អន្តរជាតិ - La Reine Media

រាជទាយាទអង់គ្លេស «ទទួលយកប្រាក់បរិច្ចាគពីគ្រួសារអតីតមេភេរវករ bin Laden»

សារព័ត៌មានអង់គ្លេស បានចុះផ្សាយថា ព្រះអង្គម្ចាស់ Charles យល់ព្រមទទួលយកខ្ទង់ប្រាក់បរិច្ចាគ ១.១៩ លានដុល្លារអាម៉េរិក ពីគ្រួសាររបស់អតីតមេភេរវករ Osama bin Laden និងដាក់បញ្ចូលទៅក្នុងមូលនិធិមនុស្សធម៌របស់ទ្រង់។

រាជទាយាទ Charles ព្រះជន្ម ៧៣ វស្សា បានទទួលជួប Bakr និង Shafiq bin Laden ដែលជាបងប្អូនឪពុកជាមួយ ម្ដាយទីទៃរបស់អតីតមេភេរវករ Osama bin Laden នៅឯរាជវាំង Clarence House កាលពីឆ្នាំ ២០១៣ ២ ឆ្នាំបន្ទាប់ពីមេភេរវករនេះត្រូវបានសម្លាប់។ ព្រះអង្គបានសព្វព្រះហរទ័យទទួលយកប្រាក់បរិច្ចាគ ១ លានផោន (១.១៩ លានដុល្លារអាម៉េរិក) ដាក់បញ្ចូលទៅក្នុងមូលនិធី PWCF។ នេះបើតាមទីភ្នាក់ងារសារព័ត៌មាន Times របស់ ចក្រភពអង់គ្លេស ចុះផ្សាយកាលពីថ្ងៃទី ៣១ កក្កដា។

Times បានឱ្យដឹងថា ព្រះអង្គម្ចាស់ Charles បាន «ចាត់ចែងខ្ទង់ប្រាក់បរិច្ចាគនេះដោយផ្ទាល់ព្រះហស្ត បើទោះជាមានការជំទាស់ពីទីប្រឹក្សាមួយចំនួន។ ទីប្រឹក្សាមួយរូបបានសូមឱ្យព្រះអង្គសងប្រាក់នោះត្រលប់ទៅវិញ ប៉ុន្តែ ទ្រង់មិនយល់ស្រប។ បុគ្គលិករបស់រាជទាយាទអង់គ្លេស មានការបារម្ភថា ដំណឹងនេះនឹងនាំឱ្យមានការមិនពេញចិត្ត បើសិនជាបានបែកធ្លាយ។

អតីតមេភេរវករ Osama bin Laden (ឆ្វេង) និង ព្រះអង្គម្ចាស់ Charles

បន្ទាប់ពីព័ត៌មានត្រូវបានចុះផ្សាយ lan Cheshire ដែលជាប្រធាន PWCF បានឱ្យដឹងថា ខ្ទង់ប្រាក់បរិច្ចាគនោះត្រូវបានសមាជិក ៥ រូបនៃក្រុមប្រឹក្សាភិបាល របស់ PWCF ជំនាន់នោះ យល់ព្រមទទួលយក។ រាជទាយាទអង់គ្លេស គឺជាស្ថាបនិក ប៉ុន្តែ ទ្រង់មិនស្ថិតនៅក្នុងក្រុមប្រឹក្សាភិបាលរបស់ PWCF។

រាជវាំង Clarence House ក្រោយមកក៏បានប្រកាសថា ការសម្រេចចិត្តទទួលយកខ្ទង់ប្រាក់បរិច្ចាគនោះ គឺត្រូវបានធ្វើឡើងដោយសមាជិកទាំងឡាយនៃក្រុមប្រឹក្សាភិបាល។

លោក Osama bin Laden គឺជាស្ថាបនិកនៃក្រុមភេរវករអ៊ីស្លាម al-Qaeda ដែលបានបើកការវាយប្រហារភេរវកម្មទៅលើ ទឹកដីសហរដ្ឋអាម៉េរិក កាលពីថ្ងៃទី ១១ កញ្ញា ២០០១ បណ្ដាលឱ្យមនុស្សជិត ៣,០០០ នាក់បាត់បង់ជីវិត។ មេភេរវករនេះត្រូវបានកម្លាំងពិសេសរបស់ សហរដ្ឋអាម៉េរិក កម្ចាត់ចោលកាលពីខែឧសភា ២០១១ នៅក្នុងបេសកកម្មឆ្មក់ចូលកន្លែងលាក់ខ្លួន នៅក្នុងតំបន់ Abbottabad នៃ ប្រទេសប៉ាគីស្ថាន៕

August 1, 2022

ករណីឃាតកម្មលើលោក អាបេ (Abe) ៖ ជនសង្ស័យបង្ហើបអំពីគោលបំណងលើ Twitter តាំងពីឆ្នាំ ២០១៩

ជនសង្ស័យ Tetsuya Yamagami ធ្លាប់បានបង្ហោះសារមួយនៅលើបណ្ដាញសង្គម Twitter និយាយអំពីគោលបំណងធ្វើឃាត អតីតនាយករដ្ឋមន្ត្រីជប៉ុន លោក អាបេ ក្នុងពេលលោកកំពុងកាន់អំណាច។

Twitter កាលពីថ្ងៃទី ១៩ កក្កដា បានបង្កកគណនីរបស់ Yamagami ដែលបង្កើតឡើងតាំងពីខែតុលា ២០១៩ និងត្រូវបានដាក់ឈ្មោះថា «silent hill 333»។ ប៉ុន្តែ Twitter បានឱ្យដឹងថា Yamagami បានបង្កើតគណនីមួយផ្សេងទៀត នៅមុនអំឡុងខែតុលា ២០១៩។ គណនីនេះត្រូវបានបិទ ដោយសារតែបានរំលោភលើគោលការណ៍ «ហាមឃាត់ខ្លឹមសារដែលមានលក្ខណៈគំរាមកំហែងដោយហិង្សាចំពោះគោលដៅជាក់លាក់មួយ ក្នុងបំណងសម្លាប់មនុស្ស»។

Twitter បានឱ្យដឹងថា បណ្ដាញសង្គមនេះមិនអាចបញ្ចេញខ្លឹមសាររបស់អត្ថបទដែលអ្នកប្រើប្រាស់បានបង្ហោះ ក៏ប៉ុន្តែ បើយោងតាមប្រភពព័ត៌មានមួយចំនួន ខ្លឹមសារនោះបង្ហាញថា Yamagami មានបំណងធ្វើឃាត អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ យ៉ាងហោចក៏តាំងពី ៣ ឆ្នាំ មុន ជាពេលដែលលោកកំពុងកាន់អំណាច។

អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ ( Shinzo Abe ) ត្រូវបានបុរសជាជនសង្ស័យម្នាក់បាញ់ប្រហារដោយប្រើប្រាស់កាំភ្លើងកែច្នៃកាលពីព្រឹកថ្ងៃទី ៨ កក្កដានេះ នៅពេលលោកកំពុងថ្លែងសុន្ទរកសំឡេងឆ្នោតជូនសមាជិកបក្សប្រជាធិបតេយ្យសេរី (LDP) នៅចំពោះមុខប្រជាពលរដ្ឋជាច្រើនសិបនាក់។

យោងតាមប្រភពព័ត៌មានពី តួក្យូ នៅថ្ងៃទី ៨ កក្កដា ២០២២ Tetsuya Yamagami ដែលជាជនសង្ស័យក្នុងករណីឃាតកម្មលើ អតីតនាយករដ្ឋមន្ត្រីជប៉ុន នៅទីក្រុង Nara ភាគខាងលិចប្រទេសជប៉ុន បានសារភាពថា ខ្លួនជាមេគំនិត។

ទូរទស្សន៍ NHK ដកស្រង់ប្រភពព័ត៌មានពីប៉ូលិស បានឱ្យដឹងថា ជនសង្ស័យបានសារភាពថា ខ្លួនមិនពេញចិត្តនឹង អតីតនាយករដ្ឋមន្ត្រី Abe និងមានបំណងធ្វើឃាតអ្នកនយោបាយនេះ។ សមត្ថកិច្ចប្រមូលបានកាំភ្លើងមួយដើមនៅកន្លែងកើតហេតុ ដែលហាក់ជាកាំភ្លើងកែច្នៃដោយខ្លួនឯង។

NHK ឱ្យដឹងថា ជនសង្ស័យធ្លាប់បម្រើការនៅក្នុងជួរកងទ័ពជប៉ុន ក្នុងរយៈពេល ៣ ឆ្នាំ ហើយបច្ចុប្បន្នរស់នៅក្នុងទីក្រុង Nara៕

August 1, 2022

សេដ្ឋីអ៊ុយក្រែន និងភរិយា បាត់បង់ជីវិត នៅពេល រុស្ស៊ី បាញ់ប្លោងតាមផ្លូវអាកាស

ការបាញ់គ្រាប់ផ្លោងវាយប្រហាររបស់ រុស្ស៊ី ទៅលើទីក្រុង Mykolaiv ត្រូវបានគេជឿថា បានបណ្ដាលឱ្យស្វាមី-ភរិយាមួយគូដែលជាម្ចាស់ក្រុមហ៊ុននាំចេញធញ្ញជាតិធំជាងគេនៅ អ៊ុយក្រែន បាត់បង់ជីវិត។

សំឡេងប្រកាសអាសន្នថាមានការបាញ់ប្លោងដំបូងបានបន្លឺឡើងនៅទីក្រុងកំពង់ផែ Mykolaiv ភាគខាងត្បូងនៃ ប្រទេសអ៊ុយក្រែន កាលពីម៉ោង ១ និង ១ នាទី ព្រឹកថ្ងៃទី ៣១ កក្កដា និងអូសបន្លាយរយៈពេល ៤ ម៉ោងពេញ នេះបើតាមន្ត្រីមូលដ្ឋាន។

មកដល់វេលាទៀបភ្លឺ សណ្ឋាគារមួយកន្លែង តំបន់កីឡដ្ឋានមួយកន្លែង សាលារៀនពីរកន្លែង មជ្ឈមណ្ឌលផ្ដល់សេវាកម្មមួយកន្លែង និងផ្ទះជាច្រើនខ្នងត្រូវបានបំផ្លាញដោយគ្រាប់ប្លោងរបស់ រុស្ស៊ី។ កំពូលអ្នកមានម្នាក់របស់ អ៊ុយក្រែន គឺលោក Oleksiy Vadatursky និងភរិយារបស់គាត់ ស្ថិតក្នុងចំណោមជនរងគ្រោះដែលបានបាត់បង់ជីវិត នៅក្នុងអ្វីដែល ប្រធានាធិបតីអ៊ុយក្រែន បានហៅថា ជា «ការវាយប្រហារដ៏ខ្លាំងក្លាបំផុតមួយ» រាប់ចាប់ពីពេលសង្គ្រាមបានផ្ទុះឡើង។

Nibulon ដែលជាក្រុមហ៊ុនរបស់លោក Vadatursky បានបញ្ជាក់ថា មហាសេដ្ឋីរូបនេះ និងភរិយារបស់គាត់ បានបាត់បង់ជីវិតនៅក្នុងគេហដ្ឋានរបស់ពួកគាត់។

លោក Vadatursky មានទ្រព្យ ៤៥០ លានដុល្លារអាម៉េរិក នេះបើតាមការគណនាកាលពីឆ្នាំ ២០២០ របស់ Forbes។ ក្រុមហ៊ុន Nibulon របស់សេដ្ឋីរូបនេះគឺជាអ្នកផលិត និងនាំចេញធញ្ញជាតិ ដូចជា ស្រូវសាលី និងពោតជាដើម និងមានក្រុមកប៉ាល់ដឹកជញ្ជូន ព្រមទាំងមានរោងចក្រផលិតកប៉ាល់ផងដែរ។

ប្រធានាធិបតី ហ្សេឡែនស្គី បានអធិប្បាយអំពីការស្លាប់របស់លោក Vadatursky ថា ជាការ «បាត់បង់ដ៏ធំចំពោះ ប្រទេសជាតិអ៊ុយក្រែន ទាំងមូល»។

ភាគីខាង រុស្ស៊ី មិនទាន់មានប្រតិកម្មអ្វីទៅនឹងការស្លាប់របស់ សេដ្ឋីអ៊ុយក្រែន និងការចោទប្រកាន់របស់ ប្រធានាធិបតី ហ្សេឡែនស្គី ខាងលើនេះនៅឡើយ៕

August 1, 2022

បុគ្គលិកពន្លត់អគ្គិភ័យបារាំង ដុតព្រៃច្រើនករណីដើម្បីឱ្យសង្គមទទួលស្គាល់

បុគ្គលិកពន្លត់អគ្គិភ័យម្នាក់នៅភាគខាងត្បូងនៃ ប្រទេសបារាំង បានបង្កឱ្យមានករណីភ្លើងឆេះព្រៃជាច្រើនកន្លែង ក្នុងបំណងស្វែងរកភាពរំជើបរំជួល និង «ត្រូវបានសង្គមទទួលស្គាល់»។

បុរសវ័យជាង ៣០ ឆ្នាំ ដែលមិនទាន់ត្រូវបានប្រកាសអំពីអត្តសញ្ញាណ និងជាបុគ្គលិកពន្លត់អគ្គិភ័យស្ម័គ្រចិត្តនៅតំបន់ Herault ត្រូវបានចាប់ខ្លួនកាលពីថ្ងៃទី ២៧ កក្កដា និងកំពុងរង់ចាំពេលឡើងតុលាការ។ រដ្ឋអាជ្ញា នៅទីក្រុង Montpellier លោក Fabrice Belargent បានឱ្យដឹងដា បុរសនេះបានសារភាពថា បានប្រើប្រាស់ដែកកេះដុតព្រៃកាលពីថ្ងៃទី ២៦ ឧសភា, ២១ កក្កដា និងថ្មីៗនេះគឺនៅយប់ថ្ងៃទី ២៦-២៧ កក្កដា។

«នៅពេលត្រូវបានសួរអំពីមូលហេតុ ជននេះសារភាពថា ធ្វើឡើងក្នុងបំណងធ្វើឱ្យក្រុមហ៊ុនពន្លត់អគ្គិភ័យចេញធ្វើអន្តរាគមន៍ ដើម្បីសង្គ្រោះខ្លួនគេពីបរិស្ថានគ្រួសារដ៏ស្មុគស្មាញ និងដើម្បីភាពរំជើបរំជួលដែលការអន្តរាគមន៍នេះនាំមកឱ្យខ្លួន» លោក Belargent ឱ្យដឹងដូច្នេះ។

បុរសខាងលើនេះ ធ្វើការពេញម៉ោងក្នុងតួនាទីជាមន្ត្រីអនុរក្សព្រៃឈើ ទទួលខុសត្រូវចម្បងក្នុងការទប់ស្កាត់ និងពន្លត់អគ្គិភ័យ។

មេធាវីរបស់ជនសង្ស័យនេះបានឱ្យដឹងថា ពេលត្រូវបានសួរនាំ កូនក្ដីរបស់គាត់ «បានបង្ហាញអំពីវិប្បដិសារី និងមានការខ្មាស់អៀនខ្លាំងណាស់។ គាត់មានអារម្មណ៍ធូរស្រាលក្នុងចិត្តព្រោះតែត្រូវចាប់ខ្លួន ហើយបាននិយាយថា នោះ (អំពើដុតព្រៃ) គឺជាអាការរោគញៀន»។

សារព័ត៌មាននានារបស់ បារាំង បានហៅករណីនេះថា «បុគ្គលិកពន្លត់អគ្គិភ័យ ឆ្កួតនឹងការបង្កអគ្គិភ័យ»។ បើសិនជាត្រូវបានកាត់ទោស បុរសនេះត្រូវប្រឈមនឹងការជាប់ពន្ធនាគារ ១៥ ឆ្នាំ និងត្រូវបង់ប្រាក់ពិន័យជាង ១៥០,០០០ ដុល្លារអាម៉េរិក៕

July 30, 2022

នាយករដ្ឋមន្ត្រីអេស្ប៉ាញ អំពាវនាវឱ្យបោះបង់ក្រវាត់ក ដើម្បីចូលរួមសំច័យថាមពលអគ្គិសនី

នាយករដ្ឋមន្ត្រី Sanchez បានបង្ហើបឱ្យដឹងថា លោកផ្អាកការប្រើប្រាស់ក្រវាត់ក ដើម្បីសំច័យថាមពលអគ្គិសនី និងអំពាវនាវដល់ក្រុមរដ្ឋមន្ត្រី បុគ្គលិកការិយាល័យ ឱ្យយកតម្រាប់តាម។

នាយករដ្ឋមន្ត្រីអេស្ប៉ាញ លោក Pedro Sanchez កាលពីថ្ងៃទី ២៩ កក្កដា បានបង្ហាញវត្តមាននៅក្នុងសន្និសីទសារព័ត៌មានស្ដីពីគម្រោងសន្សំសំច័យថាមពលរបស់រាជរដ្ឋាភិបាល។ លោក Sanchez ពាក់អាវក្នុងពណ៌ស មិនបិទឡេវកអាវ និងពាក់អាវធំក្រៅ។

«ខ្ញុំចង់ឱ្យគ្រប់គ្នាចាប់អារម្មណ៍ថា ខ្ញុំមិនពាក់ក្រវាត់ក។ ប្រការនេះមានន័យថា យើងទាំងអស់គ្នាសុទ្ធតែអាចសន្សំសំច័យថាមពល» លោក Sanchez ថ្លែងដូច្នេះ។ «ខ្ញុំបានស្នើឱ្យរដ្ឋមន្ត្រី មន្ត្រីរាជការ ហើយខ្ញុំចង់ឱ្យបុគ្គលិកការិយាល័យឯកជន ចូលរួមអនុវត្ត មិនពាក់ក្រវាត់ក បើសិនមិនចាំបាច់»។

ការអំពាវនាវរបស់ នាយករដ្ឋមន្ត្រីអេស្ប៉ាញ ត្រូវបានធ្វើឡើងបន្ទាប់ពី រដ្ឋមន្ត្រីក្រសួងបរិស្ថានអេស្ប៉ាញ បានអំពាវនាវឱ្យបើកម៉ាស៊ីនត្រជាក់ត្រឹម ២៧ អង្សាសេ ខ្ពស់ជាងឆ្ងាយ ធៀបនឹងគ្រប់គ្នាតែងតែប្រើប្រាស់។ ក្រសួងបរិស្ថានអេស្ប៉ាញ បានឱ្យដឹងថា «បើសិនប្រើប្រាស់រួមផ្សំជាមួយនឹងកង្ហារ អ្នកនឹងកាត់បន្ថយអគ្គិសនីបានពាក់កណ្ដាល»។

នាយករដ្ឋមន្ត្រី Sanchez បញ្ជាក់ថា រាជធានីម៉ាឌ្រីដ នឹងប្រកាសវិធានការបន្ទាន់នៅដើមសប្ដាហ៍ក្រោយ ដើម្បីកែលម្អប្រសិទ្ធភាពនៃការប្រើប្រាស់ និងសន្សំសំច័យថាមពល ក្នុងគ្រាដែលប្រទេសនេះ និង សហភាពអឺរ៉ុប ក៏ដូចជាពិភពលោក កំពុងប្រឈមនឹងបញ្ហាឡើងថ្លៃ និងកង្វះឧស្ម័ន និងឧន្ធនៈសម្រាប់ការប្រើប្រាស់ប្រចាំថ្ងៃ៕

July 30, 2022

សភាជាន់ទាបអាម៉េរិក អនុម័តសេចក្ដីព្រាងច្បាប់ «ហាមឃាត់កាំភ្លើងវែង»

សភាជាន់ទាបអាម៉េរិក បោះឆ្នោតអនុម័តសេចក្ដីព្រាងច្បាប់ហាមឃាត់កាំភ្លើងវែង (rifles) គ្រាដែលប្រទេសនេះកំពុងតែប្រឈមនឹងអំពើបាញ់ប្រហារដោយខ្មាន់កាំភ្លើង។

កាលពីថ្ងៃទី ២៩ កក្កដា សភាជាន់ទាបអាម៉េរិក បានបោះឆ្នោតអនុម័តសេចក្ដីព្រាងច្បាប់ហាមឃាត់កាំភ្លើងវែងវាយប្រហារ ដោយមានសន្លឹកឆ្នោតគាំទ្រចំនួន ២១៧ សំឡេង និងប្រឆាំង ២១៤ សំឡេង។ សេចក្ដីព្រាងច្បាប់នេះត្រូវបានបញ្ជូនឡើងទៅកាន់ សភាជាន់ខ្ពស់អាម៉េរិក ដើម្បីអនុម័តបន្ត។

ការកែទម្រង់ក្នុងការគ្រប់គ្រងកាំភ្លើងនៅតែមានភាពចម្រូងចម្រាសនៅ សហរដ្ឋអាម៉េរិក បើទោះជាធ្លាប់មានករណីបាញ់ប្រហារជាបន្តបន្ទាប់។ ក្នុងការបោះឆ្នោតអនុម័តនៅសភាជាន់ទាបកាលពីម្សិលមិញ មានតំណាងរាស្ត្រមកពីបក្សសាធារណរដ្ឋ តែ ២ រូបប៉ុណ្ណោះ ដែលបានបោះឆ្នោតគាំទ្រ។

កាំភ្លើងវែង Springfield Saint Victor AR-15 មួយដើម ដែលដាក់តាំងបង្ហាញនៅក្នុងសាលនៃកិច្ចប្រជុំប្រចាំឆ្នាំរបស់ សមាគមជាតិកាំភ្លើងវែងអាម៉េរិក កាលពីខែឧសភា ២០២២

នៅ សភាជាន់ខ្ពស់អាម៉េរិក បក្សប្រជាធិបតេយ្យកាន់កាប់តែ ៥០ កៅអីប៉ុណ្ណោះ ហើយត្រូវការសន្លឹកឆ្នោតគាំទ្រពីបក្សសាធារណរដ្ឋ ចំនួន ១០ សំឡេងទៀត ដើម្បីអាចយកសេចក្ដីព្រាងច្បាប់នេះ ឡើងទៅពិនិត្យ។

សភាអាម៉េរិក កាលពីឆ្នាំ ១៩៩៤ បានអនុម័តច្បាប់ហាមឃាត់រយៈពេល ១០ ឆ្នាំ ចំពោះកាំភ្លើងវែងវាយប្រហារ និងបង់ដាក់គ្រាប់ប្រភេទធំ។ ក៏ប៉ុន្តែ បទបញ្ជានេះត្រូវអស់សុពលភាពកាលពីឆ្នាំ ២០០៤ នាំឱ្យការលក់អាវុធប្រភេទនេះកើនឡើងយ៉ាងគំហុកចាប់ពីពេលនោះមក។

July 30, 2022

គ្រោះទឹកជំនន់ «ពាន់ឆ្នាំមានម្ដង» កើតឡើងនៅ សហរដ្ឋអាម៉េរិក

រដ្ឋ Kentucky ទទួលរងផលប៉ះពាល់យ៉ាងធ្ងន់ធ្ងរពីជំនន់ទឹកភ្លៀងដែលត្រូវបានគេវាយតម្លៃថា «ពាន់ឆ្នាំមានម្ដង» បណ្ដាលឱ្យមានមនុស្សស្លាប់យ៉ាងតិច ១៩ នាក់ និងរាប់សិបនាក់បាត់ខ្លួន។

ជំនន់ទឹកភ្លៀងកើតឡើងនៅ Kentucky ភាគកណ្ដាលនៃ សហរដ្ឋអាម៉េរិក កាលពីថ្ងៃទី ២៨ កក្កដា បានពន្លិចតំបន់ប្រជុំជននៅជើងភ្នំ Appalachia បណ្ដាលឱ្យមនុស្សជាច្រើននាក់ត្រូវជាប់គាំង និងបាត់ខ្លួន។ អភិបាលរដ្ឋ Kentucky លោក Andy Beshear កាលពីថ្ងៃទី ២៩ កក្កដា បានប្រកាសថា មានមនុស្សយ៉ាងហោច ១៦ នាក់ ក្នុងនោះមានកុមារផងដែរ បានបាត់បង់ជីវិតនៅក្នុងគ្រោះទឹកជំនន់ ហើយថា ករណីស្លាប់អាចនឹងមានបន្តទៀត។

ក្រុមសមត្ថកិច្ច កាលពីម្សិលមិញ បានរកឃើញករណីស្លាប់ចំនួន ៣ នាក់បន្ថែមទៀត ធ្វើឱ្យតួលេខអ្នកស្លាប់ដោយសារទឹកជំនន់នៅក្នុងរដ្ឋ Kentucky កើតឡើងដល់ ១៩ នាក់។

លោក Beshear ថ្លែងថា នេះគឺជា «គ្រោះទឹកជំនន់មួយដ៏អាក្រក់ និងមហន្តរាយបំផុតក្នុងប្រវត្តិសាស្ត្ររបស់រដ្ឋ Kentucky» ដោយមានមនុស្សស្លាប់អាចឡើងរាប់សិបនាក់។ លោកបន្តថា ក្រុមជួយសង្គ្រោះកំពុងតែញាប់ដៃញាប់ជើងក្នុងការរំដោះប្រជាពលរដ្ឋដែលកំពុងជាប់នៅលើដំបូលផ្ទះ។ មនុស្សប្រហែលពី ២០ ទៅ ៣០ នាក់ ត្រូវបាននាំទៅកាន់ទីសុវត្ថិភាព។

July 30, 2022

ប៉ូឡូញ ទិញរថក្រោះរបស់ កូរ៉េខាងត្បូង ជិត ១,០០០ គ្រឿង ក្រោយការជួយ អ៊ុយក្រែន មួយភាគធំ

អាជ្ញាធរប៉ូឡូញ បានបញ្ជាក់អំពីគម្រោងទិញរថក្រោះ K2 របស់ កូរ៉េខាងត្បូង ចំនួន ៩៨០ គ្រឿង រួមនឹងយន្តហោះចម្បាំង FA-50 ជិត ៥០ គ្រឿង និងកាំភ្លើងធំចល័ត ៤៨ ដើម។

ប្រកាសនៅលើគេហទំព័ររបស់ ក្រសួងការពារជាតិប៉ូឡូញ បានឱ្យដឹងថា នេះនឹងក្លាយជាការទិញអាវុធសំខាន់បំផុត និងទ្រង់ទ្រាយធំបំផុតរបស់ ប៉ូឡូញ នៅក្នុងប៉ុន្មានឆ្នាំចុងក្រោយនេះ។

កិច្ចព្រមព្រៀងទិញដូរអាវុធខាងលើនឹងត្រូវបានអនុវត្តជាពីរដំណាក់កាល។ ដំណាក់កាលទីមួយ កូរ៉េខាងត្បូង នឹងប្រគល់រថក្រោះ K2 Black Panther ចំនួន ១៨០ គ្រឿង, កាំភ្លើងធំចល័ត K9 Thunder ចំនួន ៤៨ គ្រឿង ដោយចាប់ផ្ដើមពីឆ្នាំនេះ ដើម្បីប៉ះប៉ូវកន្លែងទំនេរ បន្ទាប់ពី ប៉ូឡូញ បានផ្ដល់ជំនួយជាអាវុធតម្លៃយ៉ាងតិច ១.៧ ពាន់លានដុល្លារ ដល់ អ៊ុយក្រែន។

ដំណាក់កាលទីពីរ ទីក្រុងវ៉ាសូវី នឹងបានទទួលរថក្រោះ K2 Black Panther ចំនួន ៨០០ គ្រឿងបន្ថែមទៀត។ ប៉ូឡូញ ក៏មានគម្រោងទិញយន្តហោះចម្បាំងធុនស្រាល FA-50 ចំនួន ៤៨ គ្រឿង ក្នុងនោះ ១២ គ្រឿងដំបូងនឹងត្រូវបានប្រគល់នៅពាក់កណ្ដាលឆ្នាំ ២០២៣។

បច្ចុប្បន្ន មិនទាន់ដឹងថា ការទិញដូរអាវុធនេះមានតម្លៃប៉ុន្មាននៅឡើយ។ ប៉ុន្តែ ក្រុមហ៊ុនម៉ៅការផ្នែកការពារជាតិ Korea Aerospace Industries (KAI) របស់ កូរ៉េខាងត្បូង បានឱ្យដឹងថា យន្តហោះចម្បាំង FA-50 ចំនួន ៤៨ គ្រឿងនេះមានតម្លៃប្រហែល ៣ ពាន់លានដុល្លារអាម៉េរិក។ ចំណែកក្រុមហ៊ុន Forecast International របស់ សហរដ្ឋអាម៉េរិក បានអះអាងថា កិច្ចព្រមព្រៀងនេះអាចមានតម្លៃខ្ពស់ជាងថវិកាការពារជាតិសរុប ១៤.១ ពាន់លានដុល្លារអាម៉េរិក របស់ ប៉ូឡូញ នៅក្នុងឆ្នាំនេះទៅទៀត៕

កាំភ្លើងធំចល័ត ឬហៅថា រថក្រោះ K2 Black Panther

July 29, 2022

ធ្លាក់យន្តហោះនៅ ឥណ្ឌា បណ្ដាលឱ្យមនុស្ស ២ នាក់បាត់បង់ជីវិត

ក្រុមមន្ត្រីឥណ្ឌា កាលពីថ្ងៃទី ២៩ កក្កដា បានឱ្យដឹងថា អ្នកបើកបរយន្តហោះ ២ រូប នៃទ័ពអាកាសរបស់ប្រទេសនេះ បានស្លាប់ នៅពេលយន្តហោះចម្បាំង MiG-21 របស់ពួកគេបានជួបគ្រោះថ្នាក់ក្នុងពេលហោះហើរហ្វឹកហាត់នៅតំបន់ភាគខាងលិចប្រទេស។

យន្តហោះចម្បាំងដែលបានជួបគ្រោះថ្នាក់កាលពីថ្ងៃទី ២៨ កក្កដា (ម៉ោងនៅ កម្ពុជា) បានធ្លាក់លើទីតាំងមួយដែលមានចម្ងាយពីទីក្រុង Jaipur រដ្ឋ Rajasthan ប្រហែល ៥៣០ គីឡូម៉ែត្រ ទៅទិសខាងលិច។

ទ័ពអាកាសឥណ្ឌា IAF បានប្រកាសចូលរួមរំលែកទុក្ខជាមួយគ្រួសារសពអ្នកបើកបរយន្តហោះ និងប្រកាសបើកការស៊ើបអង្កេតរកមូលហេតុនៃគ្រោះថ្នាក់នេះ៕

July 29, 2022

លោក ស៊ីជីនពីង ព្រមានលោក បៃដិន ថា «កុំប្រលែងជាមួយភ្លើង»

ប្រធានាធិបតីចិន បានព្រមានដល់ ប្រធានាធិបតីអាម៉េរិក ថា មិនគួរ «ប្រលែងជាមួយភ្លើង» នៅក្នុងការសន្ទនាតាមទូរស័ព្ទជាង ២ ម៉ោង គ្រាដែលភាពតានតឹងកំពុងកើនឡើងជុំវិញបញ្ហា កោះតៃវ៉ាន់។

«អ្នកដែលប្រលែងជាមួយនឹងភ្លើង នឹងត្រូវរលាក។ ខ្ញុំសង្ឃឹមថា ភាគីអាម៉េរិក ពិតជាយល់ច្បាស់អំពីប្រការនោះ» ទីភ្នាក់ងារសារព័ត៌មាន Xinhua ស្រង់សម្ដី ប្រធានាធិបតីចិន ស៊ី ជីពីង ថ្លែងទៅកាន់ ប្រធានាធិបតីអាម៉េរិក ចូ បៃដិន នៅក្នុងកិច្ចសន្ទនាតាមទូរស័ព្ទ កាលពីថ្ងៃទី ២៨ កក្កដា។

«គោលជំហររបស់រដ្ឋាភិបាល និងប្រជាជនចិន ស្ដីពី តៃវ៉ាន់ គឺជារឿងឯកភាពទាំងស្រុង។ ឆន្ទៈដ៏មោះមុតរបស់ ប្រជាជនចិន ជាង ១.៤ ពាន់លាននាក់ គឺការការពារអធិបតេយ្យ និងបូរណភាពទឹកដីរបស់ ចិន» លោក ស៊ី ជីពីង បន្ថែមដូច្នេះ។

យោងតាម Xinhua មេដឹកនាំទាំងពីរសុទ្ធតែបានអធិប្បាយថា ការសន្ទនាតាមទូរស័ព្ទនេះ «ប្រកបដោយភាពត្រង់ទៅត្រង់មក និងស៊ីជម្រៅ។

សេតវិមានបានឱ្យដឹងថា ការសន្ទនានេះចាប់ផ្ដើមពីម៉ោង ៨ និង ៣៣ នាទី (ម៉ោងនៅ កម្ពុជា) និងបញ្ចប់ក្រោយរយៈពេល ២ ម៉ោង និង ១៧ នាទី។ «ប្រធានាធិបតី បៃដិន សង្កត់ធ្ងន់ថា គោលនយោបាយរបស់ សហរដ្ឋអាម៉េរិក មិនផ្លាស់ប្ដូរ ហើយ អាម៉េរិក ប្រឆាំងយ៉ាងខ្លាំងក្លាចំពោះការប្រឹងប្រែងជាឯកតោភាគីដើម្បីផ្លាស់ប្ដូរស្ថានការណ៍ ឬបំផ្លាញសន្តិភាព ស្ថិរភាពនៅច្រកសមុទ្រតៃវ៉ាន់» ប្រកាសរបស់ សេតវិមាន ស្ដីពីលទ្ធផលនៃកិច្ចសន្ទនា ឱ្យដឹងដូច្នេះ។

នេះគឺជាកិច្ចសន្ទនាលើកទីប្រាំ រវាងមេដឹកនាំរបស់ សហរដ្ឋអាម៉េរិក និង ចិន រាប់ចាប់តាំងពីលោក បៃដិន បានឡើងកាន់អំណាចកាលពីខែមករា ២០២១។

កិច្ចសន្ទនានេះត្រូវបានធ្វើឡើងក្នុងពេលដែលប្រទេសទាំងពីរនេះត្រូវប្រឈមនឹងភាពតានតឹងជុំវិញបញ្ហា កោះតៃវ៉ាន់ និងពាណិជ្ជកម្ម។

ចិន ចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន ដោយរង់ចាំតែការបង្រួបបង្រួមប៉ុណ្ណោះ ហើយថា នឹងប្រើកម្លាំងបាយបើសិនជាចាំបាច់។

សហរដ្ឋអាម៉េរិក មិនបានបង្កើតទំនាក់ទំនងការទូតជាផ្លូវការជាមួយនឹង កោះតៃវ៉ាន់ ប៉ុន្តែ គឺជាភាគីដែលផ្គត់ផ្គង់អាវុធចម្បងសម្រាប់កោះនេះ។

ប្រធានសភាពជាន់ទាបអាម៉េរិក លោកស្រី Nancy Pelosi ត្រូវបានគេជឿថា មានគម្រោងធ្វើទស្សនកិច្ចកោះតៃវ៉ាន់ នៅក្នុងខែសីហា។ ប្រការនេះបានធ្វើឱ្យ អាជ្ញាធរចិនដីគោក មានប្រតិកម្មយ៉ាងម៉ឺងម៉ាត់៕

July 29, 2022

Category: អន្តរជាតិ