សឿន សំណាង - La Reine Media

Delta កំពុងក្លាយជាវ៉ារ្យ៉ង់ស្នូល ក្នុងការឆ្លងរាលដាល COVID-19 នៅប្រទេសថៃ

វីរុសបំប្លែងថ្មី Delta របស់ COVID-19 កំពុងតែក្លាយជាវ៉ារ្យ៉ង់ចម្បងនៅប្រទេសថៃ ដោយមានអ្នកជំងឺ COVID-19 ជាង 90% វិជ្ជមាននឹងវ៉ារ្យ៉ង់នេះ។

ប្រធានានាយកដ្ឋានវិទ្យាសាស្ត្រសុខាភិបាល វេជ្ជបណ្ឌិត Supphakit Siriluck ថ្ងៃទី 10 សីហា បានឱ្យដឹងថា ក្នុងចំណោមសំណាកចំនួន 1,632 ដែលត្រូវបានស្រង់ស្ថិតិកាលពីសប្ដាហ៍មុន មាន 1,499 សំណាក (ប្រហែល 91.9%) ផ្ទុកវីរុសបំប្លែងថ្មី Delta (វ៉ារ្យ៉ង់ដែលរកឃើញដំបូងនៅប្រទេសឥណ្ឌា), 129 សំណាក (7.9%) ផ្ទុក Alpha (រកឃើញដំបូងនៅ អង់គ្លេស), និង 4 សំណាក (0.2%) ផ្ទុក Beta (រកឃើញដំបូងនៅ អាហ្វ្រិកខាងត្បូង)។ ក្រៅពីវ៉ារ្យ៉ង់ចំនួន 3 ខាងលើនេះ មិនទាន់មានវ៉ារ្យ៉ង់ណាផ្សេងទៀតត្រូវបានរកឃើញនៅប្រទេសថៃនៅឡើយ។

ក្នុងចំណោមសំណាកចំនួន 1,632 ខាងលើ មាន 1,157 សំណាកត្រូវបានយកពីទីក្រុងបាងកក ក្នុងនោះ មាន 95.4% ផ្ទុកវ៉ារ្យ៉ង់ Delta ខណៈក្រៅពីនេះគឺវ៉ារ្យ៉ង់ Alpha។ សំណាកចំនួន 475 ដែលយកពីបណ្ដាខេត្តគឺ មាន 83.2% មានផ្ទុក Delta និង 16% ផ្ទុក Alpha។

វេជ្ជបណ្ឌិត Supphakit និយាយថា និន្នាការនៃការឆ្លង COVID-19 នៅប្រទេសថៃ បង្ហាញថា វ៉ារ្យ៉ង់ Delta កំពុងក្លាយជាវីរុសបំប្លែងថ្មីចម្បងជាងគេ ដោយឆ្លងយ៉ាងឆាប់រហ័សជាងគេ ខណៈ Alpha អាចនឹងលែងមានតទៅទៀត។ ចំណែក Beta វិញ នឹងនៅតែមាននៅភាគខាងត្បូងប្រទេសនេះ។ វ៉ារ្យ៉ង់ Beta ឆ្លងរាលដាលយឺតជាងវ៉ារ្យ៉ង់ Delta ដូច្នេះ ងាយស្រួលក្នុងការគ្រប់គ្រង។

ក្នុងរយៈពេល 24 ម៉ោង ប្រទេសថៃ បានរកឃើញអ្នកជំងឺថ្មីចំនួនជិត 20,000 នាក់ និង 235 នាក់បានស្លាប់ដោយសារ COVID-19។ បច្ចុប្បន្ន ប្រទេសថៃ បានរកឃើញអ្នកជំងឺ COVID-19 សរុបចំនួនជាង 795.900 នាក់ ក្នុងនោះមានអ្នកស្លាប់ជិត 6,600 នាក់៕

August 10, 2021

វៀតណាម ជោគជ័យជំហានដំបូង ក្នុងការអភិវឌ្ឍថ្នាំព្យាបាល COVID-19

ថ្នាំផ្សំឡើងពីឱសថបុរាណ ដែល វៀតណាម ទើបតែបានប្រកាសថា ជោគជ័យជំហានដំបូង និងមានសមត្ថភាពទប់ស្កាត់ការកើនឡើងនៃបរិមាណវីរុស COVID-19 នៅក្នុងកោសិកា នេះ កំពុងរង់ចាំការអនុញ្ញាតពីក្រសួងសុខាភិបាល ដើម្បីធ្វើការពិសោធលើអ្នកជំងឺ។

ព្រឹកថ្ងៃទី 10 សីហា នេះ បណ្ឌិត្យសភាវិទ្យាសាស្ត្រនិងបច្ចេកវិទ្យា វៀតណាម បានប្រកាសបង្ហាញឱសថឈ្មោះ Vipdervir ដែលប្រើសម្រាប់បង្ការ និងព្យាបាលជំងឺដែលកើតដោយសារវីរុស RNA (ribonucleic acid) ពិសេសគឺ COVID-19។ លទ្ធផលនៃការស្រាវជ្រាវនេះ ទទួលបានការយល់ព្រមពីក្រុមប្រឹក្សាជាតិស្តីពីក្រមសីលធម៌ក្នុងការស្រាវជ្រាវជីវសាស្ត្រ នៃក្រសួងសុខាភិបាល ក្នុងការដាក់សំណើសុំពិសោធលើមនុស្ស ដើម្បីវាយតម្លៃប្រសិទ្ធភាពលើការព្យាបាល COVID-19។

«Vipdervir ត្រូវបានផលិតឡើងពីឱសថបុរាណ មានផ្ទុកសមាសធាតុដែលអាចគ្រប់គ្រងម៉ូលេគុលគោលដៅដែលទាក់ទិននឹងដំណើរការនៃការលុកលុយ និងការកកើតកូនចៅរបស់ COVID-19។ ទន្ទឹមនឹងនេះ ឱសថនេះក៏មានសមាសធាតុដែលជួយរំញោចទៅលើបណ្ដាកោសិកានៃប្រព័ន្ធការពាររាងកាយ ជួយបង្កើនសមត្ថភាពប្រឆាំងនឹងវីរុសរបស់អ្នកជំងឺ» នេះបើតាមវេជ្ជបណ្ឌិត Le Quang Huan សាស្ត្រាចារ្យរង និងជាប្រធានក្រុមស្រាវជ្រាវ។

លោក Quang អនុប្រធាននាយកដ្ឋានវិទ្យាសាស្ត្រ បច្ចេកវិទ្យា និងបណ្ដុះបណ្ដាល នៃក្រសួងសុខាភិបាល វៀតណាម បាននិយាយថា៖ «ក្រសួងសុខាភិបាលសង្ឃឹមថា ចាប់ពីពេលនេះដល់ចុងឆ្នាំ ការពិសោធលើមនុស្សនឹងត្រូវបានធ្វើឡើងរួចរាល់។

បច្ចុប្បន្ន Vipdervir ត្រូវបានផលិតឡើងជាទម្រង់គ្រាប់រឹង។ ក្រុមស្រាវជ្រាវនឹងអាចចាប់ផ្ដើមពិសោធលើអ្នកជំងឺ COVID-19 ក្នុងពេលឆាប់ៗនេះ ដោយសារវាជាថ្នាំរុក្ខជាតិ។ លោក Quang និយាយថា៖ «តាមផែនការ នៅចុងឆ្នាំ 2021 អាចផ្ដល់ការអនុញ្ញាតឱ្យចរាចរណ៍ថ្នាំ នេះ បន្ទាប់ពីលទ្ធផលនៃការពិសោធលើមនុស្សទទួលបានជោគជ័យ»។

ក្រុមអ្នកវិទ្យាសាស្ត្រ វៀតណាម បានចាប់ផ្ដើមស្រាវជ្រាវលើឱសថបុរាណដែលអាចជួយព្យាបាល COVID-19 តាំងពីដើមឆ្នាំ 2020 ដោយយោងទៅលើបទពិសោធន៍នៃការស្រាវជ្រាវ និងការផ្សំឱសថបុរាណព្យាបាលជំងឺមហារីក រួមនឹងថ្នាំជួយព្យាបាលជំងឺច្រើនមុខផ្សេងទៀត។ លទ្ធផលនៃការពិសោធន៍លើសត្វកន្លងមក បានបង្ហាញថា Vipdervir មានសុវត្ថិភាព។

លោក Quang បានឱ្យដឹងថា ក្រុមស្រាវជ្រាវកំពុងរង់ចាំការអនុញ្ញាតពីក្រសួងសុខាភិបាល ដើម្បីអាចពិសោធថ្នាំនេះនៅលើអ្នកជំងឺ COVID-19។ តាមគម្រោង ក្រោយពីទទួលបានការអនុញ្ញាត ឱសថនេះនឹងត្រូវបានយកទៅពិសោធនៅក្នុងមន្ទីរពេទ្យ National Hospital of Tropical Diseases នារដ្ឋធានីហាណូយ៕

August 10, 2021

NASA ជ្រើសរើសមនុស្សទៅរស់នៅលើភពព្រះអង្គារសិប្បនិម្មិត

សហរដ្ឋអាមេរិក៖ ដើម្បីត្រៀមខ្លួនសម្រាប់បញ្ជូនមនុស្សទៅកាន់ពិភពព្រះអង្គារ ទីភ្នាក់ងារអវកាសអាមេរិក (NASA) ចាប់ផ្ដើមទទួលពាក្យពីបេក្ខភាពទាំងឡាយ បំណងជ្រើសរើសមនុស្សចំនួន 4 នាក់ ឱ្យទៅរស់នៅរយៈពេល 1 ឆ្នាំ នៅលើភពអង្គារសិប្បនិម្មិត Mars Dune Alpha។

Mars Dune Alpha គឺជាទីតាំងទំហំ 158 ម៉ែត្រក្រឡា និងមានបរិយាកាសដូចទៅនឹងពិភពព្រះអង្គារ ដែលត្រូវបានសាងសង់ឡើងដោយគ្រឿងចក្របោះពុម្ភ 3D។ Mars Dune Alpha មានទីតាំងនៅក្នុងអគារមួយដែលស្ថិតក្នុងមជ្ឈមណ្ឌលអវកាស Johnson នាទីក្រុង Houston រដ្ឋ Texas សហរដ្ឋអាមេរិក។ ក្រុមអ្នកស្ម័គ្រចិត្តដែលទទួលបានប្រាក់ខែ នឹងធ្វើការក្នុងបេសកកម្មស្រាវជ្រាវភពអង្គារសិប្បនិម្មិត រួមមាន ការដើរក្នុងបរិវេណនៃទីតាំងពិសោធ ការកាត់បន្ថយទំនាក់ទំនងជាមួយគ្រួសារ ប្រភពអាហារនិងធនធានមានកំណត់ រួមនឹងស្ថានភាពឧបករណ៍បច្ចេកវិទ្យាត្រូវខូច។

NASA កំពុងរៀបចំគម្រោងសម្រាប់ការពិសោធចំនួន 3 ក្នុងចំណោមការពិសោធទាំងឡាយខាងលើ។ ការពិសោធដំបូងនឹងចាប់ផ្ដើមនៅរដូវស្លឹកឈើជ្រុះឆ្នាំក្រោយ។ អាហារទាំងអស់ សុទ្ធតែអាហារឆ្អិនស្រាប់។ អ្នកស្ម័គ្រចិត្តនឹងដាំរុក្ខជាតិមួយចំនួន។

ការជ្រើសអ្នកស្ម័គ្រចិត្តដែលត្រូវបានធ្វើឡើងចាប់តាំងពីចុងសប្ដាហ៍មុននេះ ពិតជាមានលក្ខខណ្ឌតឹងរ៉ឹង ក្នុងនោះ បេក្ខភាពត្រូវតែមានសញ្ញាបត្របណ្ឌិតផ្នែកវិទ្យាសាស្ត្រ បច្ចេកទេស គណិត ឬមានបទពិសោធន៍ជាអ្នកបើកបរយន្តហោះ។ អ្នកមិនអាចមានឱកាសទទួលបានការជ្រើសរើសនោះទេ បើសិនមិនមែនជាពលរដ្ឋអាមេរិក។ អ្នកស្ម័គ្រចិត្ត ក៏ត្រូវមានវ័យចាប់ពី 30-55 ឆ្នាំ មានសុខភាពល្អ មិនមានបញ្ហាក្នុងការហូបចុក និងមិនមានបញ្ហាពុលឡាន ឬយានជំនិះផ្សេងៗ។

ជ្រុងមួយនៃទិដ្ឋភាពខាងក្នុងរបស់ទីតាំងពិសោធន៍ Mars Dune Alpha

គម្រោងខាងលើបង្ហាញថា NASA កំពុងស្វែងរកមនុស្សដែលមានសមត្ថភាពជិតស្មើនឹងអ្នកអវកាស។ ការពិសោធនឹងផ្ដល់លទ្ធផលល្អ បើសិនអ្នកស្ម័គ្រចិត្តមានលក្ខណៈដូចទៅនឹងមនុស្សដែលជិតបានហោះទៅកាន់ភពព្រះអង្គារ។

កន្លងមក រុស្ស៊ី ក៏ធ្លាប់ធ្វើការពិសោធមួយដូចគ្នានេះដែរ ប៉ុន្តែ បេសកកម្មដែលមានឈ្មោះថា Mars 500 របស់ពួកគេ បានបរាជ័យ ព្រោះតែអ្នកស្ម័គ្រចិត្ត មានលក្ខណៈដូចទៅនឹងមនុស្សសាមញ្ញខ្លាំងពេក។

អតីតអ្នកអវកាសជនជាតិ កាណាដា ឈ្មោះ Chris Hadfield ដែលធ្លាប់បានស្ថិតនៅលើស្ថានីយអវកាសអន្តរជាតិ (ISS) រយៈពេល 5 ខែ កាលពីឆ្នាំ 2013 បានឱ្យដឹងថា ឥរិយាបថពិតជាសំខាន់ខ្លាំងណាស់។ អ្នកដែលសមស្របជាមួយនឹងបេសកកម្មគឺ ត្រូវតែមានសមត្ថភាពគ្រប់គ្រាន់ ពូកែដោះស្រាយបញ្ហា និងជាមនុស្សដែលមិនអាស្រ័យលើអារម្មណ៍អ្នកដទៃ៕

August 10, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី 10 ខែសីហា ឆ្នាំ 2021

កម្ពុជា បានរកឃើញអ្នកវិជ្ជមាននឹង Covid-19 ចំនួន 499 នាក់, អ្នកជាចំនួន 882 នាក់ និងអ្នកស្លាប់ចំនួន 17 នាក់បន្ថែមទៀត នៅក្នុងថ្ងៃទី 09 ខែសីហា ឆ្នាំ 2021។

គិតត្រឹមព្រឹកថ្ងៃទី 10 ខែសីហា ឆ្នាំ 2021 កម្ពុជា មានអ្នកឆ្លង COVID-19 សរុប 82,898 នាក់ ក្នុងនោះមានអ្នកជាសះស្បើយជាង 77,030 នាក់ និងអ្នកស្លាប់ 1,602 នាក់។

ការចាក់វ៉ាក់សាំងនៅកម្ពុជា គិតត្រឹមព្រឹកព្រលឹមថ្ងៃទី 10 ខែសីហា ឆ្នាំ 2021 នេះ រួមមាន៖ អាយុ 18 ឆ្នាំឡើងទៅ (ពលរដ្ឋគោលដៅ 10 លាននាក់) ចាក់បាន 79.54% ចំណែកពលរដ្ឋ អាយុ 12-17 ឆ្នាំ (ពលរដ្ឋគោលដៅ ជិត 2 លាននាក់) ចាក់បាន 16.04%។ ជាសរុប ការចាក់វ៉ាក់សាំងជូនពលរដ្ឋគោលដៅ 16 លាននាក់ នៅទូទាំងប្រទេស សម្រេចបាន 51.69%។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺ Covid-19 សរុបចំនួនជាង 204,151,650 នាក់ ត្រូវបានរកឃើញ ក្នុងនោះមានជាង 183,346,470 នាក់បានជា, 4,316,303 នាក់បានស្លាប់ និងជាង 16,488,870 នាក់ កំពុងព្យាបាល៕

August 10, 2021

អ្នកបានចាក់វ៉ាក់សាំង COVID-19 រួចរាល់ មិនចាំបាច់ចាក់ដូសបន្ថែមក្នុងអំឡុងមួយឆ្នាំ

អ្នកជំនាញកម្រិតកំពូលម្នាក់របស់មជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) នៃប្រទេសចិន ទើបតែបានឱ្យដឹងថា អ្នកដែលបានចាក់វ៉ាក់សាំង COVID-19 រួចរាល់ហើយ មិនចាំបាច់ចាក់ដូសបន្ថែមនោះទេ ក្នុងរយៈពេលមួយឆ្នាំ។

ប្រការខាងលើនេះ ត្រូវបានលើកឡើងនៅក្នុងគ្រាដែលសាធារណជនមានការព្រួយបារម្ភចំពោះការផ្ទុះឆ្លងរាលដាលជាថ្មីចាប់តាំងពីពាក់កណ្ដាលខែកក្កដា ពិសេសគឺ COVID-19 ប្រភេទបំប្លែងខ្លួនថ្មី ឬហៅថា វ៉ារ្យ៉ង់ Delta ដែលត្រូវបានចាត់ទុកថា មានលទ្ធភាពឆ្លងរាលដាលខ្លាំងក្លាជាងប្រភេទដំបូង។

ឆ្លើយនឹងសំណួររបស់ទូរទស្សន៍ចិន CCTV កាលពីថ្ងៃទី 08 សីហា លោក Shao Yiming ដែលជាវេជ្ជបណ្ឌិតលំដាប់កំពូល និងជាអ្នកឯកទេសផ្នែកជំងឺឆ្លងរបស់ CDC ចិន បាននិយាយថា កំហាប់នៃ អង់ទីហ្សែន ក្នុងរាងកាយមនុស្ស ថយចុះទៅតាមពេលវេលា បន្ទាប់ពីបានចាក់វ៉ាក់សាំង។ ប៉ុន្តែ អង់ទីហ្សែន នេះ នៅតែអាចជំរុញការប្រតិកម្មខ្លាំងក្លា ដើម្បីបង្កើនបរិមាណនៃអង្គបដិប្រាណក្នុងរយៈពេលខ្លីបាន។

យោងតាមវេជ្ជបណ្ឌិត Shao Yiming ក្រុមអ្នកវិទ្យាសាស្ត្រទូទាំងសកលលោក កំពុងស្រាវជ្រាវរកវិធីដើម្បីបង្កើនថាមពលឱ្យកងការពាររាងកាយ។ បច្ចុប្បន្ន មិនទាន់មានភស្ដុតាងគ្រប់គ្រាន់ដែលបញ្ជាក់ថា គួរចាក់វ៉ាក់សាំងដូសទី 3 ដល់គ្រប់គ្នា ឬអត់នៅឡើយ។ យោងតាមការស្រាវជ្រាវបឋម អ្នកដែលបានចាក់វ៉ាក់សាំងរួចរាល់ស្ទើរតែទាំងអស់ មិនចាំបាច់ចាក់ដូសទី 3 នោះទេ។

ទោះជាយ៉ាងនេះក្ដី លោក Shao Yiming ក៏បានឱ្យដឹងថា ប្រទេសចិន កំពុងតែសិក្សាស្រាវជ្រាវបន្ថែម ដើម្បីឱ្យប្រាកដថា គួរចាក់រំលឹកឡើងវិញដែរ ឬយ៉ាងណា ចំពោះមនុស្សវ័យចំណាស់ដែលមានប្រព័ន្ធការពាររាងកាយខ្សោយ និងអ្នកមានជំងឺប្រចាំកាយដែលបានចាក់វ៉ាក់សាំងរួចរាល់ចាប់ពី 6-12 ខែ ក៏ដូចជាពលរដ្ឋដែលធ្វើការក្នុងតំបន់ដែលមានហានិភ័យឆ្លង COVID-19 ខ្ពស់។ ពេលវេលាជាក់លាក់ដើម្បីអាចចាក់ដូសទី 3 ឬដូសបន្ថែម ក៏កំពុងត្រូវបានសិក្សា។

ក្រុមអ្នកជំនាញបានឱ្យដឹងថា បើទោះជាការស្រាវជ្រាវបញ្ជាក់ថា ការចាក់វ៉ាក់សាំងគឺជាវិធីដែលមានប្រសិទ្ធភាពបំផុតដើម្បីបង្ការការឆ្លង COVID-19 ប៉ុន្តែ អ្នកដែលបានចាក់វ៉ាក់សាំងរួចរាល់ នៅតែត្រូវការអនុវត្តវិធានការការពារខ្លួនជាប្រចាំ ដើម្បីប៉ះប៉ូវឱ្យការថមថយទៅតាមពេលវេលានៃប្រសិទ្ធភាពរបស់វ៉ាក់សាំង៕

August 10, 2021

ក្រសួងសុខាភិបាល ជូនដំណឹងស្ដីពីការព្យាបាលអ្នកវិជ្ជមាននឹង COVID-19 ប្រភេទ Delta

នាព្រឹកថ្ងៃទី 10 សីហា នេះ ក្រសួងសុខាភិបាល បានចេញសេចក្ដីជូនដំណឹងមួយស្ដីពីលក្ខខណ្ឌនៃការបញ្ចប់ការព្យាបាលជំងឺ COVID-19 ប្រភេទ Delta ចំពោះអ្នកជំងឺដែលត្រូវបានបញ្ជាក់ពីមន្ទីរពិសោធន៍ ឬស្ថិតក្នុងករណីសង្ស័យ។

ក្នុងសេចក្ដីប្រកាសនេះ ក្រសួងសុខាភិបាល ក៏បានឱ្យដឹងថា អ្នកជំងឺដែលវិជ្ជមាននឹង COVID-19 ប្រភេទ Delta ទាំងអស់ នឹងមិនត្រូវបានអនុញ្ញាតឱ្យព្យាបាលនៅតាមផ្ទះនោះទេ ពោលគឺត្រូវមកព្យាបាលនៅមន្ទីរពេទ្យ ឬមណ្ឌលព្យាបាល COVID-19 ដែលរដ្ឋបានកំណត់។

មូលហេតុដែលមានការកំណត់ខាងលើ ត្រូវបានក្រសួងសុខាភិបាល បញ្ជាក់ថា គឺដើម្បីគ្រប់គ្រងការព្យាបាល និងយោងទៅតាមលទ្ធផលនៃការសិក្សាស្រាវជ្រាវផ្នែកវិទ្យាសាស្ត្រ លើការឆ្លងរាលដាលរបស់ វីរុសបំប្លែងខ្លួនថ្មី របស់ COVID-19 ពិសេសគឺវ៉ារ្យ៉ង់ Delta ដែលកំពុងរាតត្បាតពិភពលោក។

សម្រាប់ការបញ្ចប់ការព្យាបាលជំងឺ COVID-19 ប្រភេទ Delta ចំពោះអ្នកជំងឺដែលត្រូវបានបញ្ជាក់ពីមន្ទីរពិសោធន៍ ឬស្ថិតក្នុងករណីសង្ស័យ សូមអានសេចក្ដីជូនដំណឹង និងលក្ខខណ្ឌខាងក្រោម៖

August 10, 2021

«អ្នកស្នងមរតក» របស់ Samsung ត្រូវបានលើកលែងទោស

កាលពីថ្ងៃទី 09 ខែសីហា ក្រសួងយុត្តិធម៌ កូរ៉េខាងត្បូង បានប្រកាសថា នឹងលើកលែងទោសដល់អនុប្រធាន និងជា «អ្នកស្នងមរតក» នៃក្រុមហ៊ុន Samsung លោក Lee Jae-yong នៅចុងសប្ដាហ៍នេះ។

នៅក្នុងប្រកាសមួយ រដ្ឋមន្ត្រីក្រសួងយុត្តិធម៌ Park Beom-kye បានលើកឡើងថា លោក Lee Jae-yong នឹងត្រូវបានដោះលែងពីពន្ធនាគារនៅថ្ងៃទី 13 សីហា ក្នុងឱកាសទិវារំដោះជាតិ 15 សីហា។ រដ្ឋាភិបាល កូរ៉េខាងត្បូង តែងតែដោះលែងអ្នកទោសដោយមានលក្ខខណ្ឌ ឬលើកលែងទោសនៅក្នុងទិវានេះ ដើម្បីលើកកម្ពស់ស្មារតីសាមគ្គីជាតិ។ ការសម្រេចនេះ ត្រូវបានធ្វើលើកឡើងបន្ទាប់ពីមានកិច្ចប្រជុំមួយរបស់គណៈកម្មការលើកលែងទោសនៃក្រសួងយុត្តិធម៌ កូរ៉េខាងត្បូង។ លោក Lee Jae-yong បានបំពេញកាតព្វកិច្ចតាមការណែនាំនានាដើម្បីអាចទទួលបានការលើកលែងទោស ក្រោយពីការអនុវត្តទោសរួចរាល់បាន 60%។

លោក Park Beom-kye បានឱ្យដឹងថា ស្ថានភាពសេដ្ឋកិច្ចរបស់ប្រទេសជាតិ បញ្ហាសេដ្ឋកិច្ចទូទាំងសកលលោក រួមនឹងវិបត្តិ COVID-19 ត្រូវបានចាត់ទុកថាជាកត្តារួមចំណែកនាំឱ្យមានការចេញសេចក្ដីសម្រេចនេះ។

ប៉ុន្តែ យោងតាមច្បាប់សេដ្ឋកិច្ចរបស់ប្រទេសនេះ លោក Lee Jae-yong នឹងមិនអាចត្រលប់ចូលធ្វើការនៅក្រុមហ៊ុន Samsung ក្នុងរយៈពេល 5 ឆ្នាំ។ ច្បាប់នេះ ហាមមិនឱ្យបុគ្គលដែលត្រូវបានកាត់ទោសពីបទពុករលួយ ឬខ្វះការទទួលខុសត្រូវលើទឹកប្រាក់ដែលលើសពី 500 លានវ៉ុន (436,300 ដុល្លារអាមេរិក) ធ្វើការក្នុងក្រុមហ៊ុនដែលជាប់ទាក់ទងនឹងអំពើខុសច្បាប់របស់ពួកគេ ក្នុងរយៈពេល 5 ឆ្នាំ រាប់ចាប់ពីថ្ងៃត្រូវបានដោះលែងពីពន្ធនាគារ។

កាលពីថ្ងៃទី 18 មករា ឆ្នាំ 2021 តុលាការកំពូលរបស់ទីក្រុងសេអ៊ូល នៃប្រទេសកូរ៉េខាងត្បូង បានប្រកាសថា លោក Lee Jae-yong (អាយុ 52 ឆ្នាំ) ដែលជាអនុប្រធាននៃក្រុមហ៊ុន Samsung បានប្រព្រឹត្តអំពើសូកប៉ាន់អតីតប្រធានាធិបតី Park Geun-hye ដើម្បីទទួលបានការគាំទ្រពីរដ្ឋាភិបាលនៅក្នុងការស្នងមរតក និងដើម្បីទទួលបានការធានាលើសិទ្ធិគ្រប់គ្រង Samsung។ តុលាការក៏បានកាត់ទោសបុគ្គលដែលមានអំណាចខ្លាំងរបស់ Samsung រូបនេះ ឱ្យជាប់ពន្ធនាគាររយៈ 2 ឆ្នាំកន្លះ។

មុននេះ ក្រុមហ៊ុន Samsung រួមនឹងសភាពាណិជ្ជកម្មនិងឧស្សាហកម្ម របស់ កូរ៉េខាងត្បូង (Korea Chamber of Commerce and Industry) បានស្នើឱ្យមានការដោះលែងបណ្ដោះអាសន្ន ឬការលើកលែងទោសដោយប្រធានាធិបតី ដើម្បីជួយឱ្យលោក Lee Jae-yong អាចផ្ដោតលើការគ្រប់គ្រងក្រុមហ៊ុនធំបំផុតរបស់ប្រទេសនេះ ក្នុងគ្រាដែលសេដ្ឋកិច្ចក្នុងស្រុក និងពិភពលោក កំពុងជួបបញ្ហាដោយសារ COVID-19៕

August 10, 2021

ទិដ្ឋភាពភ្លើងឆេះព្រៃយ៉ាងសាហាវ គួរឱ្យខ្លាច នៅប្រទេសក្រិក

បុគ្គលិកពន្លត់អគ្គិភ័យ និងប្រជាជនរាប់រយនាក់នៅប្រទេសក្រិក កំពុងតែប្រយុទ្ធប្រឆាំងនឹងអណ្ដាតភ្លើងដែលកំពុងឆាបឆេះព្រៃដ៏ធំនៅលើកោះ Evia។

ភ្លើងឆេះព្រៃជាច្រើនកន្លែង បាន និងកំពុងកើតឡើងនៅក្នុងប៉ុន្មានសប្ដាហ៍ចុងក្រោយនេះ បន្ទាប់ពីប្រទេសក្រិក រងរលកកំដៅដ៏ខ្លាំងពីព្រះអាទិត្យ។

ករណីភ្លើងឆេះព្រៃនៅ Evia ដែលជាកោះធំបំផុតលំដាប់ទីពីររបស់ ក្រិក និងស្ថិតនៅទិសខាងកើតនៃរដ្ឋធានី Athens នេះ បានដុតកម្ទេចព្រៃឈើរាប់ពាន់ហិកតា និងបំផ្លាញផ្ទះសម្បែងជាច្រើនខ្នងផងដែរ។ ពលរដ្ឋ និងភ្ញៀវទេសចរណ៍ ត្រូវបានជម្លៀសទៅរកទីសុវត្ថិភាពដោយស្រឡាង។

ភ្លើងឆេះព្រៃនៅប្រទេសក្រិក បានសម្លាប់មនុស្សចំនួន 2 នាក់ និងបណ្ដាលឱ្យមនុស្សរាប់សិបនាក់ត្រូវចូលពេទ្យ។ ប្រទេសនេះបានបញ្ជូនបុគ្គលិកពន្លត់អគ្គិភ័យចំនួន 260 និងមធ្យោបាយពន្លត់ភ្លើងចំនួន 66 គ្រឿងទៅកាន់កន្លែងកើតហេតុ។ ប្រទេសអ៊ុយក្រែន និង រ៉ូម៉ានី ក៏បានបញ្ជូនបុគ្គលិកពន្លត់អគ្គិភ័យចំនួន 200 នាក់ និងឧបករណ៍ពន្លត់អគ្គិភ័យចំនួន 23 គ្រឿង រួមនឹងយន្តហោះ 7 គ្រឿង ទៅជួយក្រិកផងដែរ។

ក្រិក ក៏បានបញ្ជូនស្រឡាង និងកប៉ាល់យោធាជាច្រើនគ្រឿងទៅជម្លៀសប្រជាជនចេញពីតំបន់រងគ្រោះ និងតំបន់រងផលប៉ះពាល់ពីភ្លើងព្រៃនៅលើកោះ Evia។ ប៉ុន្តែ ក្រុមកំលោះៗ ស្ម័គ្រចិត្តនៅជួយទប់ទល់នឹងភ្លើងព្រៃដែលកំពុងលេបត្របាក់ភូមិឋានរបស់ពួកគេ៕

August 9, 2021

ទស្សនាបណ្ដាផលិតផលរបស់ Apple ដែលបានបរាជ័យកន្លងមក

ទន្ទឹមនឹងកំពូលផលិតផលដែលទទួលបានជោគជ័យខ្លាំង ដូចជា iPhone, iPad ក្រុមហ៊ុន Apple កន្លងមកក៏មានផលិតផលជាច្រើនដែលបានបរាជ័យ ក្នុងនោះក៏មាន HomePod កុំព្យូទ័រ និងម៉ាស៊ីនលេងហ្គេមផងដែរ។

20^th Anniversary Mac

ម៉ូដែលនេះ ត្រូវបានផលិត និងបង្ហាញខ្លួនក្នុងឆ្នាំ 1997 ដើម្បីរំលឹកអនុស្សាវរីយ៍ 20 ឆ្នាំ ដែល Apple បានលោតចូលទីផ្សារ PC។ ប៉ុន្តែ វាត្រូវបានផ្អាកការផលិតទាំងស្រុង ក្រោយការបង្ហាញខ្លួនបាន 1 ឆ្នាំ។ ផលិតផលនេះ មានតម្លៃ 7,499 ដុល្លារអាមេរិក ប៉ុន្តែ ត្រូវបានបញ្ចុះរហូតដល់នៅសល់ 1,995 ដុល្លារ មុននឹងត្រូវផ្អាកការផលិត ដោយសារតែលក់មិនដាច់។

Macintosh TV

ទូរទស្សន៍នេះ ដែលមានតម្លៃ 2,099 ដុល្លារអាមេរិក នេះ ថ្វីបើមាន CPU ខ្លាំង ប៉ុន្តែ RAM របស់វា មានតែ 8 MB ប៉ុណ្ណោះ។ Apple សម្រេចបញ្ឈប់ការផលិត បើទោះផលិតផលនេះទើបតែបង្ហាញខ្លួនបាន 5 ខែ។

Pinpin

ម៉ាស៊ីនលេងហ្គេមនេះ បានចាប់កំណើតកាលពីឆ្នាំ 1994។ វាជាផលិតផលដែលបង្កើតឡើងដើម្បីប្រកួតប្រជែងជាមួយ Sony PlayStation។ នេះ គឺជាផលិតផលសហការរវាង Apple និង Bandai។

Pinpin ចំនួន 42,000 គ្រឿង ត្រូវបានលក់ចេញទូទាំងពិភពលោក។ Apple ឈប់ផលិតចាប់ពីឆ្នាំ 1997។

Ping

Ping គឺជាបណ្ដាញសង្គមផ្នែកតន្ត្រីរបស់ Apple ដែលត្រូវបានបង្កើតឡើងកាលពីឆ្នាំ 2010។ Apple ចង់សហការជាមួយ Facebook ប៉ុន្តែ បរាជ័យ។ វាបានក្លាយជាអតីតកាល ចាប់ពីឆ្នាំ 2012 ក្រោយបង្ហាញវត្តមានបាន 2 ឆ្នាំ។

Newton

មុនពេលទទួលបានជោគជ័យដោយសារ iPhone និង iPad ក្រុមហ៊ុន Apple ក៏ធ្លាប់បានបរាជ័យជាមួយនឹងជំនួយការផ្ទាល់ខ្លួន (personal digital assistant / PDA) ដែលមានឈ្មោះថា Newton។

ឧបករណ៍នេះ បានបង្ហាញខ្លួនកាលពីឆ្នាំ 1993 ដោយលក់ក្នុងតម្លៃ 699 ដុល្លារ។ Apple លក់ឧបករណ៍នេះបាន 300,000 គ្រឿង ក្នុងអំឡុង 5 ឆ្នាំដែលវាមានវត្តមានក្នុងទីផ្សារ។

Performa x200 Series

វាបានបង្ហាញខ្លួនកាលពីឆ្នាំ 1995 នៅពេល Apple កាត់បន្ថយចំណាយដើម្បីផលិតម៉ាស៊ីន Mac ដែលមានតម្លៃទាប ប៉ុន្តែ ដោយសារវាដំណើរការយឺតពេក វាក៏ទទួលបរាជ័យក្នុងទីផ្សារ។

Power Mac G4 Cube

PC នេះ បង្ហាញខ្លួនកាលពីឆ្នាំ 2000 និងឈប់ផលិតទៅវិញ ក្រោយការបង្ហាញវត្តមានក្នុងទីផ្សារបាន 1 ឆ្នាំ។

Apple III

ម៉ូដែលនេះ ផលិតឡើងកាលពីឆ្នាំ 1980 និងត្រូវបានចាត់ទុកថាជាផលិតដែលបរាជ័យដំបូងគេបង្អស់របស់ Apple ហើយក៏ជាផលិតផលដែលស្ទើរតែបានបំផ្លាញក្រុមហ៊ុននេះទាំងស្រុង។ Apple III មានតម្លៃចាប់ពី 4.340 ដុល្លារ ដល់ 7.800 ដុល្លារ។

PowerBook 5300

កុំព្យូទ័រយួរដៃ PowerBook 5300 នេះ ផលិតឡើងកាលពីឆ្នាំ 1995។ ផលិតផលនេះមានបញ្ហាច្រើន ធ្វើឱ្យវាមិនអាចរកឃើញជោគជ័យ។

កុំព្យូទ័រ PC Lisa

វាត្រូវបាន Apple ដាក់លក់ចាប់ពីឆ្នាំ 1983។ Lisa ជាផលិតផលទំនើបបំផុត កាលពីជំនាន់នោះ។ បរាជ័យរបស់វា គឺដោយសារតម្លៃខ្ពស់កប់ពពក។ PC Lisa 1 គ្រឿងមានតម្លៃ 9,995 ដុល្លារ ប្រហាក់ប្រហែលនឹង 25,000 ដុល្លារ បើគិតក្នុងសម័យនេះ។ Apple លក់ផលិតផលនេះបានជិត 100,000 គ្រឿង។

HomePod

ឧបករណ៍បំពងសំឡេងនេះ ត្រូវបានដាក់លក់កាលពីឆ្នាំ 2018។ តម្លៃ 349 ដុល្លាររបស់វា ក៏ជាកត្តាសំខាន់មួយ រួមចំណែកនាំឱ្យវាបរាជ័យ។ ឆ្នាំ 2021 HomePod ក៏ត្រូវបានបញ្ឈប់ការផលិត។

iPod Hi-Fi

ឆ្នាំ 2006 iPod បានគ្រប់គ្រងទីផ្សារតន្ត្រីចល័ត ប៉ុន្តែ ម៉ូដែល iPod Hi-Fi របស់ Apple បានទទួលបរាជ័យ ដោយសារតម្លៃ (349 ដុល្លារ) ថ្លៃជាង iPod ដំបូង។ វាត្រូវគេឈប់ផលិតចាប់ពីឆ្នាំ 2007 ក្រោយបង្ហាញវត្តមានបាន 1 ឆ្នាំ៕

August 9, 2021

រកឃើញភពខាងក្រៅប្រព័ន្ធព្រះអាទិត្យ ចំនួន 4 ដែលកំពុងចាប់កំណើត

ការរកឃើញភពក្រៅប្រព័ន្ធព្រះអាទិត្យចំនួន 4 ដែលកំពុងកកើត និងមានចម្ងាយត្រឹមតែ 130 ឆ្នាំពន្លឺ (1 ឆ្នាំពន្លឺ ស្មើនឹង 9,500,000,000,000 ឬ 9.5 ទ្រីលាន ឬ 9.5 លានលានគីឡូម៉ែត្រ) ពីផែនដីនេះ អាចជួយឱ្យមនុស្សលោកយល់បន្ថែមអំពីប្រភពដើមដំបូងរបស់ផែនដី។

បណ្ដាភពដែលត្រូវបានដាក់ឈ្មោះឱ្យថា TOI 2076 b, TOI 2076 c, TOI 2076 d និង TOI 1807 b នេះ វិលជុំវិញផ្កាយពណ៌ទឹកក្រូចចំនួន 2 ដួង ដែលគេហៅថា TOI 2076 និង TOI 1807។ ផ្កាយទាំងនេះ សុទ្ធតែកកើតចេញពីពពកឧស្ម័នមួយ កាលពីប្រហែល 200 លានឆ្នាំមុន។ ដោយមានទំហំមធ្យម កំដៅសមល្មម និងមានស្ថិរភាព ផ្កាយ TOI 2076 និង TOI 1807 គឺជាគោលដៅដ៏ល្អសម្រាប់ក្រុមអ្នកវិទ្យាសាស្ត្រស្វែងរកភពដែលអាចទ្រទ្រង់ជីវិត។

របាយការណ៍ដែលត្រូវបានចុះផ្សាយនៅលើទស្សនាវដ្ដី Astronomical Journal កាលពីថ្ងៃទី 12 កក្កដា បានឱ្យដឹងថា ភពទាំង 4 នេះ សុទ្ធតែកំពុងស្ថិតក្នុងដំណាក់កាលកកើត។

TOI 2076 b ដែលជាភពស្ថិតនៅប៉ែកខាងក្នុងបង្អស់របស់ប្រព័ន្ធផ្កាយខាងលើ មានទំហំធំជាងផែនដីរបស់មនុស្សដល់ទៅ 3 ដង ហើយ 1 ឆ្នាំរបស់ភពនេះ ស្មើនឹងរយៈពេល 10 ថ្ងៃ។ ចំណែកភពចំនួន 2 ទៀត ធំជាងផែនដី 4 ដង និងការវិលបាន 1 ជុំផ្កាយមេរបស់វា ស្មើនឹងរយៈពេល 17 ថ្ងៃ។

ដោយឡែក ផ្កាយ TOI 1807 មានភពតែ 1 គត់ នោះគឺ TOI 1807 b។ វាធំជាងផែនដី 2 ដង និងចំណាយពេល 13 ម៉ោង ដើម្បីវិលបាន 1 ជុំផ្កាយមេ។

ក្រុមអ្នកវិទ្យាសាស្ត្រក៏បានឱ្យដឹងថា ភពទាំង 4 ខាងលើ សុទ្ធតែមានបរិយាកាសក្រាស់ ដែលកើតឡើងពីសំណល់របស់ថាសឧស្ម័ន និងធូលី។

ក្នុងដំណាក់កាលនៃការវិវឌ្ឍ ភពក្មេងនានា ជួនកាលត្រូវខ្យល់របស់ផ្កាយ បោកបក បំបាត់ចោលបរិយាកាសដំបូងរបស់ពួកវា។ ប៉ុន្តែ បរិយាកាសទីពីរ អាចកើតឡើង តាមរយៈសកម្មភាពបន្ទុះភ្នំភ្លើង និងការប្រែប្រួលស្រទាប់ដី។ល។

August 9, 2021

Author: សឿន សំណាង