សឿន សំណាង - La Reine Media

(វីដេអូ)-ថៃសាកល្បងវ៉ាក់សាំងប្រឆាំង COVID-19 នៅលើស្វា ខណៈវ៉ាក់សាំងសម្រាប់សាកល្បងលើមនុស្សក៏កំពុង…

វិទ្យាស្ថានវ៉ាក់សាំងជាតិរបស់ប្រទេសថៃ បានធ្វើការសាកល្បងវ៉ាក់សាំងប្រឆាំង COVID-19 នៅលើសត្វស្វាកន្ទុយវែងចំនួន13ក្បាល និងតាមដានបរិមាណអង្គបដិប្រាណក្នុងរយៈពេល3ខែ។

ក្រុមអ្នកវិទ្យាសាស្ត្រថៃ ចាប់ផ្ដើមសាកល្បងវ៉ាក់សាំង COVID-19 នៅលើសត្វស្វា នៅក្នុងពិសោធន៍ដោយឡែកមួយ។ អ្នកវេជ្ជសាស្ត្របានចាក់ថ្នាំវ៉ាក់សាំងទៅក្នុងរាងកាយរបស់សត្វស្វាកន្ទុយវែងចំនួន13ក្បាល ហើយក្រោយមក ពួកគេនឹងចាប់ផ្ដើមតាមដាន និងវិភាគទៅលើកម្រិត ឬបរិមាណនៃអង្គបដិប្រាណដែលកើតឡើងក្នុងរាងកាយសត្វស្វានៅពេលពួកវាមានផ្ទុកCOVID-19។

សត្វស្វាទាំងនោះនឹងត្រូវបានចាក់វ៉ាក់សាំងCOVID-19 ចំនួនពីរលើកទៀតក្នុងរយៈពេល3ខែនៃការពិសោធនេះ។ ប្រភេទវ៉ាក់សាំងដែលអ្នកវិទ្យាសាស្ត្រថៃយកមកធ្វើតេស្តនេះ គឺមានប្រើប្រាស់ផ្នែកមួយនៃកូដហ្សែនរបស់វីរុសដើម្បីបង្កើតបានជាអង្គបដិប្រាណនៅខាងក្នុងរាងកាយ។

សូមបញ្ជាក់ថា ប្រទេសថៃកំពុងតែអនុវត្តគម្រោងអភិវឌ្ឍវ៉ាក់សាំងមួយចំនួនសម្រាប់ប្រឆាំងនឹងCOVID-19។ ក្រុមអ្នកវិទ្យាសាស្រឱ្យដឹងថា នៅពេលកំពុងសាកល្បងនៅលើសត្វ ពួកគេក៏កំពុងតែត្រៀមវ៉ាក់សាំងសម្រាប់ធ្វើការសាកល្បងនៅលើមនុស្សផងដែរ៕

ប្រភព៖ សារព័ត៌មានបរទេស

May 25, 2020

ចិនរៀបចំផែនការយុទ្ធសាស្ត្រសម្រាប់រយៈពេល5ឆ្នាំខាងមុខ

ផែនការ5ឆ្នាំបន្ទាប់កំពុងត្រូវបានប្រទេសចិនរៀបចំធ្វើឡើងដោយមានការដាក់គោលដៅ “ម្ចាស់ការ និងកាត់បន្ថយការពឹងផ្អែកទៅលើបច្ចេកវិទ្យាសហរដ្ឋអាមេរិក”។

ផែនការរយៈពេល5ឆ្នាំជាលើកទី14របស់ប្រទេសចិន ដែលនឹងដាក់ចេញគោលដៅនយោបាយ និងសេដ្ឋកិច្ចសម្រាប់ដំណាក់កាលឆ្នាំ2021-2025 បង្ហាញអំពីការផ្លាស់ប្ដូរគោលនយោបាយរបស់ទីក្រុងប៉េកាំងក្នុងកាលៈទេសៈប្រទេសចិននិងសហរដ្ឋអាមេរិកកំពុងប្រឈមមុខដាក់គ្នាប្រកបដោយភាពតានតឹងទាក់ទិននឹងបញ្ហាជាច្រើន ក៏ដូចជាបញ្ហាដែលចិនត្រូវប្រឈមនឹងគូប្រជែងផ្សេងៗនៅទូទាំងពិភពលោក។ នេះបើតាមក្រុមអ្នកសិក្សាស្រាវជ្រាវដែលកំពុងចូលរួមរៀបចំផែនការខាងលើ។

កំណែចុងក្រោយរបស់ផែនការនេះនឹងត្រូវបានប្រកាសឱ្យដឹងនៅក្នុងខែមីនា ឆ្នាំ2021 ប៉ុន្តែការវិភាគបឋមបានបង្ហាញថា ប្រទេសចិននឹងបង្កើនភាពម្ចាស់ការក្នុងការអភិវឌ្ឍបច្ចេកវិទ្យា ដើម្បីកាត់បន្ថយការពឹងផ្អែកទៅលើសហរដ្ឋអាមេរិក។

ទន្ទឹមនឹងនោះ ទីក្រុងប៉េកាំងក៏នឹងនៅតែរក្សាគោលនយោបាល “បើកចំហទ្វារ និងរៀបចំរចនាសម្ព័ន្ធឡើងវិញ” ដើម្បីរក្សាតួនាទីជាចំណុចកណ្ដាលរបស់ខ្លួនក្នុងការផ្គត់ផ្គង់ផលិតផលសម្រាប់ពិភពលោក ពិសេសគឺសម្រាប់បណ្ដាប្រទេសនៅអាស៊ី និងអឺរ៉ុប ព្រមទាំងកាត់បន្ថយឥទ្ធិពលនៃ “ហានិភ័យនៃការឃ្លាតឃ្លា” កាន់តែឆ្ងាយពីទីក្រុងវ៉ាស៊ីងតោន។

គំនិតខាងលើនេះត្រូវបានគាំទ្រដោយប្រធានាធិបតីចិន លោក ស៊ី ជីនភីង ផងដែរ។ តាមរយៈផែនការខាងលើនេះ ទីក្រុងប៉េកាំងនឹងអនុវត្តរូបមន្តអភិវឌ្ឍថ្មី “រួមមានទាំងបណ្ដាញសេដ្ឋកិច្ចក្នុងស្រុកទ្រង់ទ្រាយធំ និងបណ្ដាញសេដ្ឋកិច្ចអន្តរជាតិ” ដើម្បីជំនួសឱ្យការពឹងផ្អែកទៅលើតែទីផ្សារក្រៅស្រុក។

បច្ចេកវិទ្យាក៏ជាវិស័យសំខាន់មួយដែលត្រូវបានចិនសង្ឃឹមថានឹងមានភាពអស្ចារ្យជាងនេះនៅក្នុងរយៈពេល5ឆ្នាំទៅមុខ។ ការដែលទីក្រុងវ៉ាស៊ីងតោនកៀបសង្កត់ទៅលើក្រុមហ៊ុន Huawei និងកាត់បន្ថយការនាំចេញផលិតផលបច្ចេកវិទ្យាខ្ពស់ទៅកាន់ប្រទេសចិន ក៏បានជំរុញឱ្យទីក្រុងប៉េកាំងស្វែងរកគ្រប់មធ្យោបាយដើម្បីកាត់បន្ថយការពឹងផ្អែកទៅលើបច្ចេកវិទ្យាបរទេស។

បណ្ដាផែនការ5ឆ្នាំរបស់ប្រទេសចិន ចាប់ពីឆ្នាំ1981 រហូតដល់បច្ចុប្បន្ន គឺសុទ្ធសឹងតែផ្ដល់អាទិភាពទៅលើការអភិវឌ្ឍវិស័យសេដ្ឋកិច្ច ការការពារបរិស្ថាន និងរបបសន្តិសុខសង្គម។ ទាំងនេះគឺជាគ្រឹះសម្រាប់ផែនការ5ឆ្នាំចំនួនរាប់រយនៅថ្នាក់ខេត្ត ក្រុង និងវិស័យឧស្សាហកម្ម ដើម្បីធានាឱ្យបាននូវការរីកចម្រើនស្របគ្នានៅទូទាំងប្រទេស។

ក្នុងផែនការ5ឆ្នាំ ដំណាក់កាលឆ្នាំ2016-2020 ប្រទេសចិនបានដាក់ចេញគោលដៅសំខាន់ចំនួន25 ក្នុងនោះមានគោលដៅចំនួន13ត្រូវបានកំណត់ឱ្យសម្រេចបានជាដាច់ខាត ដូចជាកាត់បន្ថយភាពក្រីក្រ និងធានាឱ្យមានដីគ្រប់គ្រាន់សម្រាប់បង្កបង្កើនផល។

លទ្ធផលនៃការវាយតម្លៃទៅលើផែនការ5ឆ្នាំ សម្រាប់ឆ្នាំ2016-2020 បានបង្ហាញថា មានគោលដៅចំនួន4បានយឺតយ៉ាវ ក្នុងនោះមានថវិកាសម្រាប់ការអភិវឌ្ឍ និងស្រាវជ្រាវបច្ចេកវិទ្យាថ្មី ក៏ដូចជាគុណភាពទឹក។ល។

មេរោគរាតត្បាតCOVID-19 ក៏បានគំរាមកំហែងដល់គោលដៅបង្កើនទំហំសេដ្ឋកិច្ចទ្វេដងដែលជាគោលដៅសំខាន់បំផុតនៅក្នុងផែនការចាប់ពីឆ្នាំ2010-2020 បណ្ដាលឱ្យសេដ្ឋកិច្ចចិនធ្លាក់ចុះ6.8%ក្នុងត្រីមាសទីមួយនៃឆ្នាំ2020 ព្រមទាំងបានកាត់ផ្ដាច់ក្ដីសង្ឃឹមចំពោះកំណើនប្រាក់ចំណូលជាអប្បបរមា 6.5% សម្រាប់មនុស្សម្នាក់៕

ប្រភព៖ សារព័ត៌មានបរទេស

May 25, 2020

ពលរដ្ឋអាមេរិកាំង នាំគ្នាហែទៅលេងសមុទ្រ ថ្ងៃឈប់សម្រាកយ៉ាងកកកុញ មិនខ្វល់នឹងចំនួនស្លាប់ដោយសារវីរុសកូវីដ-19 ឡើងដល់សែននាក់

កាលពីថ្ងៃទី24 ឧសភា ម្សិលមិញ ទីភ្នាក់ងារព័ត៌មានAP បានរាយការណ៍ពីបរិយាកាសនៃការសម្រាកលម្ហែរបស់ពលរដ្ឋអាមេរិកាំង ក្នុងអំឡុងថ្ងៃឈប់សម្រាកចុងសប្ដាហ៍ Memorial Day ត្រូវនឹងថ្ងៃដែលបង្ហាញពីសញ្ញានៃការឈានចូលដល់រដូវក្ដៅ យ៉ាងមិនទាន់ផ្លូវការនៅក្នុងសហរដ្ឋអាមេរិកថា នៅតាមឆ្នេរសមុទ្រជាច្រើនកន្លែង ពេញទៅដោយមនុស្សម្នាចំនួនដ៏ច្រើន ដែលទោះជាសហរដ្ឋអាមេរិកនៅតែមានចំនួនអ្នកឆ្លងមេរោគកូវីដ-19 កើនឡើងជារឿយៗ និងមានចំនួនអ្នកស្លាប់ឡើងជិតដល់ 100,000នាក់ហើយក៏ដោយ។

បណ្ដាអាជ្ញាធរតំបន់ និងអង្គភាពការពារតាមឆ្នេរសមុទ្រ ត្រូវនៅចាំដាស់តឿនប្រជាជនឱ្យរក្សាគម្លាតរវាងគ្នានឹងគ្នា តែក៏ជារឿងមួយ ពិបាកខ្លាំងណាស់ដែរ ដូចជានៅឆ្នេរ ដេយ៍ថូណា ប៊ីជឆ៍ រដ្ឋហ្វ្លរីដាជាដើម នៅទីនោះពេញទៅដោយមនុស្សម្នា មានទាំងធ្វើផារធីជប់លៀងនៅលើឆ្នេរសមុទ្រ ដែលមានមនុស្សចូលរួមជាង 200នាក់ និងថែមទាំងនៅពេលព្រលប់ មានកើតហេតុប៉ះទង្គិចគ្នា មានស្នូរកាំភ្លើងលាន់ឮឡើងនៅក្នុងពិធី និងមានមនុស្សរងរបួស ត្រូវបញ្ជូនទៅមន្ទីរពេទ្យទៀតផង។

People visit Pensacola Beach in Pensacola, Fla., Saturday, May 23, 2020, during the coronavirus pandemic. (David Grunfeld/The Advocate via AP)

ដូចគ្នានឹងទីក្រុងធែមប៉ា រដ្ឋហ្វ្លរីដាដដែលដែរ នៅទីនោះមានប្រជាជនចំនួនដ៏ច្រើនបាននាំគ្នាហែទៅលេងមាត់សមុទ្រ រហូតដល់កន្លែងចតរថយន្ត ពេញណែន។ ចំពោះស្ថានការណ៍នេះ ធ្វើឱ្យលោកស្រីវេជ្ជបណ្ឌិត ដេប្រាហ៍ ប៊ើកស៍ អ្នកទំនាក់ទំនងក្រុមប្រតិបត្តិការទប់ទល់នឹងមេរោគវីរុសកូរ៉ូណាប្រភេទថ្មី ប្រចាំសេតវិមាន និយាយថា ជារឿងដែលគួរឱ្យវិតក្កកង្វល់ជាទីបំផុត។

People enjoy Pensacola Beach in Pensacola, Fla., Saturday, May 23, 2020, during the coronavirus pandemic. (David Grunfeld/The Advocate via AP)

លោកស្រីវេជ្ជបណ្ឌិត ថ្លែងថា “យើងចង់ឱ្យច្បាស់លាស់ថា ការរក្សាគម្លាតរវាងគ្នានឹងគ្នា គឺជារឿងសំខាន់ខ្លាំងណាស់ បើអ្នកមិនអាចរក្សាគម្លាតឆ្ងាយពីគ្នាបាន ហើយចេញក្រៅផ្ទះនោះ យ៉ាងហោចណាស់ ក៏ត្រូវពាក់ម៉ាស់អនាម័យការពារដែរ”។

Revelers celebrate Memorial Day weekend at Osage Beach of the Lake of the Ozarks, Missouri, U.S., May 23, 2020 in this screen grab taken from social media video and obtained by Reuters on May 24, 2020. Twitter/Lawler50/via REUTERS

នៅឯទីក្រុងនីវយ៉ក ស្ថានការណ៍ការឆ្លងរាលដាលរបស់មេរោគកូវីដ-19 បានធូរស្រាលខ្លះហើយ មានមនុស្សម្នាចេញមកគេងសំដិលថ្ងៃ នៅក្នុងសួនច្បារសាធារណៈ ដែលមានគូសរង្វង់ទុកគម្លាតឆ្ងាយពីគ្នា ដោយអ្នកដែលមកទីនោះបាននាំគ្នានិយាយថា មានអារម្មណ៍ល្អ ដែលបានចេញមកទទួលយកខ្យល់អាកាសក្រៅផ្ទះបែបនេះខ្លះ។

People in Domino Park are seen in circles painted as guidelines for social distancing during the outbreak of the coronavirus disease (COVID-19) in Brooklyn, New York City, U.S., May 24, 2020. REUTERS/Andrew Kelly

សម្រាប់សហរដ្ឋអាមេរិក មានអ្នកឆ្លងមេរោគកូរ៉ូណាប្រភេទថ្មីនេះរួចហើយចំនួន 1.6លាននាក់ មានអ្នកស្លាប់ចូលជិតដល់ 1សែននាក់ហើយ បើប្រៀបធៀបនឹងទ្វីបអឺរ៉ុបទាំងមូល ដែលមានអ្នកស្លាប់ 169,000នាក់។ នីវយ៉ក ថាមស៍ សាព័ត៌មានដ៏មានឥទ្ធិពលរបស់សហរដ្ឋអាមេរិក បានចំណាយផ្ទៃនៅលើទំព័រ1 បោះពុម្ពផ្សាយពីបញ្ជីឈ្មោះអ្នកស្លាប់នៅក្នុងសហរដ្ឋអាមេរិក ព្រមទាំងដាក់ចំណងជើងធំៗថា “ការបាត់បង់ដែលមិនអាចគណនាបាន”។

The cover of The New York Times, featuring a headline regarding the approaching 100,000th death of the coronavirus disease (COVID-19), is seen for sale in Manhattan, New York City, U.S., May 24, 2020. REUTERS/Andrew Kelly

ចំណែកលោកប្រធានាធិបតីដូណាល់ ត្រាំ វិញ បានចំណាយពេលវេលានៃថ្ងៃឈប់សម្រាក ទៅវាយកូនហ្គោល ជាប់ៗគ្នា 2ថ្ងៃនៅឯក្លិបផ្ទាល់ខ្លួនរបស់លោក នៅក្នុងរដ្ឋវើជីនៀ ក្រោយពីមិនបានលេងកីឡានេះជាយូរមកហើយ។

Second to left: U.S. President Donald Trump participates in a round of golf amid the coronavirus disease (COVID-19) outbreak, in Sterling, Virginia, U.S., May 24, 2020. REUTERS/Tom Brenner

កាលពីពេលមុននេះ លោកត្រាំ បានបង្ហើបឱ្យដឹងថា លោកខ្លួនឯងបានលេបថ្នាំ ហាយដ្រុកស៊ី ក្លូរ៉ូគីន និងហ្ស៊ិង ដើម្បីការពារមេរោគវីរុសមួយនេះ ដែលធ្វើឱ្យកើតមានការរិះគន់យ៉ាងសន្ធឹកថា តើវាជាវិធីដែលមានសុវត្ថិភាពដែរឬ? ព្រោះថ្នាំមួយនេះ ប្រើសម្រាប់តែការព្យាបាលជំងឺគ្រុនចាញ់(ម៉ាឡារៀ) និងនៅមិនទាន់ការធានារ៉ាប់រងថា វាអាចការពារមេរោគកូវីដ-19 បាននៅឡើយ៕

ប្រភព៖ សារព័ត៌មានបរទេស

May 25, 2020

ចិនប្រកាសថានឹងអនុម័ត ហើយអនុវត្តច្បាប់សន្តិសុខហុងកុង “ឱ្យទាល់តែបាន”

ឧបនាយករដ្ឋមន្ត្រីចិន លោក Han Zheng បានថ្លែងប្រាប់ប្រតិភូហុងកុងដែលបានចូលរួមក្នុងកិច្ចប្រជុំរបស់សភាជាតិថា ទីក្រុងប៉េកាំងនឹង “ធ្វើឱ្យទាល់តែបាន” នូវច្បាប់សន្តិសុខហុងកុង។

លោក Han Zheng មេដឹកនាំចិនដែលទទួលបន្ទុកគ្រប់គ្រងបញ្ហាហុងកុង និងម៉ាកៅ បានជួបពិភាក្សាជាមួយប្រតិភូមកពីហុងកុងនៅក្នុងកិច្ចប្រជុំសភានៅមហាសាលប្រជាជន (Great Hall of the People) នារដ្ឋធានីប៉េកាំងកាលពីម្សិលមិញ(24ឧសភា)។

Wong Yuk-shan អនុប្រធាននៃប្រតិភូហុងកុងដែលបានចូលរួមក្នុងកិច្ចប្រជុំសភាចិន បានដកស្រង់សម្ដីរបស់ឧបនាយករដ្ឋមន្ត្រីចិន លោក Han Zheng បានឱ្យដឹងថា “កុំវាយតម្លៃទាបចំពោះការប្ដេជ្ញាចិត្តរបស់ទីក្រុងប៉េកាំងឱ្យសោះ។ នៅពេលសេចក្ដីសម្រេចបានដាក់ចេញ យើងនឹងអនុវត្តវាឱ្យខាងតែបាន”។ លោក Han Zheng សង្កត់ធ្ងន់ថា សេចក្ដីសម្រេចត្រូវបានលើកឡើងក្រោយពីទីក្រុងប៉េកាំងបានពិចារណាយ៉ាងល្អិតល្អន់ ដោយគិតទៅលើផលប្រយោជន៍យូរអង្វែងរបស់ហុងកុង ហើយសំខាន់ជាងនេះ គឺដើម្បីផលប្រយោជន៍ប្រទេសជាតិទាំងមូល។

សេចក្ដីប្រកាសខាងលើត្រូវបានឧបនាយករដ្ឋមន្ត្រីចិនលើកឡើងក្នុងគ្រាដែលសាធារណមតិកំពុងផ្ដោតទៅលើដែនដីពិសេស នៅប៉ុន្មានម៉ោងមុនការប៉ះទង្គិចគ្នារវាងក្រុមប៉ូលិសហុងកុង និងក្រុមបាតកររាប់ពាន់នាក់ដែលតវ៉ាប្រឆាំងនឹងសេចក្ដីព្រាងច្បាប់សន្តិសុខហុងកុងនេះ។

លោក Han Zheng ក៏បានធានាថា “ប្រទេសមួយ របបពីរ” គឺជាច្បាប់មូលដ្ឋានដើម្បីកែលម្អទំនាក់ទំនងរវាងទីក្រុងហុងកុង និងរដ្ឋាភិបាលចិន ក្នុងនោះទីក្រុងប៉េកាំងនឹងអនុវត្តពេញលេញនូវគោលនយោបាយនានា និងគោរពដល់គោលការណ៍ “អ្នកហុងកុងគ្រប់គ្រងអ្នកហុងកុង” ផងដែរ។

សេចក្ដីព្រាងច្បាប់សន្តិសុខហុងកុងនេះ តាមគម្រោងនឹងត្រូវអនុម័តជាផ្លូវការនៅថ្ងៃទៅ28ឧសភាខាងមុខ ដែលជាថ្ងៃបិទបញ្ចប់កិច្ចប្រជុំប្រចាំឆ្នាំរបស់សភាចិន។ គណៈកម្មាធិការអចិន្ត្រៃយ៍នៃសភាចិន បានទទួលសិទ្ធិក្នុងការតាក់តែងសេចក្ដីព្រាងច្បាប់លម្អិត និងអនុវត្តនៅទីក្រុងហុងកុងដោយមិនចាំបាច់ឆ្លងកាត់សភានីតិប្បញ្ញត្តិរបស់ហុងកុងនោះឡើយ។ សភានីតិប្បញ្ញត្តិនឹងពិភាក្សាអំពីសេចក្ដីព្រាងច្បាប់សន្តិសុខហុងកុងនេះនៅថ្ងៃទី27ឧសភា៕

ប្រភព៖ សារព័ត៌មានបរទេស

May 25, 2020

កូរ៉េខាងជើង ពិភាក្សាគ្នា លើកកម្ពស់ការការពារសង្គ្រាមនុយក្លេអ៊ែរ ក្រោយមានដំណឹងថា សហរដ្ឋត្រៀមសាកល្បងនុយក្លែអ៊ែរ

ទីភ្នាក់ងារព័ត៌មានរ៉យទ័រ និងAFP បានរាយការណ៍ថា កាលពីថ្ងៃទី24 ឧសភា ទីភ្នាក់ងារព័ត៌មានមជ្ឈិម KCNA របស់ប្រទេសកូរ៉េខាងជើង បានរាយការណ៍ថា លោក គីម ជុង អ៊ុន មេដឹកនាំកូរ៉េខាងជើង បានធ្វើជាអធិបតីក្នុងកិច្ចប្រជុំរបស់កងទ័ព ដើម្បីពិភាក្សាពាក់ព័ន្ធនឹងនយោបាយថ្មីរបស់ប្រទេសកូរ៉េខាងជើង ក្នុងការបង្កើនសមត្ថភាពផ្នែកនុយក្លេអ៊ែររបស់ខ្លួន លើកកម្ពស់ការការពារសង្គ្រាមនុយក្លេអ៊ែរ ក្នុងខណៈដែលការចរចាជាមួយសហរដ្ឋអាមេរិក ដើម្បីបញ្ឈប់កម្មវិធីនុយក្លេអ៊ែររបស់កូរ៉េខាងជើង បានជាប់គាំងកាលពីពេលកន្លងមក។

ព័ត៌មានបានបញ្ជាក់ថា កិច្ចប្រជុំគណៈកម្មាធិការយោធាមជ្ឈិម របស់បក្សពលករកូរ៉េ អាចនិយាយបានថា ជាការបង្ហាញខ្លួនដល់សាធារណជន ជាលើកដំបូងក្នុងជុំ 3សប្ដាហ៍ របស់លោក គីម ជុង អ៊ុន ដែលមិនសូវបានបង្ហាញវត្តមានញឹកញាប់ប៉ុន្មាន ក្នុងអំឡុងពេល 2ខែកន្លងទៅ ក្រោមក្ដីបារម្ភកង្វល់ ពាក់ព័ន្ធនឹងការឆ្លងរាលដាលរបស់មេរោគកូវីដ-19 និងមានការលើកឡើងថា លោក គីម អាចនឹងឈឺធ្ងន់ទៀតផង។

AFP បានរាយការណ៍ថា កិច្ចប្រជុំនោះ បានកើតឡើង ក្រោយពីចុងសប្ដាហ៍កន្លងទៅ សារព័ត៌មានរបស់សហរដ្ឋអាមេរិក បានរាយការណ៍ថា រដ្ឋបាលសហរដ្ឋអាមេរិក ក្រោមការដឹកនាំរបស់លោកប្រធានាធិបតី ដូណាល់ ត្រាំ បានពិភាក្សាគ្នាថា សហរដ្ឋអាមេរិកនឹងធ្វើការសាកល្បងនុយក្លេអ៊ែរ និងកំណត់យុទ្ធសាស្ត្ររបស់កងទ័ពជាថ្មី ក្នុងអំឡុងពេលច្រើនសិបឆ្នាំកន្លងមកនេះ។

KCNA បានរាយការណ៍ថា កិច្ចប្រជុំលើកនេះ គឺជាការពិភាក្សាគ្នា ដើម្បីលើកកម្ពស់កងទ័ព និងរិះរកវិធីគ្រប់គ្រងការឈ្លានពានពីកងកម្លាំងរបស់សត្រូវ រួមទាំងការចាត់តាំងគោលនយោបាយថ្មី ដើម្បីលើកកម្ពស់ការការពារសង្គ្រាមនុយក្លេអ៊ែរ និងកំណត់កលយុទ្ធរបស់កងទ័ព ឱ្យស្ថិតក្នុងការប្រុងជើងការកម្រិតខ្ពស់បំផុត។

យ៉ាងណាក៏ដោយ រូបភាពនៅក្នុងសារព័ត៌មាន រ៉ូដុង ស៊ីនមុន របស់កូរ៉េខាងជើង ដែលបានផ្សព្វផ្សាយ មិនបង្ហាញថា មាននរណាម្នាក់ពាក់ម៉ាស់អនាម័យការពារការឆ្លងមេរោគវីរុសឡើយ ដោយទាំងអស់នេះ រដ្ឋបាលកូរ៉េខាងជើង បានអះអាងថា មិនមានអ្នកជំងឺកូវីដ-19 ឡើយនៅក្នុងប្រទេសរបស់ខ្លួន តែអ្នកជំនាញការមិនជឿថា នេះជាការពិតឡើយ៕

ប្រភព៖ សាព័ត៌មានបរទេស

May 25, 2020

ចិនថា សហរដ្ឋអាមេរិកកំពុងរុញសម្ព័ន្ធភាពឱ្យចូលឆ្ពោះទៅរក “មាត់ជ្រោះនៃសង្គ្រាមត្រជាក់ជាថ្មី”

លោក វ៉ាង ដែលមានតំណែងបន្ថែមជា មន្ត្រីនៃរដ្ឋ(state Councillor)ដែលតាមប្រព័ន្ធឋានានុក្រមរបស់ចិន មានឋានៈស្មើនឹងឧបនាយករដ្ឋមន្ត្រីនោះ បានថ្លែងថា សហរដ្ឋអាមេរិកកំពុងមានផ្ទុកមេរោគ “វីរុសខាងនយោបាយ” ដែលកំពុងចម្លងទៅទូទាំងប្រទេស ដែលបង្ហាញអាការដោយការជំរុញឱ្យពួកបុគ្គលខាងនយោបាយក្នុងប្រទេស ចាំតែវាយប្រហារចិនជាបន្តបន្ទាប់ ឥតស្រាកស្រាន្ត។

“វីរុសខាងនយោបាយនេះ ប្រើឱកាស គ្រប់ៗឱកាស ដើម្បីវាយប្រហារ និងលាបពណ៌ចិន។ អ្នកនយោបាយមួយចំនួន ដល់ថ្នាក់លែងរវីរវល់ចំពោះរឿងពិតកាលពីដំបូងៗទាំងឡាយ និងគូសវាសច្នៃប្រឌិត តែងរឿងកុហកផ្សេងៗជាច្រើន ដើម្បីចាត់ការប្រទេសចិន រួមទាំងរៀបផែនការឧបាយកល បែបទ្រឹស្ដីសមគំនិតដ៏ច្រើនលើសលប់”

លោក វ៉ាង បានប្រាប់ទៅក្រុមអ្នកយកព័ត៌មានក្នុងអំឡុងការថ្លែងការណ៍ ក្នុងឱកាសការប្រជុំពេញអង្គនៃសភាប្រជាជនចិន(រដ្ឋសភាចិន) ដែលជាធម្មតាតែងរៀបចំឡើង 1ឆ្នាំម្ដង និងប្រើរយៈពេលប្រមាណ 1សប្ដាហ៍នោះថា “វាធ្វើឱ្យយើងចាប់អារម្មណ៍មើលឃើញថា មានក្រុមកម្លាំងខាងនយោបាយជាច្រើនក្រុមនៅក្នុងសហរដ្ឋអាមេរិក កំពុងចាប់យកសម្ព័ន្ធភាពចិន-អាមេរិក ទៅធ្វើជាចំណាប់ខ្មាំង និងកំពុងរុញច្រានប្រទេសទាំង2 របស់យើង ឱ្យចូលឆ្ពោះទៅរកមាត់ជ្រោះនៃសង្គ្រាមត្រជាក់ជាថ្មី”

លោក វ់ាង មិនបានបញ្ជាក់ថា “ក្រុមកម្លាំង” ដែលលោកបានលើកឡើងនោះជាអ្វីឡើយ តែតាមរយៈរឿងរ៉ាវកន្លងមក លោកប្រធានាធិបតីនៃសហរដ្ឋអាមេរិក ដូណាល់ ត្រាំ រួមទាំងរដ្ឋមន្ត្រីការបរទេស ម៉ៃក៍ ប៉ុមប៉េអូ ផងនោះ គឺជាអ្នកដឹកនាំការរិះគន់វាយប្រហារប្រទេសចិន មានតាំងពីចោទប្រកាន់ក្នុងលក្ខណៈបង្ហាញពីទ្រឹស្ដីសមគំនិត ដោយមិនដែលបានបង្ហាញភ័ស្តុតាងអះអាងឡើយថា វីរុសនេះចេញមកពីបន្ទប់ពិសោធន៍ក្នុងទីក្រុងវូហានរបស់ចិន រហូតទៅដល់ការថ្កោលទោសថា ក្រុងប៉េកាំងលាក់បាំងព័ត៌មានក្នុងអំឡុងពេលដំបូងៗ ដែលកើតការឆ្លងរាលដាល ដែលរហូតមកដល់ពេលនេះជាហេតុធ្វើឱ្យមានមនុស្សស្លាប់ជាង 340,000នាក់ និងសេដ្ឋកិច្ចធ្លាក់ក្នុងសភាពយ៉ាប់យ៉ឺនទាំងអស់គ្នា។

ទោះជាសំឡេងរិះគន់ទាំងអស់នេះរបស់ក្រុងវ៉ាស៊ីនតោន ត្រូវបានគេតាមដានសម្លឹងមើលយ៉ាងទូលំទូលាយនៅក្នុងសហរដ្ឋអាមេរិកថា ជាការព្យាយាមរបស់លោកប្រធានាធិបតី ត្រាំ ក្នុងការបង្វែរចំណាប់អារម្មណ៍ចេញពីកំហុសឆ្គង និងការបរាជ័យរបស់សេតវិមានខ្លួនឯង ក្នុងការទប់ទល់នឹងមេរោគកូវីដ-19 រួមទាំងការរំពឹងទុក ក្នុងការរកសំឡេងឆ្នោតចេញពីអារម្មណ៍នាពេលបច្ចុប្បន្នរបស់ពលរដ្ឋអាមេរិកាំង ដែលផូលធ្វើប្រជាមតិ បានចង្អុលបង្ហាញថា សញ្ញាក្នុងការមើលប្រទេសចិនក្នុងន័យអវិជ្ជមាន បានកើនឡើងច្រើនក៏ដោយ។

នៅក្នុងសេចក្ដីថ្លែងការណ៍លើកនេះ លោកវ៉ាង មើលទៅហាក់ដូចជាវាយសំពងទៅលើសហរដ្ឋអាមេរិក ដែលនៅតែត្រូវរើបម្រះយ៉ាងខ្លាំងក្លាក្នុងការគ្រប់គ្រងវីរុសកូវីដ-19 ឱ្យស្ថិតក្នុងកណ្ដាប់ដៃឱ្យបាន ខណៈដែលចំនួនអ្នកឆ្លង និងចំនួនអ្នកស្លាប់ដោយសារមេរោគមួយនេះនៅក្នុងប្រទេសអាមេរិក សុទ្ធតែជាប់លេខ1 លើពិភពលោកទាំងអស់។

លោក វ៉ាង ថ្លែងថា “ខ្ញុំសំណូមពរដល់សហរដ្ឋអាមេរិក ឱ្យបញ្ឈប់ការបំផ្លាញពេលវេលាដោយឥតប្រយោជន៍នេះទៅ និងបញ្ឈប់ការបណ្ដោយឱ្យជីវិតដ៏មានតម្លៃរបស់មនុស្សលោក ត្រូវបាត់បង់ដោយទទេៗ”

លោកបានបន្តទៀតថា ចិន “បើកទូលាយ” សម្រាប់ការរួមសហការលំដាប់អន្តរជាតិលើផ្នែកវិទ្យាសាស្ត្រ ដើម្បីបញ្ជាក់បង្ហាញពីដើមកំណើតរបស់មេរោគវីរុសកូរ៉ូណាប្រភេទថ្មីនេះ តែលោកបានបញ្ជាក់ថា ការស៊ើបអង្កេតណាមួយក្នុងរឿងនេះ ត្រូវតែ “គ្មានការជ្រៀតជ្រែកខាងនយោបាយ” ត្រូវអាងលើវិទ្យាសាស្ត្រ និងដឹកនាំដោយអង្គការសុខភាពពិភពលោក។

លោក វ៉ាង បានបញ្ជាក់ច្បាស់ថា “បុគ្គលក្នុងពិភពនយោបាយមួយចំនួននៅក្នុងសហរដ្ឋអាមេរិក ប្រញាប់វាយត្រាអះអាងពីវីរុសមួយនេះ និងព្យាយាមធ្វើឱ្យដើមកំណើតនៃប្រភពរបស់វា ក្លាយជារឿងនយោបាយ ដោយការវាយត្រាបាបទម្លាក់កំហុសលើប្រទេសចិន”។ មន្ត្រីនៃរដ្ឋ និងជារដ្ឋមន្ត្រីការបរទេសនៃប្រទេសចិន បានប្រាប់ ព្រមទាំងបន្ថែមទៀតថា ការស៊ើបអង្កេតណាមួយក៏ដោយ របស់អន្តរជាតិចំពោះរឿងនេះ នឹងត្រូវ “ផ្ទុយនឹងការសន្និដ្ឋានទុកជាមុនថា អ្នកណាបានធ្វើខុស”។

ក្រៅពីរឿងវីរុសកូរ៉ូណាហើយ ការដែលចិនបានលើកឡើងពីសេចក្ដីព្រាងច្បាប់ថ្មី ដាក់ជូនសភាប្រជាជនចិន កាលពីថ្ងៃសុក្រ(ទី22 ឧសភា) ដែលមានខ្លឹមសារបញ្ជាឱ្យប្រើច្បាប់សន្តិសុខជាតិនៅក្នុងទីក្រុងហុងកុងនោះ ក៏កំពុងត្រូវបានសហរដ្ឋអាមេរិក និងប្រទេសលោកខាងលិចថ្កោលទោសដែរ ដោយបានប្រាប់ថា មានចេតនាក្នុងការប្រើច្បាប់នេះមកបង្ក្រាបដំណើរការទាមទារប្រជាធិបតេយ្យ ក្នុងតំបន់គ្រប់គ្រងពិសេសរបស់ចិនមួយនេះ។

តែលោក វ៉ាង បានថ្លែងការពារផែនការនេះ ដោយបានអះអាងថា ត្រូវតែនាំយកច្បាប់មួយនេះមកប្រើប្រាស់ “យ៉ាងគ្មានការស្ទាក់ស្ទើរ សូម្បីតែបន្តិច” ព្រមទាំងបានបន្ថែមថា ការតវ៉ាទាមទារដែលកំពុងដំណើរការអស់ជាច្រើនខែ និងតែងតែកើតមានអំពើហិង្សានៅក្នុងទីក្រុងហុងកុងកាលពីឆ្នាំកន្លងទៅ គឺដើម្បីប្រឆាំងនឹងឥទ្ធិពលរបស់ចិនលើមជ្ឈមណ្ឌលកណ្ដាលខាងហិរញ្ញវត្ថុមួយនេះ និងបានបង្កឱ្យកើត “គ្រោះថ្នាក់យ៉ាងធ្ងន់ធ្ងរដល់សន្តិសុខ និងស្ថិរភាពរបស់ប្រទេសចិន”៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 25, 2020

សេតវិមាននឹងដាក់ទណ្ឌកម្មចិន ព្រោះតែ “សេចក្ដីព្រាងច្បាប់សន្តិសុខហុងកុង”

សេតវិមានបានព្រមានថា សេចក្ដីព្រាងច្បាប់សន្តិសុខហុងកុងអាចនាំឱ្យមានការដាក់ទណ្ឌកម្មពីសហរដ្ឋអាមេរិក ព្រោះច្បាប់នេះនឹងគំរាមកំហែងដល់ស្ថានភាពហិរញ្ញវត្ថុរបស់ទីក្រុងហុងកុង។

ទីប្រឹក្សាសន្តិសុខជាតិអាមេរិកាំង លោក Robert O’Brien បានថ្លែងប្រាប់ NBC កាលពីថ្ងៃទី24កន្លងទៅថា “ជាមូលដ្ឋាន ជាមួយនឹងច្បាប់នេះ ប្រទេសចិននឹងគ្រប់គ្រងហុងកុងទាំងមូល។ ហើយបើសិនពួកគេធ្វើដូច្នេះ រដ្ឋមន្ត្រីការបរទេស Mike Pompeo អាចនឹងមិនទទួលស្គាល់ហុងកុងថានៅតែរក្សាសិទ្ធិគ្រប់គ្រងដោយស្វ័យភាពខ្ពស់ទៀតនោះទេ ហើយអាចនឹងមានវិធានការដាក់ទណ្ឌកម្មទៅលើទីក្រុងហុង និងប្រទេសចិនដីគោក”។

មន្ត្រីអាមេរិកាំងបានឱ្យដឹងថា ច្បាប់សន្តិសុខហុងកុង នៅពេលត្រូវបានដាក់ជាធរមាន វានឹងកាត់ផ្ដាច់សិទ្ធិគ្រប់គ្រងដោយស្វ័យភាព ព្រមទាំងបង្កការខូចខាតដល់សេដ្ឋកិច្ចហុងកុង និងប្រទេសចិនដីគោក។ លោក Robert O’Brien ថ្លែងថា ច្បាប់ថ្មីនេះ អាចបង្កគ្រោះថ្នាក់ដល់ស្ថានភាពពិសេសរបស់ទីក្រុងហុងកុងនៅក្នុងច្បាប់សហរដ្ឋអាមេរិក ដែលជាមូលដ្ឋានមួយបានជួយឱ្យហុងកុងរក្សាតួនាទីជាមជ្ឈមណ្ឌលពាណិជ្ជកម្មពិភពលោកនាពេលកន្លងទៅនេះ។

លោក Robert O’Brien សង្កត់ធ្ងន់ថា “វាពិតជាពិបាកមើល នៅពេលឃើញហុងកុងនៅតែជាមជ្ឈមណ្ឌលហិរញ្ញវត្ថុរបស់ទ្វីបអាស៊ី ប្រសិនជាប្រទេសចិនបានចូលមកគ្រប់គ្រង។ ក្រុមហ៊ុនធំៗក្នុងពិភពលោកនឹងមិនមានមូលហេតុអ្វីដែលធ្វើឱ្យពួកគេនៅទីនោះទៀតនោះទេ។ មូលហេតុសំខាន់មួយដែលនាំឱ្យពួកគេមកកាន់ទីក្រុងហុងកុង នោះគឺទីក្រុងនេះមានការគោរពច្បាប់បានល្អ និងមានប្រព័ន្ធគ្រប់គ្រងជំនួញបែបសេរី ប្រព័ន្ធមូលធននិយម ប្រជាធិបតេយ្យ និងមានការបោះឆ្នោតត្រឹមត្រូវ។ បើសិនជាទាំងអស់នេះត្រូវបាត់បង់ ខ្ញុំមិនប្រាកដថា ទីក្រុងនេះអាចរក្សាសហគមន៍ហិរញ្ញវត្ថុឱ្យនៅទីនេះទៀតនោះឡើយ”។

ទោះជាយ៉ាងណាក៏ដោយ ទីក្រុងប៉េកាំងបានអះអាងថា សេចក្ដីព្រាងច្បាប់នេះ ជាក់ស្ដែងគឺដើម្បីកែលម្អគោលការណ៍ “ប្រទេសមួយ របបពីរ” តែប៉ុណ្ណោះ ហើយវានឹងផ្ដល់ផលប្រយោជន៍ និងគាំទ្រដល់ការរីកចម្រើននៃទីក្រុងហុងកុង។ ប្រធានប្រតិបត្តិទីក្រុងហុងកុង លោកស្រី Carrie Lam បានប្រកាសថា នឹង “សហការគ្រប់វិស័យ” ជាមួយសភាចិន ដើម្បីសម្រេចបានច្បាប់ថ្មីនេះ។ លោកស្រីបន្តថា ច្បាប់សន្តិសុខហុងកុងនេះនឹងមិនប៉ះពាល់ដល់សិទ្ធិ សេរីភាព និងភាពឯករាជ្យនៃរដ្ឋធម្មនុញ្ញរបស់តំបន់ពិសេសនេះនោះទេ៕

ប្រភព៖ សារព័ត៌មានបរទេស

May 25, 2020

សេចក្ដីព្រាងច្បាប់សន្តិសុខហុងកុង! ពលរដ្ឋក្នុងស្រុកធ្វើបាតុកម្ម ខណៈតំណាងរាស្ត្រជាង20ប្រទេសជំទាស់

តំណាងរាស្ត្រជាង200នាក់មកពីប្រទេសចំនួន23ក្នុងពិភពលោក បានចេញសេចក្ដីប្រកាសរួម ថ្កោលទោសរដ្ឋាភិបាលចិនដែលបានធ្វើសេចក្ដីព្រាងច្បាប់សន្តិសុខហុងកុង ខណៈដែលពលរដ្ឋរាប់ពាន់នាក់នៅទីក្រុងនេះនាំគ្នាចេញតវ៉ា។

នៅក្នុងសេចក្ដីប្រកាសរួមមួយកាលពីម្សិលមិញ ក្រុមតំណាងរាស្ត្របានសម្ដែងការព្រួយបារម្ភយ៉ាងជ្រាលជ្រៅចំពោះការដែលទីក្រុងប៉េកាំង “ស្នើឱ្យមានច្បាប់សន្តិសុខដោយឯកតោភាគី” សម្រាប់ទីក្រុងហុងកុង។ “នេះគឺជាការវាយលុកគ្រប់ច្រកល្ហកទៅលើសិទ្ធិគ្រប់គ្រងដោយស្វ័យភាព និងសេរីភាពជាមូលដ្ឋានរបស់ទីក្រុង។ សុចរិតភាពនៃ “ប្រទេសមួយ របបពីរ” កំពុងត្រូវបានគំរាមកំហែង”។

តំណាងរាស្ត្រដែលបានចូលរួមចុះហត្ថលេខាលើសេចក្ដីប្រកាសថ្កោលទោសខាងលើ រួមមាន Chris Patten(អភិបាលក្រុងជនជាតិអង់គ្លេសចុងក្រោយរបស់ទីក្រុងហុងកុង) Malcolm Rifkind(អតីតរដ្ឋមន្ត្រីការបរទេសអង់គ្លេស) ក្រុមតំណាងរាស្ត្រមកពីសភាអាមេរិកាំង ក្រុមតំណាងរាស្ត្រអង់គ្លេស ក៏ដូចជាក្រុមតំណាងរាស្ត្រមកពីអឺរ៉ុប នូវែលហ្សេឡង់កាណាដា អូស្ត្រាលី ឥណ្ឌា ឥណ្ឌូនេស៊ី កូរ៉េខាងត្បូង និងម៉ាឡេស៊ី។

Elsie Leung Oi-sie អនុប្រធានគណៈកម្មធិការច្បាប់រដ្ឋធម្មនុញ្ញហុងកុង បានច្រានចោលការរិះគន់ ក៏ដូចជាការប្រកាសថ្កោលទោសពីសំណាក់ក្រុមតំណាងរាស្ត្របរទេស។ លោកស្រីបានឱ្យដឹងថា សិទ្ធិគ្រប់គ្រងដោយស្វ័យភាពរបស់ទីក្រុងហុងកុងនឹងមិនមានការប្ដូរផ្លាស់អ្វីនោះទេ ហើយវាត្រូវបានការពារដោយច្បាប់មូលដ្ឋានដែលជាច្បាប់កំពូលរបស់ទីក្រុងនេះ។

ចំណែកឧបនាយករដ្ឋមន្ត្រីចិន លោក Han Zheng ក៏បានថ្លែងសង្កត់ធ្ងន់ថា ច្បាប់សន្តិសុខថ្មីនេះនឹងផ្ដោតទៅលើតែ “មនុស្សមួយក្ដាប់តូច” ប៉ុណ្ណោះ ដើម្បីបិទប្រហោងតូចមួយនៃច្បាប់ដែលកើតមានឡើងក្រោយបាតុកម្មផ្ទុះឡើងនៅហុងកុងកាលពីឆ្នាំមុន។

សូមរំឭកថា ច្បាប់សន្តិសុខហុងកុងត្រូវបានស្នើឡើងរដ្ឋសភាចិនកាលពីថ្ងៃទី22ឧសភា ក្នុងនោះមានការហាមមិនឱ្យមានសកម្មភាពផ្ដាច់ខ្លួន និងរដ្ឋប្រហារ ក៏ដូចជាការជ្រៀតជ្រែកពីបរទេស និងភេរវកម្មក្នុងទីក្រុង។

យោងតាមកិច្ចព្រមព្រៀងដែលត្រូវបានធ្វើឡើងនៅពេលអង់គ្លេសប្រគល់ហុងកុងទៅឱ្យប្រទេសវិញកាលពីឆ្នាំ1997 ហុងកុងទទួលបានសិទ្ធិគ្រប់គ្រងដោយស្វ័យភាពខ្ពស់ ចំណេកសិទ្ធិសេរីភាព ប្រព័ន្ធច្បាប់ និងប្រព័ន្ធគ្រប់គ្រងពាណិជ្ជកម្មក៏មានដោយឡែក។

តំណាងរាស្ត្រហុងកុងមួយចំនួនក៏បានរិះគន់ទៅលើច្បាប់ខាងលើផងដែរ ដោយពួកគេយល់ថា វាដើរផ្ទុយទៅនឹងគោលការណ៍ “ប្រទេសមួយ របបពីរ” ដែលប្រទេសចិនបានសន្យាថា នឹងរក្សាសិទ្ធិសេរីភាពរបស់ទីក្រុងហុងកុង។

ទាក់ទិននឹងច្បាប់ខាងលើនេះដែរ នៅទីក្រុងហុងកុងកាលពីម្សិលមិញ មានមនុស្សរាប់ពាន់នាក់បានចេញធ្វើបាតុកម្មដើម្បីប្រឆាំងទៅនឹងច្បាប់នេះ។ បាតុករបានប៉ះទង្គិចជាមួយកងកម្លាំងប៉ូលិស។ ក្រុមសមត្ថកិច្ចបានប្រើប្រាស់គ្រាប់បែកផ្សែងបង្ហូរទឹកភ្នែក និងបាញ់ទិកបំបែកហ្វូងបាតុករ៕

ប្រភព៖ សារព័ត៌មានបរទេស

May 25, 2020

ជាង99,000នាក់ស្លាប់ដោយសារCOVID-19 សហរដ្ឋអាមេរិកនៅតែបន្ធូរបន្ថយបម្រាមគោចរ

រដ្ឋចំនួន50របស់សហរដ្ឋអាមេរិកបានបន្ធូរបន្ថយការរឹតត្បិតលើការដើរហើរដើម្បីចាប់ផ្ដើមបើកដំណើរការសេដ្ឋកិច្ចទាំងស្រុងឡើងវិញ បើទោះជាមានការព្រមានពីក្រុមអ្នកជំនាញផ្នែកសុខាភិបាលក៏ដោយ។

យោងតាមស្ថិតិរបស់គេហទំព័រ Worldometer គិតមកដល់បច្ចុប្បន្ន តួលេខអ្នកស្លាប់ដោយសារវីរុសCOVID-19 នៅសហរដ្ឋអាមេរិកបានកើនដល់ជាង99,200នាក់ គឺកើនជិត600នាក់បើធៀបជាមួយនឹងម្សិលមិញ។ ក្នុងរយៈពេល24ម៉ោងមកនេះ សហរដ្ឋអាមេរិកក៏បានរកឃើញអ្នកផ្ទុកមេរោគCOVID-19 ជិត18,000នាក់បន្ថែមទៀត ធ្វើឱ្យតួលេខនៃអ្នកជំងឺកូរ៉ូណាសរុបឡើងដល់ជិត1.7លាននាក់។

សហរដ្ឋអាមេរិកបច្ចុប្បន្នគឺជាប្រទេសដែលមានអ្នកជំងឺ និងអ្នកស្លាប់ដោយសារវីរុសCOVID-19ច្រើនជាងគេបង្អស់ក្នុងពិភពលោក។ តួលេខនៃអ្នកស្លាប់ដោយសារ COVID-19 នៅប្រទេសនេះ ត្រូវបានគេព្យាករថានឹងកើនដល់147,000នាក់ នៅដើមខែសីហាខាងមុខ។

គិតមកដល់បច្ចុប្បន្ន រដ្ឋចំនួន50របស់សហរដ្ឋអាមេរិកបានបន្ធូរបន្ថយបម្រាមគោចរ ខណៈដែលកាលពីសប្ដាហ៍មុន រដ្ឋចំនួន11បានរកឃើញអ្នកផ្ទុកមេរោគCOVID-19ច្រើនបំផុតមិនធ្លាប់មានពីមុនមក ក្នុងនោះរួមមានរដ្ឋ Alabama, Arkansas, Minnesota, North Dakota, New Hampshire, Maryland, Maine, Nevada, Utah, Virginia និងរដ្ឋ Wisconsin។

ក្រុមមន្ត្រីរដ្ឋការនៃសហរដ្ឋអាមេរិកបានអំពាវនាវឱ្យពលរដ្ឋរបស់ខ្លួនពាក់ម៉ាស់នៅពេលចេញទៅទីសាធារណៈ ក៏ប៉ុន្តែមានមនុស្សជាច្រើនបានប្រឆាំងនឹងការអំពាវនាវនេះ។ កាលពីចុងសប្ដាហ៍កន្លងទៅ គេឃើញមានមនុស្សតិចតួចណាស់ដែលបានពាក់ម៉ាស់នៅពេលដើរលម្ហែកាយនៅតំបន់ឆ្នេរសមុទ្រនៃទីក្រុង Ocean City ក្នុងរដ្ឋ Maryland៕

ប្រភព៖ សារព័ត៌មានបរទេស

May 25, 2020

ជិត5.5លាននាក់បានឆ្លងវីរុសCOVID-19 នៅទូទាំងពិភពលោក

ពិភពលោកទាំងមូលបានរកឃើញអ្នកផ្ទុកមេរោគកូរ៉ូណាប្រភេទថ្មីចំនួនជិត5.5លាននាក់ ក្នុងនោះមានអ្នកជំងឺជាង346,000នាក់បានបាត់បង់ជីវិត។

ប្រទេសនិងដែនដីចំនួន213ក្នុងពិភពលោក ក្នុងរយៈពេល24ម៉ោងចុងក្រោយនេះ បានរកឃើញអ្នកជំងឺCOVID-19ចំនួន94,223នាក់ និងអ្នកស្លាប់2,744នាក់បន្ថែមទៀត នាំឱ្យតួលេខសរុបនៃអ្នកជំងឺកូរ៉ូណាកើនឡើងដល់5,491,193នាក់ និងអ្នកស្លាប់សរុបដោយសារវីរុសនេះឡើងដល់346,326នាក់។ អ្នកជំងឺដែលបានជាសះស្បើយមានចំនួន2,298,806នាក់។

ទ្វីបអឺរ៉ុបមានអ្នកជំងឺCOVID-19សរុប1,901,749នាក់ ខណៈដែលតំបន់អាមេរិកខាងជើងមាន1,876,231នាក់ ទ្វីបអាស៊ីមាន960,418នាក់ តំបន់អាមេរិកខាងត្បូងមាន630,661នាក់ និងទ្វីបអាហ្វ្រិកមាន113,653នាក់។

ប្រទេសដែលមានអ្នកស្លាប់ដោយសារCOVID-19ច្រើនជាងគេ រួមមាន សហរដ្ឋអាមេរិក(99,286នាក់) អង់គ្លេស(36,793នាក់) អ៊ីតាលី(32,785នាក់) អេស្ប៉ាញ(28,752នាក់) បារាំង(28,367នាក់) និងប្រទេសប្រេស៊ីល(22,666នាក់)៕

ប្រភព៖ សារព័ត៌មានបរទេស

May 25, 2020

Author: សឿន សំណាង