អន្តរជាតិ - La Reine Media

អ្នកវិទ្យាសាស្ត្រដែលបានរកឃើញវីរុសបង្កជំងឺអេដស៍ បានទទួលមរណភាព

សារព័ត៌មាន AFP កាលពីថ្ងៃទី ១០ កុម្ភៈ បានរាយការណ៍ថា អ្នកវីរុសសាស្ត្រជនជាតិបារាំង Luc Montagnier បានទទួលមរណភាពនៅក្នុងវ័យ ៨៩ ឆ្នាំ។

លោក Montagnier បានទទួលពានរង្វាន់ ណូបែល (Nobel) កាលពីឆ្នាំ ២០០៨ ដោយសារបានរកឃើញ វីរុសដែលធ្វើឱ្យប្រព័ន្ធការពាររាងកាយចុះខ្សោយ (HIV) និងបង្កជំងឺអេដស៍ (AIDS)។

លោក Montagnier រួមនឹងអ្នកវិទ្យាសាស្ត្រជនជាតិបារាំងមួយរូបទៀត គឺ Francoise Barre-Sinoussi បានទទួលពាក់កណ្ដាលនៃពានរង្វាន់ ណូបែលវេជ្ជសាស្ត្រ ឆ្នាំ ២០០៨ ដោយសារតួនាទីរបស់ពួកគាត់ក្នុងការរកឃើញ វីរុស HIV។ ចំណែកពានរង្វាន់ពាក់កណ្ដាលទៀត ត្រូវបានប្រគល់ជូនអ្នកស្រាវជ្រាវជំងឺមហារីក ជនជាតិអាល្លឺម៉ង់ Harald zu Hausen។

កើតឆ្នាំ ១៩៣២ លោក Montagnier បានរៀនថ្នាក់បណ្ឌិតផ្នែក វីរុសសាស្ត្រនៅសាកលវិទ្យាល័យប៉ារីស។ ក្រោយមក លោកបានក្លាយជាប្រធានមូលនិធិស្រាវជ្រាវ និងទប់ស្កាត់ជំងឺអេដស៍ នៅ បារីស។ ក្រៅពី វីរុស HIV លោក Montagnier ក៏ធ្លាប់បានរកឃើញរបកគំហើញជាច្រើន ទាក់ទងនឹង វីរុស ក្នុងនោះមានវិធីការពាររាងកាយពី វីរុសជាដើម។

February 11, 2022

ឥណ្ឌូណេស៊ី លុបចោលកុងត្រាទិញយន្តហោះចម្បាំង Su-៣៥ របស់ រុស្ស៊ី ហើយងាកមកទិញយន្តហោះរបស់ប្រទេសលោកខាងលិច

ក្រសួងការពារជាតិឥណ្ឌូណេស៊ី បានចុះកិច្ចព្រមព្រៀងទិញយន្តហោះចម្បាំង Rafale ចំនួន ៤២ គ្រឿង របស់ ប្រទេសបារាំង ក្រោយពីបានលុបចោលកិច្ចសន្យាទិញយន្តហោះចម្បាំង Su-៣៥ របស់ រុស្ស៊ី។

«យើងបានយល់ព្រមទិញយន្តហោះចម្បាំង Rafale ចំនួន ៤២ គ្រឿង។ កិច្ចព្រមព្រៀងទិញនៅថ្ងៃនេះរួមមាន ៦ គ្រឿងដំបូង ហើយក្រោយមក ៣៦ គ្រឿងទៀត» រដ្ឋមន្ត្រីការពារជាតិឥណ្ឌូណេស៊ី លោក Prabowo Subianto ថ្ងៃនេះ បានឱ្យដឹងដូច្នេះ។

យន្តហោះចម្បាំង Rafale ដែលទិញពី បារាំង នឹងជួយឱ្យ ឥណ្ឌូណេស៊ី ធ្វើទំនើបកម្មទ័ពអាកាសរបស់ខ្លួន។ បច្ចុប្បន្ន ប្រទេសនេះមានយន្តហោះចម្បាំង F-១៦ របស់ អាម៉េរិក ចំនួន ៣៣ គ្រឿង និងយន្តហោះចម្បាំង ទិញពី រុស្ស៊ី ចំនួន ១៦ គ្រឿង រួមមាន Su-២៧ ចំនួន ៥ គ្រឿង និង Su-៣០ ចំនួន ១១ គ្រឿង។

ការបញ្ជាទិញខាងលើនេះត្រូវបានចុះហត្ថលេខាជិត ២ ខែ បន្ទាប់ពី ឥណ្ឌូណេស៊ី បានប្រកាសបោះបង់កិច្ចសន្យាទិញយន្តហោះចម្បាំង Su-៣៥S របស់ រុស្ស៊ី ដែលមានតម្លៃជាង ១.១ ពាន់លានដុល្លារ ដោយមិនបានបញ្ជាក់អំពីមូលហេតុ។ ប៉ុន្តែ មុននោះ ក្រុមមន្ត្រីអាម៉េរិក បានព្រមានជាច្រើនលើកថា ឥណ្ឌូណេស៊ី នឹងប្រឈមមុខនឹងការដាក់ទណ្ឌកម្ម បើសិនទិញអាវុធពី រុស្ស៊ី៕

February 10, 2022

ស៊ុយអែត ប្រកាសថា ជំងឺរាតត្បាតសកល កូវីដ-១៩ បានបញ្ចប់នៅប្រទេសនេះ

កាលពីថ្ងៃទី ៩ កុម្ភៈ ក្រុមមន្ត្រីសុខាភិបាលនៃ ប្រទេសស៊ុយអែត បានប្រកាសថា ជំងឺរាតត្បាតដែលបង្កឡើងដោយ វីរុស SARS-CoV-2 (កូវីដ-១៩) បានបញ្ចប់នៅក្នុងប្រទេសអឺរ៉ុបខាងជើងនេះ បើទោះជាមានការព្រមានអំពីហានិភ័យឆ្លងរាលដាល។

សារព័ត៌មាន AP បានឱ្យដឹងថា ឆ្លើយតបនឹងសំណួររបស់សារព័ត៌មាន Dagens Nyheter កាលពីថ្ងៃទី ៩ កុម្ភៈ រដ្ឋមន្ត្រីក្រសួងសុខាភិបាលស៊ុយអែត Lena Hallengren បានលើកឡើងថា៖ «ជាមួយនឹងអ្វីដែលយើងបានដឹងអំពីជំងឺរាតត្បាតសកល ខ្ញុំនិយាយថា វាបានកន្លងផុតទៅហើយ…។ បើទោះជាមិនទាន់បញ្ចប់ជាស្ថាពរ ប៉ុន្តែយើងឃើញថា មានការផ្លាស់ប្ដូរយ៉ាងឆាប់រហ័ស។ កូវីដ-១៩ ពេលនេះ លែងត្រូវបានចាត់ទុកថាជាការគំរាមកំហែងដល់សង្គមទៀតហើយ»។

ក្នុងថ្ងៃដដែល ប្រធានអាជ្ញាធរសុខាភិបាលសាធារណៈរបស់ ស៊ុយអែត លោកស្រី Karin Tegmark Wisell ក៏បានវាយតម្លៃថា «ប្រាក់ចំណាយ និងភាពចាំបាច់នៃការធ្វើតេស្តកូវីដ-១៩ លែងសមស្របទៀតហើយនៅ ស៊ុយអែត។ បើសិនជាធ្វើតេស្តសំណាកទូទៅលើមនុស្សគ្រប់គ្នាដែលបានឆ្លង កូវីដ-១៩ នោះមានន័យថា យើងនឹងត្រូវចំណាយកន្លះពាន់លាន ក្រូណូរ/សប្ដាហ៍ (ប្រហែល ៥៥ លានដុល្លារអាម៉េរិក) និង ២ ពាន់លានក្រូណូរ/ខែ (២២០ លានដុល្លារអាម៉េរិក)»។

ចាប់ពីថ្ងៃទី ៩ កុម្ភៈ ស៊ុយអែត បានបញ្ចប់ស្ទើរតែទាំងស្រុងនូវវិធានការរឹតបន្តឹងនានា ដើម្បីទប់ស្កាត់ការឆ្លង កូវីដ-១៩ ដោយបានផ្អាកការធ្វើតេស្តសំណាកស្ទើរតែទាំងអស់។ បណ្ដាភោជនីយដ្ឋាន និងក្លឹបរាត្រីជាដើម ត្រូវបានអនុញ្ញាតឱ្យបើកដំណើរការឡើងវិញរហូតដល់ក្រោយម៉ោង ២៣ ជារៀងរាល់យប់ ហើយក៏មិនមានការកំណត់ចំនួនភ្ញៀវដែលចូលទទួលសេវាកម្ម។ ចំណែកកម្មវិធីធំៗដែលធ្វើនៅឯផ្ទះ ក៏អាចធ្វើឡើងដោយសេរី ខណៈដែលប័ណ្ណបញ្ជាក់អំពីការចាក់វ៉ាក់សាំង ក៏អាចលែងជារបស់ចាំបាច់ទៀតដែរ។

យោងតាមការអនុវត្តថ្មី ការធ្វើតេស្ត PCR ដោយមិនគិតថ្លៃ នឹងត្រូវបានធ្វើឡើងចំពោះតែបុគ្គលិកសុខាភិបាល និងអ្នកថែទាំមនុស្សចាស់ និងអ្នកដែលមានហានិភ័យរងផលប៉ះពាល់ប៉ុណ្ណោះ នៅពេលពួកគេមានរោគសញ្ញា។ ប្រជាជនស៊ុយអែត នឹងគ្រាន់តែត្រូវស្នើឱ្យនៅផ្ទះ បើសិនពួកគេមានរោគសញ្ញាដែលសង្ស័យថា បានឆ្លង កូវីដ-១។

កាលពីពាក់កណ្ដាលខែមករា រដ្ឋាភិបាលស៊ុយអែត ក៏លែងស្នើឱ្យអ្នកទេសចរណ៍បង្ហាញលិខិតបញ្ជាក់ការធ្វើតេស្តអវិជ្ជមាននឹង កូវីដ-១៩ ទៀតដែរ នៅពេលពួកគេចូលមកលេងប្រទេសនេះ។

ទោះជាយ៉ាងណាក៏ដោយ ក៏នៅតែមានការព្រួយបារម្ភ។ បច្ចុប្បន្ន មន្ទីរពេទ្យនានានៅ ស៊ុយអែត នៅតែមានអារម្មណ៍តានតឹង ដោយសារតែមានអ្នកជំងឺកូវីដ-១៩ ប្រហែល ២,២០០ នាក់ទៀត កំពុងត្រូវការការថែទាំនៅមន្ទីរពេទ្យ ប្រហាក់ប្រហែលនឹងរលកនៃការឆ្លងទី ២ កាលពីរដូវផ្ការីក ២០២។

ដោយសារតែស្ថាប័ននានារបស់ ក្រសួងសុខាភិបាល បានផ្អាកការធ្វើតេស្តដោយឥតគិតថ្លៃ ដូច្នេះ ពុំមានអ្នកណាម្នាក់បានដឹងច្បាស់ថា មានករណីឆ្លងថ្មីចំនួនប៉ុន្មាននាក់នោះឡើយ។

ចាប់តាំងពី កូវីដ-១៩ បានផ្ទុះឆ្លងរាលដាលរហូតដល់បច្ចុប្បន្ន ប្រទេសស៊ុយអែត មានអ្នកឆ្លងជំងឺនេះសរុបជាង ២.៤ លាននាក់ ក្នុងនោះមានជាង ១៦,០០០ នាក់ បានបាត់បង់ជីវិត និងជាង ១ លាននាក់ បានជាសះស្បើយ៕

February 10, 2022

(វីដេអូ)-រោងចក្របោះពុម្ភក្រដាសប្រាក់ ត្រូវភ្លើងឆេះយ៉ាងសន្ធោសន្ធៅ

(បារាំង)-អគ្គិភ័យដ៏ធំមួយ បានកើតឡើងនៅឯរោងចក្របោះពុម្ភប្រាក់របស់ធនាគារនៅ Chamakieres បណ្ដាលឱ្យបុគ្គលិកប្រហែល ៤០០ នាក់ ត្រូវរត់ទៅរកទីសុវត្ថិភាព។

ផ្សែង និងភ្លើង បាញ់ចេញពីរោងចក្របោះពុម្ភក្រដាសប្រាក់ នៅក្នុងសង្កាត់ Chamalieres ស្ថិតក្នុងភាគកណ្ដាលនៃ ប្រទេសបារាំង កាលពីព្រឹកថ្ងៃទី ៩ កុម្ភៈ។ បុគ្គលិកពន្លត់អគ្គិភ័យចំនួន ៧០ នាក់ ត្រូវបានបញ្ជូនទៅកាន់កន្លែងកើតហេតុ និងគ្រប់គ្រងស្ថានការណ៍បានទាំងស្រុងនៅវេលាថ្ងៃត្រង់នៃថ្ងៃដដែល។

ករណីអគ្គិភ័យនេះ បានបណ្ដាលឱ្យមានអ្នករងរបួសស្រាលជាង ៣០ នាក់ និង ១០ នាក់ផ្សេងទៀតត្រូវចូលពេទ្យនៅមន្ទីរពេទ្យ Clermont-Ferrand ដែលនៅក្បែរនោះ។

រោងចក្របោះពុម្ភក្រដាសប្រាក់ Pierre-Yves Boissinot

ធនាគារកណ្ដាលរបស់ បារាំង បានបញ្ជាក់ថា អគ្គិភ័យត្រូវបានពន្លត់ទាំងស្រុង ចំណែកបុគ្គលិកក៏ត្រូវបានឈ្លៀសចេញទាន់ពេល។ មនុស្សប្រហែល ៣៨៧ នាក់ ដែលមានវត្តមាននៅក្នុងរោងចក្រនេះ សុទ្ធតែមានសុវត្តិភាព។

អគ្គិភ័យនេះប្រាកដជាប៉ះពាល់ដល់ដំណើរការបោះពុម្ភលុយ ប៉ុន្តែ ពួកគេមិនមានការព្រួយបារម្ភពេកទេ ដោយសារតែម៉ាស៊ីនបោះពុម្ភមិនមានការខូចខាត។ នេះបើតាមប្រធានរោងចក្រ Pierre-Yves Boissinot។

មេដឹកនាំតំបន់ Puy-de-Dome លោក Phillippe Chopin បានឱ្យដឹងថា មូលហេតុនៃហេតុការណ៍អគ្គិភ័យនេះមិនទាន់ត្រូវបានរកឃើញនៅឡើយ ប៉ុន្តែ លោកថា នឹងមានការស្រាវជ្រាវ។

https://www.youtube.com/watch?v=9PXteZFJ1Q8

រោងចក្រ Pierre-Yves Boissinot បោះពុម្ភក្រដាសប្រាក់សរុបប្រហែល ២.៥ ពាន់លានសន្លឹកជារៀងរាល់ឆ្នាំ៕

February 10, 2022

ឥណ្ឌូណេស៊ី នឹងប្រើប្រាស់ វ៉ាក់សាំងបង្ការកូវីដ-១៩ ដែលផលិតក្នុងស្រុក

ប្រភពព័ត៌មានពី រដ្ឋធានីហ្សាការតា កាលពីថ្ងៃទី ៩ កុម្ភៈ បានឱ្យដឹងថា រដ្ឋមន្ត្រីក្រសួងសុខាភិបាលឥណ្ឌូណេស៊ី លោក ប៊ូឌី ហ្គាណាឌី សាឌីគីន (Budi Gunadi Sadikin) បញ្ជាក់ថា វ៉ាក់សាំងបង្ការជំងឺកូវីដ-១៩ Merah Putih ដែលអភិវឌ្ឍដោយប្រទេសនេះ នឹងត្រូវបានប្រើប្រាស់ជាដូសជំរុញ និងសម្រាប់កុមារអាយុពី ៣ ដល់ ៦ ឆ្នាំ។

ថ្លែងក្នុងពិធីបើកដំណើរការពិសោធវ៉ាក់សាំង Merah Putih នៅលើមនុស្ស នៅឯមន្ទីរពេទ្យមួយក្នុង ខេត្តជ្វា (ចាវ៉ា/Java) ខាងកើត លោករដ្ឋមន្ត្រី ប៊ូឌី ឱ្យដឹងថា បច្ចុប្បន្នមានវ៉ាក់សាំងជាច្រើនប្រភេទដែលអាចប្រើប្រាស់សម្រាប់ក្មេងតូច ក្រៅពី Sinovac និង Pfizer។

លោក Budi បញ្ជាក់ថា រដ្ឋាភិបាលនឹងពិនិត្យលទ្ធភាពក្នុងការផ្ដល់ជំនួយជាវ៉ាក់សាំង Merah Putih ដល់ប្រទេសមួយចំនួន ក្នុងនោះមានបណ្ដាប្រទេសនៅ ទ្វីបអាហ្វ្រិក ផងដែរ។

រដ្ឋមន្ត្រីក្រសួងសុខាភិបាលឥណ្ឌូណេស៊ី លោក ប៊ូឌី ហ្គាណាឌី សាឌីគីន (Budi Gunadi Sadikin)

យោងតាមរដ្ឋមន្ត្រីសុខាភិបាលឥណ្ឌូណេស៊ី ការចែករំលែកវ៉ាក់សាំងនៅ ទ្វីបអាហ្វ្រិក កំពុងមានល្បឿនយឺត ក្នុងនោះ វ៉ាក់សាំងមួយចំនួន ដូចជា Moderna និង Pfizer ជាដើម ត្រូវការការដឹកជញ្ជូន និងការរក្សាទុកយ៉ាងស្មុគស្មាញ ដោយសារតែវាត្រូវការស្ថិតក្នុងសីតុណ្ហភាពត្រជាក់ខ្លាំង ចាប់ពី -២៥ ដល់ -២៨ អង្សាសេ៕

February 10, 2022

មហាក្សត្រីរបស់ ដាណឺម៉ាក និងនាយករដ្ឋមន្ត្រីរបស់ ស្លូវ៉ាគី ឆ្លង វីរុសកូវីដ-១៩

រាជវាំងរបស់ ប្រទេសដាណឺម៉ាក កាលពីថ្ងៃទី ៩ កុម្ភៈ បានឱ្យដឹងថា មហាក្សត្រី Margrethe បានឆ្លង វីរុសកូវីដ-១៩ ប៉ុន្តែមានអាការរោគស្រាល។

មហាក្សត្រីអង្គនេះ បច្ចុប្បន្នមានព្រះជន្ម ៨១ វស្សា កំពុងធ្វើចត្តាឡីស័កនៅក្នុងរាជវាំង Amalienborg នៅរាជធានី Copenhagen។

ក្នុងថ្ងៃទី ៩ កុម្ភៈដដែល នាយករដ្ឋមន្ត្រី Janez Jansa នៃ ប្រទេសស្លូវ៉ាគី បានឱ្យដឹងថា លោកបានឆ្លង កូវីដ-១៩ ក្នុងគ្រាដែលស្ថានភាពនៃជំងឺរាតត្បាតក្នុងប្រទេសជាសមាជិក សហភាពអឺរ៉ុប (EU) មួយនេះ កំពុងថយចុះ។ លោក Jansa មានអាការរោគស្រាល និងកំពុងព្យាបាលយ៉ាងយកចិត្តទុកដាក់។

February 10, 2022

វិទ្យាស្ថាន RKI អះអាងថា អាល្លឺម៉ង់ អាចឆ្លងផុតរលករាតត្បាតដែលបង្កឡើងដោយកូវីដ-១៩ ប្រភេទ អូមីក្រុង នាពេលឆាប់ៗនេះ

មេដឹកនាំនៃវិទ្យាស្ថាន Robert Koch (RKI) លោក Lothar Wieler ប្រកាសថា ប្រទេសអាល្លឺម៉ង់ នឹងឆ្លងផុតរលករាតត្បាតកូវីដ-១៩ ដែលបង្កឡើងដោយ អូមីក្រុង ក្នុងពេលឆាប់ៗខាងមុខ ហើយអាចទទួលអំណរបុណ្យអ៊ីស្ទើរ (Easter) ជាមួយនឹងការបន្ធូរបន្ថយវិធានការទប់ស្កាត់ការឆ្លងរាលដាល។

ក្នុងសន្និសីទជាមួយនឹងរដ្ឋមន្ត្រីក្រសួងសុខាភិបាល Karl Lauterbach កាលពីថ្ងៃទី ៨ កុម្ភៈ មេដឹកនាំអាជ្ញាធរគ្រប់គ្រង និងទប់ស្កាត់ជំងឺឆ្លងរបស់ អាល្លឺម៉ង់ លោក Lothar Wieler បានឱ្យអះអាងថា៖ «យើងកំពុងឈរនៅចំពោះមុខរបត់ថ្មីមួយ ហើយខ្ញុំមានជំនឿថា យើងនឹងឆ្លងផុតរលកនៃការរាតត្បាតដែលបង្កឡើងដោយ អូមីក្រុង។ មកដល់បច្ចុប្បន្ន យើងបានឆ្លងកាត់វិបត្តិជំងឺឆ្លងនេះ បានយ៉ាងល្អ»។

លោក Wieler ឱ្យដឹងថា អត្រានៃអ្នកជំងឺ កូវីដ-១៩ ប្រភេទ អូមីក្រុង បានវិវត្តទៅជាធ្ងន់ធ្ងរ មានកម្រិតទាបជាងឆ្ងាយ ធៀបនឹង វ៉ារ្យ៉ង់ ដេលតា។ ដូច្នេះ អាល្លឺម៉ង់ នឹងអាចឆ្លងផុតពីរលកនៃការឆ្លងក្នុងរយៈពេលប៉ុន្មានសប្ដាហ៍ខាងមុខ ហើយប្រជាជនអាចទទួលអំណរបុណ្យអ៊ីស្ទើរ ប្រកបដោយសេរីភាពជាងមុន។

មេដឹកនាំនៃវិទ្យាស្ថាន Robert Koch (RKI) លោក Lothar Wieler

ទោះជាយ៉ាងណាក៏ដោយ មេដឹកនាំ RKI នៅតែអំពាវនាវឱ្យប្រជាជនគោរព និងអនុវត្តតាមវិធានការដែលបានដាក់ចេញ ព្រោះថា នៅមានកត្តាជាច្រើនដែលធ្វើឱ្យ កូវីដ-១៩ ងើបឡើងវិញយ៉ាងឆាប់រហ័ស ក្នុងនោះមានដូចជា កត្តាមនុស្សវ័យលើសពី ៦០ មិនទាន់បានចាក់វ៉ាក់សាំង នៅមានច្រើន ខណៈដែលអត្រានៃការឆ្លង អូមីក្រុង ភាគច្រើនកើតឡើងលើមនុស្សវ័យចំណាស់។

ដោយឡែក រដ្ឋមន្ត្រីក្រសួងសុខាភិបាល លោក Lauterbach បានថ្លែងថា ការឆ្លង កូវីដ-១៩ នៅ អាល្លឺម៉ង់ អាចឡើងដល់កម្រិតកំពូលនៅពាក់កណ្ដាលខែកុម្ភៈ ឬយូរជាងនេះ។

លោក Lauterbach បញ្ជាក់ថា ក្រសួងសុខាភិបាលនឹងគ្រាន់តែបន្ធូរបន្ថយការរឹតបន្តឹងវិធានការទប់ស្កាត់នៅមុនរដូវបុណ្យអ៊ីស្ទើរ នៅខែមេសា តែប៉ុណ្ណោះ៕

February 9, 2022

Johnson & Johnson ផ្អាកផលិតវ៉ាក់សាំងកូវីដ-១៩ ដោយស្ងាត់ៗតាំងពីឆ្នាំមុន

ក្រុមហ៊ុន Johnson & Johnson របស់ សហរដ្ឋអាម៉េរិក ត្រូវបានគេជឿថា បានផ្អាកផលិតវ៉ាក់សាំងបង្ការជំងឺកូវីដ-១៩ កាលពីចុងឆ្នាំ ២០២១ ក្នុងគ្រាដែល រដ្ឋាភិបាលអាម៉េរិក កំពុងជំរុញយុទ្ធនាការចាក់វ៉ាក់សាំងយ៉ាងខ្លាំងក្លា។

សារព័ត៌មាន New York Times (អាម៉េរិក) ដកស្រង់ប្រភពព័ត៌មានច្បាស់ការណ៍មួយចំនួន កាលពីថ្ងៃទី ៨ កុម្ភៈ ឱ្យដឹងថា នេះគឺជាផ្អាកបណ្ដោះអាសន្ន ប៉ុន្តែ រោងចក្រផលិតវ៉ាក់សាំងមួយរបស់ Jonson & Johnson នៅ ទីក្រុង Leiden របស់ ប្រទេសហូឡង់ ច្បាស់ណាស់ បានងាកទៅផ្ដោតលើការផលិតវ៉ាក់សាំងបង្ការជំងឺផ្សេងដែលអាចរកបានប្រាក់ចំណេញខ្ពស់ជាងវ៉ាក់សាំងកូវីដ-១។

មិនទាន់ច្បាស់ថា ការផ្អាកផលិតវ៉ាក់សាំងកូវីដ-១៩ របស់ Jonson & Johnson បង្កផលប៉ះពាល់ដល់បរិមាណ វ៉ាក់សាំងបង្ការកូវីដ-១៩ ដែលមានស្រាប់របស់ក្រុមហ៊ុននេះដែរ ឬយ៉ាងណានៅឡើយ ព្រោះថា ក្រុមហ៊ុននេះតែងតែមានឃ្លាំងបម្រុង។

ប្រភពព័ត៌មានមួយដែលគួរឱ្យទុកចិត្ត បាននិយាយថា ការផ្អាកការផលិតអាចមានន័យថា Jonson & Johnson នឹងកាត់បន្ថយបរិមាណខ្ទង់រាប់រយលានដូស។ តាមគម្រោង ក្រោយពីការផ្អាកបានប៉ុន្មានខែ រោងចក្រនឹងផលិតក្នុងបរិមាណច្រើនជាងមុន។

រោងចក្រនានារបស់ Jonson & Johnson កំពុងរង់ចាំការយល់ព្រមពីអាជ្ញាធរ ខណៈ Johnson & Johnson កំពុងត្រៀមខ្លួនដើម្បីអាចឱ្យរោងចក្រ Leiden ដំណើរការផលិតវ៉ាក់សាំងបង្ការកូវីដ-១៩ ឡើងវិញ នៅខែមីនា។

អ្នកនាំពាក្យរបស់ Jonson & Johnson លោក Jake Sargent បានប្រាប់ BNBC ថា ក្រុមហ៊ុននេះកំពុង «ផ្ដោតទៅលើការធានាឱ្យបានប្រាកដថា វ៉ាក់សាំងរបស់យើងមានជានិច្ចនៅគ្រប់កន្លែងដែលគ្រប់គ្នាត្រូវការ» ហើយថា Jonson & Johnson កំពុងអនុវត្តកាតព្វកិច្ចរបស់ខ្លួនដើម្បីឆ្លើយតបនឹងបណ្ដាអង្គការអន្តរជាតិដែលកំពុងប្រឹងប្រែងជំរុញឱ្យមានការផ្គត់ផ្គង់វ៉ាក់សាំងបង្ការជំងឺកូវីដ-១៩ កាន់តែច្រើន។

មិនដូចទៅនឹងវ៉ាក់សាំងរបស់ក្រុមហ៊ុនដទៃ វ៉ាក់សាំងរបស់ Jonson & Johnson គឺជាប្រភេទចាក់តែមួយដូសបណ្ណោះគឺគ្រប់គ្រាន់។ ថ្វីបើកន្លងមក មានមន្ទិលអំពីប្រសិទ្ធភាពរបស់វ៉ាក់សាំងនេះ ប៉ុន្តែ ការស្រាវជ្រាវបានបង្ហាញថា Jonson & Johnson មានប្រសិទ្ធភាពក្នុងការទប់ស្កាត់អាការធ្ងន់ធ្ងរដែលអាចត្រូវចូលពេទ្យ ឬបាត់បង់ជីវិតដោយសារកូវីដ-១៩ ហើយដូសជំរុញក៏ត្រូវបានបញ្ជាក់ថា មានប្រសិទ្ធភាពទប់ស្កាត់អាការធ្ងន់ធ្ងរនៅពេលឆ្លង អូមីក្រុង ផងដែរ។

កាលពីឆ្នាំ ២០២១ ក្រុមហ៊ុន Jonson & Johnson បានប្រកាសថា រកបានប្រាក់ចំណូល ២.៣៩ ពាន់លានដុល្លារអាម៉េរិក ពី វ៉ាក់សាំងបង្ការកូវីដ-១៩ ក្នុងឆ្នាំ ២០២។ ក្រុមហ៊ុននេះក៏បានព្យាករថា នឹងរកបានចំណូល ៣.៥ ពាន់លានដុល្លារ ក្នុងឆ្នាំ ២០២២៕

February 9, 2022

ប្រទេសអូស្ត្រាលី នឹងចាប់ផ្ដើមបើកទ្វារព្រំដែនទទួលភ្ញៀវទេសចរណ៍បរទេស នៅ ២ សប្ដាហ៍ទៀត

ចាប់ពីថ្ងៃទី ២១ កុម្ភៈ ២០២២ ប្រទេសអូស្ត្រាលី នឹងបើកព្រំដែនឡើងវិញដើម្បីទទួលភ្ញៀវទេសចរណ៍បរទេស បន្ទាប់ពីបានបិទអស់រយៈពេល ២ ឆ្នាំ ដើម្បីអនុវត្តវិធានការទប់ស្កាត់ជំងឺរាតត្បាតសកលកូវីដ-១។

«លក្ខខណ្ឌតម្រូវដើម្បីអាចចូលទឹកដី អូស្ត្រាលី បានគឺត្រូវចាក់វ៉ាក់សាំងបាន ២ ដូស» នាយករដ្ឋមន្ត្រីអូស្ត្រាលី Scott Morrison ប្រកាសដូច្នេះ។

មេដឹកនាំអូស្ត្រលី ថ្លែងថា ដោយសារតែ អូមីក្រុង បានបង្ហាញវត្តមាននៅ អូស្ត្រាលី ដូច្នេះអ្នកដែលបានចាក់វ៉ាក់សាំងពេញលេញក៏មិនបង្កហានិភ័យធ្ងន់ធ្ងរបន្ថែមទៀតដល់ប្រជាជននៅប្រទេសនេះ។

អ្នកទេសចរណ៍បរទេសដែលមិនទាន់បានចាក់វ៉ាក់សាំងពេញលេញ នឹងត្រូវគោរពតាមការកំណត់លើការធ្វើចត្តាឡីស័ករបស់រដ្ឋ និងតំបន់នីមួយៗនៅ អូស្ត្រាលី។

នាយករដ្ឋមន្ត្រីអូស្ត្រាលី Scott Morrison

បន្ទាប់ពីបានអនុញ្ញាតឱ្យ ពលរដ្ឋអូស្ត្រាលី វិលចូលស្រុកវិញចាប់ពីខែមីនា ២០២០ រដ្ឋាភិបាលអូស្ត្រាលី បានបើកទ្វារព្រំដែនឡើងវិញទៅតាមដំណាក់កាល។

គិតមកដល់ព្រឹកថ្ងៃទី ៧ កុម្ភៈ អូស្ត្រាលី បានរកឃើញអ្នកវិជ្ជមាននឹងកូវីដ-១៩ សរុបចំនួន ២.៧ លានករណី ក្នុងនោះមានជាង ៤,០០០ នាក់ បានបាត់បង់ជីវិត៕

February 7, 2022

ព្រះអង្គម្ចាស់ Charles មានមោទកភាព នៅពេលព្រះនាង Camilla នឹងក្លាយជាអគ្គមហេសី

ព្រះអង្គម្ចាស់ Charles មានបន្ទូលថា មានមោទកភាពយ៉ាងជ្រាលជ្រៅចំពោះបំណងតែងតាំងព្រះនាង Camilla ជាអគ្គមហេសីនៃចក្រភពអង់គ្លេស។

«ក្នុងទិវាប្រវត្តិសាស្ត្រនេះ ខ្ញុំ និងមហេសី កំពុងថ្វាយព្រះពរមហាក្សត្រី ដែលទ្រង់បានគ្រប់គ្រងប្រទេស និងចក្រភពអង់គ្លេស (បណ្ដាប្រទេសជាសមាជិករបស់ខំមិនវែល (Commonwealth) អស់រយៈពេល ៧០ ឆ្នាំកន្លង។ យើងមានមនសិការយ៉ាងជ្រាលជ្រៅចំពោះមោទកភាពដែលត្រូវបានបង្ហាញតាមរយៈបំណងរបស់ព្រះមាតា។ នៅពេលយើងរួមដៃគ្នាបម្រើមហាក្សត្រី និងប្រជាជន មហេសីជាទីស្រលាញ់របស់ខ្ញុំ នៅតែជាទីពឹងដ៏រឹងមាំរបស់ខ្ញុំក្នុងរយៈពេលកន្លង» ព្រះអង្គម្ចាស់ Charles បានប្រកាសដូច្នេះកាលពីថ្ងៃទី ៦ កុម្ភៈ។

ប្រកាសរបស់ព្រះអង្គម្ចាស់ Charles ត្រូវបានលើកឡើងមួយថ្ងៃបន្ទាប់ពីមហាក្សត្រីអង់គ្លេស Elizabeth II សម្ដែងអំពីបំណងចង់ឱ្យរាជបុត្រីសុណិសា (បុត្រីប្រសា) Camilla ត្រូវបានតែងតាំងជាអគ្គមហេសី ជាឋានៈខ្ពស់បំផុតសម្រាប់មហេសីរបស់ស្ដេច នៅពេលព្រះអង្គម្ចាស់ Charles ឡើងគ្រងរាជសម្បត្តិ។

ព្រះអង្គម្ចាស់ Charles និងមហេសី Camilla បានរៀបអភិសេកកាលពីឆ្នាំ ២០០៥ បន្ទាប់ពីក្សត្រទាំងពីរអង្គនេះសុទ្ធតែធ្លាប់បានឆ្លងកាត់អាពាហ៍ពិពាហ៍បែកបាក់។ ព្រះអង្គម្ចាស់ Charles បានផ្ដាច់ចំណងអាពាហ៍ពិពាហ៍ជាមួយព្រះនាង Diana កាលពីឆ្នាំ ១៩៩៦ មួយឆ្នាំមុនពេលព្រះនាងបានចូលទិវង្គតដោយសារគ្រោះថ្នាក់ចរាចរណ៍នៅ ទីក្រុងបារីស។

យោងតាមច្បាប់ នៅពេលព្រះអង្គម្ចាស់ Charles ឡើងគ្រងរាជ ព្រះនាង Camilla នឹងត្រូវបានតែងតាំងជាអគ្គមហេសី ដែលជាតំណែងខ្ពស់បំផុតសម្រាប់មហេសីរបស់មហាក្សត្រ ប៉ុន្តែ រាជវាំងអង់គ្លេស នៅមានការរារែកអំពីប្រតិកម្មរបស់សាធារណមតិ ដូច្នេះមានដំណឹងចរាចាមអារ៉ាមថា ព្រះនាង Camilla នឹងត្រូវបានតែងតាំងជា មហេសី ប៉ុណ្ណោះ ពោលគឺមិនមែន អគ្គមហេសី នោះទេ។

ប៉ុន្តែ ប្រកាសរបស់មហាក្សត្រីអង់គ្លេស បានត្រួសត្រាយផ្លូវដើម្បីឱ្យព្រះនាង Camilla ក្លាយជា «អគ្គមហេស៊ី» ក្នុងពេលអនាគត។ មហាក្សត្រីអង់គ្លេស បច្ចុប្បន្នមានព្រះជន្មាយុ ៩៥ វស្សា ក៏មានសិទ្ធិតែងតាំងឋានៈជាអគ្គមហេសី ដល់បុត្រីសុណិសា នៅពេលរាជបុត្រា Charles របស់ទ្រង់ បានឡើងគ្រងរាជ។

មហាក្សត្រីអង់គ្លេស Elizabeth II កំពុងប្រារព្ធមហាទិវាអនុស្សាវរីយ៍នៃការឡើងសោយរាជសម្បត្តិរយៈពេល ៧០ ឆ្នាំ។ មហាក្សត្រីអង្គនេះ គឺជាក្សត្រដំបូងគេបង្អស់ដែលគ្រងរាជបាន ៧០ ឆ្នាំ ហើយក៏ជាក្សត្រដែលសោយរាជបានយូរជាងគេក្នុងពិភពលោកផងដែរ៕

February 7, 2022

Category: អន្តរជាតិ