មន្ត្រី ២ រូប របស់ សហរដ្ឋអាម៉េរិក និយាយថា រដ្ឋបាលលោកប្រធានាធិបតី ចូ បៃដិន កំពុងត្រៀមបន្ថែមជំនួយជាសព្វាវុធតម្លៃ ៧៥០ លានដុល្លារ ដល់ អ៊ុយក្រែន។
អាជ្ញាធររបស់ប្រធានាធិបតី បៃដិន ត្រូវបានគេជឿថា នឹងប្រកាសអំពីកញ្ចប់ជំនួយតម្លៃ ៧៥០ លានដុល្លារ ដល់ អ៊ុយក្រែន ក្នុងរង្វង់ពី ២៤ ទៅ ៤៨ ម៉ោងខាងមុខ នេះបើតាមការឱ្យដឹងរបស់មន្ត្រីអាម៉េរិក ២ រូប ដែលសុំមិនបញ្ចេញឈ្មោះ។
ពួកគេឱ្យដឹងថា យោងតាមផែនការបឋម កញ្ចប់ជំនួយថ្មីនឹងរួមមាន ឧទ្ធម្ភាគចក្រ Mi-១៧, រថពាសដែក Humvee, យន្តហោះគ្មានមនុស្សបើកការពារឆ្នេរសមុទ្រ រួមនឹងឈុតការពារអាវុធគីមី និងអាវុធជីវសាស្ត្រ ឬនុយក្លេអែរ។
ជំនួយការជាន់ខ្ពស់ម្នាក់របស់ សភាអាម៉េរិក និយាយថា កញ្ចប់ជំនួយថ្មីអាចនឹងរួមបញ្ចូលទាំងប្រព័ន្ធកាំភ្លើងធំលើដីធុនធ្ងន់ផងដែរ។
ក្រុមមន្ត្រីនៅ សេតវិមាន មិនទាន់បញ្ចេញប្រតិកម្មអ្វីទៅនឹងដំណឹងដែលបានលើកឡើងខាងលើនៅឡើយ។
កាលពីសប្ដាហ៍កន្លង សេតវិមាន បានឱ្យដឹងថា បានផ្ដល់ជំនួយផ្នែកសន្តិសុខតម្លៃជាង ១.៧ ពាន់លានដុល្លារ ដល់ អ៊ុយក្រែន រួចហើយ ចាប់តាំងពី រុស្ស៊ី បើកការឈ្លានពាន។ សព្វាវុធដែល អ៊ុយក្រែន បានទទួលពី សហរដ្ឋអាម៉េរិក រួមមាន រ៉ុក្កែតការពារដែនអាកាស Stinger និង រ៉ុក្កែតប្រឆាំងរថក្រោះ Javelin រួមនឹងយុទ្ធភណ្ឌជាច្រើនផ្សេងទៀត។
