សភារបស់រដ្ឋ California នៃ សហរដ្ឋអាម៉េរិក កំពុងពិចារណាលើសំណើស្ដីពីរឿងធ្វើការ ៣២ ម៉ោង ក្នុង ១ សប្ដាហ៍ ដែលស្មើនឹង ៤ ថ្ងៃ/សប្ដាហ៍ អនុវត្តចំពោះបណ្ដាក្រុមហ៊ុនធំ។
អ្នកតាក់តែងច្បាប់ ២ រូប របស់រដ្ឋ California កាលពីខែកុម្ភៈ ២០២២ បានដាក់សេចក្ដីព្រាងច្បាប់មួយទៅកាន់អង្គសភា ស្ដីពីការកំណត់ឱ្យធ្វើការក្នុង ១ សប្ដាហ៍ ត្រឹមតែ ៣២ ម៉ោង ជំនួសឱ្យ ៤០ ម៉ោង ចំពោះក្រុមហ៊ុនទាំងឡាយដែលមានបុគ្គលិកលើសពី ៥០០ នាក់។ គណៈកម្មការពលកម្ម និងការងារ របស់សភា California នៅចុងសប្ដាហ៍នេះ គ្រោងនឹងសម្រេចថា ត្រូវធ្វើការអនុម័តលើសេចក្ដីព្រាងច្បាប់ខាងលើ ឬអត់។
អ្នកដែលធ្វើការ ៤ ថ្ងៃ/សប្ដាហ៍ នឹងមិនត្រូវបានកាត់ប្រាក់ខែ ខណៈដែលអ្នកជ្រើសរើសយកការធ្វើការច្រើនម៉ោងជាងនេះនឹងទទួលបានប្រាក់ឈ្នួលក្រៅម៉ោងមិនក្រោម ១.៥ ដង ធៀបនឹងប្រាក់ឈ្នួលធម្មតា។ បើសិនក្លាយជាច្បាប់ ការកំណត់ថ្មីនេះនឹងមានឥទ្ធិពលលើក្រុមហ៊ុនជាង ២,០០០ នៅក្នុងរដ្ឋ California។
«ពិតជាគ្មានន័យ បើសិនជាយើងនៅតែបន្តរក្សាកាលបរិច្ឆេទធ្វើការដែលមានតាំងពីសម័យបដិវត្តន៍ឧស្សាហកម្ម» Cristina Garcia អ្នកនយោបាយ ១ រូប មកពីបក្សប្រជាធិបតេយ្យ នៅ California បានឱ្យដឹងដូច្នេះ និងបន្ថែមថា ពុំមានទំនាក់ទំនងនឹងគ្នាឡើយ រវាង «ការធ្វើការច្រើនម៉ោង និងផលិតភាពខ្ពស់»។
ក៏ប៉ុន្តែ ការិយាល័យពាណិជ្ជកម្ម California ដែលជាក្រុមជំនួយសម្រាប់បណ្ដាក្រុមហ៊ុន អាជីវកម្មនៅក្នុងរដ្ឋនេះ បានជំទាស់នឹងសេចក្ដីព្រាងច្បាប់ខាងលើ ដោយព្រមានថា វានឹងធ្វើឱ្យក្រុមហ៊ុននានាត្រូវចំណាយប្រាក់ច្រើនជាងមុន។
សំណើស្ដីពីការធ្វើការ ៤ ថ្ងៃ/សប្ដាហ៍ កំពុងទទួលបានការគាំទ្រច្រើន ដោយយល់ថា បរិមាណនៃការងារដូចគ្នា អាចត្រូវបានធ្វើរួចរាល់ក្នុងពេលវេលាខ្លីជាងមុន។ ក្រុមហ៊ុនជាច្រើនក៏កំពុងអនុវត្តសាកល្បងវិធី ឬរូបមន្តធ្វើការដូចខាងលើនេះដែរ។
កាលពីដើមខែនេះ ក្រុមហ៊ុនរាប់សិបនៅ សហរដ្ឋអាម៉េរិក និង កាណាដា បានចាប់ផ្ដើមសាកល្បងធ្វើការ ៤ ថ្ងៃ/សប្ដាហ៍ ក្នុងរយៈពេល ៦ ខែ។ បុគ្គលិកនឹងធ្វើការតែ ៨០% ធៀបនឹងពេលវេលានៃការបំពេញការងារដូចសព្វថ្ងៃ ហើយទទួលបានប្រាក់ខែដូចធម្មតា ប៉ុន្តែត្រូវរក្សាទិន្នផល ឬផលិតភាពឱ្យបានដូចមុន ១០០%។
នៅ ចក្រភពអង់គ្លេស មាននិយោជិតចំនួន ៣,០០០ នាក់ នៅក្នុងក្រុមហ៊ុនចំនួន ៦០ ក៏ចូលរួមសាកល្បងធ្វើការ ៤ ថ្ងៃ/សប្ដាហ៍ ក្នុងរយៈពេល ៦ ខែ ដែលនេះគឺជាការសាកល្បងទ្រង់ទ្រាយធំបំផុតក្នុងពិភពលោក ស្ដីពីបញ្ហានេះ។
ជំងឺរាតត្បាតសកល កូវីដ-១៩ បានធ្វើឱ្យមនុស្សជាច្រើន រួមនឹងបណ្ដាក្រុមហ៊ុន ត្រូវពិនិត្យឡើងវិញនូវរូបមន្តធ្វើការ ដោយបង្កើនវិធីសាស្ត្របំពេញការងារប្រកបដោយភាពបត់បែន ជំនួសឱ្យស្ដង់ដានៃការធ្វើការ ៨ ម៉ោង/ថ្ងៃ និង ៥ ថ្ងៃ/សប្ដាហ៍។
ប្រធានអង្គការមិនស្វែងរកប្រាក់ចំណេញ «4 Day Week Global» លោក Joe O’Connor បានថ្លែងថា បច្ចុប្បន្ន ពុំមានវិធីសាស្ត្រណាមួយដែលអាចបង្វិលត្រលប់មកវិញនូវយុគសម័យមិនទាន់កើតមានជំងឺរាតត្បាតសកល កូវីដ-១៩។
«ពីមួយថ្ងៃ ទៅមួយថ្ងៃ មានថ្នាក់គ្រប់គ្រង និងថ្នាក់ប្រតិបត្តិជាច្រើន អនុវត្តរូបមន្តធ្វើការថ្មី ដោយផ្ដោតទៅលើគុណភាព មិនមែនចំនួនម៉ោងធ្វើការឡើយ។ ក្រោយវិបត្តិកូវីដ-១៩ និយោជិតទាំងឡាយក៏មានសង្ឃឹមផ្សេងស្ដីពីការធ្វើឱ្យមានតុល្យភាពរវាងជីវភាពរស់នៅ និងការងារ» លោក O’Connor បញ្ជាក់ដូច្នេះ៕
