ក្នុងអំឡុង ២៤ ម៉ោងនៃថ្ងៃទី ២៤ មេសា កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ១២ នាក់ ដែលសុទ្ធតែជាប្រភេទ អូមីក្រុង និងសុទ្ធតែជាករណីឆ្លងក្នុងសហគមន៍។
Author: សឿន សំណាង
ឃ្លាំងប្រេងរបស់ រុស្ស៊ី នៅក្បែរព្រំដែនអ៊ុយក្រែន ផ្ទុះឆាបឆេះសន្ធោសន្ធៅ
អគ្គិភ័យយ៉ាងធំបានកើតឡើងនៅព្រឹកនេះ នៅឯឃ្លាំងប្រេងរបស់ ប្រទេសរុស្ស៊ី នាទីក្រុង Bryansk ក្បែរព្រំដែនអ៊ុយក្រែន ប៉ុន្តែមិនទាន់ដឹងច្បាស់អំពីការខូចខាត។
«អង្គភាពស្ថានការណ៍បន្ទាន់បញ្ជាក់ថាមានអគ្គិភ័យ» ការិយាល័យសារព័ត៌មានរបស់អាជ្ញាធរតំបន់ Bryansk ថ្ងៃទី ២៥ មេសានេះ ឱ្យដឹងដូច្នេះ ទាក់ទងនឹងដំណឹងស្ដីពីករណីឆេះឃ្លាំងប្រេង។ «អណ្ដាតភ្លើងបានផ្ទុះឆេះចេញពីធុងដាក់ប្រេង»។
ក្រុមមន្ត្រីនៃទីក្រុង Bryansk ដែលមានចម្ងាយពីព្រំដែនជាប់នឹង អ៊ុយក្រែន ប្រហែល ១០០ គីឡូម៉ែត្រ បានទទួលព័ត៌មានស្ដីពីអគ្គិភ័យនៅវេលាម៉ោង ២ (ម៉ោង ៦ នៅ កម្ពុជា)។ កងកម្លាំងពន្លត់អគ្គិភ័យ និងក្រុមជួយសង្គ្រោះ ត្រូវបានបញ្ជូនទៅកាន់កន្លែងកើតហេតុ និងបានរាយការណ៍ថា ឃ្លាំងប្រេងកំពុងឆាបឆេះ។
អង្គភាពស្ថានការណ៍បន្ទាន់នៅតំបន់ Bryansk មិនទាន់ប្រកាសព័ត៌មានបន្ថែមអំពីករណីអគ្គិភ័យនេះ ហើយបច្ចុប្បន្ន ក្រុមមន្ត្រីក៏មិនទាន់ដឹងច្បាស់ថា អគ្គិភ័យនេះមានជាប់ទាក់ទិននឹងសង្គ្រាមនៅ អ៊ុយក្រែន ឬយ៉ាងណានៅឡើយ។
កាលពីថ្ងៃព្រហស្បតិ៍សប្ដាហ៍កន្លង ក្រុមមន្ត្រីរុស្ស៊ី បានឱ្យដឹងថា ឧទ្ធម្ភាគចក្ររបស់ អ៊ុយក្រែន បានបាញ់ប្រហារសំដៅលើអគារស្នាក់នៅនានា និងបណ្ដាលឱ្យមានអ្នករងរបួស ៧ នាក់ នៅតំបន់ Bryansk របស់ រុស្ស៊ី។
កម្ពុជា ពិចារណាលើការលើកលែងកាតព្វកិច្ចពាក់ម៉ាសនៅទីសាធារណៈ ដើម្បីកាត់បន្ថយការចំណាយ
ប្រមុខរដ្ឋាភិបាលកម្ពុជា នាព្រឹកថ្ងៃទី ២៥ មេសា នេះ បានថ្លែងថា សម្ដេចបានស្នើឱ្យក្រុមមន្ត្រីសុខាភិបាល ពិចារណាអំពីការដកកាតព្វកិច្ចពាក់ម៉ាសនៅទីសាធារណៈ ប៉ុន្តែ តម្រូវឱ្យពាក់ម៉ាសនៅទីកន្លែងបិទជិត។
ការថ្លែងរបស់ប្រមុខរដ្ឋាភិបាលកម្ពុជា សម្ដេចតេជោ ហ៊ុន សែន នេះ ត្រូវបានធ្វើឡើងនៅក្នុងពិធីប្រគល់ និងទទួលអំណោយជាវ៉ាក់សាំងកូវីដ-១៩ AstraZeneca ពីរដ្ឋាភិបាល និងប្រជាជនរបស់ សាធារណរដ្ឋអ៊ីតាលី កាលពីថ្ងៃទី ២៥ មេសា ឆ្នាំ ២០២២។
ប្រមុខរដ្ឋាភិបាលកម្ពុជា បញ្ជាក់ថា គេមិនត្រូវមើលឃើញតែបញ្ហាសុខភាពតែមួយមុខទេ ប៉ុន្តែ ត្រូវមើលទៅលើបញ្ហាសេដ្ឋកិច្ច សង្គម និងចិត្តសាស្ត្ររបស់ប្រជាជនផងដែរ។ សម្ដេចថា ការទិញម៉ាសមកពាក់ទៅតាមកាតព្វកិច្ច គឺត្រូវចំណោយប្រហែល ៣ លានដុល្លារអាម៉េរិក/ខែ។ ម្យ៉ាងទៀត យោងតាមសម្ដេច «មួយរយៈចុងក្រោយនេះ ករណីឆ្លងកូវីដ-១៩ នៅ កម្ពុជា មានអត្រាទាប» ដែលនេះអាចឱ្យគេពិចារណាអំពីការដកវិធានការពាក់ម៉ាសនៅក្នុងភូមិសាស្ត្រ និងទីកន្លែងមួយចំនួន។
សម្ដេចបន្ថែមថា តាមគំនិតរបស់លោក ការពាក់ម៉ាសនៅទីសាធារណៈខាងក្រៅអគារ គួរតែទុកឱ្យប្រជាពលរដ្ឋជាអ្នកសម្រេចថា គួរពាក់ ឬមិនគួរពាក់ ចំណែកនៅក្នុងអគារ ការិយាល័យដែលមានម៉ាស៊ីនត្រជាក់ ទីកន្លែងបិទជិត គួរតែមានការតម្រូវឱ្យពាក់ម៉ាស។ ក៏ប៉ុន្តែ សម្ដេចបញ្ជាក់ថានឹងទទួលយកលទ្ធផលនៃការសម្រេចនៅក្នុងកិច្ចប្រជុំល្ងាចនេះរវាងស្ថាប័នពាក់ព័ន្ធ ក្នុងនោះមានក្រសួងសុខាភិបាល និងក្រសួងសេដ្ឋកិច្ច និងហិរញ្ញវត្ថុផងដែរ។
ជាងនេះ ប្រមុខរដ្ឋាភិបាល បានសង្កត់ធ្ងន់ថា អ្វីដែលរដ្ឋាភិបាលចង់បានគឺការចាកវ៉ាក់សាំងដូសជំរុញ ហើយដូសទី ៣ នឹងក្លាយជាកាតព្វកិច្ច។
លិចទូកដឹកជនចំណាកស្រុកនៅសមុទ្ររបស់ ទុយនីស៊ី៖ ជិត ២០ នាក់បាត់បង់ជីវិត
ប្រភពព័ត៌មានពី អាហ្វ្រិកខាងជើង ឱ្យដឹងថា អាជ្ញាធរទុយនីស៊ី កាលពីថ្ងៃទី ២៤ មេសា ប្រកាសថា បានរកឃើញសាកសពរបស់ក្រុមជនចំណាក់ស្រុកចំនួន ១៧ នាក់ បន្ទាប់ពីទូក ៤ គ្រឿង ព្យាយាមឆ្លងកាត់ សមុទ្រមេឌីទែរ៉ាណេ ដើម្បីទៅកាន់ អឺរ៉ុប ត្រូវជួបនឹងគ្រោះថ្នាក់លើសមុទ្រ។
មន្ត្រីតុលាការក្នុងតំបន់ ឱ្យដឹងថា ទូក «បណ្ដោះអាសន្នដែលមានសភាពទ្រុឌទ្រោម» ទាំងនេះ ចេញដំណើរក្នុងថ្ងៃទី ២២ ឬ ២៣ មេសា ពីទីក្រុង Sfax របស់ ទុយនីស៊ី នៅឆ្នេរសមុទ្រមេឌីទែរ៉ាណេ។ សាកសពចំនួន ១៧ នាក់ ត្រូវបានគេស្រង់ឡើងក្នុងដំណាក់កាលដំបូង ប៉ុន្តែតួលេខនេះអាចកើនឡើងបន្តទៀត។
ជនរងគ្រោះដែលបានរួចពីការស្លាប់នៅក្នុងករណីលិចទូកនេះនិយាយថា មនុស្សប្រហែលពី ៣០ ទៅ ៣២ នាក់ ជិតនៅលើទូកនីមួយៗ ហើយភាគច្រើនជាពលរដ្ឋមកពី តំបន់អាហ្វ្រិក ក្បែរ សាហារ៉ា រួមមានពលរដ្ឋរបស់ កូតឌីវ័រ, ម៉ាលី និង សូម៉ាលី។
ប្រទេសទុយនីស៊ី និងប្រទេសលីប៊ី គឺជាទីតាំងចេញដំណើរដ៏ពេញនិយមរបស់ក្រុមជនចំណាកស្រុកដែលមានបំណងទៅកាន់អឺរ៉ុប ពិសេសគឺ អ៊ីតាលី។ ក៏ប៉ុន្តែ មធ្យោបាយធ្វើដំណើររបស់ពួកគេតែងតែជាទូក ឬកប៉ាល់ដែលស្ទើរតែមិនមានលក្ខណៈសម្បត្តិគ្រប់គ្រាន់ដើម្បីឆ្លងកាត់សមុទ្រ។
អង្គការចំណាកស្រុកអន្តរជាតិ (IOM) ឱ្យដឹងថា មានមនុស្សជិត ២,០០០ នាក់ បានលង់ទឹកស្លាប់ ឬបាត់ខ្លួននៅ សមុទ្រមេឌីទែរ៉ាណេ ក្នុងឆ្នាំ ២០២១ ច្រើនជាងឆ្ងាយធៀបនឹង ១,៤០១ នាក់ ក្នុងឆ្នាំ ២០២០។ នេះគឺជាផ្លូវចំណាកស្រុកដែលគ្រោះថ្នាក់បំផុតក្នុងពិភពលោក ប៉ុន្តែ ក្រុមមនុស្សដែលសង្ឃឹមថា នឹងមានជីវភាពល្អប្រសើរនៅពេលទៅដល់ អឺរ៉ុប មានការផ្សេងព្រេងកាន់តែច្រើនឡើង៕
រដ្ឋមន្ត្រីក្រសួងការពារជាតិអាម៉េរិក ជួបពិភាក្សាជាមួយប្រធានាធិបតីអ៊ុយក្រែន
ក្រុមមន្ត្រីរបស់ អ៊ុយក្រែន ប្រកាសថា ប្រធានាធិបតី ហ្សេឡែនស្គី បានជួបពិភាក្សាជាមួយរដ្ឋមន្ត្រីការបរទេស និងរដ្ឋមន្ត្រីការពារជាតិអាម៉េរិក ដែលកំពុងធ្វើទស្សនកិច្ចនៅ ទីក្រុងកៀវ ខណៈដែល រដ្ឋធានីវ៉ាស៊ីងតោន មិនទាន់បញ្ចេញប្រតិកម្ម។
«រដ្ឋមន្ត្រីការបរទេសអាម៉េរិក លោក Antony Blinken និង រដ្ឋមន្ត្រីការពារជាតិ លោក Lloyd Austin កំពុងជួបពិភាក្សាជាមួយប្រធានាធិបតី។ សង្ឃឹមថា ភាគីទាំងពីរនឹងឯកភាពគ្នាលើបញ្ហាបង្កើនជំនួយ» Oleksiy Arestovych ទីប្រឹក្សារបស់ ប្រធានាធិបតីអ៊ុយក្រែន ថ្លែងលើកញ្ចក់ទូរទស្សន៍កាលពីម្សិលមិញ។
មន្ត្រីរបស់ អ៊ុយក្រែន ខាងលើក៏បានអំពាវនាវដល់លោកខាងលិច ផ្ដល់ជំនួយផ្នែកសព្វាវុធបន្ថែមទៀតដល់ប្រទេសនេះ។
លោក Antony Blinken និងលោក Lloyd Austin ប្រធានាធិបតីអ៊ុយក្រែន លោក ហ្សេឡែនស្គី ក្នុងថ្ងៃដដែល ក៏បានបង្ហោះសារមួយនៅលើ Twitter បញ្ជាក់ថា «ប្រជាជនអ៊ុយក្រែន កំពុងសាមគ្គីគ្នា» ហើយទំនាក់ទំនងរវាង អ៊ុយក្រែន-អាម៉េរិក កំពុង «ជិតស្និទ្ធជាងពេលណាៗទាំងអស់»។
សេតវិមាន មិនទាន់បញ្ជាក់អំពីព័ត៌មានខាងលើ ក្នុងពេលដែល ក្រសួងការបរទេសអាម៉េរិក និង មន្ទីរបញ្ចកោណ បដិសេធការស្នើឱ្យធ្វើអធិប្បាយលើរឿងនេះ។
បើសិនជាដំណឹងខាងលើត្រូវបានបញ្ជាក់ថាមានពិត នោះវានឹងក្លាយជាដំណើរទស្សនកិច្ចថ្នាក់ខ្ពស់បំផុតរបស់ក្រុមមន្ត្រីអាម៉េរិក ដែលបានមកកាន់ អ៊ុយក្រែន បន្ទាប់ពី រុស្ស៊ី បានបើកយុទ្ធនាការយោធានៅ អ៊ុយក្រែន កាលពីពីរខែមុន៕
បាតុករឡោមព័ទ្ធគេហដ្ឋានរបស់ នាយករដ្ឋមន្ត្រីស្រីលង្កា
និស្សិតរាប់ពាន់នាក់មកពីសាកលវិទ្យាល័យស្រីលង្កា នាំគ្នាទៅកាន់គេហដ្ឋានរបស់ នាយករដ្ឋមន្ត្រី Mahinda Rajapaksa ស្នើឱ្យលោកចុះចេញពីតំណែង ដោយសារតែវិបត្តិសេដ្ឋកិច្ចកាន់តែមានសភាពធ្ងន់ធ្ងរ។
ហ្វូងបាតុករកាលពីថ្ងៃទី ២៤ មេសា បានព្យាយាមផ្ដួលរំលំរបងការពារជុំវិញតំបន់គេហដ្ឋានរបស់ នាយករដ្ឋមន្ត្រីស្រីលង្កា Mahinda Rajapaksa នៅទីក្រុងកូឡុំបូ បន្ទាប់ពីក្រុមប៉ូលិសបានដំឡើងរបងរាំងខ្ទប់ដងផ្លូវជាច្រើននៅជុំវិញរដ្ឋធានី ដើម្បីរារាំងពួកគេពីការប្រមូលកម្លាំងជាមួយនឹងក្រុមបាតុករនៅក្នុងតំបន់ផ្សេង។
«ពួកលោកអាចរាំងខ្ទប់ផ្លូវ ប៉ុន្តែមិនអាចទប់ស្កាត់ការតស៊ូរបស់ពួកយើង រហូតដល់រដ្ឋាភិបាលទាំងមូលត្រូវចុះចេញពីតំណែង» បាតុករជានិស្សិតម្នាក់និយាយដូច្នេះ។
កម្លាំងដែលត្រូវប្រឈមនឹងហ្វូងបាតុករគឺ ក្រុមប៉ូលិសប្រឆាំងកុបកម្មដែលមានខែលការពារ មានតួនាទីទប់ស្កាត់បាតុករចូលទៅក្បែរផ្ទះរបស់ប្រធានាធិបតី។ បាតុករមួយចំនួនកាន់បដាដែលសរសេរថា «ចុះចេញពីតំណែងភ្លាមទៅ Gota»។ Gota គឺជារហ័សនាមរបស់ប្រធានាធិបតី Gotabaya Rajapaksa ដែលជាប្អូនប្រុសរបស់នាយករដ្ឋមន្ត្រី Mahinda។
ប៉ូលិសបានឱ្យដឹងថា លោក Mahinda មិនស្ថិតនៅក្នុងផ្ទះនាពេលនោះ ហើយក្រុមបាតុករក៏បានរំសាយដោយសន្តិវិធី។
ក្នុងរយៈពេលជាង ២ សប្ដាហ៍មកនេះ បាតុកររាប់ពាន់នាក់នាំគ្នាបោះជំរំប្រចាំថ្ងៃនៅខាងក្រៅការិយាល័យប្រធានាធិបតី Gotabaya Rajapaksa ស្នើឱ្យលោក និងបងប្រុស ចុះចេញពីតំណែង។ នៅក្នុងបាតុកម្មនានានៅទូទាំងប្រទេស គេឃើញមានហ្វូងបាតុករព្យាយាមសម្រុកចូលផ្ទះ និងកន្លែងធ្វើការរបស់ក្រុមមេដឹកនាំរដ្ឋាភិបាល។
មនុស្សម្នាក់ត្រូវបានបាញ់សម្លាប់នៅពេលប៉ូលិសផ្ទុះអាវុធរាំងខ្ទប់ផ្លូវក្នុងទីរួមស្រុកភាគកណ្ដាល Rambukkana កាលពីសប្ដាហ៍កន្លែង ដែលនេះគឺជាករណីស្លាប់ដំបូង រាប់ចាប់តាំងពីបាតុកម្មបានផ្ទុះឡើង។
ស្ថានភាពដាច់ភ្លើងក្នុងរយៈពេលយូរ អតិផរណាកើនឡើងខ្ពស់ និងបញ្ហាខ្វះឥន្ធនៈធ្ងន់ធ្ងរ រួមនឹងបញ្ហាជាច្រើនផ្សេងទៀត ជាកត្តាធ្វើឱ្យប្រជាជនរបស់ ប្រទេសស្រីលង្កា ខកចិត្ត។
កាលពីថ្ងៃទី ១២ មេសា ស្រីលង្កា បានប្រកាសក្ស័យធន។ សេដ្ឋកិច្ចត្រូវដួលរលំ បន្ទាប់ពីបាត់បង់ចំណូលពីបរទេស និងចំណួលពីវិស័យទេសចរណ៍។
រដ្ឋមន្ត្រីហិរញ្ញវត្ថុរបស់ ស្រីលង្កា Ali Sabry កំពុងស្ថិតនៅ រដ្ឋធានីវ៉ាស៊ីងតោន ដើម្បីពិភាក្សាអំពីកញ្ចប់ជំនួយរបស់ មូលនិធិរូបិយវត្ថុអន្តរជាតិ។ លោកបានព្រមានថា ស្ថានភាពសេដ្ឋកិច្ចរបស់ ស្រីលង្កា អាចនឹងអាក្រក់ជាងបច្ចុប្បន្ន៕
អគ្គិភ័យមួយកើតឡើងនៅក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ
នៅវេលាម៉ោងជាង ១០ ព្រឹក ថ្ងៃទី ២៣ មេសា ២០២២ មានករណីអគ្គិភ័យឆាបឆេះផ្ទះពលរដ្ឋមួយកន្លែងដែលស្ថិតតាមបណ្ដោយផ្លូវលេខ ៦៣ កែងផ្លូវលេខ ២៧៨ ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។
កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍ ក្រោយពីទទួលបានដំណឹងនេះភ្លាម។
សមត្ថកិច្ចត្រូវវាយទម្លុះបង្អួចដើម្បីអាចចូលពន្លត់អគ្គិភ័យនៅខាងក្នុងផ្ទះ។ ប្រភពព័ត៌មានឱ្យដឹងថា ផ្ទះរបស់ប្រជាពលរដ្ឋដែលត្រូវភ្លើងឆេះនេះ គឺជាកន្លែងកាត់ដែរសម្លៀកបំពាក់ដែលមានឈ្មោះថា បញ្ញាម៉ូតកាត់ដេរ។
រដូវក្ដៅគឺជាពេលវេលាដែលតែងកើតមានគ្រោះអគ្គិភ័យជាញឹកញាប់ ដូច្នេះសូមប្រជាពលរដ្ឋទាំងអស់ ប្រុងប្រយ័ត្នឱ្យបានខ្ពស់ ពិសេសគឺភ្លើងចង្ក្រាន ភ្លើងធូបទៀន និងខ្សែភ្លើងដែលមានសភាពចាស់។ល។
កូវីដ-១៩! កម្ពុជា បានរកឃើញអ្នកឆ្លងថ្មីជិត ៣០ នាក់ទៀត ក្នុងអំឡុងថ្ងៃទី ២២ ខែមេសា ២០២២
ក្នុងអំឡុង ២៤ ម៉ោងនៃថ្ងៃទី ២២ មេសា កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ២៨ នាក់ ដែលសុទ្ធតែជាប្រភេទ អូមីក្រុង និងសុទ្ធតែជាករណីឆ្លងក្នុងសហគមន៍។
ហេតុអ្វី Tesla មានតម្លៃមូលធនទីផ្សារឡើងដល់ជាង ១ ទ្រីលានដុល្លារ គ្រាដែលចំនួនរថយន្តបានលក់ចេញមិនដល់ ១ លានគ្រឿង/ឆ្នាំ?
បច្ចុប្បន្ន មូលធនទីផ្សារ (market capitalization) របស់ក្រុមហ៊ុនផលិតរថយន្តអគ្គិសនីអាម៉េរិក Tesla មានតម្លៃរហូតដល់ជាង ១លានលាន (១,០០០,០០០,០០០,០០០ ឬ ១ ទ្រីលាន) ដុល្លារអាម៉េរិក ខ្ពស់ជាង ៣ ដង ធៀបនឹងក្រុមហ៊ុន Toyota។
បើទោះជាមានការប្រែប្រួលឡើង-ចុះច្រើន នាពេលថ្មីៗនេះ ប៉ុន្តែ តម្លៃភាគហ៊ុនរបស់ Tesla បានលោតឡើងខ្ពស់ ក្នុងល្បឿនយ៉ាងលឿនពេញមួយឆ្នាំ ២០២១ និងក្លាយជាអ្នកផលិតរថយន្តមានតម្លៃខ្ពស់ជាងគេបង្អស់ក្នុងពិភពលោក ជាមួយនឹងតម្លៃមូលធនទីផ្សារឡើងដល់ជាង ១ ទ្រីលានដុល្លារអាម៉េរិក។ តួលេខនេះខ្ពស់ជាងជិត ៣ ដង ធៀបនឹងតម្លៃមូលធនទីផ្សាររបស់ក្រុមហ៊ុនផលិតរថយន្ត Toyota និងក្ដោបក្ដោបចំណែកទីផ្សាររហូតដល់ ៣៥% ធៀបនឹងតម្លៃមូលធនទីផ្សារសរុបរបស់បណ្ដាក្រុមហ៊ុនផលិតរថយន្តផ្សេងៗនៅទូទាំងសកលលោក។
ភាគហ៊ុនរបស់ Tesla គួរតែមានតម្លៃដូច្នេះ ឬអត់? ជាទូទៅ ករណីដែលតម្លៃភាគហ៊ុនកើនឡើងត្រង់ទៅលើដូច្នេះ គឺតែងតែមានអត្រាកំណើនខ្ពស់ខ្លាំងជាច្រើនឆ្នាំ រួមជាមួយនឹងអត្រាប្រាក់ចំណេញលើរថយន្តនីមួយៗ ខ្ពស់ជាងឆ្ងាយធៀបនឹងក្រុមហ៊ុនដទៃ។ ក៏ប៉ុន្តែ ចំពោះ Tesla វិញ អត្រា P/E (តម្លៃភាគហ៊ុន/ចំណូល) កំពុងស្ថិតនៅក្នុងកម្រិត ២០៥.៨ នេះបើតាមការគណនាប៉ាន់ស្មានស្ដីពីលទ្ធផលជំនួញឆ្នាំ ២០២២។ ចំណែក Toyota ដែលមានលទ្ធផលជំនួញល្អបំផុតក្នុងចំណោមក្រុមហ៊ុនផលិតរថយន្តបុរាណ មានអត្រា P/E ត្រឹមតែ ៩.៩៨ ប៉ុណ្ណោះ។
កាលពីឆ្នាំ ២០២១ ក្នុងកម្មវិធី Fast Money របស់ CNBC Adam Jonas ដែលជាអ្នកវិភាគ និងជាភ្ញៀវអញ្ជើញមកពី Morgan Stanley បានបង្ហាញអំពីការយល់ឃើញរបស់ខ្លួនចំពោះភាគហ៊ុន Tesla ដែលការបកស្រាយរបស់គាត់ ពិតជាធ្វើឱ្យយើង «ភ្លឺភ្នែក»។ អ្នកវិភាគរូបនេះនិយាយថា កម្រិតខ្ពស់នៃតម្លៃរបស់ Tesla មិនស្ថិតនៅលើលទ្ធផលជំនួញនាបច្ចុប្បន្ននោះទេ ប៉ុន្តែវាស្ថិតនៅត្រង់ការរំពឹងទុករបស់ទីផ្សារ ស្ដីពីអនាគតធំធេងរបស់ក្រុមហ៊ុននេះ ក្នុងរយៈពេលច្រើនឆ្នាំខាងមុខ។
Jonas បានព្យាករថា តម្លៃភាគហ៊ុនរបស់ Tesla ក្នុងឆ្នាំ ២០៣០ នឹងឡើងដល់ ១,០១៥ ដុល្លារ/ហ៊ុន គ្រាដែល Tesla អាចនឹងផលិតរថយន្តអគ្គិសនីបាន ៥.៨ លានគ្រឿងក្នុងឆ្នាំនោះ។
បច្ចុប្បន្ន បើទោះបរិមាណរថយន្តរបស់ Tesla មិនទាន់ឡើងដល់កម្រិតដែល Jonas បានព្យាករក៏ពិតមែន ប៉ុន្តែ តម្លៃភាគហ៊ុនរបស់ Tesla បានឡើងដល់ ១,០០៨.៧ ដុល្លារ/ហ៊ុនរួចទៅហើយ៕
បារាំង ដឹកជញ្ជូនអាវុធធុនធ្ងន់ ឱ្យ អ៊ុយក្រែន ដើម្បីទប់ទល់នឹង រុស្ស៊ី
ប្រធានាធិបតី Macron ប្រកាសថា បារាំង ដឹកជញ្ជូនកាំភ្លើងធំ CAESAR និងមីស៊ីលប្រឆាំងរថក្រោះ ឱ្យ អ៊ុយក្រែន ប៉ុន្តែមិនបានបង្ហើបឱ្យដឹងអំពីចំនួនអាវុធនេះទេ។
ប្រធានាធិបតីបារាំង លោក Emmanuel Macron កាលពីថ្ងៃទី ២២ មេសា ថ្លែងថា បារាំង «កំពុងផ្គត់ផ្គង់ឧបករណ៍សំខាន់ៗ តាំងពីមីស៊ីលប្រឆាំងរថក្រោះ MILAN ដល់កាំភ្លើងធំបំពាក់លើរថយន្ត CAESAR» ឱ្យ អ៊ុយក្រែន។
«ខ្ញុំគិតថា យើងត្រូវតែបន្តដើរលើផ្លូវនេះ ប៉ុន្តែ ត្រូវដឹងអំពីបន្ទាត់ក្រហមដែលថា យើងនឹងមិនក្លាយជាភាគីមួយនៃសង្គ្រាម» លោក Macron បានប្រាប់សារព័ត៌មាន Ouest-France ដូច្នេះ។
កាំភ្លើងធំបំពាក់លើរថយន្ត CAESAR លោក Macron បន្ថែមថា ទាហានអ៊ុយក្រែន ប្រមាណ ៤០ នាក់ នឹងបានហ្វឹកហាត់ក្នុងការគ្រប់គ្រងអាវុធថ្មីនេះនៅ ប្រទេសបារាំង ចាប់ពីថ្ងៃទី ២៣ មេសា។ ចំណែក រដ្ឋមន្ត្រីការពារជាតិបារាំង Florence Parly ក្រោយមកក៏បានបញ្ជាក់ថា ប្រទេសនេះនឹងផ្ទេរ «កាំភ្លើងធំ CAESAR មួយចំនួន រួមនឹងគ្រាប់កាំភ្លើងរាប់ពាន់គ្រាប់» ឱ្យ អ៊ុយក្រែន។
មីស៊ីលប្រឆាំងរថក្រោះ Milan វិមានអេលីស៊ី បានបដិសេធការបង្ហើបឱ្យដឹងអំពីចំនួនអាវុធដែលនឹងត្រូវផ្ទេរឱ្យ អ៊ុយក្រែន ព្រោះមិនចង់ធ្វើឱ្យបែកការណ៍ ប៉ុន្តែ បានប្រាប់ថា មីស៊ីលប្រឆាំងរថក្រោះ MILAN ត្រូវបានបញ្ជូនទៅកាន់អ៊ុយក្រែន រួចហើយ ចំណែកកាំភ្លើងធំ នឹងត្រូវបានដឹកទៅប្រគល់ឱ្យ ទីក្រុងកៀវ នៅប៉ុន្មានថ្ងៃខាងមុខ។