សឿន សំណាង - La Reine Media

ប្ដីឡើងលើឆាកបោកកម្ទេចមកុដបវរកញ្ញា ព្រោះតែប្រពន្ធមិនទទួលបានតំណែងលេខមួយ

(ប្រេស៊ីល) – ប្ដីរបស់បេក្ខនារីមួយរូបបានលោតឡើងលើឆាក ឆក់យកមកុដរបស់បវរកញ្ញាឯក ហើយបោកទៅលើឆាក នៅពេលដឹងថា ប្រពន្ធមិនបានគ្រងតំណែងបវរកញ្ញាឯកនៅ Miss Gay Mato Grosso 2023។

ហេតុការណ៍នេះបានកើតឡើងនៅក្នុងវគ្គផ្ដាច់ព្រ័ត្រនៃការប្រលងបវរកញ្ញាប្ដូរភេទ Miss Gay Mato Grosso 2023 នៅទីក្រុង Cuiaba របស់ប្រេស៊ីល កាលពីថ្ងៃទី 27 ឧសភា 2023។ មុនពេលកើតហេតុ បេក្ខនាទី Nathally Becker (តំណាងឱ្យ Cuiaba) និង Emannuelly Belini (តំណាងឱ្យ Varzea Grande) បានឡើងដល់ Top 2 នៃបេក្ខនារីសម្រាប់តំណែងបវរកញ្ញាឯក។

នៅពេលដែលគណៈកម្មការប្រកាសថា Belini ជាអ្នកឈ្នះ ស្រាប់តែប្ដីរបស់ Becker ឈ្មោះ Matheus Oliveira រត់ឡើងឆាក ឆក់យកមកុដពីដៃរបស់អ្នកដែលកំពុងត្រៀមបំពាក់ឱ្យបវរកញ្ញា រួចបោកទៅលើឆាក។ នៅចំពោះមុខការភ្ញាក់ផ្អើលរបស់ទស្សនិក Oliveira ក៏ទាញសក់ និងប្រុងអូសប្រពន្ធចាកចេញ។ ប៉ុន្តែ កម្លាំងសន្តិសុខក៏បានឡើងទៅលើឆាក និងបានប្រទាញប្រទង់គ្នាមុនពេលចាប់ឃាត់ខ្លួន Oliveira។

Malone Haenisch ដែលជាអ្នករៀបចំកម្មវិធីប្រលងនេះ បាននិយាយថា «គាត់យល់ថា លទ្ធផលនេះមិនមានយុត្តិធម៌ ហើយក៏បង្កហេតុនេះឡើង។ យើងគោរពតាមការសម្រេចរបស់គណៈកម្មការផ្ដល់ពិន្ទុ ហើយក៏មានការអធ្យាស្រ័យចំពោះ Belini ក៏ដូចជា Becker ព្រោះថា នាងមិនទាក់ទងនឹងសកម្មភាពរបស់ស្វាមីនាងឡើយ»។

Emannuelly Belini ដែលជាប់ជាបវរកញ្ញាឯកនៅ Miss Gay Mato Grosso 2023

យោងតាម Daily Mail បន្ទាប់ពីមកុដខាងលើបានបែកបាក់ Haenisch ក៏បានប្រគល់មកុដថ្មីដល់បវរកញ្ញាឯក Belini។ អ្នកដឹកនាំស្ថាប័ន Miss Gay Mato Grosso ក៏បាននិយាយថា នឹងមានចំណាត់ការផ្លូវច្បាប់ចំពោះសកម្មភាពបំផ្លិចបំផ្លាញរបស់ Oliveira។ ចំណែកបវរកញ្ញារងទីមួយ Becker វិញ មិនទាន់មានការអធិប្បាយអ្វីនៅឡើយ ទាក់ទិននឹងទង្វើរបស់ប្ដី៕

Revolta na final do concurso Miss Brasil Gay 2023. Torcedor arranca coroa da vencedora e joga no chão durante a cerimônia de premiação. pic.twitter.com/rb6duFvAEn
— Bruno Guzzo® (@brunoguzzo) May 28, 2023

May 30, 2023

ទួរប៊ីនខ្យល់ផលិតអគ្គិសនី (Wind Power) ដែលមានអង្កត់ផ្ចិតធំជាងគេបង្អស់នៅលើដីគោក

(ប្រទេសចិន) – ទួរប៊ីនខ្យល់ MySE 10.X-23X របស់ក្រុមហ៊ុន Mingyang Smart Energy ដែលត្រូវបានដឹកចេញពីរោងចក្រនៅទីក្រុង Daqing កាលពីថ្ងៃទី 26 ឧសភា 2023 មានស្លាបដែលមានអង្កត់ផ្ចិតឡើងដល់ 230 ម៉ែត្រ។

ដោយមានអង្កត់ផ្ចិតនៃស្លាបកង្ហារប្រវែង 230 ម៉ែត្រ និងផ្ទៃក្រឡាដែលស្លាបកង្ហារវិលដល់ ទំហំ 42,000 ម៉ែត្រការ៉េ ទួរប៊ីន MySE 10.X-23X មួយគ្រឿងនឹងអាចផលិតអគ្គិសនីបាន 21 គីឡូវ៉ាត់ម៉ោង បន្ទាប់ពីស្លាបកង្ហាររបស់វាវិលបានមួយជុំនៅពេលត្រូវខ្យល់។

តាមការគណនា MySE 10.X-23X មួយគ្រឿងនឹងផលិតអគ្គិសនីស្អាតជាមធ្យមបានជាង 35 លានគីឡូវ៉ាត់ម៉ោង នៅក្នុងមួយឆ្នាំៗ។

ស្លាប់កង្ហារនៃទួរប៊ីនខ្យល់ MySE 10.X-23X របស់ក្រុមហ៊ុន Mingyang Smart Energy

«អង្កត់ផ្ចិតរបស់ស្លាបកង្ហារវែង អនុញ្ញាតឱ្យទួរប៊ីនទទួលបានខ្យល់ច្រើន ដូច្នេះប្រសិទ្ធភាពក្នុងការផលិតអគ្គិសនីដ៏បានប្រសើរឡើង។ ទួរប៊ីនដែលមានសមត្ថភាពខ្លាំងនឹងជួយសន្សំសំចៃផ្ទៃដី ការចំណាយក្នុងការសាងសង់ ក៏ដូចជាការចំណាយសម្រាប់គ្រប់គ្រង និងថែទាំ» Wang Longkuan វិស្វករផ្នែកទួរប៊ីនខ្យល់ ថ្លែងដូច្នេះ។

May 30, 2023

ក្រោយស៊ីហ្គេមលើកទី 32 ឥណ្ឌូណេស៊ីថា នឹងឡើងដល់វគ្គផ្ដាច់ព្រ័ត្រនៅ U23 អាស៊ីអាគ្នេយ៍ឆ្នាំ 2023

ប្រធានសហព័ន្ធកីឡាបាល់ទាត់ឥណ្ឌូណេស៊ីបានប្រកាសថា កីឡាកររបស់ប្រទេសនេះនឹងបញ្ចេញថ្វីជើងដ៏ល្អបន្ថែមទៀតក្នុងការប្រកួតដណ្ដើមពានរង្វាន់បាល់ទាត់យុវជនអាយុក្រោម 23 ឆ្នាំ (U23) នៅតំបន់អាស៊ីអាគ្នេយ៍ឆ្នាំ 2023។

នៅពានរង្វាន់បាល់ទាត់ U23 អាស៊ីអាគ្នេយ៍ឆ្នាំ 2023 (AFF U23 Championship 2023) ក្រុម U23 ឥណ្ឌូណេស៊ីធ្លាក់ទៅក្នុងពូល B ដែលមាន U23 ម៉ាឡេស៊ី និង U23 ទីម័រខាងកើត បន្ទាប់ពីការចាប់ឆ្នោតបានធ្វើឡើងរួចរាល់។ ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir បាននិយាយថា «បើទោះគូប្រកួតជាអ្នកណា យើងក៏ត្រូវតែត្រៀមឱ្យបានហ្មត់ចត់បំផុត»។

លោក Erick Thohir បន្តថា «ខ្ញុំមានសុទិដ្ឋិនិយម ព្រោះថា បរិយាកាសរបស់បាល់ទាត់ឥណ្ឌូណេស៊ីនៅតែល្អ បន្ទាប់ពីដណ្ដើមបានមេដាយមាសនៅស៊ីហ្គេមលើកទី 32។ ខ្ញុំជឿជាក់ថា ប្រការនេះនឹងបន្ថែមថាមពលវិជ្ជមានដើម្បីក្រុមជម្រើសជាតិ U23 បន្តដណ្ដើមបានលទ្ធផលល្អបំផុត និងដណ្ដើមបានសិទ្ធិឡើងទៅវគ្គផ្ដាច់ព្រ័ត្រ»។

ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir (អាវក្រហម)

ពានរង្វាន់ជើងឯកបាល់ទាត់ U23 អាស៊ីអាគ្នេយ៍ឆ្នាំ 2023 នឹងជាឈ្នាន់ដើម្បីក្រុមបាល់ទាត់ឥណ្ឌូណេស៊ីមានការត្រៀមខ្លួនបានល្អបំផុតសម្រាប់មហាព្រឹត្តិការណ៍ប្រកួតកីឡាទ្វីបអាស៊ីឆ្នាំ 2023 (ASIAD លើកទី 19) ក៏ដូចជាវគ្គផ្ដាច់ព្រ័ត្រ U23 ទ្វីបអាស៊ីផងដែរ។

ការប្រកួតបាល់ទាត់នៃពានរង្វាន់យុវជនអាយុក្រោម 23 ឆ្នាំនៅតំបន់អាស៊ាន (AFF U23 Championship 2023) នឹងធ្វើឡើងនៅប្រទេសថៃ ចាប់ពីថ្ងៃទី 17 សីហា ដល់ 26 សីហា។ ក្រុម U23 របស់កម្ពុជា ត្រូវស្ថិតនៅក្នុងពូល A ជាមួយនឹងព្រុយណេ មីយ៉ាន់ម៉ា និងម្ចាស់ផ្ទះថៃ៕

May 30, 2023

រដ្ឋធានីរបស់រុស្ស៊ីរងការវាយប្រហារធ្ងន់ធ្ងរលើកដំបូង ក្រោយសង្គ្រាមលោកលើកទីពីរ

យន្តហោះគ្មានមនុស្សបើកបរ (UAV) ហោះទៅបុកអគារមួយខ្នងនៅរដ្ឋធានីមូស្គូរបស់ប្រទេសរុស្ស៊ី បង្កការខូចខាតស្រាល និងធ្វើឱ្យមនុស្សពីរនាក់រងរបួស។

មន្ត្រីនៅមូស្គូ ថ្ងៃនេះបានឱ្យដឹងថា UAV មួយគ្រឿងបានវាយប្រហារជាន់លើរបស់អគារមួយនៅភាគអាគ្នេយ៍របស់រដ្ឋធានី។ UAV មួយគ្រឿងផ្សេងទៀតក៏ហោះទៅបុកអគារ 24 ជាន់មួយនៅតំបន់ដដែល។ មនុស្សនៅក្នុងអគារទាំងពីរដែលស្ថិតក្នុងក្រុង Profsoyuznaya ភាគអាគ្នេយ៍របស់មូស្គូ ត្រូវបានជម្លៀស។

អភិបាលក្រុងមូស្គូ Sergey Sobyanin ឱ្យដឹងថា អគារមួយចំនួនរងការខូចខាតស្រាល និងមនុស្សពីរនាក់រងរបួស ប៉ុន្តែមិនធ្ងន់ធ្ងរ។

ក្រសួងការពារជាតិរុស្ស៊ី ក្រោយមកបានចោទថា អ៊ុយក្រែនគឺជាអ្នកនៅពីក្រោយករណីវាយប្រហារនេះ បើទោះមិនបានបង្ហាញភស្ដុតាង។ ក្រសួងនេះបញ្ជាក់ថា UAV ចំនួន 8 គ្រឿងបានចូលរួមការវាយប្រហារ ហើយស្ទើរតែទាំងអស់ត្រូវបានរុស្ស៊ីបាញ់ទម្លាក់។

តំណាងរាស្ត្ររុស្ស៊ី Maxim Ivanov និយាយថា នេះគឺជា «ការវាយប្រហារធ្ងន់ធ្ងន់បំផុតមកលើមូស្គូ រាប់ចាប់តាំងពីការវាយប្រហាររបស់ហ្វាស៊ីសអាល្លឺម៉ង់ក្នុងសង្គ្រាមលោកលើកទីពីរ»។

មួយរយៈពេលចុងក្រោយនេះ ទឹកដីរបស់រុស្ស៊ី កើតមានការវាយប្រហារមួយចំនួន ហើយរុស្ស៊ីតែងតែទម្លាក់កំហុសលើអ៊ុយក្រែន។ ចំណែកទីក្រុងកៀវវិញ ក៏មិនទទួលស្គាល់ការវាយប្រហារណាមួយនៅខាងក្នុងទឹកដីរបស់រុស្ស៊ី៕

May 30, 2023

កុមារបួននាក់វង្វេងក្នុងព្រៃអាម៉ាហ្សូនមួយខែក្រោយពីយន្តហោះធ្លាក់ «នៅមានជីវិត»

កងទ័ពកូឡុំប៊ី បានឱ្យដឹងថា សប្ដាហ៍កន្លងពួកគេបានរកឃើញដានថ្មីរបស់កុមារបួននាក់ដែលវង្វេងក្នុងព្រៃក្នុងរយៈពេលជិតមួយខែ ក្រោយពីហេតុការណ៍ធ្លាក់យន្តហោះកាលពីពាក់កណ្ដាល់ខែឧសភា។

កុមារបួននាក់អាយុ 13 ឆ្នាំ, 9 ឆ្នាំ, 4 ឆ្នាំ និង 11 ខែ បានវង្វេងក្នុងព្រៃ បន្ទាប់ពីយន្តហោះពួកគេជិះបានធ្លាក់នៅភាគអាគ្នេយ៍នៃប្រទេសកូឡុំប៊ី ដែលបានបណ្ដាលឱ្យអ្នកបើកបរ មេដឹកនាំជនជាតិដើម និងម្ដាយរបស់ក្មេងទាំងបួននាក់ខាងលើ ត្រូវបាត់បង់ជីវិតកាលពីថ្ងៃទី 15 ឧសភា 2023។

រូបភាពពីផ្កាយរណបបង្ហាញអំពីផ្លូវដែលកុមារទាំងនោះបានដើរឆ្លងកាត់។ កម្លាំងសង្គ្រោះបានរកឃើញវត្ថុមួយចំនួននៅកន្លែងដែលកុមារទាំងនោះបានជ្រក និងផ្លែឈើដែលពួកគេបានហូប។ កាលពីសប្ដាហ៍កន្លង កម្លាំងសង្គ្រោះក៏បានរកឃើញស្បែកជើងមួយគូ និងខោទឹកនោមផងដែរ។

មេបញ្ជាការក្រុមសង្គ្រោះ លោក Pedro Sanchez កាលពីថ្ងៃទី 29 ឧសភា បានឱ្យដឹងថា «យោងទៅតាមអ្វីដែលបានរកឃើញ យើងសន្មតថា ក្មេងទាំងនេះនៅមានជីវិត។ បើសិនពួកគេបានស្លាប់ នឹងងាយរកឃើញ ព្រោះពួកគេលែងផ្លាស់ទី ហើយសុនកជំនាញនឹងហិតដឹងក្លិន»។

ទាហានកំពុងស្វែងរកកុមារបួននាក់ដែលវង្វេងក្នុងព្រៃ

ទាហាន និងជនជាតិដើមប្រហែល 200 នាក់ដែលដឹងច្បាស់ភូមិសាស្ត្រ កំពុងតែស្វែងរកនៅក្នុងតំបន់ព្រៃទំហំ 320 គីឡូម៉ែត្រការ៉េ។ Sanchez ឱ្យដឹងថា ពិតជាចម្លែកណាស់នៅពេលកុមារទាំងនេះមិនឈប់ផ្លាស់ទី បើទោះទ័ពអាកាសបានណែនាំឱ្យនៅមួយកន្លែង តាមរយៈការទម្លាក់ក្រដាស់សរសេរជាភាសាអេស្ប៉ាញ និងភាសាជនជាតិដើមនៅមូលដ្ឋានចំនួន 10,000 សន្លឹក ទៅលើតំបន់ព្រៃនោះ។

ក្នុងក្រដាសនោះក៏រួមមានទាំងការណែនាំអំពីរបៀបរក្សាជីវិត អាហារកញ្ចប់ និងទឹកផងដែរ។ យោងតាមលោក Sanchez ក្រុមសង្គ្រោះបានអះអាងថា ពួកគេធ្លាប់ចូលទៅក្បែរកន្លែងរបស់កុមារទាំងនោះក្នុងរង្វង់ 100 ម៉ែត្រ ប៉ុន្តែ ភ្លៀងខ្យល់ខ្លាំង ព្រៃក៏ក្រាស់ ភូមិសាស្ត្រសម្បូរបឹងភក់ បានរារាំងដំណើររបស់ក្រុមសង្គ្រោះ។

ឪពុករបស់កុមារទាំងបួននាក់ (ស្ដាំ) កំពុងពិភាក្សាជាមួយបុគ្គលិកសង្គ្រោះនៅក្នុងព្រៃអាម៉ាហ្សូន

ឧទ្ធម្ភាគចក្ររបស់កងទ័ព និងផ្កាយរណបកំពុងត្រូវបានណែនាំឱ្យស្វែងរកក្នុងតំបន់ដែលមានសត្វសាហាវ។ អ្នកផ្ទះបានឱ្យដឹងថា កុមារីដែលជាបងស្រីបង្អស់ក្នុងចំណោមក្មេងទាំងបួននាក់នោះ មានការយល់ដឹងច្រើនអំពីរបៀបនៃការរក្សាជីវិតនៅក្នុងព្រៃ៕

May 30, 2023

Tesla បើក Showroom លំដាប់ប្រណិតនៅរាជធានីរបស់ប្រទេសថៃ

ក្រុមហ៊ុនផលិតរថយន្តអគ្គិសនី Tesla នឹងបើកសាលតាំងបង្ហាញ (showroom) លំដាប់ប្រណិតនៅប្រទេសថៃ នៅក្រោយខែមិថុនា ក្នុងមជ្ឈមណ្ឌលពាណិជ្ជកម្មនៅភាគខាងកើតរាជធានីបាងកក ដើម្បីជំរុញការលក់រថយន្តអគ្គិសនីដែលកំពុងកើនឡើងយ៉ាងរហ័សនៅប្រទេសថៃ និងដើម្បីតាមទាន់គូប្រកួតចិន ក្នុងនោះមាន BYD ជាដើម។

យោងតាមបណ្ដាញផ្សព្វផ្សាយក្នុងស្រុក ក្រុមហ៊ុនផលិតរថយន្តអាម៉េរិកមួយនេះកំពុងតែជួសជុល និងកែលំអទីតាំងដែលធ្លាប់ជាសាលតាំងបង្ហាញរបស់ Toyota។ នៅប្រទេសថៃ ក្រៅពីសាលតាំងបង្ហាញនេះ Tesla ក៏នឹងមានមជ្ឈមណ្ឌលសេវាកម្ម ឃ្លាំងគ្រឿងបន្លាស់ និងស្ថានីយបញ្ចូលថាមពលរហ័សផងដែរ។

ទាក់ទងនឹងដំណឹងខាងលើ តំណាងមួយរូបរបស់ Tesla បានឱ្យដឹងថា ព័ត៌មានលម្អិតនឹងត្រូវបានប្រកាសឆាប់ៗខាងមុខ។

Tesla បានចាប់ផ្ដើមលក់អនឡាញនូវរថយន្តបែបកីឡាពហុមុខងារប្រភេទមធ្យម Model Y និងរថយន្ត Model 3 នៅប្រទេសថៃ តាំងពីខែធ្នូឆ្នាំមុន ក្នុងតម្លៃចាប់ពីប្រហែល 1.96 លានបាត (56,500 ដុល្លារអាម៉េរិក) និង 1.76 លានបាត (50,700 ដុល្លារអាម៉េរិក)។ តួលេខនេះខ្ពស់ជាងបើធៀបនឹងតម្លៃ 1 លានបាត់របស់បណ្ដារថយន្តចិនដែលមានលក្ខណៈប្រហាក់ប្រហែលនេះ។

យោងតាមរបាយការណ៍របស់ទំព័រ Autolife នៅប្រទេសថៃ ចំនួនរថយន្ត Model Y ក្នុងខែមីនាបានកើនឡើងជិតទ្វេដងធៀបនឹងខែកុម្ភៈ ដោយលក់បាន 1,034 គ្រឿង ជួយឱ្យម៉ូដែលរថយន្តនេះកាន់កាប់ 17% នៅក្នុងទីផ្សាររថយន្តអគ្គិសនីនៅប្រទេសថៃ។ Model Y ក្លាយជាម៉ូដែលរថយន្តអគ្គិសនីដែលលក់ដាច់ជាងគេលំដាប់ទីពីរនៅប្រទេសថៃ បន្ទាប់ពី Atto 3 របស់ BYD និងនៅពីលើ SAIC Motor និង Great Wall Motor។

Showroom របស់ Tesla នៅរាជធានីរបស់ប្រទេសថៃ

May 30, 2023

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?

(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។

លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។

ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។

ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។

បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។

តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស

យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕

May 30, 2023

ចិននាំអវកាសចរស៊ីវិលដំបូងឡើងទៅកាន់ស្ថានីយអវកាស Tiangong

Gui Haichao ដែលជាសាស្ត្រាចារ្យនៃសាកលវិទ្យាល័យអវកាសប៉េកាំង នឹងក្លាយជាអ្នកអវកាសស៊ីវិលដំបូងគេរបស់ប្រទេសចិន ដែលហោះឡើងទៅកាន់ទីអវកាស។

តាមផែនការ Gui Haichao នឹងរួមដំណើរជាមួយអ្នកអវកាស Jing Haipeng និង Zhu Yangzhu របស់យានអវកាស Shenzhou 16 ហោះឡើងទៅកាន់ស្ថានីយអវកាស Tiangong ពីមជ្ឈមណ្ឌលបាញ់បង្ហោះផ្កាយរណប Jiuquan នៅភាគពាយព្យប្រទេសចិន នៅវេលាម៉ោង 09:31 ថ្ងៃទី 30 ឧសភា ម៉ោងនៅប៉េកាំង (ម៉ោងប្រហែល 8 កន្លះនៅភ្នំពេញ)។ មុននោះ អ្នកអវកាសចិនដែលបានហោះឡើងទៅកាន់ទីអវកាសគឺសុទ្ធតែជាមនុស្សរបស់កងទ័ពចិន (PLA)។

អ្នកនាំពាក្យរបស់ស្ថាប័នអវកាសមានមនុស្សបើកបររបស់ចិន (CMSA) បានឱ្យដឹងថា សាស្ត្រាចារ្យ Gui Haichao ទទួលបន្ទុកក្នុងការពិសោធផ្នែកវិទ្យាសាស្ត្រនៅលើស្ថានីយអវកាសចិន Tiangong។ អ្នកវិភាគ Chen Lan អះអាងថា ការចូលរួមរបស់ Gui គឺជារឿងសំខាន់ ព្រោះថា កន្លងមកមានតែអ្នកអវកាសជំនាញខាងបច្ចេកទេសប៉ុណ្ណើ ពុំទាន់មានអ្នកវិទ្យាសាស្ត្រដែលមានឯកទេសក្នុងការសិក្សាស្រាវជ្រាវពិតប្រាកដ។

ប្រធានក្រុមហោះហើររបស់យាន Shenzhou 16 គឺ Jing Haipeng នឹងបំពេញបេសកកម្មអវកាសលើកទីបួន។ សមាជិកចុងក្រោយរបស់ជើងហោះហើរលើកនេះគឺវិស្វករ Zhu Yangzhou។ តាមគម្រោង អ្នកអវកាស Jing, Gui និង Zhu នឹងធ្វើការនៅលើស្ថានីយអវកាស Tiangong ក្នុងរយៈពេលប្រហែល 5 ខែ។

តាមផែនការ ស្ថានីយអវកាស Tiangong នឹងធ្វើសកម្មភាពក្នុងគន្លងតារាវិថីផែនដីនៅលើកម្ពស់ពី 400 ទៅ 450 គីឡូម៉ែត្រ យ៉ាងតិច 10 ឆ្នាំ។ ហេដ្ឋារចនាសម្ព័ន្ធស្ថានីយអវកាសដែលមានរាងជាអក្សរ T នេះ ត្រូវបានដំឡើងរួចរាល់កាលពីឆ្នាំ 2022។ មុននោះ ក្នុងឆ្នាំ 2011 ចិនត្រូវបានបណ្ដេញចេញពីស្ថានីយអវកាសអន្តរជាតិ នៅពេលសហរដ្ឋអាម៉េរិកមិនអនុញ្ញាតឱ្យណាសាសហការជាមួយប្រទេសនេះ។

ចិនមិនមានគម្រោងប្រើប្រាស់ស្ថានីយ Tiangong សម្រាប់កិច្ចសហប្រតិបត្តិការទូទាំងសកលលោកក្នុងទ្រង់ទ្រាយធំដូច ISS ប៉ុន្តែ នៅតែត្រៀមខ្លួនសហការជាមួយបរទេស។

May 30, 2023

បច្ចេកវិទ្យា «បាញ់បញ្ជូនអគ្គិសនីពីអវកាសមកកាន់ផែនដី» កំពុងមានការប្រកួតប្រជែងខ្លាំង

ក្រុមអ្នកវិទ្យាសាស្ត្រនៅសាកលវិទ្យាល័យ Kyoto នឹងធ្វើតេស្តក្នុងការប្រើប្រាស់ផ្កាយរណបបាញ់បញ្ជូនអគ្គិសនីបានពីព្រះអាទិត្យ មកកាន់ផែនដី ក្នុងទម្រង់រលកម៉ៃក្រូវេវ នៅឆ្នាំ 2025។

ការប្រណាំងប្រជែងគ្នាអភិវឌ្ឍបច្ចេកវិទ្យាបាញ់បញ្ជូនអគ្គិសនីព្រះអាទិត្យដែលប្រមូលបានពីទីអវកាស មកកាន់ផែនដី កំពុងឡើងកម្ដៅខ្លាំង។ នៅប្រទេសជប៉ុន ក្រុមហ៊ុនរបស់ Hiroshi Matsumoto អតីតនាយកសាកលវិទ្យាល័យ Kyoto កំពុងនាំមុខគេនៅក្នុងការស្រាវជ្រាវអំពីបច្ចេកវិទ្យានេះ។ បន្ទាប់មកគឺសាស្ត្រាចារ្យ Naoki Shinohara នៅសាកលវិទ្យាល័យ Kyoto ក៏បន្តការស្រាវជ្រាវ។ នេះបើតាម Nikkei ចុះផ្សាយកាលពីថ្ងៃទី 27 ឧសភា។

ឆ្នាំ 2009 ក្រុមរបស់ Shinohara បានប្រើប្រាស់បាឡុងហោះដើម្បីបាញ់បញ្ជូនអគ្គិសនីពីកម្ពស់ 30 ម៉ែត្រ មកកាន់ទូរស័ព្ទចល័តនៅលើដី។ នៅក្នុងឆ្នាំដដែល Shinohara ក៏ត្រូវបានជ្រើសតាំងជាប្រធានក្រុមប្រឹក្សាបច្ចេកវិទ្យារបស់គម្រោងពីក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ប្រទេសជប៉ុន ដើម្បីអភិវឌ្ឍមធ្យោបាយផ្គត់ផ្គង់អគ្គិសនីដោយមិនប្រើខ្សែ។ ក្រុមអ្នកវិទ្យាសាស្ត្រក្នុងគម្រោងនេះបានទទួលជោគជ័យក្នុងការធ្វើតេស្តបាញ់បញ្ជូនអគ្គិសនីក្នុងទម្រង់ម៉ៃក្រូវេវរលកទទឹង (transverse waves) កាលពីឆ្នាំ 2015 និងក្នុងទម្រម៉ៃក្រូវេវរលកបណ្ដោយ (longitudinal waves) កាលពីឆ្នាំ 2018 ក្នុងរយៈចម្ងាយពីប្រហែល 40 ម៉ែត្រ។ នាពេលខាងមុខ ពួកគេនឹងធ្វើតេស្តបាញ់បញ្ជូនអគ្គិសនីក្នុងទម្រម៉ៃក្រូវេវរលកបណ្ដោយពីចម្ងាយចាប់ពី 1 ដល់ 5 គីឡូម៉ែត្រ។

បច្ចុប្បន្ន ក្រុមអ្នកវិទ្យាសាស្ត្រខាងលើកំពុងដាក់គោលដៅធ្វើតេស្តការបាញ់បញ្ជូនអគ្គិសនីពីអវកាសមកកាន់ផែនដីនៅឆ្នាំ 2025។ ពួកគេនឹងប្រើប្រាស់ផ្កាយរណបខ្នាតតូចដើម្បីបាញ់បញ្ជូនអគ្គិសនីមកកាន់ទីតាំងទទួលនៅលើដីដែលមានគម្លាតពីគ្នារាប់រយគីឡូម៉ែត្រ។

រូបភាពបង្ហាញពីការបាញ់បញ្ជូនរលកម៉ៃក្រូវេវអវកាសមកកាន់ស្ថានីយទទួលនៅលើដី

គំនិតស្ដីពីការប្រមូលថាមពលព្រះអាទិត្យក្នុងទីអវកាស ត្រូវបានអ្នកវិទ្យាសាស្ត្រអាម៉េរិកលើកឡើងកាលពីឆ្នាំ 1968។ មធ្យោបាយរបស់ពួកគេគឺការបាញ់បង្ហោះផ្ទាំងសូឡាឡើងទៅកាន់ទីអវកាសដើម្បីផលិតអគ្គិសនីពីកម្ដៅព្រះអាទិត្យនៅលើកម្ពស់ 36,000 គីឡូម៉ែត្រ។ ថាមពលព្រះអាទិត្យត្រូវបានបំប្លែងទៅជារលកម៉ៃក្រូវេវ និងបាញ់បញ្ជូនមកកាន់ស្ថានីយទទួលនៅលើដី រួចបំប្លែងវាមកជាអគ្គិសនីវិញ។ រលកម៉ៃក្រូវេវអាចត្រូវបានបាញ់បញ្ជូនឆ្លងកាត់ពពក និងបង្កើតបានជាប្រភពផ្គត់ផ្គង់អគ្គិសនីដែលមានស្ថិរភាព មិនថាថ្ងៃ ឬយប់ ក្ដៅ ឬភ្លៀង៕

May 29, 2023

កង់កូនកាត់រថយន្តអគ្គិសនី អាចបើកបរក្នុងល្បឿន 48 គីឡូម៉ែត្រ/ម៉ោង

(អង់គ្លេស) – Iris eTrike គឺជាយានជំនិះផ្ទាល់ខ្លួនដែលមានរូបរាងដូចកង់បន្តិច ដូចរថយន្តបន្តិច អាចផ្ទុកអីវ៉ាន់បាន 100 គីឡូក្រាម និងអាចបើកបរក្នុងល្បឿន 48 គីឡូម៉ែត្រក្នុងមួយម៉ោង។

កង់កូនកាត់រថយនុ្តគំរូ Iris eTrike របស់អ្នករចនា និងជាអ្នកជំនួញផ្នែកបច្ចេកវិទ្យា ជនជាតិអង់គ្លេស Grant Sinclair មានកម្លាំងជាង ធៀបនឹងកង់ធម្មតា ធ្វើឱ្យវាមានល្បឿនលឿនជាង។ យាននេះផ្ដល់ផាសុកភាព និងការពារអ្នកបើកបរពីអាកាសធាតុអាក្រក់។ នេះបើតាម Yahoo ចុះផ្សាយកាលពីថ្ងៃទី 27 ឧសភា 2023។

កំណែសម្រាប់ការផលិតរបស់ Iris eTrike ប្រើប្រាស់គ្រោងឆ្អឹងធ្វើពីដែកថែប chromoly, ដងខ្លួនធ្វើពីជ័រកៅស៊ូទន់ polypropylene ដែលគ្របដណ្ដប់ដោយសម្បក polymer, ដំបូលធ្វើពីជ័រទន់ថ្លាមានស្រទាប់ការពារបញ្ហាជ្រាបទឹក, ប្រព័ន្ធជំរុញកម្លាំង 9 លេខ និងកៅអីខ្ពស់។

Iris eTrike ក៏មានប្រព័ន្ធភ្លើង LED គ្រប់គ្រាន់, ប្រព័ន្ធបន្សុទ្ធខ្យល់, កាមេរ៉ាមើលក្រោយ និងប្រព័ន្ធបញ្ចុះកម្ដៅ នាំខ្យល់ដែលបានបន្សុទ្ធចូលមកកាន់កាប៊ីន។

កម្លាំងឈ្នាន់សម្រាប់ធាក់របស់អ្នកបើកបរត្រូវបានផ្ដល់ដោយម៉ូទ័រកម្លាំង 250, 500 ឬ 750 វ៉ាត់ អាចជួយឱ្យបើកបរក្នុងល្បឿន 48 គីឡូម៉ែត្រ/ម៉ោង។ Iris eTrike ប្រើប្រាស់ថ្ម lithium-ion 48 វ៉ាត់ 20 អំពែរម៉ោង អាចធ្វើដំណើរបានជាង 48 គីឡូម៉ែត្រ។

ថ្វីបើមានរូបរាងតូច តែ Iris eTrike មានកន្លែងដាក់អីវ៉ាន់ដែលមានចំណុះ 100 លីត្រ។ អេក្រង់ LED នៅខាងមុខអ្នកបើកបរបង្ហាញទិន្នន័យស្ដីពីល្បឿន គម្លាត់នៃការបើកបរ និងថាមពលថ្ម។ល។

Iris eTrike មានបណ្ដោយ 260 សង់ទីម៉ែត្រ, ទទឹង 94 សង់ទីម៉ែត្រ, កម្ពស់ 128 សង់ទីម៉ែត្រ, ទម្ងន់ 50 គីឡូក្រាម និងមានពណ៌ខ្មៅ ឬប្រាក់។ ក្រុមហ៊ុននៅ Cardiff ប្រទេសអង់គ្លេសរបស់ Grant Sinclair កំពុងទទួលការកក់សម្រាប់ Iris eTrike ហើយគ្រោងនឹងប្រគល់ជូនអតិថិជននៅក្នុងត្រីមាសទីមួយឆ្នាំក្រោយ៕

May 29, 2023

Author: សឿន សំណាង