កងទ័ពកូឡុំប៊ី បានឱ្យដឹងថា សប្ដាហ៍កន្លងពួកគេបានរកឃើញដានថ្មីរបស់កុមារបួននាក់ដែលវង្វេងក្នុងព្រៃក្នុងរយៈពេលជិតមួយខែ ក្រោយពីហេតុការណ៍ធ្លាក់យន្តហោះកាលពីពាក់កណ្ដាល់ខែឧសភា។
កុមារបួននាក់អាយុ 13 ឆ្នាំ, 9 ឆ្នាំ, 4 ឆ្នាំ និង 11 ខែ បានវង្វេងក្នុងព្រៃ បន្ទាប់ពីយន្តហោះពួកគេជិះបានធ្លាក់នៅភាគអាគ្នេយ៍នៃប្រទេសកូឡុំប៊ី ដែលបានបណ្ដាលឱ្យអ្នកបើកបរ មេដឹកនាំជនជាតិដើម និងម្ដាយរបស់ក្មេងទាំងបួននាក់ខាងលើ ត្រូវបាត់បង់ជីវិតកាលពីថ្ងៃទី 15 ឧសភា 2023។
រូបភាពពីផ្កាយរណបបង្ហាញអំពីផ្លូវដែលកុមារទាំងនោះបានដើរឆ្លងកាត់។ កម្លាំងសង្គ្រោះបានរកឃើញវត្ថុមួយចំនួននៅកន្លែងដែលកុមារទាំងនោះបានជ្រក និងផ្លែឈើដែលពួកគេបានហូប។ កាលពីសប្ដាហ៍កន្លង កម្លាំងសង្គ្រោះក៏បានរកឃើញស្បែកជើងមួយគូ និងខោទឹកនោមផងដែរ។
មេបញ្ជាការក្រុមសង្គ្រោះ លោក Pedro Sanchez កាលពីថ្ងៃទី 29 ឧសភា បានឱ្យដឹងថា «យោងទៅតាមអ្វីដែលបានរកឃើញ យើងសន្មតថា ក្មេងទាំងនេះនៅមានជីវិត។ បើសិនពួកគេបានស្លាប់ នឹងងាយរកឃើញ ព្រោះពួកគេលែងផ្លាស់ទី ហើយសុនកជំនាញនឹងហិតដឹងក្លិន»។
![](https://i0.wp.com/lareine.com.kh/wp-content/uploads/2023/05/lareine.com.kh-2023-05-30_11-46-43_144225.jpeg?resize=696%2C522&ssl=1)
ទាហាន និងជនជាតិដើមប្រហែល 200 នាក់ដែលដឹងច្បាស់ភូមិសាស្ត្រ កំពុងតែស្វែងរកនៅក្នុងតំបន់ព្រៃទំហំ 320 គីឡូម៉ែត្រការ៉េ។ Sanchez ឱ្យដឹងថា ពិតជាចម្លែកណាស់នៅពេលកុមារទាំងនេះមិនឈប់ផ្លាស់ទី បើទោះទ័ពអាកាសបានណែនាំឱ្យនៅមួយកន្លែង តាមរយៈការទម្លាក់ក្រដាស់សរសេរជាភាសាអេស្ប៉ាញ និងភាសាជនជាតិដើមនៅមូលដ្ឋានចំនួន 10,000 សន្លឹក ទៅលើតំបន់ព្រៃនោះ។
ក្នុងក្រដាសនោះក៏រួមមានទាំងការណែនាំអំពីរបៀបរក្សាជីវិត អាហារកញ្ចប់ និងទឹកផងដែរ។ យោងតាមលោក Sanchez ក្រុមសង្គ្រោះបានអះអាងថា ពួកគេធ្លាប់ចូលទៅក្បែរកន្លែងរបស់កុមារទាំងនោះក្នុងរង្វង់ 100 ម៉ែត្រ ប៉ុន្តែ ភ្លៀងខ្យល់ខ្លាំង ព្រៃក៏ក្រាស់ ភូមិសាស្ត្រសម្បូរបឹងភក់ បានរារាំងដំណើររបស់ក្រុមសង្គ្រោះ។
![](https://i0.wp.com/lareine.com.kh/wp-content/uploads/2023/05/lareine.com.kh-2023-05-30_11-46-46_164389.webp?resize=696%2C464&ssl=1)
ឧទ្ធម្ភាគចក្ររបស់កងទ័ព និងផ្កាយរណបកំពុងត្រូវបានណែនាំឱ្យស្វែងរកក្នុងតំបន់ដែលមានសត្វសាហាវ។ អ្នកផ្ទះបានឱ្យដឹងថា កុមារីដែលជាបងស្រីបង្អស់ក្នុងចំណោមក្មេងទាំងបួននាក់នោះ មានការយល់ដឹងច្រើនអំពីរបៀបនៃការរក្សាជីវិតនៅក្នុងព្រៃ៕