សឿន សំណាង - La Reine Media

(វីដេអូ)-គម្រោងផលិតអគ្គិសនីដើរដោយថាមពលព្រះអាទិត្យ និងជំនោរ-លំនាចទឹកសមុទ្រ ដំបូងគេបង្អស់នៅ ប្រទេសចិន

ប្រទេសចិន កំពុងដំឡើងផ្ទាំងសូឡានៅលើកសិដ្ឋានផលិតអគ្គិសនីដែលដើរដោយកម្លាំងជំនោរ-លំនាចទឹកសមុទ្រ ធំបំផុតរបស់ប្រទេសនេះ ដើម្បីបង្កើនសមត្ថភាពនៃការផលិតអគ្គិសនី។

នេះគឺជាគម្រោងផលិតអគ្គិសនីប្រើថាមពលព្រះអាទិត្យ និងជំនោរ-លំនាចទឹកសមុទ្រដំបូងគេបង្អស់នៅ ប្រទេសចិន។ តាមផែនការ កសិដ្ឋានផលិតអគ្គិសនីនេះ នឹងបើកដំណើរការចាប់ពីខែឧសភា ឆ្នាំ ២០២២។ គម្រោងនេះមានទីតាំងនៅក្នុងទីក្រុង Wenling នៃខេត្ត Zhejiang ភាគខាងកើតប្រទេសចិន។

គម្រោងនេះ ដំបូងឡើយត្រូវបានស្ថាបនាជារោងចក្រផលិតអគ្គិសនីដែលដើរដោយកម្លាំងជំនោរទឹក-លំនាចនៃទឹកសមុទ្រធំបំផុតរបស់ ប្រទេសចិន ប៉ុន្តែ ក្រោយមក ផ្ទាំងសូឡានានាដែលមានទំហំសរុបជាង ១៣៣ ហិកតា ក៏ត្រូវបានដំឡើងបន្ថែមពីលើ ដើម្បីបង្កើនសមត្ថភាពនៃការផលិតអគ្គិសនី។

ប្រព័ន្ធដែលដើរដោយកម្លាំងជំនោរ-លំនាចទឹកសមុទ្រ និងប្រព័ន្ធស្រូបកម្ដៅព្រះអាទិត្យនឹងផលិតអគ្គិសនីស្អាតបានជាង ១០០ លានគីឡូវ៉ាត់ម៉ោង ជារៀងរាល់ឆ្នាំ ប្រហាក់ប្រហែលនឹងការប្រើប្រាស់ធ្យូងថ្មជាង ៣១,០០០ តោន នៅក្នុងវិស័យផលិតអគ្គិសនីដើរដោយកម្ដៅធ្យូងថ្ម ដូច្នេះ វានឹងជួយកាត់បន្ថយការបំភាយឧស្ម័នកាបូន ប្រហែលជាង ៨៤,០០០ តោន ជារៀងរាល់ឆ្នាំ។

April 4, 2022

ទម្រសម្រាប់បាញ់បង្ហោះរ៉ុក្កែតខ្នាតយក្សឡើងទៅកាន់ឋានព្រះចន្ទ របស់ ណាសា ត្រូវរន្ទះបាញ់ចំច្រើនគ្រាប់

(សហរដ្ឋអាម៉េរិក)-ទម្រ ៣៩B នៅមជ្ឈមណ្ឌលអវកាស Kennedy ក្នុងរដ្ឋ Florida ត្រូវរន្ទះបាញ់ចំជាច្រើនលើកក្នុងថ្ងៃទី ២ មេសា ប៉ុន្តែ មហារុក្កែត SLS កម្ពស់ជាង ១០០ ម៉ែត្រ នៅតែស្ថិតក្នុងស្ថានភាពល្អប្រសើរ។

រន្ទះបាញ់ចំនួន ៤ «គ្រាប់» បានបាញ់ត្រង់តំបន់ជុំវិញទម្រ Pad ៣៩B ជាកន្លែងដែលប្រព័ន្ធរ៉ុក្កែត SLS របស់ ណាសា នឹងត្រូវឆ្លងកាត់ការធ្វើតេស្តបញ្ចូលឥន្ធនៈសម្រាប់បេសកកម្ម Artemis ហោះទៅកាន់ឋានព្រះចន្ទនៅចុងឆ្នាំនេះ។ រ៉ុក្កែតត្រូវបានការពារផលប៉ះពាល់ពីរន្ទះ ដោយអង់តែនចំនួន ៣ និងប្រព័ន្ធខ្សែនាំរន្ទះចុះដីដែលនៅជុំវិញ។

យោងតាម ណាសា រន្ទះ ៣ គ្រាប់ដំបូងមានថាមពលខ្សោយ ប៉ុន្តែ គ្រាប់ទី ៤ ដែលបាញ់ចំអង់តែនទីមួយក្នុងប្រព័ន្ធការពារ មានថាមពលខ្លាំងជាងគេ នេះបើតាម Jeremy Parsons អនុប្រធានផ្នែកគ្រប់គ្រងប្រព័ន្ធលើដីរបស់ ណាសា។ លោក Parsons និយាយថា ប្រព័ន្ធការពាររន្ទះដំណើរការល្អ ជួយការពាររ៉ុក្កែត SLS និងយាន Orion ប្រកបដោយសុវត្ថិភាព។

ណាសា បានបន្ថែមគុណភាពនៃប្រព័ន្ធទប់ទល់រន្ទះសម្រាប់ទម្រ ៣៩B ដើម្បីការពារប្រព័ន្ធផ្នែករឹងរបស់រ៉ុក្កែត។ នៅលើកំពូលរបស់អង់តែននីមួយៗ មានបង្គោលស្រូបយករន្ទះ ធ្វើអំពីសរសៃកញ្ចក់ និងខ្សែនាំរន្ទះចុះដី។ ប្រព័ន្ធថ្មីនេះក៏បំពាក់អង្គញាណជាច្រើន ដែលជួយឱ្យគេដឹងអំពីស្ថានភាពរបស់រ៉ុក្កែត បន្ទាប់ពីត្រូវរន្ទះបាញ់ចំក្បែរនោះ។

Artemis ១ គឺជាបេសកកម្មដំបូងរបស់ SLS ក្នុងកម្មវិធី Artemis ដើម្បីនាំអ្នកអវកាសរបស់ ណាសា ឡើងទៅកាន់ឋានព្រះចន្ទក្នុងឆ្នាំ ២០៥។ Artemis ១ គឺជាជើងហោះហើរគ្មានមនុស្សបើក ដែលនឹងហោះជុំវិញព្រះចន្ទដើម្បីសាកល្បងដំណើរការរ៉ុក្កែត SLS និងយានអវកាស Orion។ ប្រព័ន្ធយាន និងរ៉ុក្កែតនេះ នឹងដឹកឧបករណ៍វិទ្យាសាស្ត្រជាច្រើន រួមទាំងមនុស្សសិប្បនិម្មិតមួយដែលមានបំពាក់អង្គញាណផងដែរ៕

April 4, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មីជាង ៣០ នាក់ទៀត ក្នុងថ្ងៃទី ០៣ មេសា ២០២២

អ្នកវិជ្ជមាននឹង កូវីដ-១៩ ចំនួន ៣៥ នាក់ ដែលទើបតែបានរកឃើញក្នុងអំឡុង ២៤ ម៉ោងនៃថ្ងៃទី ០៣ មេសា គឺសុទ្ធតែជាករណីវិជ្ជមាននឹង អូមីក្រុង និងសុទ្ធតែជាករណីឆ្លងក្នុងសហគមន៍។

April 4, 2022

សិស្សដែលវិជ្ជមាននឹង កូវីដ-១៩ នៅ អង់គ្លេស គ្រាន់តែត្រូវធ្វើចត្តាឡីស័កនៅផ្ទះ ៣ ថ្ងៃ

យោងតាមការណែនាំថ្មីរបស់ ក្រសួងអប់រំអង់គ្លេស ក្មេងដែលវិជ្ជមាននឹង វីរុស SARS-CoV-២ (កូវីដ-១៩) ត្រូវតម្រូវឱ្យនៅដោយឡែក ៣ ថ្ងៃ ជំនួសឱ្យ ៥ ថ្ងៃដែលជាការណែនាំមុននោះ។

ការណែនាំថ្មីបំផុតខាងលើនេះ ត្រូវបានលើកឡើងក្នុងគ្រាដែលមានការបារម្ភថា សិស្សានុសិស្សនឹងត្រូវផ្អាកការសិក្សាយូរថ្ងៃដោយសារវិជ្ជមាននឹង កូវីដ-១៩។

សារព័ត៌មាន Telegraph រាយការណ៍ថា ក្រសួងអប់រំអង់គ្លេស ឱ្យដឹងថា សិស្សដែលមានវ័យក្រោម ១៨ ឆ្នាំ ត្រូវធ្វើចត្តាឡីស័កតែ ៣ ថ្ងៃប៉ុណ្ណោះ ដើម្បីធ្វើឱ្យមានតុល្យភាពរវាងហានិភ័យនៃការចម្លងវីរុស និងបញ្ហាអាក់ខានការសិក្សា។

មូលហេតុនៃការសម្រេចចិត្តខាងលើត្រូវបានក្រសួងបញ្ជាក់ថា «ដោយយោងទៅតាមការប្រឹក្សាយោបល់ យើងដឹងថា កូវីដ-១៩ បង្កហានិភ័យទាបលើការវិវត្តទៅរកភាពធ្ងន់ធ្ងរនៃជំងឺសម្រាប់កុមារ និងមនុស្សវ័យនៅក្មេង រួមនឹងអ្នកដែលបានទទួលការចាក់វ៉ាក់សាំងពេញលេញ»។

ជាងនេះ អ្នកនាំពាក្យម្នាក់របស់អាជ្ញាធរសន្តិសុខផ្នែកសុខាភិបាលអង់គ្លេស (UKHSA) ក៏បានឱ្យដឹងថា «មានភ័ស្ដុតាងបង្ហាញថា កុមារមានពេលវេលាឈឺដោយសារ កូវីដ-១៩ ខ្លីជាង ធៀបនឹងមនុស្សពេញវ័យ។ ហើយការណែនាំថ្មីនេះ ត្រូវបានធ្វើឱ្យមានតុល្យភាពរួចហើយ រវាងហានិភ័យនៃការឆ្លងរាលដាល និងការអាក់ខានការសិក្សា»។

ការណែនាំក៏បានបញ្ជាក់ថា គ្រឹះស្ថានអប់រំ និងទីតាំងថែទាំកុមារទាំងអស់នឹងមិនត្រូវតម្រូវឱ្យធ្វើតេស្តរក កូវីដ-១៩ ជាប្រចាំទៀតទេ។ នេះក៏ជាផ្នែកមួយនៃផែនការរបស់ រដ្ឋាភិបាលអង់គ្លេស ក្នុងការដកវិធានការទប់ស្កាត់កូវីដ-១៩ ចុងក្រោយរបស់ប្រទេសនេះ៕

April 4, 2022

ជនភៀសខ្លួនជិត ១០០ នាក់បានស្លាប់ ដោយសារក្រឡាប់កប៉ាល់លើ សមុទ្រមេឌីទែរ៉ាណេ

មនុស្សជិត ១០០ នាក់ បានបាត់បង់ជីវិតនៅតំបន់សមុទ្រអន្តរជាតិ បន្ទាប់ពីធ្វើដំណើរពី ប្រទេសលីប៊ី តាមកប៉ាល់ ១ គ្រឿង ដែលដឹកមនុស្សលើសចំណុះ។

យោងតាមអង្គការគ្រូពេទ្យគ្មានព្រំដែន (MSF) កប៉ាល់ពាណិជ្ជកម្ម Algeria ១ បានសង្គ្រោះមនុស្ស ៤ នាក់ ដែលកំពុងបណ្ដែតខ្លួនលើពោង នៅលើផ្ទៃសមុទ្រមេឌីទែរ៉ាណេ កាលពីព្រឹកថ្ងៃទី ២ មេសា។ អ្នកដែលត្រូវបានជួយសង្គ្រោះឱ្យដឹងថា ក្រុមជនចំណាកស្រុកជិត ១០០ នាក់ បានឡើងជិះកប៉ាល់ និងធ្វើដំណើរយ៉ាងតិច ៤ ថ្ងៃ នៅមុនពេលជួបគ្រោះថ្នាក់។ តាមការសន្និដ្ឋាន មនុស្សយ៉ាងហោច ៩៦ នាក់ បានលង់ទឹកស្លាប់។

ព្រឹកថ្ងៃទី ៣ មេសា មេដឹកនាំរបស់អង្គការជនភៀសខ្លួន របស់ អង្គការសហប្រជាជាតិ បានទទួលស្គាល់ថា មនុស្សជាង ៩០ នាក់ បានស្លាប់នៅក្នុងគ្រោះថ្នាក់ក្រឡាប់កប៉ាល់លើ សមុទ្រមេឌីទែរ៉ាណេ និងបានអំពាវនាវឱ្យបណ្ដាប្រទេសនៅ អឺរ៉ុប យកចិត្តទុកដាក់ឱ្យបានសមស្របចំពោះក្រុមជនចំណាកស្រុកមកពី មជ្ឈិមបូព៌ា និង អាហ្វ្រិកខាងជើង។

ក្រោយពីធ្លាក់ក្នុងអស្ថិរភាពអស់រយៈពេល ១ ទសវត្សរ៍ ប្រទេសលីប៊ី បច្ចុប្បន្នគឺជាចំណុចចាប់ផ្ដើមនៃការចេញដំណើររបស់ក្រុមជនភៀសខ្លួនពី អាហ្វ្រិក និង អាស៊ី ដែលចង់ឆ្លង សមុទ្រមេឌីទែរ៉ាណេ ទៅកាន់ អឺរ៉ុប។ មុនពេលហេតុការណ៍ខាងលើកើតឡើង អង្គការជនភៀសខ្លួនអន្តរជាតិ (IOM) បានរកឃើញថា មានមនុស្ស ៣៦៧ នាក់ បានស្លាប់នៅលើ សមុទ្រមេឌីទែរ៉ាណេ រាប់ចាប់ពីដើមឆ្នាំ ២០២២។ ពេញ ១ ឆ្នាំ ២០២១ តួលេខនេះមានចំនួន ២,០៤៨ នាក់៕

April 4, 2022

តម្លៃមាសត្រូវបានព្យាករថា អាចឡើងដល់ ២,០០០ ដុល្លារ ក្នុងត្រីមាសទីពីរ

ការព្រួយបារម្ភអំពីសេដ្ឋកិច្ចអាម៉េរិក មានសញ្ញានៃវិបត្តិ និងការដែលសង្គ្រាមរវាង រុស្ស៊ី និង អ៊ុយក្រែន នៅបន្តឡើងកម្ដៅ អាចធ្វើឱ្យតម្លៃមាសឡើងដល់ ២,០០០ ដុល្លារអាម៉េរិក ក្នុង ១ អោន នៅក្នុងត្រីមាសទីពីរ នេះបើតាមអ្នកជំនាញការ។

ក្នុងត្រីមាសដំបូង តម្លៃមាសកើនជាង ៦% និងខ្ពស់បំផុតរាប់ចាប់ពីត្រីមាសទីបី ឆ្នាំ ២០២។ Frank Cholly អ្នកជំនាញជាន់ខ្ពស់ផ្នែកទីផ្សាររបស់ RJO Futures ឱ្យដឹងថា សេណារីយោវិជ្ជមានប្រហាក់ប្រហែលនេះ នឹងកើតឡើងក្នុងត្រីមាសទីពីរ ជាមួយនឹងគោលដៅ ២,០០០ ដុល្លារអាម៉េរិក ក្នុង ១ អោន (១ អោន-ounce ជិតស្មើនឹង ៨.៣ ជី)។

លោក Frank Cholly ព្យាករថា បើសិនតម្លៃមាសលោតឡើងផុតរង្វង់ ១,៩៥០-១,៩៧៥ ដុល្លារ/អោន នោះគោលដៅ ២,០០០ ដុល្លារ/អោន នឹងទៅដល់ក្នុងពេលឆាប់។

បន្ទាប់ពីដំណាក់កាលកើនឡើងយ៉ាងល្អនៅដើមឆ្នាំ តម្លៃមាសចាប់ផ្ដើមត្រីមាសថ្មីដោយការធ្លាក់ចុះ ៣០ ដុល្លារ ក្នុងថ្ងៃដំបូងនៃខែមេសា មកនៅត្រឹម ១,៩២៥.៥ ដុល្លារ/អោន។ ប៉ុន្តែ ក្រុមអ្នកវិភាគដែលកំពុងតាមដានលើការប្រាក់នៃមូលបត្របំណុលរបស់រតនាគារជាតិអាម៉េរិក យល់ថា តម្លៃមាសនៅសល់ចំណុចច្រើនទៀតដែលអាចលោតឡើង។

សង្គ្រាមរវាង រុស្ស៊ី និង អ៊ុយក្រែន ត្រូវបានគេព្យាករថា នឹងបន្តបង្កផលប៉ះពាល់ដល់តម្លៃមាស។ អ្នកជំនាញប្រចាំ TD Securities ឱ្យដឹងថា «ជម្រកដែលមានសុវត្ថិភាពបំផុតសម្រាប់អ្នកវិនិយោគគឺមាស។ ឱ្យតែកិច្ចចរចាឈប់បាញ់ និងការបន្ថយភាពតានតឹងនៅតែពិបាកចាប់យក ក្រុមអ្នកវិនិយោគក៏នឹងនៅតែស្វែងរកមាស ដើម្បីជាជម្រកសុវត្ថិភាព»។

ទោះជាយ៉ាងណាក៏ដោយ Michael Boutros ដែលជាអ្នកយុទ្ធសាស្ត្ររបស់ DailyFX សង្កត់ធ្ងន់ថា កត្តាបច្ចេកទេសបង្ហាញថា មាសនៅតែមិនទាន់ដល់ពេលផ្ទុះខ្លាំង។ អនាគត មាសអាចត្រូវបានលក់ចេញក្នុងទ្រង់ទ្រាយធំ ពិសេសគឺនៅពេលដែលតម្លៃរង្វង់ពី ១,៨២៨-១,៨៤៩ ដុល្លារ/អោន មិនត្រូវបានរក្សា «ខ្ជាប់ខ្ជួន»។ លោក Boutros យល់ថា តម្លៃរបស់មាសនឹងត្រូវបានធ្វើឱ្យមានតុល្យភាពដោយល្បឿននៃកំណើនការប្រាក់របស់ FED ហើយតម្លៃពិបាកនឹងចុះទាបក្រោមរង្វង់ដែលបាននិយាយខាងដើម៕

April 4, 2022

អ៊ុយក្រែន ចេញច្បាប់ផ្ដល់រង្វាន់ធំ ១ លានដុល្លារសម្រាប់ប្ដូរយកយន្តហោះ នាវាចម្បាំងរបស់ រុស្ស៊ី

អ៊ុយក្រែន ថ្មីៗនេះ បានប្រកាសចេញច្បាប់ផ្ដល់រង្វាន់រហូតដល់ ១ លានដុល្លារអាម៉េរិក ដល់ ទាហានរុស្ស៊ី ទាំងឡាយណាដែលចុះចាញ់ និងប្រគល់គ្រឿងសព្វាវុធ ដូចជា យន្តហោះ និងនាវាចម្បាំងជាដើម ឱ្យ អ៊ុយក្រែន។

នៅក្នុងប្រកាសមួយដែលត្រូវបានបង្ហោះលើគេហទំព័ររបស់ សភាអ៊ុយក្រែន ច្បាប់ ៧២២៩ លើកឡើងថា អ្នកទាំងឡាយណាដែលប្រគល់សម្ភារៈយោធារបស់ រុស្ស៊ី ឱ្យ អ៊ុយក្រែន នឹងទទួលបានប្រាក់រង្វាន់ជាទីគាប់ចិត្ត។ ឧទាហរណ៍ អ្នកដែលបានប្រគល់នាវាចម្បាំង ១ គ្រឿង ឬយន្តហោះចម្បាំង ១ គ្រឿង របស់ រុស្ស៊ី ឱ្យ អ៊ុយក្រែន អាចទទួលបានប្រាក់រង្វាន់រហូតដល់ ១ លានដុល្លារអាម៉េរិក។ យានយោធានីមួយៗ ដូចជា ឡានដឹកទំនិញយោធាជាដើម នឹងមានតម្លៃ ១០,០០០ ដុល្លារ។

ក្រៅពីប្រាក់រង្វាន់ ប្រកាសរបស់ សភាអ៊ុយក្រែន ក៏បានបញ្ជាក់ថា អ្នកទាំងឡាយណាដែលបានប្រគល់សព្វាវុធរបស់ រុស្ស៊ី ឱ្យ អ៊ុយក្រែន នឹងទទួលបាន «ការរក្សាអត្តសញ្ញាណ ស្នាក់នៅក្នុង ប្រទេសអ៊ុយក្រែន ដោយសុវត្ថិភាព ហើយទទួលបានលិខិតស្នាមដើម្បីរើទៅប្រទេសទីបី»។

ប្រកាសពី សភាអ៊ុយក្រែន បង្ហាញអំពីខ្ទង់ប្រាក់រង្វាន់សម្រាប់យានយោធានីមួយៗរបស់ រុស្ស៊ី

អនុប្រធានសភាជាតិអ៊ុយក្រែន Oleksandr Kornienko ព្យាករថា ច្បាប់ថ្មីនេះអាចទទួលបានជោគជ័យ ព្រោះវានឹងទាក់ទាញ ទាហានរុស្ស៊ី និងអ្នកដែលមានបំណងកែប្រែស្ថានភាពហិរញ្ញវត្ថុ។ ស្ថានភាពធ្លាក់ទឹកចិត្តរបស់កងទ័ពក៏អាចធ្វើឱ្យពួកគេប្រគល់គ្រឿងសព្វាវុធ។

ភាគីខាងរុស្ស៊ី មិនទាន់មានប្រតិកម្មអ្វីនៅឡើយ ចំពោះការចេញច្បាប់ថ្មីខាងលើរបស់ អ៊ុយក្រែន។

ការផ្ដល់រង្វាន់ដល់ ទាហានរុស្ស៊ី ដែលរត់ចោលជួរ គឺជាយុទ្ធសាស្ត្រមួយរបស់ អ៊ុយក្រែន ចាប់តាំងពី ទីក្រុងមូស្គូ បានចូលឈ្លានពានលើ អ៊ុយក្រែន។ កាលពីថ្ងៃទី ២៨ កុម្ភៈ នៅលើទំព័រ Facebook រដ្ឋមន្ត្រីក្រសួងការពារជាតិអ៊ុយក្រែន Oleksiy Reznikov ឱ្យដឹងថា ទីក្រុងកៀវ នឹងផ្ដល់រង្វាន់ ៥ លានរូប្ល (ប្រហែល ៥៨,០០០ ដុល្លារអាម៉េរិក) ដល់ ទាហានរុស្ស៊ី ទាំងឡាយណា ដែលទម្លាក់អាវុធ និងចុះចាញ់ដោយស្ម័គ្រចិត្ត»៕

April 4, 2022

បុរសម្នាក់ទទួលការចាក់វ៉ាក់សាំងកូវីដ-១៩ រហូតដល់ ៩០ ដូស ដើម្បីរកប្រាក់

(អាល្លឺម៉ង់)-បុរសម្នាក់នៅទីក្រុង Magdeburg ត្រូវបានចោទប្រកាន់ថា បានទទួលការចាក់វ៉ាក់សាំងបង្ការជំងឺកូវីដ-១៩ ចំនួន ៩០ ដូស ដើម្បីយកប័ណ្ណបញ្ជាក់ការចាក់វ៉ាក់សាំង ហើយលក់វាឱ្យអ្នកទាំងឡាយណាដែលមិនចង់ចាក់វ៉ាក់សាំង។

បុរសខាងលើនេះ ត្រូវបានគេជឿថា បានទៅកាន់មជ្ឈមណ្ឌលចាក់វ៉ាក់សាំងនានានៅក្នុងរដ្ឋ Saxony ដើម្បីទទួលការចាក់វ៉ាក់សាំងរាប់សិបដូសក្នុងរយៈពេលច្រើនខែ រហូតដល់ពេលត្រូវសមត្ថកិច្ចរកឃើញកំហុស។

ជននេះមិនត្រូវបានឃុំខ្លួន ប៉ុន្តែកំពុងត្រូវបានស៊ើបអង្កេតក្រោមបទចោទ ផ្ដល់ប័ណ្ណបញ្ជាក់ការចាក់វ៉ាក់សាំងដោយខុសច្បាប់ និងក្លែងបន្លំលិខិតស្នាម។ បុរសនេះត្រូវបានចាប់ខ្លួននៅឯមជ្ឈមណ្ឌលចាក់វ៉ាក់សាំងមួយក្នុងតំបន់ Eilenburg នៅពេលទៅទទួលការចាក់វ៉ាក់នៅថ្ងៃចន្ទជាបន្តបន្ទាប់។ ប៉ូលិសបានរឹបអូសយកប័ណ្ណបញ្ជាក់ការចាក់វ៉ាក់សាំងជាច្រើនដែលបុរសនេះយកតាមខ្លួន។ ដោយការទៅទទួលការចាក់វ៉ាក់សាំងជាបន្តបន្ទាប់ ជននេះនឹងយកលេខឡូត៍វ៉ាក់សាំងពិតដើម្បីកត់ចូលក្នុងប័ណ្ណបញ្ជាក់។

បច្ចុប្បន្ន មិនទាន់ដឹងច្បាស់ថា វ៉ាក់សាំង ៩០ ដូស ដែលជននេះបានទទួលការចាក់ ជារបស់ក្រុមហ៊ុនណាខ្លះ និងមានផលប៉ះពាល់អ្វីខ្លះដល់សុខភាពរបស់ជននេះនៅឡើយ។

សមត្ថកិច្ចរបស់ អាល្លឺម៉ង់ ប៉ុន្មានខែចុងក្រោយនេះ បានធ្វើការស្រាវជ្រាវរកសកម្មភាពក្លែងបន្លំឯកសារស្ដីពីការចាក់វ៉ាក់សាំងបង្ការកូវីដ-១។ មនុស្សជាច្រើនមិនព្រមចាក់វ៉ាក់សាំង ប៉ុន្តែចង់បានប័ណ្ណបញ្ជាក់ការចាក់វ៉ាក់សាំងដើម្បីងាយស្រួលដើរហើរ ដែលនេះគឺជាមូលហេតុនាំឱ្យបុរសខាងលើរកវិធីរកប្រាក់។

ប្រទេសអាល្លឺម៉ង់ កាលពីថ្ងៃទី ០៣ មីនា បានឱ្យដឹងថា បានរកឃើញករណីឆ្លងកូវីដ-១៩ ជាង ៧៤,០០០ នាក់ទៀត ប៉ុន្តែ នេះគឺជាតួលេខដែលទាបជាងប្រហែល ៣៧,០០០ នាក់ ធៀបនឹង ១ សប្ដាហ៍មុន។ ជាសរុប ប្រទេសនេះមានអ្នកស្លាប់ដោយសារកូវីដ-១៩ ចំនួន ១៣០,០២៩ នាក់៕

April 4, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មីជាង ៣០ នាក់ទៀត ក្នុងថ្ងៃទី ០១ មេសា ២០២២

ក្នុងចំណោមអ្នកវិជ្ជមានថ្មីនឹង កូវីដ-១៩ ចំនួន ៣២ នាក់ ដែលទើបតែបានរកឃើញ គឺសុទ្ធតែជាករណីវិជ្ជមាននឹង អូមីក្រុង ក្នុងនោះមានករណីឆ្លងក្នុងសហគមន៍ ៣០ នាក់ និងអ្នកដំណើរពីបរទេស ០២ នាក់។

April 2, 2022

ប្រវត្តិឡូហ្គោ ៤៦ ឆ្នាំ របស់ Apple ៖ ហេតុអ្វីបានជា «ផ្លែប៉ោម» មានស្នាមខាំ?

និមិត្តសញ្ញាដំបូងរបស់ក្រុមហ៊ុន Apple មើលទៅគួរឱ្យព្រឺក្បាល ព្រោះស្រដៀងនឹងរូបភាពក្នុងរឿងនិទានស្ដីពីព្រលឹងវិញ្ញាណ។

Apple ត្រូវបានបង្កើតឡើងដោយ Steve Jobs, Steve Wozniak និង Ronald Wayne កាលពីខែមេសា ឆ្នាំ ១៩៧៦។ ពុំមានអ្នកណាម្នាក់នឹកស្មានដល់ថា ក្រុមហ៊ុនមួយដែលត្រូវបានបង្កើតឡើងនៅក្នុងយានដ្ឋាន អាចក្លាយជាក្រុមហ៊ុនខ្នាតយក្សក្នុងវិស័យបច្ចេកវិទ្យាដែលមានតម្លៃមូលធនទីផ្សារ ៣,០០០ ពាន់លានដុល្លារអាម៉េរិក ដូចបច្ចុប្បន្ន។

ហេតុអ្វីបានជាឡូហ្គោរបស់ Apple មានស្នាមខាំបែបនេះ?

មូលហេតុដែលនាំឱ្យ «ផ្លែប៉ោម» មានស្នាមខាំ គឺដើម្បីបញ្ចៀសការភាន់ច្រឡំទៅនឹងប្រភេទផ្លែឈើមួយចំនួនផ្សេងទៀតដូចជា ផ្លែប៉េងប៉ោះ ឬផ្លែឈែរី។

និមិត្តសញ្ញាដំបូងរបស់ Apple

ឡូហ្គោដំបូងរបស់ Apple ត្រូវបានរចនាឡើងដោយ Ronal Wayne ដែលជាសហស្ថាបនិករបស់ Apple កាលពីឆ្នាំ ១៩៧៦។ ក្នុងឡូហ្គោនេះ មានរូបលោក Issac Newton កំពុងអង្គុយក្រោមដើមឈើដែលមានផ្លែប៉ោមចាំងរស្មីនៅលើក្បាល។ ប៉ុន្តែ មិនយូរប៉ុន្មាន ឡូហ្គោនេះក៏ត្រូវបានប្ដូរ ព្រោះលោក Steve Jobs មិនចូលចិត្តអត្ថន័យនោះ។

ឡូហ្គោផ្លែប៉ោមមានពណ៌ឥន្ទធនូ

នេះគឺជានិមិត្តសញ្ញាដំបូងដែលបានធ្វើឡើងបន្ទាប់ពីលោក Jobs បានប្រគល់ឱ្យ Rob Janoff ធ្វើការសម្រេចចិត្តជ្រើសរើសដើម្បីរចនា។ លោក Jobs យល់ថា ការប្រើប្រាស់ឡូហ្គោដែលមានពណ៌ចម្រុះបែបនេះ នឹងដូចទៅនឹងមធ្យោបាយដើម្បី «ពង្រីក» ក្រុមហ៊ុន។ ចំណែក ស្លឹកឈើនៅពីលើផ្លែប៉ោម ត្រូវបាន Janoff អះអាងថា ព្រោះតែធម្មជាតិឱ្យវានៅទីនោះ។

ឡូហ្គោពណ៌ខៀវខ្ចី

ឆ្នាំ ១៩៩៨ ស្រឡាយ Mac ត្រូវបានបញ្ចេញលក់ក្នុងទីផ្សារ ដោយមានពណ៌ខៀវ Bondi។ ម៉ាស៊ីន Mac ថ្មីនោះ មានឡូហ្គោជា ផ្លែប៉ោមខៀវខ្ចីតែមួយគត់ នាំឱ្យពណ៌ស្នូតបែបឥន្ទធនូត្រូវបាត់ខ្លួន ដើម្បីឆ្ពោះទៅកាន់ភាពសាមញ្ញ។

និមិត្តសញ្ញារបស់ Apple ចាប់ពីឆ្នាំ ២០០១ ដល់បច្ចុប្បន្ន

មកដល់ឆ្នាំ ២០០១ ឡូហ្គោរបស់ Apple ស្ថិតក្នុងស្ថិរភាព។ ជាមួយនឹងកំណែពណ៌ក្រហមដែលត្រូវបានប្រើសម្រាប់គោលដៅធានារ៉ាប់រង និងជំនួយផ្នែកបច្ចេកទេស Apple Care កំណែពណ៌ខ្មៅក៏ត្រូវបានប្រើជាថ្មីនៅឆ្នាំ ២០១៤ ជំនួសឱ្យកំណែពណ៌សចំនួន ២ មុននោះ៕

April 2, 2022

Author: សឿន សំណាង