(សហរដ្ឋអាម៉េរិក)-យន្តហោះដឹកអ្នកដំណើរ ១២៦ នាក់ ជួបហេតុការណ៍បាក់ស្រុតប្រព័ន្ធកង់ចុះចត បណ្ដាលឱ្យយន្តហោះឆាបឆេះលើផ្លូវរត់ នាំឱ្យមនុស្ស ៣ នាក់រងរបួស។
នៅពេលយន្តហោះរបស់ក្រុមហ៊ុនអាកាសចរណ៍ Red Air ដែលហោះពី សាធារណរដ្ឋដូមីនីក (Dominica) កំពុងចុះចតនៅឯព្រលានយន្តហោះអន្តរជាតិ Miami កាលពីថ្ងៃទី ២១ មិថុនា ក៏ស្រាប់តែបាក់ប្រព័ន្ធកង់ចុះចត បណ្ដាលឱ្យកើតមានអគ្គិភ័យ នេះបើតាមអាជ្ញាធរគ្រប់គ្រងអាកាសចរណ៍អាម៉េរិក (FAA)។
បណ្ដាវីដេអូនៅលើបណ្ដាញសង្គម បានបង្ហាញថា អណ្ដាតភ្លើងដែលឆេះលើយន្តហោះនេះត្រូវបានពន្លត់យ៉ាងឆាប់រហ័ស។
ប្រធានផ្នែកព័ត៌មានរបស់ នាយកដ្ឋានអាកាសចរណ៍ Miami បានឱ្យដឹងថា ហេតុការណ៍នេះបានបណ្ដាលឱ្យមនុស្ស ៣ នាក់ ក្នុងចំណោមអ្នកដំណើរ ១២៦ នាក់លើយន្តហោះនេះ ត្រូវរងរបួស និងត្រូវបានបញ្ជូនទៅកាន់មន្ទីរពេទ្យ។
FAA និងស្ថាប័នសុវត្ថិភាពចរាចរណ៍អាម៉េរិក កំពុងបន្តស្រាវជ្រាវលើករណីគ្រោះថ្នាក់ និងអគ្គិភ័យនេះ។
កាលពីខែតុលា ២០២១ យន្តហោះ McDonnell Douglas MD-87 មួយគ្រឿងក៏បានជួបគ្រោះថ្នាក់ និងឆាបឆេះនៅពេលហោះឡើងពីព្រលានយន្តហោះ Houston Executive ក្នុងតំបន់ Waller រដ្ឋ Texas។ មនុស្សទាំង ២១ នាក់នៅលើយន្តហោះនេះ បានរួចពីការស្លាប់។
