សឿន សំណាង - La Reine Media

អគ្គិភ័យកំពុងឆាបឆេះផ្ទះមួយកន្លែង នៅ ខណ្ឌព្រែកព្នៅ រាជធានីភ្នំពេញ

នាវេលាម៉ោង ១០ និង ៣៥ នាទីព្រឹក ថ្ងៃទី ២១ ខែមិថុនា ឆ្នាំ ២០២២ នេះ មានករណីអគ្គិភ័យមួយកំពុងឆាបឆេះផ្ទះរបស់ប្រជាពលរដ្ឋ នៅក្នុង ខណ្ឌព្រែកព្នៅ រាជធានីភ្នំពេញ។

កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍ ក្រោយពីទទួលបានដំណឹងខាងលើ។

ករណីអគ្គិភ័យដែលកើតឡើងនៅក្នុងភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ នេះ បានបណ្ដាលឱ្យផ្ទះឈើប្រហែល ៤ ខ្នងដែលសង់នៅលើបឹងកំប្លោក ត្រូវបានអគ្គិភ័យឆាបឆេះអស់គ្មានសល់ ប៉ុន្តែ កងកម្លាំងពន្លត់អគ្គិភ័យបានគ្រប់គ្រងទាំងស្រុងហើយ។

នេះគឺជាករណីគ្រោះអគ្គិភ័យទីមួយហើយនៅ រាជធានីភ្នំពេញ សម្រាប់ថ្ងៃទី ២១ មិថុនា ២០២២។

….

June 21, 2022

ប្រទេសកូឡុំប៊ី មានអនុប្រធានាធិបតីជាស្ត្រីស្បែកខ្មៅជាលើកដំបូងក្នុងប្រវត្តិសាស្ត្រ

ជាលើកដំបូងក្នុងប្រវត្តិសាស្ត្រនៃប្រទេសកូឡុំប៊ី ដែលមានអនុប្រធានាធិបតីជាស្ត្រីភេទស្បែកខ្មៅ បន្ទាប់ពីលោកស្រី Francia Marquez សហការគ្នាជាមួយលោក Gustavo Petro ដែលជាតំណាងឱ្យសម្ព័ន្ធមិត្ត Pacto Historico យកឈ្នះនៅក្នុងការបោះឆ្នោតកាលពីថ្ងៃទី ១៩ មិថុនា ដោយទទួលបានសំឡេងគាំទ្រ ៥០.៤%។

លោកស្រី Marquez គឺជាសកម្មជនបរិស្ថានដ៏ល្បីឈ្មោះ ពិសេសគឺសកម្មភាពប្រឆាំងនឹងការរុករករ៉ែមាសនៅឯស្រុកកំណើតក្នុងខេត្ត Cauca នៅភាគនិរតីប្រទេសកូឡុំប៊ី។ លោកស្រីទទួលបានពានរង្វាន់ Goldman ស្ដីពីបរិស្ថានកាលពីឆ្នាំ ២០១៨។

ថ្លែងការណ៍ក្រោយពីទទួលបានជោគជ័យក្នុងការបោះឆ្នោតកន្លងទៅ លោកស្រី Marquez អះអាងថា ក្រោយរយៈពេល ២១៤ ឆ្នាំ ប្រទេសកូឡុំប៊ី ក៏មានរដ្ឋាភិបាលមួយរបស់ប្រជាជន ជារដ្ឋាភិបាលសម្រាប់ជួយដល់ប្រជាជនក្រីក្រ នៅក្នុងតំបន់ អាម៉េរិកខាងត្បូង នេះ។ ក្រៅពីមានតួនាទីជាអនុប្រធានាធិបតី តាមគម្រោង លោកស្រី Marquez ក៏នឹងត្រូវដឹកនាំក្រសួងថ្មីមួយទាក់ទិននឹងសមភាពយេនឌ័រ ដើម្បីស្ដារផលប្រយោជន៍សម្រាប់ស្ត្រី ក៏ដូចជាជួយដល់ក្រុមពលរដ្ឋក្រីក្រក្នុងការប្រើប្រាស់សេវាសុខាភិបាល និងអប់រំ។

ក្រៅពីលទ្ធផលនៃការរាប់សន្លឹកឆ្នោតត្រូវបានប្រកាសជាផ្លូវការ មេដឹកនាំប្រទេសមួយចំនួនក៏បានចាប់ផ្ដើមផ្ញើរសារចូលរួមអបអរសាទរដល់លោក Petro និងលោកស្រី Marquez ផងដែរ។

June 21, 2022

អាកាសយានដ្ឋានអន្តរជាតិចំនួន ៣ ទៀត នៅ ជប៉ុន ត្រូវបានបើកដំណើរការឡើងវិញ

កាលពីថ្ងៃទី ២០ មិថុនា នាយករដ្ឋមន្ត្រីជប៉ុន Kishida Fumio បានឱ្យដឹងថា ប្រទេសនេះនឹងបើកទ្វារសម្រាប់ជើងហោះហើរអន្តរជាតិចំពោះអាកាសយានដ្ឋានចំនួន ៣ ទៀតចាប់ពីខែកក្កដាខាងមុខ ក្រោយពីវិធានការទប់ស្កាត់កូវីដ-១៩ ត្រូវបានបន្ធូរបន្ថយថែមមួយកម្រិតទៀត។

យោងតាមនាយករដ្ឋមន្ត្រី លោក Kishida អាកាសយានដ្ឋានចំនួន ៣ ខាងលើនេះ រួមមាន Sendai, Hiroshima និង Takamatsu។ មុននោះ រដ្ឋាភិបាលជប៉ុន ក៏បានសម្រេចចិត្តអនុញ្ញាតឱ្យអាកាសយានដ្ឋានចំនួន ២ គឺ Naha និង New Chitose បើទ្វារទទួលជើងហោះហើរទៅ-មកអន្តរជាតិ ចាប់ពីចុងខែមិថុនានេះ ដើម្បីទាក់ទាញទេសចរទៅកាន់តំបន់ Okinawa និង Hokkaido។

ជប៉ុន បានបើកទ្វារទទួលភ្ញៀវបរទេសឡើងវិញចាប់ពីថ្ងៃទី ១០ មិថុនាកន្លងទៅ ប៉ុន្តែ អនុញ្ញាតឱ្យទទួលអ្នកដំណើរពីបរទេសត្រឹមតែ ២០,០០០ នាក់ប៉ុណ្ណោះក្នុងមួយថ្ងៃៗ ក្នុងនោះរាប់ទាំងពលរដ្ឋជប៉ុន ផងដែរ។

ជប៉ុន បច្ចុប្បន្នបែងចែកបណ្ដាប្រទេស និងតំបន់ជា ៣ ក្រុម អាស្រ័យទៅតាមស្ថានភាពជំងឺរាតត្បាត ក្នុងនោះ ភាគច្រើនត្រូវបានចាត់ចូលក្នុងក្រុមពណ៌ទឹកសមុទ្រ ដែលជាកម្រិតស្រាលបំផុត។

អ្នកដំណើរដែលមកពីបណ្ដាប្រទេស និងតំបន់ដែលស្ថិតក្នុងក្រុមពណ៌ទឹកសមុទ្រ នឹងត្រូវបង្ហាញវិញ្ញាបនបត្របញ្ជាក់ថា អវិជ្ជមាននឹងកូវីដ-១៩ មុនពេលចេញដំណើរ ប៉ុន្តែ នឹងត្រូវបានលើកលែងការធ្វើចត្តាឡីស័ក និងការធ្វើតេស្តនៅពេលមកដល់ ប្រទេសជប៉ុន៕

June 21, 2022

សហភាពអឺរ៉ុប បន្តដាក់ទណ្ឌកម្មលើ រុស្ស៊ី ព្រោះតែបានរឹបអូសយកឧបទ្វីប Krym និង Sevastopol របស់ អ៊ុយក្រែន

កាលពីថ្ងៃទី ២០ មិថុនា ឆ្នាំ ២០២២ ក្រុមប្រឹក្សាសហភាពអឺរ៉ុប បានសម្រេចចិត្តបន្តអនុវត្តវិធានការដាក់ទណ្ឌកម្មចំពោះ រុស្ស៊ី រហូតដល់ថ្ងៃទី ២៣ មិថុនា ២០២៣ ទាក់ទិននឹងរឿង រុស្ស៊ី រឹបអូស និងបញ្ចូលឧបទ្វីប Krym (គ្រីមៀ/Crimea) និងទីក្រុង Sevastopol ទៅក្នុង ទឹកដីរុស្ស៊ី។

កាលពីខែមិថុនា ២០១៤ ក្រុមប្រឹក្សាសហភាពអឺរ៉ុប បានអនុម័តវិធានការដាក់ទណ្ឌកម្ម ដើម្បីឆ្លើយតបនឹងរឿង រុស្ស៊ី រឹបអូសយក គ្រីមៀ និងទីក្រុង Sevastopol។ ចាប់តាំងពីពេលនោះមក ទណ្ឌកម្មទាក់ទងនឹងបញ្ហានេះក៏ត្រូវបានពន្យារសុពលភាពជាបន្តបន្ទាប់។

ទណ្ឌកម្មទាក់ទិននឹងបញ្ហាខាងលើរួមមាន ការហាមឃាត់លើការនាំផលិតផលពី ឧបទ្វីគ្រីមៀ និង Sevastopol ចូលមក សហភាពអឺរ៉ុប (EU), ហាមការវិនិយោគលើហេដ្ឋារចនាសម្ព័ន្ធ សេវាកម្មទេសចរណ៍ នៅ គ្រីមៀ និង Sevastopol។ EU ក៏ហាមនាំចេញទំនិញ និងផលិតផលបច្ចេកវិទ្យាទៅកាន់ គ្រីមៀ ផងដែរ។

June 21, 2022

ទីតាំងខួងយកប្រេងរបស់ រុស្ស៊ី នៅ Crimea រងការវាយប្រហារ ៖ ច្រើននាក់រងរបួស

កាលពីថ្ងៃទី ២០ មិថុនា មានការវាយប្រហារមួយទៅលើទីតាំងខួងយករ៉ែរបស់ រុស្ស៊ី នៅលើសមុទ្រនៃឧបទ្វីប Crimea ក្នុងតំបន់សមុទ្រខ្មៅ បណ្ដាលឱ្យមនុស្ស ៣ នាក់ ត្រូវរងរបួស។

សារព័ត៌មាន RT របស់ រុស្ស៊ី ដកស្រង់សម្ដីរបស់មេដឹកនាំតំបន់ Crimea បានឱ្យដឹងថា ការវាយប្រហារដែលសង្ស័យថាធ្វើឡើងដោយកងកម្លាំងរបស់ អ៊ុយក្រែន សំដៅលើបណ្ដុំនៃគ្រឿងចក្រខួងយករ៉ែនៅក្បែរឆ្នេរ Crimea ក្នុងសមុទ្រខ្មៅ ត្រូវបានធ្វើឡើងនៅព្រឹកព្រលឹមនៃថ្ងៃទី ២០ មិថុនា (ម៉ោងក្នុងស្រុក) បណ្ដាលឱ្យមនុស្ស ៣ នាក់រងរបួស។

មេដឹកនាំ Crimea លោក Sergey Aksyonov មិនបានបង្ហើបឱ្យដឹងអំពីទីតាំងជាក់លាក់ដែលបានរងការវាយប្រហារ ប៉ុន្តែ និយាយថា វាជាទ្រព្យសម្បត្តិរបស់ Chernomorneftegaz ដែលជាក្រុមហ៊ុនអភិវឌ្ឍអណ្ដូងរ៉ែប្រេង និងឧស្ម័ននៅលើសមុទ្រ។ ក្រុមហ៊ុនថាមពល Naftogaz របស់ អ៊ុយក្រែន កំពុងទាមទារកម្មសិទ្ធិលើក្រុមហ៊ុនខាងលើចាប់តាំងពីឆ្នាំ ២០១៤ ជាពេលដែលក្រុមហ៊ុន Chernomorneftegaz ត្រូវបានដាក់ចូលជាសម្បត្តិរដ្ឋ ក្រោយពេល រុស្ស៊ី បានរឹបអូសយកឧបទ្វីប Crimea ពី អ៊ុយក្រែន។

លោក Aksyonov ឱ្យដឹងថា មីស៊ីលចំនួន ៣ គ្រាប់ បានបាញ់ចាំប្រព័ន្ធខួងចំនួន ។ ក្នុងពេលមានការវាយប្រហារ ទីតាំងទាំងនេះមានមនុស្ស ១០៩ នាក់ កំពុងធ្វើការ។ ការឈ្លៀសកម្មករចេញពីកន្លែងកើតហេតុត្រូវបានធ្វើឡើងជាបន្ទាន់។

តំណាងរបស់ឧបទ្វីប Crimea នៅ សភារុស្ស៊ី លោកស្រី Olga Kovitidi និយាយថា ទីតាំងដែលបានរងការវាយប្រហារនេះ មានចម្ងាយពីកំពង់ផែ Odessa របស់ អ៊ុយក្រែន ប្រហែល ៧១ គីឡូម៉ែត្រ។

June 21, 2022

អគ្គិភ័យកំពុងឆាបឆេះផ្ទះនៅលើផ្លូវ ៣៦៩ សង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ

នៅវេលាម៉ោងប្រហែល ៤ កន្លះល្ងាចនេះ មានករណីអគ្គិភ័យកំពុងឆាបឆេះផ្ទះចំណុចផ្លូវ ៣៦៩ សង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ។

ក្រោយពីទទួលបានដំណឹងនេះភ្លាម កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍បន្ទាន់។

នេះបើយោងតាមព័ត៌មានបឋមនៃ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ។

June 20, 2022

សញ្ញាមួយចំនួនដែលអាចបង្ហាញថា មនុស្សម្នាក់កើតមកគឺដើម្បីជោគជ័យ និងក្លាយជាអ្នកមាន

«ក្នុងចំណោមសញ្ញាទាំងឡាយខាងក្រោម តើលោក អ្នកមានប៉ុន្មានប្រការ?»

១-មនុស្សម្នាក់ដែលមានរូបកាយទាក់ទាញ

សាស្ត្រាចារ្យផ្នែកសេដ្ឋកិច្ចមួយរូបនៅសាកលវិទ្យាល័យ Texas បានរកឃើញថា អ្នកដែលមានរូបរាងទាក់ទាញ ភាគច្រើនមានសមត្ថភាពរកប្រាក់បានច្រើនជាងពី ៣% ទៅ ៤% ធៀបនឹងមនុស្សដែលមានរូបរាងទាក់ទាញក្រោមកម្រិតមធ្យម។

២-មានឈាមជាអ្នករកស៊ីតាំងពីតូច

សេដ្ឋី និងមហាសេដ្ឋីដែលរកស៊ីមានបានពីបាតដៃទទេភាគច្រើននៅលើពិភពលោក សុទ្ធតែមានចំណុចរួមដ៏ពេញនិយមមួយនោះគឺ ចាប់ផ្ដើមរកប្រាក់តាំងតែពីតូច ក្នុងនោះមានទាំង Warren Buffett និង Mark Cuban ជាដើម។

៣-មានទំនាក់ទំនងទូលំទូលាយ

ការស្រាវជ្រាវមួយបង្ហាញថា បើសិនមានមិត្តភក្ដិច្រើននៅពេលរៀននៅសាលាមធ្យមសិក្សា មហាវិទ្យាល័យ និងនៅកន្លែងធ្វើការ ឬដៃគូសហការកន្លែងធ្វើការ បុគ្គលនោះនឹងរកបានប្រាក់ច្រើននាពេលអនាគត ដោយសារតែឱកាសដែលរកបានពីទំនាក់ទំនងខាងលើ។

៤-សេពគប់អ្នកដែលពូកែជាងខ្លួន

បើសិនចំណាយពេលច្រើនទៅលើមនុស្សដែលនាំមកនូវថាមពលអវិជ្ជមាន ឬមិនមានគោលដៅឆ្ពោះទៅមុខ នោះអ្នកនឹងមិនអាចរីកចម្រើន តែថែមទាំងដើរថយក្រោយទៀតផង។ ប៉ុន្តែ បើសេពគប់បុគ្គលដែលមានចំណេះដឹង និងមនុស្សដែលពូកែជាងខ្លួន នោះយើងនឹងជោគជ័យ ដោយសារតែបានរៀនសូត្រនូវបទពិសោធន៍ដ៏មានតម្លៃពីពួកគេ។

៥-ចេះផឹកស្រាបៀ ប៉ុន្តែមិនជក់បារី

យោងតាមការសិក្សាស្រាវជ្រាវមួយកាលពីឆ្នាំ ២០០៦ បុរសដែលចេះផឹកស្រាបៀ អាចរកប្រាក់បានច្រើនជាង ២១% ធៀបនឹងបុគ្គលដែលតមស្រា។ មូលហេតុគឺដោយសារថា វាអាចជួយបង្កើនទំនាក់ទំនងក្នុងសង្គម។ ការស្រាវជ្រាវមួយផ្សេងទៀតនិយាយថា អ្នកដែលមិនជក់បារី តែងតែមានទ្រព្យច្រើនជាង ៥០% ធៀបនឹងអ្នកដែលជក់បារីតិចតួច និងច្រើនជាងទ្វេដង ធៀបនឹងអ្នកញៀននឹងថ្នាំជក់។

៦-មិនធ្លាប់ ឬមិនទាន់មានការលែងលះ

ការសិក្សាស្រាវជ្រាវមួយបានឱ្យដឹងថា ការលែងលះអាចធ្វើឱ្យទ្រព្យសម្បត្តិរបស់មនុស្សម្នាក់ថយចុះប្រហែល ៧៧% ធៀបនឹងបុគ្គលដែលនៅលីវ។ ចំណែកការរៀបការវិញ អាចមានលទ្ធភាពបង្កើនទ្រព្យឡើងច្រើនទ្វេដង។

៧-តែងតែប្រឹងប្រែងដើម្បីរីកចម្រើន

សេដ្ឋី និងមហាសេដ្ឋីដែលរកស៊ីមានបានពីបាតដៃទទេជាច្រើនរូប បានឱ្យដឹងថា ពួកគាត់គឺជាប្រភេទមនុស្សដែលមិនចេះពេញចិត្តនឹងលទ្ធផលដែលខ្លួនធ្វើបាន។ ជំនួសឱ្យការត្រេកអរនៅពេលរកបាន ១ លានដុល្លារ ពួកគាត់បែរជារកវិធីដើម្បីរកឱ្យបានច្រើនជាងនេះ។

៨-កំណត់គោលដៅច្បាស់លាស់

ការរកប្រាក់បានរាប់លាន ឬរាប់ពាន់ដុល្លារ មិនមែនជារឿងចៃដន់ឡើយ។ អ្នកមានតែងតែចំណាយពេលច្រើនដើម្បីរិះគិតដើម្បីកំណត់គោលដៅយូរអង្វែង ជាក់លាក់របស់ពួកគេ សម្រាប់អនុវត្តតាម។

៩-មិនខ្លាចបរាជ័យ

បុគ្គលជោគជ័យគឺជាមនុស្សដែលធ្លាប់បានឆ្លងកាត់ការបដិសេធ ភាពបរាជ័យ និងភាពភ័យព្រួយ មុននឹងបានជោគជ័យ។ ដូច្នេះ ប្រការដែលពួកគេយកចិត្តទុកដាក់បំផុតគឺ ការដាក់ថាមពលទៅក្នុងបច្ចុប្បន្នកាល និងអនាគតកាល៕

June 20, 2022

ក្រុមហ៊ុន RMA Cambodia បានប្រារព្ធពិធី «ប្រគល់រថយន្ត ហ្វដ ចំនួន ១គ្រឿង និងដាក់ឲ្យដំណើរការមជ្ឈមណ្ឌលបណ្តុះបណ្តាលបច្ចេកទេសរថយន្ត ហ្វដ-ធី អេស អាយ» នៅវិទ្យាស្ថានតេជោសែន សាធារណការ និងដឹកជញ្ជូន (TSI)

[ភ្នំពេញ – ថ្ងៃទី ១៧ ខែមិថុនា ឆ្នាំ ២០២២]-ក្រុមហ៊ុន អ អិម អេ (ខេមបូឌា) (RMA Cambodia) បានធ្វើការប្រារព្ធពិធី “ប្រគល់រថយន្ត ហ្វដ ចំនួន ១គ្រឿង និងដាក់ឲ្យដំណើរការមជ្ឈមណ្ឌលបណ្តុះបណ្តាលបច្ចេកទេសរថយន្ត ហ្វដ-ធី អេស អាយ” ជូនដល់វិទ្យាស្ថានតេជោសែន សាធារណការ និងដឹកជញ្ជូន ក្រោមអធិបតីភាពដ៏ខ្ពង់ខ្ពស់របស់ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន ឯកឧត្តម ហឿន សំនៀង នាយកវិទ្យាស្ថានតេជោសែនសាធារណការ និងដឹកជញ្ជូន (TSI) លោក Benjamin V. Wohlauer ភារធារីនៃស្ថានទូតអាមេរិកប្រចាំព្រះរាជាណាចក្រកម្ពុជា លោកស្រី Dianne Craig អគ្គនាយិកាគ្រប់គ្រងក្រុមទីផ្សារអន្តរជាតិនៃក្រុមហ៊ុន Ford Motor Company លោកស្រី Yukontorn Wisadkosin អគ្គនាយិកាគ្រប់គ្រងទីផ្សារអាស៊ាននៃក្រុមហ៊ុន Ford Motor Company លោក Kevin Whitcraft អគ្គនាយកនៃក្រុមហ៊ុន អ អិម អេ (គ្រុប) លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងគណៈគ្រប់គ្រង រួមទាំងបុគ្គលិកនៃក្រុមហ៊ុន អ អិម អេ (ខេមបូឌា) និង Ford Motor Company។

មជ្ឈមណ្ឌលបណ្តុះបណ្តាលបច្ចេកទេសរថយន្ត ហ្វដ-ធី អេស អាយ ជាមជ្ឈមណ្ឌលបណ្តុះបណ្តាលជំនាញបច្ចេកទេសជុសជុល និងថែទាំរថយន្ត Ford ដែលត្រូវបានបង្កើតឡើងសម្រាប់ប្រើប្រាស់ក្នុងការបណ្តុះបណ្តាលវិជ្ជាជីវៈបច្ចេកទេសរថយន្តក្នុងវិទ្យាស្ថានតេជោសែន សាធារណការ និងដឹកជញ្ជូន (TSI)។

ក្រុមហ៊ុន អ អិម អេ បានធ្វើការឧបត្ថម្ភ និងគាំទ្រវិទ្យាស្ថានតេជោសែន សាធារណការ និងដឹកជញ្ជូនក្នុងការបង្កើតមជ្ឈមណ្ឌលបណ្តុះបណ្តាលបច្ចេកទេសរថយន្ត ហ្វដ-ធី អេស អាយ នេះឡើង ដោយធ្វើការជួសជុល និងកែលំអររោងជាងទាំងមូល ព្រមទាំងបំពាក់នូវគ្រឿងបរិក្ខារសម្រាប់សិក្សា និងគ្រឿងតុបតែងលំអរ រថយន្ត ហ្វដ ១គ្រឿង និងបង្កើតកម្មវិធីបណ្ដុះបណ្ដាលជំនាញបច្ចេកទេសនានា សម្រាប់ផ្ដល់ឱកាសដល់សិស្ស និស្សិតសិក្សារៀនសូត្រ ហ្វឹកហាត់ការងារដោយអនុវត្ដន៍ផ្ទាល់ជាមួយអ្នកជំនាញបច្ចេកទេស និងគ្រូបង្គោលរបស់ក្រុមហ៊ុន អ អិម អេ (ខេមបូឌា) តាមរយៈកិច្ចសហប្រតិបតិ្តការរវាងក្រុមហ៊ុន អ អិម អេ (ខេមបូឌា) និងវិទ្យាស្ថានតេជោសែន សាធារណការ និងដឹកជញ្ជូន។

ឆ្លៀតក្នុងឱកាសនេះដែរ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ ជារៀងរាល់ឆ្នាំ ក្រុមហ៊ុន អ អិម អេ (ខេមបូឌា) បានចំណាយទឹកប្រាក់ជាច្រើន សម្រាប់ការវិនិយោគលើការបណ្ដុះបណ្ដាលបច្ចេកទេស និងជំនាញផ្សេងៗដល់បុគ្គលិក និងសិស្សនិស្សិតតាមសាលាបច្ចេកទេសនានា ដើម្បីទទួលបានឱកាសមកសិក្សា និងអនុវត្តន៍ផ្ទាល់ ជាមួយអ្នកឯកទេសរបស់យើងនៅតាមបណ្ដាក្រុមហ៊ុននានាដែលជាបុត្រសម្ព័ន្ធរបស់ក្រុមហ៊ុន អ អិម អេ ខេមបូឌា។ តាមរយៈការវិនិយោគទៅលើវិស័យធនធានមនុស្សដូចដែលបានរៀបរាប់ខាងលើនេះហើយដែលជាកត្តាជុំរុញឲ្យកកើតឡើងនូវមជ្ឈមណ្ឌលបណ្តុះបណ្តាលបច្ចេកទេសរថយន្ត ហ្វដ-ធី អេស អាយ នេះលេចចេញជារូបរាងឡើង។

ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានមានប្រសាសន៍ថា៖ “កាលពីថ្ងៃទី០៩ ខែកញ្ញា ឆ្នាំ២០២១ វិទ្យាស្ថានបានចុះអនុស្សារណៈ នៃការយោគយល់គ្នាជាមួយក្រុមហ៊ុន អ អិម អេ (ខេមបូឌា) លើក្របខណ្ឌកិច្ចសហប្រតិបត្ដិការអប់រំបណ្ដុះបណ្ដាលបច្ចេកទេសរយៈពេល ៥ឆ្នាំ។ ជាសមិទ្ធិផល នៃការចុះអនុស្សារណៈ នៃការយោគយល់នេះ ក្រុមហ៊ុន អ អិម អេ (ខេមបូឌា) បានជួយជាសម្ភារៈបច្ចេកទេស មកដល់វិទ្យាស្ថានតេជោសែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន ក្នុងការរៀបចំ និងធ្វើនវានុវត្ដ អគារមួយកន្លែងរបស់ក្រសួងសាធារណការ និងដឹកជញ្ជូន ទៅជាមជ្ឈមណ្ឌលបណ្ដុះបណ្ដាលបច្ចេកទេស ហ្វដ-ធី អេស អាយ។ ក្រៅពីវគ្គបណ្ដុះបណ្ដាលជំនាញបច្ចេកទេសយានយន្ដ មជ្ឈមណ្ឌលក៏មានគម្រោងបង្រៀនវគ្គខ្លីៗ ដូចជា៖ ការបើកបរ Forklift ការបើកបរគ្រឿងចក្រធន់ធ្ងន់ និងការថែទាំគ្រឿងចក្រទាំងអស់នោះផងដែរ”។

លោកស្រី Dianne Craig អគ្គនាយិកាគ្រប់គ្រងក្រុមទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ខ្ញុំពិតជាមានសេចក្តីសោមនស្សរីករាយ និងគាំទ្រជាខ្លាំងចំពោះគំនិតផ្តួចផ្តើមរបស់ក្រុមហ៊ុន អ អិម អេ (ខេមបូឌា) ក្នុងការជ្រើសរើសយករថយន្ត Ford Ranger ស៊េរីថ្មីឆ្នាំ ២០២៣ ឧបត្ថម្ភជូនដល់វិទ្យាស្ថានតេជោសែន សាធារណការ និងដឹកជញ្ជូន ដែលនេះជាឱកាសមួយដ៏ល្អសម្រាប់ឲ្យសិស្ស និស្សិតក្នុងការរៀន និងស្វែងយល់ពីគ្រឿងបង្គំ ប្រព័ន្ធជើងក្រោម ប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយនៃ Ford Ranger ស៊េរីថ្មីឆ្នាំ ២០២៣ នេះ”។

លោក Benjamin V. Wohlauer ភារធារីនៃស្ថានទូតអាមេរិកប្រចាំព្រះរាជាណាចក្រកម្ពុជា បានមានប្រសាសន៍ថា៖ “ខ្ញុំមានមោទនភាពចំពោះក្រុមហ៊ុន អ អិម អេ (ខេមបូឌា) ក្នុងការឧបត្ថម្ភរថយន្តហ្វដចំនួន ១គ្រឿង និងបង្កើតមជ្ឈមណ្ឌលបណ្តុះបណ្តាលបច្ចេកទេសរថយន្ត ហ្វដ-ធី អេស អាយ នេះឡើងដែលវាជាការអភិវឌ្ឍបន្ថែមទៅលើការអប់រំវិជ្ជាជីវៈ កម្លាំងពលកម្ម ការអភិវឌ្ឍសេដ្ឋកិច្ចនៅព្រះរាជាណាចក្រកម្ពុជា ក៏ដូចជាបានជម្រុញភាពជាដៃគូ និងកិច្ចសហប្រតិបត្តិការរវាងសហរដ្ឋអាមេរិក និងព្រះរាជាណាចក្រកម្ពុជា”។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន បានមានប្រសាសន៍ថា៖ “តាមរយៈកិច្ចសហប្រតិបត្ដិការ រវាង វិទ្យាស្ថានតេជោសែន សាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន និង ក្រុមហ៊ុន អ អិម អេ (ខេមបូឌា) និងតាមរយៈមជ្ឍមណ្ឌលបណ្ដុះបណ្ដាលបច្ចេកទេស ហ្វដ-ធី អេស អាយ នេះ ឯកឧត្ដមទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន សង្ឃឹមយ៉ាងមុតមាំថា បញ្ហាកង្វះខាតធនធានមនុស្សលើបច្ចេកទេសជួសជុលយានយន្ត ក៏ដូចជាកង្វះខាតធនធានមនុស្សតាមយានដ្ឋាន នានា នឹងត្រូវបានដោះស្រាយ ហើយសិក្ខាកាម និងនិស្សិត ដែលបានចូលរៀននៅមជ្ឈមណ្ឌលនេះនឹងទទួលបានចំណេះដឹងច្បាស់លាស់ និងអាចមានសមត្ថភាពតម្លើងរថយន្ត បម្រើការនៅតាមយានដ្ឋាន ឬ គ្រប់គ្រងយានដ្ឋានដោយផ្ទាល់បាន។ ការដែលមានជំនាញវិជ្ជាជីវៈ និងបច្ចេកទេសយានយន្ដ ច្បាស់លាស់នេះ ក៏នឹងអាចចូលរួមចំណែកដល់ការកាត់បន្ថយការកែច្នៃ ការដំឡើងយានយន្ដ ខុសបច្ចេកទេសគ្មានគុណភាព និងកាត់បន្ថយគ្រោះថ្នាក់ចរាចរណ៍តាមដងផ្លូវ ព្រោះថា នៅពេលដែលយានយន្ដត្រូវបានដំឡើង ត្រូវបានជួសជុល និងត្រូវបានថែទាំ ដោយអ្នកជំនាញវិជ្ជាជីវៈ នោះបញ្ហាបច្ចេកទេស ដែលអាចមានជាយថាហេតុ នៅលើដងផ្លូវក៏ត្រូវបានកាត់បន្ថយបណ្ដើរៗ ផងដែរ”។

June 20, 2022

ក្រុមហ៊ុនផលិតរថយន្តអគ្គិសនីចិន ដែលជិតយកឈ្នះលើ Tesla គឺជាក្រុមហ៊ុនដែលធ្លាប់ត្រូវ Elon Musk សើចចំអក និងទទួលបានការជួយជ្រោមជ្រែងពីមហាសេដ្ឋីអាម៉េរិក

លោក Elon Musk ពេលនេះទំនងជាមិនអាចក្រអឺតក្រទម ឬមើលស្រាលក្រុមហ៊ុនផលិតរថយន្តអគ្គិសនីចិនមួយនេះបានទៀតឡើយ។

ជាងមួយទសវត្សរ៍មុន មហាសេដ្ឋី Elon Musk ធ្លាប់សើចចំអកចំពោះគំនិតដែលនិយាយថា ក្រុមហ៊ុនផលិតរថយន្តអគ្គិសនី BYD របស់ ចិន គឺជាគូប្រជែងគួរឱ្យញញើតរបស់ Tesla។ ប៉ុន្តែ ការក្រអឺតក្រទមរបស់មហាសេដ្ឋីរូបនេះ បច្ចុប្បន្នហាក់បានថយចុះច្រើន។

ពេលនេះ BYD ដែលទទួលបានការគាំទ្រពី មហាសេដ្ឋីអាម៉េរិក លោក Warren Buffett កំពុងតែត្រៀមខ្លួនផ្ដួលគូប្រជែងរបស់ខ្លួននៅលើ ទឹកដីចិន នោះគឺ Tesla។ កាលពីសប្ដាហ៍កន្លង នាយកប្រតិបត្តិមួយរូបរបស់ BYD បាននិយាយថា ក្រុមហ៊ុនរបស់គាត់កំពុងតែ «ត្រៀមផ្គត់ផ្គង់ថ្មឱ្យ Tesla ក្នុងពេលឆាប់ៗខាងមុខ»។ កិច្ចព្រមព្រៀងនេះនឹងអាចនាំឱ្យ BYD ក្លាយជាក្រុមហ៊ុនមួយក្នុងចំណោមក្រុមហ៊ុនផលិតថ្ម និងរថយន្តអគ្គិសនីលេចធ្លោ និងធំជាងគេក្នុងពិភពលោក។

ពីរឆ្នាំកន្លងទៅ BYD បានផលិតរថយន្តអគ្គិសនី និងថ្ម lithium បច្ចេកវិទ្យាខ្ពស់ជាងមុន អនុញ្ញាតឱ្យពួកគេគ្រប់គ្រងទីផ្សារពិភពលោកបានមួយភាគធំ។ BYD មានគម្រោងលក់រថយន្តអគ្គិសនី ១.៥ លានគ្រឿងក្នុងឆ្នាំ ២០២២ ដែលនេះនឹងជួយឱ្យក្រុមហ៊ុនឆ្ពោះទៅជិតដល់គោលដៅកាន់កាប់ ១/៣ នៃចំណែកទីផ្សាររថយន្តអគ្គិសនីនៅ ប្រទេសចិន នៅចុងឆ្នាំនេះ។

កាលពីខែមេសាកន្លងទៅ BYD ជាប់ចំណាត់ថ្នាក់លេខមួយ ក្នុងចំណោមក្រុមហ៊ុនផលិតរថយន្តអគ្គិសនីលំដាប់កំពូលៗ បើគិតទៅតាមចំនួនរថយន្តដែលបានលក់ចេញ និងក្លាយជាក្រុមហ៊ុនផលិតរថយន្តធំជាងគេលំដាប់ទីបីក្នុងពិភពលោក បើគិតទៅតាមតម្លៃមូលធនទីផ្សារ។ ក្នុងខែមេសា BYD បានលក់រថយន្តអគ្គិសនីជាង ៤៦,០០០ គ្រឿង (Tesla លក់បាន ១,៧២៨ គ្រឿង) និងបានប្រកាសឈប់ផលិតរថយន្តប្រើប្រេងសាំង។ ខែឧសភា កំណើននៃការលក់រថយន្តអគ្គិសនីរបស់ក្រុមហ៊ុន BYD ក៏បានកើនឡើង ២៥០% ធៀបនឹងមួយឆ្នាំមុននោះ។

កិច្ចព្រមព្រៀងរវាង BYD និង Tesla នៅមិនទាន់មានភាពច្បាស់លាស់នៅឡើយ ប៉ុន្តែ ក្រុមហ៊ុនចិន មួយនេះអាចផ្គត់ផ្គង់ថ្ម Blade ដល់ Tesla។

BYD កំពុងតែធ្វើអ្វីៗដែល Tesla ចង់ធ្វើ ៖ ផលិតថ្ម និងធានាប្រភពផ្គត់ផ្គង់។ BYD ក៏សម្រេចបាននូវគោលដៅរបស់ខ្លួន នោះគឺ «ក្លាយជាក្រុមហ៊ុនផលិតរថយន្តអគ្គិសនីធំជាងគេមួយនៅក្នុងពិភពលោក។ ថ្វីបើរថយន្តរបស់ BYD មិនទាន់មានបច្ចេកវិទ្យាទំនើបខ្លាំង ឬរូបរាងមិនទាន់សម័យខ្លាំងដូច Tesla ប៉ុន្តែ ពួកវានៅតែទទួលបានការគាំទ្រច្រើន និងជាហូរហែ។ បច្ចុប្បន្ន ថ្មរបស់ BYD ក៏ត្រូវបានប្រើប្រាស់នៅលើរថយន្ត Tesla។

ទោះជាយ៉ាងណាក៏ដោយ BYD នឹងអាចដើរមិនទាន់គេ បើសិន CATL (Contemporary Amperex Technology Co. Limited) ដែលជាក្រុមហ៊ុនផលិតថ្មធំជាងគេក្នុងពិភពលោក និងបណ្ដាក្រុមហ៊ុននានានៅ កូរ៉េខាងត្បូង ប្រឹងប្រែងជំរុញការប្រើប្រាស់ថ្មដែលមានថាមពលខ្ពស់ជាង។

ក្រុមហ៊ុនចិន BYD បន្តពង្រីកមូលដ្ឋានអតិថិជនរបស់ខ្លួន ដោយផ្គត់ផ្គង់ថ្មដែលមានរូបរាងជាដំបង (ប្រភេទដែលដូចទៅនឹងថ្មដែល Tesla កំពុងប្រើប្រាស់) ឱ្យ BMW AG ដោយបំបាត់ថ្មដែលមានរូបរាងជ្រុង។

សូម្បីតែនៅពេល CATL មិនទទួលបានជោគជ័យ BYD ក៏នៅតែទទួលបានផលចំណេញពីយុទ្ធសាស្ត្រមួយដែលមានចក្ខុវិស័យវែងឆ្ងាយ និងត្រូវបានអនុវត្តប្រកបដោយប្រសិទ្ធភាព។ ប្រការនេះទំនងជាអាចជួយឱ្យ BYD យកឈ្នះលើ Telsa នៅថ្ងៃណាមួយមិនខាន៕

June 20, 2022

មេទ័ពរបស់ អង់គ្លេស ថា កងទ័ពជើងគោកត្រូវតែត្រៀមខ្លួនឱ្យបានរួចរាល់សម្រាប់ចូលរួមប្រយុទ្ធប្រឆាំង រុស្ស៊ី ពេលសង្គ្រាមលោកលើកទី ៣ កើតឡើង

អគ្គមេបញ្ជាការកងទ័ពជើងគោកថ្មី របស់ ប្រទេសអង់គ្លេស ថ្មីៗនេះបានប្រកាសថា ទាហានអង់គ្លេសត្រូវតែត្រៀមខ្លួនឱ្យបានរួចរាល់សម្រាប់លទ្ធភាពប្រយុទ្ធនៅលើទឹកដីរបស់ អឺរ៉ុប និងយកឈ្នះលើ កងទ័ពរុស្ស៊ី នៅក្នុងសង្គ្រាមលោកលើកទី ។

ក្រោយពីបានស្បថចូលកាន់តំណែងជាអគ្គមេបញ្ជាការ ឧត្តមសេនីយ៍ Patrick Sanders បានសរសើរលិខិតផ្ញើជូនទាហានក្រោមឱវាទ។ លិខិតដែលបានផ្ញើកាលពីថ្ងៃទី ១៦ មិថុនា មានឃ្លាសរសេរថា «បច្ចុប្បន្ន មានតម្រូវការបន្ទាន់គឺ ការកសាងកម្លាំងជើងគោកមួយដែលមានសមត្ថភាពប្រយុទ្ធទន្ទឹមគ្នានឹងសម្ព័ន្ធមិត្តរបស់យើង និងផ្ដួល រុស្ស៊ី នៅលើសមរភូមិ។ យើងគឺជាជំនាន់មនុស្សដែលត្រូវត្រៀមខ្លួនសម្រាប់ការធ្វើសង្គ្រាមជាថ្មីនៅលើទឹកដី អឺរ៉ុប»។

ឧត្តមសេនីយ៍អង់គ្លេស វ័យ ៥៦ ឆ្នាំរូបនេះ យល់ថា សង្គ្រាមនៅ អ៊ុយក្រែន បានបញ្ជាក់ថា «តួនាទីស្នូល» នៃ កងទ័ពជើងគោកអង់គ្លេស គឺការការពារ ប្រទេសអង់គ្លេស ដោយការត្រៀមខ្លួនរួចរាល់សម្រាប់ការប្រយុទ្ធ និងដណ្ដើមយកជ័យជម្នះនៅលើដីគោក។

អគ្គមេបញ្ជាការកងទ័ពរបស់ អង់គ្លេស ឧត្តមសេនីយ៍ Patrick Sanders

លោក Sanders ឱ្យដឹងថា លោកគឺជា ប្រធានអគ្គសេនាធិការដំបូងរបស់ អង់គ្លេស រាប់ចាប់តាំងពីឆ្នាំ ១៩៤១ ដែលទទួលបន្ទុកគ្រប់គ្រងកងទ័ពជើងគោកអង់គ្លេស ក្នុងស្ថានការណ៍សង្គ្រាមលើដីគោកនៅ អឺរ៉ុប មានការចូលរួមពីមហាអំណាចដីគោកមួយ។

ឧត្តមសេនីយ៍ Sanders ធ្លាប់ដឹកនាំបេសកកម្មប្រយុទ្ធនៅ អៀឡង់ខាងជើង, កូសូវ៉ូ, អ៊ីរ៉ាក់ និង អាហ្វហ្គានីស្ថាន។ លោកសន្យាថា នឹងជំរុញការធ្វើទំនើបកម្មយោធាក្នុងជួរកងទ័ពជើងគោករបស់ អង់គ្លេស និងបញ្ជូនកម្លាំងទៅបរទេសឱ្យបានញឹកញាប់ជាងមុន ដើម្បីអាចប្រតិកម្មបានរហ័សនៅចំពោះមុខវិបត្តិសង្គ្រាមនានា។

ព័ត៌មានខាងលើត្រូវបានលើកឡើងបន្ទាប់ពី នាយករដ្ឋមន្ត្រីអង់គ្លេស លោក ចនសុន ទើបតែត្រលប់មកពី ប្រទេសអ៊ុយក្រែន និងបានព្រមានឱ្យ ជនជាតិអង់គ្លេស ត្រៀមខ្លួនសម្រាប់ «សង្គ្រាមយូរអង្វែង» នៅ អ៊ុយក្រែន៕

June 20, 2022

Author: សឿន សំណាង