សឿន សំណាង - La Reine Media

ត្រូវបានទ័ពរុស្ស៊ី ឡោមព័ទ្ធ ទីក្រុងរបស់ អ៊ុយក្រែន សុំជំនួយ

អភិបាលក្រុង Mariupol អំពាវនាវសុំជំនួយ និងបើកច្រកសម្រាប់សកម្មភាពមនុស្សធម៌ នៅពេលទីក្រុងនេះកំពុងដាច់ភ្លើង ទឹក និងស្បៀង ដោយសារត្រូវ កងទ័ពរុស្ស៊ី ឡោមព័ទ្ធ។

Vadym Boychenko ដែលជាអភិបាលក្រុង Mariupol នៅភាគអាគ្នេយ៍របស់ អ៊ុយក្រែន កាលពីថ្ងៃទី ៤ មីនា បានអំពាវនាវសុំជំនួយយោធា និងការបង្កើតច្រកទទួលជំនួយមនុស្សធម៌ នឹងជម្លៀសមនុស្សមួយចំនួនក្នុងចំណោមប្រជាជន ៤០០,០០០ នាក់ ទៅរកទីសុវត្ថិភាព បន្ទាប់ពីត្រូវជាប់ក្នុងការឡោមព័ទ្ធ និងការវាយប្រហារអស់រយៈពេល ៥ ថ្ងៃ ពីភាគី កងទ័ពរុស្ស៊ី។

«យើងកំពុងត្រូវបានគេប្រល័យ» Boychenko បានថ្លែងដូច្នេះនៅលើកញ្ចក់ទូរទស្សន៍ ដោយចោទថា កម្លាំងរបស់ រុស្ស៊ី បានបាញ់គ្រាប់ប្លោងមកលើទីប្រជុំជន និងមន្ទីរពេទ្យ។ «ពួកគេចង់លុបបំបាត់ Mariupol និងប្រជាជននៅក្នុងក្រុង»។

មេបញ្ជាការរងម្នាក់នៃអង្គភាព Azov របស់កងទ័ពការពារជាតិអ៊ុយក្រែន ឱ្យដឹងថា កងទ័ពអ៊ុយក្រែន កំពុងរក្សាបានជំហរនៅចំពោះមុខការវាយសម្រុករបស់ កងទ័ពរុស្ស៊ី មកលើក្រុង Mariupol ប៉ុន្តែ ត្រូវការជំនួយច្រើន។

រុស្ស៊ី និង អ៊ុយក្រែន កាលពីថ្ងៃទី ៣ មីនា បានយល់ព្រមបើកឱ្យមានច្រកសុវត្ថិភាពសម្រាប់ជំនួយមនុស្សធម៌ ដើម្បីផ្ដល់ឱកាសឱ្យប្រជាជនភៀសខ្លួន ដែលនេះគឺជាលទ្ធផលជាក់ស្ដែងដំបូង បន្ទាប់ពីការចរចា ២លើក។

March 5, 2022

ពិធីបញ្ចុះបឋមសិលាការដ្ឋានសាងសង់លំនៅឋានបុស្បា

កាលពីថ្ងៃទី ១៩ កុម្ភះ ឆ្នាំ ២០២២ មានព្រឹត្តិការណ៍ដ៏រំភើបនិងជាពិធីសិរីសួស្តីមួយបានកើតឡើង ដែលជាព្រឹត្តិការណ៍ដ៏សំខាន់នៃការចាប់ផ្តើមឈានចូលប្រឡូកលើវិស័យអចលនទ្រព្យដែលកំពុងមានសន្ទុះយ៉ាងគួរអោយកត់សំគាល់ក្នុងព្រះរាជាណាចក្រកម្ពុជា។

ក្រុមហ៊ុនបុស្បា អ៊ិនវេសម៉ិន បានប្រារព្ធរៀបចំឡើងនូវ ពិធីសិរីសួស្តីមង្គលគឺ “ពិធីបញ្ចុះបឋមសិលាការដ្ឋានសាងសង់គម្រោងលំនៅឋានបុស្បា” ដែលមានទីតាំងស្ថិតនៅ ភូមិថ្មី សង្កាត់ទៀន ខណ្ឌដង្កោ រាជធានីភ្នំពេញ ពីសំណាក់ឯកឧត្តម លោកជំទាវ អស់លោក លោកស្រីនិងភ្ញៀវកិត្តិយសជាច្រើន រួមទាំងក្រុមការងារក្នុងក្តីសោមនស្សរីករាយ។

ពិធីដ៏ឱឡារិកនេះ ត្រូវបានរៀបចំឡើងតាំងពីម៉ោង៧ព្រឹកតមក តាមលំនាំប្រពៃណីទំនៀមទំនៀមទម្លាប់ និងដំណាក់កាលសំខាន់ៗដូច ពិធីក្រុងពាលី ពិធីសូត្រមន្តប្រស់ព្រំសុំសេចក្តីសុខសេចក្តីចម្រើន និងបានដង្ហែគ្រឿងរណ្តាប់លើអាសនៈ ឆ្ពោះទៅកាន់រណ្តៅជ័យ និងចុងក្រោយគឺការអញ្ជើញឡើងទៅកាន់ឆាកនៃពិធីដើម្បីចុចប៊ូតុងនៃការចាប់ផ្តើមបុកគ្រឹះ ដើម្បីបើកអោយមានដំណើរការការដ្ឋានសាងសង់ជាផ្លូវការនៃគម្រោងលំនៅដ្ឋាន បុស្បា ទី១ ក្រោមវត្តមានពីថ្នាក់ដឹកនាំ និងបុគ្គលសំខាន់ៗនៃ ក្រុមហ៊ុនបុស្បាអ៊ិន វេស មិន ព្រមជាមួយកិច្ចស្វាគមន៍អំណរសាទរដ៏កងរំពង ពីសំណាក់ភ្ញៀវកិត្តិយសដែលបានអញ្ជើញចូលរួមផងដែរ ។

បន្ទាប់ពីពេលវេលាដ៏ថ្លៃថ្លានៅលើឆាកកិត្តិយសរួចមក ក៏បានឈានចូលដល់ពិធីសំណេះសំណាលនិងការផ្តល់ជូនបទបង្ហាញអំពីគម្រោង លំនៅដ្ឋាន បុស្បា ទី១ ដោយលោកស្រី ប្រធានគ្រប់គ្រងទូទៅនៃក្រុមហ៊ុនបុស្បាអ៊ិន វេស មិន “នាង ខូរី“ បានអញ្ជើញថ្លែងជូននូវសន្ទរកថានិងជាកិច្ចស្វាគមន៍នៃកម្មពិធីដោយប្រសាសន៍ថា៖

ចក្ខុវិស័យរបស់លំនៅដ្ឋាន បុស្បា គឺធ្វើជាគោលដៅដ៏ចំបងមួយសម្រាប់បរិបទរស់នៅដ៏ប្រសើររបស់ប្រជាជនកម្ពុជា និងពោរពេញដោយភាពសុខដុម។ បេសកកម្មរបស់បុស្បា អ៊ិនវេសម៉ិន គឺ ខិតខំកសាងនូវទំនាក់ទំនងដ៏ស្អិតរមួតរវាងអតិថិជន និង ដៃគូសហការការងារទាំងអស់់ ហើយផ្ដួចផ្ដើមនូវគំនិត និងដំណោះស្រាយប្រកបដោយភាពច្នៃប្រឌិតឈានមុខគេ។

លោកស្រីក៏បានលើកឡើងផងដែរថា គម្រោងក៏យកចិត្តទុកដាក់លើការរៀបចំអោយមាន ការិយាល័យអាជីវកម្មខ្នាតធំ,តូច សួនច្បារ សួនកម្សាន្តសម្រាប់កុមារ កន្លែងហាត់ប្រាណ និងសេវាសាធារណៈផ្សេងៗទៀត។ គម្រោងលំនៅដ្ឋាននេះផងដែរ គឺមានអំណោយផលនៃទីតាំងភូមិសាស្ត្រដ៏ល្អនាពេលអនាគត ដោយគម្រោងទាំងមូលគឺនៅតាមបណ្តោយផ្លូវ ២០អា ទំហំ៥០ម៉ែត្រ តភ្ជាប់ផ្លូវជាតិលេខ២និងលេខ៣, ផ្លូវ៦០ម៉ែត្រដូចជាផ្លូវក្រវ៉ាត់ក្រុមទី៣ មហាវិថីសម្តេចតេជោហ៊ុនសែន និងមាន ប្រព័ន្ធធារាសាស្ត្រ ផ្លូវនិងប្រឡាយទំហំ៣២ម៉ែត្រជាច្រើនក្នុងតំបន់។ លក្ខណៈពិសេសទាំងនេះគឺពិតជាមានអំណោយផលល្អដល់ការរស់នៅនិងប្រកបអាជីវកម្មរបស់ប្រជាជនយ៉ាងពិតប្រាកដ។

ត្រឹមតែគម្រោងលំនៅដ្ឋានដ៏សំបូរបែបមួយមុខនោះគឺ ពុំទាន់គ្រប់គ្រាន់ឡើយ សម្រាប់ការកសាងសហគមន៍ដ៏សុខដុម សុខសាន្ដ និងរឹងមាំមួយ ហេតុដូច្នេះហើយទើប បុស្បា អ៊ិនវេសម៉ិន បានត្រៀមរួចជាស្រេច ក្នុងការពាំនាំមកនូវភាពងាយស្រួលទៅលើសេវាចំបាច់នានាដើម្បីបំពេញនូវតម្រូវការក្នុងបរិបទរស់នៅបែបទាន់សម័យ។ មិនតែប៉ុណ្ណោះ យើងខ្ញុំបានប្ដេជ្ញាក្នុងការពាំនាំនូវ អាជីវកម្ម និងគ្រឹះស្ថានសំខាន់ៗដទៃទៀត ចូលមកក្នុងសហគមន៍នេះ។

ពាក្យថាបុស្បាមានន័យថា រាជនីនៃសព្វផ្កាទាំងពួង ដែលតំណាងឲ្យ កិត្យានុភាព ភាពសុខដុមរមនា វិបុលភាព ផាសុកភាព និងគុណភាព ទាំងនេះសុទ្ធសឹងតែជាគុណតម្លៃនៃចក្ខុវិស័យ ទៅលើការស្ថាបនាលំនៅដ្ឋាន និងសហគមន៍របស់ បុស្បា អ៊ិនវេសម៉ិន។

ដូចដែលបានរៀបរាប់ជូនខាងលើនេះ គម្រោងទាំងនេះគឺគ្រាន់តែជាចំនុចចាប់ផ្ដើមនៃទស្សនវិស័យប្រកបដោយនិរន្ដរភាពរបស់ក្រុមហ៊ុន បុស្បា អ៊ិនវេសម៉ិន។ យោងតាមចក្ខុវិស័យរបស់ស្ថាបនិក គឺលោកជំទាវអគ្គនាយិកា ម៉ឺន ស្រីណែត “ក្រុមហ៊ុន បុស្បា អ៊ិនវេសម៉ិន នឹងខិតខំឲ្យអស់ពីកំលាំងកាយចិត្តក្នុងការអភិវឌ្ឍគម្រោងទាំងមូល ក្នុងន័យបង្កើតជាប្រយោជន៍រួមមួយសម្រាប់ការរស់នៅដ៏សុខដុម និងភាពងាយស្រួលដល់ប្រជាជនក្នុងតំបន់ និង មជ្ឈដ្ឋានជុំវិញ។

March 4, 2022

Tiger Beer នាំមកនូវពិព័រណ៌៍សិល្បៈគំនូរធំបំផុតនៅប្រទេសកម្ពុជា

(ភ្នំពេញ ថ្ងៃទី០៤ ខែមីនា ឆ្នាំ២០២២)៖ ដើម្បីស្វាគមន៍ Year of the Tiger ស្រាបៀរថៃហ្គឺរ បាននាំមកជូននូវកម្មវិធី Murals for Cambodia Festival ដោយសហការជាមួយ FT Gallery និង FONKi។ Murals for Cambodia Festival ប្រារព្ធឡើងរយៈពេលបីថ្ងៃ ចាប់ពីថ្ងៃទី25 ដល់ថ្ងៃទី27 ខែកុម្ភៈ កន្លងទៅនេះ ក្នុងនោះមានការតាំងពិព័រណ៌សិល្បៈក្នុងស្រុក និងអន្តរជាតិ ព្រមទាំងការប្រគំតន្ត្រី នៅមជ្ឈមណ្ឌលច្នៃប្រឌិត Factory Phnom Penh។

កម្មវិធីនេះទទួលបានការគាំទ្រយ៉ាងពេញទំហឹង ដោយមានការចូលរួមពីសំណាក់ភ្ញៀវជាតិ និងអន្តរជាតិយ៉ាងច្រើនកុះករ។ ជាកិត្តិយសណាស់ សម្រាប់ប្រទេសកម្ពុជាដែលបានទទួលស្វាគមន៍វិចិត្រករដែលមានទេពកោសល្យដូចជា MAUY & NAP MSV ដែលមានវិចិត្រករល្បីមកពីប្រទេសថៃ TONES វិចិត្រករជនជាតិខ្មែរដ៏ល្បីល្បាញទូទាំងពិភពលោកមកពីប្រទេសស្វីស KIMSAN SOU វិចិត្រករកម្ពុជាវ័យក្មេង VENKS វិចិត្រករគំនូរជីវចលរបស់ចក្រភពអង់គ្លេស YSK MIKE វិចិត្រករក្នុងស្រុក រួមទាំង TWOONE វិចិត្រករតាមដងវិថីជនជាតិជប៉ុនដ៏ល្បី Jean Baptiste Carraro វិចិត្រករជនជាតិបារាំងដែលមានមូលដ្ឋាននៅព្រះរាជាណាចក្រកម្ពុជានិង RYYSA សិល្បករជនជាតិខ្មែរ-ហូឡង់។ MAUY MSV ជាវិចិត្រករថៃផ្នែកគំនូរតាមដងវិថី បានបង្ហាញស្នាដៃរបស់ខ្លួនតាមរយៈ គំនូររូបខ្លាលើជញ្ជាំង ដែលជាគំនូរធំជាងគេបំផុតក្នុងកម្មវិធីនេះផងដែរ ដែលមានទីតាំងនៅបរិវេណ Tiger Plaza, Factory Phnom Penh។

ក្រៅពីផ្ទាំងគំនូរ និងការតាំងពិព័រណ៌សិល្បៈ ក៏មានការប្រគំតន្ត្រីជាមួយនឹងការសំដែងរបស់ DJ និងក្រុម Hip Hop យ៉ាងសំបូរបែបដ៏ល្អបំផុតប្រចាំប្រទេសកម្ពុជា ក្នុងនោះរួមមាន កញ្ញា Nikki Nikki តារាចំរៀង និងអ្នកនិពន្ធបទចម្រៀង Original Song រូបនេះបានបកស្រាយចំរៀងស្នាដៃថ្មីរបស់ខ្លួន។ បន្ថែមទៀតនោះក៏មានការសំដែងរួមគ្នាជាមួយ កញ្ញា Marie Thach និងសិល្បករផ្សេងទៀតផងដែរ។ មិនតែប៉ុណ្ណោះ កញ្ញា Marie Thach ក៏បានបង្ហាញពីជំនាញ DJ របស់គាត់ជាមួយស្ទីលបែប House & Funk ដែលធ្វើឱ្យកម្មវិធីកាន់តែសប្បាយរីករាយថែមមួយកំរិតទៀត។

ស្វាគមន៍ឆ្នាំថ្មី Year of the Tiger! ពី Tiger Beer តែងតែលើកទឹកចិត្តឱ្យមនុស្សគ្រប់រូប បង្ហាញនូវភាពជឿជាក់ និងបញ្ចេញសក្ដានុពលរបស់ខ្លួន។ អ្នកនាង គង់ សូរីដា Senior Brand Manager របស់ Tiger Beer បានមានប្រសាសន៍ថា “គោលបំណងធំបំផុតរបស់ Tiger Beer គឺចង់បំផុសគំនិត ឱ្យអ្នកទាំងអស់គ្នាមានក្តីស្រមៃខ្ពស់ មានទំនុកចិត្តលើខ្លួនឯង និងអបអរភាពជឿជាក់របស់ខ្លួនឯង។

នៅក្នុង Year Of The Tiger ពួកយើងមិនគ្រាន់តែបំផុសគំនិតឱ្យមនុស្សគ្រប់រូបបន្តក្ដីស្រមៃរបស់ពួកគេនោះទេ ប៉ុន្តែលើសពីនេះយើងនឹងជំរុញភាពក្លាហានដើម្បីឱ្យពួកគេសម្រេចនូវគោលដៅនោះអោយបាន។ Tiger ពិតជាមានក្ដីសោមនស្សយ៉ាងខ្លាំងដែលបានសហការជាមួយ FONKi និង FT Gallery ដើម្បីបង្កើតកម្មវិធីដ៍៏អស្ចារ្យមួយនេះឡើង ហើយនឹងទន្ទឹងរង់ចាំបន្តនូវព្រឹត្តិការណ៍សិល្បៈ និងតន្ត្រីបន្ថែមទៀតក្នុងពេលឆាប់ៗខាងមុខនេះ។

អំពី Murals for Cambodia

Murals for Cambodia គឺជាព្រឹត្តិការណ៍ថ្មីប្រចាំឆ្នាំបន្ទាប់ពីការបើកសម្ពោធ FT GALLERY កាលពីឆ្នាំមុន។ FT GALLERY តែងតែប្រមូលផ្ដុំវិចិត្រករក្នុងស្រុក និងអន្តរជាតិ ដែលមានកេរ្តិ៍ឈ្មោះល្បីៗមកបង្ហាញស្នាដៃដ៏៏គួរឱ្យកោតសរសើរជាច្រើននៅឯមជ្ឈមណ្ឌលច្នៃប្រឌិតធំបំផុតនៅអាស៊ីអាគ្នេយ៍ ក្នុង Factory Phnom Penh។ តាមរយៈព្រឹត្តិការណ៍នេះដែរ FT Gallery ព្រមទាំងអ្នកគ្រប់គ្រង់/សហស្ថាបនិក FONKi នឹងបង្កើតផ្ទាំងគំនូរធំៗ ព្រមទាំងផ្សព្វផ្សាយទូទាំងប្រទេសសម្រាប់ឆ្នាំខាងមុខនេះបន្តទៀត។

អំពី Tiger Beer

Tiger Beer មានដើមកំណើតនៅប្រទេសសិង្ហបុរី ដែលត្រូវបានបង្កើតឡើងនៅឆ្នាំ 1932។ Tiger Beer គឺជាស្រាបៀរលំដាប់ថ្នាក់អន្តរជាតិ ដែលសព្វថ្ងៃនេះ ឈរនៅលំដាប់លេខមួយក្នុងអាស៊ី និងជាម៉ាកផលិតផលដែលមានភាពរីកចម្រើនលឿនជាងគេបំផុត។ Tiger Beer មានលក់នៅលើទីផ្សារជាង 50 ប្រទេស នៅទូទាំងពិភពលោក។ ការជម្នះគ្រប់បែបយ៉ាងដើម្បីផលិតចេញនូវសមិទ្ធិផលដ៏ល្អឥតខ្ចោះដែលមានរសជាតិដិតជាប់ និងធ្វើឲ្យអារម្មណ៍ស្រស់ស្រាយ។ Tiger បានរកឃើញនូវវិធីដែលអាចនាំអ្នកទៅកាន់ភាពស្រស់ស្រាយថ្មីមួយដែលមិនធ្លាប់មានពីមុនមក ហើយ Tiger ក៏បានសម្រេចអ្វីដែលគ្រប់គ្នាគិតថា មិនអាចទៅរួចជាច្រើនទសវត្សរ៍មកហើយ។

March 4, 2022

ក្រុមហ៊ុនអាកាសចរណ៍ ថៃវៀតចេត(Thai Vietjet) បានបើកជើងហោះហើរត្រង់ពី ភ្នំពេញ - បាងកក

(បាងកក, ៤ មីនា ២០២២) – ការរៀបចំរចនាសម្ព័ន្ធក្នុងតំបន់ ក្រុមហ៊ុនអាកាសចរណ៍ ថៃវៀតចេត បានប្រកាសបើកជើងហោះហើរថ្មី ពីរាជធានីភ្នំពេញទៅទីក្រុងបាងកក ដែលជារាជធានីនៃប្រទេសថៃ ចាប់ពីថ្ងៃទី១៦ ខែមីនា ឆ្នាំ ២០២២ នេះតទៅ។

លោក Woranate Laprabang ដែលជានាយកប្រតិបត្តិ នៅក្រុមហ៊ុនអាកាសចរណ៍ ថៃវៀតចេត បានមានប្រសាសន៍ថា “ពួកយើងពិតជារីករាយដែលបានភ្ជាប់ទំនាក់ទំនងរវាងប្រទេសថៃ និង ប្រទេសកម្ពុជា ហើយបានផ្តល់ឱកាសឱ្យប្រជាជនថៃបានហោះហើរទៅប្រទេសកម្ពុជា ក៏ដូចជាស្វាគមន៍អ្នកដំណើរ និងអ្នកជំនួញនៃប្រទេសកម្ពុជា មកទស្សនានិងទទួលយកបទពិសោធន៍ពីភាពស្រស់ស្អាតនៃប្រទេសថៃ បន្ទាប់ពីការរីករាលដាលពីជំងឺទូទាំងសាកលអស់រយៈពេលយូរមកហើយ។ ជើងហោះហើរទៅកាន់គោលដៅប្រទេសទាំង២នេះ ក៏ជាចំណែកមួយដែលអាចជួយឱ្យសេដ្ឋកិច្ចនៅក្នុងប្រទេសទាំង២ មានភាពប្រសើរឡើងវិញ និង ធ្វើអោយតម្រូវការនៃការធ្វើដំណើរតាមផ្លូវអាកាសមានការកើនឡើង ព្រមទាំងជំរុញឱ្យមានទំនាក់ទនងផ្នែកទេសចរណ៍និងពាណិជ្ជកម្មរវាងប្រទេសទាំង២ ផងដែរ ដើម្បីបញ្ជាក់ពីគោលដៅក្នុងការពង្រីកបណ្តាញទំនាក់ទំនង និងបំពេញតម្រូវការរបស់ភ្ញៀវទេសចរណ៍។

ជើងហោះហើរអន្តរជាតិថ្មីរវាង ភ្នំពេញ – បាងកក (សុវណ្ណភូមិ) នឹងដំណើរការ ១សប្តាហ៍ ៣ដង នៅរៀងរាល់ថ្ងៃច័ន្ទ ថ្ងៃពុធ និង ថ្ងៃសុក្រ ជាមួយនឹងរយៈពេលហោះហើរ ១ម៉ោង១០នាទី។ អ្នកអាចស្វែងរកកាលវិភាគហោះហើរ ក្នុងតារាងខាងក្រោម៖

លើសពីនេះទៅទៀត ជើងហោះហើរថ្មី ពីរាជធានីភ្នំពេញទៅទីក្រុងបាងកក រួមជាមួយនឹងបណ្តាញរបស់ក្រុមហ៊ុន ថៃវៀតចេត បានបន្ថែមកាលវិភាគជើងហោះហើររវាង បាងកក-ហូជីមិញ សរុបរហូតដល់៦ដងក្នុង ១សប្តាហ៍ ដើម្បីផ្តល់ជូននូវជម្រើសដ៏ល្អបំផុតដល់ភ្ញៀវក្នុងប្រទេសទាំង២នេះ។ ក្នុងរយៈពេលខាងមុខនេះ ក្រុមហ៊ុនអាកាសចរណ៍ ថៃវៀតចេត សង្ឃឹមថា នឹងអាចពង្រីក និងបន្ថែមបណ្តាញជើងហោះហើរអន្តរជាតិរបស់ខ្លួន ទៅកាន់គោលដៅជាច្រើនបន្ថែមទៀត ជាពិសេសនៅក្នុងតំបន់ អាស៊ីប៉ាស៊ីហ្វិច ដូចជា ប្រទេសវៀតណាម ប្រទេសសិង្ហបុរី កោះតៃវ៉ាន់។ល។

ក្រុមហ៊ុនអាកាសចរណ៍ ថៃ វៀតចេត មានយន្តហោះសម្រាប់ដឹកអ្នកដំណើររហូតដល់ ១៦ គ្រឿង ដែលក្នុងនោះមាន Airbus A320-200 ចំនួន ១០ គ្រឿង, Airbus A321-200 ចំនួន ៦ គ្រឿង ជាមួយនឹង ភាគរយនៃអត្រាការអនុវត្តទាន់ពេលវេលា (OTP) រហូតដល់ ៩៧.២៩% ភាពជឿជាក់នៃបច្ចេកទេស ៩៩.៧៣% និង មានអ្នកដំណើរសរុបជិត ១១ លាននាក់ បន្ថែមជាមួយនឹងការបន្តពង្រីកបណ្តាញរបស់ខ្លួនក្នុងកំឡុងពេលនៃការរីករាលដាលនៃជំងឺកូវីដ-១៩ បានធ្វើអោយក្រុមហ៊ុន ថៃ វៀតចេត ជោគជ័យដោយទទួលបានពានរង្វាន់ជា “ក្រុមហ៊ុនដឹកអ្នកដំណើរមានតម្លៃទាបដែលរីកលូតលាស់លឿនបំផុតប្រចាំឆ្នាំ” (The Fastest Growing Low-cost Carrier of the 2020) ពីទស្សនាវដ្ដី Global Business Outlook 2020។ ក្រុមហ៊ុន ថៃ វៀតចេត ក៏បានទទួលពានរង្វាន់ជាក្រុមហ៊ុនអាកាសចរណ៍ ដែលមានបាហុនិការរួសរាយ រាក់ទាក់ជាងគេ (Most Passenger-Friendly Cabin Crew – 2021) ពីទស្សនាវដ្ដី International Finance ដោយសង្កត់ធ្ងន់លើជំហររបស់ខ្លួនជា “ក្រុមហ៊ុនអាកាសចរណ៍នៃបដិសណ្ឋារកិច្ច” ដោយពង្រឹងតម្លៃស្នូលនៃ មិត្តភាព និង ភាពសប្បាយរីករាយ រួមជាមួយនឹង សុវត្ថិភាព ពេលវេលា និង តម្លៃសមរម្យ។

ទីក្រុងភ្នំពេញគឺជារាជធានីនៃប្រទេសកម្ពុជា ដែលពោរពេញទៅដោយទេសភាពដ៏ស្រស់ស្អាតជាច្រើន និង កន្លែងទេសចរណ៍បែបប្រវត្តិសាស្ត្រ មានដូចជា ព្រះបរមរាជវាំងដ៍អស្ចារ្យ សារមន្ទីរជាតិដែលជាកន្លែងថែរក្សា និង ប្រមូលផ្តុំសិល្បៈគ្រប់ទម្រង់របស់ខ្មែរ និងរូបចម្លាក់ច្រើនជាងគេលើសកលលោក រួមទាំងមានសារមន្ទីរឧក្រិដ្ឋកម្មប្រល័យពូជសាសន៍ទួលស្លែងផងដែរ។ ចំណែកឯទីក្រុងបាំងកកវិញ មានទេសភាពដ៏ស្រស់ស្អាតរបស់ទូកទេសចរណ៏នៅតាមដងទន្លេ ចៅ ប្រាយ៉ា ព្រះបរមមហារាជវាំងដ៏ស្អាតអស្ចារ្យ និងមានផ្សាររាត្រីអ៊ូរអរជាច្រើន។

អំពី ក្រុមហ៊ុន ថៃ វៀតចេត (Thai Vietjet)

ក្រុមហ៊ុន ថៃ វៀតចេត បានបង្កើតឡើងក្នុងឆ្នាំ២០១៤ ហើយបានសហការជាមួយក្រុមហ៊ុន វៀតចេត អ៊ែរ ដើម្បីពង្រីកបណ្តាញហោះហើររបស់ខ្លួន និងផ្តល់ឱកាសកាន់តែច្រើនសម្រាប់អ្នកធ្វើដំណើរទៅកាន់ប្រទេសថៃ និងប្រទេសជាច្រើនទៀតប្រកបដោយសេវាកម្មរួសរាយរាក់ទាក់ និងសប្បាយរីករាយ។ ដោយផ្តោតលើសមត្ថភាពគ្រប់គ្រងការចំណាយ ប្រតិបត្តិការដែលប្រកបដោយប្រសិទ្ធភាព និងការអនុវត្តរបស់ក្រុមហ៊ុនអាកាសចរណ៍ យើងអាចផ្តល់ជូននូវការហោះហើរដោយសន្សំសំចៃ និងតម្លៃដែលអាចផ្លាស់ប្ដូរទៅតាមកាលទេសៈ ព្រមទាំងសេវាកម្មជាច្រើនទៀតដើម្បីសម្របតាមតម្រូវការរបស់អតិថិជន។

ថៃ វៀតចេត ទទួលបានពានរង្វាន់ ក្រុមហ៊ុនដឹកអ្នកដំណើរដែលមានតម្លៃទាបនិងរីកលូតលាស់លឿនបំផុតនៃឆ្នាំ២០២០ ដោយទស្សនាវដ្តី Global Business Outlook។ ក្រុមហ៊ុនកំពុងបន្តពង្រីកបណ្តាញហោះហើររបស់ខ្លួនទាំងក្នុងស្រុក និងក្រៅស្រុក ក៏ដូចជាពង្រីកងារជាក្រុមហ៊ុនក្មេងជាងគេដែលមានយន្តហោះទំនើបៗ ដោយមានយន្តហោះ Airbus A320 និង A321។ ថ្មីៗនេះ ក្រុមហ៊ុនអាកាសចរណ៍ ថៃ វៀតចេត ក៏បានទទួលពានរង្វាន់ជាក្រុមហ៊ុនអាកាសចរណ៍ ដែលមានបាហុនិការរួសរាយ រាក់ទាក់ជាងគេ ពីទស្សនាវដ្ដី International Finance ដោយសង្កត់ធ្ងន់លើជំហររបស់ខ្លួនជា “ក្រុមហ៊ុនអាកាសចរណ៍នៃបដិសណ្ឋារកិច្ច” ដោយពង្រឹងតម្លៃស្នូលនៃ មិត្តភាព និងភាពសប្បាយរីករាយ រួមជាមួយនឹង សុវត្ថិភាព ពេលវេលា និង តម្លៃសមរម្យ។

បច្ចុប្បន្នក្រុមហ៊ុន ថៃ វៀតចេត ប្រទេសថៃបានប្រតិបត្តិការជើងហោះហើរក្នុងស្រុកចំនួន ១៤ ជើង ក្នុងនោះរួមមានជើងហោះហើរពីទីក្រុងបាងកក (សុវណ្ណភូមិ) ទៅ ឈៀងម៉ៃ ឈៀងរ៉ៃ ភូកេត ក្រាប៊ី អ៊ូដនថានី ហាតយ៉ៃ ខនខេន ណាខនស៊ី ថាម៉ារ៉ាត់ អ៊ូបន់ រ៉ាត់ឆាថានី និង ស៊ូរ៉ាត់ ថានី។ ចំណែកឯជើងហោះហើរឆ្លងតំបន់មាន ពីភូកេតទៅឈៀងរ៉ៃ ឈៀងម៉ៃ និង អ៊ូដុន ថានី រួមទាំងជើងហោះហើរត្រង់ពី ហាត់យ៉ៃ ទៅ ឈៀងរ៉ៃ ផងដែរ។ ក្រុមហ៊ុនក៏កំពុងតែពង្រីកបណ្តាញហោះហើរអន្តរជាតិរបស់ខ្លួនយ៉ាងសកម្មទៅកាន់គោលដៅជាច្រើននៅទូទាំងអាស៊ីប៉ាស៊ីហ្វិក ដោយភ្ជាប់ប្រទេសថៃជាមួយ វៀតណាម តៃវ៉ាន់ សិង្ហបុរី និងគោលដៅកំពូលផ្សេងទៀតនៅក្នុងតំបន់។

សម្រាប់ពត៌មានបន្ថែម www.vietjetair.com

ទំនាក់ទំនងប្រព័ន្ធផ្សព្វផ្សាយ

Thai Vietjet Air Joint Stock Company Limited

Siwarut Mongpra (Ruch): [email protected] / +6689 738 3364

Piyawat Chuangsri (Kodak): [email protected] / +6699 075 5969

March 4, 2022

ចំណុចខ្មៅ (Umbra) ប៉ុនផែនដី បង្ហាញខ្លួននៅលើផ្ទៃរបស់ព្រះអាទិត្យ

តេឡេស្កុបស្រាវជ្រាវព្រះអាទិត្យធំបំផុតក្នុងពិភពលោក ថតបានចំណុចខ្មៅដ៏មហិមាដែលបង្ហាញខ្លួននៅលើព្រះអាទិត្យកាលពីចុងខែកុម្ភៈ។

កែវយឹតព្រះអាទិត្យ Daniel K. Inouye នៅ Hawaii អាចប្រមូលទិន្នន័យវិទ្យាសាស្ត្រដ៏មានតម្លៃស្ដីពីព្រះអាទិត្យ ដោយមិនបាច់ហោះទៅកាន់ទីអវកាស។

ស្ថានីយជាតិសង្កេតព្រះអាទិត្យ (NSO) កាលពីថ្ងៃទី ១ មីនា បានចែករំលែកលើបណ្ដាញសង្គមនូវរូបថតស្ដីពីចំណុចខ្មៅលើព្រះអាទិត្យដ៏គួរឱ្យចាប់អារម្មណ៍ ដែលថតបានដោយកែវយឹត Daniel K. Inouye។ អង្កត់ផ្ចិតនៃតំបន់ងងឹតរបស់ចំណុចខ្មៅលើព្រះអាទិត្យ (humbra) ជិតស្មើនឹងអង្កត់ផ្ចិតរបស់ផែនដី នេះបើតាមការឱ្យដឹងរបស់ NSO។

ចំណុចខ្មៅលើព្រះអាទិត្យ (Umbra) ដែល កែវយឹតសង្កេតព្រះអាទិត្យ Daniel K. Inouye ថតបាន និងត្រូវស្ថានីយជាតិសង្កេតព្រះអាទិត្យ (NSO) ចែករំលែកកាលពីថ្ងៃទី ១ មីនា

Daniel K. Inouye ត្រូវបានបង្កើតឡើងដោយប្រើប្រាស់ទុនពីមូលនិធិវិទ្យាសាស្ត្រជាតិអាម៉េរិក (USNSF)។ ឧបករណ៍នេះ បានចាប់ផ្ដើមដំណើរការដំបូងកាលពីខែកុម្ភៈ ២០២២។ នេះគឺជាតេឡេស្កុបស្រាវជ្រាវព្រះអាទិត្យធំបំផុតក្នុងពិភពលោក។ វាត្រូវបានបង្កើតឡើងដើម្បីថតបានរូបភាពច្បាស់កម្រិតខ្ពស់អំពីព្រះអាទិត្យ ជាមួយនឹងភាពលម្អិតមិនធ្លាប់មានពីមុនមក។

កែវយឹត Daniel K. Inouye អាចថតរូបភាពដែលមានអង្កត់ផ្ចិតត្រឹមតែ ២០ គីឡូម៉ែត្រ។ វានឹងជួយក្រុមអ្នកវិទ្យាសាស្ត្រ ស្រាវជ្រាវ និងព្យាករអំពីបាតុភូតនានារបស់ព្រះអាទិត្យដែលអាចជះផលប៉ះពាល់ដល់ផែនដី។

March 4, 2022

ក្រសួងការពារជាតិរុស្ស៊ី និងសហរដ្ឋអាម៉េរិក តភ្ជាប់ខ្សែទូរស័ព្ទទាន់ហេតុការណ៍

ក្រសួងការពារជាតិអាម៉េរិក បានបង្កើតខ្សែទូរស័ព្ទទំនាក់ទំនងផ្ទាល់ជាមួយក្រសួងការពារជាតិរុស្ស៊ី ដើម្បីកាត់បន្ថយភាពតានតឹងជុំវិញបញ្ហានៅ អ៊ុយក្រែន។

ការសម្រេចចិត្តដែលត្រូវបានធ្វើឡើងកាលពីថ្ងៃទី ១ មីនា របស់ ក្រសួងការពារជាតិរុស្ស៊ី និងសហរដ្ឋអាម៉េរិក គឺក្នុងបំណងបញ្ចៀស «ការគណនាខុស» ទៅលើហេតុការណ៍យោធា និងការឡើងកំដៅនៃភាពតានតឹងរវាងបណ្ដាប្រទេសដែលពាក់ព័ន្ធនឹងវិបត្តិនៅ អ៊ុយក្រែន នេះបើតាមការឱ្យដឹងកាលពីថ្ងៃទី ៣ មីនា របស់មន្ត្រីជាន់ខ្ពស់មួយរូប នៅ មន្ទីរបញ្ចកោណ។

ក្នុងថ្ងៃដដែល រដ្ឋមន្ត្រីការបរទេសអាម៉េរិក Antony Blinken ក៏បានពិភាក្សាតាមទូរស័ព្ទជាមួយសមភាគីអ៊ុយក្រែន លោក Dmytro Kuleba ទាក់ទងនឹងការផ្ដល់ជំនួយផ្នែកសន្តិសុខ សេដ្ឋកិច្ច និងជនភៀសខ្លួននៅ អ៊ុយក្រែន ផងដែរ។

សកម្មភាពខាងលើត្រូវបានធ្វើឡើងនៅក្នុងគ្រាដែល ប្រតិភូអ៊ុយក្រែន និង រុស្ស៊ី បានបញ្ចប់កិច្ចចរចាជុំទី ២ និងយល់ព្រមគាំទ្រលើគំនិតផ្ដួចផ្ដើមស្ដីពីការបង្កើតច្រកសុវត្ថិភាពមនុស្សធម៌ សម្រាប់ប្រជាជនស៊ីវិល និងកិច្ចព្រមព្រៀងឈប់បាញ់ជាក់លាក់។

March 4, 2022

រុស្ស៊ី ផ្ដល់សំណងជូនគ្រួសារទាហានរុស្ស៊ី ដែលបានស្លាប់ និងរបួស នៅ អ៊ុយក្រែន

ប្រធានាធិបតីរុស្ស៊ី លោក វ្លាឌីមៀ ពូទីន បានឱ្យដឹងថា គ្រួសាររបស់ ទាហានរុស្ស៊ី ដែលស្លាប់នៅ អ៊ុយក្រែន នឹងទទួលបាន ៧ លានរូប្លរុស្ស៊ី ចំណែកទាហានដែលរងរបួស នឹងទទួលបានសំណងតិចជាងនេះពាក់កណ្ដាល។

ថ្លែងនៅក្នុងកិច្ចប្រជុំរបស់ ក្រុមប្រឹក្សាសន្តិសុខ កាលពី ថ្ងៃទី ៣ មីនា ប្រធានាធិបតី ពូទីន ឱ្យដឹងថា គ្រួសាររបស់ ទាហានរុស្ស៊ី ដែលបានស្លាប់នៅ អ៊ុយក្រែន នឹងទទួលបានសំណងជាង ៧ លានរូប្លរុស្ស៊ី (ជិត ៥៦,០០០ ដុល្លារអាម៉េរិក) ពីរដ្ឋាភិបាលរុស្ស៊ី។

លោក ពូទីន ក៏បានបន្ថែមថា ទាហានរុស្ស៊ី ដែលរងរបួស និងមានលក្ខខណ្ឌគ្រប់គ្រាន់ នឹងទទួលបានប្រាក់ឧបត្ថម្ភម្ដង ចំនួន ៣ លានរូប្លរុស្ស៊ី (ជិត ២៨,០០០ ដុល្លារអាម៉េរិក) ចំណែកទាហានដែលត្រូវពិការជារៀងរហូត នឹងទទួលបានប្រាក់ឧបត្ថម្ភពេញមួយជីវិត។

«ប្រជាជនរុស្ស៊ី និងប្រជាជនអ៊ុយក្រែន គឺជាជនជាតិតែមួយ ខ្ញុំនឹងមិនបោះបង់ប្រការនេះជាដាច់ខាត» ប្រធានាធិបតីរុស្ស៊ី លោក ពូទីន បញ្ជាក់ដុច្នេះ។

March 4, 2022

ខ្លាច រុស្ស៊ី ពេក ប្រទេសហ្សកហ្ស៊ី និង ម៉ុលដាវី សុំចូលជាសមាជិករបស់ សហភាពអឺរ៉ុប (EU)

រដ្ឋាភិបាលរបស់ប្រទេស ២ នៅ អឺរ៉ុបខាងកើត គឺ ហ្សកហ្ស៊ី (Georgia អតីត Gruzia) និង ម៉ុលដាវី (Moldova) បានដាក់លិខិតស្នើសុំចូលជាសមាជិករបស់ សហភាពអឺរ៉ុប ក្រោយពី សភាអឹរ៉ុប បានគាំទ្រសំណើដូចគ្នានេះរបស់ អ៊ុយក្រែន។

«ថ្ងៃនេះ យើងបានដាក់ពាក្យស្នើសុំចូលជាសមាជិកសហភាពអឺរ៉ុប (EU)» នាយករដ្ឋមន្ត្រី Irakli Garibashvili កាលពីថ្ងៃទី ៣ មីនា បានប្រកាសដូច្នេះក្រោយពីបានចុះហត្ថលេខាលើលិខិតស្នើសុំ។ «ហ្សកហ្ស៊ី គឺជាប្រទេសអឺរ៉ុប ហើយនឹងបន្តមានការរួមចំណែកដែលមានតម្លៃក្នុងការការពារ និងអភិវឌ្ឍទ្វីបនេះ»។

ការសម្រេចចិត្តខាងលើត្រូវបានធ្វើឡើងបន្ទាប់ពីបក្សកាន់អំណាចនៅ ហ្សកហ្ស៊ី ប៉ុន្មានថ្ងៃកន្លងទៅនេះ បានរងសម្ពាធខ្លាំងពីក្រុមប្រឆាំង ដោយស្នើឱ្យរដ្ឋាភិបាលរបស់នាយករដ្ឋមន្ត្រី Garibashvili យកគំរូតាម អ៊ុយក្រែន ក្រោយពី ប្រធានាធិបតី ហ្សេឡែនស្គី បានទទួលការគាំទ្រច្រើននៅពេលលោកបានដាក់ពាក្យសុំចូលជាសមាជិក EU។

ប្រធានាធិបតីម៉ុលដាវី លោកស្រី Maia Sandu (ស្ដាំ) និងប្រធានាធិបតីអ៊ុយក្រែន លោក ហ្សេឡែនស្គី កាលពីខែកញ្ញា ២០២១

ហ្សកហ្ស៊ី មានប្រជាជនសរុប ៣.៧ លាននាក់ ភាគខាងលិចជាប់នឹងសមុទ្រខ្មៅ ភាគខាងជើង និងខាងកើតជាប់នឹង រុស្ស៊ី ចំណែកភាគខាងត្បូងជាប់នឹង តួកគឺ និង អាមេនី រីឯភាគខាងត្បូងជាប់នឹង អាស៊ែបៃហ្សង់។

នៅក្នុងថ្ងៃដដែល ប្រធានាធិបតីរបស់ ប្រទេសម៉ុលដាវី (Moldova) លោកស្រី Maia Sandu ក៏បានប្រកាសថា ប្រទេសនេះបានចុះហត្ថលេខាលើលិខិតស្នើសុំចូលជាសមាជិករបស់ EU ផងដែរ។

ប្រទេសម៉ុលដាវី មានប្រជាជនសរុបជិត ២.៦ លាននាក់។ ប្រទេសនេះមានព្រំដែនខាងលិចជាប់នឹង រូម៉ានី ចំណែកភាគខាងជើង ខាងកើត និងខាងត្បូងជាប់នឹង អ៊ុយក្រែន។

ថ្មីៗនេះ អ៊ុយក្រែន បានដាក់ពាក្យសុំចូលជាសមាជិករបស់ EU ហើយទទួលបានការគាំទ្រយ៉ាងខ្លាំងក្លាពី សភាអឺរ៉ុប។ លោក ហ្សេឡែនស្គី បានស្នើឱ្យមានការដាក់បញ្ចូល អ៊ុយក្រែន ទៅក្នុង សហភាពអឺរ៉ុប ជាបន្ទាន់ ដោយមូលហេតុថា ប្រទេសនេះកំពុងរងការឈ្លានពានពី កងទ័ពរុស្ស៊ី។

March 4, 2022

អគ្គិភ័យឆាបឆេះនៅរោងចក្រអគ្គិសនីថាមពលនុយក្លេអែរធំបំផុត របស់ អ៊ុយក្រែន

វេលាទៀបភ្លឺថ្ងៃទី ៤ មីនានេះ មានហេតុការណ៍អគ្គិភ័យមួយបានកើតឡើងនៅឯរោងចក្រផលិតអគ្គិសនីដើរដោយថាមពលនុយក្លេអែរធំបំផុតនៅ អ៊ុយក្រែន បន្ទាប់ពីវាត្រូវបាន កងកម្លាំងរុស្ស៊ី ឡោមព័ទ្ធ។

«ក្រោយពីមានការបាញ់ប្រហារជាបន្តបន្ទាប់ទៅលើ Zaporizhzhia ដែលជារោងចក្រអគ្គិសនីថាមពលនុយក្លេអែរធំបំផុតនៅ អ៊ុយក្រែន ទីតាំងនេះក៏បានឆាបឆេះ» អភិបាលក្រុង Eneerhodar លោក Dmytro Orlov បានសរសេរនៅលើ Telegram នាថ្ងៃនេះ។

លោកអភិបាលក្រុងខាងលើបានហៅករណីនេះថា ជា «ការគំរាមកំហែងដល់សន្តិសុខពិភពលោក» ប៉ុន្តែ មិនទាន់បានផ្ដល់ព័ត៌មានលំអិតនៅឡើយ។

រដ្ឋមន្ត្រីការបរទេសអ៊ុយក្រែន លោក Dmytro Kuleba ក៏បានឱ្យដឹងដែរថា «កងទ័ពរុស្ស៊ី បានបាញ់កាំជ្រួចពីគ្រប់ទិសសំដៅលើរោងចក្រ Zaporizhzhia»។ លោកព្រមានថា បើសិនជារោងចក្រនេះផ្ទុះ នោះការខូចខាតនឹងធំជាង ១០ ដង ធៀបនឹងគ្រោះមហន្តរាយ Chernobyl។

ទាក់ទងនឹងបញ្ហាអគ្គិភ័យនៅរោងចក្រខាងលើ ភាគីរុស្ស៊ី មិនទាន់មានប្រតិកម្មឆ្លើយតបណាមួយនៅឡើយ។

March 4, 2022

ភាគហ៊ុនធនាគារ Sberbank របស់ រុស្ស៊ី ថយចុះ ៩៥% នៅលើផ្សារហ៊ុនក្រុងឡុងដ៍

(អង់គ្លេស)-ភាគហ៊ុនរបស់ ធានាគាររុស្ស៊ី Sberbank បានថយចុះ ៩៥% នៅលើផ្សារហ៊ុនក្រុងឡុងដ៍ (London) នៅក្នុងថ្ងៃពុធ (ថ្ងៃព្រហស្បតិ៍ នៅ កម្ពុជា) និងត្រូវបានជួញដូរក្នុងតម្លៃទាបបំផុត បន្ទាប់ពីធនាគារនេះប្រកាសដកខ្លួនពី ទីផ្សារអឺរ៉ុប។

ក្រុមហ៊ុនផ្ដល់ប្រាក់កម្ចីធំបំផុតរបស់ រុស្ស៊ី ឱ្យដឹងថា ពួកគេមានការបារម្ភអំពីសុវត្ថិភាពរបស់បុគ្គលិក និងទ្រព្យសម្បត្តិរបស់ពួកគេនៅ អឺរ៉ុប។

ធនាគារកណ្ដាលរបស់ អឺរ៉ុប បានចេញបញ្ជាឱ្យបិទទ្វារបណ្ដាសាខានៅ អឺរ៉ុប របស់ Sberbank នេះបើតាមការឱ្យដឹងពីអាជ្ញាធរគ្រប់គ្រងទីផ្សារហិរញ្ញវត្ថុរបស់ អូទ្រីស។ ប្រការនេះបង្ហាញថា Sberbank ដួលរលំ ឬមានហានិភ័យដួលរលំ ក្រោយពីការឈ្លានពានរបស់ រុស្ស៊ី លើ អ៊ុយក្រែន បានបង្កឱ្យមានវិបត្តិធ្ងន់ធ្ងរ។

ភាគហ៊ុនរបស់ធនាគារ Sberbank បញ្ចប់ការជួញដូរក្នុងថ្ងៃពុធ មានតម្លៃទាបជាង ៧៨% នៅផ្សារហ៊ុនក្រុងឡុងដ៍។ ធនាគារនេះបានបាត់បង់តម្លៃ ៩៩.៩% ចាប់ពីដើមឆ្នាំរហូតដល់បច្ចុប្បន្ន។

March 3, 2022

Author: សឿន សំណាង