅ អង់គ្លេស ហើយវា «កំពុងតែមានការកើនឡើង»។

Maria Van Kerkhove ប្រធានផ្នែកបច្ចេកទេសសម្រាប់បញ្ហា COVID-19 របស់អង្គការសុខភាពពិភពលោក (WHO) បានឱ្យដឹងនៅក្នុងសប្ដាហ៍នេះថា Delta នៅតែជាវ៉ារ្យ៉ង់ លេចធ្លោជាងគេនៅលើពិភពលោក។

វីរុសកាន់តែឆ្លងរាលដាល លទ្ធភាពនៃការកើតមានវ៉ារ្យ៉ង់ថ្មីក៏នឹងកើនឡើងខ្ពស់។ បច្ចុប្បន្ន WHO កំពុងតាមដានសាខាវ៉ារ្យ៉ង់ថ្មីចំនួន 20 របស់ Delta ក្នុងនោះក៏មាន AY4.2 ផងដែរ។ នេះបើតាមការបញ្ជាក់របស់លោកស្រី Maria Van Kerkhove៕

October 26, 2021

ប្រទេសក្រីក្រមានសង្ឃឹមហើយ! ខឹង Moderna មិនព្រមចែករំលែករូបមន្តវ៉ាក់សាំង WHO ក៏រត់ទៅរកក្រុមហ៊ុនផលិតឱសថបសុសត្វ ដើម្បីឱ្យជួយ

បន្ទាប់ពីក្រុមហ៊ុន Moderna បដិសេធសំណើចែករំលែករូបមន្តវ៉ាក់សាំង អង្គការសុខភាពពិភពលោក (WHO) ក៏បានបង្កើតគម្រោងថ្មីមួយភ្លាម ដើម្បីវិភាគរូបមន្ត ក៏ដូចជាបច្ចេកវិទ្យា mRNA ក្នុងបំណងបង្កើតវ៉ាក់សាំងមួយប្រភេទដែលដូចទៅនឹងវ៉ាក់សាំង Moderna។

Afrigen ដែលជាក្រុមហ៊ុនជំនាញខាងអភិវឌ្ឍវ៉ាក់សាំងសម្រាប់បសុសត្វ នៅ ប្រទេសអាហ្វ្រិកខាងត្បូង នៃ ទ្វីបអាហ្វ្រិក បានក្លាយជាស្ថាប័នស្នូលនៅក្នុងគម្រោងដែលមានតម្លៃ 100 លានដុល្លារ របស់ WHO។ ការបញ្ជាទិញដែលក្រុមហ៊ុននេះបានទទួលគឺ ការស្វែងរកវ៉ាក់សាំងបង្ការវីរុស COVID-19 ដោយប្រើប្រាស់បច្ចេកវិទ្យា mRNA ឱ្យដូច ឬប្រហាក់ប្រហែលទៅនឹងវ៉ាក់សាំងរបស់ Moderna។

កន្លងមក Afrigen ប្រើប្រាស់តែបច្ចេកវិទ្យាប្រពៃណីដើម្បីអភិវឌ្ឍវ៉ាក់សាំងសម្រាប់បសុសត្វ ប៉ុន្តែ ពួកគេបានសម្រេចចិត្តទទួលយកគម្រោងរបស់ WHO។ នាយកប្រតិបត្តិ Petro Treblanche បានអធិប្បាយថា បន្ទប់ពិសោធន៍របស់ក្រុមហ៊ុន ពេលនេះក្លាយទៅជា «សម្បុកឃ្មុំ» មួយ ដែលជំនាញខាងស្រាវជ្រាវបច្ចេកវិទ្យាវ៉ាក់សាំង mRNA។

នៅពេល Afrigen វិភាគដឹកអំពីដំណើរការដ៏ស្មុគស្មាញនៃការអភិវឌ្ឍវ៉ាក់សាំងបង្ការ COVID-19 របស់ Moderna ពេលនោះ WHO រួមនឹងដៃគូមួយចំនួននឹងបន្តវិនិយោគ ដើម្បីជួយឱ្យពួកគេអាចបង្រៀនបច្ចេកវិទ្យានេះដល់បណ្ដាប្រទេស។ Martin Friede ដែលជាមន្ត្រីម្នាក់ទទួលខុសត្រូវលើគម្រោងខាងលើរបស់ WHO បានហៅបន្ទប់ពិសោធន៍របស់ក្រុមហ៊ុន Afrigen ថាជា «មជ្ឈមណ្ឌលផ្ទេរបច្ចេកវិទ្យាវ៉ាក់សាំង»។

«ក្រុមហ៊ុនផលិតវ៉ាក់សាំងមកពីជុំវិញពិភពលោកនឹងត្រូវបានអញ្ជើញឱ្យមករៀនសូត្រនូវដំណើរការទាំងអស់ដែលទាក់ទងនឹងការផលិត»។

លោកស្រី Petro Treblanche នាយិកាប្រតិបត្តិរបស់ក្រុមហ៊ុន Afrigen

Friede សង្ឃឹមថា គម្រោងនេះនឹងជួយបង្កើនការគ្របដណ្ដប់នៃបច្ចេកវិទ្យាវ៉ាក់សាំង mRNA នៅទូទាំងសកលលោក ពោលគឺមិនមែនត្រឹមតែជាការផ្ទេរទៅឱ្យក្រុមហ៊ុនមួយចំនួនតូចនោះទេ។ WHO យកចិត្តទុកដាក់ជាពិសេសទៅលើបណ្ដាក្រុមហ៊ុនផលិតវ៉ាក់សាំងនៃបណ្ដាប្រទេសដែលមានចំណូលទាប និងមធ្យម ជាប្រទេសដែលកំពុងខ្វះវ៉ាក់សាំងបង្ការ COVID-19 ជាងគេ។

Moderna កំពុងប្រឈមនឹងសម្ពាធកាន់តែខ្លាំងទាក់ទងនឹងបញ្ហាចែករំលែកបច្ចេកវិទ្យាផលិតវ៉ាក់សាំងទៅឱ្យពិភពលោក។ កាលពីសប្ដាហ៍មុន តំណាងរាស្ត្រមួយចំនួនរបស់បក្សប្រជាធិបតេយ្យដែលបានឈរឈ្មោះនៅក្នុងលិខិតមួយ ឱ្យដឹងថា ក្រុមហ៊ុន Moderna បានទទួលកញ្ចប់ថវិកាឧបត្ថម្ភដ៏ធំពី រដ្ឋាភិបាលអាម៉េរិក នៅក្នុងដំណាក់កាលនៃការអភិវឌ្ឍវ៉ាក់សាំង ក្នុងនោះ ការស្រាវជ្រាវអំពីសមាសធាតុវ៉ាក់សាំង mRNA បានទទួលប្រាក់យ៉ាងតិច 1 ពាន់លានដុល្លារ។

ក្រុមតំណាងរាស្ត្រខាងលើយល់ថា រដ្ឋាភិបាល អាច និងគួរតែប្រើប្រាស់ការកំណត់ក្នុងកិច្ចព្រមព្រៀងជាមួយ Moderna ដោយបង្ខំឱ្យក្រុមហ៊ុនផលិតឱសថនេះចែករំលែករូបមន្តវ៉ាក់សាំងរបស់ពួកគេ។

គម្រោងដែល WHO ប្រគល់ឱ្យ Afrigen អាចចំណាយពេលចាប់ពី 3-4 ឆ្នាំ ទើបអាចបង្កើតបានវ៉ាក់សាំងបង្ការ COVID-19 «ចម្លង» ពីគេ ដោយប្រើប្រាស់បច្ចេកវិទ្យា mRNA។ ក្នុងករណី WHO បញ្ចុះបញ្ចូល Moderna បានដោយជោគជ័យទាក់ទងនឹងការចែករំលែកបច្ចេកវិទ្យា Friede សង្ឃឹមថា បណ្ដាក្រុមហ៊ុនផលិតវ៉ាក់សាំងនៅក្នុងបណ្ដាប្រទេសក្រីក្រ អាចនឹងផលិតបានវ៉ាក់សាំងដំបូងក្រោយរយៈពេលពីរឆ្នាំ៕

October 25, 2021

រដ្ឋប្រហារយោធានៅ ស៊ូដង់! នាយករដ្ឋមន្ត្រី និងរដ្ឋមន្ត្រីច្រើនរូបត្រូវបានឃុំខ្លួន

កងទ័ពរបស់ ប្រទេសស៊ូដង់ ត្រូវបានគេជឿថា កំពុងឃុំខ្លួននាយករដ្ឋមន្ត្រី Hamdok នៅក្នុងផ្ទះ និងចាប់ខ្លួនរដ្ឋមន្ត្រី 4 រូប ក្រោយពីមានការខ្វែងគំនិតជាមួយនឹងអាជ្ញាធរស៊ីវិលអស់ជាច្រើនខែ។

នាយករដ្ឋមន្ត្រី Abdalla Hamdok ត្រូវបានឃុំខ្លួនក្នុងផ្ទះចាប់ពីព្រឹកនេះ បន្ទាប់ពីអង្គភាពមួយនៃកងទ័ពបានឡោមព័ទ្ធផ្ទះរបស់លោកនៅឯរដ្ឋធានី Khartoum។ ទូរទស្សន៍ Al Hadath បានរាយការណ៍ថា ក្រុមមនុស្សដែលស្លៀកឈុតទាហាន និងប្រដាប់ដោយអាវុធ ក៏បានចាប់ខ្លួនមន្ត្រីជាន់ខ្ពស់មួយចំនួននៅក្នុងរដ្ឋាភិបាល ក្នុងនោះក៏មានទាំងរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងព័ត៌មាន ទីប្រឹក្សាផ្នែកសារព័ត៌មានរបស់នាយករដ្ឋមន្ត្រី និងសមាជិកម្នាក់នៃក្រុមប្រឹក្សាអធិបតេយ្យ។

ក្រសួងព័ត៌មានរបស់ ស៊ូដង់ ក្រោយមកបានចេញប្រកាសទទួលថា រដ្ឋមន្ត្រីជាច្រើនរូបត្រូវបាន «កងកម្លាំងចម្រុះ» ចាប់ខ្លួន។ «បន្ទាប់ពីនាយករដ្ឋមន្ត្រី Hamdok បដិសេធមិនចូលរួមធ្វើរដ្ឋប្រហារ អង្គភាពមួយរបស់កងទ័ព បានចាប់ខ្លួនលោក និងនាំទៅកាន់ទីតាំងអាថ៌កំបាំង» សេចក្ដីប្រកាស មានឃ្លាមួយសរសេរដូច្នេះ។

ក្រុមអ្នកយកព័ត៌មានរបស់ AFP បានឱ្យដឹងថា បណ្ដាញអ៊ីនធើណិត ត្រូវបានកាត់ផ្ដាច់ទូទាំងប្រទេស នៅពេលមានបាតុកម្មកើតឡើងនៅតាមដងផ្លូវដើម្បីប្រឆាំងនឹងទង្វើរបស់កងទ័ព។ ទាហានត្រូវបានគេដាក់ពង្រាយនៅតាមបណ្ដោយផ្លូវទៅកាន់រដ្ឋធានី ខណៈទូរទស្សន៍ជាតិកំពុងចាក់ផ្សាយបទចម្រៀងស្នេហាជាតិ។

សមាគមអ្នកជំនាញស៊ូដង់ ដែលជាក្រុមគាំទ្រប្រជាធិបតេយ្យ បានហៅទង្វើរបស់កងទ័ពថាជាអំពើរដ្ឋប្រហារយោធា និងបានអំពាវនាវឱ្យប្រជាជនចេញធ្វើបាតុកម្មប្រឆាំង។

អស្ថិរភាពនយោបាយបានកើតឡើងនៅ ប្រទេសស៊ូដង់ បន្ទាប់ពីរដ្ឋប្រហារយោធាបរាជ័យមួយកាលពីខែមុន។ កាលណោះ ទាហានប្រហែល 40 នាក់ ត្រូវបានចាប់ខ្លួននៅពេលពួកគេកំពុងរកវិធីគ្រប់គ្រងអគាររបស់ស្ថានីយទូរទស្សន៍ជាតិ និងអគ្គបញ្ជាការដ្ឋានកងទ័ព។

បណ្ដាក្រុមដែលគាំទ្រដោយកងទ័ព និងក្រុមស៊ីវិលគាំទ្រប្រជាធិបតេយ្យនៅ ស៊ូដង់ បាន និងកំពុងប្រកួតប្រជែងគ្នាក្នុងការចែករំលែកអំណាច បន្ទាប់ពីមេដឹកនាំយូរឆ្នាំ Omar al-Bashir ត្រូវបានផ្ដួលរំលំកាលពីឆ្នាំ 2019។ Bashir បច្ចុប្បន្នជាប់ឃុំនៅក្នុងពន្ធនាគារនៅ Khartoum និងកំពុងប្រឈមនឹងការចោទប្រកាន់ជាច្រើន។

ក្រុមប្រឹក្សាអធិបតេយ្យស៊ូដង់ កំពុងទទួលបន្ទុកដឹកនាំប្រទេស ទៅតាមកិច្ចព្រមព្រៀងចែករំលែកអំណាចរវាងកងទ័ព និងកងកម្លាំងស៊ីវិល ក្រោយពី Bashir ត្រូវបានផ្ដួលរំលំ។ តាមគម្រោង ការបោះឆ្នោតនានានឹងត្រូវធ្វើឡើងនៅឆ្នាំ 2024៕

October 25, 2021

ប្រធានអង្គការ WHO បញ្ជាក់ថា «ជំងឺរាតត្បាត COVID-19 នឹងស្ថិតនៅយូរទៀតទើបអាចត្រូវបានបញ្ចប់»

ប្រធានអង្គការសុខភាពពិភពលោក (WHO) បានអះអាងថា ជាមួយនឹងអ្នកស្លាប់ជិត 50,000 នាក់ជារៀងរាល់សប្ដាហ៍ដោយសារតែឆ្លង COVID-19 នៅទូទាំងពិភពលោក ជំងឺរាតត្បាតនេះ នឹង «នៅយូរទៀត ទើបអាចបញ្ចប់»។

ប្រធាន WHO លោក Tedros Adhanom Ghebreyesus បានថ្លែងនៅក្នុងកិច្ចប្រជុំមួយនៅ រដ្ឋធានីប៊ែកឡាំង កាលពីចុងសប្ដាហ៍មុនថា មហារោគរាតត្បាត COVID-19 នឹងចប់ «នៅពេលពិភពលោកជ្រើសរើសការបញ្ចប់»។

«ប្រការនោះស្ថិតក្នុងដៃរបស់យើង។ យើងមានគ្រប់មធ្យោបាយដែលត្រូវការ ប៉ុន្តែ ពិភពលោកមិនបានប្រើប្រាស់មធ្យោបាយទាំងនោះឱ្យបានល្អ» លោក Tedros ថ្លែងដូច្នេះ និងបញ្ជាក់ថា ជំងឺរាតត្បាតនេះនៅអូសបន្លាយពេលយូរទៀត ខណៈករណីស្លាប់ដោយសារ COVID-19 នៅតែកើនឡើង ដោយស្លាប់ប្រហែល 50,000 នាក់ក្នុងមួយសប្ដាហ៍។

គិតមកដល់បច្ចុប្បន្ន ពិភពលោកមានអ្នកឆ្លង COVID-19 សរុបជាង 244,429,000 នាក់ និងស្លាប់សរុបជាង 4,963,760 នាក់ ស្របពេលដែលមនុស្សជាង 17,996,380 នាក់ កំពុងព្យាបាលជំងឺនេះ ក្នុងនោះ ទ្វីបអឺរ៉ុប បច្ចុប្បន្នគឺជាតំបន់ដែលមានករណីឆ្លងច្រើនជាងគេ៕

October 25, 2021

ថ្នាំព្យាបាលប្រភេទថ្មី ទប់ស្កាត់អាការធ្ងន់ធ្ងរនៃជំងឺ COVID-19 និងមានប្រសិទ្ធភាពជិត 20 ខែ

ដោយគ្រាន់តែចាក់លើសាច់ដុំ ថ្នាំប្រភេទថ្មីនេះ នឹងមានសមត្ថភាពក្នុងការទប់ស្កាត់ជំងឺ COVID-19 មិនឱ្យវិវឌ្ឍទៅជាធ្ងន់ធ្ងរ ឬស្លាប់ ក្នុងរយៈពេលរហូតដល់ 18 ខែឯណោះ។

ក្រុមហ៊ុន AstraZeneca របស់ ប្រទេសអង់គ្លេស ថ្មីៗនេះបានប្រកាសលទ្ធផលនៃការពិសោធលើមនុស្សដំណាក់កាលទីបី ដែលជាដំណាក់កាលចុងក្រោយមុននឹងត្រូវបានអនុម័តឱ្យយកទៅប្រើប្រាស់ បង្ហាញថា វិធីសាស្ត្រថ្មីក្នុងការព្យាបាលជំងឺ COVIDD-19 ដោយប្រើថ្នាំ AZD7442 របស់ក្រុមហ៊ុននេះ មានប្រសិទ្ធភាពក្នុងការទប់ស្កាត់ជំងឺ COVID-19 មិនឱ្យមានអាការធ្ងន់ធ្ងរ ឬស្លាប់ នៅក្នុងរង្វង់ 18 ខែ។

AZD7442 មានផ្ទុកអង្គបដិប្រាណ ជាធាតុដែលដើមឡើយត្រូវបានផលិតឡើងដោយរាងកាយ ដើម្បីប្រតិកម្មជាមួយនឹងវីរុស ឬត្រូវបានរាងកាយផលិតឡើងបន្ទាប់ពីបានចាក់វ៉ាក់សាំង។ ពួកវាធ្វើសកម្មភាពដោយការមើលស្គាល់ផ្នែកជាក់លាក់របស់វីរុស COVID-19 ហើយធ្វើការវាយប្រហារដោយផ្ទាល់ ឬទប់ស្កាត់សកម្មភាពរបស់វីរុស និង «ដាក់ស្លាក» លើវីរុស ដើម្បីឱ្យផ្នែកដទៃនៃប្រព័ន្ធការពាររាងកាយ កម្ចាត់ចោល។

ក្រោយពីបានកម្ចាត់វីរុស អង្គបដិប្រាណទាំងនេះក៏នៅតែស្ថិតនៅក្នុងរាងកាយមួយរយៈពេល បង្កើតបានជាផ្នែកមួយនៃបណ្ដាញចងចាំរបស់ប្រព័ន្ធការពាររាងកាយមនុស្ស។ នៅពេល អង់ទីហ្សែន បង្ហាញខ្លួន អង្គបដិប្រាណទាំងនេះនឹងចាត់ការភ្លាម។

ថ្នាំព្យាបាលថ្មី AZD7442 ប្រើប្រាស់អង្គបដិប្រាណពិសេសដែលហៅថា ម៉ូណូក្លូន (Monoclonal antibodies) ជាអង្គបដិប្រាណដែលត្រូវបានបង្កើតឡើងនៅក្នុងបន្ទប់ពិសោធន៍ ដោយធ្វើត្រាបតាមលទ្ធភាពនៃការការពារបែបធម្មជាតិរបស់រាងកាយ ប៉ុន្តែក្នុងករណីនេះគឺធ្វើត្រាបតាមប្រតិកម្មនៃប្រព័ន្ធភាពស៊ាំ ជាមួយនឹងវីរុស COVID-19។

ក្រុមអ្នកវិទ្យាសាស្ត្ររបស់ AstraZeneca សង្ឃឹមថា ថ្នាំ AZD7442 មួយដូស អាចការពារមនុស្សក្នុងរយៈពេលពី 12 ដល់ 18 ខែ ពីការកើតមានអាការធ្ងន់ធ្ងរដោយសារ COVID-19

នេះមិនមែនជាបច្ចេកវិទ្យាថ្មីនោះទេ ព្រោះថា វាត្រូវបានប្រើប្រាស់ដើម្បីព្យាបាលជំងឺជាច្រើនមុខរួចមកហើយ។ ជាងនេះ វាក៏ត្រូវបាន អនុម័តដំបូងគេ សម្រាប់ប្រើដើម្បីព្យាបាលជំងឺ COVID-19 នៅ ប្រទេសអង់គ្លេស កាលពីខែសីហា ឆ្នាំ 2021។

ក៏ប៉ុន្តែ ថ្នាំថ្មីរបស់ក្រុមហ៊ុន AstraZeneca នេះ ត្រូវបានអភិវឌ្ឍឡើងដោយមានបន្ថែមមុខងារថ្មីដែលសំខាន់ជាង អនុញ្ញាតឱ្យរក្សាទុកអង្គបដិប្រាណប្រឆាំង COVID-19 ក្នុងរាងកាយ រយៈពេលយូរជាង។

ក្រុមអ្នកវិទ្យាសាស្ត្ររបស់ AstraZeneca សង្ឃឹមថា ថ្នាំ AZD7442 មួយដូស អាចការពារមនុស្សក្នុងរយៈពេលពី 12 ដល់ 18 ខែ ពីការកើតមានអាការធ្ងន់ធ្ងរដោយសារ COVID-19។

លទ្ធផលនៃការពិសោធបានបង្ហាញថា ក្នុងចំណោមអ្នកប្រើថ្នាំ AZD7442 ចំនួន 407 នាក់ គឺមានតែ 18 នាក់ប៉ុណ្ណោះដែលមានអាការនៃជំងឺ COVID-19 ធ្ងន់ធ្ងរ ឬស្លាប់ បើធៀបនឹង 37 នាក់ ក្នុងចំណោម 415 នាក់ដែលបានប្រើថ្នាំបញ្ឆោត (Placebo)។ ប្រការនេះមានន័យថា ក្រុមមនុស្សដែលប្រើថ្នាំ AZD7442 ប្រឈមនឹងហានិភ័យកើតអាការធ្ងន់ធ្ងរទាបជាង 50% ធៀបនឹងក្រុមមនុស្សដែលប្រើថ្នាំបញ្ឆោត។ លទ្ធផលនៃការពិសោធក៏បង្ហាញដែរថា ការឆាប់បានព្យាបាលដោយប្រើថ្នាំ AZD7442 នាំមកនូវប្រសិទ្ធភាពខ្ពស់ជាង ធៀបនឹងវិធីសាស្ត្រព្យាបាលដទៃ។

ទោះជាយ៉ាងណាក៏ដោយ នេះគ្រាន់តែជាលទ្ធផលនៃការពិសោធដែលត្រូវបានធ្វើឡើងដោយភាគីក្រុមហ៊ុន។ គេត្រូវរង់ចាំការត្រួតពិនិត្យ វាយតម្លៃ និងការអនុម័តពីស្ថាប័នរដ្ឋ ក៏ដូចជាអង្គការសុខភាពពិភពលោក៕

October 25, 2021

ទាហាន 500 នាក់ និងឧទ្ធម្ភាគចក្រ 22 គ្រឿង ដេញចាប់ជនជូញដូរគ្រឿងញៀន នៅក្នុងព្រៃជ្រៅ

(កូឡុំប៊ី)-កងកម្លាំងពិសេសរបស់ ប្រទេសកូឡុំប៊ី ទើបតែបានចាប់ខ្លួនកំពូលអ្នកជួញដូរគ្រឿងញៀន Dairo Antonio Usuga ឬហៅថា Otoniel នៅក្នុងយុទ្ធនាការឡោមព័ទ្ធទ្រង់ទ្រាយធំ។

យោងតាមទូរទស្សន៍ RT ទាហានជាង 500 នាក់ និងឧទ្ធម្ភាគចក្រចំនួន 22 គ្រឿង បានចូលរួមក្នុងបេសកកម្មតាមចាប់ខ្លួន Otoniel នៅក្នុងព្រៃនៃតំបន់ Uraba ភាគពាយព្យនេះ ប្រទេសកូឡុំប៊ី កាលពីថ្ងៃទី 23 តុលា។

ទំហំនៃបេសកកម្មឡោមព័ទ្ធនេះចាប់ខ្លួននេះ ធំដល់ថ្នាក់សូម្បីតែបណ្ដាញសន្តិសុខដែលមាន 8 ស្រទាប់ ដឹកនាំដោយជនជួញដូរគ្រឿងញៀនរូបនេះ ក៏មិនអាចការពារបាន។

ក្រុមមន្ត្រីមូលដ្ឋានបានឱ្យដឹងថា យុទ្ធនាការដែលបានបណ្ដាលឱ្យប៉ូលិសម្នាក់ស្លាប់នេះ ត្រូវបានធ្វើឡើងដោយយោងទៅតាមព័ត៌មានសម្ងាត់ដែលផ្ដល់ឱ្យដោយ សហរដ្ឋអាម៉េរិក និងអង់គ្លេស។

នៅក្នុងថ្ងៃជាមួយគ្នា ក្រុមទាហានដែលមានអាវុធគ្រប់ប្រភេទ បានចាប់ និងនាំខ្លួន Otoniel ចេញពីព្រៃ។ នៅក្នុងរូបថតដែលចេញផ្សាយដោយសារព័ត៌មាន កូឡុំប៊ី គេឃើញថា មេគ្រឿងញៀននេះពាក់ស្បែកជើងកៅស៊ូកវែង។

ប្រធានាធិបតីកូឡុំប៊ី Ivan Duque បានប្រកាសថា ការចាប់ខ្លួន Otoniel នេះគឺជាការសំពងក្បាលដ៏ធ្ងន់បំផុតទៅលើបណ្ដាញជួញដូរគ្រឿងញៀននៅក្នុងប្រទេសនេះ ក្នុងអំឡុងមួយសតវត្សរ៍កន្លងមក។

Dairo Antonio Usuga ត្រូវបានគេចាត់ទុកថាជាមេដឹកនាំក្រុមសង្គមងងឹត Gulf Clan ដែលគ្រប់គ្រងបណ្ដាញជួញដូរទំនិញហាមឃាត់នៅក្នុងព្រៃ បង្កឱ្យមានការភ័យខ្លាចនៅពាសពេញភាគខាងជើងនៃ ប្រទេសកូឡុំប៊ី។ ក្រុមសង្គមងងឹតនេះមានខ្មាន់កាំភ្លើងចំនួន 1,200 នាក់ ដែលភាគច្រើនគឺជាទាហានរបបចាស់។ អាជ្ញាធរកូឡុំប៊ី ក៏បានចោទមេគ្រឿងញៀននេះអំពីបទបង្ខំឱ្យក្មេងៗចូលរួមក្នុងបណ្ដាញរបស់ពួកគេដោយប្រើកម្លាំងបាយ និងការរំលោភបំពានផ្លូវភេទ។

អង្គភាពប្រឆាំងគ្រឿងញៀន (DEA) របស់ សហរដ្ឋអាម៉េរិក កន្លងមក ធ្លាប់បានប្រកាសផ្ដល់រង្វាន់ 5 លានដុល្លារ ដល់អ្នកទាំងឡាយណាដែលបានចាប់ខ្លួន Otoniel។ កាលពីឆ្នាំ 2009 តុលាការនៅ Manhattan បានចោទប្រកាន់ជននេះពីបទជួញដូរគ្រឿងញៀន ក៏ដូចជាអំពើគាំទ្រដល់កងជីវពលដែលត្រូវបានចាត់ទុកថាជាក្រុមភេរវករនៅ សហរដ្ឋអាម៉េរិក។

Otoniel បានជួញដូរគ្រឿងញៀនប្រភេទ កូកាអ៊ីន ចំនួន 73 តោន ចូលទឹកដី អាម៉េរិក ចាប់ពីឆ្នាំ 2003 ដល់ 2014 ដោយឆ្លងកាត់បណ្ដាប្រទេស ដូចជា វ៉េណេស៊ុយអេឡា, ក្វាតេម៉ាឡា , ម៉ុកស៊ិក, ប៉ាណាម៉ា និង ហុងឌូរ៉ាស។

មេគ្រឿងញៀននេះ បានលាក់ខ្លួនពីសមត្ថកិច្ច កូឡុំប៊ី អស់រយៈពេលជាងមួយទសវត្ស៍មកហើយ។ ជននេះត្រូវបានគេជឿថា មិនដែលលាក់ខ្លួននៅកន្លែងតែមួយ លើសពីមួយយប់នោះឡើយ៕

October 25, 2021

មន្ត្រីការទូតចិន សង្ស័យថា «COVID-19 ឆ្លងពីបង្កងដែលនាំចូលពី សហរដ្ឋអាម៉េរិក»

គណនី Twitter របស់អគ្គកុងស៊ុលចិន រួមនឹងមនុស្សជាង 550 នាក់ផ្សេងទៀត បានផ្សព្វផ្សាយព័ត៌មានដែលនិយាយថា COVID-19 មាននៅក្នុងទំនិញជាបង្កងដែលនាំពី សហរដ្ឋអាម៉េរិក ចូលមកកាន់ ទីក្រុងអ៊ូហាន របស់ ប្រទេសចិន កាលពីខែវិច្ឆិកា ឆ្នាំ 2019។

Marcel Schliebs ដែលជាអ្នកជំនាញផ្នែកស្រាវជ្រាវព័ត៌មានមិនពិតប្រចាំសាកលវិទ្យាល័យ Oxford របស់ ចក្រភពអង់គ្លេស បានតាមដានសារទាំងឡាយដែលក្រុមមន្ត្រីការបរទេស និងសារព័ត៌មានចិន បានបង្ហោះនៅលើបណ្ដាញសង្គម Twitter ក្នុងរយៈពេល 18 ខែកន្លង។ កាលពីខែកញ្ញា អ្នកជំនាញរូបនេះបានរកឃើញ សម្មតិកម្ម «ដ៏គួរឱ្យភ្ញាក់ផ្អើល» ស្ដីពីប្រភពរបស់ COVID-19 ដែលត្រូវបានក្រុមមន្ត្រីការទូតចិន ផ្សព្វផ្សាយ។

កាលពីថ្ងៃទី 21 ខែតុលា ឆ្នាំ 2021 Schliebs បានឱ្យដឹងថា អគ្គកុលស៊ុលចិន ប្រចាំ ប្រទេសឥណ្ឌា Zha Liyou បានបង្ហោះសារមួយនៅលើ Twitter ថា COVID-19 ដែលបានផ្ទុះឆ្លងរាលដាលនៅ ទីក្រុងអ៊ូហាន អាចមានប្រភពពីបង្កងដែលនាំចូលពី រដ្ឋម៉ែន (Maine) របស់ សហរដ្ឋអាម៉េរិក កាលពីខែវិច្ឆិកា ឆ្នាំ 2019។ នេះគឺជាសម្មតិកម្មថ្មីបំផុតស្ដីពីប្រភពរបស់ COVID-19 ដែលត្រូវបានគណនី Twitter នានាដែលទាក់ទងនឹង ប្រទេសចិន បានលើកឡើងក្នុងរយៈពេលពីរឆ្នាំកន្លងទៅ។

បន្ទាប់ពីការស្រាវជ្រាវស៊ីជម្រៅ Schliebs បានរកឃើញថា មានបណ្ដាញគណនី Twitter ជាង 550 បានចូលរួមផ្សព្វផ្សាយសារខាងលើ ដែលសារទាំងនេះត្រូវបានបកប្រែជាភាសាផ្សេងៗជាច្រើន ដូចជា អង់គ្លេស បារាំង ប៉ូឡូញ កូរ៉េ និង ភាសាឡាតាំង ជាដើម ហើយសារទាំងនេះត្រូវបានបង្ហោះយ៉ាងទៀតទាត់ជារៀងរាល់ថ្ងៃ ក្នុងអំឡុងពីម៉ោង 8 ព្រឹក ដល់ម៉ោង 11 (ម៉ោងនៅទីក្រុងប៉េកាំង)។

Schliebs បញ្ជាក់ថា ក្នុងចំណោមគណនីរាប់រយខាងលើ មានគណនីមួយចំនួនហាក់ដូចជាគណនីក្លូន (clone) ដោយវាមានអ្នកតាមដាន (follower) តិចបំផុត ឬគ្មានសោះតែម្ដង។ គណនីមួយចំនួនទៀតត្រូវបានបញ្ជាក់ពីភាពត្រឹមត្រូវ ប៉ុន្តែត្រូវបានគេហែកចូលគ្រប់គ្រងដើម្បីផ្សព្វផ្សាយសម្មតិកម្មខាងលើ។

សមត្ថកិច្ចចិន ឈរយាមផ្សារបោះដុំគ្រឿងសមុទ្រនៅ ទីក្រុងអ៊ូហាន កាលពីឆ្នាំ 2020

«ពិតជាពិបាកធ្វើការសន្និដ្ឋាន ប៉ុន្តែ យើងអាចមើលឃើញថា សកម្មភាពទាំងនោះគឺជាយុទ្ធនាការឃោសនាព័ត៌មាន និងនាំមកនូវផលប្រយោជន៍សម្រាប់ ប្រទេសចិន» អ្នកជំនាញខាងលើអះអាងដូច្នេះ។

សារព័ត៌មានរបស់ ប្រទេសចិន កន្លងមកធ្លាប់បានផ្សាយច្រើនលើកអំពីការសម្មតិកម្មដែលថា COVID-19 អាចមានប្រភពពីអាហារបង្កក។ Schliebs ឱ្យដឹងថា អគ្គកុងស៊ុលចិន Zha Liyou កាលពីខែធ្នូ ឆ្នាំ 2020 បានបង្ហោះសារមួយឃ្លាដែលនិយាយថា COVID-19 អាចមកពីកន្លែងផ្សេង ចូលមកកាន់ អ៊ូហាន តាមរយៈទំនិញបង្កក ទន្ទឹមនឹងនេះក៏បានអំពាវនាវឱ្យមានការស្រាវជ្រាវលើសម្មតិកម្មមួយផ្សេងទៀតដែលយល់ថា កងទ័ពរបស់ សហរដ្ឋអាម៉េរិក ជាប់ទាក់ទិននឹងការចម្លង nCoV។

Schliebs បង្ហើបឱ្យដឹងដែរថា ខ្លួនបានចែករំលែកលទ្ធផលនៃការស្រាវជ្រាវនេះ ជាមួយ Twitter។ ក្រោយពីបានត្រួតពិនិត្យ បណ្ដាញសង្គមនេះក៏បានបិទគណនីទាំងឡាយខាងលើ ដោយយោងទៅតាមគោលការណ៍ទប់ស្កាត់ព័ត៌មានមិនពិត។

ដោយសារតែក្រុមស្រាវជ្រាវរបស់ Schliebs បានរកឃើញ និងស្រាវជ្រាវលើបណ្ដាញគណនីខាងលើយ៉ាងឆាប់រហ័ស ទើបឥទ្ធិពលរបស់វា «អាចមានតិចតួច» នៅពេលគណនីទាំងនោះត្រូវបានផ្អាកមុនពេលទាក់ទាញចំណាប់អារម្មណ៍បានច្រើន។ នេះបើតាមអ្នកជំនាញ Schliebs៕

October 23, 2021

រុស្ស៊ី រកឃើញករណីឆ្លង «COVID-19 ប្រភេទថ្មី» ដែលគ្រោះថ្នាក់ជាង Delta ទៅទៀត!

ប្រទេសរុស្ស៊ី បានរាយការណ៍អំពី «ករណីឆ្លង COVID-19 ប្រភេទថ្មី» នោះគឺវីរុសបំប្លែងខ្លួន AY.4.2 ដែលជាសាខាមួយរបស់វ៉ារ្យ៉ង់ Delta Plus ហើយត្រូវបានគេជឿថា ងាយឆ្លងជាង បើធៀបនឹង វ៉ារ្យ៉ង់ Delta ដំបូង។

អ្នកស្រាវជ្រាវ ជនជាតិរុស្ស៊ី Kamil Khafizov ថ្ងៃនេះបានឱ្យដឹងថា COVID-19 បំប្លែងខ្លួនថ្មី ឈ្មោះ AY.4.2 ងាយឆ្លងជាងប្រហែល 10% ធៀបនឹង វ៉ារ្យ៉ង់ Delta ដំបូង នាំឱ្យករណីឆ្លង និងស្លាប់ប្រចាំថ្ងៃនៅ ប្រទេសរុស្ស៊ី កើនឡើងខ្ពស់បំផុត។ Kamil Khafizov បញ្ជាក់ថា AY.4.2 អាចចូលមកជំនួស Delta ប៉ុន្តែ នេះគឺជាដំណើរការដែលអាចកើតឡើងយឺត។

លោក Kamil Khafizov អះអាងថា AY.4.2 អាចជ្រែកចូលទៅក្នុងកោសិកាឈាម។ លោកបន្ថែមថា «វ៉ាក់សាំងបច្ចុប្បន្ន មានប្រសិទ្ធភាពគ្រប់គ្រាន់ក្នុងការប្រឆាំងនឹងវីរុសបំប្លែងខ្លួនថ្មីនេះ»។

AY.4.2 ក៏កំពុងមាននិន្នាការកើនឡើងជាបន្តបន្ទាប់នៅ ប្រទេសអង់គ្លេស ដោយវាមានប្រហែល 6% ធៀបនឹងករណីឆ្លងសរុបក្នុងមួយសប្ដាហ៍ រាប់ចាប់ពីថ្ងៃទី 27 កញ្ញា នេះបើតាមរបាយការណ៍របស់ស្ថាប័នសុវត្ថិភាពសុខាភិបាល អង់គ្លេស ដែលបានប្រកាសកាលពីថ្ងៃទី 15 តុលា។ ក៏ប៉ុន្តែ រដ្ឋលេខាធិការក្រសួងសុខាភិបាលអង់គ្លេស លោក Sajid Javid កាលពីថ្ងៃទី 20 តុលា បានអះអាងថា ពុំមានមូលហេតុណាមួយដែលអាចឱ្យជឿបានថា AY.4.2 នឹងបង្កការគំរាមកំហែងធ្ងន់ធ្ងរជាង Delta នោះទេ។

Nikolay Kryuchkov អ្នកឯកទេសផ្នែកប្រព័ន្ធភាពស៊ាំរបស់ ប្រទេសរុស្ស៊ី ថ្លែងថា Delta និងវីរុសបំប្លែងខ្លួនថ្មីរបស់វា នឹងនៅតែមានឥទ្ធិពលជាងគេ ហើយក្នុងអនាគត ពួកវាអាចសម្របខ្លួនជាមួយនឹងវ៉ាក់សាំង ពិសេសនៅពេលអត្រាការចាក់វ៉ាក់សាំង ក្រោម ឬប្រហាក់ប្រហែលនឹង 50%។

ទាក់ទងនឹងព័ត៌មានខាងលើនេះ ក្រសួងសុខាភិបាលរុស្ស៊ី មិនទាន់បញ្ចេញមតិអ្វីនៅឡើយ៕

October 22, 2021

Category: អន្តរជាតិ