អន្តរជាតិ - La Reine Media

រុស្ស៊ី អាចនឹង «កាត់ទឹកដីរបស់ អ៊ុយក្រែន ជាពីរ» ដូចទៅនឹង ឧបទ្វីបកូរ៉េ

មេដឹកនាំអង្គភាពស៊ើបការណ៍សម្ងាត់ផ្នែកយោធារបស់ អ៊ុយក្រែន នាថ្ងៃទី ២៨ មីនា បានសរសេរនៅលើបណ្ដាញសង្គមថា រុស្ស៊ី អាចបង្កើតព្រំដែនរវាងតំបន់ដែលគ្រប់គ្រងដោយ ទីក្រុងមូស្គូ និងតំបន់ដែលកាន់កាប់ដោយ អ៊ុយក្រែន ដើម្បី «កាត់ អ៊ុយក្រែន ជា ២ ដូចទៅនឹង កូរ៉េខាងត្បូង និង កូរ៉េខាងជើង»។

លោក Kyrylo Budanov ដែលជាមេដឹកនាំអង្គភាពស៊ើបការណ៍សម្ងាត់ផ្នែកយោធារបស់ អ៊ុយក្រែន បន្ថែមថា យុទ្ធសាស្ត្រខាងលើនេះអាចជាលទ្ធផលនៃការដែល រុស្ស៊ី «មិនអាចចូលកាន់កាប់ រដ្ឋធានីកៀវ»។

នៅ ឧបទ្វីបកូរ៉េ អំពីទ្រឹស្ដី កូរ៉េខាងជើង និង កូរ៉េខាងត្បូង បច្ចុប្បន្នស្ថិតក្នុងស្ថានភាពសង្គ្រាមនៅឡើយ ក្រោយពីការប្រយុទ្ធគ្នាអំឡុងឆ្នាំ ១៩៥០-១៩៥៣ ត្រូវបានបញ្ចប់ដោយកិច្ចព្រមព្រៀងឈប់បាញ់ ពោលគឺមិនមែនជាសន្ធិសញ្ញាសន្តិភាពនោះទេ។ តំបន់ខណ្ឌចែក កូរ៉េ ទាំង ២ មានទទឹង ៤ គីឡូម៉ែត្រ និងបណ្ដោយ ២៤៨ គីឡូម៉ែត្រ ដែលត្រូវបានគេហៅថា តំបន់គ្មានកងទ័ព (DMZ)។

ទាក់ទងនឹងការអះអាងរបស់ មេដឹកនាំអង្គភាពស៊ើបការណ៍សម្ងាត់ផ្នែកយោធារបស់ អ៊ុយក្រែន នេះ ភាគីខាង រុស្ស៊ី មិនទាន់បញ្ចេញប្រតិកម្មអ្វីនៅឡើយ៕

March 28, 2022

កូរ៉េខាងជើង ប្រកាសបន្តអភិវឌ្ឍកម្លាំងវាយប្រហារយុទ្ធសាស្ត្រដ៏គួរឱ្យញញើត

មេដឹកនាំកូរ៉េខាងជើង លោក គីម ជុងអ៊ុន ឱ្យដឹងថា ប្រទេសនេះនឹងបន្តការអភិវឌ្ឍ «កម្លាំងវាយប្រហារដ៏គួរឱ្យញញើត» ដែលមិនអាចដោះដូរ និងទិញបាន។

«មានតែបំពាក់អាវុធវាយប្រហារដែលគួរឱ្យញញើត កម្លាំងយោធាខ្លាំងក្លាគ្មាននគរទប់ទល់បាន ទើបយើងអាចទប់ស្កាត់សង្គ្រាម ធានាសន្តិភាពជូនប្រទេសជាតិ និងគ្រប់គ្រងរាល់ការគំរាមកំហែង» ទីភ្នាក់ងារសារព័ត៌មាន KCNA ដកស្រង់សម្ដីរបស់លោក គីម ជុងអ៊ុន ថ្លែងនៅក្នុងពិធីជួបជុំក្រុមមន្ត្រី អ្នកវិទ្យាសាស្ត្រ វិស្វករ និងបុគ្គលិកដែលបានចូលរួមត្រៀមសម្រាប់ការបាញ់មីស៊ីលអន្តរទ្វីប (ICBM) កាលពីថ្ងៃទី ២៤ មីនា។

មេដឹកនាំកូរ៉េខាងជើង ឱ្យដឹងថា ការសាកល្បងបច្ចេកវិទ្យា ICBM ថ្មីបំផុតរបស់ប្រទេសនេះ គឺមានបំណងទប់ស្កាត់រាល់សកម្មភាពយោធារបស់ សហរដ្ឋអាម៉េរិក។

ទីក្រុងវ៉ាស៊ីងតោន បានស្វែងរកវិធីដាក់សម្ពាធលើ ទីក្រុងព្យុងយ៉ាង ក្នុងបំណងបង្ខំឱ្យ កូរ៉េខាងជើង បោះបង់ ឬកាត់បន្ថយចំនួនក្បាលគ្រាប់នុយក្លេអែរ និង ICBM ដែលមានលទ្ធភាពអាចបាញ់ដល់គោលដៅនានានៅ សហរដ្ឋអាម៉េរិក។ ក៏ប៉ុន្តែ លោក គីម ជុងអ៊ុន បានអះអាងថា កម្លាំងការពារជាតិរបស់ កូរ៉េខាងជើង «មិនអាចត្រូវបានដោះដូរ ឬទិញដោយប្រការណាមួយឡើយ» ហើយថា នឹងរក្សាឱ្យបាន បើទោះជារងទណ្ឌកម្មខ្លាំងក្លាយ៉ាងណាក៏ដោយ។

អំពីកម្លាំងនុយក្លេអែរ លោក គីម ថ្លែងថា កូរ៉េខាងជើង នឹងបន្តកសាង «កម្លាំងយុទ្ធសាស្ត្រល្អឥតខ្ចោះ និងខ្លាំងក្លាជាងមុន»។

សហរដ្ឋអាម៉េរិក កាលពីថ្ងៃទិ ២៥ មីនា បានឱ្យដឹងថា នឹងជំរុញឱ្យ អង្គការសហប្រជាជាតិ បង្កើនការដាក់ទណ្ឌកម្មលើ កូរ៉េខាងជើង ទាក់ទិននឹងការបាញ់សាកល្បងមីស៊ីលអន្តរទ្វីប កាលពីសប្ដាហ៍មុន របស់ប្រទេសនេះ។ ក៏ប៉ុន្តែ ប្រទេសចិន និង រុស្ស៊ី បានបញ្ជេញសញ្ញាបដិសេធរួចទៅហើយ។

មីស៊ីល Hwasong-១៧ ជាកំណែ ICBM ដំបូងរបស់ កូរ៉េខាងជើង ដែលបានចាប់ផ្ដើមបាញ់សាកល្បងតាំងពីឆ្នាំ ២០១៧ អាចហោះឡើងដល់រយៈកម្ពស់ជាង ៦,២០០ គីឡូម៉ែត្រ និងធ្វើដំណើរបានជិត ១,១០០ គីឡូម៉ែត្រ មុនពេលធ្លាក់នៅ សមុទ្រជប៉ុន។ ក្រុមអ្នកជំនាញអះអាងថា បើសិនត្រូវបានបាញ់ទៅតាមគន្លងគោចរស្ដង់ដា នោះ Hwasong-១៧ អាចបាញ់ដល់រយៈចម្ងាយ ១៣,០០០ គីឡូម៉ែត្រ គ្រប់គ្រាន់សម្រាប់បន្តក់លើគោលដៅនានានៅទូទាំង សហរដ្ឋអាម៉េរិក៕

March 28, 2022

មាសនៅទូទាំងពិភពផែនដី មានចំនួនប៉ុន្មានតោន?

ក្រុមអ្នកជំនាញផ្នែកភូគព្ភសាស្ត្របានគណនាឃើញថា មាសនៅក្នុងដីនៅមានប្រហែល ៥០,០០០ តោនទៀត ខណៈ ១៩០,០០០ តោន ត្រូវបានទាញយករួចហើយក្នុងប្រវត្តិសាស្ត្រ។

នៅក្នុងជ្រុងណាមួយនោះ ពិភពលោកបច្ចុប្បន្នត្រូវបានកសាងដោយយោងទៅលើមាស។ មាសនៅក្នុងឧបករណ៍បច្ចេកវិទ្យាទាំងឡាយដែលមនុស្សកំពុងប្រើប្រាស់ប្រចាំថ្ងៃ។ កុំព្យូទ័រ ទូរស័ព្ទ ទូរទស្សន៍ សុទ្ធតែត្រូវការមាសក្នុងដំណាក់កាលនៃការផលិត។ សូម្បីតែគ្រឿងម៉ាស៊ីនដែលផលិតឧបករណ៍បច្ចេកវិទ្យាក៏មានមាស។

ជាមួយនឹងមាសដែលវិស័យឧស្សាហកម្មទាំងឡាយក្នុងពិភពលោកប្រើប្រាស់ យើងងាយនឹងភ្លេចនឹកដល់ប្រភពដែលមានកំណត់របស់វា។ សម្រាប់វិស័យរ៉ែ ការទាញយកមាសបាន ១ ក្រាម ពីដី ១ តោន គឺជាលទ្ធផលល្អ។ ប៉ុន្តែ ដោយសារមាសមានតម្លៃខ្ពស់ ក្រុមហ៊ុនទាញយករ៉ែប្រភេទនេះ នៅតែចំណេញ។

នៅក្នុងអំឡុងពាក់កណ្ដាលខែមីនា ២០២២ មាស ១ ដុំ ទម្ងន់ ១២.៥ គីឡូក្រាម មានតម្លៃរហូតដល់ ៨០០,០០០ ដុល្លារអាម៉េរិក។

ដូច្នេះ តើពិភពលោកទាំងមូលមានមាសចំនួនប៉ុន្មានតោន?

មាសនៅក្នុងដី ត្រូវបានចែកចេញជា ២ ក្រុម៖ រ៉ែមាស (មាសដែលរងកម្ដៅគ្រប់គ្រាន់ដល់ថ្នាក់រលាយដាច់ដោយឡែក) និងរ៉ែលោហមាស (គឺជារ៉ែមាសដែលនៅលាឡំជាមួយលោហធាតុផ្សេង)។

មាស ៣១ ក្រាម (ជាង ១ តម្លឹង) ត្រូវការចំណាយប្រាក់ទាញយកប្រហែលពី ៧០០ ទៅ ១,៤០០ ដុល្លារអាម៉េរិក អាស្រ័យលើទំហំនៃការចំណាយសម្រាប់ដំណើរការសកម្មភាពរុករក និងទីតាំងរុករក។

ក្រុមអ្នកជំនាញផ្នែកភូគព្ភសាស្ត្រ គណនាឃើញថា មាសប្រហែល ៥០,០០០ តោន កំពុងស្ថិតនៅក្រោមដី រង់ចាំការទាញយក។ ចំណែកមាសដែលត្រូវបានទាញយករួចហើយ មានចំនួនជាង ១៩០,០០០ តោន នៅទូទាំងសកលលោក។

យោងតាមតួលេខខាងលើ ប្រភពផ្គត់ផ្គង់មាសឆៅនៅលើពិភពលោក នៅសល់តែប្រហែល ២០% ទៀតប៉ុណ្ណោះ។ នៅពេលរ៉ែមាសឈានដល់ដំណាក់កាល «ខ្សោះ» មនុស្សមានតែកែច្នៃ និងប្រើប្រាស់វាឡើងវិញ។

March 26, 2022

អ៊ុយក្រែន ស្នើឱ្យ អាម៉េរិក ផ្ដល់ជំនួយជាគ្រាប់រ៉ុក្កែត ១,០០០ គ្រាប់/ថ្ងៃ

ទីក្រុងកៀវ បានស្នើសុំជំនួយជាគ្រាប់រ៉ុក្កែតប្រឆាំងរថក្រោះ Javelin ចំនួន ៥០០ គ្រាប់ និងរ៉ុក្កែតការពារដែនអាកាស Stinger ៥០០ គ្រាប់ជារៀងរាល់ថ្ងៃ ដើម្បីជួយប្រទេសនេះ ទប់ទល់នឹង កងទ័ពរុស្ស៊ី។

ព័ត៌មានពី RT ឱ្យដឹងថា ក្នុងមួយរយៈពេលចុងក្រោយនេះ បណ្ដាប្រទេសលោកខាងលិច បានផ្ដល់អាវុធ និងសម្ភារៈយោធាជាច្រើនដល់ អ៊ុយក្រែន។ ក៏ប៉ុន្តែ ប្រធានាធិបតី វ៉ូឡូឌីមៀ ហ្សេឡែនស្គី យល់ថា ការផ្ដល់ជំនួយនោះមិនទាន់គ្រប់គ្រាន់។

CNN ដកស្រង់ប្រភពព័ត៌មានច្បាស់ការណ៍មួយចំនួន ឱ្យដឹងថា ឯកសារបញ្ជូនឡើងទៅកាន់សភាអាម៉េរិក បង្ហាញថា អ៊ុយក្រែន កំពុងស្នើឱ្យ អាម៉េរិក ផ្ដល់អាវុធច្រើនជាងបច្ចុប្បន្ន។ សំណើនេះត្រូវបានលើកឡើងនៅពេល កងទ័ពអ៊ុយក្រែន កំពុងខ្វះអាវុធដើម្បីប្រយុទ្ធតតាំងទល់នឹងការឈ្លានពានរបស់ រុស្ស៊ី។

March 26, 2022

(វីដេអូ)-ឃ្លាំងដាក់ប្រេងសាំង និងរោងចក្រប្រេងរបស់ អារ៉ាប៊ីសាអូឌីត រងការវាយប្រហារដោយរ៉ុក្កែត

កងកម្លាំងបោះបោរ Houthi នៅ ប្រទេសយេម៉ែន បាន «ស្រោច» រ៉ុក្កែត ទៅលើឃ្លាំងដាក់ប្រេងឥន្ធនៈ និងរោងចក្រចម្រាញ់ប្រេងរបស់ អារ៉ាប៊ីសាអូឌីត នៅក្បែរទីលានប្រណាំងរថយន្ត F១ មុនពេលការប្រកួតចាប់ផ្ដើម។

កាលពីថ្ងៃទី ២៥ មីនា កងកម្លាំងប្រដាប់អាវុធ Houthi នៅ យេម៉ែន បានបាញ់រ៉ុក្កែតទៅលើឃ្លាំងដាក់ប្រេង Aramco នៅទីក្រុង Jeddah របស់ អារ៉ាប៊ីសាអូឌីត មុនពេលព្រឹត្តិការណ៍ប្រណែងរថយន្ត F១ ចាប់ផ្ដើម។ នេះគឺជាសកម្មភាពត្រូវបានគេជឿថា ដើម្បីបង្ខំឱ្យ អារ៉ាប៊ីសាអូឌីត បញ្ចប់ឡោមព័ទ្ធលើ យេម៉ែន។ នេះបើតាមប្រភពព័ត៌មានរបស់ RT។

អ្នកនាំពាក្យម្នាក់របស់ក្រុមបះបោរ បានចេញមកអះអាងទទួលខុសត្រូវលើករណីវាយប្រហារនេះ។ ហេដ្ឋារចនាសម្ព័ន្ធរបស់ឃ្លាំងដាក់ប្រេង ត្រូវរងការវាយប្រហារដោយគ្រាប់រ៉ុក្កែត ចំណែករោងចក្រចម្រាញ់ប្រេង Ras Tanura និង Rabigh ដែលនៅក្បែរនោះ ត្រូវបានវាយប្រហារដោយយន្តហោះគ្មានមនុស្សបើក។ គោលដៅនៃការវាយប្រហារនេះ ស្ថិតនៅមិនឆ្ងាយប៉ុន្មានពីទីលានប្រណាំងរថយន្ត ដែលមានចម្ងាយប្រហែល ១០ គីឡូម៉ែត្រ ពីព្រលានយន្តហោះរបស់ទីក្រុង Jeddah។

វីដេអូនៅលើបណ្ដាញសង្គម បង្ហាញថា ផ្សែង និងភ្លើងកំពុងលេបត្របាក់ឃ្លាំងដាក់ប្រេង និងរោងចក្រចម្រាញ់ប្រេង។

សម្ព័ន្ធអារ៉ាប់ បានប្រកាសអំពីការវាយប្រហែលខាងលើ ប៉ុន្តែ ថា មិនបង្កផលប៉ះពាល់ដល់ជីវភាពរបស់ប្រជាជននៅតំបន់ជុំវិញទីក្រុង Jeddah នោះឡើយ៕

March 26, 2022

ក្រោយ កូរ៉េខាងជើង ថា ជោគជ័យក្នុងការសាកល្បងមីស៊ីលអន្តរទ្វីប អាម៉េរិក ក៏ដាក់ទណ្ឌកម្មលើក្រុមហ៊ុនរុស្ស៊ី និងកម្មវិធីអភិវឌ្ឍមីស៊ីល របស់ ទីក្រុងព្យុងយ៉ាង

សហរដ្ឋអាម៉េរិក សម្រេចដាក់ទណ្ឌកម្មលើក្រុមហ៊ុនចំនួន ២ របស់ រុស្ស៊ី និងស្ថាប័នមួយរបស់ កូរ៉េខាងជើង ព្រោះបានប្រគល់ទំនិញសំខាន់សម្រាប់កម្មវិធីអភិវឌ្ឍមីស៊ីល របស់ ទីក្រុងព្យុងយ៉ាង។

ទណ្ឌកម្មដែលត្រូវបានក្រសួងការបរទេសអាម៉េរិក ប្រកាសកាលពីថ្ងៃទី ២៤ មីនា គឺសំដៅលើក្រុមហ៊ុន ២ របស់ រុស្ស៊ី រួមមាន Ardis Group និង PFK Profpodshipnik LLC រួមនឹងបណ្ឌិត្យសភាវិទ្យាសាស្ត្រធម្មជាតិលេខពីររបស់ កូរ៉េខាងជើង។ ទីក្រុងវ៉ាស៊ីងតោន ក៏បានដាក់ទណ្ឌកម្មលើពលរដ្ឋរុស្ស៊ី Igor Aleksandrovich Michurin និងពលរដ្ឋកូរ៉េខាងជើង Ri Sung-chol ផងដែរ។

«ទណ្ឌកម្មនេះគឺជាមួយផ្នែកនៃការប្រឹងប្រែងទប់ស្កាត់លទ្ធភាពអភិវឌ្ឍកម្មវិធីមីស៊ីលរបស់ កូរ៉េខាងជើង» អ្នកនាំពាក្យរបស់ក្រសួងការបរទេសអាម៉េរិក Ned Price បានបញ្ជាក់ដូច្នេះ។

ការសម្រេចដាក់ទណ្ឌកម្មរបស់ សហរដ្ឋអាម៉េរិក នេះ ត្រូវបានលើកឡើងក្នុងថ្ងៃជាមួយគ្នាដែល កូរ៉េខាងជើង ប្រកាសថា បានសាកល្បងបាញ់កាំជ្រួចផ្លោងអន្តរទ្វីបថ្មី Hwasong-១៧ ពីព្រលានយន្តហោះព្យុងយ៉ាង ដោយជោគជ័យ ក្រោមវត្តមានតាមដានរបស់លោក គីម ជុនអ៊ុន។

«មីស៊ីល ត្រូវបានបាញ់ចេញពីព្រលានយន្តហោះអន្តរជាតិព្យុងយ៉ាង ហោះដល់កម្ពស់អតិបរមា ៦,២៤៨.៥ គីឡូម៉ែត្រ និងហោះបានរយៈចម្ងាយ ១,០៩០ គីឡូម៉ែត្រ ក្នុងរយៈពេល ៤,០៥២ វិនាទី មុនពេលសំដៅចំគោលដៅដែលបានកំណត់» នៅឯសមុទ្រជប៉ុន នេះបើតាមទីភ្នាក់ងារសារព័ត៌មានជាតិកូរ៉េខាងជើង (KCNA)។

នេះអាចជាការបាញ់សាកល្បង ICBM ធំបំផុតរបស់ កូរ៉េខាងជើង និងជាលើកដំបូងដែល ទីក្រុងព្យុងយ៉ាង បានបាញ់សាកល្បងកាំជ្រួចផ្លោងអន្តរទ្វីប រាប់ចាប់តាំងពីឆ្នាំ ២០១៧។

March 25, 2022

ចែវទូកកៅស៊ូប្រវែងជាង ២ម៉ែត្រ ឆ្លងកាត់សមុទ្រថៃ ទៅកាន់ ឥណ្ឌា ដើម្បីជួបប្រពន្ធ

នៅពេលត្រូវបានកងទ័ពថៃ រកឃើញ បុរសម្នាក់ដែលជា ជនជាតិវៀតណាម អាយុ ៣៧ ឆ្នាំ បានប្រាប់ថា ខ្លួនចែវទូកកៅស៊ូ រយៈពេល ១៨ មកហើយនៅលើសមុទ្រ បំណងឆ្ពោះទៅកាន់ ប្រទេសឥណ្ឌា ដើម្បីជួបប្រពន្ធ។

កងទ័ពថៃ ឱ្យដឹងថា ពួកគេទទួលបានរបាយការណ៍ពីអ្នកនេសាទក្នុងតំបន់កាលពីថ្ងៃទី ២៣ មីនា អំពីបុរសម្នាក់កំពុងចែវទូកកៅស៊ូសប់ខ្យល់ នៅតំបន់សមុទ្រ ចម្ងាយប្រហែល ១៤ គីឡូម៉ែត្រ ពីប្រជុំកោះ Similan។

មួយម៉ោងក្រោយមក កម្លាំងសង្គ្រោះរបស់ ថៃ ក៏បានទៅដល់កន្លែងកើតហេតុ និងបានឃើញទូកកៅស៊ូត្រូវបានចងទៅនឹងទូកនេសាទរបស់ ប្រជាជនថៃ។ បុរសដែលនៅលើទូកកៅស៊ូនោះ ត្រូវបានគេដឹងថា មានឈ្មោះ Ho Hoang Hung អាយុ ៣៧ ឆ្នាំ ជាជនជាតិវៀតណាម។

នៅលើទូកតូចប្រវែង ២.៥ ម៉ែត្រ របស់បុរសនោះ មានធុងទឹកមួយដែលជិតអស់ទឹករលីង រួមនឹងមីប្រហែល ១០ កញ្ចប់ និងវ៉ាលិសមួយ។

បុរសខាងលើបានប្រាប់ថា គាត់កំពុងចែវទូកទៅកាន់ ប្រទេសឥណ្ឌា ដើម្បីជួបប្រពន្ធដែលកំពុងរស់នៅក្នុងទីក្រុង Mumbai។ បុរសនេះបន្ថែមថា ពួកគេបានរៀបការកាលពី ២ ឆ្នាំមុន នៅមុនពេលត្រូវបានឃ្លាតពីគ្នាដោយសារជំងឺរាតត្បាតសកល កូវីដ-១។

Hung និយាយថា ខ្លួនបានធ្វើដំណើរតាមយន្តហោះពី ទីក្រុងហូជីមិញ ទៅកាន់បាងកក ប្រទេសថៃ កាលពីថ្ងៃទី ២ មីនា ហើយគ្រោងនឹងបន្តដំណើរតាមយន្តហោះទៅកាន់ ប្រទេសឥណ្ឌា ប៉ុន្តែ សុំទិដ្ឋាការមិនបាន។

ក្រោយមក បុរសនេះក៏បានជិះរថយន្តក្រុងពី បាងកក ទៅកាន់ ភូកេត និងទិញទូកកៅស៊ូមួយគ្រឿង ចេញដំណើរពីថ្ងៃទី ៥ មីនា ក្នុងបំណងឆ្លងកាត់សមុទ្រចម្ងាយ ២,០០០ គីឡូម៉ែត្រ ទៅកាន់ ប្រទេសឥណ្ឌា។ គាត់ត្រូវបានក្រុមអ្នកនេសាទប្រទះឃើញ បន្ទាប់ពីធ្វើដំណើរបាន ១៨ ថ្ងៃ នៅលើសមុទ្រ។

សមត្ថកិច្ចថៃ បាននាំបុរសនេះទៅកាន់ការិយាល័យរបស់ឧទ្យានជាតិ Mu Ko Similan នៅ Phangnga ដើម្បីសាកសួរបន្ថែម៕

March 24, 2022

កូរ៉េខាងត្បូង ថា កូរ៉េខាងជើង ទំនងជាទើបបានបាញ់សាកល្បងកាំជ្រួចផ្លោងអន្តរទ្វីបប្រើបច្ចេកវិទ្យា ICBM

ថ្ងៃទី ២៤ មីនា កងទ័ពកូរ៉េខាងត្បូង ប្រកាសថា កូរ៉េខាងជើង ទំនងជាទើបតែបានបាញ់សាកល្បងកាំជ្រួចផ្លោងរយៈចម្ងាយឆ្ងាយ ចេញពីឆ្នេរសមុទ្រភាគខាងកើតនៃឧបទ្វីបកូរ៉េ នៅមុននេះ។

ល្ងាចថ្ងៃទី ២៤ មីនា កូរ៉េខាងជើង បានបាញ់កាំជ្រួចផ្លោងយ៉ាងតិច ១ គ្រាប់ ឆ្ពោះទៅកាន់ សមុទ្រជប៉ុន (សមុទ្រខាងកើតនៃឧបទ្វីបកូរ៉េ) នេះបើតាមសារព័ត៌មាន Yonhap របស់ កូរ៉េខាងត្បូង ដកស្រង់ប្រកាសពីក្រុមប្រឹក្សាយោធាជាតិប្រទេសនេះ។

យោងតាម Yonhap ក្រុមមន្ត្រីយោធាកូរ៉េខាងត្បូង អះអាងថា នេះអាចជាកាំជ្រួចផ្លោងរយៈចម្ងាយឆ្ងាយ ប្រើបច្ចេកវិទ្យាកាំជ្រួចអន្តរទ្វីប (ICBM)។ ក្រុមប្រឹក្សាសន្តិសុខកូរ៉េខាងត្បូង កំពុងត្រៀមបើកកិច្ចប្រជុំបន្ទាន់ ស្ដីពីករណីបាញ់សាកល្បងកាំជ្រួចផ្លោងរបស់ កូរ៉េខាងជើង នេះ។

ក្រុមប្រឹក្សាសន្តិសុខនៃអង្គការសហប្រជាជាតិ បានកំណត់ ហាម កូរ៉េខាងជើង សាកល្បងកាំជ្រួចផ្លោងរយៈចម្ងាយឆ្ងាយ និងអាវុធនុយក្លេអែរ។

March 24, 2022

រុស្ស៊ី បញ្ចេញវីដេអូ ស្ដីពី ប្រព័ន្ធមីស៊ីល S-៣០០ របស់ អ៊ុយក្រែន ត្រូវបានកម្ទេច

រុស្ស៊ី បានបញ្ចេញវីដេអូមួយ ដែលបង្ហាញអំពីការវាយប្រហារទៅលើមីស៊ីលការពារដែនអាកាស S-៣០០ របស់ អ៊ុយក្រែន នៅភាគខាងជើងរដ្ឋធានីកៀវ ដោយប្រើប្រាស់អាវុធបាញ់ចំគោលដៅបំផុត។

«យន្តហោះគ្មានមនុស្សបើក (UAV) របស់ រុស្ស៊ី បានប្រទះឃើញប្រព័ន្ធមីស៊ីល S-៣០០ របស់ អ៊ុយក្រែន ដែលដាក់ពង្រាយនៅក្នុងតំបន់ឧស្សាហកម្មភាគខាងជើងរដ្ឋធានីកៀវ។ ប្រព័ន្ធមីស៊ីលនេះ ត្រូវបានកម្ទេចទាំងស្រុងដោយអាវុធកំណត់ទិសចំគោលដៅ» ក្រសួងការពារជាតិរុស្ស៊ី បានប្រកាសកាលពីម្សិលមិញដូច្នេះ ប៉ុន្តែ មិនបាននិយាយច្បាស់ថា វីដេអូនេះ ត្រូវបានថតកាលពីថ្ងៃណា។

វីដេអូដែលថតពី UAV របស់ រុស្ស៊ី បង្ហាញថា រថយន្តយោធា ១ គ្រឿង ដែលដឹកគ្រាប់រំសេវ និងជាប្រព័ន្ធបាញ់គ្រាប់មីស៊ីលការពារដែនអាកាស ចល័តចូលទៅក្នុងតំបន់ខាងលើ មុនពេលរថយន្ត ១ គ្រឿងទៀត ថយចូលទៅក្នុងឃ្លាំង។ គោលដៅដែលត្រូវបានវាយប្រហារដោយអាវុធអាថ៌កំបាំងនេះ បានឆាប់ឆេះខ្ទេចទាំងស្រុង។

ចំណែកភាគីខាងកងទ័ពអ៊ុយក្រែន មិនទាន់មានប្រតិកម្មអ្វីទៅនឹងការលើកឡើងរបស់ ក្រសួងការពារជាតិរុស្ស៊ី នៅឡើយ។

March 24, 2022

ទ័ពអាកាសរុស្ស៊ី «ប្ដូរយុទ្ធសាស្ត្រ» សម្រាប់សង្គ្រាមនៅ អ៊ុយក្រែន

សហគមន៍អ្នកជំនាញផ្នែកយោធា និងក្រុមមន្ត្រីអាម៉េរិក អះអាងថា ទ័ពអាកាសរបស់ រុស្ស៊ី បង្កើនការហោះហើរច្រើនជាងមុន ៥០% និងបញ្ជូន UAV និងអាវុធបន្ថែមទៀត ទៅកាន់ អ៊ុយក្រែន។

Washington Post កាលពីថ្ងៃទី ២៣ មីនា ដកស្រង់សម្ដីរបស់មន្ត្រីការពារជាតិអាម៉េរិក រួមនឹងក្រុមអ្នកជំនាញផ្នែកយោធា វាយតម្លៃថា រុស្ស៊ី បង្កើនសកម្មភាពរបស់ទ័ពអាកាសនៅ អ៊ុយក្រែន ក្រោយពីយន្តហោះជាច្រើនគ្រឿងត្រូវបាន អ៊ុយក្រែន បាញ់ទម្លាក់ ក្នុងពេលដែល សហរដ្ឋអាម៉េរិក និងសម្ព័ន្ធមិត្ត បញ្ជូនប្រព័ន្ធមីស៊ីលការពារដែនអាកាស MANPADS (Man-portable air-defense systems -MPADS) រាប់ពាន់ឈុត ទៅឱ្យ ទីក្រុងកៀវ។

មន្ត្រីជាន់ខ្ពស់មួយរូបនៃស្ថាប័នការពារជាតិរបស់ សហរដ្ឋអាម៉េរិក កាលពីថ្ងៃទី ២១ មីនា ឱ្យដឹងថា ទ័ពអាកាសរបស់ រុស្ស៊ី បានធ្វើការហោះហើរប្រហែល ៣០០ លើក ក្នុងអំឡុង ២៤ ម៉ោង កើន ១០០ លើក ធៀបនឹងការហោះហើរប្រចាំថ្ងៃមុននោះ។

«ទ័ពអាកាសរុស្ស៊ី ទំនងជាបានកែសម្រួលយុទ្ធសាស្ត្រនៃការធ្វើសកម្មភាព» Michael Kofman ប្រធានផ្នែកស្រាវជ្រាវអំពី រុស្ស៊ី ប្រចាំស្ថាប័នប្រឹក្សា CAN ដែលមានមូលដ្ឋាននៅ Virginia ថ្លែងដូច្នេះ។

យោងតាម Kofman អ៊ុយក្រែន ហាក់ប្រមូលផ្ដុំប្រព័ន្ធការពារដែនអាកាសនៅតាមតំបន់សំខាន់មួយចំនួន ដូចជា រដ្ឋធានី និងទីក្រុងធំទីពីរ ខាកូវ។ ប្រការនេះ នាំឱ្យ រុស្ស៊ី អាចបើកការវាយប្រហារតាមអាកាសលើតំបន់ជុំវិញទីក្រុង ម៉ារីប៉ូឡ (Mariupol) នៅភាគខាងត្បូងប្រទេស ជាទីដែលកំពុងមានការប្រយុទ្ធគ្នាយ៉ាងខ្លាំងក្លា។

ប្រព័ន្ធ MANPADS ដែល អ៊ុយក្រែន កំពុងប្រើប្រាស់ បានរារាំងយន្តហោះ និងឧទ្ធម្ភាគចក្រយោធារបស់ រុស្ស៊ី ប៉ុន្តែ ទីក្រុងមូស្គូ ទំនងជាបានទប់ទល់នឹងបញ្ហានេះដោយការគេចចេញពីរង្វង់ប្រតិបត្តិការរបស់មីស៊ីលខាងលើ។ មន្ត្រីការពារជាតិជាន់ខ្ពស់ ១ រូបរបស់ អាម៉េរិក និយាយថា យន្តហោះចម្បាំងជាច្រើនគ្រឿងរបស់ រុស្ស៊ី មិនដែលបានចេញផុតពីដែនអាកាសរបស់ រុស្ស៊ី ឬ បេឡារូស ដោយពួកគេ ភាគច្រើន ធ្វើការវាយប្រហារចូល ទឹកដីអ៊ុយក្រែន ពីដែនអាកាសខាងក្រៅ។

ប្រព័ន្ធអាវុធមួយចំនួនរបស់ រុស្ស៊ី ដើមឡើយមិនបង្ហាញវត្តមានក្នុងយុទ្ធនាការយោធានៅ អ៊ុយក្រែន ប៉ុន្តែ ពេលនេះវាបានបង្ហាញខ្លួនកាន់តែញឹកញាប់ ក្នុងនោះមានទាំងយន្តហោះឈ្លបការណ៍គ្មានមនុស្សបើក Orlan-១០ ផងដែរ។

កាលពីថ្ងៃទី ១៩ មីនា រុស្ស៊ី ក៏បានទទួលស្គាល់ថា បានប្រើប្រាស់កាំជ្រួចផ្លោងល្បឿនលឿនជាងសំឡេង Kinzhal ជាលើកដំបូង វាយប្រហារទៅលើមូលដ្ឋានមួយនៅតំបន់ Ivano-Frankivsk ក្នុងភាគខាងកើតអ៊ុយក្រែន។ មួយថ្ងៃក្រោយមក ទីក្រុងមូស្គូ ក៏បានប្រកាសថា បានបន្តបើកការវាយប្រហារដោយ Kinzal ទៅលើឃ្លាំងដាក់ប្រេងនៅក្បែរភូមិ Kostyantynivka ក្នុងខេត្ត Mykolaiv ភាគខាងលិចរបស់ អ៊ុយក្រែន។

យ៉ាងនេះក្ដី ក្រុមមន្ត្រីជំនាញឱ្យដឹងថា មីស៊ីលល្បឿនលឿនជាងសំឡេងរបស់ រុស្ស៊ី នឹងមិនអាចប្ដូរផ្លាស់ស្ថានភាពប្រយុទ្ធបានច្រើននោះទេ ដោយសារចំនួនគ្រាប់មីស៊ីលប្រភេទនេះ មានមិនច្រើន៕

March 24, 2022

Category: អន្តរជាតិ