ថ្ងៃទី ២៧ កុម្ភៈ ក្រសួងការបរទេសអាល្លឺម៉ង់ ដែលជាប្រទេសកំពុងកាន់តំណែងជាប្រធានបន្តវេននៃក្រុមប្រទេសឧស្សាហកម្មជឿនលឿនជាងគេក្នុងពិភពលោក (G៧) បានប្រកាសដូចខាងលើបន្ទាប់ពីបញ្ចប់កិច្ចប្រជុំរដ្ឋមន្ត្រីរបស់ G៧ ដែលពិភាក្សាអំពីស្ថានការណ៍តានតឹងនៅ អ៊ុយក្រែន។
ក្នុងកិច្ចប្រជុំតាមប្រព័ន្ធវីដេអូ រវាងរដ្ឋមន្ត្រីការបទេសអង់គ្លេស, កាណាដា, បារាំង, អាល្លឺម៉ង់, អ៊ីតាលី, ជប៉ុន និង អាម៉េរិក រួមជាមួយនឹងវត្តមានរបស់តំណាងជាន់ខ្ពស់ទទួលបន្ទុកផ្នែកគោលនយោបាយសន្តិសុខ និងការបរទេសរបស់ សហភាពអឺរ៉ុប និង រដ្ឋមន្ត្រីការបរទេសអ៊ុយក្រែន បណ្ដាភាគីបានពិភាក្សាស៊ីជម្រៅអំពីវិធានការខ្លាំងក្លាផ្សេងទៀត ដើម្បីជួយដល់ អ៊ុយក្រែន និងប្រជាជនប្រទេសនេះ ក្នុងនោះក៏មានជំនួយផ្នែកសន្តិសុខអ៊ីនធើណិត ក៏ដូចជាសង្គ្រាមប្រឆាំងព័ត៌មានក្លែងក្លាយ។ G៧ ក៏សន្យាផ្ដល់ជំនួយមនុស្សធម៌ដល់ប្រជាជនអ៊ុយក្រែន ផងដែរ។
G៧ អំពាវនាវឱ្យ រុស្ស៊ី បញ្ឈប់ការឈ្លានពានរបស់ខ្លួន និងដកទ័ពចេញពី អ៊ុយក្រែន ជាបន្ទាន់។ ក្រុមប្រទេសនេះក៏លើកឡើងនូវវិធានការដាក់ទណ្ឌកម្មធ្ងន់ធ្ងរ និងមានការសហការ ក្នុងនោះមានការដាក់ទណ្ឌកម្មលើ បេឡារូស ព្រោះតែប្រទេសនេះបានអនុញ្ញាតឱ្យ រុស្ស៊ី ប្រើប្រាស់ទឹកដីក្នុងការចូលឈ្លានពាន អ៊ុយក្រែន។ G៧ ក៏នឹងមានជំហានបន្ទាប់ បើសិន រុស្ស៊ី មិនបានស្ដាប់តាមការអំពាវនាវ។
មុននោះ EU ក៏បានប្រកាសដាក់ទណ្ឌកម្មលើ រុស្ស៊ី និង បេឡារូស ទន្ទឹមនឹងការផ្ដល់ជំនួយជាអាវុធដល់ អ៊ុយក្រែន ផងដែរ។
