វល័ក្ខ - La Reine Media

សិស្ស-និស្សិត កាន់តែមានភាពងាយស្រួលជាមួយវេទិកា ឧត្តមសិក្សា កម្ពុជា-អន្តរជាតិ ឆ្នាំ2017

ដោយសម្លឹងឃើញពីតម្រូវការ និងក្ដីព្រួយបារម្ភរបស់សិស្ស-និស្សិត ដែលត្រូវបន្តការសិក្សានៅថ្នាក់ឧត្តម ទើបក្រុមហ៊ុនផ្សព្វផ្សាយពាណិជ្ជកម្មឈានមុខគេនៅកម្ពុជា Directions Advertising បានរៀបចំវេទិកា ឧត្តមសិក្សា កម្ពុជា-អន្តរជាតិ ឆ្នាំ2017 ដ៏ធំ និងដំបូងគេបំផុតនៅកម្ពុជាដែលមានរយៈពេល3ថ្ងៃ ចាប់ពីថ្ងៃទី29 ខែកញ្ញា រហូតដល់ទី01 ខែតុលា ឆ្នាំ2017 នៅសាលកោះពេជ្រ និងបានបញ្ចប់ទៅយ៉ាងជោគជ័យ ។

នៅក្នុងព្រឹត្តិការណ៍នេះ សិស្ស-និស្សិត និងឪពុក-ម្តាយទាំងអស់ បានជួបជាមួយតំណាងនៃបណ្តាសាកលវិទ្យាល័យជាតិ និងអន្តរជាតិ ដែលផ្តល់នូវជម្រើស និងឱកាសសម្រាប់យុវជនកម្ពុជាអាចស្វែងយល់ពីកម្មវិធីសិក្សា និងចំណុចសំខាន់ៗ ចាំបាច់សម្រាប់ការសម្រេចចិត្តដែលមានឥទ្ធិពលដល់អនាគត់របស់ពួកគេ។

សិស្ស-និស្សិត រួមជាមួយអាណាព្យាបាល ក៏ដូចជាអ្នកតំណាងសាកលវិទ្យាល័យជាតិ-អន្តរជាតិ ព្រមទាំងអ្នកតំណាងក្រុមហ៊ុនធំៗសរុបជា1ម៉ឺននាក់ បានចូលរួមក្នុងព្រឹត្តិការណ៍នេះដើម្បីទទួលយក និងផ្ដល់ជូននូវសេវាកម្មពាក់ព័ន្ធទៅនឹងវិស័យអប់រំ។ ចំណុចលេចធ្លោបំផុតនៃវេទិកានេះ គឺមានការចូលរួមពីវាគ្មិនជាច្រើននាក់ ដូចជា សាស្ត្រាចារ្យ អ្នកជំនាញ អ្នកឯកទេស ដែលបានចែករំលែកនូវបទពិសោធន៍ទៅដល់សិស្ស-និស្សិត ដែលកំពុងត្រូវការជាចាំបាច់នូវព័ត៌មានអំពីអាជីពដែលសមស្របនឹងទីផ្សារការងារ រួមជាមួយការអភិវឌ្ឍផ្សេង។ ក្នុងនោះក៏មានវេទិកាពិភាក្សាតាមរយៈសំណួរ-ចម្លើយ ដែលបានបង្ហាញឱ្យឃើញពីចំណាប់អារម្មណ៍ និងការយល់ដឹងកម្រិតខ្ពស់ពីសំណាក់យុវជនកម្ពុជាផងដែរ ។

ថ្លែងនៅក្នុងកិច្ចប្រកាសបើកវេទិកា លោក គង់ សុជាតិ អ្នកគ្រប់គ្រងគម្រោងរបស់ក្រុមហ៊ុន Directions Advertising បានលើកឡើងថា «យើងពិតជារីករាយ ដោយអ្នកចូលរួមទាំងអស់មានការពេញចិត្តនឹងវេទិកានេះតាមរយៈការទទួលបាននូវចំណេះដឹង និងព័ត៌មានប្រកបដោយគុណប្រយោជន៍។ យើងបានធ្វើសម្ភាសន៍ដោយផ្ទាល់ជាមួយសិស្ស-និស្សិត និងអាណាព្យាបាលដែលបានចូលរួមនៅក្នុងវេទិកាមួយនេះពីចំណាច់អារម្មណ៍របស់ពួកគាត់ ហើយចម្លើយដែលយើងទទួលបានគឺ វិជ្ជមាន គួរជាទីមោទនៈ ខណៈដែលនៅមានចំណុចដែលគួរឱ្យកត់សម្គាល់នៅក្នុងវេទិកានេះមួយទៀត គឺការចូលរួមសហការពីបណ្តាក្រុមហ៊ុនធំៗជាង15 ក្នុងនាមជាអ្នកឧត្ថម្ភ និងតាំងបង្ហាញស្ដង់ផ្សព្វផ្សាយផលិតផលរបស់ខ្លួនយ៉ាងស្រស់ស្អាត ៕

September 30, 2017

អគ្គនាយកដ្ឋានពន្ធដារ ៖ ម្ចាស់អចលនទ្រព្យដែលជាប់កាតព្វកិច្ច គួររួសរាន់ទៅបង់ពន្ធ

ប្រជាពលរដ្ឋ ឬម្ចាស់អចលនទ្រព្យដែលមានកាតព្វកិច្ចត្រូវបង់ពន្ធលើអចលនទ្រព្យរបស់ខ្លួន គួរតែរួសរាន់ទៅបង់ពន្ធឱ្យទាន់ពេលវេលា ខណៈអគ្គនាយកដ្ឋានពន្ធដារបានពន្យារពេលនៃការបង់ពន្ធចំនួន 1ខែ ដើម្បីទុកឱកាសឱ្យម្ចាស់អចលនទ្រព្យទាំងនោះបានបំពេញកាតព្វកិច្ចឱ្យបានរួចរាល់ ។

ក្នុងសេចក្ដីជូនដំណឹងរបស់អគ្គនាយកដ្ឋានពន្ធដារ បានបញ្ជាក់ថា ម្ចាស់អចលនទ្រព្យទាំងអស់ដែលមានអចលនទ្រព្យស្ថិតនៅក្នុងភូមិសាស្ដ្រជាប់ពន្ធទូទាំងរាជធានី-ខេត្ដ សូមជ្រាបថា ដោយសង្កេតឃើញថា មានម្ចាស់អចលនទ្រព្យជាច្រើនបានមកបង់ពន្ធលើអចលនទ្រព្យរបស់ខ្លួនប្រចាំឆ្នាំ2017រួចរាល់ហើយ តែក៏នៅមានម្ចាស់អចលនទ្រព្យមួយចំនួនមិនទាន់បានបំពេញកាតព្វកិច្ចនេះនៅឡើយ។

ដើម្បីបង្កលក្ខណៈងាយស្រួលដល់ម្ចាស់អចលនទ្រព្យឱ្យមានពេលវេលាគ្រប់គ្រាន់ក្នុងការបំពេញកាតព្វកិច្ចខ្លួនទៅលើការប្រកាសបង់ពន្ធ អគ្គនាយកដ្ឋានពន្ធដារបានសម្រេចពន្យារពេលបង់ពន្ធលើអចលនទ្រព្យក្នុងឆ្នាំ2017 រហូតដល់ថ្ងៃទី31 ខែតុលា ឆ្នាំ2017 ដូច្នេះប្រជាពលរដ្ឋជាម្ចាស់អចលនទ្រព្យទាំងអស់គួរតែរួសរាន់ទៅបង់ពន្ធឱ្យទាន់ពេលវេលា បើពុំដូច្នេះទេ នឹងត្រូវទទួលរងទោសទណ្ឌស្របតាមច្បាប់ស្ដីពីសារពើពន្ធជាធរមាន៕

September 30, 2017

ក្រសួងទេសចរណ៏បង់ក្លាដែស និងកម្ពុជាត្រៀមចុះ MOU ទាក់ទាញភ្ញៀវទេសចរ

ភ្នំពេញ៖ ប្រមុខដឹកនាំរដ្ឋាភិបាលបង់ក្លាដែសនឹងមកបំពេញទស្សនកិច្ចនៅកម្ពុជា នៅថ្ងៃទី16 ខែតុលា ឆ្នាំ2017ខាងមុខនេះ ដើម្បីជំរុញកិច្ចសហប្រតិបត្តិការជាមួយកម្ពុជា ក្នុងនោះមានការចុះអនុស្សរណៈនៃការយោគយល់គ្នាផ្ដោតលើការជំរុញការអភិវឌ្ឍលើវិស័យទេសចរណ៍នៃប្រទេសទាំងពីរផងដែរ ខណៈដែលប្រទេសនៅក្នុងអាស៊ីមួយនេះមានការចាប់អារម្មណ៍ខ្លាំងលើតំបន់ទេសចរណ៍កម្ពុជា ពិសេស ប្រាសាទអង្គរវត្តតែម្ដង។

លោក ទិត ចន្ថា រដ្ឋលេខាធិការក្រសួងទេសចរណ៍ បានឱ្យដឹងនៅក្រោយបញ្ចប់ជំនួបពិភាក្សាការងាររវាងលោក ថោង ខុន រដ្ឋមន្ត្រីក្រសួងទេសចរណ៍ ជាមួយលោកស្រី សៃដា មូណាតាស្នីម ឯកអគ្គរដ្ឋទូតបង់ក្លាដែសប្រចាំកម្ពុជា ដែលមាននិវេសនដ្ឋាននៅរាជធានីបាងកក ប្រទេសថៃ នាថ្ងៃទី29 ខែកញ្ញាឆ្នាំ207 នៅទីស្ដីការក្រសួងទេសចរណ៍។

លោក ទិត ចន្ថា បានឱ្យដឹងថា ក្នុងជំនួបពិភាក្សានាព្រឹកថ្ងៃសុក្រ ម្សិលមិញនេះ លោកស្រី សៃដា មូណាតាស្នីម បានជម្រាបប្រាប់លោករដ្ឋមន្ត្រី ថោង ខុន ថា នាពេលខាងមុខឆាប់ៗនេះ ប្រមុខដឹកនាំរដ្ឋាភិបាលបង់ក្លាដែសរបស់លោកស្រីនឹងមកបំពេញទស្សនកិច្ចនៅប្រទេសកម្ពុជាដើម្បីជំរុញកិច្ចសហប្រតិបត្តិការលើវិស័យមួយចំនួនជាមួយកម្ពុជា ពិសេសគឺវិស័យទេសចរណ៍។

លោកស្រីឯកអគ្គរដ្ឋទូតបានលើកសរសើរមិនដាច់ពីមាត់ថា ដោយសារប្រទេសកម្ពុជារក្សាបាននូវសុខសន្តិភាព ស្ថិរភាពនយោបាយ និងមានការអភិវឌ្ឍលើគ្រប់វិស័យ ពិសេសគឺវិស័យទេសចរណ៍នេះតែម្ដង ទើបប្រជាជនបង់ក្លាដែស និងភ្ញៀវទេសចរប្រទេសទីបីដែលកំពុងទស្សនានៅបង់ក្លាដែសទាំងនោះចង់មកទស្សនាកម្សាន្តនៅប្រទេសកម្ពុជា ពិសេសប្រជាជនរបស់លោកស្រីបាននិងកំពុងចាប់អារម្មណ៍ខ្លាំងលើប្រាសាទអង្គរវត្ត ខេត្តសៀមរាប ដោយសារអាជ្ញាធរកម្ពុជាមានការគ្រប់គ្រងតំបន់ទេសចរណ៍នៅតំបន់អង្គរបានយ៉ាងល្អប្រសើរ។ ប្រជាជនបង់ក្លាដែសមានចំនួនរហូតដល់ជាង200លាននាក់ឯណោះ ដែលនេះជាសក្ដានុពល វិជ្ជមានមួយសម្រាប់វិស័យទេសចរណ៍របស់កម្ពុជា ហើយលោកស្រីឯកអគ្គរដ្ឋទូតក៏ចង់ឱ្យភ្ញៀវទេសចរកម្ពុជាទៅទស្សនានៅប្រទេសបង់ក្លាដែសផងដែរ។

លោករដ្ឋលេខាធិការបានបន្តថា ភាគីទាំងពីរបានពិភាក្សា គ្នាលើកិច្ចសហប្រតិបត្តិការក្នុងការបញ្ជូនភ្ញៀវទេសចរប្រទេសទាំងពីរ និងភ្ញៀវទេសចរប្រទេសទីបី ឱ្យទៅមកទស្សនាគ្នាទៅវិញទៅមក ធ្វើយ៉ាងណាជំរុញការងារទំនាក់ទំនងនេះឱ្យកាន់ល្អប្រសើរ និងជិតស្និទ្ធថែមទៀត ពីព្រោះកម្ពុជា-បង់ក្លាដែសធ្លាប់មានទំនាក់ទំនងជាមួយគ្នាជាយូរមកហើយ ហើយក៏មានស្ថានភាពសង្គម ទំនាក់ទំនងសាសនា វប្បធម៌ និងអរិយធម៌ ប្រហាក់ប្រហែលគ្នាផងដែរ។

លោក ចន្ថា បានបន្ថែមទៀតថា ក្នុងឱកាសដំណើរទស្សនកិច្ចរបស់ប្រមុខដឹកនាំបង់ក្លាដែស នាពេលខាងមុខ លោកស្រី សៃដា ចង់ឱ្យមានការចុះអនុស្សរណៈនៃការយោគយល់គ្នាមួយ (MoU) រវាងក្រសួងទេសចរណ៍កម្ពុជា និងក្រសួងទេសចរណ៍បង់ក្លាដែស។ ចំណែកលោករដ្ឋមន្ត្រី ថោង ខុន ក៏បានជម្រាបពីការចាប់អារម្មណ៍ និងឆ្លើយតបនូវការស្វាគមន៍ចំពោះកិច្ចសហប្រតិបត្តិការនេះយ៉ាងពេញចិត្ត។

លោក ថោង ខុន បានជម្រាបទៅលោកស្រី សៃដា ថា កម្ពុជាពិតជាចង់ពង្រីកកិច្ចសហប្រតិបត្តិការលើវិស័យទេសចរណ៍ជាមួយបង់ក្លាដែស ដូចទៅនឹងបំណងប្រាថ្នារបស់ប្រទេសបង់ក្លាដែសផងដែរ ពីព្រោះផលប្រយោជន៍ដែលបានពីវិស័យទេសចរណ៍នេះនឹងចូលរួមជំរុញកំណើនសេដ្ឋកិច្ចនៃប្រទេសទាំងពីរឱ្យកាន់តែរីកចម្រើនមួយកម្រិតទៀត។ លោករដ្ឋមន្ត្រីក៏បានស្នើទៅលោកស្រី សៃដា មូណាតាស្នីម នូវគោលបំណងពិសេសមួយទាក់ទងនឹងការតភ្ជាប់ជើងហោះហើរត្រង់ កម្ពុជា-បង់ក្លាដែស-កម្ពុជា ពីព្រោះការតភ្ជាប់ជើងហោះហើរត្រង់នេះហើយ គឺជាកត្តាចម្បងដ៏សំខាន់បំផុតសម្រាប់ជំរុញចលនាទេសចរណ៍ពីគ្នាទៅវិញទៅមក។

ទោះយ៉ាងណា ភាគីបង់ក្លាដែសមិនទាន់អាចបញ្ជាក់ពីកាលបរិច្ឆេទច្បាស់លាស់ នៃដំណើរទស្សនកិច្ចរបស់ប្រមុខដឹកនាំរបស់ខ្លួននៅឡើយទេ ប៉ុន្តែបើតាមលោកស្រីឯកអគ្គរដ្ឋទូតគឺ ខណៈនេះបង់ក្លាដែសកំពុងរៀបចំកម្មវិធីនៃដំណើរទស្សនកិច្ចនេះជាបណ្ដើរៗហើយ៕

September 30, 2017

ក្រុមហ៊ុន khmer Household &Healthcare បង្ហាញផលិតផលថ្មី2ប្រភេទបន្ថែមទៀតនៅលើទីផ្សារកម្ពុជា

ក្រុមហ៊ុន Khmer Household & Healthcare ដែលផលិត និងចែកចាយផលិតផលសម្រាប់គ្រួសារ និងថែទាំសុខភាពដោយគុណភាពខ្ពស់ កាលពីថ្ងៃទី28 ខែកញ្ញា ឆ្នាំ2017 កន្លងទៅនេះ បានធ្វើសន្និសីទសារព័ត៌មាន ដើម្បីបង្ហាញជាផ្លូវការនូវផលិតផលថ្មីរបស់ខ្លួនចំនួន2ទៀត គឺផលិតផលសាប៊ូលាងខ្លួនម៉ាក ក្លិន (KLEN Whitening Shower Gel) ធ្វើឱ្យស្បែកមានសំណើម ស ស្អាត និងផលិតផលសាប៊ូលាងចានកម្ចាត់បាក់តេរីរបស់សាប៊ូស្អាត (SAAT Dish Washing Liquid) ។

នៅក្នុងឱកាសនោះ លោក សាង ប៉េងគី នាយកប្រតិបត្តិក្រុមហ៊ុន Khmer Household & Healthcare (KHH) បានលើកឡើងថា «ផលិតផលថ្មី គុណភាពខ្ពស់ទាំង2នេះ បាននាំមកនូវភាពស្រស់ស្អាត និងអនាម័យខ្ពស់បំផុតសម្រាប់ប្រជាជនកម្ពុជា។ ផលិតផលទាំងអស់របស់ក្រុមហ៊ុន Khmer Household & Healthcare ត្រូវបានផលិតនៅប្រទេសកម្ពុជាដោយរោងចក្រផ្ទាល់ខ្លួន ដែលមានទីតាំងនៅក្នុងរាជធានីភ្នំពេញ និងមានរូបមន្ត រួមជាមួយវត្ថុធាតុដើមនាំចូលពីប្រទេសកូរ៉េ ដែលមានអជ្ញាប័ណ្ណ និងលិខិតបញ្ជាក់ត្រឹមត្រូវ ដោយឆ្លងកាត់ការសាកល្បងយ៉ាងម៉ត់ចត់ពីក្រសួងឧស្សាហកម្ម និងសិប្បកម្ម ដើម្បីធានាបាននូវគុណភាពខ្ពស់ រួមទាំងផ្តល់ទំនុកចិត្តដល់អតិថិជនផងដែរ។ លើសពីនេះទៅទៀត ក្រុមហ៊ុនបានអភិវឌ្ឍផលិតផលជាមួយក្រុមអ្នកជំនាញនៅប្រទេសកូរ៉េ និងដឹកនាំដោយអ្នកគ្រប់គ្រងគម្រោងដែលមានបទពិសោធន៍ក្នុងឧស្សាហកម្មនេះជាង30ឆ្នាំមកហើយ។

គួរបញ្ជាក់ផងដែរថា ក្រុមហ៊ុន Khmer Household & Healthcare ទទួលបានអជ្ញាប័ណ្ណស្របច្បាប់ពីក្រសួងពាណិជ្ជកម្មនៃព្រះរាជាណាចក្រកម្ពុជា និងទទួលស្គាល់ការវិនិយោគដោយគណៈកម្មការក្រុមប្រឹក្សាអភិវឌ្ឍកម្ពុជា ដើម្បីចែកចាយផលិតផលម៉ាក ក្លិន ស្អាត និងល្អ ដែលរួមមានសាប៊ូលាងខ្លួន សាប៊ូកក់សក់ក្លិន សាប៊ូលាងកម្រាលឥដ្ឋស្អាត សាប៊ូលាងចានស្អាត និងសាប៊ូលាងចានល្អ ហើយតាមរយៈកិច្ចសហប្រតិបត្តិការប្រកបដោយប្រសិទ្ធភាពរបស់ដេប៉ូចែកចាយផលិតផលគ្រប់ប្រភេទរបស់ក្រុមហ៊ុនត្រូវបានចែកចាយទៅដល់ប្រជាជនកម្ពុជា និងទទួលបានការគាំទ្រយ៉ាងខ្លាំង ៕

September 30, 2017

Man City ខកចិត្តធំ Aguero គ្រោះថ្នាក់រថយន្តបាក់ឆ្អឹងជំនីរ

ខ្សែប្រយុទ្ធ Sergio Aguero របស់ក្លិប Manchester City បានរងរបួសបាក់ឆ្អឹងជំនីរ ក្នុងគ្រោះថ្នាក់បុករថយន្តមួយក្នុងប្រទេសហូឡង់ ដែលក្លាយជាការខកចិត្តដ៏ធំមួយដល់ការប្រជែងលើកពានរបស់ក្រុម ដែលកំពុងនាំមុខលើតារាងក្របខ័ណ្ឌ Premier League មួយនេះ។

Aguero បានធ្វើឲ្យខ្លួនគេក្លាយជាសមាជិកដ៏សំខាន់ម្នាក់ក្នុងការជួយឲ្យ Man City ឡើងទៅឈរនៅលើកំពូលតារាង តាមរយៈការរកបានគ្រាប់បាល់បញ្ចូលទី6គ្រាប់ក្នុងក្របខ័ណ្ឌ Premier League នៅរដូវកាលនេះ។ ខ្សែប្រយុទ្ធវ័យ 29ឆ្នាំរូបនេះ បានរងរបួសក្រោយពីរថយន្តតាក់ស៊ីមួយគ្រឿងបានដឹករូបគេទៅកាន់អាកាសយានដ្ឋាននៃទីក្រុង Amsterdam បន្ទាប់ពីមានឧប្បត្តិហេតុមួយក្នុងការប្រគំតន្ត្រីមួយកន្លែងកាលពីរាត្រីថ្ងៃព្រហស្បតិ៍។

ក្រោយមក Aguero បានបង្ហោះសារនៅលើបណ្តាញសង្គម Twitter កាលពីថ្ងៃសុក្រថា រូបគេពិតជាមានសំណាងល្អណាស់ដែលបានពាក់ខ្សែក្រវាត់សុវត្ថិភាព។ តារាឆ្នើមអន្តរជាតិអាហ្សង់ទីនដែលក្លិបរបស់គេបានបញ្ជាក់ថា រូបគេនឹងត្រូវអវត្តមានរយៈពេល4សប្តាហ៍នោះ បានឲ្យដឹងថា៖ «វាជាការបុកយ៉ាងខ្លាំងក្លាមួយ ប៉ុន្តែខ្សែក្រវាត់សុវត្ថិភាពបានការពារមិនឲ្យរូបខ្ញុំរងគ្រោះថ្នាក់ធ្ងន់»។

ដំបូងឡើយ វាមានការព្រួយបារម្ភថា រូបគេអាចនឹងត្រូវអវត្តមានរយៈពេល2ខែ។ លោក Pep Guardiola អ្នកចាត់ការទូទៅរបស់ក្រុម Man City បាននិយាយថា Aguero នឹងត្រូវអវត្តមានក្នុងការប្រកួតរបស់ Man City នៅលើទឹកដីក្រុមម្ចាស់ការពារតំណែងជើងឯក Chelsea នៅថ្ងៃសៅរ៍នេះ ហើយក៏នឹងត្រូវអវត្តមានក្នុងការប្រកួតជម្រុះ World Cup របស់ក្រុមបាល់ទាត់ជម្រើសជាតិអាហ្សង់ទីន នៅដើមខែតុលានេះ ផងដែរ៕

ប្រភពពី៖ Skysports

September 30, 2017

សន្និសីទសារព័ត៌មាន «ការផ្តល់អាហារូបករណ៍ 100% ចំនួន300នាក់ ដល់សិស្សនិទ្ទេស F មធ្យមសិក្សាទុតិយភូមិ សម្រាប់វគ្គបណ្តុះបណ្តាល Customized AML Soft Skills” ដែលមានតម្លៃស្មើនឹង 245ដុល្លារ

ភ្នំពេញ៖ ក្រោយបញ្ចប់ការប្រឡងមធ្យមសិក្សាទុតិយភូមិ យើងសង្កេតឃើញថា សិស្សដែលទទួលបាន និទ្ទេសល្អៗ (និទ្ទេស A) ត្រូវបានស្ថាប័នជាច្រើនផ្តល់រង្វាន់លើកទឹកចិត្ត និងផ្តល់ឱកាសផ្សេងៗផងដែរ។ ដោយឡែក បើយើងក្រឡែកមើលសិស្សដែលបានប្រឡងធ្លាក់មធ្យមសិក្សាទុតិយភូមិ (សិស្សនិទ្ទេស F) ក៏មានចំនួន ច្រើនផងដែរ ដែលសិស្សទាំងនោះត្រូវការ ការលើកទឹកចិត្ត ការបង្ហាញផ្លូវ និងដំណោះស្រាយ សម្រាប់ដំណើរទៅមុខរបស់ពួកគេផងដែរ។ ដោយមើលឃើញបញ្ហាប្រឈមនេះហើយ ទើបវិទ្យាស្ថាន សិក្សាដើម្បីជោគជ័យបានសម្រេចផ្តល់អាហារូបករណ៍ 100% ចំនួន 300នាក់ ដល់សិស្សនិទ្ទេស F មធ្យមសិក្សាទុតិយភូមិ សម្រាប់វគ្គបណ្តុះបណ្តាល Customized AML Soft Skills។

ការផ្តល់អាហារូបករណ៍នេះមានគោលបំណង (1) លើកទឹកចិត្តដល់សិស្សានុសិស្សនិទ្ទេស F ផ្តល់ចំណេះ និងជំនាញទន់ AML Soft Skills ដើម្បីជាទន់និងគំនិតសម្រាប់ដំណើរជីវិតរបស់ពួកគាត់ នាពេលអនាគត (2)ដើម្បីចូលរួមចំណែកក្នុងការបណ្តុះបណ្តាលធនធានមនុស្សសំរាប់ សង្គម និងប្រទេស ជាតិផងដែរ។

ថ្លែងក្នុងឱកាសសន្និសីទនេះលោក ឃីម សុខហេង មានប្រសាសន៍ថា៖“ខ្ញុំចង់ផ្តល់ឱកាសអោយសិស្សានុ សិស្សដែលប្រឡង ធ្លាក់មធ្យមសិក្សាទុតិយភូមិ មានឱកាសបានចូលរួមរៀនសូត្រពីវគ្គសិក្សា AML Soft Skills ការផ្តល់ អាហារូបករណ៍នេះ វាជាឱកាសមួយដ៏ល្អសម្រាប់ប្អូនៗសិស្សានុសិស្សបានរៀនសូត្រនិង ស្វែងពីវគ្គសិក្សាជំនាញទន់AMLSoftSkillsខ្ញុំជឿជាក់ថា វគ្គសិក្សានេះនឹងជួយពួកគេឱ្យចេះជំរុញលើកទឹក ចិត្តខ្លួនឯង ចេះរៀបចំផែនការជីវិត និងផ្តល់ពីរបៀបក្នុងសម្រេចគោលដៅជីវិតនោះ។

ស្ថាបនិកនៃវិទ្យាស្ថានសិក្សាដើម្បីជោគជ័យ លោក ឃីម សុខហេង បានសង្កត់ធ្ងន់ដែរថា លោកថា “ទោះបីជាប្រឡងបាក់ឌុប ជាប់ក្តី មិនជាប់ក្តី មានក្តី ក្រក្តី សូមកុំបោះបង់ការចោលការសិក្សា ព្រោះការសិក្សាមានសារ:សំខាន់ណាស់ ដែលអាចធ្វើអោយប្អូនៗអោយមានអនាគតល្អ និងអាចជួយ ជ្រោមជ្រែងជីវភាពគ្រួសារ ក៏ដូចជាក្លាយជាសរសរទ្រូងសម្រាប់ប្រទេសជាតិ។ តែបើប្អូនៗខ្វះលទ្ធភាពបន្តការសិក្សា ប្អូនៗអាចធ្វើការបណ្តើរ រៀនបណ្តើរ ដូច្នេះកុំអស់សង្ឃឹម ហើយកុំបោះបង់”

ដើម្បីឆ្លើយតបនឹងការផ្តល់អាហារូបករណ៍ខាងលើ វិទ្យាស្ថានសិក្សាដើម្បីជោគជ័យ (LSI) នឹងរៀបចំកម្មវិធី ផ្តល់អាហារូបករណ៍ដល់សិស្សនិទ្ទេស F នៅថ្ងែទី 07 ខែតុលា ឆ្នាំ 2017 វេលាម៉ោង 9:00 នាទីព្រឹក ដល់ 11:00 នាទីព្រឹក នៅ វិទ្យាស្ថានសិក្សាដើម្បីជោគជ័យ (LSI)។

ព័ត៍មានលំអិតសូមទំនាក់ទំនង:

Mr. Chan Kosol, Marketing Supervisor
Tel: 016 536 939
Email: [email protected]

Mrs. Sem Sreytouch, Event & Traning Manager
Tel: 012 34 96 04
Email: [email protected]

Download ពាក្យស្នើសុំអាហាររូបករណ៍

September 29, 2017

មនុស្សជោគជ័យសុទ្ធតែផ្តើមចេញពីការលំបាក គ្រាន់តែពេលខ្លះគេមិនប្រាប់

«ខ្ញុំជឿថា មនុស្សជោគជ័យទាំងអស់សុទ្ធតែត្រូវឆ្លងកាត់ការលំបាកជាច្រើន គ្រាន់តែគេលាក់មិននិយាយ» នេះជាការលើកឡើងរបស់លោក កុល ផេងវឌ្ឍនា សាកលវិទ្យាធិការរងនៃសាកលវិទ្យាល័យបញ្ញាសាស្ត្រកម្ពុជា និងជាអ្នកនិពន្ធសៀវភៅ Discovery Your Greatness នៅក្នុងសិក្ខាសាលាមួយស្តីពីជីវិតសិក្សា និងការងារ។

លោក កុល ផេងវឌ្ឍនា បានបញ្ចប់ការសិក្សានៅសហរដ្ឋអាមេរិក តែលោកបានឆ្លងកាត់ដំណាក់កាលលំបាកជាច្រើន ដែលលោកអះអាងថា នៅទីនោះសូម្បីតែកូនសេដ្ឋីក៏គេរៀនផង និងធ្វើការផងដូចរូបលោកដែរ។ ការងារដំបូងរបស់លោកគឺជាអ្នកលាងចាន ដែលការងារនេះទទួលបានចំណូលតិចតួចបំផុតហើយថែមទាំងត្រូវលាងបង្គន់ទៀតផង តែលោកនៅតែតស៊ូជាមួយនឹងការលំបាករហូតដល់លោកបានក្លាយជាអ្នកគ្រប់គ្រងម្នាក់នៅក្នុងហាងមួយនៅអាមេរិក ខណៈពេលដែលលោកត្រូវចំណាយពេលវេលាជាច្រើនដើម្បីរៀននៅមហាវិទ្យាល័យ។

លោក កុល ផេងវឌ្ឍនា បាននិយាយថា៖ «ការលំបាកអាចធ្វើឱ្យយើងតស៊ូ និងមានកម្លាំងកាន់តែខ្លាំងក្នុងការជម្នះឧបសគ្គធំៗក្នុងជីវិត និងការងារ»។

លោក វឌ្ឍនា បានលើកឡើងផងដែថា យុវវ័យគួរតែព្យាយាមប្រើជីវិត និងពេលវេលាឱ្យអស់ពីលទ្ធភាពដោយកុំខ្លាចការលំបាក ព្រោះថា នៅពេលដែលយើងបានឆ្លងកាត់ ឬប្រឈមជាមួយនឹងបញ្ហាដ៏ច្រើនទាំងនោះហើយ យើងនឹងស្គាល់ពីភាពអត់ធ្មត់ ហើយធ្វើឱ្យយើងអាចក្លាយជាអ្នកគ្រប់គ្រងល្អផងនៅថ្ងៃអនាគត។

ការដែលចាប់ផ្តើមពីការធ្វើការងារតូចបំផុត អាចធ្វើឱ្យយើងក្លាយជាអ្នកគ្រប់គ្រងបុគ្គលិកបានល្អនៅពេលដែលយើងក្លាយជាអ្នកគ្រប់គ្រង ឬក្លាយជាម្ចាស់អាជីវកម្ម ព្រោះយើងបានយល់ដឹងច្បាស់ពីសុខទុក្ខ និងបញ្ហារបស់បុគ្គលិកគ្រប់ជាន់ថ្នាក់ មិនថាបុគ្គលិកដែលស្ថិតនៅថ្នាក់ទាបប៉ុនណាក៏ដោយ៕

September 29, 2017

ក្រសួងឧស្សាហកម្ម ធ្វើប្រតិភូកម្មផ្តល់ភាពងាយស្រួលក្នុងការផ្តល់សេវាជូនពលរដ្ឋ

ភ្នំពេញ៖ ដើម្បីបង្កលក្ខណៈឱ្យកាន់តែងាយស្រួល និងឆ្លើយតបបានទាន់ពេលវេលា នូវសេចក្តីត្រូវការរបស់ប្រជាពលរដ្ឋ ក្រសួងឧស្សាហកម្ម និងសិប្បកម្មបានធ្វើប្រតិភូកម្មជាលើកដំបូង ផ្ទេរអំណាចទៅដល់ថ្នាក់រាជធានី-ខេត្ត ស្រុក-ខណ្ឌតាមរយៈការប្រមូលផ្តុំសេវារដ្ឋបាលលើវិស័យឧស្សាហកម្ម និងសិប្បកម្មនៅកន្លែងតែមួយ។

ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មបានមានប្រសាសន៍នៅក្នុងសិក្ខាសាលាការពិគ្រោះយោបល់ និងបណ្តុះបណ្តាលក្នុងការធ្វើប្រតិភូកម្មអំណាចការងារឧស្សាហកម្ម និងសិប្បកម្មជូនដល់រដ្ឋបាលរាជធានី-ខេត្ត និងមន្ទីរឧស្សាហកម្ម និងសិប្បកម្មរាជធានី-ខេត្តកាលពីម្សិលមិញថា ការផ្តល់សេវាតាមរយៈប្រតិភូកម្មអំណាច របស់ក្រសួងឧស្សាហកម្ម និងសិប្បកម្មតាមរយៈយន្តការច្រកចេញចូលតែមួយនៅរដ្ឋបាលថ្នាក់ក្រោមជាតិទូទាំងប្រទេសនេះ គឺមានបំណងលើកកម្ពស់គុណភាព ប្រសិទ្ធភាព តម្លាភាព និងគណនេយ្យភាព នៃការផ្តល់សេវាថ្នាក់ក្រោមជាតិ តាមរយៈការប្រមូលផ្តុំសេវារដ្ឋបាលលើវិស័យឧស្សាហកម្ម និងសិប្បកម្មនៅកន្លែងតែមួយដើម្បីបង្កលក្ខណៈងាយស្រួល និងឆ្លើយតបទាន់ពេលវេលាទៅនឹងតម្រូវការ និងសំណូមពររបស់ប្រជាពលរដ្ឋ។

សិក្ខាសាលាដែលបានរៀបចំមានគោលបំណងពិភាក្សាពិគ្រោះយោបល់ និងបណ្តុះបណ្តាល អំពីនីតិវិធីគំរូបែបបទតាមគោលការណ៍ប្រតិភូកម្មអំណាចការងារឧស្សាហកម្ម និងសិប្បកម្ម រួមមាន៖
1.ប្រតិភូកម្មការងារឧស្សាហកម្មស្តីពីការចុះបញ្ជីរោងចក្រដែលមានទុនសមមូល 2លានដុល្លារចុះក្រោមក្នុងដែនសមត្ថកិច្ចនៃអនុគណៈកម្មាធិការវិនិយោគរាជធានី-ខេត្ត ក្នុងនោះមន្ទីរឧស្សាហកម្ម និងសិប្បកម្មរាជធានី-ខេត្តជាសេនាធិការឱ្យរដ្ឋបាលថ្នាក់ក្រោមជាតិក្នុងការចុះបញ្ជីនេះ (ប្រកាសប្រតិភូកម្មរបស់ក្រសួងឧស្សាហកម្ម និងសិប្បកម្ម)។

ប្រតិភូកម្មការងារសហគ្រាសធុនតូច និងមធ្យម និងសិប្បកម្មដែលមានទុនសមមូល 5ម៉ឺន ដុល្លារចុះ ជូនដល់រដ្ឋបាលរាជធានី-ខេត្តក្នុងការចុះបញ្ជីបង្កើត និងចេញវិញ្ញាបនបត្រអនុញ្ញាតដំណើរការ ក្នុងនោះមន្ទីរឧស្សាហកម្ម និងសិប្បកម្មរាជធានី-ខេត្តជាសេនាធិការឱ្យរដ្ឋបាលថ្នាក់ក្រោមជាតិក្នុងការចុះបញ្ជីនេះ (អនុក្រឹត្យលេខ 18 អនក្របក ស្តីពីប្រតិភូកម្ម)។
ប្រតិភូកម្មការងារសិប្បកម្មដែលមានកម្រឹតទុន5ពាន់ដុល្លារចុះ និងនីតិវិធីនៃការចុះបញ្ជី បង្កើត និងអនុញ្ញាតដំណើរការនៃសិប្បកម្មទុនសមមូល3ពាន់ដុល្លារចុះ ជូនដល់រដ្ឋបាលក្រុង ស្រុក-ខណ្ឌ។ ឯកឧត្តមបានបញ្ជាក់ផងដែរថា ការធ្វើប្រតិភូកម្ម5ពាន់ដុល្លារចុះនេះ ក្រសួងបានធ្វើប្រតិភូកម្មតាំងពីឆ្នាំ2011មកម្ល៉េះ ប៉ុន្តែបច្ចុប្បន្នដោយក្រសួងឧស្សាហកម្ម និងសិប្បកម្ម ទើបបង្កើតថ្មី ត្រូវធ្វើនីត្យានុកូលភាពឡើងវិញនូវប្រកាសប្រតិភូកម្មនេះ ទន្ទឹមនឹងនេះក្រសួងបានសម្រេចធ្វើប្រតិភូកម្មទាំងចុះបញ្ជី និងដំណើរការនៅពេលតែមួយសម្រាប់សិប្បកម្មដើមទុនក្រោម3ពាន់ដុល្លាចុះ ដើម្បីបង្កលក្ខណៈងាយស្រួលដល់ប្រជាពលរដ្ឋក្នុងការទទួលបានសេវា និងផ្តល់ជូនសេដ្ឋកិច្ចខ្នាតតូចនៅមូលដ្ឋាន។

4.ក្រសួងឧស្សាហកម្ម និងសិប្បកម្មពិនិត្យលើស្ថានភាពបច្ចុប្បន្ន ការចុះបញ្ជីសហគ្រាសធុនតូច និងមធ្យមពុំមានវិសាលភាពគ្រប់គ្រាន់ក្នុងការគ្រប់គ្រងនៃការចុះបញ្ជី ជាពិសេសការគ្រប់គ្រងស្ថិតិរបស់សហគ្រាស ធុនតូច និងមធ្យម នៅមានកម្រិត ដូចនេះក្រសួងឧស្សាហកម្មនិងសិប្បកម្មបានសម្រេចចិត្តក្នុងសន្និបាតបូកសរុបរបស់ក្រសួងនៅឆ្នាំ2016 និងទិសដៅឆ្នាំ2017 គឺការធ្វើប្រតិភូកម្មការងារសហគ្រាសធុនតូច និងមធ្យម និងសិប្បកម្មដែលមានកម្រិតទុន5ម៉ឺន ដល់50ម៉ឺនដុល្លារជូនដល់មន្ទីរឧស្សាហកម្ម និងសិប្បកម្មរាជធានី-ខេត្ត ក្នុងកម្រិតសាកល្បងដើម្បីពិនិត្យសមត្ថភាពនៃការគ្រប់គ្រងរបស់អង្គភាពមូលដ្ឋានលើវិស័យនេះ៕

September 29, 2017

អាជ្ញាធរបញ្ជាក់ពីមូលហេតុធ្វើឱ្យលិចលង់ផ្លូវ2004

ភ្នំពេញ – កាលពីម្សិលមិញមានភ្លៀងធ្លាក់ចុះមកមួយមេយ៉ាងធំនៅក្នុងរាជធានីភ្នំពេញបានធ្វើឱ្យលិចលង់ផ្លូវធំៗជាច្រើនខ្សែដែលបង្កជាការលំបាកក្នុងការធ្វើចរាចរយ៉ាងខ្លាំង។ ក្នុងនោះការលិចលង់ផ្លូវ 2004 សឡា បានធ្វើឱ្យមហាជនជាច្រើនមានការចាប់អារម្មណ៍ជាខ្លាំង គ្រាដែលមានការបង្ហោះវីដេអូជុំវិញការលិចលង់ផ្ទះប្រជាពលរដ្ឋ និងរថយន្ដទំនើបៗមួយចំនួន។

យោងតាម Page ផ្លូវការនៃរដ្ឋបាលសាលារាជធានីភ្នំពេញបានសសេរសាដើម្បីបង្ហាញពីមូលហេតុដែលបណ្ដាឱ្យមានការលិចលង់ផ្លូវលេខ 2004សឡា ក្នុងនោះត្រូវបានគេមើលឃើញថា មានមូលហេតុចំនួន 2:

1-ផ្ទះប្រជាពលរដ្ឋចំនួន 562គ្រួសារ បានសាងសង់និងរស់នៅលើពោះប្រឡាយស្ទឹងមានជ័យ ចាប់ពីទ្វារទឹកដើមស្លែងនៃផ្លូវលេខ 371 ដល់ស្ពានអាកាសស្ទឹងមានជ័យ ដែលបង្កអោយស្ទះផ្លូវទឹកបង្ហូរពីផ្លូវលេខ 2004 សឡា។ ទឹកបានហូរច្រោះតាមសំរាមក្រោមផ្ទះរបស់ពួកគាត់ ដែលធ្វើអោយទឹកហូរយឺត។

ប្រជាពលរដ្ឋទាំង 562គ្រួសារតែងតែប្តឹងតវ៉ាជាញឹកញាប់មកសាលារាជធានីភ្នំពេញ និងក្រសួងរៀបចំដែនដី នគរូបនីយកម្ម និងសំណង់ ជំទាស់នឹងគម្រោងជីកស្តារប្រឡាយដោយប៉ះពាល់ផ្ទះពួកគាត់ និងសុំអភិវឌ្ឍន៍នៅនឹងកន្លែង។

2-សំរាមបាំងអណ្តូងលូ និងខ្វះអណ្តូងលូ៕

September 29, 2017

កុមារគួរលេងកីឡាពិត ឱ្យច្រើនជាងលេងក្នុងឧបករណ៍អេឡិចត្រូនិក

ដោយសារតែបច្ចេកវិទ្យានាពេលបច្ចុប្បន្នមានការរីកចម្រើនខ្លាំង ប្រជាជនគ្រប់គ្នាទាំងនៅទីក្រុង និងតំបន់ជនបទសុទ្ធតែមានឧបករណ៍អេឡិចត្រូនិកប្រើប្រាស់ ហើយក្នុងនោះចំនួនកុមារដែលចាប់ផ្តើមលេង Smartphone និង Tablet ជាដើមនោះ បានចាប់ផ្តើមកើនឡើង ដែលពេលខ្លះចរន្តនេះបានជះផលប៉ះពាល់ជាអវិជ្ជមានដល់ក្មេង។

ពាក់ព័ន្ធជាមួយនឹងបញ្ហានេះ គេហទំព័រអប់រំដ៏ល្បីល្បាញ Education World ធ្លាប់បានបង្ហាញពីគុណវិបត្តិនៃការញៀនល្បែងតាមអនឡាញ និងបញ្ហានានាដែលប្រទេសអភិវឌ្ឍន៍មួយចំនួនជួបប្រទះជាមួយដំណោះស្រាយមួយចំនួន ដោយក្នុងនោះការជំរុញឱ្យកុមារមានកន្លែងគ្រប់គ្រាន់ដើម្បីលេង និងលេងកីឡាអាចជំរុញឱ្យពួកគេក្លាយជាមនុស្សដែលមានស្ថានភាពផ្លូវចិត្តរឹងមាំ។

គេហទំព័រដដែលបានបង្ហាញផងដែរថា ការលេងកីឡាពិតប្រាកដ ខុសគ្នាដាច់ស្រឡះពីការលេងឧបករណ៍អេឡិចត្រូនិក ព្រោះថា ប្រសិនបើកុមារណាម្នាក់លេងបាល់ទាត់ដោយផ្ទាល់គាត់អាចទទួលបានទាំងការអភិវឌ្ឍផ្នែករាងកាយ ខួរក្បាល និងការទំនាក់ទំនងល្អ តែប្រសិនបើពួកគេលេងកីឡានៅក្នុងឧបករណ៍អេឡិចត្រូនិកវិញ វាក៏ផ្តល់ផលវិជ្ជមានដូចគ្នា គ្រាន់តែផលវិជ្ជមានទាំងអស់នោះមានតិចជាងការលេងដោយផ្ទាល់។ ការលេងឧបករណ៍អេឡិចត្រូនិក ថ្វីត្បិតតែអាចធ្វើឱ្យកុមាររីករាយ និងមិនគ្រោះថ្នាក់ផ្នែករាងកាយ មែន តែវាអាចធ្វើឱ្យកុមារញៀន និងបាត់បង់ភាពសកម្ម ព្រោះពួកគេអាចចូលចិត្តនៅមួយកន្លែងដើម្បីលេងកីឡាក្នុងកញ្ចក់អេក្រង់។

លើសពីនេះទៅទៀត ការដែលលេងកីឡា អាចធ្វើឱ្យកុមារបានឃើញពិភពខាងក្រៅច្រើន មានភាពរួសរាយ និងអាចធ្វើឱ្យគាត់មានភាពស្វាហាប់តាមរយៈការមើលឃើញនូវបរិស្ថានជាក់ស្តែងដែលអាចធ្វើឱ្យពួគគាត់យល់ពីជីវិតរស់នៅពិតប្រាកដ ខុសពីកុមារដែលលេងនៅក្នុងឧបករណ៍អេឡិចត្រូនិកដែលស្រួលៗ រហូតធ្វើឱ្យពួកគេគិតថា ធ្វើអ្វីមួយស្រួលៗ ហើយពិបាកទទួលបានជោគជ័យក្នុងជីវិត និងងាយបោះបង់ការតស៊ូនៅពេលដែលជួបឧបសគ្គជាក់ស្តែង៕

September 29, 2017

Author: វល័ក្ខ