អន្តរជាតិ - La Reine Media

អាម៉េរិក ណែនាំឱ្យចាក់វ៉ាក់សាំង Pfizer និង Moderna ជំនួស Johnson & Johnson

CDC របស់ សហរដ្ឋអាម៉េរិក បានផ្ដល់អនុសាសន៍ដល់ពលរដ្ឋថា គួរចាក់វ៉ាក់សាំង Pfizer ឬ Moderna ជំនួសវ៉ាក់សាំង Johnson & Johnson ព្រោះតែមានការព្រួយបារម្ភអំពីហានិភ័យនៃបញ្ហាឈាមកកដោយសារតែវ៉ាក់សាំងនេះ។

«អនុសាសន៍ដែលត្រូវបានលើកឡើងនៅក្នុងថ្ងៃនេះ សង្កត់ធ្ងន់ទៅលើការសន្យារបស់មជ្ឈមណ្ឌលគ្រប់គ្រងនិងទប់ស្កាត់ជំងឺឆ្លង (CDC) របស់ អាម៉េរិក ស្ដីពីការផ្ដល់ព័ត៌មានប្រកបដោយវិទ្យាសាស្ត្រទៅតាមពេលវេលាជាក់ស្ដែងដល់ប្រជាជន» ប្រធាន CDC របស់ អាម៉េរិក លោកស្រី Rochelle Walensky បានប្រកាសដូច្នេះកាលពីថ្ងៃទី ១៦ ធ្នូ ២០២១។

ក្រុមប្រឹក្សាវ៉ាក់សាំងរបស់ CDC អាម៉េរិក មុននោះបានបោះឆ្នោតយល់ស្របទៅនឹងអនុសាសន៍នេះ ដោយសារតែហានិភ័យនៃបញ្ហាបង្កកំណកឈាមរបស់វ៉ាក់សាំង Johnson & Johnson។ CDC អាម៉េរិក បានណែនាំពលរដ្ឋ ចាក់វ៉ាក់សាំងណាដែលមានសុវត្ថិភាព និងប្រសិទ្ធភាពបំផុត ដូចជា Pfizer និង Moderna ជាដើម។

ប្រធាន CDC របស់ អាម៉េរិក លោកស្រី Rochelle Walensky

គិតត្រឹមខែកញ្ញា សហរដ្ឋអាម៉េរិក មានករណីស្លាប់ចំនួន ៩ នាក់ ដែលទាក់ទងនឹងបញ្ហាឈាមកក បន្ទាប់ពីបានទទួលការចាក់វ៉ាក់សាំងរបស់ Johnson & Johnson។ ៧ នាក់ ក្នុងចំណោមនោះ មានអាយុចាប់ពី ២៨ ឆ្នាំ ដល់ ៦២ ឆ្នាំ និងមានជំងឺប្រចាំកាយ ដូចជា ទឹកនោមផ្អែម សម្ពាធឈាមខ្ពស់ និងលើសទម្ងន់។ ចំណែកមនុស្សរាប់សិបនាក់ទៀតក៏មានបញ្ហាប្រតិកម្មធ្ងន់ធ្ងរ បន្ទាប់ពីបានចាក់វ៉ាក់សាំងនេះ៕

December 17, 2021

Dubai ក្លាយជារាជាណាចក្រដំបូងគេក្នុងពិភពលោកដែលមិនប្រើក្រដាស ១០០% ៖ សំច័យប្រាក់បាន ៣៥០ លានដុល្លារ និងពេលវេលាធ្វើការ ១៤ លានម៉ោង

ប្រជាជននៅក្នុងទីក្រុង Dubai ចាប់ពីពេលនេះតទៅ នឹងធ្វើលិខិតស្នាមដែលទាក់ទងនឹងកិច្ចការរដ្ឋបាលនៅលើកុំព្យូទ័រ ទូរស័ព្ទ ដោយមិនចាំបាច់ប្រើប្រាស់ក្រដាសអ្វីទាំងអស់។

យោងតាម Livemint រាជាណាចក្រ Dubai បានក្លាយជារដ្ឋាភិបាលដំបូងគេក្នុងពិភពលោកដែលធ្វើការផ្នែករដ្ឋបាលដោយមិនប្រើប្រាស់ក្រដាសស្នាម។ ព្រះអង្គម្ចាស់ Sheikh Hamdan bin Mohammed bin Rashid Al Maktoum នៃរាជាណាចក្រ Dubai ឱ្យដឹងថា រដ្ឋាភិបាលរបស់ពួកគេនឹងប្ដូរទៅប្រើប្រាស់បច្ចេកវិទ្យាឌីជីថលទាំងស្រុងនៅក្នុងការងាររដ្ឋបាល ហើយតាមរយៈកំណែទម្រង់នេះ ពួកគេក៏សំច័យប្រាក់បាន ១.៣ ពាន់លាន Dirham ដែលប្រហាក់ប្រហែលនឹង ៣៥០ លានដុល្លារអាម៉េរិក និងពេលវេលាធ្វើការចំនួន ១៤ លានម៉ោងផងដែរ។

គិតមកដល់បច្ចុប្បន្ន លិខិតស្នាមទាំងអស់ ត្រូវបានប្ដូរទៅជាឌីជីថល ១០០% ហើយត្រូវបានគ្រប់គ្រងដោយថ្នាលសេវាឌីជីថលរបស់រាជាណាចក្រនេះ។

កន្លងមក មានប្រទេសជាច្រើនដូចជា សហរដ្ឋអាម៉េរិក អង់គ្លេស អឺរ៉ុប ឬ កាណាដា ជាដើម ក៏មានគម្រោងធ្វើនវានុវត្តន៍ឌីជីថល ទៅលើសកម្មភាពរដ្ឋបាលរបស់រដ្ឋាភិបាលជាទ្រង់ទ្រាយធំ ប៉ុន្តែ មនុស្សជាច្រើនមានការបារម្ភអំពីហានិភ័យនៃការវាយប្រហារតាមប្រព័ន្ធអ៊ីនធើណិត។

នៅរាជាណាចក្រ Dubai នៃ អារ៉ាប់រួម (United Arab Emirates) ពលរដ្ឋប្រើប្រាស់កម្មវិធី (App) «Dubai Now» ដើម្បីធ្វើអន្តរកម្មជាមួយនឹងកិច្ចការរដ្ឋបាល ឬចូលទៅប្រើប្រាស់សេវាឆ្លាតវៃជាង ១៣០ ប្រភេទ របស់កម្មវិធីនេះ៕

December 17, 2021

ប្រទេសចំនួនជិតពាក់កណ្ដាលនៅតំបន់ អាស៊ីអាគ្នេយ៍ បានរកឃើញ អូមីក្រុង (Omicron)

វីរុសកូវីដ-១៩ ប្រភេទ អូមីក្រុង ទើបតែត្រូវបានរកឃើញ ១ ករណីទៀត កាលពីយប់ថ្ងៃទី ១៥ ធ្នូ នៅលើបុគ្គលិកម្នាក់របស់មន្ទីរពេទ្យ Wisma Atlet ក្នុងទីក្រុង Jakarta ធ្វើឱ្យចំនួនប្រទេសដែលមានវត្តមានរបស់ វ៉ារ្យ៉ង់ នេះ នៅតំបន់ អាស៊ីអាគ្នេយ៍ មានការកើនឡើង។

រដ្ឋមន្ត្រីក្រសួងសុខាភិបាលរបស់ ឥណ្ឌូនេស៊ី លោក Budi Gunadi Sadikin ទើបតែបានឱ្យដឹងថា ប្រទេសនេះបានរកឃើញករណីឆ្លង វ៉ារ្យ៉ង់អូមីក្រុង ដំបូង។ នេះបើតាមការចុះផ្សាយរបស់ Reuters។

រដ្ឋមន្ត្រីរូបនេះបន្ថែមថា ក្រៅពីករណីឆ្លងខាងលើ ក៏មានករណីសង្ស័យថាឆ្លង អូមីក្រុង ចំនួន ៥ នាក់ទៀត រួមមាន ជនជាតិឥណ្ឌូនេស៊ី ២ នាក់ ដែលទើបត្រលប់ពី សហរដ្ឋអាម៉េរិក និងអង់គ្លេស រួមនឹងពលរដ្ឋចិន ៣ នាក់ផងដែរ។ បច្ចុប្បន្ន អ្នកទាំងនេះកំពុងត្រូវបានដាក់ឱ្យធ្វើចត្តាឡីស័ក និងរង់ចាំលទ្ធផលវិភាគបន្ថែម។

រដ្ឋមន្ត្រីសុខាភិបាលរបស់ ឥណ្ឌូនេស៊ី លោក Budi Gunadi Sadikin

យោងតាមអង្គការសុខភាពពិភពលោក (WHO) អូមីក្រុង ដែលត្រូវបានរកឃើញដំបូងនៅក្នុងប្រទេស បុតស្វាណា និងត្រូវបាន ប្រទេសអាហ្វ្រិកខាងត្បូង រាយការណ៍ជូន WHO កាលពីខែវិច្ឆិកា បានបង្ហាញវត្តមាននៅក្នុងប្រទេសជាង ៧០ រួចហើយ ក្នុងនោះក៏មានប្រទេសមួយចំនួននៅក្នុង តំបន់អាស៊ីអាគ្នេយ៍ ផងដែរ រួមមាន ម៉ាឡេស៊ី, សិង្ហបុរី, ថៃ, កម្ពុជា និង ហ្វ៊ីលីពីន។

កាលពីថ្ងៃទី ១៤ ធ្នូ WHO បានព្រមានថា អូមីក្រុង កំពុងឆ្លងរាលដាលលឿនជាង វ៉ារ្យ៉ង់ ដទៃ ហើយវាទំនងជានឹងអាចបង្ហាញវត្តមាននៅគ្រប់ប្រទេសក្នុងសកលលោកនាពេលខាងមុខ៕

December 16, 2021

ចិនតៃវ៉ាន់ «ទប់ស្កាត់ការបែកធ្លាយបច្ចេកវិទ្យាសម្ងាត់» ទៅ ចិនដីគោក

កោះតៃវ៉ាន់ ត្រៀមរារាំងបណ្ដាក្រុមហ៊ុនរបស់កោះនេះ លក់ទ្រព្យ ឬក្រុមហ៊ុនបុត្រសម្ព័ន្ធនៅ ចិនដីគោក ក្នុងបំណងទប់ស្កាត់ហានិភ័យនៃការបែកធ្លាយព័ត៌មានសម្ងាត់ស្ដីពីបច្ចេកវិទ្យា។

ស្ថាប័នគ្រប់គ្រងសេដ្ឋកិច្ចរបស់ កោះតៃវ៉ាន់ កាលពីថ្ងៃទី ១៥ ខែធ្នូ បានឱ្យដឹងថា កំពុងតែកែសម្រួលច្បាប់បច្ចុប្បន្ន ដើម្បីអាចតម្រូវឱ្យបណ្ដាក្រុមហ៊ុននៅលើកោះនេះ សុំការអនុញ្ញាត បើសិនចង់លក់ ឬកាត់បន្ថយទ្រព្យ រោងចក្រ ឬក្រុមហ៊ុនបុត្រសម្ព័ន្ធនៅឯ ចិនដីគោក។ ប្រការនេះត្រូវបានគេយល់ថាគឺដើម្បីទប់ស្កាត់ការបែកធ្លាយព័ត៌មានបច្ចេកវិទ្យាជាន់ខ្ពស់របស់ តៃវ៉ាន់ ទៅ ប្រទេសចិន។

ការកំណត់ថ្មី ដែលត្រូវបានរៀបចំឡើងដើម្បីការពារបច្ចេកវិទ្យាឈីបដ៏មានតម្លៃរបស់ កោះតៃវ៉ាន់ ត្រូវបានបញ្ជូនទៅកាន់សភា កាលពីថ្ងៃទី ១៥ ខែធ្នូរួចហើយ ដើម្បីពិនិត្យ និងអនុម័ត ហើយវាអាចចូលជាធរមានចាប់ពីចុងឆ្នាំ ២០២១ ឬខែមករា ២០២២។

នាបច្ចុប្បន្ន ខ្ទង់វិនិយោគរបស់បណ្ដាក្រុមហ៊ុនតៃវ៉ាន់ នៅឯ ចិនដីគោក រួមទាំងការបង្កើតក្រុមហ៊ុនបុត្រសម្ព័ន្ធ គឺសុទ្ធតែត្រូវបានតម្រូវឱ្យសុំការអនុញ្ញាតពីកោះនេះ។ ប៉ុន្តែ ដំណើរការនៃការប្ដូរផ្លាស់ម្ចាស់កម្មសិទ្ធិក្រោយមក មិនត្រូវការការយល់ព្រមពីមន្ត្រីនៅ តៃវ៉ាន់ ប្រការនេះធ្វើឱ្យមានការព្រួយបារម្ភចំពោះហានិភ័យនៃការបែកធ្លាយបច្ចេកវិទ្យា នៅក្នុងគ្រាដែលបងប្អូនគូសត្រូវនេះ ប្រឈមមុខដាក់គ្នាកាន់តែខ្លាំង ទាក់ទិននឹងជម្លោះទឹកដី៕

December 16, 2021

ហ្វ៊ីលីពីន ប្រកាសអាសន្នកម្រិត ៣ នៅចំពោះមុខព្យុះកំណាច Rai

ប្រទេសហ្វ៊ីលីពីន បានប្រកាសអាសន្នកម្រិត ៣ នៅក្នុងកាំប្រកាសអាសន្នដែលមាន ៥ កម្រិត និងចាប់ផ្ដើមឈ្លៀសប្រជាជនរាប់ពាន់នាក់ទៅរកទីសុវត្ថិភាព នៅពេលព្យុះកំណាច Rai បោកបក់ជិតមកដល់។

មជ្ឈមណ្ឌលជូនដំណឹងរួមអំពីព្យុះទីហ្វុង (JTWC) បានព្យាករថា ព្យុះកំណាច Rai ឬហៅថា Odette នៅ ប្រទេសហ្វ៊ីលីពីន នឹងធ្វើដំណើរក្នុងល្បឿន ២៦០ គីឡូម៉ែត្រ/ម៉ោង នៅពេលបោកបក់ចូលដល់ដីគោក។ ល្បឿននេះធ្វើឱ្យព្យុះ Rai មានកម្លាំងប្រហាក់ប្រហែលនឹងព្យុះកម្រិត ៥ ឬ ព្យុះសង្ឃរា។

ស្ថាប័នឧតុនិយមរបស់ ហ្វ៊ីលីពីន បានព្យាករដែរថា ចាប់ពីព្រឹកថ្ងៃទី ១៦ នេះ រហូតដល់ថ្ងៃទី ១៧ ធ្នូ ព្យុះ Rai នឹងបង្កឱ្យមានភ្ញៀងធ្លាក់ខ្លាំង។ ភ្លៀងធំត្រូវបានអាជ្ញាធរព្រមានថា អាចបណ្ដាលឱ្យមានទឹកជំនន់ទ្រង់ទ្រាយធំ និងបំណាក់ដី។

សមត្ថកិច្ចឈ្លៀសពលរដ្ឋទៅរកទីសុវត្ថិភាព កាលពីខែវិច្ឆិកា ឆ្នាំ ២០២០ ដោយសារតែព្យុះត្រូពិច

បច្ចុប្បន្ន អាជ្ញាធររបស់ ហ្វ៊ីលីពីន កំពុងប្រកាសអាសន្នកម្រិត ៣ អំពីព្យុះកំណាច Rai នៅតំបន់ភាគខាងកើតនៃប្រជុំកោះ Visayas និងភាគខាងជើងនៃកោះ Mindanao។ ក្រោយពីព្យុះបានវាយប្រហារលើដីគោក ស្ថាប័នឧតុនិយមរបស់ប្រទេសនេះ អាចនឹងបង្កើនកម្រិតនៃការប្រកាសអាសន្នឡើងដល់កម្រិត ៤ ឬកម្រិត ៥ ដែលជាកម្រិតខ្ពស់បំផុតនៅក្នុងកាំប្រកាសអាសន្នអំពីព្យុះ។

ហ្វ៊ីលីពីន តែងតែរងគ្រោះដោយសារព្យុះត្រូពិចជាមធ្យម ២០ ករណី រៀងរាល់ឆ្នាំ ដែលបង្កការខូចខាតធ្ងន់ធ្ងរចំពោះមនុស្ស និងសេដ្ឋកិច្ច។ កាលពីឆ្នាំមុន ប្រទេសនេះក៏បានរងគ្រោះដោយសារព្យុះ Goni ដែលជាព្យុះខ្លាំងបំផុតក្នុងពិភពលោកនៅឆ្នាំ ២០២០ បណ្ដាលឱ្យមនុស្សរាប់សិបនាក់បាត់បង់ជីវិត រាប់ពាន់នាក់បាត់បង់ទីជម្រក ខណៈសេដ្ឋកិច្ចត្រូវខាតបង់ប្រាក់ជាង ៣៧០,០០០ ដុល្លារអាម៉េរិក៕

December 16, 2021

ក្រុមប្រឆាំងវ៉ាក់សាំង មានផែនការធ្វើឃាតមេដឹកនាំរដ្ឋរបស់ អាល្លឺម៉ង់ នាំឱ្យ Telegram ប្រឈមនឹងបញ្ហា

សមាជិកនៃក្រុមប្រឆាំងវ៉ាក់សាំងជ្រុលនិយម នៅក្នុងរដ្ឋ Sachsen (Saxony) ត្រូវបានចោទប្រកាន់ពីបទមានផែនការវាយប្រហារដោយស្នា និងការគំរាមធ្វើឃាតលោកអភិបាល Michael Kretschmer។

សមត្ថកិច្ចរដ្ឋ Sachsen កាលពីថ្ងៃទី ១៥ ធ្នូ ឱ្យដឹងថា កងកម្លាំងសន្តិសុខ ក្នុងនោះមានអង្គភាពពិសេសប្រឆាំងអំពើជ្រុលនិយម Soko Rex បានឆ្មក់ចូលទីតាំងមួយ ដើម្បីជាការប្រតិកម្មទៅនឹងការគំរាមធ្វើឃាតអភិបាលរដ្ឋ Michael Kretschmer ដែលផែនការនេះត្រូវបានបង្ហើបឱ្យដឹងនៅក្នុងខ្សែភាពយន្តឯកសារមួយដែលបានផ្សាយតាមទូរទស្សន៍អាល្លឺម៉ង់ កាលពីសប្ដាហ៍មុន។

ផែនការធ្វើឃាតអភិបាលរដ្ឋ Sachsen លោក Kretschmer ត្រូវបានក្រុមអ្នកយកព័ត៌មានរបស់ អាល្លឺម៉ង់ លាតត្រដាង បន្ទាប់ពីពួកគេបានជ្រៀតចូលក្នុងក្រុមអ្នកប្រឆាំងវ៉ាក់សាំង មានសមាជិកប្រមាណ ១០០ នាក់ ដែលទាក់ទងគ្នាតាមរយៈកម្មវិធីផ្ញើសារ Telegram។

សមាជិកម្នាក់របស់ក្រុមខាងលើបាននិយាយថា បានត្រៀមអាវុធរួចរាល់សម្រាប់ការវាយប្រហារ។ ពួកគេបានពិភាក្សាអំពីផែនការធ្វើឃាតលោកអភិបាល រួមនឹងមន្ត្រីមួយចំនួនរបស់រដ្ឋ Sachsen។ នេះបើតាមការឱ្យដឹងរបស់សមត្ថកិច្ច។

ទាក់ទងនឹងបញ្ហា កូវីដ-១៩ លោក Kretschmer ដំបូងឡើយ មានការជំទាស់ទៅនឹងវិធានការរឹតបន្តឹងនានាដើម្បីទប់ស្កាត់ការឆ្លងរាលដាល។ ប៉ុន្តែ នៅពេល Sachsen ក្លាយជារដ្ឋដែលរងគ្រោះធ្ងន់ធ្ងរដោយសារវីរុសនេះ លោក Kretschmer ក៏បានផ្លាស់ប្ដូរជំហរ។

លោក Kretschmer ថ្លែងថា ក្រុមមន្ត្រីកំពុងតែរត់ប្រណាំងជាមួយនឹងពេលវេលា នៅក្នុងការចាក់វ៉ាក់សាំងដល់ប្រជាជន។

នាយរដ្ឋមន្ត្រី នៃ ប្រទេសអាល្លឺម៉ង់ លោក Olaf Scholz បានគាំទ្រសំណើដែលទាក់ទិននឹងការតម្រូវឱ្យចាក់វ៉ាក់សាំងចំពោះពលរដ្ឋពេញវ័យនៅ អាល្លឺម៉ង់ ចាប់ពីដើមឆ្នាំ ២០២១។

បាតុកម្មជាច្រើនត្រូវបានបង្កើតឡើងនៅ អាល្លឺម៉ង់ ដើម្បីប្រឆាំងនឹងបម្រាមគោចរ។ បាតុករប្រមាណ ៣,៥០០ នាក់ បានចូលរួមធ្វើបាតុកម្មនៅទីក្រុង Magdeburg ភាគខាងកើតរបស់ ប្រទេសអាល្លឺម៉ង់ កាលពីថ្ងៃទី ១៣ ធ្នូ។

យ៉ាងហោចណាស់ មានសំបុត្រគំរាមចំនួន ១០ ច្បាប់ ដែលខាងក្នុងមានផ្ទុកសាច់ស្រស់ ត្រូវបានផ្ញើទៅកាន់អ្នកនយោបាយ អង្គភាពសារព័ត៌មាន និងស្ថាប័នរដ្ឋាភិបាលអាល្លឺម៉ង់។ សារព័ត៌មានប្រទេសនេះយល់ថា នេះគឺជាការគំរាមអំពី «ការប្រឆាំងប្រកបដោយការបង្ហូរឈាម» តបតនឹងបទបញ្ជាតម្រូវឱ្យចាក់វ៉ាក់សាំង។

នាយរដ្ឋមន្ត្រី Olaf Scholz បានថ្កោលទោសចំពោះអំពើទាំងឡាយរបស់ក្រុមអ្នកប្រឆាំងវ៉ាក់សាំងខាងលើ។

Telegram កំពុងត្រូវបានរិះគន់នៅ ប្រទេសអាល្លឺម៉ង់ និងត្រូវគេចោទថា កំពុងបិទបាំងទោសកំហុសរបស់ក្រុមអ្នកជ្រុលនិយមប្រឆាំងវ៉ាក់សាំងបង្ការជំងឺកូវីដ-១។

មន្ត្រីជាន់ខ្ពស់មួយរូបរបស់រដ្ឋ Lower Saxony កាលពីថ្ងៃទី ១៤ ធ្នូ ឱ្យដឹងថា ផ្សារលក់កម្មវិធីរបស់ Google និង Apple គួរតែលុប Telegram ចេញពីថ្នាលបច្ចេកវិទ្យារបស់ពួកគេ បើសិនម្ចាស់ Telegram បដិសេធការដោះស្រាយខ្លឹមសារជ្រុលនិយម៕

December 16, 2021

សម្លាប់មនុស្សដើម្បីបន្លំខ្លួនជាអ្នកស្លាប់ ក្រោយពីត្រូវបានដោះលែងពីមន្ទីរឃុំឃាំង ព្រោះមិនចង់ត្រលប់ចូលពន្ធនាគារ

(ឥណ្ឌា)-ជនសង្ស័យឈ្មោះ Sudesh Kumar ដែលត្រូវបានចាប់ខ្លួនពីបទសម្លាប់កូនខ្លួនឯង ត្រូវបានដោះលែងពីពន្ធនាគារដោយសារតែបញ្ហា កូវីដ-១៩ ប៉ុន្តែ បន្ទាប់ពីបានចេញពីមន្ទីរឃុំឃាំង ជននេះបានសម្លាប់មនុស្សម្នាក់ទៀត ដើម្បីឱ្យខ្លួនអាចបន្លំជាអ្នកស្លាប់។

Sudesh Kumar ជនសង្ស័យដែលកំពុងរង់ចាំការកាត់ក្ដីនៅតុលាការ ព្រោះតែបានសម្លាប់កូនកាលពីឆ្នាំ ២០១៨ ត្រូវបានចាប់ខ្លួនជាថ្មីកាលពីថ្ងៃទី ១០ ធ្នូ ក្រោយពីបានប្រព្រឹត្តអំពើមនុស្សឃាតមួយករណីបន្ថែមទៀត និងបានព្យាយាមបន្លំខ្លួនជាសាកសពជនរងគ្រោះ ក្នុងបំណងបានរស់នៅក្រៅឃុំដោយលាក់បាំង។

Kumar ត្រូវបានដោះលែងកាលពីឆ្នាំមុន នៅពេលអាជ្ញាធរធ្វើយុទ្ធនាការទប់ស្កាត់ កូវីដ-១៩ ដោយការកាត់បន្ថយអ្នកទោសនៅក្នុងពន្ធនាគារ។ សមត្ថកិច្ចបានរកឃើញសាកសពរបស់មនុស្សម្នាក់ដែលស្លៀកពាក់ខោអាវរបស់ Kumar និងកាន់អត្តសញ្ញាណប័ណ្ណរបស់ជនសង្ស័យនេះ នៅតំបន់ Ghaziabad ជាយក្រុង New Delhi កាលពីខែមុន។

«សាកសពត្រូវគេដុតមួយផ្នែក មិនអាចកំណត់អត្តសញ្ញាណនៅលើផ្ទៃមុខ។ យើងបានទៅដល់ផ្ទះរបស់ Kumar ដើម្បីឱ្យភរិយាជននេះបញ្ជាក់។ ស្ត្រីជាភរិយាបានអះអាងថា នេះគឺជាសាកសពប្ដីរបស់នាង ប៉ុន្តែមិនអាចធ្វើឱ្យសមត្ថកិច្ចទុកចិត្តបាន នេះបើតាម មេប៉ូលិសប្រចាំតំបន់ Ghaziabad លោក Iraj Raja។

បន្ទាប់មក សមត្ថកិច្ចក៏បានទទួលព័ត៌មានថា Kumar នៅមានជីវិត។ កាមេរ៉ាសន្តិសុខនៅតំបន់ដែលប្ដីប្រពន្ធ Kumar រស់នៅ បានបង្ហាញថា មនុស្សម្នាក់មានរូបរាងដូចជនសង្ស័យ បានដឹកអ្វីមួយដែលដូចទៅនឹងសាកសព ដោយដាក់នៅលើកង់។ ប៉ូលិសបានចាប់ខ្លួនជនសង្ស័យនៅខាងក្រៅផ្ទះកាលពីថ្ងៃទី ១០ ខែធ្នូ។

«ក្នុងពេលសួរចម្លើយ ជនសង្ស័យបានក៏បានសារភាព» លោក Raja និយាយដូច្នេះ និងបន្ថែមថា Kumar និងប្រពន្ធសុទ្ធតែត្រូវបានចោទប្រកាន់ពីបទមនុស្សឃាត។

Kumar ឱ្យដឹងថា ព្រោះតែខ្លាចបទបញ្ជាដោះលែងបណ្ដោះអាសន្នដោយសារបញ្ហាកូវីដ-១៩ នឹងត្រូវបញ្ចប់ឆាប់ៗ ហើយអាចត្រូវបានចោទពីបទមនុស្សឃាត ទើបប្រើល្បិចកលសម្លាប់មនុស្ស បន្លំខ្លួនជាអ្នកដែលបានស្លាប់ ដើម្បីមិនត្រូវត្រលប់ចូលពន្ធនាគារ។ ជនសង្ស័យបានបង្កើតទំនាក់ទំនងមិត្តភក្ដិជាមួយនឹងជាងសំណង់ម្នាក់ រួចក៏ហៅជនរងគ្រោះមកផ្ទះដើម្បីជួសជុលផ្ទះ និងបានយកខោអាវឱ្យជនរងគ្រោះស្លៀកពាក់ ហើយក៏ធ្វើសកម្មភាពសម្លាប់ ក្រោយពីជននេះស្រវឹងស្រា។ បន្ទាប់មក ជនសង្ស័យបានដុតភ្លើងលើផ្ទៃមុខរបស់សាកសពដើម្បីមិនឱ្យសមត្ថកិច្ចអាចកំណត់អត្តសញ្ញាណជនរងគ្រោះ៕

December 14, 2021

WHO បន្តព្រមានអំពី «ហានិភ័យខ្ពស់» ពី កូវីដ-១៩ ប្រភេទ អូមីក្រុង (Omicron)

អង្គការសុខភាពពិភពលោក (WHO) យល់ថា អូមីក្រុង ធ្វើឱ្យមានហានិភ័យខ្ពស់ខ្លាំងនៅទូទាំងសកលលោក ប៉ុន្តែ បញ្ជាក់ថា នៅមានកត្តាមិនទាន់ច្បាស់លាស់ជាច្រើនទាក់ទងនឹងវីរុសបំប្លែងខ្លួនថ្មីនេះ។

«ហានិភ័យរួមទាក់ទងនឹង វ៉ារ្យ៉ង់ ដែលគួរឱ្យព្រួយបារម្ភ អូមីក្រុង នៅតែស្ថិតក្នុងកម្រិតខ្ពស់ ដោយសារតែមូលហេតុជាច្រើន» WHO ឱ្យដឹងដូច្នេះនៅក្នុងរបាយការណ៍កាលពីថ្ងៃទី១២ ខែធ្នូ និងបានសង្កាត់ធ្ងន់ថា សញ្ញាមួយចំនួនបង្ហាញថា អ្នកដែលបានទទួលការចាក់វ៉ាក់សាំង ឬធ្លាប់បានឆ្លងវីរុសកូវីដ-១៩ ទំនងជាមិនអាចបង្កើតអង្គបដិប្រាណគ្រប់គ្រាន់ដើម្បីទប់ស្កាត់ អូមីក្រុង នាំឱ្យអត្រាឆ្លងមានកម្រិតខ្ពស់ និង «ផលវិបាកធ្ងន់ធ្ងរ»។

យ៉ាងណាក៏ដោយ WHO ក៏បានព្រមានថា នៅមានប្រការជាច្រើនផ្សេងទៀតដែលមិនទាន់ច្បាស់លាស់ទាក់ទងនឹង អូមីក្រុង។ ការវាយតម្លៃដំបូងៗ បង្ហាញថា អូមីក្រុង បង្កអាការរោគស្រាលជាង ដេលតា ប៉ុន្តែ នៅតែត្រូវការទិន្នន័យបន្ថែមទៀតដើម្បីបញ្ជាក់ថា វាបង្កគ្រោះថ្នាក់ក្នុងកម្រិតទាបជាងបណ្ដាវ៉ារ្យ៉ង់មុនៗដែរឬអត់។

ក្រុមអ្នកវិទ្យាសាស្ត្រនៅសាកលវិទ្យាល័យ Oxford របស់ អង់គ្លេស កាលពីម្សិលមិញបានប្រកាសលទ្ធផលស្រាវជ្រាវមួយបង្ហាញថា អត្រានៃអង្គបដិប្រាណដែលអាចបន្សាប អូមីក្រុង បានថយចុះគួរឱ្យកត់សម្គាល់ នៅលើអ្នកដែលបានទទួលការចាក់វ៉ាក់សាំងចំនួន ២ ដូសរួចហើយ។

វីរុសកូវីដ-១៩ ប្រភេទ អូមីក្រុង ដែលត្រូវបានរកឃើញដំបូងនៅ ប្រទេសបុតស្វាណា កាលពីថ្ងៃទី ១១ វិច្ឆិកា ២០២១ និងត្រូវបាន ប្រទេសអាហ្វ្រិកខាងត្បូង រាយការណ៍ដល់ WHO កាលពីថ្ងៃទី ២៤ វិច្ឆិកា បច្ចុប្បន្ន បានបង្ហាញវត្តមាននៅក្នុងប្រទេសជាង ៦០ រួចហើយ។ ថ្វីបើត្រូវបាន WHO ចាត់ចូលទៅក្នុងក្រុមដែលគួរឱ្យព្រួយបារម្ភ ប៉ុន្តែ មកដល់ពេលនេះ ពុំទាន់មានទិន្នន័យច្បាស់លាស់ និងគ្រប់គ្រាន់ដែលអាចបញ្ជាក់បាននូវកម្រិតនៃការឆ្លងរាលដាល និងភាពសាហាវរបស់ អូមីក្រុង នៅឡើយ៕

December 14, 2021

ទិដ្ឋភាពដ៏គួរឱ្យភ័យខ្លាចដែលបង្កឡើងដោយខ្យល់កំបុតត្បូង នៅសហរដ្ឋអាម៉េរិក

កងកម្លាំងជួយសង្គ្រោះបន្ទាន់របស់ សហរដ្ឋអាម៉េរិក កំពុងរត់ប្រណាំងនឹងពេលវេលានៅក្នុងការជួយសង្គ្រោះជីវិតមនុស្សដែលរងគ្រោះដោយសារខ្យល់កំបុតត្បូង ដែលបានបណ្ដាលឱ្យមានអ្នកស្លាប់ជាង ៨០ នាក់ នៅក្នុងរដ្ឋចំនួន ។

រដ្ឋ Kentucky គឺជាកន្លែងដែលរងគ្រោះមហន្តរាយធ្ងន់ធ្ងរបំផុត បន្ទាប់ពីមានខ្យល់កំបុតត្បូងប្រមាណ ៣០ ករណី បានវាយប្រហារទៅលើរដ្ឋចំនួន ៦ របស់ អាម៉េរិក ដែលរួមមាន រដ្ឋ Arkansas, Illinois, Kentucky, Missouri, Tennessee និងរដ្ឋ Mississippi កាលពីចុងសប្ដាហ៍មុន។

ក្រុមមន្ត្រីអាម៉េរិក បច្ចុប្បន្ន បានឱ្យដឹងថា មនុស្សជាង ៨០ នាក់ បានស្លាប់ដោយសារខ្យល់កំបុតត្បូង ប៉ុន្តែ តួលេខនេះអាចកើនឡើងដល់ជាង ១០០ នាក់ នៅពេលបញ្ចប់យុទ្ធនាការជួយសង្គ្រោះ។

អភិបាលរដ្ឋ Kentucky លោក Andy Beshear បានហៅខ្យល់កំបុតត្បូងនេះថាជា «គ្រោះអាក្រក់បំផុត សាហាវបំផុត និងបង្កការស្លាប់ច្រើនបំផុតក្នុងប្រវត្តិសាស្ត្ររបស់រដ្ឋ» នេះ។

ប្រធានាធិបតី ចូ បៃដិន ក៏បានថ្លែងថា នេះអាចជាគ្រោះធម្មជាតិខ្យល់កំបុតត្បូងធំបំផុតក្នុងប្រវត្តិសាស្ត្ររបស់ សហរដ្ឋអាម៉េរិក។

កងកម្លាំងជួយសង្គ្រោះកំពុងតែញាប់ដៃញាប់ជើងជួយដល់ប្រជាជនបន្ទាប់ពីគ្រោះធម្មជាតិនេះបានធ្វើឱ្យផ្ទះសម្បែង ឃ្លាំងទំនិញជាដើម ត្រូវខូចខាតទាំងស្រុង៕

December 13, 2021

ចិនអំពាវនាវដល់ពលរដ្ឋ «កុំត្រលប់មកស្រុកកំណើត» ក្នុងឱកាសបុណ្យចូលឆ្នាំថ្មី

នេះគឺជាឆ្នាំទីពីរហើយដែលពលរដ្ឋចិន ត្រូវបានអំពាវនាវ សុំមិនត្រលប់មកស្រុកកំណើតនៅក្នុងឱកាសបុណ្យចូលឆ្នាំប្រពៃណីជាតិ ក្នុងបំណងទប់ស្កាត់ការឆ្លងរាលដាលនៃវីរុសកូវីដ-។

ខណ្ឌមួយនៅក្នុងទីក្រុង Zhangjiakou នៃ ខេត្ត Hebei បានអំពាវនាវដល់មន្ត្រី បុគ្គលិករដ្ឋ និងបក្ខជន «ធ្វើជាគំរូ» ដោយការទទួលអំណរឆ្នាំថ្មីនៅនឹងកន្លែង ជំនួសឱ្យការត្រលប់ទៅស្រុកកំណើត និងចៀសវាងការធ្វើដំណើរដែលមិនចាំបាច់។

អាជ្ញាធរខណ្ឌខាងលើ ក៏បានលើកទឹកចិត្តដល់ប្រជាជន ក្នុងការបញ្ចុះបញ្ចូលញាតិរបស់ខ្លួនដែលនៅបរទេស ឬនៅតំបន់ដែលមានហានិភ័យឆ្លងកម្រិតមធ្យម និងខ្ពស់ នៅក្នុងស្រុក កុំឱ្យពួកគេត្រលប់មកចូលឆ្នាំថ្មីនៅឯស្រុកកំណើត។

«បើសិនជាមានតម្រូវការត្រូវធ្វើដំណើរ នោះការធ្វើតេស្ត និងការអនុញ្ញាត ត្រូវតែធ្វើឡើងដោយការប្រុងប្រយ័ត្ន» ប្រកាសរបស់អាជ្ញាធរខណ្ឌខាងលើ ឱ្យដឹងដូច្នេះកាលពីថ្ងៃទី ៩ ធ្នូ។

នៅក្នុងខេត្តក្វាងទុង បណ្ដាក្រុមហ៊ុនក្នុងស្រុកនៅក្នុងទីរួមស្រុក Sanxiang នៃ ទីក្រុង Zhongshan ត្រូវបានលើកទឹកចិត្តឱ្យបញ្ចុះបញ្ចូលបុគ្គលិក ឱ្យនៅស្ងៀម នៅក្នុងឱកាសបុណ្យចូលឆ្នាំថ្មី។ ចំណែកនៅឯ Pingxiang នៃខេត្ត Quangxi វិញ ហាងទំនិញទាំងអស់ក៏ត្រូវបានស្នើឱ្យមានការលើកទឹកចិត្តដល់បុគ្គលិក ដើម្បីកុំឱ្យពួកគេធ្វើដំណើរ។

ទន្ទឹមនឹងនេះ អាជ្ញាធរតំបន់នានារបស់ ប្រទេសចិន ក៏កំពុងបង្កើនការពិន័យទៅលើអ្នកទាំងឡាយណាដែលលាក់បាំង ឬកុហក ទាក់ទងនឹងប្រវត្តិនៃការឆ្លង ក៏ដូចជារារាំងការខិតខំក្នុងការស្រាវជ្រាវរបស់អាជ្ញាធរ លើករណីឆ្លងនីមួយ៕

December 13, 2021

Category: អន្តរជាតិ