សឿន សំណាង - La Reine Media

ចិននឹងបិទស្ថានកុងស៊ុលអាមេរិកាំងនៅទីក្រុង Chengdu ដែលធ្វើសកម្មភាពទូទាំងតំបន់ភាគនិរតីប្រទេសចិន

ប្រទេសចិនកំពុងតែពន្លឿនដំណើរការដើម្បីបិទស្ថានកុងស៊ុលអាមេរិកាំងនៅទីក្រុង Chengdu ដើម្បីឆ្លើយតបនឹងការដែលទីក្រុងវ៉ាស៊ីងតោនបញ្ជាឱ្យបិទស្ថានអគ្គកុងស៊ុលចិននៅទីក្រុង Houston រដ្ឋ Texas។

សហរដ្ឋអាមេរិកមានស្ថានកុងស៊ុលចំនួន5នៅលើទឹកដីប្រទេសចិន រួមមាននៅ Guangzhou, Shanghai, Chengdu, Wuhan, Shenyang និងស្ថានកុងស៊ុលមួយកន្លែងទៀតសម្រាប់ Hong Kong និង Macau។

ប្រភពព័ត៌មានរបស់ South China Morning Post បានអះអាងថា ស្ថានកុងស៊ុលសហរដ្ឋអាមេរិកនៅ Chengdu ក្នុងខេត្ត Sichuan គឺជាជម្រើសដំបូងរបស់ប្រទេសចិនដើម្បីយកមកសងសឹក ហើយប្រការនេះនឹងធ្វើឱ្យភាពតានតឹងរវាងអាមេរិកាំង និងចិន បន្តឡើងកម្ដៅ។

ដំបូងឡើយ ប្រភពមួយចំនួនយល់ថា ចិននឹងបិទទ្វារស្ថានកុងស៊ុលអាមេរិកាំងនៅទីក្រុង Wuhan ក្រោយពីទីក្រុងប៉េកាំងបានប្រកាសសងសឹក។ ប៉ុន្តែ និពន្ធនាយករបស់ Global Times យល់ថា ការបិទស្ថានកុងស៊ុលអាមេរិកាំងនៅ Wuhan មិនមានភាពខ្លាំងក្លាគ្រប់គ្រាន់នោះទេ ព្រោះថាសហរដ្ឋអាមេរិកបានជម្លៀសបុគ្គលិករបស់ខ្លួនចេញអស់រួចហើយកាលពី COVID-19 កំពុងឆ្លងរាលដាលខ្លាំង។

ស្ថានកុងស៊ុលរបស់សហរដ្ឋអាមេរិកនៅទីក្រុង Chengdu បានបើកទ្វារកាលពីឆ្នាំ1985 និងមានសារសំខាន់ជាយុទ្ធសាស្ត្រ ដោយសារតែវាទទួលខុសត្រូវរាល់បេសកកម្មផ្នែកកុងស៊ុលនៅក្នុងតំបន់ភាគនិរតីនៃប្រទេសចិន រួមមានខេត្ត Sichuan, Yunnan, Guizhou, តំបន់ស្វយ័ត Tibet និង Chongqing។ ស្ថានកុងស៊ុលអាមេរិកាំងនៅទីក្រុង Chengdu ធ្លាប់ជាទីចាប់អារម្មណ៍របស់ចិនកាលពីពេលអតីតមេប៉ូលិស និងជាអភិបាលរងក្រុង Chongqing លោក Wang Lijun បានចូលទៅសុំសិទ្ធិជ្រោកកោនកាលពីថ្ងៃទី6កុម្ភៈ2012 នៅក្នុងកិច្ចខិតខំដើម្បីភៀសខ្លួន។

ក្រោយរយៈពេល30នាទីនៅក្នុងអគាររបស់ស្ថានកុងស៊ុលអាមេរិកក្នុងទីក្រុង Chengdu លោក Wang Lijun ក៏បានសម្រេចចិត្តបោះបង់ការភៀសខ្លួន និងត្រូវបានគេដឹងថា បានបង្ហាញភ័ស្តុតាងចោទប្រកាន់អតីតលេខាក្រុង Chongqing លោក Bo Xilai នៅក្នុងកិច្ចប្រជុំមួយជាមួយមន្ត្រីអាមេរិកាំងខណៈលោកកំពុងស្ថិតនៅក្នុងអគារស្ថានកុងស៊ុលនេះ។ លោក Bo Xilai ក្រោយមកក៏ត្រូវបានដកហូតតំណែង និងកាត់ទោសជាប់ពន្ធនាគារអស់មួយជីវិត ពីបទស៊ីសំណូក និងប្រើអំណាចខុសច្បាប់។ ចំណែកភរិយារបស់លោក Bo Xilai លោកស្រី Gu Kailai ក៏ត្រូវកាត់ទោសប្រហារជីវិតពីបទធ្វើឃាតអ្នកជំនួញអង់គ្លេស លោក Neil Heywood។

ចំពោះលោក Wang Lijun វិញ ក៏ត្រូវបានកាត់ទោសឱ្យជាប់ពន្ធនាគាររយៈពេល15ឆ្នាំពីបទរំលោភអំណាច ស៊ីសំណូក និងទោសភៀសខ្លួន។

សហរដ្ឋអាមេរិកកាលពីថ្ងៃទី21កក្កដា បានបញ្ជាឱ្យបិទស្ថានអគ្គកុងស៊ុលចិននៅទីក្រុង Houston ដោយទុកពេលឱ្យ72ម៉ោងសម្រាប់រៀបចំ។ ទង្វើនេះត្រូវបានសហរដ្ឋអាមេរិកអះអាងថា គឺដើម្បី “ការពារកម្មសិទ្ធិបញ្ហា និងព័ត៌មានឯកជនរបស់ជនជាតិអាមេរិកាំង”។ សហរដ្ឋអាមេរិកបានចោទប្រកាន់ថា ស្ថានអគ្គកុងស៊ុលចិននៅទីក្រុង Houston គឺជាមជ្ឈមណ្ឌលចារកម្មរបស់កងទ័ពចិន។

ចំណែកប្រទេសចិនវិញ បានហៅករណីនេះថាជា “ការបង្កើនភាពតានតឹងដែលមិនធ្លាប់មានពីមុនមក” និងថាជា “ការបង្កហេតុផ្នែកនយោបាយជាឯកតោភាគី” និង “បំផ្លាញទំនាក់ទំនងទ្វេភាគី” ហើយថា “ចិននឹងឆ្លើយតបជាចាំបាច់”៕

ប្រភព៖ SCMP

July 23, 2020

ប្រទេសក្រៗ អត់!! អាមេរិកត្រៀមចំណាយ 1,950លានដុល្លារ កក់ថ្លៃវ៉ាក់សាំងប្រឆាំងកូវីដ-19 ជាង 100លានដូស

រដ្ឋបាលសហរដ្ឋអាមេរិក នឹងចំណាយប្រាក់ចំនួន 1,950លានដុល្លារ សម្រាប់ទិញអនាគតវ៉ាក់សាំងប្រឆាំងកូវីដ-19 របស់ ហ្វៃហ្ស៊ើរ អ៊ិងក៍ ក្រុមហ៊ុនផលិតឱសថ សញ្ជាតិអាមេរិក និងបៃអូអេនថេក ក្រុមហ៊ុនតិចណូឡូជីសរីរាង្គ របស់ប្រទេសអាល្លឺម៉ង់ ចំនួន 100លានដូស បើសិនជាវ៉ាក់សាំងរបស់ពួកគេ បានទទួលការពិសោធរួចហើយថា មានសុវត្ថិភាព និងមានប្រសិទ្ធភាព។

កិច្ចសន្យាមួយនេះ គឺជាកិច្ចសន្យាដែលមានតម្លៃសរុបខ្ពស់បំផុតមិនធ្លាប់មាន ដែលសហរដ្ឋអាមេរិក យល់ព្រមនឹងចំណាយទៅលើវ៉ាក់សាំងមួយ ដោយសារតែកិច្ចព្រមព្រៀងកន្លងៗមក រដ្ឋបាល ច្រើនតែចុះហត្ថលេខាជួយចេញថ្លៃចំណាយផ្នែកការអភិវឌ្ឍ ទៅបណ្ដាអ្នកផលិតវ៉ាក់សាំងភាគច្រើន។

យ៉ាងណាក៏ដោយ ក្រោមកិច្ចសន្យានេះ ហ្វៃហ្ស៊ើរ និង បៃអូអេនថេក នឹងមិនបានទទួលប្រាក់អ្វីទាំងអស់ ពីរដ្ឋបាលអាមេរិក រហូតទាល់តែវ៉ាក់សាំងរបស់ពួកគេឆ្លងផុតការពិសោធរួចហើយថា មានសុវត្ថិភាព និងប្រសិទ្ធភាព រួមទាំងទទួលបានជោគជ័យក្នុងផ្នែកការផលិត។ នេះបើតាមការឱ្យដឹងពីអ្នកនាំពាក្យរបស់ក្រុមហ៊ុន ហ្វៃហ្ស៊ើរ។

ក្រសួងសុខភាព និងសេវាកម្មមនុស្ស និងក្រសួងការពារជាតិរបស់សហរដ្ឋអាមេរិក បានឱ្យដឹងថា កិច្ចព្រមព្រៀងនេះ ថែមទាំងបើកផ្លូវឱ្យសហរដ្ឋអាមេរិក អាចទិញវ៉ាក់សាំងបន្ថែមទៀតបាន 500លានដូស ខណៈដែលក្រសួងសុខភាព និងសេវាកម្មមនុស្ស បានឱ្យដឹងថា ជនជាតិអាមេរិកនឹងទទួលបានវ៉ាក់សាំងដោយមិនចាំបាច់ចំណាយប្រាក់អ្វីទាំងអស់ តែការធានារ៉ាប់រងសុខភាពរបស់ពួកគេ អាចនឹងគិតថ្លៃចាយវាយ។

ក្នុងការសាកល្បងខាងគ្លីនិក(ការព្យាបាល)គឺ វ៉ាក់សាំងសាកល្បងរបស់ហ្វៃហ្ស៊ើរ និង បៃអូអេបថេក ចាំបាច់ត្រូវប្រើវ៉ាក់សាំង 2ដូសក្នុងការព្យាបាល នោះមានន័យថា តាមរយៈការបញ្ជាទិញ 100ដូស នឹងមានជនជាតិអាមេរិកបានទទួលវ៉ាក់សាំង 50លាននាក់ និងតាមរយៈកិច្ចព្រមព្រៀង បានបញ្ជាក់ថា វ៉ាក់សាំង 2ដូស មានតម្លៃ 39ដុល្លារ។

បច្ចុប្បន្នទូទាំងពិភពលោក មានវ៉ាក់សាំងប្រឆាំងវីរុសកូរ៉ូណាប្រភេទថ្មី ច្រើនជាង 150ប្រភេទ កំពុងស្ថិតក្នុងដំណាក់កាលអភិវឌ្ឍន៍ ដោយប្រើតិចណូឡូជីដ៏សម្បូរបែប ក្នុងនោះរួមមាន 24ប្រភេទ បានចូលដល់ដំណាក់កាលសាកល្បងនៅលើមនុស្សហើយ ហើយរដ្ឋបាលនៃប្រទេសផ្សេងៗ បានចុះហត្ថលេខាលើកិច្ចសន្យាជាមួយបណ្ដាអ្នកផលិតថ្នាំ ដើម្បីបញ្ជាទិញអនាគតវ៉ាក់សាំងទាំងនោះជាបណ្ដើរៗហើយ។

ចំណែកសហរដ្ឋអាមេរិក បានចុះហត្ថលេខាលើកិច្ចព្រមព្រៀងផ្សេងៗ សម្រាប់គាំទ្រគ្រោងការអភិវឌ្ឍន៍វ៉ាក់សាំងរបស់ក្រុមហ៊ុនជាច្រើន ក្នុងនោះរួមទាំង ម៉ូឌើណា, អេស្ត្រាសេនេកា និងណូវ៉ាវ៉េកស៍ ជាដើម។

តែវ៉ាក់សាំងរបស់ហ្វៃហ្ស៊ើរ និង បៃអូអេនថេក គឺជាវ៉ាក់សាំងមួយ ក្នុងចំណោមវ៉ាក់សាំងដែលត្រៀមចូលទៅរកការសាកល្បងក្នុងក្រុមមនុស្សដ៏ធំ ក្រោយពីវាមានលទ្ធផលចេញមកក្នុងន័យវិជ្ជមាន ក្នុងការសាកល្បងលើមនុស្សក្រុមតូចៗក្នុងដំណាក់កាលដំបូង។

ហ្វៃហ្ស៊ើរ នឹងប្រគល់វ៉ាក់សាំង បើសិនជាវាបានទទួលការអនុញ្ញាតឱ្យប្រើប្រាស់ក្នុងករណីបន្ទាន់ ឬបានទទួលលិខិតអនុញ្ញាតពីអង្គការអាហារ និងថ្នាំ នៃសហរដ្ឋអាមេរិក ក្នុងករណីដែលវាបានពិសោធហើយថា មានសុវត្ថិភាព និងប្រសិទ្ធភាពក្នុងការសាកល្បងខាងគ្លីនិក(ការព្យាបាល)ក្រុមធំ ឬដំណាក់កាលទី3។

ក្រុមហ៊ុនទាំង2 (ហ្វៃហ្ស៊ើរ និងបៃអូអេនថេក) រំពឹងថា វ៉ាក់សាំងរបស់ពួកគេ នឹងត្រៀមជាស្រេច សម្រាប់ការសុំការអនុម័តពីអង្គភាពដែលគ្រប់គ្រងច្បាប់ បានយ៉ាងលឿនបំផុតក្នុងខែតុលា បើសិនការសិក្សាស្រាវជ្រាវដែលកំពុងដំណើរការ បានទទួលជោគជ័យ។

បច្ចុប្បន្ន ខាងហ្វៃហ្ស៊ើរ និង បៃអូអេនថេក រំពឹងថា ពួកគេនឹងអាចផលិតវ៉ាក់សាំងបានខ្ពស់បំផុត 100លានដូសទូទាំងពិភពលោក ក្នុងអំឡុងដំណាច់ឆ្នាំ2020 និងមានភាពអាចទៅរួចក្នុងការអាចផលិតបានច្រើនជាង 1,300លានដូស ក្នុងអំឡុងដាច់ឆ្នាំ2021។

កាលពីថ្ងៃចន្ទ(ទី20កក្កដា) ហ្វៃហ្ស៊ើរ និង បៃអូអេនថេក បានព្រមព្រៀងក្នុងការចាត់ការស្វែងរកអនាគតវ៉ាក់សាំងប្រឆាំងកូវីដ-19 ចំពោះសហរាជអាណាចក្រ 30លានដូស តែមិនមានការបង្ហើបឱ្យដឹងអំពីតម្លៃឡើយ៕

ប្រភព៖ សារព័ត៌មានបរទេស

July 23, 2020

Elon Musk ប្រកាសថា “បច្ចេកវិទ្យាសម្រាប់រថយន្តបើកបរស្វ័យប្រវត្តទាំងស្រុង” នឹងរួចរាល់ក្នុងឆ្នាំនេះ

ក្រុមហ៊ុនផលិតរថយន្ត Tesla បន្តរកបានប្រាក់ចំណេញនៅក្នុងត្រីមាសទី2 ដែលនេះបានជួយឱ្យមូលបត្ររបស់ Tesla កើនឡើងយ៉ាងខ្ពស់កាលពីម្សិលមិញ (22កក្កដា)។

ក្រុមហ៊ុន Tesla កាលពីម្សិលមិញបានប្រកាសថា ខ្លួនទទួលបានប្រាក់ចំណេញសុទ្ធចំនួន104លានដុល្លារ និងប្រាក់ចំណេញប្រតិបត្តិអាជីវកម្មចំនួន327លានដុល្លារក្នុងត្រីមាសទី2 បើទោះជាត្រូវបង្ខំចត្តិបិទទ្វាររោងចក្រនៅ Fremont រដ្ឋ California ក្នុងរយៈពេលជិតពាក់កណ្ដាលនៃត្រីមាសមុន។ ប្រាក់ចំណេញប្រតិបត្តិការអាជីវកម្មក្នុងរយៈពេល12ខែកន្លងទៅរបស់ Tesla បានថយចុះ5%។ ក្រុមហ៊ុននេះបានឱ្យដឹងថា អត្រាថយចុះនេះនឹងកើនឡើងបន្ថែមទៀតនៅពេលខាងមុខ។

ការរកបានប្រាក់ចំណេញជាបន្តបន្ទាប់ក្នុងរយៈពេល4ត្រីមាសកន្លងទៅនេះ បានជួយឱ្យ Tesla មានលក្ខណៈគ្រប់គ្រាន់ក្នុងការចូលទៅកាន់សន្ទស្សន៍ S&P 500 (S&P 500 គឺជាសន្ទស្សន៍មូលបត្រមួយដែលវាស់ស្ទង់ប្រសិទ្ធភាពនៃការជួញដូរមូលបត្ររបស់ក្រុមហ៊ុនធំៗចំនួន500 ដែលកំពុងធ្វើការជួញដូរក្នុងផ្សារហ៊ុននានានៅសហរដ្ឋអាមេរិក)។។ មូលបត្ររបស់ក្រុមហ៊ុននេះ កាលពីម្សិលមិញបានកើន4% ក្នុងការជួញដូរក្រៅម៉ោង នាំឱ្យវាឡើងថ្លៃដល់1,656ដុល្លារក្នុង1ហ៊ុន។ ជាសរុប រាប់ចាប់ពីដើមឆ្នាំ មូលបត្រ Tesla បានកើនឡើង3ដង ដែលក៏បានជួយឱ្យវាក្លាយជាក្រុមហ៊ុនផលិតរថយន្តដែលមានតម្លៃទុនខ្ពស់ជាងគេក្នុងពិភពលោកផងដែរ។

ក្នុងត្រីមាសទី2 តួលេខរថយន្ត Tesla បានថយចុះ5% បើធៀបជាមួយនឹងរយៈពេលដូចគ្នាកាលពីឆ្នាំទៅ។ ប៉ុន្តែ អត្រាថយចុះនេះតិចជាងឆ្ងាយណាស់បើធៀបជាមួយនឹងអត្រា30% ឬច្រើនជាងនេះរបស់បណ្ដាក្រុមហ៊ុនផលិតរថយន្តនានាក្នុងពិភពលោក។

CEO របស់ Tesla លោក Elon Musk កាលពីម្សិលមិញបានប្រកាសថា ក្រុមហ៊ុននេះនឹងសាងសង់រោងចក្របន្ទាប់មួយទៀតនៅ Austin ក្នុងរដ្ឋ Texas។

មហាសេដ្ឋីពិភពលោកលំដាប់ទី5រូបនេះ ក៏មានការជឿជាក់ខ្លាំងទៅលើសមត្ថភាពនៃប្រព័ន្ធបើកបរស្វ័យប្រវត្តរបស់រថយន្ត Tesla ផងដែរ។ លោករំពឹងថា ការអភិវឌ្ឍបច្ចេកវិទ្យា “បើកបរស្វ័យប្រវត្តទាំងស្រុង” នឹងរួចរាល់ជាស្ថាពរនៅក្នុងឆ្នាំ2020នេះ។ លោក Musk ថ្លែងថា “ជិតដល់ពេលខ្ញុំអាចធ្វើដំណើរពីផ្ទះមកកាន់ក្រុមហ៊ុន ដោយមិនចាំបាច់ធ្វើអន្តរាគមន៍អ្វីនោះឡើយ”៕

ប្រភព៖ CNN

July 23, 2020

ចិននិយាយថា ស្ថានទូតរបស់ខ្លួននៅសហរដ្ឋអាមេរិក ត្រូវរងការគំរាមបំផ្ទុះគ្រាប់បែក

អ្នកនាំពាក្យក្រសួងការបរទេសចិនបានឱ្យដឹងថា ស្ថានទូតចិននៅរដ្ឋធានីវ៉ាស៊ីងតោន ជាច្រើនលើកបានរងការគំរាមកំហែងវាយប្រហារ ដោយសារតែ “ការគុំកួន” របស់រដ្ឋាភិបាលសហរដ្ឋអាមេរិក។

“នេះគឺជាការបង្កើនការកៀបសង្កត់ផ្នែកនយោបាយមិនធ្លាប់មានរបស់សហរដ្ឋអាមេរិកមកលើប្រទេសចិន ក្រោយពីទីក្រុងវ៉ាស៊ីងតោនបានរឹតត្បិតលើសកម្មភាពរបស់ក្រុមអ្នកការទូតចិន និងបានបើកមើលបញ្ចើរបស់ស្ថាប័នការទូតចិន” អ្នកនាំពាក្យក្រសួងការបរទេសចិន លោកស្រី Hua Chunying បានសរសេរបែបនេះកាលពីថ្ងៃទី22កក្កដានៅលើទំព័រ Twitter ក្រោយពីសហរដ្ឋអាមរិកប្រកាសស្នើឱ្យស្ថានអគ្គកុងស៊ុលចិននៅទីក្រុង Houston បិទទ្វារចាប់ពីថ្ងៃទី24កក្កដា។

“ក្រោយពីមានពាក្យសម្ដីប្រកបដោយការញុះញង់ និងការគុំកួនដែលត្រូវបានរដ្ឋាភិបាលសហរដ្ឋអាមេរិកបំប៉ោង ស្ថានទូនចិនក៏ទទួលរងការគំរាមកំហែងបំផ្ទុះគ្រាប់បែក និងការគំរាមសម្លាប់” លោកស្រី Hua Chunying សរសេរបន្តដូច្នេះ ប៉ុន្តែមិនបានបញ្ជាក់លម្អិតថា តើការគំរាមកំហែងនេះ អ្នកណាជាអ្នកធ្វើ និងនៅពេលណានោះទេ។

លោកស្រីយល់ថា ការរំលោភបំពាន និងការធ្វើអន្តរាគមន៍ “មិនដែលមាននៅក្នុងហ្សែន និងប្រពៃណីនៃគោលនយោបាយការទូតចិននោះឡើយ” និងបានចោទប្រកាន់ស្ថានទូតសហរដ្ឋអាមេរិកនៅទីក្រុងប៉េកាំងថាបានវាយប្រហារប្រព័ន្ធនយោបាយចិន ខណៈដែលក្រុមមន្ត្រីការទូតចិន “កំពុងប្រឹងប្រែងជំរុញទំនាក់ទំនងមិត្តភាព និងការយល់អំពីគ្នាទៅវិញទៅមក”។

លោកស្រី Chunying ថ្លែងថា “សហរដ្ឋអាមេរិកគួរតែបោះបង់ការសម្រេចចិត្តប្រកបដោយកំហុសឆ្គងរបស់ខ្លួន។ ប្រទេសចិនប្រាកដជានឹងប្រតិកម្មតបតដោយវិធានការម៉ឺងម៉ាត់បំផុត”។

សេចក្ដីថ្លែងការណ៍របស់លោកស្រី Chungying ត្រូវបានលើកឡើងបន្ទាប់ពីសហរដ្ឋអាមេរិកបានស្នើឱ្យបិទស្ថានអគ្គកុងស៊ុលចិននៅទីក្រុង Houston ដោយចោទថា នេះគឺជាមជ្ឈមណ្ឌលចារកម្មរបស់ចិន។ ប្រធានាធិបតី Donald Trump ថែមទាំងបានប្រកាសថា អាចបិទទ្វារស្ថានកុងស៊ុលចិននៅសហរដ្ឋអាមេរិកគ្រប់ពេល នៅពេលចាំបាច់។

ក្រៅពីនៅ Houston ចិនក៏មានស្ថានកុងស៊ុលចំនួន4ផ្សេងទៀត នៅទីក្រុង New York, Los Angeles, San Francisco និង Chicago ទន្ទឹមនឹងស្ថានទូតនៅទីក្រុងវ៉ាស៊ីងតោន។

ក្រុមអ្នកជំនាញអំពីប្រទេសចិននៅសហរដ្ឋអាមេរិកបានអះអាងថា ទីក្រុងប៉េកាំងអាចបិទស្ថានកុងស៊ុលអាមេរិកាំងនៅហុងកុង សៀងហៃ ឬក្វាងចូវ ដែលនេះគឺសុទ្ធតែអាចបង្កផលប៉ះពាល់ដល់ក្រុមហ៊ុនអាមេរិកាំងដែលរកស៊ីនៅប្រទេសចិន៕

ប្រភព៖ សារព័ត៌មានបរទេស

July 23, 2020

សងសឹក!! ក្មេងស្រីអាហ្វហ្គានីស្ថាន បាញ់រះកាំភ្លើងអាកា ប្រហារជីវិត “អ្នកប្រយុទ្ធតាលីបង់” ស្លាប់ 2នាក់ គុំដោយសារសម្លាប់ឪពុកម្ដាយនាង

យុវតីជនជាតិអាហ្វហ្គានីស្ថានម្នាក់ បានស្រវាចាប់កាំភ្លើងអាកា ហើយបាញ់រះយ៉ាងឥតសំចៃដៃទៅលើពួកអ្នកប្រយុទ្ធតាលីបង់ បណ្ដាលឱ្យស្លាប់ 2នាក់ និងរងរបួសជាច្រើននាក់ ក្រោយពីឪពុកម្ដាយរបស់នាង ត្រូវពួកតាលីបង់សម្រុកចូលមកសម្លាប់ដល់ក្នុងផ្ទះ មូលហេតុដោយសារតែផ្ដល់ការគាំទ្ររដ្ឋបាលក្រុងកាប៊ុល។

លោក ហាប៊ីប៊ុរ៉ោះម៉ាន ម៉ាលេកសាដា អធិការប៉ូលិសក្នុងតំបន់ បានផ្ដល់ព័ត៌មានដល់ទីភ្នាក់ងារព័ត៌មានAFP ថា ពួកអ្នកប្រយុទ្ធតាលីបង់បានសម្រុកចូលទៅក្នុងផ្ទះរបស់ កាម៉ា ហ្គុល យុវតីម្នាក់ ដែលរស់នៅជាមួយឪពុកម្ដាយនៅឯខេត្តហ្គ័រ ភាគកណ្ដាលនៃប្រទេស កាលពីសប្ដាហ៍កន្លងទៅ ដើម្បីតាមរកឪពុករបស់នាងដែលជាអ្នកដឹកនាំភូមិ និងផ្ដល់ការគាំទ្ររដ្ឋបាលក្រុងកាប៊ុល។

ជនល្មើសព្យាយាមចាប់អូសឪពុករបស់ ហ្គុល ចេញទៅខាងក្រៅផ្ទះ តែម្ដាយរបស់នាងបានចូលទៅរារាំង ទើបត្រូវពួកតាលីបង់បាញ់សម្លាប់ទាំង 2នាក់។

លោក ម៉ាលេកសាដា បញ្ជាក់ថា “កាម៉ា ហ្គុល ដែលពេលនោះកំពុងនៅក្នុងផ្ទះ បានស្រវាយកកាំភ្លើង AK-47 របស់ឪពុកនាង និងបាញ់រះយ៉ាងសន្ធាប់ទៅលើពួកតាលីបង់ 2នាក់ដែលបានសម្លាប់ឪពុកម្ដាយរបស់នាង រហូតដល់ស្លាប់ និងថែមទាំងធ្វើឱ្យពួកជនល្មើសដទៃទៀតរងរបួសជាច្រើននាក់”

អាជ្ញាធរ មិនបានផ្ដល់ព័ត៌មានជាក់ច្បាស់ឡើយថា តើ ហ្គុល មានអាយុប៉ុន្មានពិតប្រាកដនោះទេ តែសន្និដ្ឋានថា ប្រហែលជាស្ថិតក្នុងចន្លោះ 14-16ឆ្នាំ។

បន្ទាប់ពីនោះ ពួកតាលីបង់ បានលើកគ្នាមកបាញ់កម្ទេចផ្ទះរបស់នាង តែពួកអ្នកស្រុក និងកងកម្លាំងរបស់រដ្ឋបាល បានជួយគ្នាបាញ់តបតវិញ រហូតធ្វើឱ្យពួកវាដកថយទៅវិញ។

លោក ម៉ូហាមេត អារេហ្វ អាប៊ើរ អ្នកនាំពាក្យរបស់អភិបាលខេត្ត ហ្គ័រ បានបញ្ជាក់ថា អង្គភាពសន្តិសុខបាននាំខ្លួនកាម៉ា ហ្គុល និងប្អូនប្រុសរបស់នាងទៅរស់នៅក្នុងទីតាំងដែលមានសុវត្ថិភាពហើយ ខណៈដែលអ្នកតាមដានព័ត៌មានក្នុងប្រព័ន្ធបណ្ដាញសង្គម បាននាំគ្នាសរសើរតម្កើងពីភាពក្លាហានរបស់យុវតីរូបនេះ ហើយរូបភាពរបស់យុវតីមុស្លីមរូបនេះ ដែលដៃកាន់កាំភ្លើងអាកាដាក់នៅលើភ្លៅ ក៏ត្រូវបានផ្សព្វផ្សាយជាទូទៅនៅក្នុងសង្គមអនឡាញពេញមួយរយៈពេល 2-3ថ្ងៃកន្លងមកនេះ។

“សូមកោតសរសើរភាពក្លាហានរបស់នាង!! ពិតជាធ្វើបានល្អមែន!!” ម្ចាស់គណនីហ្វេសប៊ុកឈ្មោះ ណាជិបា រ៉ាមី បានសរសេរសារនេះ ខណៈដែលម្នាក់ទៀត បានលើកតម្កើងយុវតី ហ្គុល ថា ជាតំណាង “ថាមពលរបស់យុវតីអាហ្វហ្គាន់”

លោក ម៉ូហាមេត សាលេហ៍ បន្ថែមថា “យើងដឹងថា គ្មានអ្វីមកជំនួសឪពុកម្ដាយបានទេ តែយ៉ាងហោចណាស់ ការបានសងសឹក ក៏នឹងធ្វើឱ្យផ្លូវចិត្តរបស់នាងបានស្ងប់ខ្លះដែរ”

***ក្រុមប្រដាប់អាវុធតាលីបង់ តែងតែសម្រុកចូលមកសម្លាប់អ្នកស្រុកអាហ្វហ្គាន់ ណាដែលពួកវាសង្ស័យថា ជាខ្សែរយៈសម្ងាត់ឱ្យរដ្ឋបាល ឬអង្គភាពសន្តិសុខអាហ្វហ្គានីស្ថាន៕

ប្រភព៖ សារព័ត៌មានបរទេស

July 23, 2020

ក្រសួងរកឃើញអ្នកផ្ទុកវីរុសCOVID-19 ចំនួន1នាក់ទៀតហើយសម្រាប់ព្រឹកនេះ

ព្រឹកថ្ងៃទី23កក្កដានេះ ក្រសួងសុខាភិបាលកម្ពុជាបានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន1នាក់ និងអ្នកជំងឺ2នាក់ទៀតបានជាសះស្បើយ។

ករណីរកឃើញអ្នកជំងឺថ្មីនេះ គឺជាបុរសអាយុ28ឆ្នាំ មានទីលំនៅនៅក្នុងភូមិគោកត្នោត ឃុំកណ្ដែត ស្រុកប្រាសាទបាគង ខេត្តសៀមរាប។ ករណីនេះត្រូវបានក្រសួងរកឃើញកាលពីថ្ងៃទី22កក្កដា ក្រោយពីការធ្វើតេស្តរកវីរុសជាលើទីពីរ។

គិតត្រឹមព្រឹក ថ្ងៃទី23កក្កដានេះ កម្ពុជាបានរកឃើញអ្នកផ្ទុកវីរុសCOVID-19 សរុប 198នាក់ ក្នុងនោះមានអ្នកជំងឺចំនួន 5នាក់កំពុងសម្រាកព្យាបាលនៅមន្ទីរមិត្តភាពខ្មែរ-សូវៀត និងនៅឯមជ្ឈមណ្ឌលសុខភាពចាក់អង្រែ ក្នុងទីក្រុងភ្នំពេញចំនួន49នាក់។

July 23, 2020

សហរដ្ឋអាមេរិកថា ស្ថានអគ្គកុងស៊ុលចិនគឺជា “មជ្ឈមណ្ឌលស៊ើបការណ៍សម្ងាត់”

លោក David Stillwell ដែលជាជំនួយការម្នាក់របស់រដ្ឋមន្ត្រីការបរទេសសហរដ្ឋអាមេរិក បានឱ្យដឹងថា ស្ថានអគ្គកុងស៊ុលចិននៅទីក្រុង Houston គឺជាមជ្ឈមណ្ឌលស៊ើបការណ៍សម្ងាត់របស់កងទ័ពចិន។

“កងទ័ពចិនបានបញ្ជូននិស្សិតរបស់ខ្លួន ទាំងបើកចំហ ទាំងលាក់ការណ៍ ទៅសិក្សានៅសហរដ្ឋអាមេរិកដើម្បីរៀនអំពីអ្វីដែលអាចជំរុញឱ្យពួកគេមានប្រៀបក្នុងសង្គ្រាម”។ លោក David Stillwell ថ្លែងបែបនេះនៅក្នុងកិច្ចសម្ភាសមួយជាមួយសារព័ត៌មាន NYTimes កាលពីថ្ងៃទី22កក្កាកន្លងទៅ។ លោកបន្ថែមថា សកម្មភាពទាំងអស់នេះទទួលបានជំនួយឧបត្ថម្ភពីស្ថានអគ្គកុងស៊ុលចិននៅទីក្រុង Houston។

លោក David Stillwell ក៏បានចោទប្រកាន់ស្ថានអគ្គកុងស៊ុលចិននៅ Houston និងក្រុមអ្នកការទូតចិនថា ថ្មីនេះបានចូលរួមធ្វើសកម្មភាពដែលគួរឱ្យសង្ស័យនៅអាកាសយានដ្ឋានអន្តរជាតិ Houston ជាកន្លែងដែលពួកគេនាំពលរដ្ឋចិនឡើងយន្តហោះត្រលប់ទៅស្រុក ក្នុងគ្រាដែល COVID-19 កំពុងរាតត្បាតខ្លាំង។

ស្ថានទូតចិនប្រចាំទីក្រុងវ៉ាស៊ីងតោន និងភាគីក្រុមហ៊ុន Air China មិនបានបញ្ចេញមតិអ្វីទៅនឹងការចោទប្រកាន់ខាងលើនេះទេ។ ចំណែកក្រសួងការបរទេសសហរដ្ឋអាមេរិកក៏មិនបានឆ្លើយនឹងសំណួរដើម្បីបញ្ជាក់អំពីសកម្មភាពដែលគួរឱ្យសង្ស័យរបស់ចិននៅព្រលានយន្តហោះ Houston ថាជាអ្វីនោះដែរ។

ក្នុងថ្ងៃដដែល តំណាងរាស្ត្រនៃសភាជាន់ខ្ពស់សហរដ្ឋអាមេរិក លោក Marco Rubio បានបង្ហោះសារនៅលើ Twitter ថា “ស្ថានអគ្គកុងស៊ុលចិននៅ Houston មិនមែនជាស្ថាប័នការទូតនោះទេ។ នោះគឺជាចំណុចកណ្ដាលក្នុងបណ្ដាញស៊ើបការណ៍សម្ងាត់ខ្នាតធំ និងធ្វើសកម្មភាពបង្កផលប៉ះពាល់ដល់សហរដ្ឋអាមេរិក។ អគារនោះ (អគារនៃអគ្គកុងស៊ុលចិន) ត្រូវតែបិទទ្វារនៅពេលនេះ ហើយក្រុមចារកម្មមានពេល72ម៉ោងដើម្បីចាកចេញ មិនដូច្នោះទេពួកគេនឹងត្រូវចាប់ខ្លួន”។

សេចក្ដីប្រកាសនេះ ត្រូវបានលោក David Stillwell លើកឡើង ក្រោយពីក្រសួងការបរទេសចិនបានឱ្យដឹងថា សហរដ្ឋអាមេរិកកាលពីថ្ងៃទី21កក្កដា បានស្នើឱ្យប្រទេសចិនបិទទ្វារស្ថានអគ្គកុងស៊ុលរបស់ខ្លួននៅទីក្រុង Houston ដោយទុកពេលឱ្យ72ម៉ោង។ ក្រសួងការបរទេសសហរដ្ឋអាមេរិកបកស្រាយថា ពួកគេធ្វើបែបនេះគឺដើម្បីការពារកម្មសិទ្ធិបញ្ហា និងព័ត៌មានឯកជនរបស់ពលរដ្ឋអាមេរិកាំង”។ សហរដ្ឋអាមេរិកសង្កត់ធ្ងន់ថា ក្រុមអ្នកការទូតត្រូវតែគោរពច្បាប់ ការកំណត់របស់ប្រទេសជាម្ចាស់ផ្ទះ និង “ត្រូវមានភារកិច្ចមិនលូកដៃទៅក្នុងកិច្ចការផ្ទៃក្នុង” របស់ប្រទេសនោះ។

ប្រទេសចិនបានហៅករណីនេះថាជា “ការបង្កើនភាពតានតឹងមិនធ្លាប់មាន” ជា “ការបង្កហេតុផ្នែកនយោបាយជាឯកតោភាគី” និងជា “ការបំផ្លាញទំនាក់ទំនងទ្វេភាគី ហើយចិននឹងមានការឆ្លើយតបជាចាំបាច់”។ ក្រោយពីបានស្នើឱ្យបិទទ្វារ ក្រុមប៉ូលិស និងក្រុមពន្លត់អគ្គិភ័យ បានទទួលសេចក្ដីរាយការណ៍អំពីករណីដុតឯកសារនៅក្នុងស្ថានអគ្គកុងស៊ុលចិននៅ Houston កាលពីម្សិលមិញ។

ស្ថានអគ្គកុងស៊ុលចិនដែលមានទីតាំងនៅក្នុងទីក្រុង Houston ផ្ដល់សេវាកម្មផ្នែកទិដ្ឋាការ និងលិខិតឆ្លងដែនជាដើម នៅក្នុងរដ្ឋចំនួន8នៅសហរដ្ឋអាមេរិក ក្នុងនោះក៏មាន Texas ផងដែរ។ ក្រៅពីស្ថានអគ្គកុងស៊ុលនេះ ចិនក៏មានស្ថានកុងស៊ុលចំនួន4ផ្សេងទៀតនៅលើទឹកដីសហរដ្ឋអាមេរិក។

ទំនាក់ទំនងរវាងទីក្រុងវ៉ាស៊ីងតោន និងប៉េកាំង កំពុងស្ថិតក្នុងស្ថានភាពតានតឹងបំផុតក្នុងរយៈពេលច្រើនឆ្នាំមកនេះ ដោយមានបញ្ហាជាច្រើនដែលបាននិងកំពុងកើតឡើង ក្នុងនោះមានដូចជា បញ្ហាវីរុសCOVID-19 បញ្ហាហុងកុង និងតំបន់ស៊ីនជាំង រួមនឹងសង្គ្រាមពាណិជ្ជកម្ម។ល។

ប្រភព៖ SCMP

July 23, 2020

(វីដេអូ)ឆេះយន្តហោះដឹកទំនិញនៅព្រលានយន្តហោះប្រទេសចិន បណ្ដាលឱ្យយន្តហោះខូចខាតយ៉ាងធ្ងន់ធ្ងរ

យន្តហោះដឹកទំនិញ Boeing 777F របស់ក្រុមហ៊ុនអាកាសចរណ៍អេត្យូពី បានឆាប់ឆេះសន្ធោសន្ធៅនៅក្នុងអាកាសយានដ្ឋានអន្តរជាតិ Pudong (Shanghai Pudong International Airport) នៅប្រទេសចិន មុននេះប៉ុន្មានម៉ោងប៉ុណ្ណោះ។

អណ្ដាតភ្លើងបានឆាបឆេះចេញពីផ្នែកខាងក្រោយនៃយន្តហោះពណ៌សដែលកំពុងចតនៅក្នុងព្រលានយន្តហោះ នាវេលាម៉ោង15ល្ងាច (ម៉ោង14នៅភ្នំពេញ) ថ្ងៃទី22កក្កដានេះ ប៉ុន្តែត្រូវបានពន្លត់រួចរាល់ហើយ។ ករណីអគ្គិភ័យឆាប់ឆេះយន្តហោះពាណិជ្ជកម្មនេះ មិនបានបណ្ដាលឱ្យមានមនុស្សស្លាប់ ឬរបួងនោះទេ ប៉ុន្តែ យន្តហោះត្រូវរងការខូចខាតយ៉ាងធ្ងន់ធ្ងរ ហើយទំនងជានឹងមិនអាចហោះហើរបានទៀតទេ។

ក្រុមហ៊ុនអាកាសចរណ៍អេត្យូពី (Ethiopia) ទទួលបានយន្តហោះ Boeing 777F នេះ កាលពីខែតុលា2014។ Boeing 777F បានហោះហើរពីទីក្រុង Brussels ប្រទេសបែលហ្សិក និងបានមកដល់អាកាសយានដ្ឋានអន្តរជាតិ Shanghai Pudong International Airport នៃប្រទេសចិននៅព្រឹកមិញនេះ។ មុនពេលឆាប់ឆេះ យន្តហោះនេះកំពុងត្រៀមរៀបចំចាកចេញទៅកាន់ទីក្រុង Sao Paulo ប្រទេសប្រេស៊ីល។

https://www.youtube.com/watch?v=n7Gu9SmpiLM

ក្រុមហ៊ុនអាកាសចរណ៍អេត្យូពី បច្ចុប្បន្នប្រើប្រាស់យន្តហោះ Boeing 777F ចំនួន10គ្រឿង និងយន្តហោះ Boeing 737-800F ចំនួន2គ្រឿង។

ប្រភពសារព័ត៌មានបានឱ្យដឹងថា ក្រុមមន្ត្រីមានសមត្ថកិច្ចចិនកំពុងតែស៊ើបអង្កេតលើការណីឆាប់ឆេះយន្តហោះនេះហើយ៕

ប្រភព៖ សារព័ត៌មានបរទេស

July 22, 2020

ទិដ្ឋភាពខ្លះៗនៃការដុតឯកសារក្នុងស្ថានកុងស៊ុលចិននៅ Houston មុនពេលមន្ត្រីការទូតចិនចាកចេញនៅថ្ងៃទី24កក្កដា

យោងតាម New York Post មន្ត្រីទាំងអស់នៅក្នុងស្ថានកុងស៊ុលចិនប្រចាំទីក្រុង Houston នឹងចាកចេញពីទីនេះនៅវេលាម៉ោង4ល្ងាចនាថ្ងៃទី24កក្កដាខាងមុខ។

ក្រុមប៉ូលិសនៅទីក្រុង Houston បានបញ្ជាក់ប្រាប់សារព័ត៌មាន Fox News ថា ក្រុមមន្ត្រីចិនដែលនៅក្នុងស្ថានកុងស៊ុល បាននាំគ្នាដុតឯកសារព្រោះតែពួកគេត្រូវបានស្នើឱ្យចាកចេញពីអគារនេះនៅ2ថ្ងៃទៀត។

បច្ចុប្បន្ន មិនទាន់ដឹងប្រាកដថា តើការដុតឯកសារ បង្កការភ្ញាក់ផ្អើលនេះ មានជាប់ទាក់ទិននឹងគម្រោងចាកចេញពីស្ថានកុងស៊ុលចិនដែរ ឬយ៉ាងណានៅឡើយ។

ការដែលសហរដ្ឋអាមេរិកស្នើឱ្យចិនបិទស្ថានកុងស៊ុលនៅទីក្រុង Houston និងការដុតឯកសារក្នុងស្ថានកុងស៊ុលនេះ បានកើតឡើងក្នុងស្ថានភាពដែលទំនាក់ទំនងរវាងសហរដ្ឋអាមេរិកនិងចិនកំពុងធ្លាក់ក្នុងដំណាក់កាលតានតឹងខ្លាំង ទាក់ទិននឹងបញ្ហាជាច្រើន ក្នុងនោះមានដូចជា បញ្ហាវីរុសCOVID-19 បញ្ហាហុងកុង បញ្ហាស៊ីនជាំង សង្គ្រាមពាណិជ្ជកម្ម បញ្ហាសមុទ្រចិនខាងត្បូង។ល។

ប្រភព៖ សារព័ត៌មានបរទេស

July 22, 2020

ចិននាំគ្នាដុតឯកសារ បន្ទាប់ពីអាមេរិកស្នើឱ្យបិទស្ថានកុងស៊ុលនៅទីក្រុង Houston

សមត្ថកិច្ច និងក្រុមពន្លត់អគ្គិភ័យនៅតំបន់ Houston ទទួលបានសេចក្ដីរាយការណ៍អំពីករណីដុតឯកសារនៅក្នុងស្ថានកុងស៊ុលចិន បន្ទាប់ពីសហរដ្ឋអាមេរិកបានស្នើឱ្យទីក្រុងប៉េកាំងបិទទ្វារការិយាល័យនេះក្នុងរយៈពេល72ម៉ោង។

ប៉ូលិសនៅទីក្រុង Houston បានឱ្យដឹងថា ពួកគេទទួលបានព័ត៌មានអំពីការដុតឯកសារនៅក្នុងស្ថានកុងស៊ុលចិន ក្រោយវេលាម៉ោង20 ថ្ងៃទី21កក្កដា (ត្រូវនឹងម៉ោង8ព្រឹកនៃថ្ងៃទី22កក្កដា នៅកម្ពុជា)។ ក្រុមប៉ូលិសនៅ Houston ត្រូវបានបញ្ជូនទៅកាន់បរិវេណខាងក្រៅនៃស្ថានទូតចិន ហើយបានឱ្យដឹងថា ពួកគេបានរកឃើញផ្សែង ប៉ុន្តែ “មិនទទួលបានសិទ្ធិឱ្យចូលទៅខាងក្នុងអគារនេះទេ”។

ក្នុងវីដេអូមួយដែលចែករំលែកដោយអ្នកយកព័ត៌មានម្នាក់បានបង្ហាញថា មានមនុស្សមួយចំនួនកំពុងជួបជុំគ្នានៅជុំវិញភ្លក់ភ្លើងនៅទីលានក្នុងស្ថានកុងស៊ុល។ មើលពីផ្លូវខាងក្រៅអគារនេះ គេក៏អាចសង្កេតឃើញផ្សែងចេញពីស្ថានកុងស៊ុលនេះដែរ។

ហេតុការណ៍ខាងលើនេះបានកើតឡើងនៅពេលសហរដ្ឋអាមេរិកបានស្នើឱ្យចិនបិទទ្វារការិយាល័យអគ្គកុងស៊ុលចិននៅទីក្រុង Houston ឱ្យបានមុនម៉ោង16 នាថ្ងៃទី24កក្កដាខាងមុខ។

ថ្លែងនៅក្នុងសន្និសីទសារព័ត៌មានមួយនៅទីក្រុងប៉េកាំងនាថ្ងៃនេះ អ្នកនាំពាក្យក្រសួងការបរទេសចិន លោក Wang Wenbin បានទទួលស្គាល់ថា សហរដ្ឋអាមេរិក កាលពីថ្ងៃទី21កក្កដាបានស្នើឱ្យប្រទេសចិនបិទទ្វារស្ថានកុងស៊ុល ដោយទុកពេលឱ្យ72ម៉ោង។ លោក Wang Wenbin បានហៅទង្វើនេះថាជា “ការបង្កើនភាពតានតឹងមិនធ្លាប់មានពីមុនមក” ហើយប្រទេសចិននឹងមានប្រតិកម្មតបមិនខាន។

“ប្រទេសចិនអំពាវនាវឱ្យសហរដ្ឋអាមេរិកដកសេចក្ដីសម្រេចចិត្តប្រកបដោយកំហុសឆ្គងរបស់ខ្លួន ពុំដូច្នោះទេ ចិនប្រាកដជាមានប្រតិកម្មយ៉ាងត្រឹមត្រូវ និងចាំបាច់” លោក Wang Wenbin ថ្លែងបែបនេះ។ លោកបន្តថា “នោះគឺជាការបង្កហេតុក្នុងរឿងនយោបាយដែលធ្វើឡើងដោយសហរដ្ឋអាមេរិក ដែលនេះបានរំលោភច្បាប់អន្តរជាតិ និងកិច្ចព្រមព្រៀងទ្វេភាគីរវាងចិននិងសហរដ្ឋអាមេរិក។ ប្រទេសចិនថ្កោលទោសយ៉ាងខ្លាំងក្លាចំពោះទង្វើគួរឱ្យស្អប់ខ្ពើម មិនសមហេតុផល និងបានបំផ្លាញទំនាក់ទំនងរវាងចិននិងសហរដ្ឋអាមេរិក”។

ទំនាក់ទំនងរវាងទីក្រុងប៉េកាំងនិងទីក្រុងវ៉ាស៊ីងតោន កំពុងស្ថិតនៅក្នុងកម្រិតទាបបំផុតក្នុងមួយរយៈពេលចុងក្រោយនេះ រាប់ចាប់ពី COVID-19 បានបង្ហាញវត្តមាននៅប្រទេសចិន។ សហរដ្ឋអាមេរិកបានចោទប្រកាន់ចិនជាច្រើនលើកថា បានលាក់បាំងព័ត៌មានទាក់ទិននឹង COVID-19 ធ្វើឱ្យវីរុសនេះឆ្លងរាលដាលខ្លាំង នឹងប៉ះពាល់ដល់បេសកកម្មប្រឆាំងជំងឺឆ្លងនេះរបស់បណ្ដាប្រទេសក្នុងពិភពលោក ក៏ប៉ុន្តែ ទីក្រុងប៉េកាំងបានទាត់ចោលការចោទប្រកាន់នេះ។

ក្នុងរយៈពេលប៉ុន្មានសប្ដាហ៍កន្លងទៅនេះ រដ្ឋបាលរបស់លោក Trump ក៏បានដាក់ទណ្ឌកម្មខ្លះៗទៅលើប្រទេសចិន ដោយសារតែគោលនយោបាលរបស់ចិន ទាក់ទិននឹងទីក្រុងហុងកុង និងតំបន់ស៊ីនជាំង។ សហរដ្ឋអាមេរិក មិនត្រឹមតែចាត់វិធានការថ្មីដើម្បីទប់ស្កាត់មហិច្ឆតាក្នុងការកែប្រែស្ថានភាពពិភពលោក ដោយការទប់ស្កាត់មិនឱ្យចិនទទួលបានបច្ចេកវិទ្យាថ្មីពីសហរដ្ឋអាមេរិកតែប៉ុណ្ណោះទេ ប៉ុន្តែអាមេរិកាំងថែមទាំងបានបញ្ចុះបញ្ចូលបណ្ដាប្រទេសជាសម្ព័ន្ធមិត្ត ឱ្យធ្វើតាមអាមេរិកទៀតផង។

កំពុងបន្តធ្វើបច្ចុប្បន្ន…
ប្រភព៖ NYPost, Bloomberg

July 22, 2020

Author: សឿន សំណាង