សឿន សំណាង - La Reine Media

(វីដេអូ) ចិនលើកនិងប្ដូរទីតាំងវិហារបុរាណដ៏ធំមួយ ទៅដាក់កន្លែងថ្មី ដោយចំណាយពេលតែ 82នាទីប៉ុណ្ណោះ

ក្រុមកម្មករចិនបានលើកវិហារប្រវត្តិសាស្ត្រដ៏ធំមួយខ្នងដែលមានទម្ងន់ 2,360តោន យកទៅដាក់នៅទីតាំងថ្មីដែលមានចម្ងាយ76ម៉ែត្រពីទីតាំងចាស់។

វិហារសាសនាវ័យចំណាស់មួយខ្នងធំដែលមានអាយុកាល127ឆ្នាំ នៅក្នុងទីក្រុង Jinan ប្រទេសចិន ត្រូវបានផ្លាស់ទីទៅកាន់កន្លែងថ្មីកាលពីថ្ងៃទី10មិថុនាកន្លងទៅ។

វិហារដែលមានទម្ងន់2,360តោននេះ ត្រូវបានលើកខ្ពស់ពីដី1.65ម៉ែត្រ រួចហើយដាក់ទៅលើរឺម៉ករថយន្តធំៗចំនួន10គ្រឿង។ ក្រុមកម្មករនាំគ្នាផ្លាស់ទីតាំងរបស់វិហារនេះទៅកន្លែងថ្មីដែលមានចម្ងាយពីទីតាំងចាស់76ម៉ែត្រ ដោយឆ្លងកាត់កំណាត់ផ្លូវកែងធំមួយ។

វិហារនេះត្រូវបានសាងសង់ឡើងកាលពីឆ្នាំ1893 ដែលជាស្ថាបត្យកម្មប្រវត្តិសាស្ត្រដ៏សំខាន់ និងលេចធ្លោរបស់ទីក្រុង Jinan នៃប្រទេសចិន។

វិហារនេះមានកម្ពស់3ជាន់ បណ្ដោយ36ម៉ែត្រ និងទទឹង15ម៉ែត្រ មានជញ្ជាំងធ្វើអំពីឥដ្ឋ ហើយជាន់នីមួយៗត្រូវបានក្រាលដោយបន្ទះឈើ។

ការផ្លាស់ទីតាំងរបស់វិហារខាងលើ ត្រូវចំណាយពេលត្រឹមតែ 82នាទីប៉ុណ្ណោះ។

ប្រភព៖ SCMP

June 13, 2020

ដៃស្ដាំរបស់មហាសេដ្ឋីមានទ្រព្យច្រើនបំផុតនៅទ្វីបអាស៊ី បានធ្វើអ្វីខ្លះជូនក្រុមហ៊ុន?

Manoj Modi មិនមានកេរ្តិ៍ឈ្មោះល្បីនោះឡើយ ប៉ុន្តែលោកគឺជាមនុស្សមានអំណាចបំផុតនៅក្នុងក្រុមហ៊ុន Reliance Industries របស់មហាសេដ្ឋីឥណ្ឌា Mukesh Ambani។

ជាមនុស្សមិនសូវបញ្ចេញមតិ និងស្ទើរតែមិនបង្ហាញខ្លួននៅលើទំព័រសារព័ត៌មាន ក៏ប៉ុន្តែ លោក Manoj Modi ត្រូវបានអ្នករកស៊ីជាច្រើននៅប្រទេសឥណ្ឌាចាត់ទុកថាជាដៃស្ដាំរបស់មហាសេដ្ឋី Mukesh Ambani ដែលជាអ្នកមានបំផុតនៅអាស៊ី។ លោក Manoj Modi ដើរតួនាទីសំខាន់បំផុតនៅក្នុងជំនួញដែលមានតម្លៃ 5.7ពាន់លានដុល្លាររវាងក្រុមហ៊ុន Reliance Industries និង Facebook កាលពីខែមេសាកន្លងទៅ នៅពេលដែលបានជួយមហាសេដ្ឋី Ambani និងកូនៗរបស់លោក ចរចាជាមួយបណ្ដាញសង្គម Facebook។

ក្រោយពីលោក Ambani បានប្ដូរទិសដៅអាទិភាពរបស់ក្រុមហ៊ុនពីឥទ្ទនៈគីមី (Petrochemistry/ផលិតផលគីមីដែលធ្វើអំពីប្រេងឥន្ទនៈ) ទៅកាន់អ៊ីនធើណិត លោក Modi ត្រូវបានគេមើលឃើញថាជាមនុស្សមាន “ទឹកមាត់ប្រៃ” បំផុត។ ខ្ទង់វិនិយោគរបស់ Facebook ទៅក្នុង Jio Platforms បានបើកផ្លូវឱ្យមានជំនួញជាច្រើនពីបណ្ដាអ្នកវិនិយោគឯកជន។ ជាសរុប Jio Platforms បានទាក់ទាញខ្ទង់វិនិយោគចំនួន 13ពាន់លានដុល្លារ ដែលនេះបានធ្វើឱ្យមានការចាប់អារម្មណ៍ពីអ្នករកស៊ីនៅជ្រលងភ្នំស៊ីលីកុន (Silicon valley)។

លោក Modi ឆ្នាំនេះមានអាយុជាង60 ប៉ុន្តែលោកមិនមានទំនាក់ទំនងអ្វីជាមួយនាយករដ្ឋមន្ត្រីឥណ្ឌា លោក Narenda Modi នោះទេ ថ្វីបើមានត្រកូលដូចគ្នា។ លោក Manoj Modi កម្រនឹងទទួលកិច្ចសម្ភាសជាមួយសារព័ត៌មាន ដូច្នេះលោកក៏មិនត្រូវបានសាធារណជនស្គាល់ច្រើនដែរ។ យ៉ាងនេះក្ដី លោកគឺជា “ភ័ស្ដុតាង” មួយបញ្ជាក់ថា អ្នកដែលមិនសូវបញ្ចេញសម្លេង (មតិ) និងបានខំប្រឹងប្រែងបញ្ចេញកម្លាំងជាច្រើនឆ្នាំជាមួយនឹងបណ្ដាក្រុមហ៊ុនធំៗនៅឥណ្ឌា អាចបង្កើតបានឥទ្ធិពលធំកម្រិតណា។

“ក្រុមអ្នកជំនួញសុទ្ធតែដឹងថា មហាសេដ្ឋី Ambani និងលោក Modi មានភាពស្និទ្ធស្នាលនឹងគ្នា។ ពួកគេធ្វើការរួមគ្នាដើម្បីជំរុញការចរចា និងដោះស្រាយបញ្ហាតូច-ធំជាមួយគ្នា” នេះបើតាម Vani Kola ដែលជានាយករបស់ក្រុមហ៊ុន Kalaari Capital Partners។ Kola គឺជាអ្នកដែលបានទទួលជោគជ័យក្នុងការបញ្ចុះបញ្ចូលលោក Modi ចូលរួមកិច្ចប្រជុំដ៏កម្រមួយកាលពីឆ្នាំទៅ។

បច្ចុប្បន្ន លោក Modi គឺជានាយកក្រុមហ៊ុន Reliance Retail និង Reliance Jio Infocomm ដែលជាក្រុមហ៊ុនបុត្រសម្ព័ន្ធរបស់ Jio Platforms។ នៅក្នុងព្រឹត្តិការណ៍របស់ Kola លោក Modi នៅតែដាក់ខ្លួនដដែលនៅពេលនិយាយដល់សមត្ថភាពរបស់ខ្លួនក្នុងការចរចា និងការបំពេញការងារ។

“ខ្ញុំមិនបានចរចាអ្វីឱ្យជាដុំកំភួននោះទេ។ ខ្ញុំមិនយល់អំពីយុទ្ធសាស្ត្រអ្វីឡើយ។ ជាក់ស្ដែង អ្នករាល់គ្នានៅក្នុងក្រុមហ៊ុន សុទ្ធតែដឹងថា ខ្ញុំមិនមានចក្ខុវិស័យអ្វីនោះដែរ” លោក Modi ថ្លែងបែបនេះនៅក្នុងព្រឹត្តិការណ៍របស់ Kola ពេលនិយាយអំពីតួនាទីរបស់លោក។ លោកបន្ថែមថា “ខ្ញុំធ្វើការជាមួយបុគ្គលិកក្នុងក្រុមហ៊ុន និងធ្វើការបណ្ដុះបណ្ដាល ណែនាំពួកគេអំពីរបៀបធ្វើការ។ គោលការណ៍នៅ Reliance ពិតជាសាមញ្ញ៖ លើកលែងតែអ្នករាល់គ្នាសុទ្ធតែរកលុយបាននៅពេលធ្វើការជាមួយយើងខ្ញុំ មិនដូច្នោះទេ អាជីវកម្មនឹងមិនប្រកបដោយនិរន្តរភាពនោះឡើយ”។

ក្នុងកិច្ចសម្ភាសនានា ក្រុមមេដឹកនាំក្នុងវិស័យបច្ចេកវិទ្យាដែលធ្លាប់មានទំនាក់ទំនងរកស៊ីជាមួយក្រុមហ៊ុន Reliance សុទ្ធតែយល់ថា លោក Modi ជាអ្នកចរចាប្រកបដោយភាពម៉ឺងម៉ាត់ដើម្បីនាំយកផលប្រយោជន៍ជូនក្រុមហ៊ុន។ នៅពេលចរចាជាមួយបណ្ដាក្រុមហ៊ុនថ្មីៗ លោក Modi តែងនៅឈរពីក្រោយដើម្បីណែនាំថ្នាក់ដឹកនាំរបស់ខ្លួនថាត្រូវពិភាក្សាកម្រិតណាទើបទទួលបានជោគជ័យ។

បើទោះជាថ្មីៗនេះ Reliance ទើបតែទទួលបានចំណាប់អារម្មណ៍ច្រើនដោយសារការជួញដូរធំៗ ប៉ុន្តែក្រុមហ៊ុននេះបានចាប់ផ្ដើមទិញក្រុមហ៊ុនតូចៗតាំងពីច្រើនឆ្នាំមុនមកម្លេះ ដើម្បីបង្កើតបានជាខឿនដ៏រឹងមាំនៅក្នុងវិស័យឧស្សាហកម្មថ្មី ចាប់ពីបញ្ញាសិប្បនិម្មិត រហូតដល់ Blockchain (Blockchain គឺជាប្រព័ន្ធទិន្នន័យ (Database) មួយប្រភេទដែលមានតួនាទីបែបវិមជ្ឈការ (Decentralized)។ ប្រព័ន្ធ Blockchain អាចរក្សាទិន្នន័យប្រកបដោយសុវត្ថិភាពខ្ពស់ ដោយសារទិន្នន័យដែលដូចគ្នាត្រូវបានគេរក្សាទុកនៅច្រើនកន្លែង និងត្រូវបានតភ្ជាប់ជាមួយគ្នាដោយ encode ហើយវាពង្រីកវិសាលភាពទៅតាមពេលវេលា)។ ពួកគេមានបំណងបង្កើតក្រុមហ៊ុនឌីជីថលមួយដែលមានអំណាចគ្របដណ្ដប់តាំងពីការលក់រាយតាមអនឡាញ រហូតដល់វិស័យកម្សាន្ត និងការទូទាត់តាមអ៊ីនធើណិត។

“លោក Modi គឺជាមនុស្សមានអំណាចខ្លាំងនៅក្នុងការជួញដូរធំៗ ហើយជំនួបជាមួយលោក ក៏ជាសញ្ញាដែលបញ្ជាក់ថា ការជួញដូរត្រូវបានយល់ព្រម” នេះបើតាមការឱ្យពីបណ្ដាថ្នាក់ដឹកនាំក្រុមហ៊ុនថ្មីៗ។ G. R. Gopinath ដែលជាស្ថាបនិកក្រុមហ៊ុនអាកាសចរណ៍តម្លៃទាប Air Deccan បានឱ្យដឹងថា “លោក Modi មានអំណាចក្នុងក្រុមហ៊ុន មិនមែនត្រឹមតែភាពស្មោះត្រង់នោះទេ តែលោកក៏មានបញ្ញាខ្ពស់ និងជំនាញខាងចរចា”។ Air Deccan ត្រូវបានលក់ទៅឱ្យក្រុមហ៊ុន Reliance កាលពីឆ្នាំ2010។ លោក G. R. Gopinath បន្តថា “បើទោះជាមិនបានទទួលការបណ្ដុះបណ្ដាលពីមហាវិទ្យាល័យកំពូលៗនៅសហរដ្ឋអាមេរិក ប៉ុន្តែ លោក Modi នៅតែមានការគិតប្រកបដោយភាពមោះមុត និងចក្ខុវិស័យវែងឆ្ងាយកម្របានជួប ក្នុងការចាប់យកបច្ចេកវិទ្យាទំនើបៗនៅឥណ្ឌា”។

ច្រើនឆ្នាំកន្លងទៅ លោក Modi កាន់តែល្បីឈ្មោះជាមួយនឹងតួនាទីជាអ្នកអនុវត្ត និងតាមដានគម្រោងធំៗរបស់ក្រុមហ៊ុន។ លោកបានរកទីផ្សារថ្មីៗសម្រាប់ Reliance ខណៈដែលបាននាំយកបណ្ដាញលក់រាយទៅដល់បណ្ដាទីក្រុងតូចៗ ទន្ទឹមនឹងនេះ លោកក៏បានជួយឱ្យ Reliance ក្លាយជាក្រុមហ៊ុនលក់រាយធំជាងគេបង្អស់នៅលើទឹកដីឥណ្ឌាផងដែរ។ ក៏ប៉ុន្តែ ទូរគមនាគមន៍ឯណោះវិញទេ ទើបជាវិស័យដែលជួយឱ្យលោក Modi បង្កើតបានចំណាប់អារម្មណ៍ដ៏អស្ចារ្យ។

លោក Manoj Modi (ស្ដាំ) ជាមួយនឹងមហាសេដ្ឋី Mukesh Ambani និងកូនប្រុស

សមត្ថភាពចរចារបស់លោក Modi បានបង្ហាញយ៉ាងច្បាស់នៅពេល Reliance Jio ដាក់ដំណើរការសេវាកម្មទូរគមនាគមន៍ឆ្នាំ2016 និងបង្កើតប្រព័ន្ធខ្សែកាបអ៊ីនធើណិត។ មនុស្សម្នាក់ក្នុងចំណោមអ្នកដែលបានចូលរួមក្នុងកិច្ចការចរចា បានរៀបរាប់ប្រាប់អំពីករណីមួយដែលបណ្ដាដៃគូជំនួញត្រូវបានអញ្ជើញមកកាន់ទីស្នាក់ងារដើម្បីជជែកគ្នា។ “ចំណី” ដ៏ធំត្រូវបានបង្ហាញនៅចំពោះមុខពួកគេ នោះគឺទំហំដ៏មហិមារបស់គម្រោង។ ប៉ុន្តែ ពួកគេមិនដឹងថា មុននោះបន្តិច ក្រុម “សកម្មជន” របស់ Reliance ក៏ត្រូវបានហៅចូលបន្ទប់របស់លោក Modi ដើម្បីទទួលការណែនាំអំពីកិច្ចការចរចានេះឡើយ”។

ក្រោយពីបានផ្ដួលគូប្រជែងនានា Jio បានក្លាយជាក្រុមហ៊ុនអ៊ីនធើណិតធំជាងគេនៅប្រទេសឥណ្ឌា ដោយមានអ្នកប្រើប្រាស់ជិត400លាននាក់។ ពួកគេក៏កាន់តែមានសារសំខាន់សម្រាប់បណ្ដាក្រុមហ៊ុនអន្តរជាតិ ដូចជា Facebook និង WhatsApp ជាដើម ក្នុងការជៀតចូលរកស៊ីនៅឥណ្ឌា។

លោក Modi ក៏នៅមានសមត្ថភាពពិសេសផ្សេងមួយទៀត នោះគឺការធ្វើការបានយ៉ាងល្អជាមួយក្រុមមេដឹកនាំជាន់ខ្ពស់ក្នុងក្រុមហ៊ុន Reliance ដូចជា Anshuman Thakur (នាយកផ្នែកយុទ្ធសាស្ត្ររបស់ Reliance Jio Infocomm)។ Thakur ធ្លាប់ធ្វើការនៅធនាគារ និងដើរតួនាទីសំខាន់ក្នុងជំនួញ ក៏ដូចជាសន្និសីទសារព័ត៌មានរបស់ក្រុមហ៊ុន។ នៅពេលដែលមហាសេដ្ឋី Ambani យល់ព្រមជាមួយនឹងការទិញដូរក្រុមហ៊ុនណាមួយ Thakur នឹងទទួលខុសត្រូវក្នុងការបង្កើតរចនាសម្ព័ន្ធនៃកិច្ចព្រមព្រៀង។

នៅប៉ុន្មានសប្ដាហ៍ចុងក្រោយនេះ បញ្ជីអ្នកវិនិយោគរបស់ Jio មានឈ្មោះក្រុមហ៊ុនធំៗ ដូចជា KKR & Co., Silver Lake Partners, Vista Equity Partners និង General Atlantic ជាដើម។ ប៉ុន្តែ COVID-19 បានរុញច្រានឥណ្ឌាទៅជិតដល់មាត់ជ្រោះនៃវិបត្តិសេដ្ឋកិច្ច។ ប្រការនេះមានន័យថា Modi និង Ambani នឹងត្រូវកែសម្រួលយុទ្ធសាស្ត្ររបស់ខ្លួនដើម្បីបង្កើនប្រាក់ចំណូលតាមអនឡាញនៅពេលការចាយវាយទូទាំងប្រទេស ដំណើរការដោយយឺតៗ។

នៅក្នុងគ្រានេះដែរ តម្លៃប្រេងបានធ្លាក់ថ្លៃខ្លាំង កំពុងបង្កជាឧបសគ្គដល់កិច្ចការចរចាលក់ភាគហ៊ុនតម្លៃ 15ពាន់លានដុល្លារនៅក្នុងផ្នែកឥន្ទនៈគីមីរបស់ Reliance Industries ទៅឱ្យ Saudi Aramco។ ប៉ុន្តែ ក្រុមហ៊ុនរបស់ Modi បានឱ្យដឹងថា ពួកគេនៅតែបន្តការចរចា៕

ប្រភព៖ Bloomberg

June 13, 2020

ភរិយារបស់ប្រធានាធិបតីអ៊ុយក្រែន ឆ្លងវីរុសCOVID-19 ខណៈដែលពិភពលោកមានអ្នកជំងឺជាង7.7លាននាក់

លោកស្រី Olena ភរិយារបស់ប្រធានាធិបតីអ៊ុយក្រែន Zelenskiy កាលពីម្សិលមិញបានប្រាប់ឱ្យដឹងអំពីលទ្ធផលវិជ្ជមានជាមួយនឹងវីរុសCOVID-19 ដែលលោកស្រីទទួលបានក្រោយពីការធ្វើតេស្ត ប៉ុន្តែស្វាមីនិងកូនៗរបស់លោកស្រីទទួលបានលទ្ធផលអវិជ្ជមានជាមួយនឹងមេរោគនេះ។

“ថ្ងៃនេះខ្ញុំបានទទួលលទ្ធផលធ្វើតេស្តវិជ្ជមានជាមួយនឹង COVID-19។ ជាដំណឹងដែលខ្ញុំមិនបានរំពឹងទុកទាល់តែសោះ។ ពិសេសគឺនៅពេលដែលខ្ញុំនិងគ្រួសារតែងតែគោរពគោលការទាក់ទិននឹងការពាក់ម៉ាស់ ពាក់ស្រោមដៃ និងកាត់បន្ថយការទាក់ទងផ្ទាល់” លោកស្រី Olena Zelenska ភរិយារបស់ប្រធានាធិបតីអ៊ុយក្រែន សរសេរបែបនេះនៅលើ Facebook។

លោកស្រី Olena បានឱ្យដឹងថា លោកស្រីនៅមានសុខភាពល្អ និងមិនបាច់ចូលពេទ្យ ប៉ុន្តែបានរក្សាគម្លាតជាមួយនឹងគ្រួសារទាំងមូល។

សូមរំឭកថា កន្លងមកក៏មានមន្ត្រីជាន់ខ្ពស់របស់បណ្ដាប្រទេសជាច្រើនបានឆ្លងវីរុសCOVID-19នេះ ក្នុងនោះមានដូចជា នាយករដ្ឋមន្ត្រីអង់គ្លេស (Boris Johnson) អនុប្រធានាធិបតីទីមួយរបស់អ៊ីរ៉ង់ (Eshaq Jahangiri) និងឧបនាយករដ្ឋមន្ត្រីអេស្ប៉ាញ (Carmen Calvo) ចំណែកលោកស្រី Sophie Gregoire ដែលជាភរិយារបស់ប្រធានាធិបតីកាណាដាក៏ត្រូវបានបញ្ជាក់ថាបានឆ្លងវីរុសនេះដែរ។ ក្រៅពីនេះនៅមានរដ្ឋមន្ត្រី អនុរដ្ឋមន្ត្រី និងមន្ត្រីជាន់ខ្ពស់នៃប្រទេសជាច្រើនផ្សេងទៀតក៏ធ្លាប់បានឆ្លង COVID-19។

ប្រទេសអ៊ុយក្រែនបានចាប់ផ្ដើមបន្ធូរបន្ថយការរឹតត្បិតនានាទាក់ទងនឹង COVID-19 ចាប់ពីចុងខែឧសភា ក្នុងនោះក៏បានអនុញ្ញាតឱ្យមានការប្រកួតបាល់ទាត់ឡើងវិញផងដែរ។ ចំណែកបណ្ដាញរថភ្លើងក្រោមដីនៅក្នុងរដ្ឋធានី Kiev ក៏បានដំណើរការឡើងវិញក្រោយពីបានផ្អាកអស់រយៈពេល2ខែដោយសារវិបត្តិសុខភាព។

COVID-19 បានបង្ហាញខ្លួននៅក្នុងប្រទេសនិងដែនដីចំនួន221ក្នុងពិភពលោក បណ្ដាលឱ្យមនុស្សជាង7.7លាននាក់បានឆ្លងវីរុស និងជាង428,000នាក់បានស្លាប់។ ប្រទេសអ៊ុយក្រែន បច្ចុប្បន្នមានអ្នកជំងឺCOVID-19 ជិត 30,000នាក់ និងជាង870នាក់បានស្លាប់ដោយសារវីរុសនេះ៕

ប្រភព៖ សារព័ត៌មានបរទេស

June 13, 2020

ទិដ្ឋភាពទឹកជំនន់វាយប្រហារតំបន់ភាគខាងត្បូងប្រទេសចិន! សណ្ឋាគារនិងផ្ទះរាប់ពាន់ខ្នងរងការខូចខាត

ទឹកជំនន់និងបាក់ដីនៅភាគខាងត្បូងប្រទេសចិន បណ្ដាលឱ្យមនុស្សរាប់សែននាក់បាត់បង់ផ្ទះសម្បែង មនុស្សរាប់សិបនាក់ស្លាប់ និងបាត់ខ្លួន ខណៈទំហំការខូចខាតបានឡើងដល់រាប់រយលានដុល្លារអាមេរិក។

ភ្លៀងធំបណ្ដាលឱ្យមានទឹកជំនន់ និងបាក់ដីជាច្រើនថ្ងៃមកនេះនៅតំបន់ស្វយ័តរបស់ជនជាតិ Zhuang (Guangxi Zhuang Autonomous Region) ក្នុងខេត្តក្វាងស៊ី បានបំផ្លាញផ្ទះសម្បែកជាង1,300ខ្នង នាំឱ្យមនុស្សប្រមាណជា 230,000នាក់ត្រូវជម្លៀសខ្លួន និង6នាក់បានស្លាប់ ម្នាក់បាត់ខ្លួន។

នៅក្នុងតំបន់ Yangshuo ដែលជាទីតាំងទេសចរណ៍ដ៏ល្បីឈ្មោះ ស្ថិតក្នុងទីក្រុង Guilin ខេត្តក្វាងស៊ី ត្រូវបានលិចលុងក្នុងទឹកជំនន់ បណ្ដាលឱ្យអ្នកទេសចរ និងពលរដ្ឋត្រូវជម្លៀសខ្លួនតាមក្បូនឫស្សី។ អាជ្ញាធរបានឱ្យដឹងថា សណ្ឋាគារជាង1,000 កំពុងលិចទឹក និងតំបន់ទេសចរណ៍ជាង30កន្លែងផ្សេងទៀតរងការខូចខាត។

ក្រសួងគ្រប់គ្រងគ្រោះអាសន្នចិន (Ministry of Emergency Management) វាយតម្លៃថា ការខូចខាតផ្នែកសេដ្ឋកិច្ច អាចឡើងដល់550លានដុល្លារអាមេរិក។

ចំណែកនៅខេត្ត Hunan យ៉ាងហោចណាស់មានមនុស្ស13នាក់បានស្លាប់ដោយសារភ្លៀងធំ។ នៅខេត្ត Guizhou វិញ មានមនុស្សចំនួន8នាក់បានបាត់ខ្លួន។

ភ្លៀងធំបានផ្ដើមធ្លាក់ចាប់ពីដើមខែមិថុនា នាំឱ្យទឹកទន្លេចំនួន110នៅប្រទេសចិន “កើនឡើងខ្ពស់ដល់កម្រិតគ្រោះថ្នាក់”។ តាមការព្យាករ ភ្លៀងនឹងបន្តធ្លាក់ក្នុងរយៈពេលច្រើនថ្ងៃទៀត នៅទូទាំងភាគខាងត្បូងប្រទេសចិន។

ប្រភព៖ AFP

June 12, 2020

មន្ត្រីយោធាថ្នាក់វរសេនីយ៍ម្នាក់របស់ចិន ត្រូវអាមេរិកចាប់ខ្លួននៅពេលត្រៀមឡើងយន្តហោះត្រលប់មកស្រុក

Xin Wang ដែលជាមន្ត្រីយោធាចិនម្នាក់មានឋានន្តរសក្ដិថ្នាក់វរសេនីយ៍ ត្រូវបានចាប់ខ្លួននៅពេលនាំយកការសិក្សាស្រាវជ្រាវចាកចេញពីសហរដ្ឋអាមេរិក ព្រមទាំងត្រូវរងការចោទប្រកាន់ថាបានក្លែងបន្លំទិដ្ឋាការផងដែរ។

មន្ត្រីទាហានថ្នាក់វរសេនីយ៍ ឈ្មោះ Xin Wang នេះ ត្រូវបានអង្គភាពស៊ើបការណ៍សម្ងាត់អាមេរិកាំង (FBI) ចាប់ខ្លួនខណៈត្រៀមចេញដំណើរពីអាកាសយានដ្ឋានអន្តរជាតិ Los Angeles ត្រលប់មកកាន់តំបន់ Tianjin ប្រទេសចិនកាលពីថ្ងៃទី7មិថុនា។ ព័ត៌មានខាងលើនេះត្រូវបានក្រសួងយុត្តិធម៌សហរដ្ឋអាមេរិកប្រកាសកាលពីម្សិលមិញ។

យោងតាមកំណត់ហេតុរបស់ FBI លោក Wang កំពុងកាន់កាប់តំណែងប្រហាក់ប្រហែលនឹងវរសេនីយ៍ទោក្នុងជួរកងទ័ពរំដោះប្រជាជនចិន (PLA) និងនៅតែទទួលប្រាក់ខែពីកងទ័ពចិន។

ប៉ុន្តែ នៅក្នុងពាក្យស្នើសុំទិដ្ឋាការចូលទឹកដីសហរដ្ឋអាមេរិកកាលពីឆ្នាំ2018 លោក Wang បានសរសេរថា ខ្លួនគ្រាន់តែជាសាស្ត្រាចារ្យរងផ្នែកវេជ្ជសាស្ត្រនៅ PLA ចាប់ពីឆ្នាំ2002 ដល់2016 ហើយមកកាន់សហរដ្ឋអាមេរិកដើម្បីធ្វើការសិក្សាស្រាវជ្រាវវិទ្យាសាស្ត្រនៅសាកលវិទ្យាល័យ California នាទីក្រុង San Francisco (UCSF)។

Wang បានសារភាពថា “មានចេតនាកុហកអំពីដំណាក់កាលបម្រើការក្នុងជួរកងទ័ពនៅក្នុងលិខិតស្នើសុំទិដ្ឋាការគឺគ្រាន់តែដើម្បីបង្កើនលទ្ធភាពទទួលបានទិដ្ឋាការតែប៉ុណ្ណោះ”។

នៅពេលត្រៀមចាកចេញពីព្រលានយន្តហោះ Los Angeles កាលពីថ្ងៃទីអាទិត្យ Wang បាននិយាយជាមួយមន្ត្រីអាមេរិកាំងប្រចាំការនៅអាកាសយានដ្ឋានថា “បានទទួលការអនុញ្ញាតពីថ្នាក់លើ គឺប្រធានមន្ទីរពិសោធន៍នៅសាកលវិទ្យាល័យយោធាចិន ណែនាំឱ្យសង្កេតមើលរបៀបរៀបចំបន្ទប់ពិសោធន៍នៅ UCSF ហើយនាំយកព័ត៌មាននេះត្រលប់ទៅប្រទេសចិន”។

ក្រុមមន្ត្រីគយអាមេរិកាំងប្រចាំនៅព្រលានយន្តហោះទទួលបានព័ត៌មានថា “Wang នាំយកការសិក្សាស្រាវជ្រាវជាច្រើនពី UCSF ដើម្បីចែករំលែកទៅឱ្យអ្នករួមការងារនៅ PLA និងថែមទាំងបានផ្ញើលទ្ធផលនៃការសិក្សាស្រាវជ្រាវទៅកាន់មន្ទីរពិសោធន៍របស់ខ្លួននៅប្រទេសចិនតាមរយៈអ៊ីម៉ែល” នេះបើតាមសេចក្ដីប្រកាសរបស់ក្រសួងយុត្តិធម៌សហរដ្ឋអាមេរិក។

លទ្ធផលនៃការសិក្សាស្រាវជ្រាវរបស់ UCSF ដែល Wang យកតាមខ្លួននោះ ទទួលបានឧបត្ថម្ភពីក្រសួងសុខាភិបាលអាមេរិកាំង (United States Department of Health and Human Services) និងមន្ទីរសុខាភិបាលជាតិអាមេរិកាំង (National Institutes of Health)។ Wang ក៏បានលុបចោលសារក្នុងកម្មវិធី WeChat នៅលើទូរស័ព្ទរបស់ខ្លួននៅមុនពេលមកកាន់ព្រលានយន្តហោះដើម្បីធ្វើដំណើរត្រលប់មកប្រទេសចិន។

លោក Wang អាចប្រឈមមុខនឹងការជាប់ពន្ធនាគាររយៈពេល10ឆ្នាំ និងបង់ប្រាក់ពិន័យចំនួន 250,000ដុល្លារ បើសិនត្រូវបានកាត់ទោស។

នៅចំពោះមុខការព្រួយបារម្ភអំពីសន្តិសុខជាតិ រដ្ឋាភិបាលអាមេរិកាំងកំពុងស្វែងរកចាប់ខ្លួនក្រុមអ្នកស្រាវជ្រាវ និងក្រុមអ្នកវិទ្យាសាស្ត្រទាំងឡាយណាដែលទទួលបានជំនួយពីសហរដ្ឋអាមេរិកតែធ្វើការឱ្យកងទ័ពចិន ឬសហការជាមួយមន្ទីរស្រាវជ្រាវរបស់ចិន។

ប្រធានាធិបតី Donald Trump កាលពីថ្ងៃទី29ឧសភា បានប្រកាសថា និសិត្សនិងអ្នកស្រាវជ្រាវចិននឹងត្រូវហាមមិនឱ្យចូលទឹកដីអាមេរិក បើសិនពួកគេមានលទ្ធភាពផ្ទេរចំណេះដឹងផ្នែកបច្ចេកទេសទៅឱ្យកងទ័ពចិន។ សេចក្ដីសម្រេចនេះមានសុពលភាពចាប់ពីថ្ងៃទី1មិថុនាឆ្នាំ2020។ បទបញ្ជានេះមិនបាននិយាយលម្អិតនោះទេ ប៉ុន្តែទុកឱ្យក្រសួងការបរទេសជាអ្នកសម្រេចបន្ថែម៕

ប្រភព៖ SCMP

June 12, 2020

ខាងក្នុង “តំបន់ស្វយ័ត” នៅកណ្ដាលទឹកដីសហរដ្ឋអាមេរិកដែលបង្កើតឡើងដោយក្រុមបាតុករ

នៅតំបន់ប្រជុំជនក្នុងទីក្រុង Seattle ក្រុមបាតុករបាននាំគ្នាដាក់របងការពារនៅជុំវិញ ហើយដាក់ឈ្មោះទីនេះថាជា “តំបន់ស្វយ័ត Capitol Hill” បន្ទាប់ពីអង្គភាពប៉ូលិសបាន “ចុះចាញ់”។

មុននោះ ការប៉ះទង្គិចគ្នារវាងក្រុមបាតុករដែលកើតឡើងដោយសារការស្លាប់របស់ George Floyd ជាមួយនឹងក្រុមប៉ូលិសនៅទីក្រុង Seattle រដ្ឋវ៉ាស៊ីងតោន សហរដ្ឋអាមេរិក បានធ្លាក់ទៅក្នុងស្ថានភាពទាល់ច្រកអស់រយៈពេលមួយសប្ដាហ៍។ ចុងក្រោយ ប្រតិកម្មកាន់តែខ្លាំងឡើងៗរបស់ក្រុមបាតុករ ក៏បានធ្វើឱ្យអង្គភាពប៉ូលិសក្នុងតំបន់Seattle ត្រូវបង្ខំចិត្តចុះចាញ់ ដោយការដកមន្ត្រីប៉ូលិសទាំងអស់ចេញពីប៉ូស្តិ៍ក្នុងទីប្រជុំជន Capitol Hill ហើយទុកឱ្យក្រុមបាតុករធ្វើសកម្មភាពតាមអំពើចិត្ត។

“បរិវេណនេះ បច្ចុប្បន្នគឺជាទ្រព្យរបស់ប្រជាជន Seattle” បដាមួយមានសរសេរបែបនេះ។ តំបន់ដែលនៅជុំវិញបរិវេណនេះ មកដល់បច្ចុប្បន្ន បានក្លាយជាកន្លែងសម្រាប់ឱ្យប្រជាជនសាកល្បងរស់នៅដោយគ្មានវត្តមានរបស់សមត្ថកិច្ច។

មនុស្សរាប់រយនាក់ដែលនៅខាងក្នុងទីប្រជុំជននេះ តែងមកប្រមូលផ្ដុំគ្នាដើម្បីស្ដាប់សេចក្ដីថ្លែងការណ៍នានា រួមទាំងកំណាព្យ និងចម្រៀងផងដែរ។ កាលពីយប់ថ្ងៃទី9មិថុនាកន្លងទៅ មនុស្សរាប់សិបនាក់បាននាំគ្នាអង្គុយកណ្ដាលផ្លូវបែកជាមួយដើម្បីទស្សនាខ្សែភាពយន្តឯកសារ រឿង “វិសោធនកម្មលើកទី13” របស់អ្នកដឹកនាំរឿង Ava DuVernay ដែលនិយាយអំពីឥទ្ធិពលរបស់ប្រព័ន្ធយុត្តិធម៌ព្រហ្មទណ្ឌចំពោះជនជាតិអាមេរិកាំងដើមកំណើតអាហ្វ្រិក។ មួយថ្ងៃក្រោយមក នៅទីនេះគេឃើញមានក្មេងៗជាច្រើននាំគ្នាយកដីស និងទឹកថ្នាំមកគូសលេងនៅកណ្ដាលផ្លូវ។

ខាងលើនេះគ្រាន់តែជាការរៀបរាប់អំពីទិដ្ឋភាពខ្លះៗដែលបង្ហាញអំពីការរស់នៅដោយគ្មាននគរបាល នៅក្នុងតំបន់Seattle៕

ប្រភព៖ សារព័ត៌មានបរទេស

June 12, 2020

Alibaba អាចដើរបញ្ច្រាសទិសឆ្លងកាត់មហាវិបត្តិសុខភាពពិភពលោកដោយរបៀបណា?

SARS បានជាន់ពន្លិចក្រុមហ៊ុនធំៗជាច្រើន ប៉ុន្តែវាក៏ជាតំណភ្ជាប់ដែលជួយបង្កើតបានជា “មេមាន់ពងមាស” Taobao ហើយដូចគ្នានេះដែរ Alibaba ក៏កំពុងតែរកបានប្រាក់ចំណេញរាប់លានដុល្លារនៅក្នុងសម័យ COVID-19។

កាលពី17ឆ្នាំមុន នៅពេលដែលរោគរាតត្បាត SARS ឆ្លងរាលដាលពេញទឹកដីចិន បុគ្គលិកទាំងអស់របស់ Alibaba ត្រូវបានតម្រូវឱ្យរក្សាគម្លាតសង្គម និងយកការងារក្រុមហ៊ុនទៅធ្វើនៅឯផ្ទះ។ ដំណាក់កាលនោះ ក្រុមហ៊ុន Alibaba ទើបតែមានអាយុ4ឆ្នាំប៉ុណ្ណោះ និងត្រូវប្រឹងប្រែងគិតគូរអំពីប្រាក់ចំណេញតាមបែបក្រុមហ៊ុនថ្មី (startup)។

ប៉ុន្តែ ដោយសារតែវិបត្តិសុខភាព SARS នោះហើយ បានរុញច្រាន Alibaba ឱ្យបង្កើត Taobao ដែលជាផ្សារអនឡាញមួយដើម្បីទប់ទល់ និងប្រើប្រាស់ប្រយោជន៍ដែលបានមកពី SARS។ មកដល់បច្ចុប្បន្ន Taobao គឺជាទីផ្សារលក់រាយធំជាងគេមួយនៅក្នុងពិភពលោក។

ចំណែក COVID-19 វិញ បើទោះជាបានក្លាយជាក្រុមហ៊ុនពាណិជ្ជកម្មលំដាប់កំពូលរបស់ពិភពលោក ប៉ុន្តែ Alibaba នៅតែមិនអាចគេចផុតពីរលកវិបត្តិសុខភាព ហើយត្រូវការចាំបាច់នូវការសម្របខ្លួនដើម្បីឆ្លងកាត់ឧបសគ្គនេះ។ ក្រុមហ៊ុន “យក្ស” មួយនេះ បានរកឃើញឱកាសដើម្បីធ្វើឧបនីយកម្មឌីជីថលទៅលើសកម្មភាពតាំងពិព័រណ៍វិស័យពាណិជ្ជកម្មនៅក្នុងពេលដែលគម្រោងតាំងពិព័រណ៍បែបបុរាណនានាត្រូវបានពន្យារពេល ឬលុបចោល ដោយសារវីរុសCOVID-19។ យោងតាម Alibaba សកម្មភាពខាងលើនេះអាចជួយធ្វើឱ្យ “ផ្លូវដើរ” របស់បណ្ដាក្រុមហ៊ុនតូចៗ មានភាពរាបស្មើល្អជាងមុន។

កាលពីថ្ងៃទី9កន្លងទៅ Abibaba បានប្រកាសបញ្ចេញមុខងារថ្មីៗជាច្រើនសម្រាប់ Alibaba.com ក្នុងបំណងជំរុញការតភ្ជាប់រវាងអ្នកផ្គត់ផ្គង់អន្តរជាតិជាមួយនឹងអតិថិជន។ ក្នុងចំណោមផលិតផលថ្មីជាច្រើនដែលទើបត្រូវបានឧទ្ទេសនាមក៏មាន Online Trade Show USA ផងដែរ ដែលផ្ដល់ជូនបទពិសោធន៍ជាច្រើនក្នុងការតភ្ជាប់ក្រុមហ៊ុនជាមួយនឹងក្រុមហ៊ុន (B2B) ជាកន្លែងដែលក្រុមអ្នកលក់និងអ្នកផលិតនៅសហរដ្ឋអាមេរិកអាចចាប់យកអតិថិជនថ្មី។

John Caplan ប្រធានក្រុមហ៊ុន Alibaba ប្រចាំសហរដ្ឋអាមេរិកនិងអឺរ៉ុប បានឱ្យដឹងថា “ពិព័រណ៍ពាណិជ្ជកម្មអនឡាញសំដៅទៅលើបណ្ដាក្រុមហ៊ុនខ្នាតតូច។ ដោយមានជម្រើសផ្នែកឌីជីថល ពួកគេនឹងមិនចាំបាច់ចំណាយពេលច្រើនថ្ងៃ និងប្រាក់រាប់ពាន់ដុល្លារដើម្បីធ្វើដំណើរទៅចូលរួមពិព័រណ៍ offline នោះឡើយ”។

ថ្មីៗនេះ ការបង្កើនមុខងារឌីជីថលសម្រាប់វេទិកាពាណិជ្ជកម្ម Alibaba.com បានក្លាយជាគោលដៅយុទ្ធសាស្ត្រអាទិភាពរបស់ក្រុមហ៊ុន Alibaba។ ក្រុមហ៊ុននេះមិនរំលងចោលទីផ្សារដ៏មានសក្ដានុពលរបស់វេទិកា B2B នៅក្នុងសម័យ COVID-19 នេះឡើយ ខណៈដែលក្រុមហ៊ុនខ្នាតតូចនាំគ្នាបង្កើនការស្វែងរកឧបករណ៍ឌីជីថលដើម្បីបម្រើ និងស្វែងរកអតិថិជន។

ក្រៅពីនេះ Alibaba បានឱ្យដឹងថា ខ្លួននឹងបន្ថែមមុខងារជាច្រើនផ្សេងទៀតទាក់ទិននឹងជំនួយផ្នែកហិរញ្ញវត្ថុពាណិជ្ជកម្ម និងដឹកជញ្ជូនទំនិញ ក្នុងបំណងកែលម្អសេវាកម្ម និងដោះស្រាយបញ្ហា “ឈឺចាប់” ក្នុងទីផ្សារពាណិជ្ជកម្មរបស់ពិភពលោកផងដែរ។ ជាមួយនឹងជម្រើសជំនួយពាណិជ្ជកម្ម អតិថិជនដែលបានឆ្លើយតបនឹងលក្ខខណ្ឌដែលបានកំណត់នឹងអាចបញ្ជាទិញទំនិញតាមរយៈឧបករណ៍ឌីជីថល និងធ្វើការទូទាត់ក្នុងរយៈពេល60ថ្ងៃ ក្រោយពីទទួលបានទំនិញ។ ជាធម្មតា ការដោះដូរពាណិជ្ជកម្មឆ្លងព្រំដែនរវាងក្រុមហ៊ុនខ្នាតតូច តែងតម្រូវឱ្យទូទាត់មុន100% មុននឹងផ្ញើទំនិញ ដែលនេះបង្កជាឧបសគ្គធំចំពោះចរន្តសាច់ប្រាក់របស់អ្នកទិញ។

Alibaba ឱ្យដឹងថា ខ្លួនកំពុងធ្វើការជាមួយ MSTS ដែលជាក្រុមហ៊ុនឥណទានប្រភេទ B2B ដើម្បីកំណត់ថា អ្នកទិញណាខ្លះមានលក្ខខណ្ឌគ្រប់គ្រាន់។ ក្រុមហ៊ុននេះក៏កំពុងសហការជាមួយ Freightos ដែលមានជំនាញក្នុងវិស័យដឹកជញ្ជូនទំនិញបែបឌីជីថល ដើម្បីជួយដល់បណ្ដាក្រុមហ៊ុនក្នុងការប្រៀបធៀបតម្លៃ និងគ្រប់គ្រងការដឹកជញ្ជូនសម្រាប់សកម្មភាពដឹកទំនិញដោយប្រើកម្មវិធីអនឡាញ។

មុននោះ បន្ទាប់ពី COVID-19 បានផ្ទុះឡើងនៅប្រទេសចិនភ្លាម Alibaba ក៏បានប្រកាសវិធានការជំនួយចំនួន20ចំណុចដើម្បីជួយដល់បណ្ដាក្រុមហ៊ុនដែលរងផលប៉ះពាល់ពីរោគរាតត្បាត។ ក្នុងពេលដែលហាងនានានៅចិនបានបិទទ្វារ អ្នកលក់ក៏បានងាកមកប្រើ Taobao Live ដើម្បីស្វែងរកអតិថិជន និងដើម្បីរក្សាចំណូល។ Taobao Live ថែមទាំងបានបើកទ្វារទទួលកសិករពីគ្រប់ទិសទីក្នុងប្រទេសចិន ដើម្បីជួយពួកគេក្នុងការដាក់លក់កសិផលតាមអនឡាញទៀតផង។

ជាក់ស្ដែង ជាមួយនឹងកម្មវិធី “Rural Support Program” ដែលបានបង្ហាញវត្តមានចាប់ពីខែកុម្ភៈ កសិករចិនអាចចូល និងប្រើប្រាស់ឆាណែលផ្សាយផ្ទាល់របស់ Taobao Live ដោយមិនគិតថ្លៃ។ Taobao Live ប្រកាសថា នឹងជួយដល់ហាងលក់រាយ offline ចំនួនជាង200,000កន្លែងក្នុងការបណ្ដុះបណ្ដាលបុគ្គលិកជាង10,000នាក់របស់ហាងទាំងនោះ ឱ្យក្លាយជាអ្នកដឹកនាំ livestream ប្រកបដោយប្រសិទ្ធភាព។

Taobao Live បានដាក់ផែនការបង្កើតប្រាក់ចំណូល 2.1ពាន់លានដុល្លារពីការលក់កសិផលរបស់ខេត្តចំនួន16នៅប្រទេសចិនក្នុងឆ្នាំនេះ។

Freshippo ដែលជាបណ្ដាញហាងលក់រាយគ្រឿងចាបហួយថ្មីរបស់ Alibaba ក៏រកបានចំណេញច្រើនក្នុងសម័យ COVID-19 នេះដែរ។ Freshippo អនុញ្ញាតឱ្យអតិថិជនបញ្ជាទិញផ្ទាល់នូវអាហារស្រស់តាមរយៈកម្មវិធីអនឡាញជាមួយនឹងជម្រើសប្រគល់ទំនិញដោយមិនប៉ះពាល់គ្នា។

ឧបករណ៍អនឡាញផ្សេងមួយទៀតរបស់ Alibaba គឺ DingTalk ក៏បានបន្ថែមមុខងារថ្មីដែលអនុញ្ញាតឱ្យបុគ្គលិកជាង200លាននាក់មកពីក្រុមហ៊ុនជាង10លាននៅប្រទេសចិន រក្សាទំនាក់ទំនងដើម្បីរៀនសូត្រ ធ្វើការជាដើមនៅក្នុងសម័យវិបត្តិសុខភាពនេះដែរ។

ប្រតិបត្តិការជីឌីថលគឺជាឧបករណ៍ដ៏អស្ចារ្យក្នុងសង្គ្រាមប្រឆាំង COVID-19។ លោក Jack Ma ធ្លាប់បានថ្លែងថា អ្នកដែលមានឧបករណ៍អនឡាញស្រាប់នឹងមានប្រៀបជាងអ្នកដទៃក្នុងការបង្កើនការលក់នៅក្នុងសម័យ COVID-19នេះ៕

ប្រភព៖ សារព័ត៌មានបរទេស

June 12, 2020

ដំរីជាង3,000ក្បាល កំពុង “អត់ការងារធ្វើ” ដោយសារ COVID-19 (វីដេអូ)

ឥទ្ធិពលរបស់ COVID-19 បានបណ្ដាលឱ្យទីតាំងគ្រប់គ្រងសត្វដំរីនានានៅប្រទេសថៃ ត្រូវបង្ខំចិត្តប្រគល់ដំរីដែលកំពុងប្រឈមនឹងហានិភ័យនៃការស្លាប់ដោយសារអត់អាហារ ទៅឱ្យម្ចាស់ដើមវិញ។

ដំរីជាង3,000ក្បាលនៅប្រទេសថៃគឺជាដំរីដែលស្និទ្ធស្នាលជាមួយមនុស្ស ប៉ុន្តែដោយសារតែឥទ្ធិពលរបស់ COVID-19 កន្លែងគ្រប់គ្រងដំរីជាច្រើនត្រូវបានបិទទ្វារចាប់ពីខែមីនា2020 នាំឱ្យដំរីជាង3,000ក្បាលនេះបានធ្លាក់ទៅក្នុងវិបត្តិ “គ្មានការងារធ្វើ” និងប្រឈមមុខទៅនឹងការបាត់បង់ជីវិតដោយសារដាច់អាហារ។

“នៅពេលនេះ យើងមិនមានប្រភពចំណូលអ្វីទៀតនោះទេ ប៉ុន្តែ ដំរីទាំងនោះនៅតែត្រូវការចំណីដូចធម្មតា” នេះបើតាមគ្រូបង្វឹកដំរី លោក Sinchai Joroenbunpod។

ប្រាក់ចំណាយទៅលើការថែទាំដំរីមួយក្បាល អាចឡើងដល់30ដុល្លារសម្រាប់មួយថ្ងៃ។ ប៉ុន្តែ អ្វីដែលជាបញ្ហាគួរឱ្យព្រួយបារម្ភជាងនេះ នោះគឺហានិភ័យនៃការកើតមាន “ជម្លោះ” រវាងដំរីជាមួយនឹងប្រជាជនក្នុងភូមិ។

ដំរីនានាអាចដើរវង្វេងផ្លូវក្នុងព្រៃ និងចូលដល់ភូមិឋាន ឬចំការរបស់ពលរដ្ឋដើម្បីស្វែងរកអាហារ។ ប្រការនេះអាចបង្កឱ្យកើតមានការប៉ះទង្គិចគ្នាជាមួយនឹងមនុស្ស។

ប្រភព៖ AFP

June 12, 2020

នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ (តពីម្សិលមិញ)

គំនិតដ៏មហាអស្ចារ្យដែលបង្ហាញឡើងយ៉ាងឆាប់រហ័សបែបនេះ គឺជាក្ដីស្រមើស្រមៃ ដែលមិនអាចទៅរួចបានឡើយ និងមានតែសាងភាពខូចខាតបន្ថែមច្រើនឡើងក្នុងវិស័យការទូត និងភាពជាអ្នកដឹកនាំរបស់សហរដ្ឋអាមេរិក។ សមាជិកដែលនៅសល់ ៦ប្រទេសទៀតរបស់ G7 គឺចក្រភពអង់គ្លេស បារាំង អាល្លឺម៉ង់ អ៊ីតាលី កាណាដា និងជប៉ុន នៅតែមានការសង្ស័យនៅក្នុងចិត្ត ក្នុងរឿងដែលចង់យកប្រទេសរុស្ស៊ីមកចូលរួម 1ទៀត ក្រោយពីដែនដីខ្លាឃ្មុំសមួយនេះ ត្រូវបានបណ្ដេញចេញនៅឆ្នាំ2014 ដោយសារករណី ចូលទៅឈ្លានពាន និងរំលោភយកដែនដីឆក ខ្រៃមៀរ។

ក្រៅពីនោះ អឺរ៉ុបត្រូវការដឹងមុនគេបំផុតថា តើលោកត្រាំ នឹងធ្វើអ្វីជាមួយឋានៈនៃភាពជាអ្នកដឹកនាំរបស់អាមេរិកក្នុងរបៀបរបបអន្តរជាតិ បែបសេរីនិយមនៃយុគសម័យក្រោយសង្គ្រាមលោកលើកទី2?។ វាមិនមែនត្រឹមតែថា ពួកប្រទេសសមាជិកផ្សេងៗទៀតរបស់ G7 មានអារម្មណ៍ធុញទ្រាន់តិចៗ ពីសំណើតាមអំពើចិត្តតែម្នាក់ឯងក្នុងរឿងការពង្រីកវង់(G7)ជាផ្លូវការរបស់លោកត្រាំប៉ុណ្ណោះទេ តែពួកអឺរ៉ុបថែមទាំងបានសម្រេចចិត្តរួចហើយទៀតផងថា ពួកត្រូវការថែរក្សាការសហការជាមួយចិនតទៅទៀត។

ជប៉ុន កូរ៉េខាងត្បូង អូស្ត្រាលី និងរុស្ស៊ី ក៏ដូចគ្នាដែរ សុទ្ធតែមានផលប្រយោជន៍ក្នុងការស្ដារ និងអភិវឌ្ឍន៍សេដ្ឋកិច្ចលំដាប់ភូមិភាគ ដោយមានចិនចូលមករួមជាមួយដែរ និងទាំងអស់គ្នាសុទ្ធតែត្រូវការឱ្យការស្ដារ និងអភិវឌ្ឍន៍នេះឱ្យរឹតតែស៊ីជម្រៅ ស្ថិតស្ថេរខ្លាំងឡើងទៀត។

ភាពបាក់បែករ៉ៅឆានផ្ទៃក្នុងរបស់ក្រុមប្រទេសលោកខាងលិច ក្នុងរឿងសម្ព័ន្ធភាពជាមួយចិន បានទទួលការបញ្ជាក់បន្ថែមដោយលោកស្រី មើកែល ក្នុងចំណុចសង្កេតផ្សេងៗ ដែលលោកស្រីបាននិយាយកាលពីសប្ដាហ៍កន្លងទៅ នៅពេលដែលលោកស្រីបានអះអាងថា បណ្ដាប្រទេសអឺរ៉ុបមាន “ផលប្រយោជន៍ខាងយុទ្ធសាស្ត្រដ៏ធំសម្បើម” ក្នុងការមានបដិសម្ព័ន្ធបែបចម្រើនជាមួយចិន បើទោះជាក្នុងពេលជាមួយគ្នានោះ នៅត្រូវខំព្យាយាមតាំងចិត្តយ៉ាងម៉ឺងម៉ាត់ ដើម្បីឱ្យបានឆ្ពោះទៅដល់ភាពជាភាគហ៊ុន ដែលមានភាពស្មើភាគគ្នាជាមួយចិនក៏ដោយ។

នៅក្នុងការជួបប្រាស្រ័យដ៏សំខាន់មួយដែលលោកស្រី មើរកែល បានទៅថ្លែងជាមួយមូលនិធិ Konrad-Adenauer Stiftung ក្រុមបណ្ដុំគំនិត ដែលមានសម្ព័ន្ធភាពជាមួយបក្ស គ្រីស្ទាន ដេម៉ូខ្រេទិក យូនៀន របស់លោកស្រី នៅទីក្រុងប៊ែរឡាំង កាលពីថ្ងៃទី27 ឧសភានោះ លោកស្រីបានប្រាប់ថា ចិននឹងក្លាយជារឿងមានកម្រិតភាពសំខាន់ខ្ពស់បំផុតមួយ នៅពេលរដ្ឋបាលរបស់លោកស្រីចូលទទួលតំណែងជាប្រធានរបស់សហភាពអឺរ៉ុបវិលជុំ 6ខែ ចាប់ពីថ្ងៃទី1 ខែកក្កដាខាងមុខ។

ការឈានដើរ ដែលខ្វះការត្រិះរិះ

លោកស្រី មើរកែល បានបញ្ជាក់ថា “យើងប្រជាពលរដ្ឋអឺរ៉ុប មានភាពចាំបាច់ក្នុងការត្រូវធានាភាពដាច់ខាតពិតប្រាកដរបស់ចិន ក្នុងការប្រកាសអាងឋានៈនៃភាពជាអ្នកដឹកនាំម្នាក់ក្នុងគ្រោងសាងស្ថាបត្យកម្មអន្តរជាតិ ដែលកំពុងមាននាពេលបច្ចុប្បន្ន”។ លោកស្រីបានបន្តទៀតថា បើទោះជាពួករដ្ឋបាលប្រទេសអឺរ៉ុប នឹងសម្លឹងមើលការតាំងជំហរដ៏រឹងមាំក្លៀវក្លារបស់ចិនដោយខ្សែភ្នែករិះគន់ សង្ស័យក៏ដោយចុះ តែលោកស្រី ក៏នឹងនៅតែមានគោលដៅក្នុងការថែរក្សាការសន្ទនា “យ៉ាងរិះគន់ សង្ស័យ និងយ៉ាងរីកចម្រើន” ជាមួយក្រុងប៉េកាំងជានិច្ច។

លោកស្រី មើរកែល បានសង្កត់ធ្ងន់ពីគោលបំណងរបស់លោកស្រី ក្នុងការទៅឱ្យដល់កិច្ចព្រមព្រៀងការវិនិយោគទុនជាមួយចិនឱ្យសម្រេចស្រេចបាច់ រហូតដល់ការស្វែងរកទីតាំងរួមគ្នាក្នុងការតស៊ូជាមួយការប្រែប្រួលនៃអាកាសធាតុ និងហានិភ័យផ្សេងៗខាងផ្នែកសុខភាពសាធារណៈលំដាប់ពិភពលោកទៀតផង។ គោលបំណងទាំងអស់នេះរបស់លោកស្រីមើរកែល គឺជាការពន្លត់ក្ដីសង្ឃឹមរបស់លោកត្រាំ ដែលចង់ប្រើ G7 ឬអ្វីដែលក្នុងពេលនេះ លោកហៅថា G10 ឬ G11 ដើម្បីបង្កើតក្រុមសម្ព័ន្ធមិត្តមួយឡើងមកគាបសង្កត់ចិន។

បើនិយាយងាយៗ ក៏គឺ ការប្រកាសតាមអំពើចិត្តតែម្នាក់ឯងពាក់ព័ន្ធនឹងការពង្រីក G7 នេះ ត្រូវបានដឹង ត្រូវបានយល់ដឹងទាំងអស់គ្នានៅក្នុងអឺរ៉ុបថា គ្រាន់តែជាការបន្តការឈានដើរ ដែលខ្វះការត្រិះរិះគិតពិចារណារបស់លោក ត្រាំ ក្នុងរយៈពេល 3ឆ្នាំនៃការគ្រងតំណែងប្រធានាធិបតីរបស់ខ្លួន ដែលក្លាយជាការបំផ្លិចបំផ្លាញរបៀបរបបពិភពលោកបែបពហុភាគីដែលពឹងលើច្បាប់វិន័យ ដែលពួកប្រធានាធិបតីរបស់សហរដ្ឋអាមេរិកទាំងឡាយ ដែលចេញមកពីបក្សនយោបាយទាំង2 បានខឹតខំព្យាយាមកសាងឡើងពេញមួយរយៈពេលជាង 70ឆ្នាំកន្លងមក។

ទង្វើបែបអាងវាយ អាងតប់ លើកចុងក្រោយបំផុតរបស់លោកត្រាំ ដែលបានប្រកាសចេតនារម្មណ៍របស់ខ្លួនក្នុងការដឹកនាំសហរដ្ឋអាមេរិក ដកខ្លួនចេញពីអង្គការសុខភាពពិភពលោក បានធ្វើឱ្យលោក Ursula von der Leyen ប្រធានរបស់គណៈកម្មាធិការអឺរ៉ុប (European Commision) និងលោក Josep Borrel អ្នកតំណាងផ្នែកកិច្ចការអន្តរជាតិ និងនយោបាយសន្តិសុខ និងជាអនុប្រធានរបស់គណៈកម្មាធិការអឺរ៉ុប ចេញសេចក្ដីថ្លែងការណ៍មួយ សម្ដែងការមិនយល់ស្រប កាលពីថ្ងៃទី30 ខែឧសភា។

សេចក្ដីថ្លែងការណ៍ច្បាប់នោះ មានខ្លឹមសាររិះគន់លោកប្រធានាធិបតី ដូណាល់ ត្រាំ យ៉ាងបើកចំហថា៖ “ខណៈដែលពិភពលោកនៅតែកំពុងតស៊ូនឹងរោគឆ្លងរាតត្បាតដ៏ធំកូវីដ-19 យ៉ាងឥតឈប់ឈរនេះ ភារកិច្ចចម្បងសម្រាប់គ្រប់ៗភាគីក៏គឺ ត្រូវព្យាយាមថែរក្សាជីវិតមនុស្សឱ្យបានច្រើនបំផុត ត្រូវព្យាយាមគ្រប់គ្រង និងសម្រាលភាពធ្ងន់ធ្ងររបស់រោគឆ្លងរាតត្បាតដ៏ធំនេះឱ្យបាន។ តាមរយៈទស្សនៈមួយនេះ សហភាពអឺរ៉ុបនឹងនៅតែផ្ដល់ការគាំទ្រ WHO បន្តទៅទៀត និងថែមទាំងបានចាត់ចែងរកប្រាក់មកបន្ថែមឱ្យហើយទៀតផង”

…នៅមានត…

ប្រែសម្រួលដោយ តាវ៉ែនតា

June 12, 2020

Drone តាក់ស៊ីហោះ145គម/ម៉ោង ចាប់ផ្ដើមដំណើរការដឹកទំនិញហើយ

ម៉ូដែលតាក់ស៊ីហោះ EHang នឹងអាចដឹកទំនិញទៅដល់ផ្ទះរបស់ប្រជាជន ក្រោយពីទទួលបានលិខិតអនុញ្ញាតរកស៊ីពីរដ្ឋាភិបាលចិន។

ម៉ូដែលតាកស៊ីហោះគ្មានមនុស្សបើករបស់ក្រុមហ៊ុនបច្ចេកវិទ្យា EHang នៅក្នុងខេត្តក្វាងចូវ ប្រទេសចិន បំពាក់ម៉ាស៊ីនរុញច្រានចំនួន16 អាចដឹកទំនិញទម្ងន់150គីឡូក្រាមនៅក្នុងជើងហោះហើរនីមួយៗ ហើយអាចហោះហើរទៅដល់តំបន់ដាច់ស្រយាល និងតំបន់ភ្នំទៀតផង។ ក្រុមហ៊ុន EHang ឱ្យដឹងថា drone ខ្នាតធំរបស់ពួកគេគឺជាមធ្យោបាយហោះហើរដឹកអ្នកដំណើរដោយស្វ័យប្រវត្ត ដែលដំណើរការដោយអគ្គិសនីដំបូងគេបង្អស់ក្នុងពិភពលោក។

កាលពីថ្ងៃទី27ឧសភា ក្រុមហ៊ុន EHang បានប្រកាសថា ពួកគេទទួលបានលិខិតអនុញ្ញាតពីរដ្ឋបាលអាកាសចរណ៍ស៊ីវិលចិន (CAAC/Civil Aviation Administration of China) រួចហើយ ដើម្បីប្រើប្រាស់ drone ដឹកទំនិញ។ ដោយមានល្បឿន 145គម/ម៉ោង ម៉ូដែលតាក់ស៊ីហោះនេះអាចដឹកទំនិញឆ្លងកាត់រវាងតំបន់វាលរាបជាមួយនឹងតំបន់ភ្នំ ឬរវាងតំបន់ដីគោកជាមួយនឹងតំបន់កោះនៅទីក្រុង Taizhou នៅក្នុងការហោះហើរសាកល្បងកន្លងមក។

ក្រុមហ៊ុន EHang បានចែករំលែកវីដេអូបង្ហាញអំពីម៉ូដែលតាក់ស៊ីហោះ EHang 216 ហោះហើរឆ្លងកាត់ផ្ទៃសមុទ្រ និងខ្នងភ្នំនានា។ Drone នេះត្រូវបានហោះហើរសាកល្បងជាលើកដំបូងនៅអឺរ៉ុបកាលពីខែមេសា2019។ EHang 216 អាចដឹកភ្ញៀវចំនួន2នាក់ក្នុងពេលតែមួយ។

កាលពីខែឧសភា2020 ក្រុមហ៊ុន EHang បានចុះកិច្ចព្រមព្រៀងជាមួយនឹងសណ្ឋាគារ LN Garden Hotel នៅខេត្តក្វាងចូវដើម្បីផ្ដល់សេវាកម្មដឹកអ្នកទេសចរក្នុងអនាគតដ៏ខ្លីខាងមុខ។ បច្ចុប្បន្ន អាជ្ញាធរចិនមិនទាន់ផ្ដល់លិខិតអនុញ្ញាតឱ្យក្រុមហ៊ុននេះដឹកអ្នកដំណើរនៅឡើយ។ ប៉ុន្តែ ការទទួលបានលិខិតអនុញ្ញាតឱ្យដឹកទំនិញគឺជាជំហានដ៏ជោគជ័យមួយសម្រាប់ក្រុមហ៊ុនបច្ចេកវិទ្យា EHang៕

ប្រភព៖ Fox News

June 12, 2020

Author: សឿន សំណាង