ក្រសួងការពារជាតិរុស្ស៊ី ប្រកាសថា បានកម្ទេចគោលដៅលើដីចំនួន ៨៣ កន្លែង នៅ អ៊ុយក្រែន ក្នុងនោះរួមមានទាំងហេដ្ឋារចនាសម្ព័ន្ធយោធា និងយន្តហោះជាច្រើនគ្រឿងផងដែរ។
ប្រកាសនេះត្រូវបានធ្វើឡើងកាលពីថ្ងៃទី ២៤ កុម្ភៈ ដោយអ្នកនាំពាក្យក្រសួងការពារជាតិរុស្ស៊ី ឧត្តមសេនីយ៍ទោ Igor Konashenkov។
Igor Konashenkov បញ្ជាក់ថា ក្នុងចំណោមនោះ មាន ព្រលានយន្តហោះយោធាចំនួន ១១ កន្លែង, ទីបញ្ជាការយោធាចំនួន ៣ កន្លែង, មូលដ្ឋានទ័ពជើងទឹក ១ កន្លែង, ប្រព័ន្ធរ៉ាដានៃប្រព័ន្ធការពារដែនអាកាស S-៣០០ និង Buk-M១ ចំនួន ១៨ កន្លែង។
ក្រៅពីនេះ យន្តហោះចម្បាំង Su-២៧ ២ គ្រឿង, Su-២៤ ២ គ្រឿង, ឧទ្ធម្ភាគចក្រ ១ គ្រឿង និង យន្តហោះគ្មានមនុស្សបើក (UAV) ៤ គ្រឿង របស់កងទ័ពអ៊ុយក្រែន ក៏ត្រូវបានកម្ទេចនៅក្នុងការវាយប្រហារដោយរ៉ុក្កែត របស់ រុស្ស៊ី ក្នុងថ្ងៃឈ្លានពានដំបូង។
ក្រោមការជួយគាំទ្រពី កងទ័ពរុស្ស៊ី កម្លាំងផ្ដាច់ខ្លួន Donetsk (DPR) និង Luhansk (LPR) បានទម្លុះស្រទាប់ការពារនៅជួរមុខរបស់ អ៊ុយក្រែន និងបានរុលចូលក្នុងទឹកដីប្រទេសនេះ ពី ៦ ទៅ ៨ គីឡូម៉ែត្រ បន្ថែមទៀត គិតពីសមរភូមិក្ដៅ។
ក៏ប៉ុន្តែ កងទ័ពរុស្ស៊ី ក៏ទទួលរងការខូចខាតផងដែរនៅក្នុងថ្ងៃដំបូងនៃការលុកលុយរបស់ខ្លួន។ យន្តហោះចម្បាំង Su-២៥ ១ គ្រឿង របស់ រុស្ស៊ី បានធ្លាក់ក្នុងទឹកដី អ៊ុយក្រែន ដោយសារកំហុសបច្ចេកទេស។ យន្តហោះដឹកជញ្ជូនសម្ភារៈយោធា An-២៦ ១ គ្រឿង ធ្លាក់នៅក្នុងខេត្ត Voronezh ជាប់ព្រំដែនជាមួយ អ៊ុយក្រែន បណ្ដាលឱ្យក្រុមហោះហើរបាត់បង់ជីវិតទាំងអស់។ រុស្ស៊ី មិនទាន់ប្រកាសអំពីតួលេខទាហានរបស់ខ្លួន ដែលបានស្លាប់ ឬរងរបួសក្នុងបេសកកម្មនេះនៅឡើយ។
