នៅពេលពិភាក្សាតាមទូរស័ព្ទជាមួយប្រធានាធិបតីបារាំង កាលពីថ្ងៃទី ២៨ កុម្ភៈ មេដឹកនាំរបស់ រុស្ស៊ី បានលើកឡើងនូវលក្ខខណ្ឌចំនួន ៣ ដែល អ៊ុយក្រែន ត្រូវតែធ្វើតាម បើសិនចង់បានសន្តិភាព។
ក្រោយជំនួបតាមទូរស័ព្ទ រវាង ប្រធានាធិបតីរុស្ស៊ី លោក វ្លាឌីមៀ ពូទីន និង ប្រធានាធិបតីបារាំង លោក អេម៉ានុយអែល ម៉ាក្រុង កាលពីថ្ងៃទី ២៨ កុម្ភៈ វិមានក្រឹមឡាំង ប្រកាសថា លោក ពូទីន និយាយថា រុស្ស៊ី «ត្រៀមខ្លួនជានិច្ចក្នុងការចរចាជាមួយតំណាងរបស់ អ៊ុយក្រែន»។
ប៉ុន្តែ លោក ពូទីន បញ្ជាក់ថា ដំណោះស្រាយសន្តិភាពនឹងអាចទទួលយកបាន លុះត្រាតែ «ផលប្រយោជន៍ផ្នែកសន្តិសុខស្របច្បាប់របស់ រុស្ស៊ី ត្រូវបានរាប់បញ្ចូលដោយមិនមានលក្ខខណ្ឌ» ក្នុងនោះមានទាំង «ការទទួលស្គាល់អធិបតេយ្យភាពរបស់ រុស្ស៊ី ចំពោះឧបទ្វីប Crimea, សម្រេចភារកិច្ចមិនពង្រីកទ័ព និង ការផ្ដាច់ហ្វាស៊ីសនិយម ពី ប្រទេសអ៊ុយក្រែន ក៏ដូចជាធានានូវស្ថានភាពអព្យាក្រឹតរបស់ ទីក្រុងកៀវ»។
វិមានអេលីសេ (Elysee) របស់ បារាំង ក៏បានចេញសេចក្ដីប្រកាស ក្រោយពីជំនួបជាមួយមេដឹកនាំរបស់ រុស្ស៊ី ថា លោកប្រធានាធិបតី ម៉ាក្រុង «រំលឹកឡើងវិញអំពីសំណើរបស់សហគមន៍អន្តរជាតិ» ដែលថា រុស្ស៊ី ត្រូវបញ្ចប់យុទ្ធនាការយោធានៅ អ៊ុយក្រែន និងអំពាវនាវឱ្យឈប់បាញ់ជាបន្ទាន់។
លោក ម៉ាក្រុង ក៏បានលើកសំណើមួយចំនួន ក្នុងនោះ ជាពិសេស រុស្ស៊ី ត្រូវតែគោរពតាមស្ថានភាពជាក់ស្ដែងនៃដែនដីនៅ អ៊ុយក្រែន។ លោកក៏អំពាវនាវឱ្យ «បញ្ឈប់រាល់សកម្មភាពវាយប្រហារតាមអាកាស និងការបាញ់សំដៅប្រជាជនស៊ីវិល» រួមនឹង «ការរក្សាហេដ្ឋារចនាសម្ព័ន្ធស៊ីវិល» និង «ធ្វើឱ្យមានសន្តិសុខដល់បណ្ដាផ្លូវសំខាន់» រួមទាំងផ្លូវនៅភាគខាងត្បូងនៃ ក្រុងកៀវ ផងដែរ។
