សឿន សំណាង - La Reine Media

អភិបាលខណ្ឌច្បារអំពៅ សម្រេចបិទផ្សារច្បារអំពៅរយៈពេល 14ថ្ងៃ ដើម្បីបង្ការបញ្ហាឆ្លង Covid-19

នាថ្ងៃទី23 ខែមេសា ឆ្នាំ2021នេះ រដ្ឋបាលខណ្ឌច្បារអំពៅ នៃរាជធានីភ្នំពេញ បានសម្រេចផ្អាកដំណើរការផ្សារច្បារអំពៅជាបណ្ដោះអាសន្នរយៈពេល 14ថ្ងៃ។

ប្រធានផ្សារច្បារអំពៅ លោក គួច ចំណាន នៅមុននេះបានការប្រកាសថា អភិបាលខណ្ឌច្បារអំពៅ លោក ចេង មុនីរ៉ា បានចេញបទបញ្ជាឱ្យបិទផ្សារនេះជាបណ្ដោះអាសន្ន ដើម្បីទប់ស្កាត់ការឆ្លងរាលដាលនៃវីរុសCovid-19 ទៅក្នុងសហគមន៍។

ការបិទផ្សារនេះនឹងត្រូវអនុវត្តចាប់ពីថ្ងៃទី24 ខែមេសា ឆ្នាំ2021 ដល់ថ្ងៃទី8 ខែឧសភា ឆ្នាំ2021។

ក្រុមអ្នកគ្រប់គ្រងផ្សារច្បារអំពៅកំពុងដើរប្រកាសអំពីការបិទផ្សារ

គិតមកដល់បច្ចុប្បន្ន (23មេសា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 8,848នាក់ ក្នុងនោះមានអ្នកជាសះស្បើយសរុប 3,148នាក់, អ្នកស្លាប់ 61នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 5,633នាក់៕

ប្រភព៖ ប្រធានផ្សារច្បារអំពៅ
ដកស្រង់៖ បុត្រា

April 23, 2021

មិនទុកចិត្ត!! សហរដ្ឋអាមេរិក ប្រកាសតាមមើលយ៉ាងដិតដល់ ទោះរុស្ស៊ីដកទ័ពរាប់សែននាក់ចេញពីព្រំដែនអ៊ុយក្រែនក្ដី

ប្រទេសរុស្ស៊ី បានថ្លែងកាលពីថ្ងៃព្រហស្បតិ៍ ទី22 មេសា ចេញបញ្ជាឱ្យដកកងទ័ពចេញពីតំបន់ព្រំដែនជាប់ប្រទេសអ៊ុយក្រែន ត្រឡប់ចូលបន្ទាយវិញ បញ្ឈប់ការបន្ថែមកម្លាំងយោធា ដែលធ្វើឱ្យកើតមានក្ដីបារម្ភកង្វល់ចំពោះប្រទេសលោកខាងលិច តែយ៉ាងណាក៏ដោយ ខាងសហរដ្ឋអាមេរិកវិញ បានបញ្ជាក់ថា នឹងតាមសង្កេតមើលស្ថានការណ៍នេះយ៉ាងដិតដល់ជាបន្តទៅទៀត។

ការអះអាង ដកកងទ័ពនេះ អាចនឹងធ្វើឱ្យកើតមានការស្វាគមន៍ពីប្រទេសលោកខាងលិចទាំងឡាយ ដែលកាលពីពេលមុននេះ បានសម្ដែងក្ដីព្រួយបារម្ភ ពាក់ព័ន្ធនឹងនិន្នាការដែលប្រទេសរុស្ស៊ី អាចនឹងជ្រៀតជ្រៀតចូល នៅភាគខាងកើតរបស់ប្រទេសអ៊ុយក្រែនខ្លាំងជាងមុន ក្នុងខណៈដែលពួកឧទ្ទាមផ្ដាច់ខ្លួន ដែលរុស្ស៊ីផ្ដល់ការគាំទ្រ បានបើកឆាកប្រយុទ្ធជាមួយទាហានរដ្ឋាភិបាលអ៊ុយក្រែន ក្នុងភូមិភាគនោះ តាំងពីឆ្នាំ2014 មកម្ល៉េះ។

អ្នកនាំពាក្យរបស់ប្រធានាធិបតីអ៊ុយក្រែន បានបញ្ជាក់កាលពីដើមខែថា រុស្ស៊ីមានទាហានប្រចាំការ តាមជួរព្រំដែនជាប់គ្នា ភាគខាងកើតរបស់អ៊ុយក្រែន ច្រើនជាង 40,000នាក់ និងជាង 40,000នាក់ទៀតនៅក្នុងគ្រីមៀ ដោយក្នុងនោះប្រមាណជា 50,000នាក់ ជាការដាក់ប្រចាំការថ្មី តែយ៉ាងណាក្ដី ខាងក្រុងម៉ូស្គូ មិនបានផ្ដល់តួលេខណាមួយ ពាក់ព័ន្ធនឹងចំនួនកម្លាំងទាហានរបស់ពួកគេឡើយ។

លោកប្រធានាធិបតី វ្ល៉ូឌីមៀ សេលេនស្គី បានសរសេរនៅក្នុងធ្វីតធើរថា “អ៊ុយក្រែនស្វាគមន៍ចំពោះជំហានណាមួយ ក្នុងការបន្ថយការប្រចាំយោធា និងបន្ថយស្ថានការណ៍ភាពតានតឹងនៅដុងបាស់ (ភាគខាងកើតរបស់អ៊ុយក្រែន)” ព្រមទាំងថ្លែងអំណរគុណកម្លាំងគាំទ្រពីបណ្ដាសម្ព័ន្ធមិត្តអន្តរជាតិទៀតផង។

ដាមីតូ ឃូលេបា រដ្ឋមន្ត្រីការបរទេស បានប្រាប់ទីភ្នាក់ងារព័ត៌មានរ៉យទ័រថា ក្រុងកៀវ មិនដឹងថាក្រុងម៉ូស្គូ មានចេតនាចាប់ផ្ដើមវាយប្រហារ ដែរឬទេ? និងប្រទេសលោកខាងលិច ត្រូវតែបង្ហាញគោលជំរយ៉ាងច្បាស់លាស់ថា ពួកគេនឹងឈរនៅជាមួយអ៊ុយក្រែន បើសិនរុស្ស៊ីចាប់ផ្ដើមវាយប្រហារ។ “ពេលនេះ វាអាចទៅរួច បានទាំង 2ផ្លូវ ហើយនេះគឺហេតុផលដែលថា ហេតុអីបានប្រតិកម្មយ៉ាងមាំមួនរបស់ប្រទេសលោកខាងលិច មានភាពសំខាន់ខ្លាំងបំផុត សម្រាប់ការពារមិនឱ្យពូទីន សម្រេចចិត្តធ្វើដូច្នោះ”

លោក ណិត ផ្រៃស៍ អ្នកនាំពាក្យក្រសួងការបរទេសសហរដ្ឋអាមេរិក ប្រាប់ថា ក្រុងវ៉ាស៊ីនតោន បានដឹងពាក់ព័ន្ធនឹងសេចក្ដីថ្លែងការណ៍របស់ប្រទេសរុស្ស៊ីហើយ និងកំពុងតាមសង្កេតមើលស្ថានការណ៍តាមបណ្ដោយព្រំដែនយ៉ាងដិតដល់។ “យើងបានឮសេចក្ដីថ្លែងការណ៍នោះហើយ ខ្ញុំគិតថា យើងត្រូវតែសម្លឹងមើលទៅលើទង្វើបន្តទៀត”៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 23, 2021

កម្ពុជារកឃើញករណីវិជ្ជមាននឹង Covid-19 ចំនួន 655នាក់ កាលពីថ្ងៃទី22មេសា

នាថ្ងៃទី 23មេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 655នាក់ និងករណីស្លាប់ 1នាក់ទៀត ក្នុងអំឡុង 24ម៉ោងនៃថ្ងៃទី 22មេសា ឆ្នាំ2021។

ក្នុងចំណោមអ្នកវិជ្ជមានខាងលើ មាន 522នាក់នៅភ្នំពេញ, 113នាក់នៅខេត្តព្រះសីហនុ, 5នាក់នៅខេត្តកណ្ដាល, 5នាក់នៅតាកែវ, 3នាក់នៅកំពង់ចាម, 3នាក់នៅខេត្តកែប, 1នាក់នៅមណ្ឌលគិរី, 1នាក់នៅត្បូងឃ្មុំ និង 1នាក់នៅកំពង់ស្ពឺ។ អ្នកជំងឺទាំង 655នាក់គឺមាន 654នាក់ ជាករណីពាក់ព័ន្ធនឹងព្រឹត្តិការណ៍20កុម្ភៈ និង 1នាក់ជាពលករខ្មែរត្រលប់ពីប្រទេសថៃ។ ក្នុងថ្ងៃទី 22មេសាដដែល កម្ពុជាក៏មានអ្នកជំងឺCovid-19 ចំនួន 224នាក់បានជាសះស្បើយ និងមានអ្នកស្លាប់ថ្មីចំនួន 2នាក់ផងដែរ។

គិតមកដល់បច្ចុប្បន្ន (23មេសា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 8,848នាក់ ក្នុងនោះមានអ្នកជាសះស្បើយសរុប 3,148នាក់, អ្នកស្លាប់ 61នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 5,633នាក់៕

ប្រភព៖ ក្រសួងសុខាភិបាល
ដកស្រង់៖ បុត្រា

April 23, 2021

ក្រសួងសុខាភិបាល៖ អ្នកឆ្លង Covid-19 ក្រោយការចាក់វ៉ាក់សាំងលើកទីមួយ មិនចាំបាច់ចាក់លើកទីពីរ

អ្នកនាំពាក្យរបស់ក្រសួងសុខាភិបាលកម្ពុជា បានឱ្យដឹងថា អ្នកដែលបានចាក់វ៉ាក់សាំងបង្ការ Covid-19 លើកទីមួយរួច ប៉ុន្តែក្រោយមកបានឆ្លងវីរុស នោះមិនចាំបាច់ទៅចាក់វ៉ាក់សាំងលើកទីពីរទេ ព្រោះថា បន្ទាប់ពីបានជាសះស្បើយ រាងកាយមានប្រព័ន្ធការពាររួចហើយ។

បុគ្គលដែលបានចាក់វ៉ាក់សាំងលើកទីមួយរួចហើយ តែត្រូវធ្វើចត្តាឡីស័ក គឺអាចចាក់វ៉ាក់សាំងលើកទីពីរតាមធម្មតា បន្ទាប់ពីបានធ្វើចត្តាឡីស័កគ្រប់ថ្ងៃ និងមិនមានផ្ទុកវីរុសCovid-19 ប៉ុន្តែ បើបុគ្គលនោះមានផ្ទុក Covid-19 និងបានជាសះស្បើយក្រោយពីការព្យាបាលវិញ គឺមិនចាំបាច់ចាក់វ៉ាក់សាំងលើកទីពីរទេ ដោយសារតែរាងកាយបានបង្កើតអង្គបដិប្រាណរួចហើយ បន្ទាប់ពីបានយកឈ្នះលើវីរុស។ នេះបើតាម លោកជំទាវវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំង Covid-19។

អ្នកនាំពាក្យក្រសួងសុខាភិបាលធ្លាប់បានមានប្រសាសន៍ថា បុគ្គលដែលបានចាក់វ៉ាក់សាំងរួចហើយ ក៏នៅតែអាចឆ្លងវីរុសCovid-19 ប្រសិនមិនអនុវត្តតាមការណែនាំរបស់ក្រសួង។ ក៏ប៉ុន្តែ វ៉ាក់សាំងនេះនឹងជួយដល់រាងកាយក្នុងការទប់ទល់នឹងវីរុស មិនឱ្យរាងកាយមានបញ្ហាសុខភាពធ្ងន់ធ្ងរ កាត់បន្ថយអត្រានៃការចូលពេទ្យ និងអត្រានៃការស្លាប់ដោយសារវីរុសនេះ។

ជាងនេះ លោកជំទាវវេជ្ជបណ្ឌិត ឱ វណ្ណឌីន ក៏បានបញ្ជាក់ថា ការចាក់វ៉ាក់សាំងភ្លាម រាងកាយនឹងមិនទាន់មានកងការពារភ្លាមនោះទេ ពិសេសគឺត្រូវការចាក់ដូសទីពីរឱ្យបានត្រឹមត្រូវតាមការកំណត់ និងត្រូវការពេលវេលាបន្ថែម ទើបរាងកាយបង្កើតប្រព័ន្ធការពារបានគ្រប់គ្រាន់៕

ប្រភព៖ វិទ្យុជាតិកម្ពុជា
ដកស្រង់៖ បុត្រា

April 23, 2021

សេចក្ដីព្រាងច្បាប់ប្រឆាំងការរើសអើងលើជនជាតិអាស៊ី ត្រូវបានព្រឹទ្ធសភាអាមេរិក អនុម័តរួចហើយ!

សភាជាន់ខ្ពស់របស់សហរដ្ឋអាមេរិក បានអនុម័តច្បាប់ប្រឆាំងការរើសអើងជាតិសាសន៍ដែលសំដៅលើពលរដ្ឋអាមេរិកាំងដើមកំណើតអាស៊ី នៅក្នុងគ្រាដែលអំពើប្រកាន់ជាតិសាសន៍លើជនជាតិអាមេរិកាំងដើមកំណើតអាស៊ី កំពុងរាលដាលពាសពេញសហរដ្ឋអាមេរិក។

សេចក្ដីព្រាងច្បាប់ខាងលើ ត្រូវបានអនុម័តកាលពីថ្ងៃទី22 ខែមេសា ឆ្នាំ2021 ដោយមានសន្លឹកឆ្នោតគាំទ្រចំនួន 94សំឡេង និងប្រឆាំង 1សំឡេង។ តំណាងរាស្ត្រនៃសភាជាន់ខ្ពស់មកពីបក្សសាធារណរដ្ឋ លោក Josh Hawley គឺជាអ្នកបោះឆ្នោតប្រឆាំងនឹងសេចក្ដីព្រាងច្បាប់នេះ។

សេចក្ដីព្រាងច្បាប់នេះ ត្រូវបានស្នើឡើងដោយតំណាងរាស្ត្រសភាជាន់ខ្ពស់ Mazie Hirono, Tammy Duckworth និងតំណាងរាស្ត្រសភាជាន់ទាប Grace Meng មកពីគណបក្សប្រជាធិបតេយ្យ ដើម្បីស្នើឱ្យក្រសួងយុត្តិធម៌បង្កើតការិយាល័យស៊ើបអង្កេតលើអំពើល្មើសច្បាប់ទាក់ទងនឹងការស្អប់ខ្ពើមជាតិសាសន៍ដែលត្រូវបានរាយការណ៍នៅក្នុងវិបត្តិ Covid-19។ សេចក្ដីព្រាងច្បាប់នេះក៏ណែនាំឱ្យក្រុមមន្ត្រីអនុវត្តច្បាប់នៅមូលដ្ឋាន រាយការណ៍អំពីអំពើល្មើសច្បាប់រើសអើងជាតិសាសន៍ ពង្រីកការអប់រំដល់សហគមន៍នានា និងប្រឆាំងនឹងពាក្យស្អប់ខ្ពើមទាក់ទងនឹងវិបត្តិ Covid-19។

Hirono និង Duckworth គឺជាជនជាតិអាមេរិកាំងដើមកំណើតអាស៊ីតែពីរនាក់គត់ នៅក្នុងសភាជាន់ខ្ពស់សហរដ្ឋអាមេរិក ក្នុងចំណោមតំណាងរាស្ត្រសរុបចំនួន 100នាក់។

សេចក្ដីព្រាងច្បាប់នេះនឹងត្រូវការការអនុម័តនៅសភាជាន់ទាប ជាកន្លែងដែលកៅអីភាគច្រើនត្រូវបានកាន់កាប់ដោយបក្សប្រជាធិបតេយ្យ ហើយបន្ទាប់មកទៀត វានឹងត្រូវបញ្ជូនទៅកាន់សេតវិមានដើម្បីឱ្យប្រធានាធិបតី Joe Biden ចុះហត្ថលេខា។

សូមរំលឹកថា អំពើហិង្សាប្រឆាំងនឹងពលរដ្ឋអាមេរិកាំងដើមកំណើតអាស៊ី បានកើនឡើងខ្ពស់ ចាប់តាំងពី Covid-19 បានផ្ទុះឡើង។ ក្រុមសកម្មជន និងប៉ូលិសបានឱ្យដឹងថា គំនិតស្អប់ខ្ពើមជនជាតិអាស៊ី ត្រូវបានញុះញង់ដោយវោហាសាស្ត្រចោទប្រកាន់ចិនអំពីបញ្ហា Covid-19។ អតីតប្រធានាធិបតី Donald Trump ធ្លាប់បានប្រើពាក្យពេចន៍ដូចជា «វីរុសចិន» ជាដើម ដើម្បីហៅ Covid-19។

យោងតាមក្រុមសកម្មជនប្រឆាំងនឹងអំពើស្អប់ខ្ពស់លើពលរដ្ឋអាមេរិកដើមកំណើតអាស៊ី និងបណ្ដាកោះនៅមហាសមុទ្រប៉ាស៊ីហ្វិក (AAPI) អំពើរើសអើងជាតិសាសន៍ជិត 3,800ករណី បានកើតឡើងនៅសហរដ្ឋអាមេរិក រាប់ចាប់ពីខែមីនា ឆ្នាំ2020 ដល់ខែកុម្ភៈ ឆ្នាំ2021។ ចំណែកមជ្ឈមណ្ឌលស្រាវជ្រាវអំពីលទ្ធិស្អប់ខ្ពើម និងជ្រុលនិយម នៃសាកលវិទ្យាល័យរដ្ឋ California បានបញ្ជាក់ថា អំពើល្មើសដែលប្រឆាំងនឹងពលរដ្ឋអាមេរិកាំងដើមកំណើតអាស៊ី កើនជិត 150% ក្នុងឆ្នាំ2020 បើធៀបនឹងឆ្នាំ2019៕

ប្រភព៖ Reuters, Financial Times
ប្រែសម្រួល៖ បុត្រា

April 23, 2021

UN ប៉ានប្រមាណថា ប៉ុន្មានខែខាងមុខ ប្រជាជនមីយ៉ាន់ម៉ា ច្រើនលាននាក់ នឹងប្រឈមនឹងគ្រោះទុរភិក្ស ដោយសារវិបត្តិផ្ទៃក្នុង

ភាពគ្មានស្ថិរភាពខាងស្បៀង កំពុងកើនឡើងយ៉ាងឆាប់រហ័សនៅក្នុងប្រទេសមីយ៉ាន់ម៉ា ដែលនេះជាផលប៉ះពាល់បណ្ដាលមកពីរដ្ឋប្រហារ និងវិបត្តិហិរញ្ញវត្ថុ ដែលមានភាពធ្ងន់ធ្ងរទ្វេឡើង ដោយអង្គការសហប្រជាជាតិ បានប៉ាន់ប្រមាណថា នឹងមានមនុស្សជាច្រើនលាននាក់ ប្រឈមនឹងភាពអត់ឃ្លាន ក្នុងអំឡុងពេលប៉ុន្មានខែខាងមុខនេះ។

អង្គការចំណីអាហារពិភពលោក ឬ WFP បានវិភាគថា មនុស្សម្នាច្រើនដល់ 3.4លាននាក់ នឹងត្រូវតស៊ូ ដើម្បីរកទិញស្បៀងអាហារ ក្នុងរយៈពេល 3-6ខែខាងមុខ ដោយទីប្រជុំជននឹងទទួលរងផលប៉ះពាល់យ៉ាងធ្ងន់ធ្ងរ បណ្ដាលមកពីអត្រាគ្មានការងារធ្វើ ដែលកើនឡើងក្នុងវិស័យផលិតកម្ម ការសាងសង់ និងសេវាកម្ម រួមទាំងតម្លៃម្ហូបអាហារដែលកើនឡើងខ្ពស់ដូចគ្នា។

“អ្នកក្រ ចំនួនដ៏ច្រើន លែងមានការងារធ្វើ និងមិនអាចរកទិញចំណីអាហារបានឡើយ ដូច្នេះចាំបាច់ត្រូវមានការតបស្នងយ៉ាងព្រមព្រៀងគ្នា ដើម្បីសម្រាលការលំបាកលំបិនភ្លាមៗ និងការពារមិនឱ្យកើតមានភាពចុះខ្សោយខាងស្ថិរភាពចំណីអាហារ” លោក ស្ទីហ្វេន អ៊ែនដឺសុន ប្រធានអង្គការចំណីអាហារពិភពលោក ប្រចាំប្រទេសមីយ៉ាន់ម៉ា បានថ្លែងបែបនេះនៅក្នុងសេចក្ដីថ្លែងព័ត៌មាន។

WFP បានបញ្ជាក់ថា តម្លៃទីផ្សារអង្ករ និងប្រេងឆា កើនឡើង 5% និង 18% តាមលំដាប់ ចាប់តាំងពីដំណាច់ខែកុម្ភៈមក និងមានសញ្ញាថា ក្រុមគ្រួសារជនជាតិមីយ៉ាន់ម៉ាមួយចំនួន ក្នុងទីក្រុងយ៉ាំងហ្គោន កំពុងរំលងពេលបាយចោលខ្លះ ហូបអាហារដែលមានគុណតម្លៃខាងភោជនាហារទាប និងកំពុងមានបំណុលច្រើន។

ក្រុមការងារ បានរៀបផែនការក្នុងការពង្រីកប្រតិបត្តិការផ្ដល់ការជួយសង្គ្រោះមនុស្ស កើនឡើង 3ដង ស្មើនឹង 3.3លាននាក់ និងកំពុងប្រមូលផ្ដុំថវិកា ដើម្បីប្រើប្រាស់ក្នុងការជួយសង្គ្រោះឱ្យបានដល់ 106លានដុល្លារ។ នេះបើតាមការឱ្យដឹងពីស្ថាប័នខាងលើ។

ទាំងអស់នេះ អ្នកនាំពាក្យរដ្ឋបាលទាហានមីយ៉ាន់ម៉ា មិនបានឆ្លើយតបទូរស័ព្ទដែលទីភ្នាក់ងារព័ត៌មាន Reuters ទំនាក់ទំនង ដើម្បីសុំការអធិប្បាយឡើយ៕

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 23, 2021

បែលហ្ស៊ិកភ័យរន្ធត់! រកឃើញអ្នកឆ្លងជំងឺកូវីដក្លាយពូជឥណ្ឌា ខណៈដែលប្រទេសជាច្រើន ហាមជើងហោះហើរ

មេរោគកូវីដ-19 ប្រភេទក្លាយពូជ ដែលកាន់តែពុះកញ្ជ្រោលខ្លាំងឡើងក្នុងករណីអ្នកឆ្លងថ្មីនៅក្នុងប្រទេសឥណ្ឌា ត្រូវបានរកឃើញនៅក្នុងប្រទេសបែលហ្ស៊ិក ក្នុងក្រុមនិស្សិតជនជាតិឥណ្ឌា ដែលធ្វើដំណើរមកពីទីក្រុងប៉ារីស ប្រទេសបារាំង ខណៈដែលកាណាដា ជាប្រទេសចុងក្រោយគេ ដែលបានហាមឃាត់ជើងហោះហើរមកពីប្រទេសឥណ្ឌា និងប៉ាគីស្ថាន មិនឱ្យធ្វើដំណើរចូលប្រទេស ក្រោមក្ដីកង្វល់បារម្ភចំពោះមេរោគក្លាយពូជ ដែលមានលក្ខណៈពិសេស ដែលអាចបង្កឱ្យកើត “ការឆ្លងរាលដាលច្រើនឡើង” ឬរហូតដល់ “កាត់បន្ថយប្រសិទ្ធភាពវ៉ាក់សាំង” បានទៀតផង។

លោក ប៉េដ្រូ ហ្វាខុន មន្ត្រីថ្នាក់ខ្ពស់នៃរដ្ឋបាលបែលហ្ស៊ិក បានបង្ហើបប្រាប់ទីភ្នាក់ងារព័ត៌មាន AFP ថា និស្សិតពេទ្យឥណ្ឌា 20នាក់ ដែលធ្វើដំណើរមកពីទីក្រុងប៉ារីស ប្រទេសបារាំង ចូលមកបែលហ្ស៊ិក ក្នុងអំឡុងពាក់កណ្ដាលខែមេសា មានលទ្ធពិនិត្យវីរុសកូរ៉ូណាប្រភេទថ្មីក្លាយពូជឥណ្ឌា វិជ្ជមាន។

និស្សិតទាំងអស់ ត្រូវបាននាំខ្លួនទៅមជ្ឈមណ្ឌលបង្ខាំងជំងឺ ក្នុងក្រុងហាលស៍ និងទីក្រុងលូវឹន ភាគខាងជើងប្រទេសបែលហ្ស៊ិក ដែលពីដើមពួកគេមានកម្មវិធីចូលរួមសិក្ខាសាលាហ្វឹកអប់រំ ក្នុងទីក្រុងមួយនេះ។

ក្រុមអ្នកជំនាញការជាច្រើន បានចង្អុលបង្ហាញថា ក្រុមនិស្សិតទាំងនោះ អាចជាជនរងគ្រោះរបស់ Super Spreader ទាំងពីសមាជិកក្នុងក្រុមខ្លួនឯង ឬអ្នកដំណើរដទៃទៀតនៅលើរថយន្តក្រុង ដែលដឹកពួកគេ ពីទីក្រុងប៉ារីស មកប្រទេសបែលហ្ស៊ិក “ក្រុមនិស្សិតទាំងនោះ កំពុងស្ថិតក្នុងការបង្ខាំងខ្លួនយ៉ាងតឹងរ៉ឹង តាំងពីពេលធ្វើដំណើរមកដល់ រហូតមកដល់ថ្ងៃនេះ និស្សិតទាំង 20នាក់ ក្នុងចំណោម 43នាក់ បានឆ្លងមេរោគកូវីដក្លាយពូជ” លោក អេមម៉ានូអែល អង់ដ្រេ អ្នកជំនាញផ្នែក Microbiology មកពីមហាវិទ្យាល័យលូវឹន បានថ្លែងបែបនេះ។

លោក ម៉ាក ហ្វាន រ៉ាន់ស៍ អ្នកវីរុសវិទ្យា ជាអ្នកជំនាញការម្នាក់ទៀត បានផ្ដល់សម្ភាសជាមួយស្ថានីយវិទ្យុក្នុងតំបន់ថា ក្រុមរបស់លោក បានធ្វើដំណើរតាមយន្តហោះមកដល់ទីក្រុងប៉ារីសនៅថ្ងៃទី12 មេសា បន្ទាប់ពីនោះ 5ថ្ងៃតមកទៀត និស្សិតជាច្រើននាក់ បានចាប់ផ្ដើមបង្ហាញអាការការឆ្លងមេរោគវីរុសកូរ៉ូណាប្រភេទថ្មី។

មេរោគក្លាយពូជឥណ្ឌា B.1.617 ចាប់ផ្ដើមរកឃើញនៅក្នុងប្រទេសផ្សេងៗរួចហើយ ក្នុងនោះរួមទាំងសហរដ្ឋអាមេរិក អូស្ត្រាលី អ៊ីស្រាអែល និងសិង្ហបុរី ដែលក្ដីបារម្ភកង្វល់ពាក់ព័ន្ធនឹងមេរោគក្លាយពូជនេះ បានធ្វើឱ្យប្រទេសមួយចំនួន ក្នុងនោះរួមទាំងចក្រភពអង់គ្លេសផង បានកំណត់កម្រិតការធ្វើដំណើរជាមួយប្រទេសឥណ្ឌា។

យ៉ាងណាក៏ដោយ ក្ដីកង្វល់បារម្ភ មានកាន់តែខ្លាំងឡើង ក្រោយពីចំនួនអ្នកឆ្លងមេរោគកូវីដ-19 ក្នុងប្រទេសឥណ្ឌា បានកើនឡើងយ៉ាងឥតឈប់ឈរ ដោយថ្មីៗបំផុតនេះ បានក្លាយជាស្ថិតិថ្មី ខ្ពស់បំផុតក្នុងពិភពលោក ចាប់តាំងពីមេរោគវីរុសកូរ៉ូណាប្រភេទថ្មី ចាប់ផ្ដើមរាលដាល កាលពីចុងឆ្នាំ2019 មក។

មូលហេតុមួយផ្នែក របស់ការឆ្លងរាលដាលរលកថ្មីនៅក្នុងប្រទេសឥណ្ឌា បណ្ដាលមកពីវីរុសក្លាយពូជបែប “Double Mutant”។

ប្រភព៖ ទីភ្នាក់ងារព័ត៌មាន Reuters
ប្រែសម្រួលដោយ តាវ៉ែនតា

April 23, 2021

អង់គ្លេស៖ មនុស្ស 23នាក់បានស្លាប់ដោយសារបញ្ហាកកឈាម ក្រោយការចាក់វ៉ាក់សាំង AstraZeneca

ក្រុមមន្ត្រីអង់គ្លេសបានឱ្យដឹងថា ប្រទេសនេះបានរកឃើញករណីស្លាប់ចំនួន 32នាក់ នៅក្នុងចំណោមករណីកកឈាមដ៏កម្រ ចំនួន 168នាក់ បន្ទាប់ពីបានចាក់វ៉ាក់សាំង AstraZeneca។

នាយកដ្ឋានគ្រប់គ្រងឱសថ និងផលិតផលថែរក្សាសុខភាពរបស់អង់គ្លេស (MHRA) បានរាយការណ៍ថា ក្នុងចំណោមពលរដ្ឋ 21.2លាននាក់ដែលបានចាក់វ៉ាក់សាំង AstraZeneca ដូសទីមួយ គិតមកដល់ថ្ងៃទី14 ខែមេសា ឆ្នាំ2021 មនុស្សចំនួន 168នាក់ត្រូវបានរកឃើញថា មានឈាមកកក្នុងរាងកាយ ក្នុងនោះក៏មាន 32នាក់បានស្លាប់។

បច្ចុប្បន្ន តួលេខស្ដីអំពីបញ្ហាកកឈាម និងស្លាប់ ដែលទាក់ទិននឹងវ៉ាក់សាំង AstraZeneca បានកើនបន្តបន្ទាប់គឺ 68 និង 10ករណី បើធៀបនឹងទិន្នន័យដែលត្រូវបានស្រង់កាលពីថ្ងៃទី5 ខែមេសា។

MHRA បានបញ្ជាក់ថា៖ «យោងតាមការវាយតម្លៃជាបន្តបន្ទាប់នេះ ការផ្ដល់យោបល់នោះគឺថា «ផលប្រយោជន៍របស់វ៉ាក់សាំងនេះ នៅតែធំជាងហានិភ័យរបស់វា សម្រាប់ពលរដ្ឋភាគច្រើន»។

នៅតំបន់អឺរ៉ុប ប្រទេសជាច្រើនបានចាប់ផ្ដើមយុទ្ធនាការចាក់វ៉ាក់សាំង Johnson & Johnson ឡើងវិញ បន្ទាប់ពីស្ថាប័នគ្រប់គ្រងឱសថរបស់សហភាពនេះ គាំទ្រដល់វ៉ាក់សាំងប្រភេទមួយដូសនេះ។

ក្រោយពីបានស្រាវជ្រាវលើករណីកកឈាមបន្ទាប់ពីបានចាក់វ៉ាក់សាំង គណៈកម្មការសុវត្ថិភាពរបស់ស្ថាប័នគ្រប់គ្រងឱសថអឺរ៉ុប (EMA) កាលពីថ្ងៃទី20 ខែមេសា បានសម្រេចថា «ការព្រមានអំពីបញ្ហាកកឈាមខុសធម្មតា និងបរិមាណប្លាកែតក្នុងឈាមមានកម្រិតទាប គួរតែត្រូវបានបន្ថែមទៅក្នុងព័ត៌មាននៃផលិតផល» របស់វ៉ាក់សាំង Johnson & Johnson។ EMA យល់ថា គួរតែបន្តប្រើប្រាស់វ៉ាក់សាំង Johnson & Johnson ព្រោះថា វាមានផលប្រយោជន៍ច្រើនជាងផលវិបាក។

ពិភពលោក បច្ចុប្បន្នមានអ្នកឆ្លងវីរុសCovid-19 សរុបចំនួន 145,315,026នាក់ ក្នុងនោះមាន 3,084,441នាក់បានស្លាប់, 123,302,909នាក់បានជាសះស្បើយ និង 18,927,676នាក់កំពុងព្យាបាល។ នេះបើតាមគេហទំព័រ Worldometers៕

ប្រភព៖ AFP, CNN
ប្រែសម្រួល៖ បុត្រា

April 23, 2021

កូនយន្តហោះដ្រោន 1,500គ្រឿង ហោះតម្រៀបជាកូដ QR «យក្ស» នៅលើផ្ទៃមេឃនៃប្រទេសចិន

ក្រុមអ្នកជំនាញ បានប្រើប្រាស់កូនយន្តហោះដ្រោនចំនួន 1,500គ្រឿង ដើម្បីបង្កើតកូដ QR ដ៏ធំ នៅលើផ្ទៃមេឃនៃទីក្រុងសៀងហៃ ប្រទេសចិន ដែលគ្រប់គ្នាអាចប្រើប្រាស់ទូរស័ព្ទដើម្បីស្គែនវាបាន។

ការបង្កើតព្រឹត្តិការណ៍ដ៏អស្ចារ្យនេះគឺជាពិធីរំលឹកខួបមួយឆ្នាំនៃវត្តមានរបស់ហ្គេមមួយប្រភេទនៅប្រទេសចិន។ កូនយន្តហោះដ្រោនទាំងនេះ បានធ្វើឱ្យរាត្រីនៅសៀងហៃ ប្រែជាភ្លឺចែងចាំង គួរជាទីគយគន់។

ពួកវាត្រូវបានគេបញ្ជាឱ្យហោះហើរទៅលើអាកាស និងតម្រៀបជារូបរាងនៃតួអង្គនានាក្នុងហ្គេម «Princess Connect! Re:Dive» រួមនឹងកូដ QR ដែលអាចស្កែនដោយទូរស័ព្ទឆ្លាតវៃ។

កូដ QR នៅលើអាកាសនេះ នឹងនាំម្ចាស់ទូរស័ព្ទទៅកាន់គេហទំព័ររបស់ហ្គេម។ ព្រឹត្តិការណ៍ដ៏គួរឱ្យភ្ញាក់ផ្អើលនេះ ត្រូវបានចុះផ្សាយនៅលើបណ្ដាញសង្គមចែករំលែកវីដេអូ Bilibili របស់ចិន៕

ប្រភព៖ SCMP, Techtimes
ប្រែសម្រួល៖ បុត្រា

April 23, 2021

នាវាមុជទឹកឥណ្ឌូនេស៊ីដែលកំពុងបាត់ខ្លួន នៅសល់អុកស៊ីសែន ប្រហែល 70ម៉ោងទៀតប៉ុណ្ណោះ

សារព័ត៌មាន CNN (អាមេរិក) ដកស្រង់សម្ដីរបស់ឧត្តមនាវី Yudo Margono អគ្គមេបញ្ជាការកងទ័ពជើងទឹកឥណ្ឌូនេស៊ី បានឱ្យដឹងដោយយោងទៅលើការគណនាដែលរាប់ចាប់ពីដំណាក់កាលនៅមានទំនាក់ទំនងនាថ្ងៃទី21 ខែមេសាថា នាវាមុជទឹកដែលកំពុងបាត់ខ្លួននោះ នៅមានអុកស៊ីសែនដែលអាចឱ្យក្រុមនាវិកដកដង្ហើមបានត្រឹមតែ 72ម៉ោងទៀតប៉ុណ្ណោះ។

នាវាមុជទឹកផលិតនៅប្រទេសអាល្លឺម៉ង់ KRI Nanggala-402 ត្រូវបានអនុញ្ញាតឱ្យមុជចូលក្នុងទឹកលើកចុងក្រោយ នៅវេលាម៉ោង15 នៃថ្ងៃទី21 ខែមេសា ហើយក្រោយមកក៏បានដាច់ទំនាក់ទំនងជាមួយនឹងក្រុមការងារនៅលើគោក។ ឧត្តមនាវី Margono បានបង្ហើបឱ្យដឹងថា ពេលនោះ KRI Nanggala-402 ទើបតែបានបាញ់មីស៊ីលទឹកចំនួនពីរគ្រាប់ នៅក្នុងសមយុទ្ធក្នុងសមុទ្រ Bali ត្រង់ចន្លោះសមុទ្រ Bali និងមហាសមុទ្រឥណ្ឌា។

លោក Margono បន្ថែមថា កងទ័ពជើងទឹកបានឃើញរលកសញ្ញានៃវត្ថុមួយដែលស្ថិតនៅជម្រៅប្រមាណពី 50-100ម៉ែត្រក្រោមទឹកសមុទ្រ និងមានដែនម៉ាញេទិច ដែលនេះទំនងជាបានជះចេញពីនាវាមុជទឹកដែលកំពុងបាត់ខ្លួន។

នាវាមុជទឹក KRI Nanggala-402 ដែលមានទម្ងន់ 1,395តោន ដែលកំពុងជួបគ្រោះថ្នាក់នេះ ត្រូវបានដាក់ឱ្យប្រើប្រាស់នៅក្នុងជួរកងទ័ពឥណ្ឌូនេស៊ី ចាប់ពីឆ្នាំ1981៕

ប្រភព៖ CNN
ប្រែសម្រួល៖ បុត្រា

April 22, 2021

Author: សឿន សំណាង