អន្តរជាតិ - La Reine Media

ទិដ្ឋភាពភ្លើងឆេះព្រៃនៅពាសពេញពិភពលោក ដែលថតបានដោយផ្កាយរណប

រូបភាពពីផ្កាយរណបបង្ហាញថា រលកកម្ដៅបានបង្កឱ្យមានករណីភ្លើងឆេះព្រៃនៅពាសពេញពិភពលោក ដែលបាតុភូតនេះអាចនឹងកើតឡើងកាន់តែច្រើនដោយសារតែបម្រែបម្រួលអាកាសធាតុ នេះបើតាមអ្នកវិទ្យាសាស្ត្រ។

ខាងក្រោមនេះគឺជាបណ្ដារូបភាពស្ដីពីភ្លើងព្រៃនៅពាសពេញពិភពលោក ដែលថតដោយផ្កាយរណប ៖

១-រូបភាពផ្កាយរណប Landsat ថតបានកាលពីថ្ងៃទី ២៤ កក្កដា បង្ហាញអំពីភ្លើងព្រៃ Oak Fire កំពុងបំផ្លាញ California សហរដ្ឋអាម៉េរិក ៖

២-ករណីភ្លើងព្រៃ (ក្នុងរង្វង់ពណ៌ក្រហម) កើតមានក្នុងតំបន់ជាច្រើននៅ ព័រទុយហ្គាល និង អេស្ប៉ាញ ដែលថតបានដោយផ្កាយរណប Suomi NPP របស់ ណាសា ៖

៣-រូបថតពីផ្កាយរណបបង្ហាញអំពីផ្សែងកំពុងបាញ់ឡើងពីតំបន់ភ្លើងព្រៃនៅក្នុងខេត្ត Salamanca និង Caceres របស់ ប្រទេសអេស្ប៉ាញ កាលពីថ្ងៃទី ១៤ កក្កដា ៖

៤-តំបន់ Leiria របស់ ព័រទុយហ្គាល ត្រូវបានបំផ្លាញស្ទើរតែទាំងស្រុងដោយភ្លើងព្រៃកាលពីថ្ងៃទី ១៥ កក្កដា ដោយមានស្នាមផេះដ៏ធំជាច្រើនកន្លែងនៅក្នុងរូបភាពនេះ ៖

៥-ផ្សែងបាញ់ឡើងពីភ្លើងឆេះព្រៃនៅ La Teste-de-Buch ក្នុងតំបន់ Gironde ភាគនិរតីនៃ ប្រទេសបារាំង នៅក្នុងរូបថតផ្កាយរណបកាលពីថ្ងៃទី ១៨ កក្កដា ៖

July 28, 2022

អាវអ្នកអវកាស Apollo 11 លក់ដេញថ្លៃបានជិត ៣ លានដុល្លារអាម៉េរិក

អាវមួយដែលត្រូវបានប្រើប្រាស់ដោយអ្នកអវកាស Buzz Aldrin ក្នុងពេលឡើងទៅកាន់ឋានព្រះចន្ទកាលពីឆ្នាំ ១៩៦៩ រកបានប្រាក់ជិត ៣ លានដុល្លារអាម៉េរិក នៅក្នុងព្រឹត្តិការណ៍លក់ដេញថ្លៃកាលពីថ្ងៃទី ២៦ កក្កដា។

នៅក្នុងព្រឹត្តិការណ៍នៅ New York ដែលប្រារព្ធឡើងដោយ Sotherby’s អាវធំក្រៅពណ៌ស ដែលត្រូវបានប្រើប្រាស់ដោយអ្នកអវកាស Buzz Aldrin នៅក្នុងបេសកកម្ម Apollo 11 ត្រូវបានក្រុមហ៊ុនម៉ៅការមួយសុំមិនបញ្ចេញឈ្មោះ ទិញក្នុងតម្លៃ ២,៧៧២,៥០០ ដុល្លារអាម៉េរិក ខ្ពស់ជាងការរំពឹងទុកប្រហែល ១ លានដុល្លារ ដែលនេះធ្វើឱ្យវាក្លាយជាសម្ភារអវកាសដែលមានតម្លៃខ្ពស់បំផុតរបស់ សហរដ្ឋអាម៉េរិក។

លោក Buzz Aldrin បានពាក់ពាវអាវនេះនៅក្នុងបេសកកម្មរយៈពេល ៦ ថ្ងៃរបស់ខ្លួន និងបានដោះវាចេញនៅមុនពេលពាក់អាវពិសេសដែលស៊ូទ្រាំបានជាមួយនឹងសម្ពាធ មុនពេលឈានជើងចុះជាន់ដីរបស់ឋានព្រះចន្ទ ជាមួយនឹងលោក Neil Armstrong។

ក្រោយរយៈពេលជាង ២១ ម៉ោងនៅលើឋានព្រះចន្ទ អវកាសចរទាំងពីររូបនេះបានត្រលប់មកកាន់យាន Apollo និងពាក់អាវធម្មតាខាងលើឡើងវិញ មុននឹងត្រលប់មកកាន់ផែនដី។

ត្រូវបានផលិតពីក្រណាត់ Beta ដែលអាចទប់ទល់នឹងភ្លើង អាវពណ៌សស្រោបជ័រ Teflon នេះ គឺជាអាវអវកាសតែមួយគត់ពីបេសកកម្ម Apollo 11 ដែលអាចទិញបាន ដូច្នេះ អាវនេះគឺពិតជារបស់កម្រ នេះបើតាម Cassandra Hatton ប្រធានផ្នែកវិទ្យាសាស្ត្រ និងវប្បធម៌ប្រជាប្រិយសកលរបស់ Sotheby’s។

ក្រៅពីអាវដែលបាននិយាយខាងលើ ឯកសារស្ដីពីផែនការហោះហើររបស់បេសកកម្ម Apollo 11 និងមេដាយសេរីភាពប្រធានាធិបតី ដែល Aldrin បានទទួលកាលពីឆ្នាំ ១៩៦៩ ក៏រកបានប្រាក់ច្រើនផងដែរ គឺ ៨១៩,០០០ ដុល្លារ សម្រាប់ឯកសារ និង ២៧៧,២០០ ដុល្លារ សម្រាប់មេដាយ នៅក្នុងការលក់ដេញថ្លៃកាលពីថ្ងៃទី ២៦ កក្កដាកន្លងទៅ៕

អាវធំក្រៅរបស់អ្នកអវកាស Buzz Aldrin ក្នុងបេសកកម្ម Apollo 11

July 28, 2022

កូរ៉េខាងជើង ប្រកាសថា បានត្រៀមរួចរាល់សម្រាប់ការពង្រាយកម្លាំងនុយក្លេអែរ

មេដឹកនាំកូរ៉េខាងជើង លោក គីម ជុងអុន បានឱ្យដឹងថា ទីក្រុងព្យុងយ៉ាង បានត្រៀមខ្លួនរួចរាល់ក្នុងការប្រមូល និងពង្រាយកម្លាំងនុយក្លេអែរ ដើម្បីប្រឈមមុខនឹងការផ្ទុះសង្គ្រាមជាមួយ សហរដ្ឋអាម៉េរិក និង កូរ៉េខាងត្បូង។

«ជាថ្មីម្ដងទៀត ខ្ញុំអះអាងថា កូរ៉េខាងជើង តែងតែត្រៀមខ្លួនរួចរាល់សម្រាប់ការពង្រាយកម្លាំងកំញើញដោយអាវុធនុយក្លេអែរ ចំពោះការប្រឈមមុខជាមួយ សហរដ្ឋអាម៉េរិក» ទីភ្នាក់ងារសារព័ត៌មានរដ្ឋកូរ៉េខាងជើង KCNA ថ្ងៃនេះ ដកស្រង់សម្ដីរបស់លោក គីម ជុងអុន ថ្លែងនៅក្នុងព្រឹត្តិការណ៍រម្លឹកខួប ៦៩ ឆ្នាំនៃការបញ្ចប់សង្គ្រាមកូរ៉េ។

លោក គីម ជុងអុន ក៏បានព្រមានដល់ អាជ្ញាធរប្រធានាធិបតីកូរ៉េខាងត្បូង Yoon Suk-yeol ដោយបានឱ្យដឹងថា រាល់ការប្រឹងប្រែងក្នុងការវាយប្រហារលើ កូរ៉េខាងជើង នឹងត្រូវបានឆ្លើយតបដោយ «ការប្រល័យ»។ លោកបន្តថា «អាជ្ញាធរ និង កងទ័ពកូរ៉េខាងត្បូង ពិតជាខុសធ្ងន់ បើសិនពួកគេជឿថា អាចបិទដំណើរការ ឬកម្ទេចមួយផ្នែកនៃកងទ័ពរបស់ កូរ៉េខាងជើង ដោយវិធានការយោធា»។

ការព្រមានរបស់លោក គីម ជុងអុន ត្រូវបានលើកឡើងក្នុងគ្រាដែល ក្រុមមន្ត្រីអាម៉េរិក និង កូរ៉េខាងត្បូង ច្រើនខែមកនេះ យល់ថា កូរ៉េខាងជើង បានត្រៀមខ្លួនរួចរាល់សម្រាប់ការសាកល្បងអាវុធនុយក្លេអែរលើកទី ៧ នៅវាលតេស្តនុយក្លេអែរក្រោមដី Punggye-ri។ នេះនឹងក្លាយជាការសាកល្បងនុយក្លេអែរដំបូងរបស់ ទីក្រុងព្យុងយ៉ាង រាប់ចាប់តាំងពីខែកញ្ញា ២០១៧។

«ពិបាកក្នុងការរកឃើញតួលេខច្បាស់លាស់ ប៉ុន្តែ យើងយល់ថា កូរ៉េខាងជើង ចម្រាញ់សារធាតុ ប្លាតូនីញ៉ូម និងអ៊ុយរ៉ាញ៉ូម (plutonium and uranium) បានប្រហែល ១០% បន្ថែមទៀត» រដ្ឋមន្ត្រីក្រសួងការពារជាតិកូរ៉េខាងត្បូង លោក Lee Jong-sup ថ្លែងនៅក្នុងសភាកាលពីថ្ងៃទី ២៦ កក្កដា បន្ទាប់ពីត្រូវបានសួរថា កូរ៉េខាងជើង ផលិតអាវុធនុយក្លេអែរ បានប៉ុន្មានហើយ រាប់ចាប់ពីក្រោយសន្និសីទកំពូលកូរ៉េខាងត្បូង-កូរ៉េខាងជើង កាលពីខែមេសា ២០១៨។

លោក Lee ជឿថា កូរ៉េខាងជើង អាចសាកល្បងអាវុធនុយក្លេអែរ គ្រប់ពេល អាស្រ័យលើមេដឹកនាំ គីម ជុងអុន។ លោករដ្ឋមន្ត្រីការពារជាតិកូរ៉េខាងត្បូង អធិប្បាយថា កម្មវិធីនុយក្លេអែរ របស់ កូរ៉េខាងជើង គឺជា «ការគំរាមកំហែងដ៏ធ្ងន់ធ្ងរចំពោះ កូរ៉េខាងត្បូង និងសហគមន៍អន្តរជាតិ»៕

July 28, 2022

កូរ៉េខាងត្បូង នឹងបាញ់បង្ហោះយានអវកាសដំបូង ឡើងទៅឋានព្រះចន្ទ

កូរ៉េខាងត្បូង ជិតបានក្លាយជាប្រទេសទី ៧ ក្នុងពិភពលោកដែលបាញ់បង្ហោះយានអវកាសស្រាវជ្រាវឋានព្រះចន្ទដំបូងរបស់ខ្លួន ដែលគ្រោងនឹងគោចរជុំវិញភពរណបនេះយ៉ាងតិច ១ ឆ្នាំ។

Korea Pathfinder Lunar Orbiter (KPLO) ដែលជាយានអវកាសគោចរជុំវិញព្រះចន្ទដំបូងរបស់ កូរ៉េខាងត្បូង គ្រោងនឹងហោះឡើងទៅកាន់ទីអវកាសដោយប្រើប្រាស់រ៉ុក្កែត Falcon 9 របស់ SpaceX ពីមូលដ្ឋានទ័ពអាកាស Cape Canaveral នៅ Florida សហរដ្ឋអាម៉េរិក ក្នុងថ្ងៃទី ២ សីហាខាងមុខ។

កាលពីខែឧសភាឆ្នាំនេះ KPLO ត្រូវបានដាក់ឈ្មោះថា Danuri ដែលជាពាក្យរួមផ្សំពីពាក្យ «ព្រះចន្ទ» និង «រីករាយ» ក្នុងភាសាកូរ៉េ។ បេសកកម្មនេះត្រូវបានចាត់ទុកថាជាជំហានដំបូងក្នុងកម្មវិធីអវកាសឆ្ងាយរបស់ កូរ៉េខាងត្បូង ដែលរួមមាន ការនាំរ៉ូបូតចុះចតលើឋានព្រះចន្ទនៅឆ្នាំ ២០៣០ និងបេសកកម្មនាំយកសំណាកដីព្រះចន្ទមកកាន់ផែនដី។

Danuri មានទម្ងន់ប្រហែល ៤១៨ គីឡូក្រាម, ទទឹង ១.៨២ ម៉ែត្រ, បណ្ដោយ ២.១៤ ម៉ែត្រ និងកម្ពស់ ២.២៩ ម៉ែត្រ។ វិទ្យាស្ថានស្រាវជ្រាវអវកាសចរណ៍កូរ៉េខាងត្បូង (KARI) បានឱ្យដឹងថា Danuri ស្រាលជាងយានអវកាសរបស់ប្រទេសដទៃ។

Danuri នឹងត្រូវបានបំពាក់ឧបករណ៍វិទ្យាសាស្ត្រចំនួន ៦ ក្នុងនោះ ៥ ឧបករណ៍ត្រូវបានអភិវឌ្ឍដោយស្ថាប័នក្នុងស្រុក ខណៈដែលឧបរកណ៍ ១ ទៀតគឺជាការផ្គត់ផ្គង់របស់ ណាសា។ ឧបករណ៍ទាំងនេះរួមមាន ម៉ាស៊ីនថតភូមិសាស្ត្រឋានព្រះចន្ទ (LUTI), កាមេរ៉ា PolCam, ឧបករណ៍វាស់ដែនម៉ាញេទិច KMAG, ឧបករណ៍វាស់កាំរស្មីហ្គាម៉ា KGRS, ឧបករណ៍ DTNPL និង កាមេរ៉ាកម្លាំងខ្លាំង ShadowCam របស់ ណាសា។

តាមគម្រោង Danuri នឹងហោះទៅដល់ឋានព្រះចន្ទប្រហែលពាក់កណ្ដាលខែធ្នូ។ យានអវកាសនេះនឹងគោចរជុំវិញឋានព្រះចន្ទយ៉ាងតិចមួយឆ្នាំ។ ភារកិច្ចរបស់ Danuri គឺការវាស់ដែនម៉ាញេទិកនៃឋានព្រះចន្ទ និងវាយតម្លៃលើប្រភពធនធានដូចជា ទឹកជាដើម និងគូរផែនទីដើម្បីជួយដល់ការជ្រើសរើសទីតាំងចុះចតនៅពេលអនាគត៕

July 27, 2022

ក្រពើខ្នាតយក្សស៊ីសាច់អ្នកនេសាទ ត្រូវប៉ូលិស និងប្រជាពលរដ្ឋចាប់បាន

(ឥណ្ឌូណេស៊ី)-សាកសពរបស់អ្នកនេសាទម្នាក់ឈ្មោះ Samsul Bahri ត្រូវបានរកឃើញនៅក្នុងពោះរបស់សត្វក្រពើមួយក្បាលប្រវែង ៨ មែត្រ នៅក្នុងខេត្ត Kalimantan ខាងជើង កាលពីថ្ងៃទី ២២ កក្កដា។

សត្វក្រពើខ្នាតធំនេះត្រូវក្រុមប៉ូលិស និងប្រជាពលរដ្ឋចាប់បាន ក្រោយពីវាបានស៊ីសាច់អ្នកនេសាទម្នាក់អាយុ ៤៥ ឆ្នាំ នៅ ឥណ្ឌូណេស៊ី។ Samsul Bahri ត្រូវបានក្រពើលបខាំ និងស៊ីជាអាហារកាលពីថ្ងៃទី ១៩ កក្កដា ពេលកំពុងរកបង្គានៅលើទន្លេ Semaja ក្នុងស្រុក Nunukan នៃខេត្ត Kalimantan ខាងជើង នេះបើតាម Daily Star។

សមត្ថកិច្ចក្នុងតំបន់ បានតាមរកសត្វក្រពើខាងលើអស់ ៣ ថ្ងៃមកហើយ បន្ទាប់ពីជនរងគ្រោះបានបាត់ខ្លួន។ ក្រុមប៉ូលិសបានរកឃើញ និងចាប់បានសត្វក្រពើមួយក្បាលប្រវែង ៤.៩ ម៉ែត្រ និងមួយក្បាលទៀតប្រវែង ៤ ម៉ែត្រ។ ប៉ុន្តែ ក្រោយការពិនិត្យ សមត្ថកិច្ចមិនបានឃើញសាកសពជនរងគ្រោះក្នុងពោះក្រពើទាំងនេះឡើយ។

ថ្ងៃទី ២២ កក្កដា ក្រុមបុគ្គលិកស្វែងរកក៏បានដាក់អន្ទាក់ និងចាប់បានក្រពើមួយក្បាលប្រវែងជិត ៨ ម៉ែត្រ ហើយក៏បានបាញ់ថ្នាំសណ្ដំ។ ពួកគេរកឃើញដៃជើង និងឆ្អឹងមនុស្សនៅក្នុងពោះក្រពើនេះ ដូច្នេះ សមត្ថកិច្ចក៏បានសន្និដ្ឋានថា សាកសពនេះគឺជារបស់ Samsul។

ទន្លេ Semaja ក៏ដូចជាប្រជុំកោះ ឥណ្ឌូណេស៊ី ទាំងមូល គឺជាជម្រករបស់សត្វក្រពើចំនួន ១៤ ប្រភេទ។ ក្រពើនៅក្នុងតំបន់ច្រកទន្លេ ភាគច្រើនជាប្រភេទធំៗ និងកាចសាហាវ។ Dede Hariana ប្រធានអង្គភាពសង្គ្រោះ Tarakan ឱ្យដឹងថា ករណីមនុស្សត្រូវក្រពើវាយប្រហារកំពុងតែកើនឡើងនៅក្នុងតំបន់ ភាគច្រើនគឺនៅក្នុងបណ្ដាភូមិជាប់មាត់ទន្លេ។ លោកក៏បានអំពាវនាវឱ្យប្រជាជនបង្កើនការប្រុងប្រយ័ត្ន៕

July 27, 2022

តំណាងរាស្ត្រអាម៉េរិក លើកឡើងដំណាក់កាលសំខាន់បំផុតសម្រាប់ អ៊ុយក្រែន ក្នុងសង្គ្រាមប្រឆាំង រុស្ស៊ី

តំណាងរាស្ត្រនៅ សភាជាន់ទាបអាម៉េរិក លោក Smith បានថ្លែងថា ពី ៣ ទៅ ៦ សប្ដាហ៍ខាងមុខគឺជាពេលវេលាសំខាន់បំផុតចំពោះ អ៊ុយក្រែន មុនពេលរដូវត្រជាក់ចូលមកដល់ និងត្រូវជួយដល់ ទីក្រុងកៀវ កាន់តែច្រើន កាន់តែល្អ។

«នៅពេលនេះ ចូរជួយពួកគេកាន់តែច្រើនកាន់តែល្អ ព្រោះពី ៣ ទៅ ៦ សប្ដាហ៍ខាងមុខពិតជាសំខាន់ខ្លាំងណាស់» តំណាងរាស្ត្រសភាជាន់ទាបអាម៉េរិក Adam Smith ប្រធានគណៈកម្មការយោធារបស់ សភាជាន់ទាបអាម៉េរិក កាលពីថ្ងៃទី ២៥ កក្កដា បានថ្លែងអំពីអ្វីដែលលោកបានដឹងតាមរយៈ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ក្រោយទស្សនកិច្ច រដ្ឋធានីកៀវ នាពេលកន្លង។

«បច្ចុប្បន្នគឺជារដូវក្ដៅ ប៉ុន្តែ បណ្ដាខែក្នុងរដូវរងាកំពុងតែចូលមកយ៉ាងលឿន។ សីតុណ្ហភាពចុះត្រជាក់ជាង និងលក្ខខណ្ឌមិនអំណោយផលល្អនឹងប្រែក្លាយការប្រយុទ្ធទៅជាសង្គ្រាមដែលត្រូវចំណាយច្រើន ផ្ដល់ផលប្រយោជន៍សំខាន់ដល់ រុស្ស៊ី។ ចូរផ្ដល់អាទិភាពជួយពួកគេឱ្យបានច្រើនជាងនេះ មុនពេលកងកម្លាំងរុស្ស៊ី មានប្រៀបជាង» តំណាងរាស្ត្រអាម៉េរិក បញ្ជាក់ដូច្នេះ។

ការផ្ដល់អាវុធឱ្យ អ៊ុយក្រែន នៅតែជាបញ្ហាចម្រូងចម្រាសនៅ សហរដ្ឋអាម៉េរិក។ រដ្ឋាភិបាលលោក បៃដិន បានផ្ដល់ជំនួយ ៨.២ ពាន់លានដុល្លារដល់ អ៊ុយក្រែន រួចហើយ រាប់ចាប់តាំងពី រុស្ស៊ី បើកការឈ្លានពានកាលពីចុងខែកុម្ភៈ។

លោក Adam Smith ប្រធានគណៈកម្មការយោធារបស់ សភាជាន់ទាបអាម៉េរិក

ក៏ប៉ុន្តែ រដ្ឋាភិបាលអាម៉េរិក មិនចង់បញ្ជូនអាវុធរយៈចម្ងាយឆ្ងាយទៅឱ្យ អ៊ុយក្រែន ដោយសារតែការបារម្ភអំពីការកើនឡើងនៃភាពតានតឹង ដែលអាចនាំទៅរកសង្គ្រាមលោកលើកទីបី។

July 27, 2022

វេជ្ជបណ្ឌិតថៃ ជាង ៨០០ នាក់ អំពាវនាវដល់រាជរដ្ឋាភិបាល ផ្អាកការធ្វើឱ្យកញ្ឆាទៅជាទំនិញស្របច្បាប់

វេជ្ជបណ្ឌិតថៃជាង ៨០០ នាក់ បានអំពាវនាវឱ្យ រាជរដ្ឋាភិបាលប្រទេសនេះ ផ្អាកការកំណត់ឱ្យកញ្ឆាក្លាយជាទំនិញស្របច្បាប់ ខណៈដែលកំពុងរង់ចាំវិធានការគ្រប់គ្រងសមស្របដើម្បីការពារក្មេងមិនទាន់គ្រប់អាយុ។

នៅក្នុងអត្ថបទមួយដែលបានបង្ហោះលើបណ្ដាញសង្គមកាលពីថ្ងៃទី ២៥ កក្កដា វេជ្ជបណ្ឌិត Smith Srisont ប្រធានសមាគមវេជ្ជបណ្ឌិតកោលស្យវិច្ច័យថៃ បានឱ្យដឹងថា វេជ្ជបណ្ឌិត សាស្ត្រាចារ្យ និងអតីតនិស្សិតនៃផ្នែកវេជ្ជសាស្ត្ររបស់មន្ទីរពេទ្យ Ramathibodi នៃសាកលវិទ្យាល័យ Mahidol ចំនួន ៨៥១ រូប បានឯកភាពគ្នាលើកញត្តិស្នើសូមឱ្យ រាជរដ្ឋាភិបាល ផ្អាកជាបន្ទាន់នូវការធ្វើឱ្យកញ្ឆាទៅជាទំនិញស្របច្បាប់។

យោងតាមក្រុមវេជ្ជបណ្ឌិត ការធ្វើឱ្យកញ្ឆាស្របច្បាប់នៅក្នុងគ្រាដែលមិនទាន់មានវិធានការ និងគោលនយោបាយគ្រប់គ្រងសមស្រប បាននាំឱ្យយុវវ័យប្រើប្រាស់មិនបានត្រឹមត្រូវ ខណៈដែលភស្ដុតាងផ្នែកវិទ្យាសាស្ត្របានបញ្ជាក់ច្បាស់ថា កញ្ឆាបង្កផលប៉ះពាល់អាក្រក់ដល់រាងកាយ និងប្រព័ន្ធខួរក្បាលរបស់យុវវ័យមិនទាន់គ្រប់អាយុ។

ក្រុមវេជ្ជបណ្ឌិត ជំរុញឱ្យផ្អាកបណ្ដោះអាសន្ននូវការកំណត់ដែល រដ្ឋាភិបាលថៃ បានសម្រេចចិត្តនាពេលកន្លង រហូតដល់មានច្បាប់ការពារក្មេងជំទង់ពីកញ្ឆា ការកំណត់ស្ដីពីការប្រើប្រាស់កញ្ឆាឱ្យត្រឹមត្រូវ ដើម្បីកាត់បន្ថយផលប៉ះពាល់អាក្រក់ដល់សុខភាព៕

July 26, 2022

ផ្ទះបីជាន់សាងសង់ដោយម៉ាស៊ីនបោះពុម្ភ 3D សម្រាប់ក្រុមអវកាសចរ អាចដាក់ចូលក្នុងយាន SpaceX

ក្រុមហ៊ុន SAGA Space Architects សហការជាមួយសិស្សនៅ ប្រទេសស្វ៊ីស ដើម្បីសាងសង់ផ្ទះសម្រាប់អវកាសចរនៅលើឋានព្រះចន្ទ និងពិភពព្រះអង្គារ។

សិស្សនៅវិទ្យាស្ថាន Rosenberg បានចំណាយពេលជាច្រើនឆ្នាំក្នុងការអភិវឌ្ឍផ្ទះស្នាក់នៅសម្រាប់ក្រុមអ្នកអវកាសនាពេលអនាគត ដែលផ្ទះនេះអាចដាក់ចូលក្នុងយានអវកាស Starship របស់ SpaceX។ ផ្ទះគំរូដែលត្រូវបានបង្ហាញកាលពីថ្ងៃទី ២០ កក្កដានេះ គឺជាលទ្ធផលនៃការសហការរវាងសិស្សនៅវិទ្យាស្ថាន Rosenberg និងក្រុមហ៊ុនស្ថាបត្យកម្មរបស់ ដាណឺម៉ាក SAGA Space Architects នេះបើតាមទំព័រ Space។

ផ្ទះកម្ពស់ ៣ ជាន់ របស់ វិទ្យាស្ថាន Rosenberg និង ក្រុមហ៊ុន SAGA Space Architects នេះ មានទំហំធំទូលាយសម្រាប់ក្រុមអ្នកអវកាសធ្វើការ និងកម្សាន្ត។

Bernhatd Gademann អគ្គនាយកនៃវិទ្យាស្ថាន Rosenberg បានឱ្យដឹងថា ពួកគេត្រូវចំណាយពេលអស់ ២ ឆ្នាំ ទើបផលិតបានផ្ទះដែលមានឈ្មោះថា Rosenberg Space Habitat នេះ។ ក្រុមអ្នកអវកាសអាចរុះផ្ទះនេះ ហើយប្រើប្រាស់ polymer ដើម្បីបង្កើតជារចនាសម្ព័ន្ធថ្មី បើសិនជាចាំបាច់។ រ៉ូបូតមួយគ្រឿងដែលមានឈ្មោះថា Spot រួមនឹងគ្រឿងសង្ហារិមពហុមុខងារ នឹងជួយឱ្យក្រុមអ្នកអវកាសអាចប្រើប្រាស់លម្ហក្នុងផ្ទះនេះបានយ៉ាងមានប្រសិទ្ធភាព។

វិទ្យាស្ថាន Rosenberg បានរៀបគម្រោងត្រួតពិនិត្យផ្នែករឹង ផ្នែកទន់ និងប្រព័ន្ធបញ្ជាពីចម្ងាយដែលប្រើប្រាស់សម្រាប់ផ្ទះ Rosenberg Space Habitat។ ក្រុមសិស្សរបស់វិទ្យាស្ថាននេះនឹងចូលរួមអនុវត្តគម្រោងជាច្រើនផ្សេងទៀត ដើម្បីបង្ហាញអំពីរបៀបដែលព័ន្ធដ៏ស្មុគស្មាញនេះធ្វើអន្តរកម្មនឹងគ្នា និងធ្វើការជាមួយបញ្ញាសិប្បនិម្មិត៕

July 26, 2022

ចិន អនុម័តឱ្យប្រើប្រាស់ឱសថគ្រាប់ដែលផលិតក្នុងស្រុក សម្រាប់ការព្យាបាលជំងឺកូវីដ-១៩

ថ្នាំប្រភេទគ្រាប់ដែលផលិតក្នុងស្រុក និងទើបតែត្រូវបានអនុម័តឱ្យប្រើប្រាស់សម្រាប់ព្យាបាលជំងឺកូវីដ-១៩ នាពេលថ្មីៗនេះ ត្រូវបានអនុញ្ញាតឱ្យប្រើសម្រាប់ព្យាបាលអ្នកឆ្លងវីរុស HIV-1 កាលពីខែកក្កដា ២០២១។

កាលពីថ្ងៃទី ២៥ កក្កដា អាជ្ញាធរចិន បានយល់ព្រមឱ្យធ្វើចរាចរណ៍ដោយមានលក្ខខណ្ឌចំពោះឱសថប្រភេទគ្រាប់សម្រាប់លេបដែលផលិតក្នុងស្រុក នៅក្នុងការព្យាបាលជំងឺកូវីដ-១៩ ចំពោះអ្នកជំងឺពេញវ័យ។

ប្រកាសរបស់អាជ្ញាធរជាតិគ្រប់គ្រងឱសថចិន បានឱ្យដឹងថា ថ្នាំប្រភេទនេះមានឈ្មោះថា Azvudine ផលិតដោយក្រុមហ៊ុនឱសថ Genuine Biotech។ កាលពីឆ្នាំ ២០២១ ថ្នាំ Azvudine ត្រូវបានអនុម័តឱ្យប្រើប្រាស់សម្រាប់ព្យាបាលអ្នកជំងឺអេដស៍ ប៉ុន្តែ ពេលនេះវេជ្ជបណ្ឌិតអាចប្រើប្រាស់វាដើម្បីព្យាបាលជំងឺកូវីដ-១៩។

រាប់ចាប់តាំងពីខែមេសា ២០២០ ថ្នាំ Azvudine ត្រូវបានពិសោធដល់ដំណាក់កាលពីបី នៅក្នុងការព្យាបាលជំងឺកូវីដ-១៩ ហើយទទួលបានលទ្ធផលល្អ ចំពោះអ្នកជំងឺដែលមានសភាពធ្ងន់ធ្ងរ និងកំពុងប្រឈមនឹងការស្លាប់។ ទន្ទឹមនឹងនេះ Azvudine ក្នុងបរិមាណដ៏តិចក៏អាចព្យាបាលបានយ៉ាងមានប្រសិទ្ធភាព ដោយកាត់បន្ថយចំនួនវីរុសបានយ៉ាងលឿន នៅចំពោះមុខជំងឺកូវីដ-១៩ បង្កឡើងដោយវីរុស SARS-CoV-2 ប្រភេទ Alpha, Beta, Delta និង Omicron។

July 26, 2022

មនុស្សរាប់ពាន់នាក់ត្រូវរត់ចោលផ្ទះដោយសារភ្លើងព្រៃនៅ សហរដ្ឋអាម៉េរិក

ភ្លើងព្រៃនៅ California សហរដ្ឋអាម៉រិក បន្តឆេះរាលដាល ដុតបំផ្លាញព្រៃឈើរាប់ពាន់ហិកតា បង្ខំឱ្យមនុស្សជាង ៦,០០០ នាក់ត្រូវរត់ចោលផ្ទះសំបែង។

ភ្លើងឆេះព្រៃដែលត្រូវបានគេហៅថា Oak Fire បានឆាបឆេះនៅខាងក្រៅឧទ្យានជាតិ Yosemite ក្នុងស្រុក Mariposa ភាគកណ្ដាលនៃរដ្ឋ California តាំងពីថ្ងៃទី ២២ កក្កដា រហូតដល់បច្ចុប្បន្ន ដោយមិនទាន់ត្រូវបានគ្រប់គ្រងនៅឡើយ។

បុគ្គលិកពន្លត់អគ្គិភ័យជាង ២,០០០ នាក់ និងឧទ្ធម្ភាគចក្រ ១៧ គ្រឿង កំពុងចូលរួមបេសកកម្មពន្លត់ភ្លើងព្រៃ Oak Fire នេះបើតាមនាយកដ្ឋានព្រៃឈើ និងបង្ការ ពន្លត់ភ្លើងព្រៃរបស់ រដ្ឋកាលីហ្វ័រញ៉ា (CAL FIRE)។ ភ្លើងព្រៃបានដុតបំផ្លាញឈើ និងគ្រប់យ៉ាង ជាង ៦,៣០០ ហិកតា។ អាកាសធាតុក្ដៅខ្លាំង រួមនឹងកម្រិតសំណើមទាប បានបណ្ដាលឱ្យបេសកកម្មពន្លត់ភ្លើងព្រៃត្រូវជួបការលំបាកខ្លាំង។

ភ្លើងព្រៃ Oak Fire បានបំផ្លាញផ្ទះយ៉ាងតិច ១០ ខ្នង បង្កការខូចខាតដល់ផ្ទះ ៥ ខ្នងផ្សេងទៀត និងកំពុងគំរាមកំហែងដល់ផ្ទះរាប់ពាន់ខ្នងនៅក្បែរនោះ។ មនុស្សជាង ៦,០០០ នាក់ត្រូវបានជម្លៀស នេះបើតាម Hector Vasquez មន្ត្រីជាន់ខ្ពស់របស់ CAL FIRE។

អភិបាលរដ្ឋ California កាលពីថ្ងៃទី ២៣ កក្កដា បានប្រកាសអាសន្នចំពោះស្រុក Mariposa ព្រោះតែ «ស្ថានការណ៍គ្រោះថ្នាក់ជាទីបំផុតសម្រាប់ទ្រព្យសម្បត្តិ និងអាយុជីវិតមនុស្ស»៕

July 25, 2022

Category: អន្តរជាតិ