Author: សឿន សំណាង

សិង្ហបុរីផ្ដល់ប្រាក់ជំនួយដល់ពលរដ្ឋដែលចង់យកកូននៅក្នុងសម័យCOVID-19
រដ្ឋាភិបាលសិង្ហបុរីនឹងផ្ដល់ប្រាក់ឧបត្ថម្ភមួយចំនួនដល់ក្រុមគ្រួសារណាដែលចង់បង្កើតកូននៅក្នុងសម័យវិបត្តិសុខភាពដែលបង្កឡើងដោយវីរុសCOVID-19 ដើម្បីជួយបន្ធូរបន្ថយសម្ពាធផ្នែកហិរញ្ញវត្ថុរបស់ពលរដ្ឋ។
“យើងបានទទួលដំណឹងថា COVID-19 ធ្វើឱ្យមនុស្សមួយចំនួនដែលមានបំណងយកកូន ត្រូវពន្យារគម្រោងរបស់ខ្លួន” នេះបើតាមប្រសាសន៍កាលពីថ្ងៃទី5តុលារបស់លោក Heng Swee Keat ឧបនាយករដ្ឋមន្ត្រីនៃប្រទេសសិង្ហបុរី។
“ប្រការនេះ ពិតជាអាចយល់បាន ពិសេសគឺនៅពេលពួកគេត្រូវប្រឈមនឹងបញ្ហាប្រាក់ចំណូល” លោក Heng ថ្លែងដូច្នេះ និងបានបន្តថា ខ្ទង់ប្រាក់ដែលទូទាត់មួយលើកនេះនឹងជួយសម្រួលដល់ការចាយវាយរបស់អាណាព្យាបាល ក៏ប៉ុន្តែ លោកមិនបាននិយាយអំពីចំនួនទឹកប្រាក់សម្រាប់គ្រួសារដែលចង់មានកូននោះទេ។
បើទោះជាទទួលបានជោគជ័យក្នុងការទប់ស្កាត់ការឆ្លងរាលដាលរបស់វីរុសCOVID-19 សេដ្ឋកិច្ចរបស់សិង្ហបុរីនៅតែធ្លាក់ទៅក្នុងស្ថានភាពវិបត្តិដដែល។ GDP របស់ប្រទេសនេះបានថយចុះ12.6% នៅក្នុងត្រីមាសទីពីរ បើធៀបនឹងអំឡុងពេលដូចគ្នាកាលពីឆ្នាំ2019 ដែលនេះគឺជាការធ្លាក់ចុះដល់កម្រិតទាបបំផុត “មិនធ្លាប់មានក្នុងប្រវត្តិសាស្ត្រ” របស់ប្រទេសនេះ។
ទារកម្នាក់ដែលបានចាប់កំណើតនៅសិង្ហបុរី កាលពីឆ្នាំ2014
សិង្ហបុរីគឺជាប្រទេសមួយក្នុងចំណោមប្រទេសដែលមានកំណើនពលរដ្ឋក្នុងស្រុកទាបជាងគេក្នុងពិភពលោក។ រដ្ឋាភិបាលបានព្យាយាមកែប្រែស្ថានការណ៍ ប៉ុន្តែមិនបានសម្រេច។ កំណើននៃទារកថ្មីរបស់ប្រទេសនេះស្ថិតក្នុងអត្រា1.14នាក់នៅលើស្ត្រីម្នាក់ក្នុងឆ្នាំ2018 ពោលគឺប្រហាក់ប្រហែលនឹងទីក្រុងហុងកុង។ នេះបើតាមធនាគារពិភពលោក។ នៅទូទាំងពិភពលោក មានតែប្រទេសចំនួន2ប៉ុណ្ណោះ ដែលមានកំណើនទារកថ្មី តិចជាងសិង្ហបុរី នោះគឺកូរ៉េខាងត្បូង និងដែនដី Puerto Rico របស់សហរដ្ឋអាមេរិក។
អត្រាកំណើតកូនដែលល្អបំផុតគឺ2.1នាក់ សម្រាប់ស្ត្រី1រូប។ ក៏ប៉ុន្តែ ភាគច្រើននៃប្រទេសរីកចម្រើន សុទ្ធតែស្ថិតក្រោមកម្រិតនេះ ដោយសារអត្រានៃការរៀបការបានថយចុះច្រើន និងដោយសារការប្រកាន់ភេទបែបបុរាណបានប្ដូរផ្លាស់។
សិង្ហបុរីបានធ្វើការលើកទឹកចិត្តឱ្យមានការបង្កើតកូនចាប់ពីទសវត្សរ៍ឆ្នាំ1980។ យុទ្ធនាការលើកទឹកចិត្តចំពោះការបង្កើតកូន រួមនឹងការផ្ដល់ផលប្រយោជន៍ផ្នែកហិរញ្ញវត្ថុ និងពន្ធដារជាច្រើនត្រូវបានធ្វើឡើង ប៉ុន្តែមិនអាចទប់ស្កាត់ការថយចុះនៃអត្រាបង្កើតកូននេះបាន។ បច្ចុប្បន្ន សម្រាប់ស្ត្រីម្នាក់នៅសិង្ហបុរីដែលមានលក្ខណគ្រប់គ្រាន់ នឹងទទួលបានប្រាក់ឧបត្ថម្ភឡើងដល់7,330ដុល្លារអាមេរិកនៅពេលពួកគេបង្កើតបានកូនមួយនាក់។
សិង្ហបុរីគឺជាប្រទេសមួយក្នុងចំណោមប្រទេសដែលមានកំណើនពលរដ្ឋក្នុងស្រុកទាបជាងគេក្នុងពិភពលោក
របាយការណ៍កាលពីឆ្នាំ2011របស់រដ្ឋាភិបាល បានឱ្យដឹងថា៖ “ដូចទៅនឹងប្រទេសរីកចម្រើនដទៃ មូលហេតុនៃការថយចុះនៃចំនួនប្រជាជននៅសិង្ហបុរី នោះគឺអត្រានៃការបង្កើតកូនទាប និងពលរដ្ឋវ័យចំណាស់មានចំនួនច្រើន។
សិង្ហបុរីបានទទួលជោគជ័យក្នុងការទប់ស្កាត់ការឆ្លងរាលដាលនៃវីរុសCOVID-19 ដោយមានការចាត់វិធានការយ៉ាងឆាប់រហ័សនានា ដូចជាការដាក់ឱ្យនៅដាច់ដោយឡែកចំពោះពលរដ្ឋណាដែលត្រូវសង្ស័យថាឆ្លងវីរុស ការអនុវត្តបំរាមគោចរយ៉ាងតឹងរឹងនៅពេលរកឃើញសម្បុកមេរោគ រួមនឹងការប្រើប្រាស់បច្ចេកវិទ្យាដើម្បីតាមដានក្រុមមនុស្សដែលពាក់ព័ន្ធនៃករណីឆ្លងនីមួយៗ។
គិតមកដល់បច្ចុប្បន្ន សិង្ហបុរីបានរកឃើញអ្នកឆ្លងវីរុសCOVID-19 សរុប 57,840នាក់ និងមានអ្នកជំងឺតែ27នាក់ប៉ុណ្ណោះដែលបានបាត់បង់ជីវិតដោយសារវីរុសនេះ៕
ប្រភព៖ CNN
October 7, 2020
អាយុ21ឆ្នាំ ត្រូវធនាគារបដិសេធសំណើខ្ចីលុយ 18ឆ្នាំក្រោយ ក្លាយជាសេដ្ឋី និងបានទិញអគារធនាគារនោះមកធ្វើជាកម្មសិទ្ធិដើម្បីសងសឹក
ក្រោយរយៈពេល18ឆ្នាំ សេដ្ឋី Adam Deering បានត្រលប់មកវិញ និងបាន “សងសឹកប្រកបដោយភាពផ្អែមល្ហែម” នោះគឺការទិញយកកន្លែងដែលធ្លាប់បានមើលស្រាលក្ដីស្រមៃក្នុងការបើកមុខជំនួញរបស់គាត់។
កាលពីឆ្នាំ2002 បុរសវ័យ21ឆ្នាំ ឈ្មោះ Adam Deering ត្រូវបានធនាគារមួយ ឈ្មោះ Greater Manchester (អង់គ្លេស) នៅឯស្រុកកំណើត បដិសេធសំណើខ្ចីប្រាក់ចំនួន10,000ផោន (ប្រហែល12,800ដុល្លារអាមេរិក) ដើម្បីបើកមុខរបររកស៊ី។
Deering បានរៀបចំគម្រោងបើកមុខជំនួញ និងបានណាត់ជួបនាយកធនាគារនេះដើម្បីពិភាក្សាអំពីវិធីបើកគណនី និងសំណើឥណទាន។ សេដ្ឋី Deering រំឭកឡើងវិញ៖ “មុនពេលឈានជើងចូល ខ្ញុំបានបួងសួង ព្រោះមិនមានប្រាក់ និងមិនដឹងថានឹងត្រូវធ្វើតាមក្ដីស្រមៃរបស់ខ្លួនយ៉ាងដូចម្ដេច។ ក្រោយពីបានមើលគម្រោងរបស់ខ្ញុំមួយត្រួស គាត់នោះបានបដិសេធភ្លាមដោយប្រើសំឡេងស្រាលៗថា ខ្ញុំនៅក្មេង និងមិនទាន់មានបទពិសោធន៍ក្នុងការធ្វើជំនួញ។ ការឱ្យខ្ចីបែបនេះ ពិតជាមានហានិភ័យខ្ពស់ ហើយនោះមិនមែនជារឿងដែលពួកគេនឹងធ្វើឡើយ”។
ក្នុងដំណាក់កាលនោះ Deering មានអារម្មណ៍ “អស់សង្ឃឹម និងតូចចិត្ត” ជាខ្លាំង។ អ្វីដែលអាក្រក់ជាងនេះ នោះគឺថា គាត់មិនទាន់បានរៀបចំផែនការទីពីរដើម្បី “ត្រៀមជ្រើងព្រួល” នៅឡើយ។ មុននោះ Deering បានលាឈប់ពីការងារជាបុគ្គលិកផ្នែកលក់។ គាត់បានយកប្រាក់ខែចុងក្រោយដើម្បីជួលការិយាល័យតូចមួយនៅ Streetford។
លោក Adam Deering
នៅទីនេះ គាត់ខិតខំហៅទូរស័ព្ទដើម្បីទាក់ទាញអតិថិជនដែលមានសក្ដានុពល ដោយប្រើប្រាស់ទិន្នន័យពីបញ្ជីលេខទូរស័ព្ទរបស់គាត់។ នៅលើ Instagram លោក Deering បានសរសេរថា៖ “សូម្បីតែប្រាក់សម្រាប់ទិញតុ កៅអី ក៏ខ្ញុំមិនមានដែរ។ ដូច្នេះ ខ្ញុំក៏ត្រូវអង្គុយនៅលើឥដ្ឋដើម្បីធ្វើការអស់រយៈពេល4ខែ”។
ដំណាក់កាលដំបូងនៃការបង្កើត និងដំណើរការក្រុមហ៊ុនរបស់ Deering គឺពិតជាលំបាកខ្លាំងណាស់។ គាត់តែងតែមានការព្រួយបារម្ភថា គាត់មិនអាចរកបានប្រាក់គ្រប់គ្រាន់សម្រាប់បង់ថ្លៃផ្ទះ រួមនឹងការចំណាយដែលទាក់ទងមួយចំនួនទៀត។ ជាច្រើនលើក Deering ត្រូវប្រឈមនឹងការលំបាកធំៗ និងហត់នឿយខ្លាំង ប៉ុន្តែគាត់នៅតែមិនចុះចាញ់ ហើយចុងក្រោយ ការលះបង់កម្លាំងកាយចិត្តរបស់គាត់ក៏ទទួលបានការឆ្លើយតបយ៉ាងស័ក្ដិសម។
Deering បានកសាងក្រុមហ៊ុនគ្រប់គ្រងបំណុលមួយដែលដំណើរការប្រកបដោយភាពជោគជ័យ។ ឆ្នាំ2014 គាត់បានលក់ក្រុមហ៊ុននេះក្នុងតម្លៃ5លានផោន (ស្មើនឹង6.4លានដុល្លារអាមេរិក)។ បច្ចុប្បន្ន លោក Deering គឺជាអ្នកជំនួញជោគជ័យម្នាក់ និងទទួលបានការគោរព កោតសរសើរច្រើននៅពេលលោកគ្រប់គ្រងបណ្ដាក្រុមហ៊ុនដែលមានតម្លៃរាប់លានដុល្លារ ដូចជាក្រុមហ៊ុនគ្រប់គ្រងបំណុល Hanover Insolvency និងក្រុមហ៊ុនរៀបចំពិធីបុណ្យសព Pride Lanning ជាដើម។
អគារធនាគារដែលធ្លាប់បានបដិសេធសំណើខ្ចីប្រាក់របស់ Adam Deering កាលពី18ឆ្នាំមុន
18ឆ្នាំក្រោយ រាប់ចាប់ពីពេលដែលត្រូវធនាគារបដិសេធសំណើខ្ចីលុយ Deering បានវិលត្រលប់មកវិញជាមួយនឹង “ការសងសឹកប្រកបដោយភាពផ្អែមល្ហែម” នោះគឺការទិញយកអគារធនាគារមួយដែលជាកន្លែងដែលធ្លាប់បានមើលងាយក្ដីស្រមៃក្នុងការរកស៊ីរបស់គាត់។ Deering បានទិញវាក្នុងតម្លៃ 450,000ផោន (ប្រហែល 580,000ដុល្លារអាមេរិក)។ អ្នកជំនួញវ័យ39ឆ្នាំរូបនេះ បានសរសេរនៅលើទំព័រ Twitter ថា៖ “កាលពីសប្ដាហ៍មុន ខ្ញុំបានទិញអគារធនាគារមួយដែលធ្លាប់បានបដិសេធសំណើខ្ចីប្រាក់របស់ខ្ញុំ”។
សម្រាប់ Deering ការទិញយកអគារធនាគារនេះគឺមានអត្ថន័យទាក់ទងនឹងអារម្មណ៍។ ប៉ុន្តែ គាត់បានរៀបគម្រោងដើម្បីប្រែក្លាយវាឱ្យទៅជាគម្រោងមួយដែលរួមផ្សំរវាងការលក់រាយ និងការឱ្យជួល។ Deering នឹងចំណាយ500,000ផោន (643,000ដុល្លារ) បន្ថែមទៀត ដើម្បីកែប្រែទីនេះឱ្យទៅជាអគារ8ល្វែង និងស្ថាប័នលក់រាយមួយ។
រឿងរ៉ាវជោគជ័យក្នុងការរកស៊ីចាប់ពីបាទដៃទទេរបស់ Deering បានបញ្ជូនសារបំផុសគំនិតដល់មនុស្សជាច្រើនដែលមានមហិច្ឆតាក្នុងបើកមុខរបររកស៊ី។ ក្រៅពីជាអ្នកជំនួញដែលមានទ្រព្យរាប់រយលានដុល្លារ គាត់ក៏ជាវាគ្មិនដ៏ល្បីឈ្មោះផងដែរ។
លោក Deering ចែករំលែកបទពិសោធន៍របស់ខ្លួន៖ “ខ្ញុំតែងតែជឿជាក់ថា បើសិនជាអ្នកខំប្រឹងធ្វើការដើម្បីប្រែក្លាយក្ដីស្រមៃរបស់ខ្លួនឱ្យទៅជាការពិត នោះគ្រប់យ៉ាងនឹងអាចកើតឡើង។ ខ្ញុំបានបោះបង់ការងារជាបុគ្គលិកផ្នែកលក់រាយកាលពីមានអាយុ21ឆ្នាំ ដោយសារតែគិតថា ខ្ញុំអាចបង្កើតក្រុមហ៊ុនមួយដែលជោគជ័យ។
ការបង្កើតក្រុមហ៊ុនមួយ ពិតជាមិនងាយស្រួល និងតែងមានពេលខ្លះ អ្នកសួរខ្លួនឯងថា តើវាអាចជោគជ័យដែរ ឬអត់។ ប្រការដែលសំខាន់ នោះគឺថា អ្នកត្រូវតែរក្សាគោលជំហរនៃទស្សនវិស័យរបស់អ្នកឱ្យបានមាំទាំ។ វាតែងតែមានឧបសគ្គដែលត្រូវឆ្លងកាត់។ ពេលខ្ញុំត្រូវគេបដិសេធសំណើខ្ចីប្រាក់ ពេលនោះពិតជារឿងលំបាកខ្លាំងណាស់ ក៏ប៉ុន្តែ ដោយសារតែមានក្ដីស្រមៃ ព្រមទាំងមានការផ្ដោតអារម្មណ៍យ៉ាងខ្លាំងក្លាទៅលើគោលដៅ ខ្ញុំក៏បានប្រែក្លាយវាឱ្យទៅជាការពិត”៕
ប្រភព៖ Entrepreneur
October 7, 2020
លោក Trump លែងមានរោគសញ្ញារបស់ COVID-19 ហើយ
វេជ្ជបណ្ឌិតប្រចាំសេតវិមាន បានឱ្យដឹងថា ប្រធានាធិបតី “លែងមានរោគសញ្ញា” របស់វីរុសCOVID-19 ហើយ ក្រោយពីបានចេញពីមន្ទីរពេទ្យ និងឆ្លងកាត់ការសម្រាកមួយយប់ដំបូងនៅឯផ្ទះ។
“ព្រឹកនេះ ក្រុមវេជ្ជបណ្ឌិតរបស់ប្រធានាធិបតី បានជួបលោកនៅឯភូមិគ្រឹះ។ ប្រធានាធិបតីបានសម្រាកប្រកបដោយផាសុខភាពមួយយប់ដំបូងនៅឯផ្ទះ ហើយថ្ងៃនេះ លោកលែងមានរោគសញ្ញាណាមួយទៀតហើយ” នេះបើតាមវេជ្ជបណ្ឌិតប្រចាំការនៅសេតវិមាន លោក Sean Conley ដែលបានថ្លែងកាលពីថ្ងៃទី6តុលា។ លោកបន្តថា៖ “សញ្ញានៃការរស់រាន និងការពិនិត្យសុខភាព បង្ហាញថា នៅតែធម្មតា ដោយកំហាប់អ៊ុកស៊ីហ្សែនស្ថិតក្នុងកម្រិតចន្លោះពី95ទៅ97%។ និយាយរួម ស្ថានភាពសុខភាពរបស់ប្រធានាធិបតីនៅតែល្អប្រសើរ ខ្ញុំនឹងផ្ដល់ព័ត៌មានបន្ថែមនៅពេលមានដំណឹងថ្មី”។
ដំណឹងខាងលើនេះ ត្រូវបានលើកឡើងក្រោយរយៈពេល1ថ្ងៃបន្ទាប់ពីលោក Trump បានចេញពីមន្ទីរពេទ្យយោធា Walter Reed ក្រោយពីបានទទួលការព្យាបាល4ថ្ងៃដោយសារឆ្លងវីរុសCOVID-19។
ព្រឹត្តិការណ៍ជជែកតតាំងគ្នាលើកទីពីរ រវាងលោក Trump និងលោក Biden តាមគម្រោងនឹងត្រូវធ្វើឡើងនៅក្នុងថ្ងៃទី15តុលា នៅសាលមហោស្រព Adrienne Arsht ក្នុងទីក្រុង Miami រដ្ឋ Florida។ យោងតាមគណៈកម្មការរៀបចំព្រឹត្តិការណ៍ជជែកតតាំងសម្រាប់បេក្ខភាពប្រធានាធិបតីអាមេរិក នឹងត្រូវធ្វើឡើងក្រោមរូបភាព “ប្រជាជនដាក់សំណួរទៅកាន់បេក្ខភាព” ពោលគឺមិនដូចទៅនឹងការជជែកតតាំងលើកទីមួយនោះទេ៕
ប្រភព៖ CNBC, Fox

October 7, 2020
Biden ប្រកាសមិនជជែកតតាំង បើសិន Trump នៅតែវិមានជានឹងCOVID-19
លោក Joe Biden បានឱ្យដឹងថា លោកជាមួយនឹងលោក Trump “មិនគួរចូលរួមជជែកតតាំងគ្នា” នោះឡើយ ប្រសិនបើប្រធានាធិបតីអាមេរិកនៅតែវិជ្ជមានជាមួយនឹងវីរុសCOVID-19។
ឆ្លើយតបនឹងក្រុមអ្នកសារព័ត៌មានកាលពីថ្ងៃទី6តុលា បេក្ខភាពប្រធានាធិបតីមកពីបក្សប្រជាធិបតេយ្យ លោក Joe Biden បានសម្ដែងអំពីបំណងធ្វើការជជែកតតាំងជាមួយនឹងប្រធានាធិបតី Donald Trump ជាលើកទី2 ក៏ប៉ុន្តែ លោកបញ្ជាក់ថា ពួកគេត្រូវតែ “អនុវត្តតាមការណែនាំប្រកបដោយភាពតឹងតែងបំផុត”។
អតីតអនុប្រធានាធិបតីអាមេរិករូបនេះ បានបន្ថែមថា លោកមិនបានទទួលដំណឹងអ្វីអំពីស្ថានភាពសុខភាពរបស់លោក Trump ចាប់ពីពេលប្រធានាធិបតីបានត្រលប់មកសេតវិមានវិញ។
សូមបញ្ជាក់ថា លោក Trump បានប្រកាសថា លោកបានឆ្លងវីរុសCOVID-19 កាលពីថ្ងៃទី2តុលា ហើយត្រូវបានបញ្ជូនទៅកាន់មន្ទីរពេទ្យយោធា Walter Reed ក្នុងរដ្ឋ Maryland និងទទួលការព្យាបាលនៅទីនោះចំនួន3ថ្ងៃ មុនពេលវិលទៅកាន់សេតវិមាន។
ព្រឹត្តិការណ៍ជជែកតតាំងគ្នាលើកទី2រវាងលោក Trump និងលោក Biden តាមគម្រោងនឹងត្រូវធ្វើឡើងនៅក្នុងថ្ងៃទី15តុលា នៅសាលមហោស្រព Adrienne Arsht ក្នុងទីក្រុង Miami រដ្ឋ Florida៕
ប្រភព៖ AP
October 7, 2020
ជាង36លាននាក់បានឆ្លង COVID-19 នៅទូទាំងពិភពលោក! WHO ថា 10%នៃប្រជាជនរបស់ពិភពលោក ប្រហែលបានឆ្លងវីរុសនេះហើយ
ក្នុងសកលលោកទាំងមូលមានអ្នកស្លាប់ជិត1.1លាននាក់នៅក្នុងចំណោមអ្នកបានឆ្លងវីរុសCOVID-19 ជាង36លាននាក់ ខណៈដែល WHO បានប៉ានប្រមាណឃើញថា វីរុសនេះបានឆ្លងរាលដាលទៅមនុស្សក្នុងអត្រា10%នៃប្រជាជនសរុបរបស់ពិភពលោក។
ប្រទេសនិងដែនដីចំនួន214ក្នុងពិភពលោក បានរកឃើញអ្នកឆ្លងវីរុសCOVID-19 សរុបឡើងដល់ 36,032,666នាក់ និងអ្នកស្លាប់ដោយសារវីរុសនេះមានចំនួន1,054,036នាក់ ក្នុងនោះមានករណីឆ្លងថ្មី338,942នាក់ និងករណីស្លាប់ថ្មី8,109នាក់ត្រូវបានរកឃើញក្នុងអំឡុងពេល24ម៉ោងចុងក្រោយនេះ។ ចំណែកអ្នកបានជាសះស្បើយមានចំនួន27,109,777នាក់។ នេះបើតាមគេហទំព័រ Worldometers។
សហរដ្ឋអាមេរិកនៅតែជាប្រទេសដែលមានករណីឆ្លងវីរុសCOVID-19 ច្រើនជាងគេក្នុងពិភពលោក ដោយមានករណីឆ្លងសរុប 7,715,456នាក់ និងស្លាប់សរុប215,701នាក់។ អ្នកឆ្លងថ្មីបានកើន36,370នាក់ និងអ្នកស្លាប់ថ្មីបានកើន669នាក់ បើធៀបនឹងមុននោះមួយថ្ងៃ។
លោក Mike Ryan នាយកគ្រប់គ្រងស្ថានការណ៍បន្ទាន់របស់អង្គការសុខភាពពិភពលោក (WHO)
លោក Mike Ryan នាយកគ្រប់គ្រងស្ថានការណ៍បន្ទាន់របស់អង្គការសុខភាពពិភពលោក (WHO) បានព្រមានថា COVID-19 ទំនងជាបានឆ្លងទៅប្រជាជនចំនួន10%ក្នុងចំណោមប្រជាជនសរុបរបស់ពិភពលោក ហើយការឆ្លងរាលដាលនេះនឹងនៅតែបន្តកើតមាន។
នៅក្នុងសន្និសីទសារព័ត៌មានមួយកាលពីថ្ងៃទី5តុលា លោក Mike Ryan និយាយថា៖ “តួលេខនេះ អាស្រ័យទៅលើប្រទេស និងតំបន់នីមួយៗ ក៏ដូចជាក្រុមប្រពលរដ្ឋនីមួយៗ។ ប៉ុន្តែ វាបង្ហាញថា ប្រជាជនភាគច្រើនរបស់ពិភពលោកនៅតែប្រឈមនឹងគ្រោះថ្នាក់។ យើងកំពុងឈានចូលដល់ដំណាក់កាលលំបាក៕
ប្រភព៖ AFP, Reuters, worldometers
October 7, 2020
ប៉ូលិសនិងបាតុករប៉ះទង្គិចគ្នានៅកៀហ្ស៊ីស៊ីស្ថាន! ជិត600នាក់រងរបួស (វីដេអូ)
ការប៉ះទង្គិចគ្នាដោយហិង្សាបានផ្ទុះឡើងនៅពេលបាតុករបានឡោមព័ទ្ធវិមានសភាជាតិដើម្បីប្រឆាំងនឹងលទ្ធផលនៃការបោះឆ្នោតសភាកៀហ្ស៊ីស៊ីស្ថាន (Kyrgyzstan) នាំឱ្យក្រុមប៉ូលិសប្រើប្រាស់កម្លាំងបាយដើម្បីបំបែកហ្វូងបាតុករ។
បាតុកម្មនៅទីក្រុង Bishkek របស់ប្រទេសកៀហ្ស៊ីស៊ីស្ថានបានកើតឡើងបន្ទាប់ពីការបោះឆ្នោតសភាកាលពីថ្ងៃទី4តុលាដែលមានគណបក្សចំនួន16បានចូលរួមប្រជែងឆ្នោតដណ្ដើមកៅអីចំនួន120នៅសភាជាតិ។ យោងតាមលទ្ធផលនៃការរាប់សន្លឹកឆ្នោតបឋម មានតែបក្សចំនួន4ប៉ុណ្ណោះដែលទទួលបានសន្លឹកឆ្នោតយ៉ាងតិច7%ដើម្បីចូលសភាជាតិ នាំឱ្យបក្សផ្សេងៗធ្វើការជំទាស់។
ព្រឹកថ្ងៃទី5តុលា សមាជិករបស់បក្សចំនួន2ដែលចាញ់ឆ្នោត បាននាំគ្នាធ្វើបាតុកម្មនៅទីលានកណ្ដាលក្រុង Bishkek។ អ្នកគាំទ្ររបស់បក្សផ្សេងៗក៏បានអូសគ្នាមកចូលរួម បណ្ដាលឱ្យហ្វូងបាតុករឡើងដល់ប្រមាណពី5,000-6,000នាក់។
ហ្វូងបាតុករបានឡោមព័ទ្ធវិមានសភាជាតិ និងមិនអនុញ្ញាតឱ្យក្រុមមន្ត្រី និងបុគ្គលិករដ្ឋចាកចេញពីទីនេះ។ វិមានសភានេះក៏ជាទីតាំងរបស់ការិយាល័យប្រធានាធិបតី រដ្ឋាភិបាល ប្រធានរដ្ឋអាជ្ញា និងអភិបាលក្រុង Bishkek ផងដែរ។
កងកម្លាំងរបស់រដ្ឋាភិបាល បានប្រើប្រាស់គ្រាប់បែកភ្លើងហ្វ្លាស stun grenade និងគ្រាប់កាំភ្លើងកៅស៊ូដើម្បីបំបែកហ្វូងបាតុករ និងបានចាប់ខ្លួនមនុស្សមួយចំនួន។ ប៉ុន្តែ ក្រោយការប៉ះទង្គិចជាមួយក្រុមប៉ូលិសរយៈពេល6ម៉ោង ក្រុមបាតុករក៏បានគ្រប់គ្រងវិមានរដ្ឋសភា និងបានរំដោះអតីតប្រធានាធិបតី Almazbek Atambayev ដែលត្រូវបានគណៈកម្មការសន្តិសុខជាតិរបស់កៀហ្ស៊ីស៊ីស្ថានចាប់ខ្លួនកាលពីខែសីហា2019។
ការប៉ះទង្គិចគ្នានៅរដ្ឋធានី Bishkek កាលពីថ្ងៃទី5តុលា បណ្ដាលឱ្យមនុស្សប្រមាណ590នាក់បានរងរបួស និងម្នាក់បានស្លាប់ នេះបើតាមសេចក្ដីប្រកាសក្នុងថ្ងៃនេះ (6តុលា) របស់ក្រសួងសុខាភិបាលកៀហ្ស៊ីស៊ីស្ថាន។
មជ្ឈមណ្ឌលប្រឆាំងនឹងការធ្វើទារុណកម្មកៀហ្ស៊ីស៊ីស្ថាន បានឱ្យដឹង មន្ត្រីអនុវត្តច្បាប់ប្រហែល190នាក់បានរងរបួសក្នុងការប៉ះទង្គិចនេះ ក្នុងនោះមាន6នាក់ស្ថិតក្នុងស្ថានភាពធ្ងន់ធ្ងរ។
នៅឯទីក្រុង Osh ភាគខាងលិចកៀហ្ស៊ីស៊ីស្ថាន ក៏មានការហែក្បួនដ៏ធំមួយដែលមានមនុស្សប្រមាណ500នាក់បានចូលរួម ដើម្បីសំដែងការគាំទ្រចំពោះប្រធានាធិបតី Jeenbekov។ ក្នុងចំណោមពួកគេ មានអ្នកខ្លះគាំទ្រនឹងលទ្ធផលបោះឆ្នោត ប៉ុន្តែក៏មានអ្នកខ្លះប្រឆាំងនឹងលទ្ធផលនៃការបោះឆ្នោតនេះដែរ៕
ប្រភព៖ TASS, Sputnik
October 6, 2020
កងទ័ពអាមេរិកបានទទួលប្រព័ន្ធការពារដែនអាកាស Iron Dome ដំបូងពីអ៊ីស្រាអែលហើយ
កងទ័ពជើងគោកសហរដ្ឋអាមេរិក ទើបតែទទួលបានប្រព័ន្ធការពារដែនអាកាស Iron Dome (បកប្រែក្រៅផ្លូវការថាខែលដំបូលដែក) ដំបូងបង្អស់នៅក្នុងចំណោមប្រព័ន្ធ Iron Dome ចំនួន2ដែលត្រូវបានបញ្ជាទិញពីអ៊ីស្រាអែលកាលពីខែសីហា2019។
ក្រសួងការពារជាតិអ៊ីស្រាអែល កាលពីថ្ងៃទី4តុលាបានឱ្យដឹងថា ខ្លួនបានប្រគល់ប្រព័ន្ធការពារដែនអាកាស Iron Dome ដំបូងទៅឱ្យកងទ័ពជើងគោកសហរដ្ឋអាមេរិករួចហើយ ប៉ុន្តែមិនទាន់បានអះអាងថា តើប្រព័ន្ធការពារនេះសមស្របទៅនឹងចក្ខុវិស័យបច្ចុប្បន្នរបស់កងទ័ពជើងគោកអាមេរិកដែរ ឬយ៉ាងណានៅឡើយ។
ក្រុមហ៊ុន Rafael របស់អ៊ីស្រាអែលបានឱ្យដឹងថា រ៉ុកកែតបាញ់ស្ទាក់ Tamir របស់ប្រព័ន្ធការពារនេះត្រូវបានក្រុមហ៊ុន Raytheon របស់សហរដ្ឋអាមេរិកជាអ្នកផលិត នឹងមានកម្លាំងគ្រប់គ្រាន់ក្នុងការទប់ទល់នឹងការគំរាមកំហែងដែលមានចម្ងាយពីប្រព័ន្ធ Iron Dome ប្រមាណ64គីឡូម៉ែត្រ។
“ប្រព័ន្ធ Iron Dome គឺជាផ្នែកមួយនៃប្រព័ន្ធការពារកាំជ្រួចផ្លោងច្រើនស្រទាប់របស់អ៊ីស្រាអែល ដែលវាបង្ហាញអំពីកម្លាំងការពារជាតិរបស់អ៊ីស្រាអែល” រដ្ឋមន្ត្រីការពារជាតិអ៊ីស្រាអែល លោក Benny Gantz បានថ្លែងដូច្នេះនៅក្នុងសេក្ដីប្រកាសមួយរបស់ក្រុមហ៊ុន Rafael។ “ប្រព័ន្ធនេះបានការពារជីវិតមនុស្សយ៉ាងច្រើននៅសមរភូមិភាគខាងត្បូងប្រទេសអ៊ីស្រាអែល ដោយសារតែប្រសិទ្ធភាពរបស់វា។ ខ្ញុំមានមោទនភាព និងជឿជាក់ថា ប្រព័ន្ធដ៏ទំនើបនេះនឹងការពារកងទ័ពជើងគោកសហរដ្ឋអាមេរិក”។
សូមរំឭកថា កងទ័ពជើងគោកសហរដ្ឋអាមេរិកបានប្រកាសអំពីគម្រោងទិញប្រព័ន្ធការពារដែនអាកាស Iron Dome កាលពីខែកុម្ភៈ2019 និងបានចុះហត្ថលេខាទិញប្រព័ន្ធនេះចំនួន2 ជាមួយនឹងប្រទេសអ៊ីស្រាអេលកាលពីខែសីហា2019។ មេដឹកនាំរបស់ក្រុមហ៊ុន Rafael ឱ្យដឹងថា Iron Dome បានចូលរួមក្នុងការសាកល្បងជាច្រើនលើកជាមួយនឹងកងទ័ពជើងគោកអាមេរិកនៅក្នុងវាលសាកល្បងរ៉ុកកែត White Sands ក្នុងរដ្ឋ New Mexico សហរដ្ឋអាមេរិក។
តាមគម្រោង កងទ័ពជើងគោកអាមេរិកនឹងទទួលប្រព័ន្ធ Iron Dome ទី2 ពីអ៊ីស្រាអែល នៅក្នុងខែកុម្ភៈ2021ខាងមុខ និងត្រូវធានាឱ្យប្រាកដថា ប្រព័ន្ធនេះដំណើរការប្រកបដោយប្រសិទ្ធភាពជាមួយនឹងប្រព័ន្ធបញ្ជាការសមរភូមិចម្រុះ IBCS (Integrated Battle Command System) នៅត្រីមាសទី2ឆ្នាំ2021។ បន្ទាប់មកទៀត Iron Dome នឹងត្រូវចូលរួមធ្វើការបាញ់សាកល្បងនៅឆ្នាំក្រោយ ដែលជាព្រឹត្តិការណ៍មួយសម្រាប់ក្រុមហ៊ុនផលិតអាវុធនានាបង្ហាញថា ប្រព័ន្ធការពារអាវុធរបស់ពួកគេអាចតភ្ជាប់ជាមួយប្រព័ន្ធ IBCS បានល្អ។
អ៊ីស្រាអែលចាប់ផ្ដើមអភិវឌ្ឍប្រព័ន្ធ Iron Dome នេះ បន្ទាប់ពីសង្គ្រាមនៅលីបង់កាលពីឆ្នាំ2006 នៅពេលដែលកងកម្លាំង Hezbollah បានបានបាញ់ស្រោចគ្រាប់រ៉ុកកែតទៅលើប្រទេសអ៊ីស្រាអែល។ ក្រុមប្រដាប់អាវុធនានានៅ Gaza ប្រើប្រាស់រ៉ុកកែត122មម ដែលអាចបាញ់ក្នុងរយៈចម្ងាយ20គីឡូម៉ែត្រ គំរាមកំហែងដល់ប្រជាជនជិត1លាននាក់នៅភាគខាងត្បូងប្រទេសអ៊ីស្រាអែល។
បច្ចុប្បន្ន អ៊ីស្រាអែលមានប្រព័ន្ធ Iron Dome ចំនួន10 និងអាចដាក់ពង្រាយបន្ថែមចំនួន5ប្រព័ន្ធទៀតនៅពេលខាងមុខ។ ប្រព័ន្ធ Iron Dome ពេញលេញមួយមានតម្លៃប្រមាណ50លានដុល្លារអាមេរិក ដោយវាមាន3ផ្នែកសំខាន់ៗ គឺ រ៉ាដាតាមចាប់គោលដៅ ប្រព័ន្ធគ្រប់គ្រងការប្រយុទ្ធនិងបញ្ជារ៉ុកកែត (BMC) រួមនឹងជើងទម្របាញ់គ្រាប់ (MFU)។ ជើងទម្រ MFU នីមួយៗមានរ៉ុកកែតវាយស្ទាក់ Tamir ចំនួន20ដើមដែលអាចបាញ់បានរយៈចម្ងាយ70គីឡូម៉ែត្រ៕
ប្រភព៖ Military
October 6, 2020
ពិធីប្រកួតបន្លែយក្ស មិនព្រមចុះចាញ់កូវីដ ងាកមករៀបចំការប្រកួតតាមអនឡាញ ឱ្យកសិករផ្ញើរូប រួមប្រកួត…
ទីភ្នាក់ងារព័ត៌មាន BBC បានរាយការណ៍ថា ទោះជាឆ្នាំនេះគ្មានពិធីបុណ្យបង្អួតផលិតផលកសិកម្ម ដោយសារតែស្ថានការណ៍កូវីដ-19ក្ដី តែកសិករជនជាតិអង់គ្លេស នៅតែជួយគ្នាជ្រោមជ្រែង និងមើលថែទាំដំណាំបន្លែបង្ការយ៉ាងល្អ ក្នុងអំឡុងពេលបិទប្រទេស ធ្វើឱ្យទទួលបានទិន្នផលធំៗ យក្សៗ គួរឱ្យភ្ញាក់ផ្អើល។
Joe Atherton បង្ហាញទិន្នផលបន្លែរបស់លោក ក្នុងអំឡុងពេលកូវីដ-19
ក្រុមហ៊ុន ឃែនណា ជាប្រក្រតី តែងធ្វើជាម្ចាស់កម្មវិធីរៀបចំការប្រកួតបង្អួតបន្លែយក្សៗ ក្នុងអំឡុងរដូវស្លឹកឈើជ្រុះ តែលើកនេះ ត្រូវបានផ្អាកកម្មវិធីនេះ ធ្វើឱ្យសមាគមជាតិអ្នកដាំបន្លែ បានរៀបចំការប្រកួតប្រជែងនេះ តាមអនឡាញជំនួសវិញ ដោយអនុញ្ញាតឱ្យកសិករ ផ្ញើរូបភាព មកចូលរួមប្រកួតតាមរយៈអ៊ីមែលជំនួសវិញ។
លោក ចូ អាធើតុន មកពីទីក្រុង ណត់ធីងហ៊ែម ស៊ើរ៍ ម្ចាស់ជើងឯកពិភពលោក 5ឆ្នាំជាប់ៗគ្នា ជឿថា ឆ្នាំនេះ លោកក៏នឹងបានគ្រប់គ្រងតំណែងជើងឯកជាឆ្នាំទី6 បន្តទៀត ដែលការប្រកួតលើកនេះ គឺជាការប្រកួតតែម្ដងគត់ ក្នុងអំឡុងពេល 1ឆ្នាំ ដោយសារតែការឆ្លងរាលដាលរបស់កូវីដ-19។
លោក ចូ អាធើតុន ធ្លាប់ទទួលបានរង្វាន់ជើងឯក ខាងដាំបានបន្លែទំហំយក្សៗ រួចមកហើយ 5ឆ្នាំ ជាប់ៗគ្នា
កាលពីសប្ដាហ៍កន្លងទៅ លោកអាធើតុន បាននាំបន្លែធំៗ យក្សៗ មកបង្ហាញនៅក្នុងពិធីបុណ្យ “The Grow Show On Tour” នៅឯទីក្រុង មែនស៍ហ្វៀល ធ្វើឱ្យមនុស្សម្នាទាំងឡាយ ភ្ញាក់ផ្អើលនឹងខ្នាតដ៏ធំៗ របស់បន្លែស្ពៃ ដែលមានប្រវែង 5.5ម៉ែត្រ និងមើមរ៉ាឌី ប្រវែង 85សង់ទីម៉ែត្រ។
ចំណែកលោក ហូលលី បូលុស មកពីក្រុមហ៊ុនឃែនណា បានថ្លែងថា ការរៀបចំការប្រកួតបន្លែយក្សៗនេះ គឺដើម្បីបើកឱកាសឱ្យកសិករ បានបង្ហាញផលិតផលរបស់ពួកគេ ដែលដាំដុះបានដោយក្ដីលំបាក និងទោះជាការប្រកួតតាមប្រក្រតី ត្រូវបានផ្អាកក៏ពិតមែន តែការរៀបចំការប្រកួតតាមអនឡាញលើកនេះ មានអ្នកដាំដុះបន្លែថ្មីៗ បានចូលរួមប្រកួតបង្ហាញបន្លែបង្ការទំហំធំៗ យក្សៗ ជាលើកដំបូងរបស់ពួកគេ ជាច្រើននាក់។
មើមរ៉ាឌី វែងបំផុត ដែលលោក អាធើតុន យកឈ្នះលើស្ថិតិចាស់របស់ខ្លួនឯង
រួមទាំងលោក ដូមីនិក ឌ្រីសខូលល៍ មកពី វីនហ្គើវើធ ទីក្រុងឌឹប៊ីឈើរ៍ បានដាំបន្លែស្ពៃក្ដោបយក្ស 1គុម្ព ទម្ងន់ 22គីឡូក្រាមផង ម្ចាស់ស្ពៃក្ដោបយក្សរូបនេះ បានថ្លែងថា លោកមិនសូវបានដាំដុះបន្លែធំៗ យក្សៗបែបនេះប៉ុន្មានទេ ព្រោះរវល់តែដាំបន្លែសម្រាប់បរិភោគ ច្រើនជាងបន្លែខ្នាតធំៗ ហើយការដែលត្រូវកាត់ចិត្ត កាត់បន្លែយកមកប្រកួតនេះ គឺជារឿងដែលលោកពិបាកចិត្តមែនទែន តែក៏សប្បាយរីករាយខ្លាំងណាស់ ដែលបានដាំវា តាំងកូនគ្រាប់តូចមួយ រហូតដល់បានធំប៉ុននេះ ហើយលោកថែមទាំងសប្បាយចិត្តទៀតផង ដែលបន្លែមានរសជាតិផ្អែម និងស្រួយឆ្ងាញ់។
បន្លែស្ពៃក្ដោប របស់លោក ដូមីនិក ទម្ងន់ 22គីឡូក្រាម
ចំណែកលោក ខេវីន ហ្វ័រធីយ៍ មកពីទីក្រុងសៅធ៍វេលស៍ អ្នកបង្កើតផេចហ្វេសប៊ុក “ក្រុមបន្លែយក្ស” បាននិយាយថា ក្នុងអំឡុងពេលបិទទីក្រុង គឺជាឱកាសដ៏ល្អ សម្រាប់អ្នកដាំដុះបន្លែបង្ការទូទាំងពិភពលោក ដែលបានទំនាក់ទំនងគ្នា តាមរយៈបណ្ដាញសង្គមអនឡាញ។
លោក ខេវីន ហ្វ័រធីយ៍ ក៏បានបង្ហាញផ្លែល្ពៅយក្សរបស់លោកដែរ
ការប្រកួតបែបសប្បាយៗតាមអនឡាញ បានធ្វើឱ្យមនុស្សទូទាំងពិភពលោក បានឃើញបន្លែទំហំធំៗ យក្សៗ ដែលគួរឱ្យចាប់អារម្មណ៍ជាច្រើន រួមទាំងមានអ្នកដាំដុះជំនាន់ថ្មីៗ ចូលរួមប្រកួតផងនោះ អាចនិយាយបានថា វាជាការងារបន្ទាប់បន្សំមួយ ដែលជួយឱ្យមនុស្សម្នា បានចេញមកក្រៅផ្ទះខ្លះ និងនៅជាមួយការសម្លឹងមើលបន្លែដែលធំធាត់ឡើងក្នុងអំឡុងពេលបិទទីក្រុង។
គួរបញ្ជាក់ផងដែរថា បន្លែធំៗ យក្សៗ ដែលបានយកមកតាំងបង្ហាញ ប្រកួតប្រជែងគ្នានេះ នឹងត្រូវបានបរិច្ចាគទៅឱ្យមជ្ឈមណ្ឌលថែទាំជនចាស់ជរា និងធនាគារស្បៀងអាហារ នៅពេលចប់កម្មវិធី៕
ប្រភព៖ សារព័ត៌មានបរទេស

October 6, 2020
សេដ្ឋិនីគ្រប់គ្រងភោជនីយដ្ឋានជាង10,000កន្លែងនៅប្រទេសចិន៖ ថ្វីបើជោគជ័យក្នុងការរកប្រាក់ ប៉ុន្តែការចំណាយពេលសម្រាប់គ្រួសារគឺជារឿងសំខាន់
Joey Wat គឺជា CEO របស់ក្រុមហ៊ុន Yum China ដែលជាស្ថាប័នគ្រប់គ្រងភោជនីយដ្ឋានជាង10,000កន្លែងនៅក្នុងប្រទេសដែលមានប្រជាជនច្រើនជាងគេបង្អស់ក្នុងពិភពលោក ដោយរួមមានទាំងបណ្ដាញហាង KFC នៅប្រទេសចិនផងដែរ។
មុនពេលបានក្លាយជា CEO របស់ Yum China (ក្រុមហ៊ុនភោជនីយដ្ឋានធំជាងគេងបំផុតនៅប្រទេសចិន ដោយមានហាងជាង10,000កន្លែង) Joey Wat ធ្លាប់ជានាយិកានៃក្រុមហ៊ុន Watsons UK និងចាប់ផ្ដើមការងាររបស់ខ្លួននៅ McKinsey & Company។ អ្នកស្រីគឺជាស្ត្រីម្នាក់ក្នុងចំណោមស្ត្រីជា CEO ចំនួន 37នាក់ដែលមានឈ្មោះនៅក្នុងបញ្ជី Fortune 500 និងមានទ្រព្យសម្បត្តិដែលមានតម្លៃ15.2លានដុល្លារអាមេរិក។
Yum China បានឡើងផ្សារហ៊ុន (IPO) New York ចាប់ពីឆ្នាំ2016 និងចូលផ្សារហ៊ុនជាលើកទី2នៅ Hong Kong កាលពីខែកញ្ញា2020។ បើទោះជាការធ្វើ IPO កាលពីពេលថ្មីៗនេះរបស់ Yum China ត្រូវគេវាយតម្លៃថា បានចាប់ផ្ដើមដោយការលំបាកបំផុតក្នុងចំណោមករណីធ្វើ IPO នានានៅ Hong Kong ដែលមានតម្លៃចាប់ពី1,000លានដុល្លារឡើងទៅក្នុងឆ្នាំ2019ក៏ដោយ Joey Wat នៅតែមានគម្រោងបើកហាងយ៉ាងតិច800កន្លែងទៀតនៅចុងឆ្នាំ2020។
សេដ្ឋិនីគ្រប់គ្រងភោជនីយដ្ឋានជាង10,000កន្លែងនៅប្រទេសចិន៖ ថ្វីបើជោគជ័យក្នុងការរកប្រាក់ ប៉ុន្តែការចំណាយពេលសម្រាប់គ្រួសារគឺជារឿងសំខាន់
ស្ត្រី CEO ខាងលើនេះ មិនមែនជាកូនចៅអ្នកមាននោះទេ ប៉ុន្តែគ្រួសាររបស់អ្នកស្រីបានរើពីទីក្រុង Fuzhou មកកាន់ទី Hong Kong កាលពី Wat នៅក្មេង។ ការសិក្សារបស់ Wat ទទួលបានលទ្ធផលល្អត្រចះត្រចង់ និងបានចូលរៀននៅសាកលវិទ្យាល័យ Hong Kong ផងដែរ នៅមុនពេលបានបន្តការសិក្សានៅសាកលវិទ្យាល័យ Northwestern នៅសហរដ្ឋអាមេរិក និងចូលធ្វើការឱ្យក្រុមហ៊ុន McKinsey & Company កាលពីឆ្នាំ2020។
ឆ្នាំ2004 Wat បានចូលធ្វើការឱ្យ A.S. Watson Group នៅអង់គ្លេស ដោយទទួលខុសត្រូវលើគ្រប់គ្រងដំណើរការ និងយុទ្ធសាស្ត្ររបស់ក្រុមហ៊ុន។ ក្នុងរយៈពេល1ទសវត្សរ៍ Wat បានជួយសង្គ្រោះបណ្ដាញលក់រាយផលិតផលថែរក្សាសុខភាពនិងសម្រស់ Savers ដែលកំពុងស្ថិតក្នុងដំណាក់កាលលំបាក ហើយបន្ទាប់មកក៏បានក្លាយជានាយិកាប្រតិបត្តិរបស់ Watson UK ដែលជាក្រុមហ៊ុនគ្រប់គ្រងទាំង Savers និងបណ្ដាញលក់រាយ Superdrug។
ឆ្នាំ2014 Wat បានឈានជើងចូលក្នុងវិស័យ F&B (អាហារនិងភេសជ្ជៈ/Food & Beverage) ដោយធ្វើជានាយិការបស់ KFC China នៅមុនពេលទទួលបានតំណែងជាអ្នកគ្រប់គ្រងនានានៅក្រុមហ៊ុនមេ Yum China។ ក្រោយមកទៀត Wat ក៏បានចាប់ផ្ដើមធ្វើជា CEO របស់ Yum China កាលពីឆ្នាំ2018។
ជាមួយនឹងការដឹកនាំរបស់ Wat សកម្មភាពពាណិជ្ជកម្ម មានដូចជាការប្រគល់ទំនិញ និងការលក់ទំនិញតាមអនឡាញរបស់ KFC China ជាដើម បានកើនឡើងគួរឱ្យកត់សម្គាល់ ខណៈដែលសេវាកម្មប្រគល់ទំនិញបានគ្រប់គ្រង17% នៃចំណូលសរុបរបស់បណ្ដាញភោជនីយដ្ឋាននេះនៅក្នុងត្រីមានទី3នៃឆ្នាំ2018។
អ្នកស្រី Joey Wat (Joey Chui Yung Wat) កើតឆ្នាំ1971 និងបង្កើតបានកូនប្រុសម្នាក់កាលពីឆ្នាំ2011។ ទោះជាមមាញឹកនឹងការងារយ៉ាងណាក៏ដោយ អ្នកស្រីតែងតែជឿជាក់ទៅលើសារសំខាន់នៃការចំណាយពេលសម្រាប់គ្រួសារ។
នៅក្នុងកិច្ចសម្ភាសមួយ អ្នកស្រី Joey Wat បានប្រាប់សារព័ត៌មាន Forbes ថា៖ “គ្មានអ្វីសំខាន់ជាងការថែទាំកូនៗនោះទេ ហើយវាគឺជាភារកិច្ចរបស់ខ្ញុំ”៕
ប្រភព៖ SCMP
October 6, 2020
លោក Donald Trump ចេញពីពេទ្យហើយ!
ប្រធានាធិបតីសហរដ្ឋអាមេរិកបានចាកចេញពីមជ្ឈមណ្ឌលសុខាភិបាលយោធា Walter Reed បន្ទាប់ពីបានចូលព្យាបាលជំងឺនៅទីនេះដោយសារឆ្លង COVID-19 និងបានត្រលប់ទៅកាន់សេតវិមានវិញហើយ ដើម្បីបន្តការព្យាបាល និងធ្វើការ។
លោក Donald Trump បានចាកចេញពីមន្ទីរពេទ្យយោធា Walter Reed នៅវេលាម៉ោង18និង38នាទី ថ្ងៃទី5តុលា (ម៉ោង5និង38នាទី ថ្ងៃទី6តុលារ នៅភ្នំពេញ)។ ក្រុមអង្គរក្សដែលនៅក្បែរលោក សុទ្ធតែពាក់ម៉ាស់។ ក្រុមអ្នកសារព័ត៌មានបានសួរសំណួរទៅកាន់លោក Trump ប៉ុន្តែ លោកមិនបានឆ្លើយតប់នោះទេ ដោយគ្រាន់តែនិយាយពាក្យថាអរគុណប៉ុណ្ណោះ។
នៅពេលនោះដែរ លោក Trump ត្រូវបានគេមើលឃើញថា បានលើកម្រាមដៃមេជាច្រើនលើកដែលបញ្ជាក់ថា គ្រប់យ៉ាងនៅតែល្អប្រសើរ ហើយលោកថែមទាំងបានលើកបង្ហាញកណ្ដាប់ដៃដែលហាក់បញ្ជាក់ថា លោកមានការប្ដេជ្ញាខ្ពស់ នៅមុនពេលលោកចូលរថយន្តពណ៌ខ្មៅ និងបរឆ្ពោះទៅកាន់កន្លែងចតឧទ្ធម្ភាគចក្រ Marine One ដែលកំពុងរង់ចាំលោកជាស្រេច។
ពេលទៅដល់ឧទ្ធម្ភាគចក្រ ម្ចាស់សេតវិមានក៏បានចុះពីលើរថយន្ត រួចលើកម្រាមដៃមេសាជាថ្មីនៅចំពោះមុខក្រុមអ្នកយកព័ត៌មាន បន្ទាប់មកក៏ឡើងឧទ្ធម្ភាគចក្រ។ ឧទ្ធម្ភាគចក្របានហោះឡើងនៅវេលាម៉ោង18និង46នាទី។ ខណៈពេលចាកចេញពីមន្ទីរពេទ្យ លោក Trump ធ្វើដំណើរដោយថ្មើរជើងបានលឿនជាងកាលពីលោកទើបតែទទួលបានលទ្ធផលវិជ្ជមាន ព្រមទាំងមិនបង្ហាញអំពីអាការហត់នឿយនោះដែរ។
ក្រោយពីបានត្រលប់ដោយសេតវិមាន លោក Trump ក៏បានឡើងទៅកាន់ជាន់ទី2តែម្នាក់ឯង ដោយទុកឱ្យក្រុមអង្គរក្សនៅជាន់ក្រោម។ លោក Trump ឈរនៅលើយ៉អគារ រួចក៏ដោះម៉ាស់ដាក់ទៅក្នុងហោប៉ៅ ហើយលើកដៃគោរពតាមបែបទាហានទៅកាន់ក្រុមមន្ត្រីយោធានៅលើឧទ្ធម្ភាគចក្រដែលកំពុងត្រៀមហោះចាកចេញ។ លោក Trump ក៏បានលើកម្រាមដៃមេម្ដងទៀត មុនពេលចូលទៅខាងក្នុង។
លោក Trump នឹងបន្តទទួលការព្យាបាល COVID-19 នៅសេតវិមាន ជាកន្លែងដែលមានក្រុមវេជ្ជបណ្ឌិត និងឧបករណ៍វេជ្ជសាស្ត្រចាំបាច់។
មុននោះ លោក Trump បានប្រកាសនៅលើ Twitter ថា៖ “ខ្ញុំមានអារម្មណ៍ថា ពិតជាមានសុខភាពល្អ! កុំខ្លាច COVID។ ចូរកុំទុកឱ្យវាបំបែកបំបាក់ជីវភាពរបស់អ្នក។ ក្រោមសម័យរបស់រដ្ឋាភិបាល Trump យើងបានអភិវឌ្ឍថ្នាំពេទ្យមួយចំនួន រួមនឹងចំណេះដឹងដ៏អស្ចារ្យ។ ខ្ញុំមានអារម្មណ៍ថា មានសុខភាពល្អជាង បើធៀបនឹងម្ភៃឆ្នាំមុន!”។
លោក Trump ក៏បានឱ្យដឹងថា លោកនឹងវិលទៅធ្វើការឃោសនារកសំឡេងឆ្នោតនាពេលដ៏ខ្លីខាងមុខ។
ទោះជាយ៉ាងណាក៏ដោយ សារព័ត៌មាននានានៅសហរដ្ឋអាមេរិក ចេញផ្សាយថា លោក Trump អាចនឹងត្រូវវិលចូលពេទ្យជាថ្មី ដែលប្រការនេះនឹងបង្កផលប៉ះពាល់ច្រើនដល់សុខភាព និងឱកាសជាប់ឆ្នោតជាថ្មីរបស់លោក។ លោក Trump មានអាយុ74ឆ្នាំ និងកំពុងលើសទម្ងន់ ធ្វើឱ្យលោកមានហានិភ័យខ្ពស់ទាក់ទងនឹងការកើតជំងឺផ្សេងៗដោយសារតែCOVID-19។
កាលពីថ្ងៃទី5តុលាកន្លងទៅ លោក Conley ដែលជាវេជ្ជបណ្ឌិតរបស់សេតវិមាន បានសង្កត់ធ្ងន់ថា លោក Trump នឹងងាយរងផលប៉ះពាល់អាក្រក់បំផុតនៅក្នុងអំឡុងពេលចន្លោះពីថ្ងៃទី7ដល់ថ្ងៃទី10 ក្រោយទទួលបានលទ្ធផលវិជ្ជមានជាមួយនឹងCOVID-19។ ប៉ុន្តែ លោក Conley អះអាងថា លោក Trump នឹងទទួលបានការព្យបាល និងថែទាំ “លំដាប់ពិភពលោក” ពីក្រុមសុខាភិបាលនៅសេតវិមាន៕
ប្រភព៖ Fox,AFP
October 6, 2020